Monday, December 11, 2017

MO aanza na KIUNGO mzambia

 

By Thobias Sebastian, Mwananchi

Kama ulidhani Mohamed Dewji “MO” anatania, basi umeula wa chuya; ameliamsha dude.

Juzi Mo alitangazwa kuwa mshindi wa zabuni ya hisa za kuwa mmiliki mwenza wa klabu ya Simba akimiliki asilimia 50 na hivyo kuwa na haki ya kuingiza wajumbe saba kati ya 14 kwenye bodi ya uendeshaji klabu. Saba wengine wanawakilisha wanachama. Hiyo ndiyo Simba.

MO anataka kuifanya Simba kuwa klabu kubwa, tajiri na yenye kukusanya mataji. Wanaokusanya mataji ni wachezaji na Mo ameanza kwa kumtazama Jonas Sakuhawa kutoka Zambia.

Simba mwakani watashiriki michuano ya Kombe la Shirikisho Afrika baada ya kukosekana kwa takriban miaka mitano baada ya mara ya mwisho kufanya hivyo ilikuwa 2012.

Lakini msimu huu wameanza kujipanga mapema kwa kusajili wachezaji ili kuboresha kikosi chao ambacho kitakwenda kwenye michuano hiyo kwa kutaka kusajili wachezaji wa maana ambao wanatajwa.

Majaribio

Simba imemleta winga Mzambia Jonas Sakuhawa ambaye yupo katika majaribio kwenye kikosi cha Joseph Omog ambacho hakijaonja ubingwa wa Ligi Kuu kwa miaka mitano.

Sakuhawa alizaliwa Julai 22, 1983 Kafue Zambia anacheza kama mshambuliaji wa kati au pembeni na amecheza timu kubwa Afrika na hata Ulaya pia.

Alianzia klabu ya Zesco United 2006-09, baadaye alikwenda Lorient ya Ufaransa ambako alicheza mechi 14 kati ya 2009-10 bila kufunga na mwisho wa msimu huo alikwenda kwa mkopo Le Havre pia ya Ufaransa.

Alijiunga na Al-Merreikh ya Sudan msimu wa 2011-12, kabla ya kutimkia zake TP Mazembe msimu wa 2013-14 na mwaka 2015 alirudi kwao Zambia na kujiunga na Zesco na sasa ametua Simba kwa majaribio.

Mkali wa mabao

Akiwa kikosi cha Al-Merreikh alicheza mechi 33 na kufunga magoli 22 na alipokuwa TP Mazembe alicheza mechi 29 na kufunga magoli 14. Kwa ujumla amecheza mechi 62 na kufunga magoli 36.

Sakuhawa ana wastani wa kufunga goli kila baada ya mechi mbili ambazo amecheza kwahiyo kama atakuwa na uwezo kama huo anaweza kuisaidia Simba yenye shida ya wafungaji.

Anavyocheza

Tangu atue Simba takriban wiki moja iliyopita, Sakuhawa amefanya mazoezi chini ya kocha msaidizi Mrundi Masoud Djuma aliyeshika nafasi ya Omog ambaye hayupo.

Muda wote aliokuwepo hapa nchini, Sakuhawa amefanya mazoezi vizuri na Simba kwenye Uwanja wa Chuo cha Polisi, Kurasini na alikuwa anaonyesha ana kitu cha ziada.

Sakuhawa amefanya mazoezi na Simba siku tano lakini ameonyesha utulivu, umakini uzoefu na amekuwa akifunga mara kwa mara katika mazoezi ya kufunga ambayo anapewa na Djuma.

Kiwanja chamzingua

Sakuhawa anasema amekuja moja ya timu kubwa barani Afrika kwa kuwa alikuwa akiisikia Simba. Lakini amekutana na changamoto ya uwanja ambao wanatumia kufanyia mazoezi. “Uwanja si mzuri hasa eneo la kucheza kama huko ambako nimetoka, lakini nitajitahidi kuonyesha kile ambacho ninacho katika siku zote ambazo nitakuwa nafanya majaribio hapa na kocha naimani anaweza kuona uwezo wangu licha ya changamoto hiyo,” anasema.

“Kama nikipata nafasi ya kucheza katika kiwanja ambacho kinaeneo zuri la kuchezea ninaimani nitaonyesha zaidi uwezo niliokuwa nao,” aliongezea Sakuhawa ambaye yuko katika wiki ya mwisho ya majaribio yake.

Liuzio awashtua Simba

Straika wa Simba Juma Liuzio, ambaye amekuwa na nafasi finyu ya kucheza mara kwa mara katika kikosi hicho msimu huu, alisema Sakuhawa ni mchezaji mzuri ambaye alishawahi kucheza naye Zesco United.

Liuzio anasema Sakuhawa ni mzoefu na alikuwa akicheza vizuri katika kikosi cha Zesco ambacho kilikuwa chini ya kocha George Lwandamina ambaye kwa sasa anainoa Yanga.

“Sakuhawa alikuwepo wakati Zesco inafika nusu fainali ya Ligi ya Mabingwa Afrika na kutolewa na Mamelod Sundowns, kwa hiyo si mchezaji wa kumbeza ingawa sijamuona siku nyingi tangu mimi nilipoondoka Zambia,” anasema Liuzio.

Monday, December 11, 2017

Eliuter: Viongozi Friends waliniwekea mizengwe

 

By Eliya Solomon, Mwananchi

Mshambuliaji Eliuter Mpepo amekuwa mchezaji muhimu kwenye kikosi cha Tanzania Prisons na ameonekana kutolewa macho na vigogo wa soka kutokana na uwezo wake katika ushambuliaji.

Mpepo (20) ameichezea Prisons mechi saba na kufunga mabao matatu, likiwemo bao maarufu alilomfunga kipa wa Yanga, Youth Rostand wakati timu hizo zilipofungana bao 1-1.

Kabla ya kutua Tanzania Prisons, mshambuliaji huyo amezichezea Kinyerezi United, Friends Rangers na Mbeya Kwanza.

Hata hivyo, Mpepo anasema hawezi kusahau mazingira aliyopitia akiwa Friends Rangers.

“Ulifika wakati nikaanza kuwaza kuachana na soka. Nilivyojiunga na Friends kuna baadhi ya viongozi walikuwa hawanipendi kabisa hivyo walinitengenezea zengwe kwa hata kupandikiza chuki kwa mashabiki,” anasema Mpepo..

“Kwa kweli walifanikiwa maana kila nilipokuwa ninaingia uwanjani nilikuwa ninazomewa. Nilishindwa kumudu hali ya kuzomewa hadi ikaanza kuathiri uwezo wangu wa kawaida uwanjani. Nilipiga moyo konde na kuushinda ule mtiani.”

Pamoja na kuonekana kuwa mmoja wa washambuliaji hatari kwa sasa, Mpepo anasema hana tatizo wala mapenzi kati ya Simba na Yanga kama ukitokea upande wowote kumwitaji atakuwa tayari kuusikiliza.

“Ninafanya kazi popote bila ya kuhofia chochote,” anasema.

“Ninaweza kucheza Simba na hata Yanga kama wakinihitaji. Ninamshukuru sana kocha wangu wa Tanzania Prisons, Abdallah Mohammed kwa kuniamini na kunipa nafasi.”

Mbali na kocha wake, Mpepo aliwataja watu wengine ambao wamechangia kukua kwake kisoka ambao ni Kivunje, Olenjo, Mwenjala na Henry Mzozo.

“Kivunje alinifundisha mpira Kinyerezi pia nilikuwa nikipewa sana moyo wakati napitia magumu na familia ya Mr Mwambete, Nguvumali, Shiraz Batchu na kaka yangu Justin, bila hao ingekuwa ngumu kufika hapa nilipo,” anasema.

Hata hivyo, mshambuliaji huyo mwenye uwezo wa kucheza nafasi zote za ushambuliaji, alisema kama si soka anaamini kuwa kazi ya ununuzi na ugavi ingemtoa kimaisha kwa sababu ni kazi ambayo ameisomea.

Monday, December 11, 2017

Msuva, utafika tu muda wa WEWE kujidai

 

Mchana mmoja kwenye mitandao ya kijamii zilisambaa picha zikimwonyesha Saimon Msuva akiwa eneo la hoteli ya kisasa. Msuva anaonekana amevalia suti nadhifu mithili ya kijana anayeelekea kutoa posa kwenye nyumba ya kifalme.

Bandiko hili liliambatana na maneno kuwa Msuva alikuwa kwenye harakati za majaribio na klabu moja inayoshiriki Ligi Kuu ya Hispania yaani La Liga.

Haikuteka akili yangu kwa kiasi kikubwa kwa sababu mawazo yangu yaliniambia pengine ilikuwa mapema kupita kiasi kwa suala lile kutokea huku nikiamini Msuva alikuwa bado na muda wa kufanya makubwa na klabu yake mpya ya Difaa El Jadidi, hivyo isingeweza kumruhusu mapema kiasi hiki kuondoka wakati akiwa ndio kwanza ameanza kuingia kwenye mfumo wao.

Bahati nzuri sikuwa mbali na taarifa zinazomuhusu hivyo nikafanya jitihada kupata ukweli wa mambo na kupitia vyanzo vinavyoaminika, kijana huyu wa Kitanzania ambaye alikacha fani ya “Mosses Iyobo wa WCB” na kuamua kutumia miguu yake kutafuta unga, alikanusha taarifa hiyo na kuweka bayana kuwa bado alikuwa na kazi ya kufanya pale Morocco. Ndio alikuwa bado na kazi ya kumfanya kocha Abderrahim Taleb kuamini katika miguu yake zaidi ya ilivyokuwa kawaida.

Ndani ya kikosi cha El Jadidi ama El Jadida kama wengine wanavyoita kutokana na eneo inapotokea, Msuva anasimama kama moja ya wachezaji muhimu kwa sasa, jambo ambalo hakuna aliyetarajia lingetokea kwa haraka kiasi hiki. Ndani ya ubongo wowote unaowaza vyema basi utagundua kuwa kuna vipaji vingi Tanzania ambavyo iwapo vikipata macho basi vitaona malisho mengi na ardhi zenye rutuba nje ya hii inayoitwa Tanzania.

Safari ya Msuva ambayo wengi hatutaki iwe na kugota, inatakiwa iwe mfano kwa wengi ambao walihisi Mbwana Samatta alikuwa na “bahati ya maisha.”

Kwenye karatasi yoyote ambayo utaandika vikosi ama majina ya wachezaji wa Tanzania, ni wazi kuwa utapata majina kama Ibrahim Ajib, Mo Ibrahim, Said Ndemla, Shaban Idd, Ramadhani Singano, Shiza Kichuya, Raphael Daudi na wengine wengi kuwa wana vipaji vya asili kuliko Msuva, lakini mwenzao huyu ana Baraka moja ambayo hawa wameshindwa kuishughulikia nayo; kujituma na kufahamu wanachotaka.

Inawezekana katika kundi hili bado wengi wana nafasi ya kufanya makubwa, lakini maisha ya Msuva ndani ya Ligi Kuu ya Vodacom na upinzani aliowahi kupata inakupa picha ni moyo wa aina ipi aliokuwa nao.

Kwenye michezo na hata maisha si kila binadamu huzaliwa na hulka ya kuwa mshindi au kuwa na roho ngumu na ndio maana si ajabu kwenye mpira wa kikapu kusikia kauli inayomsema Lebron James kuwa hakuzaliwa na roho ya kikatili ndani ya uwanja kama Michael Jordan au Kobe Bryant ambao waliweza kusaka ushindi vyovyote vile.

Lebron ilibidi ajifunze hili kwa kuishi jirani na washindi kama Dwayne Wade alipokwenda Miami Heat. Hivyo inawezakana pia Ajib asiwe na roho ya Msuva, lakini akawa na nafasi ya kujifunza. Swali pekee linabaki kuwa yupo tayari?

Moyoni mwangu na roho yangu ya Kizalendo ninaona kabisa maisha yetu kwa maana ya idadi na majaaliwa ya vipaji yapo katika sehemu na mlengo mzuri. Wachezaji wameanza kupata tamaa na msukumo wa kufika mbali na kufanya makubwa.

Huku kukiwa na taarifa za Himid Mao kutakiwa na Afrika Kusini ambako ataungana na Abdi Banda, idadi ya “maprofeshino” itapendeza zaidi pale majina ya Said Ndemla na Kichuya yakitoka kama inavyoendelea kutajwa ili kuendelea kufumbua macho ya wachezaji kama Mbaraka Yusuph ambaye ana nukuu ya kusikitisha ya kutoona umuhimu wa ligi za nje.

Nikiwa katika furaha na nikiwa na kusudio la kuonyesha umuhimu wa kuendelea “kuwafungulia njia” vijana wetu pale tunapopata nafasi, mikono yangu ilikuwa kwenye mtandao na nilikuwa natazama namna ligi ya Morocco inavyoendelea, Simon Msuva amenifanya niwe shabiki wao.

Hakuna sababu ya kuchambua umuhimu wa Mohamed Salah ndani ya Liverpool bila kutaka kufahamu ni kwanini Msuva ameanza kufanya makubwa kila akiitwa Taifa Stars.

Mpaka makala haya yanaenda kuchapishwa, kikosi anachochezea Msuva cha Difaa El Jadida kilikuwa kwenye nafasi ya tatu Ligi Kuu ya Morocco, maarufu kwa jina la Botola.

Ikiwa na pointi 14, El Jadida ilikuwa imefunga mabao 14, huku matano yakiwa yamefungwa na mchezaji wao Bilal El Megri na Msuva akiwa miongoni mwa wachezaji watatu waliofunga mabao mawili kila mmoja.

Kwa tafsiri nyingine ni kuwa Msuva ni miongoni mwa wachezaji wanaotegemewa katika kikosi cha kocha Abderrahim Talib.

Ukitazama namna ya mgawanyo wa mabao mpaka hapo maana yake ni kuwa kikosi chao kina mfumo ambao ni “free flowing” yaani mfumo huru ambao unatoa nafasi kwa wachezaji wengi kufunga mabao mengi.

Mfumo huu unarahisisha wachezaji kama Msuva wanaopenda kufunga wakitokea pembeni kupata faida na kuendelea kukomaa zaidi na hii inaweza kuwa faida kubwa kwa Msuva ambaye alipewa majukumu haya toka akiwa na kikosi cha Yanga, hii ni baraka kwake.

Si muda mrefu sasa tutakuwa tunaita kikosi cha Taifa Stars na majina mengi yakiwa ni yale yanayocheza nje ya ligi yetu. Ukomavu wa Banda unakupa sababu ya kwanini wachezaji hawatakiwi kuwa ndani, huku ufungaji wa Msuva ndani ya Taifa ni mabadiliko ya muda mfupi ambayo tunaombea yaendelee kuongezeka afike League One pale Ufaransa, ambako kutokea Morocco ni rahisi zaidi.

Naamini moyo wa Msuva ni wa kupigana. Naamini ni mshindi na ninaamini ni mwanaume wa shoka. Alikuwa na ndoto za kucheza soka la kulipwa, zimetimia. Sasa nataka arudi kitandani aweze kuanza kuota ligi kubwa zaidi kwam kuwa Ufaransa na La Liga kunafikika.

Hongera Msuva. Wenzio waanze kukutamani kila ukipiga hatua maana itasaidia Taifa kwa ujumla.

Monday, December 11, 2017

Yuko akademi Marekani lakini ndoto yake ni Taifa Stars

 

By Eliya Solomon, Mwananchi

jambo ambalo linaweza kuwa linamrahisishia kazi kocha wa Taifa Stars, Salum Mayanga utayari wa wachezaji wanaosakata soka nje ya nchi kuja kulitumikia taifa lao.

Na Spoti Mikiki imechangia kuonyesha baadhi ya wachezaji walio nje, hasa Hamis Abdallah (Sony Sugar),Abdul Hilal (Tusker) na Aman Kyata (Chemelil) za Kenya ambao wameanza kuitwa kulitumikia taifa lao kwenye kikosi cha timu ya Taifa.

Wiki iliyopita tuliona safari ya Yusuf Juma ambaye anaichezea Monroe SC, tangu ilivyoanzia mkoani Kigoma hadi Marekani ambako nako yuko mbioni kuondoka kutokana na kuhitaji sana kwake kucheza barani Ulaya akizipigia hesabu Arsenal na Chelsea.

Wiki hii tunaye mdogo wake, Abdallah Juma (16) ambaye yupo kwenye kituo cha New England Revolution akipatiwa misingi ya mpira kabla ya kuanza kucheza soka la ushindani.

Abdallah anakaribia kutimiza miaka 16 hivi karibuni ameongea na gazeti hili kutoka kwenye kambi ya kituo hicho iliyopo Florida, Marekani na kusema japo amekulia Marekani lakini anatamani kuanza kuzichezea timu za vijana za nchi yake ya Tanzania.

“Kucheza timu za vijana kuna umuhimu wake, inategemea na mipango ya makocha husika ambao nadhani wamekuwa wakiita wachezaji kutokana na mahitaji yao, nipo kwenye hiki kituo ila natamani kuzichezea timu za vijana za Tanzania.

“Nilitoka Tanzania na kuja huku Marekani na familia yangu nikiwa mdogo sana, sina kumbukumbu nyingi kuhusu nchi yangu ila ninachojua, mimi ni Mtanzania, kukulia kwangu Marekani hakunifanyi niwe na uamuzi wa kuwa raia wa huku.

“Ndoto yangu ni kuwa mchezaji mkubwa ili nilisaidie pia Taifa langu la Tanzania kwenye ngazi tofauti za timu za Taifa,hata kama ikitokea nimeshawishiwa kuachana na Tanzania na kuichezea Marekani sintokuwa tayari,” anasema Abdallah.

Ameendelea.”Ujinga ni kuisaliti nchi yako, hakuna sababu ya kunifanya niisaliti Tanzania na natamani sana siku nikipata nafasi nirudi ili nilione vizuri Taifa langu, maana nasikia kwanza lina vivutio vingi vya Utalii,”

Abdallah ambaye anamudu kucheza kwenye nafasi ya kiungo mshambuliaji, amesema namna soka la kufundishwa linavyoweza kumfanya mchezaji kuwa bora zaidi.

“Kila siku tunausoma mpira ambao unamambo mengi, sio kuucheza tu uwanjani, mchezaji kwenye kituo chochote cha soka huwa anaandaliwa kuja kuwa mchezaji wa kulipwa hivyo kuna vitu vya ziada anavipata ikiwemo kucheza kwa nidhamu.

“Ukikizoea kitu basi utakuwa unakifanya kwa umakini, kadri unavyosisitiziwa nidhamu na kuifanyia kazi kila siku inakujenga mchezaji, sio nidhamu pekee pia kuna mbinu mbalimbali za mpira na mengineyo mengi ambayo mchezaji binafsi anatakiwa kuwa nayo.

“Mwenye kipaji halisia akiongezea na maarifa ya kwenye kituo cha mpira basi ni wazi huyo mchezaji atakuwa na uwezo mara mbili, yule ambaye anakipaji na hata hajapitia kwenye kituo atakuwa na uwezo mara moja labla kipaji chake kiwe cha hali ya juu,” anasema.

Mdogo huyo wa Yusuf,amesema kuwa anasimamiwa na kaka yake hivyo suala la wapi anategemea kucheza kama akipevuka kwenye kituo hicho alishindwa kutoa jibu la moja kwa moja na mwishowe kumsukumia Hamis ambaye ni kaka yake mkubwa.

“Kaka Hamis ndiyo anaweza kuzungumzia hilo vizuri, nipo kwenye hiki kituo yeye ndiye anafanya mipango nje ya kutusimamia pamoja na kaka yangu mwingine Yusuf hivyo siwezi kulizungumzia hilo sana.

“Ila natamani zaidi kucheza Ulaya, soka la Ulaya linamvuto zaidi na hata ushindani wake ni mkubwa kama utalinganisha na huku,” anasema kiungo huyo mchezeshaji.

Hamis, akimzungumzia mdogo wake, Abdallah anaeleza namna ambavyo anaweza kumudu kuwasimamia wadogo zake pamoja na mipango yake kwa ujumla ilivyo.

“Soko la mpira wa Ulaya linalipa hivyo nimeopanga kujikita zaidi na Ulaya, Yusuf nimeshafanya mpango kwa kuzungumza na timu kadhaa ambazo atakwenda kufanya majaribio mwenzi,Januari.

“Abdallah yupo kwenye kituo sina haraka naye maana anamuda wa kuendelea kujifunza, atakapomaliza mafunzo yake tutaangalia ni wapi patakuwa sehemu sahihi kwake, kinachonipa faraja ni kuwa wote wawili wanauwezo mkubwa.

“Kama misingi ya mpira wanayo kwa hiyo hata kwenye kufanya majaribio hawawezi kukwama kabisa kwa kukosa timu za kuzichezea, kikubwa tuombe uzima,” anasema kaka huyo.

Monday, December 11, 2017

BAADA YA BAO Tino: Joel Bendera alinibeba mgongoni Zambia

 

By Imani Makongoro, Mwananchi imakongoro@mwananchi.co.tz

Kocha Joel Bendera ametangulia na jana Jumapili alipumzishwa katika nyumba yake ya milele wilayani Korogwe, lakini ameondoka na historia yake tamu ambayo nyota wa zamani wa Taifa Stars, Peter Tino anasema kama sio Bendera, Taanzania isingecheza fainali za Mataifa ya Afrika (AFCON) mwaka 1980.

Bendera alifariki Alhamisi iliyopita akiwa Hospitali ya Taifa ya Muhimbili (MNH) jijini Dar es Salaam ikiwa ni saa nne tu tangu alipopokewa akitokea mjini Bagamoyo.

Mchezaji wa zamani wa Pan African, Peter Tino hatasauliwa kutokana na kufunga bao lililoiwezesha Taifa Stars kufuzu kucheza fainali za Mataifa ya Afrika, lakini mshambuliaji huyo anasema wa kukumbukwa zaidi ni Bendera.

“Asikwambie mtu, wachezaji tulifuraji lakini bendera alifurahi zaidi tulipofunga bao la kusawazisha kwenye mechi na Zambia tena mbele ya rais wao, Kenneth Kaunda kwenye uwanja wa Ndola,” Tino anasimulia alipofuatwa na Spoti Mikiki.

“Baada ya filimbi ya mwisho, Bendera alinikimbilia na kunibeba mgongoni. Ilikuwa ni furaha ya Watanzania wachache waliokuwa pale uwanjani.”

Anasema ushindi haukuanzia uwanjani, bali maneno ya Bendera walipopokelewa ubalozini.

“Tulipofika Lusaka, timu yetu ilikwenda kumtembelea balozi kabla ya kwenda Ndola. Tukiwa pale (ubalozini) tulionyeshwa magazeti ya Zambia, rais wao akiwa ameshika funguo za gari na kutamka kwamba kila mchezaji atapewa gari na nyumba kama wataifunga Tanzania,” anasema.

“Yale maneno yalimuumiza mno Bendera. Alituambia, ninyi hamjaahidiwa chochote, lakini ninyi ndiyo mnatakiwa mtoe zawadi kwa Watanzania. Msitumike kama mgongo wa watu kupewa nyumba na gari. Bendera alizungumza kwa ujasiri mno na maneno yake yalitusisimua na tuliwaahidi kufia uwanjani.

“Kwenye mechi ilikuwa hakuna bahati mbaya. Hadi mapumziko tulikuwa tumeshafungwa bao 1-0. Tukiwa kwenye vyumba vya kubadilishia nguo kocha mzungu alizungumza akamaliza, ikafika zamu ya Bendera sasa, alizungumza kwa hisia akasema maneno yangu ni yale yale.

“Tusikubali watu wapewe nyumba na gari kwa mgongo wetu, Serikali haijatoa ahadi yoyote kwetu, lakini sisi tutoe ahadi kwa Watanzainia, wao wanaongoza na bila shaka sasa hawana nguvu hivyo sisi twendeni tukawafunge, Bendera alipomaliza kutamka hivyo, mimi niliitikia sawaa tena kwa sauti ya juu,” anasimulia Peter Tino. “Wakati tunacheza, pale Uwanjani kulikuwa na Watanzania kama 30 hivi au 40 ambao walikuwa wakitushangilia mwanzo mwisho kwani kitendo cha kufungwa bao moja hadi mapumziko wao waliona cha kishujaa kwetu kwani walijua tutapigwa nne au tano hadi mapumziko.

“Baada ya bao letu mpira ukaisha kwa sare ya bao 1-1, Bendera alikuja spidi hata sikumbuki alinibebaje mgongoni. Nilijikuta niko tayari mgongo kwake huku akiimba ndoto yangu imetimiaaa! Ilikuwa ni furaha isiyopimika kwani matokeo yale yalitupeleka AFCON kwa ushindi wa mabao 2-1 baada ya kuibika na ushindi wa bao 1-0,” anasema.

Jinsi bao lililovyofungwa

Tino alifunga bao hilo wakati Stars iliporudiana na Zambia jijini Ndola Agosti 26,1979 wakati huo wenyeji wakijulikana kwa jina la KK Eleven, kumaanisha rais wa zamani wa Zambia, Kenneth Kaunda.

Iko hivi, Taifa Stars wakati huo ikiwa chini ya Kocha, Slowmir Wolk kutoka Poland, akisaidiwa na Bendera na Ray Gama ambaye naye ni marehemu, ilikata tiketi ya kushiriki Fainali hizo za Afrika.

Katika pambano hilo la agosti 26, 1979, Taifa Stars ilikuwa ikihitaji sare ya aina yoyote ili ifuzu fainali hizo kwa mara ya kwanza tangu ilipoanza kushiriki mwaka 1968.

Timu hizo zilikuwa zinarudiana baada ya Stars kushinda kwa bao 1-0 katika mchezo wa kwanza uliofanyika wiki mbili zilizotangulia kwenye Uwanja wa Taifa jijini Dar es Salaam (sasa Uhuru), bao pekee likiwa limefungwa na kiungo, Mohammed Rishard Adolph.

Katika mchezo huo wa marudiano, KK walipata bao la mapema katika mchezo huo ambalo lilidumu hadi dakika ya 85.

Dakika tano za mwisho, Peter Tino alisawazisha bao na kunyamazisha umati wa mashabiki waliofurika kwenye Uwanja wa Ndola.

Ilipigwa kona kuelekea lango la Stars na kipa Juma Pondamali “Mensar” akaupangua kwa ngumi, ukamkuta beki wa kati, Leodegar Chilla Tenga ambaye naye alitoa pasi ndefu kwa Hussein Ngulungu. Kiungo huyo akamgongea Tino.

Akiwa amezungukwa na mabeki watatu wa Zambia, Tino aliwazidi ujanja akiwa nje kidogo ya eneo la hatari la Zambia na kupiga kombora la mguu wa kulia, lililompita kipa wa Zambia aliyekuwa kikwazo, John Shileshi.

Katika mchezo huo, Tanzania iliwakilishwa na; Juma Pondamali ‘Mensar’, Leopard Tasso Mukebezi, Mohammed Kajole Machela/ Ahmed Amasha ‘Mathematician’, Salim Amir, Jella Mtagwa, Leodegar Chilla Tenga, Hussein Ngulungu, Omari Hussein ‘Keegan’, Peter Tino, Mohamed Salim na Thuweni Ally.

Nahodha Leodegar Tenga

Leodegar Tenga, aliyekuwa nahodha wa Taifa Stars kwa miaka 10, aliiongoza timu hiyo uwanjani na kufanya vizuri hata kufika fainali hizo.

Akimzungumza na Spoti Mikiki Hospitali ya Lugalo wakati wa kuuaga mwili wa Bendera, Tenga anasema: “Mwalimu Bendera alikuwa na uwezo mzuri wa kuongea na wachezaji kabla na hata wakati wa mchezo.

“Tulikuwa tukijisikia furaha tukiwa naye. Kila mmoja wetu alijiona ni mwana familia, hakika hili ni pigo kwenye familia ya mpira na daima atabaki kukumbukwa kama mtu mbaye amelifanyia Taifa makubwa.”

Hata hivyo, Tenga anasema kuwa mafanikio yao hayakuja kirahisi kwani waliandaliwa kwa miaka minne kuanzia mwaka 1976.

Kiraka Adolf Rishard

Jina la timu ya taifa ya Kenya, Harambee Stars lilizinduliwa katika mchezo ambao Tanzania iliongozwa na Bendera, kwa mujibu wa Adolf Rishard, mchezaji mwingine aliyewahi kuwa chini ya mkufunzi huyo.

Rishard, ambaye pia alifunga bao katika mchezo wa kufuzu AFCON dhidi ya Zambia nyumbani, anasema Bendera alikuwa ni kocha mwenye maono.

“Mimi niliitwa Stars 1976 kwenye mechi na Kenya kwa ajili ya kuzindua jina la Harambee Stars. Alikuwa pamoja na marehemu Gama mwaka 1977 hatukucheza Chalenji kutokana na vita ya Uganda, lakini mwaka 1978 tulikwenda kuweka kambi Lushoto kwa ajili ya Chalenji na 1979 tulikuwa wa tatu kwenye Chalenji Nairobi .

“Wakati huo ndio tulikuwa katika harakati za kufuzu tukiwa naye hadi 1980 kwenye AFCON. Lakini baada ya AFCON aliondoka na kocha wa Stars akawa Msomari, japo sikumbuki Bendera aliondokaje ondokaje Stars wakati ule,” anasema Rishard.

“Ninamkumbuka Bendera alikuwa na kipawa cha hamasa, alitupa hamasa sana kiasi cha kufanya vizuri mechi zetu.”

SAFARI YA KOROGWE

Bendera alifariki Desemba 6 jijini Dar es Salaam. Kwa mujibu wa mdogo wa marehemu, Brass Kiondo ndugu yao alikuwa akisumbuliwa na tatizo la kupumua ambalo lilimuanza Desemba 3 na alikuwa anatibiwa Hospitali ya Korogwe na baada ya hali yake kuimarika, akapelekwa Muhimbili kwa matibabu zaidi lakini hali ilibadilika ghafla hadi mauti yalipomkuta akiwa Muhimbili.

Bendera aliagwa juzi jijini Dar es Salaam na ndugu, jamaa na marafiki na wanamichezo, hasa wachezaji aliowafundisha akiwemo Tenga na Tino.

Watu wengine waliohudhuria ni pamoja na mkurugenzi wa ufundi wa TFF ambaye pia ni kocha, Salum Madadi na mtangazaji mkongwe, Tido Muhando.

Wengine ni mbunge wa Muheza, Adadi Rajab.

Bendera aliwahi kuwa mbunge wa Korogwe Mjini, Naibu Waziri wa Habari, Utamaduni na Michezo katika utawala uliopita wa Rais mstaafu Jakaya Kikwete na mkuu wa mikoa ya Morogoro na Manyara.

Katika mabadiliko ya wakuu wa mikoa yaliyofanywa na Rais John Magufuli Oktoba 26, Bendera alikuwa miongoni mwa wakuu wa mikoa waliostaafu na nafasi yake imechukuliwa na Alexander Mnyeti aliyepandishwa kutoka kuwa mkuu wa Wilaya ya Arumeru.

Mapema baada ya kushindwa ubunge, aliteuliwa kuwa Mkuu wa mkoa wa Morogoro.

Monday, December 4, 2017

Najua tu naonekana mgeni

 

By Eliya Solomon, Mwananchi

Mwanzoni mwa miaka ya 2000, Shirikisho la Soka Tanzania (TFF) lilimteua Dk Mshindo Msolla kuinoa timu ya taifa ya Tanzania, Taifa Stars.

Dk Msolla akaita wachezaji wake, kati ya aliowaita alikuwemo Ammy Ninje. Watu wakawa wanajiuliza “huyu Ammy Ninje ni nani? Katokea wapi” Mbona hatukuwahi kumsikia?”.

Akamtetea,akisema anamfahamu na alikuwa anamfuatilia huko England. Itakumbukwa hakucheza mechi nyingi kwa kuwa alibanwa na majukumu ya timu yake huko nje.

Juzi juzi, TFF ilimtangaza Ninje kuwa kocha wa Kilimanjaro Stars iliyoko Kenya kushiriki Kombe la Chalenji, na jana ilicheza na Libya.

Lakini bado wadau wanajiuliza “huyu Ninje ni nani hasa? Asili yake ni wapi” kwa kuwa anaonekana kama ni mgeni kwenye kikosi hicho cha Tanzania Bara.

SI MGENI TANZANIA

Kwanza Ninje anasema yeye si mgeni kwani ni msaidizi wa kocha wa Taifa Stars, Salum Mayanga tangu alipoteuliwa.

Amekuwa na timu kipindi chote na zaidi ndiye msimamizi wa timu na Mayanga ni kama anaratibu. Kimsingi anasema kuwa anaonekana mgeni kwa kuwa hafundishi timu yoyote ya Ligi Kuu kama ilivyo makocha wengine wazawa.

“Ninasaidiana na Mayanga Taifa Stars hivyo mimi si mgeni kama wengi wanavyodhani,” anasema Ninje katika mahojiano na Spoti Mikiki.

“Nina ujuzi wa kutosha ambao nimetoka nao Uingereza ambako ndiko nilipojipatia elimu ya ukocha na uzoefu kwa kukaa chini ya makocha kadhaa Uingereza na Tanzania.”

CHALENJI

Ninje anaipeleka Tanzania kwenye michuano ambayo haina rekodi nzuri ya mafanikio, lakini haonekani kuwa na hofu nayo.

“Nimejipanga, ninafahamu Chalenji haina mabadiliko sana,” anasema.

“Haya ni mashindano ambayo kila mchezo una umuhimu wake, itatulazimu kupata matokeo ya ushindi kwenye kila mchezo utakaokuwa mbele yetu. Ninafurahia kuwa na kikosi kizuri chenye wachezaji wepesi kushika maelekezo.

“Kikubwa ni Watanzania kuniunga mkono, mengine watajionea wao wenyewe uzuri. Hayo mashindano huenda yakaonyeshwa hivyo wataiona timu yao itakavyokuwa ikipambana.”

Kabla ya kuondoka nchini Kili Stars ilijikita hasa kwenye mazoezi na kufanyia kazi mfumo wa namna ya uchezaji kwa kuanzia eneo lake la nyuma. Mara nyingi katika mazoezi, Ninje alionekana kutaka timu yake ianzishe mashambulizi kutokea kwenye ngome; mabeki wa kati au pembeni kulingana na hali ya mchezo.

KUNDI A

Katika mashindano ya Kombe la Chalenji, ambayo hushirikisha nchi wanachama wa Jumuiya ya Afrika Mashariki na majirani pamoja na kualika timu za nje ya ukanda, Tanzania Bara imepangwa Kundi A pamoja na Kenya, Libya, Zanzibar.

Ninje anakubali kuwa hilo si kundi jepesi, lakini ana matumaini ya kufanya vizuri.

“Tumejiandaa vizuri hivyo hatuna cha kuhofia. Timu zote tunazichukulia kwenye daraja moja,” anasema.

“Katu hatuwezi kuibeza timu yoyote kwa sababu kwenye soka ile ambayo hauipi nafasi, inaweza kuonyesha maaajabu ambayo husababishwa na uzembe.

“Dharau inasababisha kutofanya kitu kwa ufasini, ndiyo maana ninasema tumejipanga.”

Monday, December 4, 2017

Kombe la Chalenji 1981-Ilikuwa akiingia Mogella tu, kapiga bao

 

By Ibrahim Bakari, Mwananchi

Achana na mwaka 2010 Tanzania Bara ilipotwaa ubingwa wa Chalenji kwa bao la beki wake, Shadrack Nsajigwa, shughuli ilikuwa mwaka 1981.

Iko hivi, kulifanyika mashindano mengi, Tanzania Bara ikawa mwenyeji baada ya 1981, mwaka 1992, 2002, 2007, 2010 na 2011. Hata mwaka 2010 wakati inatwaa ubingwa, moto wake haukuwa kama ilivyokuwa mwaka 1981.

Kuna mchezaji anaitwa Zamoyoni Mogella ‘Golden Boy’ anasema: “Nilipewa hilo jina mwaka 1981 nikiwa miongoni mwa wachezaji wa timu ya Taifa (Taifa Stars) kwenye mechi za Chalenji na ilikuwa zaidi dhidi ya Malawi.

“Tulikuwa tumefungwa magoli 2-1 katika ile mechi na Malawi, niliingia dakika ya 75, zikiwa zimesalia dakika mbili mpira kwisha, nilifunga goli la kusawazisha na kufanya matokeo kuwa sare ya 2-2.

“Pale ndipo nikapewa jina la Golden Boy, ilifikia mahali nikawaaminisha mashabiki kutokana na uwezo wangu kwamba, nikiingia tu lazima nifunge na kweli ilikuwa hivyo kutokana na kujitunza na kulinda kiwango changu hadi nilipostaafu,” anasimulia.

Tanzania Bara wakati huo ikiwa chini ya kocha Mjerumani, Rudi Gutendorf, na kati ya wachezaji wake, alikuwa Zamoyoni Mogella. Tanzania ikifungwa, akiingia tu lazima atikise nyavu, licha ya kuwa Wakenya walimbana tukalala 1-0 katika fainali.

Ilikuwa dakika kama 10 au 15 kabla mpira kwisha, Gutendorf alikuwa anamwinua Mogella basi uwanja mzima kelele.

Mashindano yale yalikuwa na msisimko wa aina yake, kila mmoja alikuwa nyuma ya timu ya Tanzania Bara hadi fainali dhidi ya Kenya tuliyolala kwa bao la Ouma.

Hata hivyo, mwendo wa mashindano haya umekuwa wa kusuasua kutokana na udhamini, lakini sasa kuanzia jana Desemba 3 hadi 17, mwaka huu Kenya ndiye mwenyeji wake na Tanzania Bara imepangwa Kundi A pamoja na Zanzibar, Libya, Kenya na Rwanda.

Bara jana ilikuwa ikicheza na Libya mechi ya ufunguzi wakati Kenya ilikuwa ikikwaruzana na Rwanda.

Lilikoanzia Kombe la Chalenji

Hicho kilikuwa kibwagizo cha 1981, lakini Chalenji ilianzia wapi hasa?

Tunaelezwa katika historia kuwa hii ndiyo michuano mikongwe Afrika. Ilianza mwaka 1926 wakati huo ikiitwa Gossage ambayo sasa inatimiza miaka 91.

Gossage lilikuwa jina la tajiri mmoja akimiliki kiwanda cha sabuni na ndiye alikuwa mdhamini na alikuwa akipenda soka.

Baada ya kumaliza kuizunguka Afrika Mashariki kwa usafiri wa reli enzi hizo ikiitwa, Uganda-Kenya Railways mwanzoni mwa miaka ya 1900, katika safari yake alikuwa akikutana na makundi ya watu waliokuwa wakikaakaa bila kujishughulisha baada ya kumaliza kujenga reli na shughuli nyingine.

Wengi wao walikuwa Waafrika, Waasia na Wanubi ambao ndiyo waliokuwa wakijenga reli. Gossage aliona kwamba njia pekee ya kuwafanya wafurahi ni kuwawekea michezo (mashindano).

Kwa hiyo, mwaka 1927, alianzisha michuano iliyoshirikisha mataifa ya Kenya na Uganda na alianzisha Kombe lililoitwa Gossage. Mashindano yalishindaniwa katika miji ya Kampala na Nairobi kwa miaka mingi na kuwa moja ya mashindano maarufu.

Tanganyika (sasa Tanzania) ilijiunga 1944 na kushiriki mashindano hayo kwa mara ya kwanza kuanzia 1945.

Kwa upande wa Zanzibar, iliyokuwa chini ya utawala wa Waarabu, mwaka 1948 baadaye iliingizwa na kufanya mashindano ya mataifa manne.

Mashindano yaliendelea na jina la Gossage hadi mwaka 1963 na kubadilishwa jina na kuitwa Mashindano ya Chalenji Afrika Mashariki.

Mataifa hayo manne yalishindana hadi 1973 walipokaribisha mataifa mengine.

Katika mkutano maalum uliofanyika Nairobi, Kenya wanachama hao walikubaliana kuiingiza Somalia, Zambia na Ethiopia na wakati huo sasa ndipo Cecafa ikazaliwa.

Sasa kuna mataifa saba yaliyoingia. Wakati huo na Makao Makuu ya Cecafa yalikuwa Mogadishu, Somalia kabla ya kuhamishiwa Nairobi. Michuano hiyo inaitwa Kombe la Cecafa.

Mwaka 1974, nchi wanachama walianzisha mashindano mengine, lakini haya yalikuwa katika ngazi ya klabu, uzinduzi ulifanyika Dar es Salaam na ndiyo hiyo Kombe la Kagame.

Sudan na Malawi zilijiunga Cecafa mwaka 1975. Baadaye 1981, Zimbabwe, baada ya kupata uhuru wake 1980, ikajiunga na familia ya Cecafa.

Hata hivyo, 1994 baada ya kuanguka utawala wa kidhalimu Afrika Kusini, kulianzishwa Baraza kama Cecafa la Cosafa lililokuwa likiunganisha mataifa ya Kusini mwa Afrika.

Kutokana na hali hiyo, mataifa ya Malawi, Zambia na Zimbabwe yakajiondoa Cecafa na kuanza maisha mapya ya Cosafa.

Kuondoka kwa mataifa hayo, kulifungua mlango kwa Rwanda, Burundi na Eritrea, pamoja na Djibouti kuingia Cecafa mwaka 1995.

Hiyo ilifanya mataifa ya Cecafa kufikia 11 ambayo ni: Kenya, Sudan, Uganda, Tanzania, Ethiopia, Eritrea, Zanzibar, Somalia, Rwanda, Djibouti na Burundi.

Waliotwaa mara nyingi

Mpaka sasa, Uganda Cranes imetwaa mara nyingi, 1973, 1976, 1977, 1989, 1990, 1992, 1996, 2000, 2003, 2008, 2009, 2011, 2012 na 2015.

Kenya inafuatia, 1975, 1981, 1982, 1983, 2002 na 2013 wakati Tanzania Bara imetwaa mara tatu, 1974, 1994 na 2010 sawa na Malawi 1978, 1979, na 1988 na Sudan 1980, 2006 na 2007.

Monday, December 4, 2017

Makundi ya Morocco, Nigeria na Tunisia siyo ya kitoto!

 

Kuna kitu hakijawahi kufanyika Afrika lakini juzi Rais wa Shirikisho la Soka Afrika, CAF, Ahmad Ahmad alifanya, alizipa nchi zilizofuzu Fainali za Kombe la Dunia, kila mmoja Dola 500,000 za maandalizi.

Unaambiwa Rais wa CAF aliyepita, Issa Hayatou, tangu aingie madarakani Lionel Messi akiwa na mwaka mmoja, hajawahi kufanya. Hayatou alimwagwa kwenye uchaguzi wa CAF uliofanyika Addis Ababa Machi 16, mwaka huu.

Achana na Hayatou, Ahmad Ahmad anataka kuiweka Afrika karibu kwa kila mmoja, ametoa nafasi kwa timu kujiandaa, anaziandalia mechi za majaribio lakini pia amesogeza mechi za kuwania kucheza Afcon 2019 zilizokuwa zichezwe Machi mwakani akazipeleka Oktoba mwakani.

Mataifa matano ya Afrika yatakayokwenda Moscow, Russia kwenye Fainali za Kombe la Dunia ni Nigeria, Morocco, Tunisia, Misri na Senegal.

Ijumaa jioni, wenyeji wa fainali hizo waliandaa hafla kubwa ya kupanga ratiba na makundi ya fainali hizo zikiwemo nchi hizo za Afrika.

Ukiangalia droo hiyo, mataifa ya Morocco na Nigeria yatakuwa na kibarua pevu katika makundi yao.

Nigeria imepangwa na mabingwa wa zamani Argentina. Super

Eagles inaweza kugeuziwa kibao licha ya kuifunga mabao 4 – 2 katika mchezo ya kirafiki hivi karibuni. Mbali na Argentina,

Nigeria itakutana na Croatia na Iceland katika Kundi D.

Kundi B, Morocco watakuwa na shughuli pevu watakapokutana na kasi ya Cristiano Ronaldo na mastaa wengine wa Ureno. Timu hiyo pia ni bingwa wa Ulaya.

Shughuli nyingine watakayokutana nayo Morocco ni kwa wakali wa Hispania na timu isiyotabirika ya Iran.

Wawakilishi wengine wa Afrika, Tunisia watakutana na mziki wa Ubelgiji utakaokuwa ukiongozwa na Romelu Lukaku katika Kundi G. Nchi nyingine katika kundi hilo ni England na wageni wa fainali hizo, Panama.

Misri walioko Kundi A itawalazimika kuweka pembeni masuala yao ya kidiplomasia na kuingiliana na Saudi Arabia.

Pia watakumbana na joto la wenyeji, Russia. Timu nyingine watakayokumbana na nayo ni wataalamu wa rafu, Uruguay.

Senegal walioingia robo fainali za Kombe la Dunia mwaka 2002 Korea Kusini na Japan wanaonekana kutokuwa na kazi ngumu, lakini shughuli watakutana nayo kwa Poland, Colombia na Japan na jina la Sadio Mane tayari limeanza kuonekana kama litakuwa tishia katika Kundi hilo kutoka Senegal.

Rekodi za Wawakilishi wa Afrika

1. MISRI – ‘Pharaohs’ ilicheza Fainali za Kombe la Dunia kwa mara ya kwanza nchini Italia 1990

2. MOROCCO – ‘Simba wa Atlas’ walifuzu wakiwa na rekodi nzuri Afrika.

3. NIGERIA – ‘Super Eagles’ wamekosa Fainali moja tangu walipocheza Fainali za Kombe la Dunia Marekani 1994

4. SENEGAL – Waliingia kwa mara ya kwanza Korea/Japan 2002, Simba wa Teranga wakaingia robo fainali.

5. TUNISIA – walicheza Fainali za Argentina 1978, ‘Tai wa Carthage’ ilikuwa timu ya kwanza kushinda mechi ya Kombe la Dunia.

FAINALI ZA 2014 VS 2018

Mwaka 2014 timu za Afrika zilizofuzu ni Ghana, Cameroon, Ivory Coast, Nigeria na Algeria. Moja ya Afrika Kaskazini na nne kutoka sub Sahara.

Miaka minne baadaye, ni Nigeria pekee ikarudi kwenye fainali. wakati huo sasa ikawa na timu nyingine ya Afrika Magharibi, Senegal.

Timu nyingine ni kutoka Afrika Kaskazini – Misri (mabingwa mara nyingi wa Afcon), Morocco na Tunisia.

Timu kutoka mataifa mengine

UKANDA WA UEFA – ULAYA

UBELGIJI – Walifuzu wakitokea Kundi H na hawakupoteza mechi hata moja.

CROATIA – Wazoefu, walikuwa watatu Fainali za Ufaransa 1998

DENMARK – Walifuzu kiulaini kwa kuifunga Jamhuri ya Ireland.

ENGLAND – ‘The Three Lions’ wameingia mara ya 14 kati ya 16 walizoshiriki.

UFARANSA – ‘Les Bleus’ wanacheza mara ya sita mfululizo.

UJERUMANI – Waliingia wakijiamini kwa ushindi wa asilimia 100.

ICELAND – Taifa lenye idadi ndogo ya watu kuwahi kufuzu.

POLAND – ‘The Poles’ walikuwa wa tatu Fainali za Ujerumani mwaka 1974 na Hispania 1982

URENO – ‘Seleção das Quinas’ Fainali za tano mfululizo.

RUSSIA – Kama Soviet Union, walikuwa wanne Fainali za England 1966

SERBIA – ‘The Serbs’ilifuzu kutokea Ukanda wa UEFA Kundi D ikipoteza mechi moja.

HISPANIA – Mabingwa 2010, ilianza kucheza Fainali za Italia 1934.

SWEDEN – Walimaliza wa pili Fainali za Kombe la Dunia 1958.

USWISI – Mara tatu wamemaliza nafasi ya tatu Kombe la Dunia.

CONMEBOL – AMERIKA KUSINI

ARGENTINA – Mabingwa mara mbili. Walikuwa kwenye uzindizi wa Kombe la Dunia mara ya kwanza nchini Uruguay 1930

BRAZIL – ‘Seleção’ ilikuwa ya kwanza kufuzu fainali za mwakani ukiacha wenyeji Russia.

COLOMBIA – ‘Los Cafeteros’ ilikuwa chini ya kocha, Jose Pekerman raia wa Argentina Fainali za Ujerumani mwaka 2006.

PERU – Imerudi Fainali za 2018 baada ya miaka 36.

URUGUAY – ‘La Celeste’ walitwaa ubingwa 1930 na Fainali za Brazil 1950

CONCACAF – AMERICA KASKAZINI

COSTA RICA – ‘Los Ticos’ ilionyesha soka yake Brazil 2014, na kuingia robo fainali.

MEXICO – ‘The Mexicans’ ilipoteza mechi moja ikiwani kufuzu Russia 2018

PANAMA – Imetokea Amerika ya Kati, imefuzu kwa mara ya kwanza Russia.

UKANDA WA AFC – ASIA

AUSTRALIA – ‘Socceroos’ Inaingia mara ya tano Kombe la Dunia.

IRAN – ‘Team Melli’ timu ya kwanza Asia kwenda Russia 2018

JAPAN – Mara ya 16 kuingia fainali.

JAMHURI YA KOREA – ‘The Taeguk Warriors’ Haikuwahi kucheza Kombe la Dunia tangu 1986

SAUDI ARABIA – Ilianza kucheza Fainali za Kombe la Dunia 1994 nchini Marekani.

Monday, December 4, 2017

Yusuf Juma, Mtanzania anayezipigia hesabu Chelsea na Arsenal

 

By Eliya Solomon, Mwananchi

Wachezaji wa Kitanzania wanaendelea kupasua anga kwa kasi, kila mmoja kwa nafasi yake amekuwa akijitahidi kutafuta upenyo wa kwenda kujitafutia maisha ya soka kwenye mataifa yaliyopiga hatua kisoka.

Hivi karibuni, kiungo wa Simba, Said Ndemla ametajwa kuwa ambaye amefuzu majaribio ya kucheza soka la kulipwa nchini Sweden katika klabu ya AFC Eskilstuna, yote hii inathibitisha kuwa ni wazi nyota wa Kitanzania wanapasua anga kwa kasi.

Spoti Mikiki linaendelea kuibua wachezaji wa Kitanzania ambao wanatafuta maisha ya mpira nje ya nchi.

Wiki iliyopita tulikuwa na Benedictor Jacob anayeichezea Palos FC ya Ligi Daraja la Kwanza nchini Kenya anavyotamani kuitumikia Taifa Stars.

Leo tunahama kutoka Afrika hadi Marekani na kumleta kwako kiungo mkabaji wa Monroe SC, Yusufu Juma ambaye ametokea Mjimwema mkoani Kigoma kabla ya kutua Marekani.

Yusufu ana ndoto ya kuichezea Taifa Stars ambayo ipo chini ya kocha mkuu Salum Mayanga ambaye ameanza kutoa nafasi kwa wachezaji wa Kitanzania ambao amepata vielelezo vyao.

Katika mahojiano na Spoti Mikiki kutoka Marekani, anasema: “Kilele cha mafanikio yangu ninatamani sana kikamilike kwa kuwa mchezaji wa kutegemewa kwenye timu ya Taifa, ninasikia kuwa unapogusia Tanzania kwenye soka lazima umtaje Mbwana Samatta, amekuwa mchezaji muhimu ambaye kila mtu analitaja jina lake.

“Samatta ana uwezo mkubwa, amejituma mpaka kufika pale, lengo langu ni kujituma ili kufika ninapohitaji, Mungu akipenda hivi karibuni nitafungua ukarasa mpya wa soka langu kwa kwenda kufanya majaribio England.

“Pamojana yote yani inatakiwa nicheze kwenye kiwango cha juu, nitakapokuwa kwenye hicho kiwango hapatakuwa na wasi wasi kuhusu kuitwa kwangu timu ya Taifa,” anasema Yusufu.

Yusufu (17) alizaliwa kwenye Hospitali ya Maweni mkoani Kigoma na kuishi mkoani humo kwa zaidi ya miaka kumi kisha akapata nafasi ya kusafiri na wazazi wake kuelekea nchini Marekani.

“Wazazi wangu waliamua kuhama Kigoma na kuhamia Marekani, napenda sana soka tangu nikiwa mdogo kwa hiyo baada ya kuhamia Marekani nilianza kucheza mpira wa mtaani. “Nilipata elimu ya sekondari nikiwa Marekani, baada ya kumaliza elimu hiyo nilipata nafasi ya kujiunga na timu ya chuo cha Monroe SC, nilianza kawaida na mwisho wa siku waliamua pia kunipatia elimu ya bure kupitia kipaji changu.

“Sikuona tatizo kwa sababu walikuwa wakinilipa kwenye timu yao, huku kuna soka la vyuo ambalo ni maarufu na wachezaji wengi wa Ligi Kuu ya Marekani wamepitia kwenye mfumo huo,” anasema.

Hata hivyo, Yusufu anaonekana kutovutiwa hata kidogo na Ligi Kuu Marekani na ndiyo maana kaka yake Hamisi ambaye anamsimamia kama wakala amemtafutia nafasi ya kufanya majaribio London, Uingereza.

“Mwakani nimepewa ruhusu ya kufanya majaribio kwenye timu tatu za London ambazo ni Arsenal na Chelsea, kama nitafuzu nitapata nafasi ya kujiunga na vituo vyao vya kulelea vipaji vya soka.

“Pia nina upenyo wa kwenda Ubelgiji kama mambo hayatakaa vizuri, Ubelgiji nitafanya majaribio Standard Liege na Anderletch zote za Ligi Kuu, huku ni kama kule nikifuzu nitajiunga na timu zao za vijana,” anasema Yusufu.

Kiungo huyo anasema kuwa amekuwa akichukulia changamoto ni kama sehemu ya maisha na ndiyo maana kila akikutana na changamoto amekuwa akisonga mbele kwa kujua zinamjenga kukua kisoka.

“Kuna muda kunakuwa na mambo mazito kupita kiasi, nachofanya huwa naona kuwa yote hayo ni ya mpito hivyo huwa najipa moyo na nashukuru Mungu kwa sababu amekuwa akinishindia. Yusufu alimalizia kwa kusema mpango wa kaka yake kumtafutia sehemu ya kufanya majaribio umechangiwa na juhudi zake binafsi na hata hivyo kaka yake amekuwa mstari wa mbele kuhakikisha anafanikisha ndoto zake.

Mchezaji huyo wa Kitanzania alimalizia kwa kusema kuwa anatamani kuwasaidia vijana wenzake ambao wana ndoto ya kucheza mpira kutokana na mfumo wa Marekani ulivyo.

“Mtu mwenye kipaji anatakiwa kusaidiwa na kuthaminiwa kama ilivyo Marekani, tukifika hapo tutakuwa kwenye hatua ya kuzalisha vipaji vingi kwa kuzingatia hayo,” anasema kiungo huyo wa kati.

Mbali na Yusufu ambaye anaichezea Monroe SC pia wapo Watanzania wengine ambao nao wanatafuta mafanikio ya soka nchini humo pamoja na kupatiwa elimu bure ambao ni Daud Aboud na Adolf Bitegeko wa Lcc Men’s Soccer na Ronald Makaramba ambaye kwa sasa anachezea TAMUT FC.

Monday, December 4, 2017

Wachezaji Kili Stars na kiu ya ubingwa wa Chalenji

 

By Eliya Solomon, Mwananchi

Kikosi cha timu ya Taifa ya Tanzania Bara ‘ Kilimanjaro Stars’ tayari kimetua nchini Kenya kwa ajili ya kushindania taji la mashindano ya Chalenji yaliyoanza jana hadi Desemba 17.

Mashindano ya Chalenji yanachezwa kwa mfumo wa makundi mawili kisha timu mbili zitakazofanya vizuri kwenye kila kundi zitapata nafasi ya kutinga nusu fainali kisha fainali ambayo itatoa bingwa.

Kundi A lina timu tano ambazo ni Tanzania Bara, Libya, Rwanda, Zanzibar na Kenya. Kundi B ni Uganda,Zimbabwe,Burundi,Ethiopia na Sudan Kusini. Huenda timu moja ikahamishiwa Kundi B baada ya Zimbabwe kujitoa.

Spoti Mikiki ilibonga na wachezaji wa Kilimanjaro Stars wakielezea wamejiandaaje na nini Watanzania tutarajie kutoka kwao.

Erasto Nyoni, fulubeki

Niko na timu ya Simba...Kikosi cha Kilimanjaro Stars tuko sawasawa, tunaweza kufanya vizuri kwenye mashindano ya Chalenji kutokana na wachezaji wengi kuwa na viwango vya juu.

“Wachezaji wengi hii itakuwa mara yao ya kwanza hivyo watakuwa na shauku ya kutaka kuonyesha vipaji vyao, tumekuwa pamoja kwa muda nadhani hapatakuwa na tatizo la muunganiko.

Kwa mimi, haya yatakuwa mashindano yangu ya zaidi ya mara tano kuitumikia Kili na mara yangu ya kwanza ilikuwa 2006 nchini Ethiopia.

Abdul Hilal, Winga

Ninachezea Tusker ya Kenya, nimepanga kuitumia vizuri hii nafasi ambayo nimeipata kwa kuaminiwa na kuitwa kwenye kikosi cha timu ya Taifa ya Tanzania Bara.

“Ninachokiamini ni kuwa safari moja huzaa nyingine hili nimekuwa nikipenda sana kulisema, kuitwa kwangu kwa mara ya kwanza na Mayanga kulianzisha hatua nyingine ya kuendelea kuaminiwa.

“Sitaki kumwangusha Ammy ambaye ameona ninafaa kwenye kikosi chake pamoja na kuona ninafaa kuwa mwakilishi wa wachezaji wengine ili nikalipiganie Taifa, nitacheza kwa kujitolea ili kuisaidia timu.

Hamis Abdallah, kiungo

Mimi ni kiungo mkabaji wa Sony Sugar ya Kenya, nimefurahi kurejea kwenye nchi ambayo ninacheza ligi...ushirikiano na kujituma kutatupa mafanikio na kutwaa Kombe la Chalenji.

“Wachezaji tumekuwa na ushirikiano wa uchezaji, kuna muda anaweza asiwepo mchezaji fulani kwenye nafasi yake lakini kutokana na ushirikiano wetu huwa kuna mtu ambaye anaweza kwenda kuziba lile pengo.

“Ushirikiano huo nadhani watu waliuona kwenye mchezo wetu wa kirafiki uliopita dhidi ya Benin, japo hii sio Taifa Stars ila ina wachezaji wengi ambao walikuwa kwenye kikosi kile.”

Gadiel Michael, fulubeki wa kushoto

Niko na Yanga, lakini ni wazi huu ni wakati wetu wa kufanya kitu kwa ajili ya Taifa kwa kuzingatia hiki ni kipindi ambacho Tanzania imekosa kombe hilo kwa muda mrefu.

Mara ya mwisho kwa Tanzania Bara kuchukua ubingwa wa Chalenji ni 2010...Binafsi ninaona kuwa hiki ni kizazi chenye wachezaji ambao wanaweza kuliletea heshima Taifa, tunaweza kufanya kweli kwenye hayo mashindano, naomba wapenda soka watuunge mkono.”

Peter Manyika JR, kipa

Ninachezea Singida United. Sisi kama wachezaji, tunakwenda Kenya tukiwa na njaa ya kupata matokeo ya ushindi katika kila mchezo ambao tutakuwa tunacheza.

“Njaa ya kupata matokeo inaweza kuifanya timu yoyote kucheza kwa moyo na kutokata tama hata kama tutakuwa nyuma, mpira ni dakika tisini.”

Mohammed Hussein ‘Tshabalala’, fulubeki

Mimi ni nahodha msaidizi wa Simba, nasema kucheza ugenini hakuwezi kutufanya tushindwe kupata matokeo kwa sababu hali ya hewa ya Kenya na kila kitu vinafanana na nyumbani.

Hatutakuwa na kisingizio, kuwa kwetu Kenya ni kama tuko nyumbani sioni kama kutakuwa na tatizo, kila mmoja wetu naona yupo kwenye hali nzuri.

Juma Kennedy, sentahafu

Ninakipiga Singida United, na hii ni mara yangu ya kwanza kuwa kwenye timu ya Taifa na ni fursa kwangu kuendelea kuonyesha uwezo wake zaidi. “Watanzania wengi wananifahamu kupitia Singida ambayo nimekuwa nikiichezea, kupitia timu ya Taifa itakuwa ni kama daraja la kunifanya nitambulike zaidi kimataifa, pamoja na kuwa nawaza hilo lakini pia jukumu langu la kwanza litakuwa kuisaidia timu.

Boniphace Maganga, fulubeki wa kulia

Ninachezea Mbao FC ya Mwanza, ukweli itakuwa aibu kama tutarudi mikono mitupu, ni bora tukikosa sana tuambulie hata nafasi ya pili na sio kuishia hatua ya makundi.

“Binafsi sipendi kushindwa, nachukia sana kuona timu yangu inapoteza hivyo hata kama nikiwa mchezaji wa akiba nitajitahidi kuwahamasisha wenzangu ili tufanye vizuri.

Shiza Kichuya, kiungo/winga

Ninachezea Simba. Ninachokiona, hatuna sababu ya kupoteza kwenye mashindano hayo kutokana na uchu tulio nao wa kutwaa ubingwa.

“Kinachotakiwa,ili kutwaa ubingwa inatakiwa tuwe makini kwenye uchezaji wetu, kama tukiwa tunashinda michezo yetu ya makundi itatufanya kuingia na morali ya ushindi kwenye nusu fainali ambayo inaweza kutusaidia kutinga fainali. “Sioni kama inashindikana kurudi na taji nchini, tumejitolea kupigania Taifa letu.”

Raphael Daud, Kiungo

Niko na klabu ya Yanga, kikubwa ninawataka Watanzania kutuunga mkono kwa sababu hata sisi hatupendi kufanya vibaya kwenye mashindano.

“Hakuna mchezaji hata mmoja ambaye anatamani kuona timu yetu ikifanya vibaya, kwa pamoja tunaweza kuifanya Kili kufanya vizuri kikubwa kila mtu afanye majuku yake.”

Elias Maguli, straika

Nilikuwa ninachezea Dhofar lakini mkataba wangu umekamilika, ukweli nimepania kufunga mabao mengi kila nitakapokuwa napata nafasi ili kuisaidia Kili kupata matokeo ya ushindi.

Katika eneo langu la ushambuliaji natakiwa zaidi kufunga mabao, kila nitakapokuwa nafunga nitakuwa natengeneza mazingira kwa timu yangu kupata matokeo ya ushindi.

“Siwezi kabisa suala la wapi nitatua maana ni kweli makataba wangu umemalizika na timu yangu Oman, nawaza zaidi kwa sasa kulisaidia Taifa langu alafu hayo mengine yatafuata maana kama ofa ninazo za kutosha ni uchaguzi wangu, wapi patanifaa.

Yohana Mkomola, straika

Mkomola nilikuwa kikosi cha timu ya Taifa ya vijana cha Serengeti Boys kilichoshiriki mashindano ya Afrika kwa Vijana, nitatumia nafasi hii kujifunza.

“Bado ninakuwa kiuchezaji, nahitaji kujifunza mengi kupitia ushindani, kama nitapata nafasi ya kucheza itakuwa ni faida kwenye ukuaji wa soka langu na kama sintopata basi itakuwa faida nyingine.

“Hata ile hatua ya kuitwa timu ya Taifa halafu ninafanya mazoezi ninajifunza baadhi ya vitu vya uchezaji kutoka kwa kaka zangu ambao wamenitangulia.

Kelvin Yondani, beki wa kati

Niko Yanga kama beki wa kati, tutajituma na hapatakuwa na mtihani wa maelewano kwa sababu wachezaji wamekuwa pamoja kwa muda sasa tofauti na vipindi kadhaa nyuma na kulikuwa na panga pangua ya kikosi.

“Wachezaji wanapokuwa pamoja kuna namna nzuri inajengeka maelewano ya kucheza, kuliko ile ya leo wengine kesho wengine hufanya wachezaji kuwa na wakati mgumu wa kuelewana, kwa maandalizi ambayo tumefanya tutafanya vizuri.”

Monday, December 4, 2017

Omary Banda hataki kuzisikia Simba wala Yanga

 

By Imani Makongoro, Mwananchi

Omary Banda ni mchezaji kinda anayechipukia kwenye Kituo cha Azam mwenye ndoto za kufuata nyayo za kaka yake, Abdi Banda anayecheza Baroka FC ya Afrika Kusini.

Dogo huyo, 16, ni mtoto wa tatu katika familia ya watoto watano ya nguli wa zamani wa Simba, Banda ambaye aliichezea timu hiyo mwishoni mwa miaka ya tisini.

Omary alizaliwa mkoani Tanga anadai alikuja kumtembelea kaka yake jijini hapa na kisha kuanza kimya kimya harakati za kujitafutia timu ya kuichezea ndipo akabahatika kujiunga na Kituo cha Azam.

“Ninacheza namba sita, kaka yangu yeye ni beki wa kati japo na mimi ninaweza pia kucheza kwenye hiyo nafasi.

“Lakini kabla ya kuja Dar nilikuwa nikicheza kwenye kituo cha kulelea vipaji cha Fairplay cha kule kule Tanga, msimu uliopita ndiyo nilipata nafasi Azam,” anasema.

Hata hivyo Omary hakusita kwa kusema anatamani siku moja kucheza soka la kulipwa kama ilivyo kwa kaka yake na kudai hata hana mawazo ya kuzichezea Simba na Yanga.

“Bado ninahitaji muda wa kuendelea kufundishwa mpira ila muda utakapofika wa kucheza mpira kwenye kiwango cha ushindani, nitafurahi kama nitafikia hatua ya kucheza nje ya nchi.

“Naongea mara kwa mara na kaka ambaye yupo Afrika Kusini, huwa ananitaka nisikilize kwa makini yale yote ambayo ninafundishwa kwenye hiki kituo cha Azam ili siku za usoni nije kuwa mchezaji mkubwa.

“Kuhusu kucheza nje amekuwa akiniambia ni kitu kinachowezekana hasa kutokana na kipindi hiki kuwa na nafasi za kutosha ambazo zinaendelea kutengenezwa na wachezaji kadhaa wa kitanzania wanaofanya vizuri katika mataifa yaliyoendelea,” anasema Omary.

Mdogo huyo wa Banda amezitaja ligi tatu anazozitamani kwa Afrika ni Ligi Kuu Afrika Kusini ‘PSL’, Morocco ‘Batola Pro’ na Ligi Kuu ya Misri.

Monday, November 27, 2017

Kerr: Ninavisikia vishindo vya Kichuya huko

 

By Vincent Opiyo, Mwananchi

Kocha wa zamani wa Simba ambaye sasa anafundisha Gor Mahia, Mwingereza, Dylan Kerr amesema anapenda kufuatilia Ligi ya Kuu ya Tanzania na vile vile ligi za kote Barani Afrika.

Ni mambo manne tu ametaja kuhusu ligi zote mbili baada ya kuhudumu Tanzania kwa mwaka mmoja katika klabu cha Simba.

Wachezaji wa Kenya na Tanzania“Kuna baadhi ya wachezaji wazuri sana kwenye mazoezi kisha wanaogopa mechi na wanakuwa butu.

“Wakati wangu Simba kulikuwa na mchezaji anaitwa Sserunkuma (Danny) alikuwa hivyo. Wengi wa wachezaji wa Tanzania hawajitumi kama hapa Kenya.

“Nikikumbuka, wachezaji wengi ni wazembe, wapo wachache tu wanaojituma na kama nikipewa nafasi ya kusajili, naweza kumsajili Kichuya (Shiza).

Nimekuwa nikimsikia huyu Kichuya mara nyingi, anafanya mambo makubwa.

“Pia Okwi ninaambiwa anafunga sana, lakini kwangu siwezi kumpa nafasi

kikosi changu. Wakati wangu kulikuwa na akina Kiiza (Hamis) walikuwa wazuri sana lakini ninafikiri sasa hivi umri umekwenda unajua nataka wachezaji wenye nguvu ya kustahimili dakika zote 90.

“Nimetazama mechi kadhaa Ligi ya hapa Kenya ya KPL ninafikiri kuna vipaji. Wengi wao wanajituma sana ikilinganishwa na Tanzania haswa wakicheza dhidi ya Gor Mahia manake wanataka kuonyesha uwezo wao kwa timu kubwa.

“Tanzania ukweli hili halipo. Timu nyingi ndogo pamoja na wachezaji wao wengi wao wanaogopa timu kubwa haswa Simba na Yanga,” anasimulia Kerr katika mahojiano mafupi na Spoti Mikiki.

Kerr anasema kuwa hakudhani kama angepata fursa ya kufundisha soka Afrika Mashariki tena baada ya kuhudumu Simba kwa mwaka mmoja uliokosa mafanikio.

Baada ya kutoswa Simba, Kerr (50) alifanya mazungumzo na mwenyekiti wa klabu ya Gor Mahia, Ambrose Rachier siku chache baada ya kocha wa wakati huo, Mbrazili Jose Marcelo Ferreira ‘Ze Maria’ kujiuzulu na kuelekea klabu ya KF Tirana ya Albania.

“Kocha Iddi Salim aliniuliza iwapo ningetaka kazi ya Gor nikasema mbona freshi tu kama ipo basi niko tayari, akanijulisha kwa mwenyekiti na papo hapo nikatumiwa tiketi yangu kuja Kenya,” anasimulia

“Nilipewa mkataba wa miaka miwili, nikaambiwa huu ndo utakuwa mshahara wako na ndivyo nilivyoanza kazi Julai 10, 2016.”

Arudi Tanzania

Baada ya Kerr kuchukua timu, siku chache timu ikaja Dar es Salaam, Tanzania kuchuana na Everton ya Ligi Kuu ya England Julai 13 na kupoteza 2-1.

“Nilipendezwa na jinsi mashabiki wa Simba walinikaribisha Uwanja wa Taifa. Walifahamu kazi yangu japo sikupewa muda wa kukisuka kikosi kwa sababu ya uamuzi wa baadhi ya viongozi walinipiga fitna.

“Eti nilishindwa kunyakua ubingwa wa Mapinduzi ilhali tulikuwa nambari mbili kwenye ligi. Mkataba wangu mwanzoni ulikuwa na malengo ya kushinda ubingwa au nimalize nafasi tatu bora na tulikuwa tunacheza vizuri wakati huo.

“Unajua timu ikifanya vizuri halafu panaibukia mashindano fulani utakichezesha kikosi cha pili ili na wao wapate nafasi ya kuonyesha uwezo wao lakini kumbe hawakulipenda hili, walitaka kikosi cha Ligi

Kuu. hilo kama ni kocha mzuri unajitambua huwezi chezesha walewale.

“Baada ya nusu fainali tukaondolewa na mmoja wao aliniambia hajawahi

shuhudia mchezo mbovu wa Simba kama leo kisha Kaburu (Geofrey) naye akanisifia sana jinsi tulivyomakinika.

“Kumbe siku iliyofuata, akawaita waandishi wa habari kulalamikia kiwango cha timu na kocha wake, baadaye wakaniondoa kwenye timu,” anasema Kerr kwenye mahojiano ya moja kwa moja na Spoti Mikiki hotelini Lavington Mall.

Nilipokwenda Dar es Salaam kucheza na Gor Mahia: “Unajua walishtuka sana kuniona nimeingia na K’Ogalo na mimi huyo naiongoza dhidi ya Everton, mechi ambayo ilinifunza mengi haswa kukifahamu kikosi changu kipya.

“Sasa pale Tanzania, tulicheza soka nzuri, na ilinikumbusha wakati wangu nilipokuwa Simba. Lakini uongozi wa klabu ndiyo mbovu zaidi.

Akipewa nafasi Simba atarudi?

Kerr anagoma ikiwa italetwa ofa mezani.“Ikitokea nimepewa nafasi sasa hivi kurudi SDimba, hilo halipo, nimeshaifuta Simba labda nijiunge na Yanga, lakini sio Simba japo naipenda lakini kwa sababu ya uongozi wa sasa bado upo madarakani, siwezi.

“Simba wamenikataa, lakini kipindi kifupi Gor Mahia imebadilika na kwa upande wangu sasa hivi Kenya mambo mazuri, kama hivi unavyoona tumetwaa ubingwa, hii ni historia maishani kwangu, lazima niwashukuru wachezaji wangu.

“Mwenyekiti Rachier ni mtu nzuri sana. Hana mambo mengi yake ni kazi tu. Nilifurahi sana aliponipongeza wakati tulishinda Ulinzi Stars mjini Kericho kwenye mechi iliyotuhakikishia kombe na mechi nne mkononi,”

“Sasa ni kulenga kumaliza msimu kisha tuangalie mambo ya usajili ambapo tayari tumeshaanza mazungumzo na wachezaji kadhaa kutoka humu nchini na nje.

Muhimu mwakani ni kufanya kweli Ligi ya Mabingwa Afrika na pia kujaribu kutetea ubingwa. Mipango ipo kabambe sana, mtatushtuka,” anasema kocha huyo ambaye aliwahi kufanya kazi Mpumalanga Black Aces ya Sauzi na pia nchini Vietnam alisema.

Mchezaji anayemuhusudu

Kerr anasema beki wake Harun Shakava ni mtu ambaye ana uwezo wa kupiga soka hata Tanzania klabu moja kubwa lakini iwapo tu watatoa kitita cha Dola za Marekani 1 milioni.

“Huyu jamaa ni bonge moja la sentahafu, ni mzuri sana ambaye anaweza fedha nitawaachia tu.

Mara ya kwanza nilimtazama akifunga dhidi ya Yanga mechi za Kombe la Kagame mwaka 2015 nikapendezwa na kipaji chake, wakija na hiyo mihela nitawapa lakini najua hawawezi kufika bei, wale ni jamaa wa Dola 60,000 mwisho tu.”

Monday, November 27, 2017

WAKALI WA NJE- Festi 11 ya mapro hii hapa

 

By Charles Abel na Eliya Solomon

Ligi Kuu soka inaendelea baada ya kusimama kupisha mechi za kimataifa za kirafiki pamoja na zile za kuwania kufuzu fainali za Kombe la Dunia.

Kabla ya Ligi Kuu kuanza mapema Agosti, tulishuhudia timu zikifanya usajili ambao ulihusisha wachezaji wazawa na wale wa kigeni kwa ajili ya kuimarisha vikosi vyao.

Hata hivyo usajili wa wachezaji wa kigeni umekuwa ukilalamikiwa na wadau wa soka kwa madai kwamba wamekuwa hawathibitishi thamani yao wanapopewa nafasi.

Kwa mtazamo wa wadau hao, mchezaji wa kigeni anatakiwa awe na kiwango bora zaidi ya wazawa yota ili asajiliwe na iwapo anakuwa na uwezo sawa au amezidiwa na wazawa, hafai kuendelea kuwepo.

“Timu zetu zimekuwa zinapenda kusajili wachezaji wa kigeni, lakini wengi hawana uwezo mkubwa kulinganisha na wazawa wanaocheza kwenye nafasi zao na wamekuwa wakipokea fedha za bure tu,” anasema kocha wa Dodoma FC, Jamhuri Kihwelu.

Unajua sifa kubwa ya mchezaji wa kigeni ni kwamba anapaswa aonyeshe uwezo wa ziada ili aonyeshe utofauti wake na wazawa lakini inapokuwa kingine, ni vyema klabu zetu zikawapa nafasi wachezaji wazawa tu,” anasema kocha John Tegete.

Hata hivyo, katika mechi za Ligi Kuu zinazoendelea hadi sasa, wapo nyota wa kigeni waliofanya vizuri ambao wanaweza kuunda kikosi kikali ambacho kinaweza kuifunga klabu yoyote nchini.

Pia kinaweza kuwa mazoezi mazuri kwa timu ya taifa ya Tanzania Bara inayojiandaa na Kombe la Chalenji.

Festi 11 ya mapro wanaochezea timu zinazoshiriki Ligi Kuu Tanzania Bara msimu huu ni hawa wafuatao.

Razack Abalora- Azam FC

Hapana shaka yoyote kwamba Abalora ndiye kipa anayefanya vizuri kwenye Ligi Kuu msimu huu kwa sasa na amekuwa chanzo cha ngome imara ya Azam FC ambayo imekuwa ngumu kwa washambuliaji wa timu pinzani kuipenya.

Hadi sasa, Abalora ambaye Azam FC imemsajili akitokea klabu ya WAFA inayoshiriki Ligi Kuu ya Ghana, amefungwa mabao mawili tu huku akiwa amecheza mechi nane bila kuruhusu nyavu zake kutikiswa.

Michael Rusheshangoga- Singida United

Huyu ni beki wa kulia wa Singida United aliyesajiliwa akitokea APR inayoshiriki Ligi Kuu nchini Rwanda.

Tangu aliposajiliwa amethibitisha ubora wake kwa kuwa chaguo la kwanza kwenye nafasi hiyo mbele ya beki mzawa, Miraji Adam.

Shafiq Batambuze- Singida Utd

Kabla ya ujio wa Batambuze ambaye Singida United ilimsajili alitokea Tusker ya Kenya, beki bora mgeni wa kushoto alikuwa akitajwa kama Mzimbabwe, Bruce Kangwa wa Azam FC.

Hata hivyo, ndani ya kipindi kifupi alichoichezea Singida United kwenye Ligi Kuu, Batambuze ameonekana kuzima nyota ya Kangwa na kutokana na uwezo wake wa kusaidia mashambulizi na kulinda jambo lililofanya achaguliwe kuwa mchezaji bora wa Ligi Kuu mwezi Septemba.

Asante Kwasi- Lipuli FC

Sifa yake kubwa ni kucheza kwa bidii, kujitolea na kuhakikisha anakuwa wa kwanza kuucheza mpira wowote ambao anauwania na washambuliaji wa timu pinzani uwe wa juu au chini jambo ambalo limekuwa msaada mkubwa kwa safu ya ulinzi ya timu yake.

Mbali na kujilinda, Kwasi pia ana uwezo mkubwa katika kusaidia mashambulizi pamoja na kufunga na hadi sasa amehusika katika mabao matatu ya Lipuli na amefunga mawili na kutoa pasi ya bao moja.

Yakubu Mohammed-Azam FC

Ameziba pengo lililoachwa na Paschal Wawa kutokana na matumizi bora ya nguvu na akili pindi anapokabiliana na washambuliaji wa timu pinzani.

Ni kiongozi mzuri wa safu ya ulinzi ya Azam FC na amefanya timu hiyo kuwa na kuta mgumu zaidi msimu huu, ikiwa imeruhusu mabao mawili tu hadi sasa katika mechi tisa.

Kabamba Tshishimbi-Yanga

Kiungo wa shoka aliyemaliza tatizo la Yanga katika eneo la kiungo wa ulinzi, na zaidi ni kutokana na uwezo wake wa kupora mipira kutoka kwa wachezaji wa timu pinzani na kuziba mianya ya wapinzani kutengeneza nafasi za mabao.

Ubora wake katika eneo hilo umenifanya Yanga iruhusu mabao manne tu hadi sasa.

Haruna Niyonzima- Simba

Hakuna pasi yoyote ya bao ambayo amepiga hadi sasa wala kufunga lakini uwepo wake umekuwa ukiisaidia Simba kutengeneza na kufunga idadi kubwa ya mabao kutokana na mchango wake wa kumiliki dimba la kati mbele na kupiga chenga jambo linalofanya afungue nafasi kwa wenzake.

Thaban Kamusoko-Yanga

Ni injini ya kutengeneza mabao katika klabu ya Yanga, ana uwezo wa hali ya juu katika kumiliki mpira, kusoma mchezo, kupiga pasi za mwisho pamoja na kufunga bao pindi apatapo nafasi.

Mzimbabwe huyo kukosekana kwake kwa muda mrefu kumekuwa kukiipa wakati mgumu Yanga kwani huwa haitengenezi nafasi kwa kiasi kikubwa pindi anapokuwa nje.

Emmanuel Okwi-Simba

Siku zote namba zimekuwa hazidanganyi na hilo ndilo linaloonekana kwa Okwi ambaye takwimu za mabao aliyofunga hadi sasa, zinamfanya awemo katika kundi la nyota wanaounda kikosi bora cha wachezaji wa kigeni.

Okwi aliyesajiliwa na Simba kwa mkataba wa miaka miwili akitokea SC Villa ya Uganda, hadi sasa ndiye mfungaji anayeongoza kwa kufumania nyavu akiwa amefunga mabao nane.

Tafadzwa Kutinyu-Singida Utd

Ana jicho la goli, uwezo wake wa kutengeneza na kufunga mabao ni wa hali ya juu lakini pia ana akili ya kukabiliana na mabeki hata pale anapokuwa kwenye mazingira magumu.

Pamoja na hilo anabebwa na uwezo wake wa kucheza nafasi tofauti za mbele kwa ustadi wa hali ya juu jambo ambalo ni nadra kuliona kwa wachezaji wengine

Obrey Chirwa-Yanga

Pambano la Mbeya City alipiga hat trick na mara zote unapotaja mafanikio ya Yanga kwa sasa, jina la Chirwa haliwezi kukosa katika orodha ya nyota wanaochangia mafanikio.

Hiyo kutokana na uwezo wake wa kutengeneza nafasi na kufunga, akibebwa na nguvu pamoja na kasi aliyonayo.

Hadi sasa mshambuliaji huyo ameifungia Yanga mabao sita kwenye ligi huku akitoa pasi mbili zilizozaa mabao.

WACHEZAJI WA AKIBA

Youth Rostand, Yanga

Huu ni msimu wa kwanza kwa Rostand kuichezea Yanga akitokea African Lyon ambayo ilishuka daraja, uwezo wake umemfanya kuwa kipa namba moja mbele ya Beno Kakolanya, amefungwa mabao manne pekee.

Juuko Murshid, Simba

Mbali na kutopata nafasi ya kucheza mara kwa mara kwenye kikosi cha Simba atabaki kuwa moja ya mabeki bora wa kati wa kigeni, Juuko anaweza kucheza na Kwasi au Yakubu kwenye kikosi hiki.

Bruce Kangwa, Azam FC

Faida anayoitoa Kangwa kwenye kikosi cha Azam ni kucheza kwake kwenye nafasi zaidi ya moja, anaweza kutumika kama beki wa kushoto ama akacheza kama beki wa kati.

James Kotei, Simba

Uwezo wake wa kukaba umemfanya kupata nafasi ya kuanza mara kadhaa kwenye kikosi cha Simba huku Jonas Mkude ikimlazimu kutumika kama mchezaji wa akiba na muda mwingine huanza wote, Kotei anaweza kucheza kwenye eneo la Tshishimbi.

Danny Usengimana, Singida

Ubora wa Singida United umechangiwa na uwepo wa Usengimana kwenye idara ya ushambuliaji, Usengimana anaweza kuwa mbadala sahihi wa Okwi au Kutinyu ambaye amekuwa na muunganiko naye mzuri kwenye kikosi cha Singida United.

KOCHA MKUU

Kocha Joseph Omog ni miongoni mwa makocha bora wa kigeni alitua Azam na kuipa ubingwa wa ligi msimu wa 2013/2014 akiwa ametoka kuiongoza klabu ya A.C Leopards ya Jamhuri ya Kongo (Brazaville) kutwaa ubingwa wa ligi ya nchi hiyo kwa misimu miwili mfululizo (2012 na 2013).

Pia 2012 aliiwezesha A.C Leopards kunyakuwa ubingwa wa Kombe la Shirikisho la Afrika kwa kuzipiga kumbo timu ngumu na zenye uzoefu mkubwa kama vile Mas de Fes ya Morocco, Heartlands ya Nigeria na Sfaxien ya Tunisia.

Kadhalika mwaka huu 2013, A.C Leopards chini ya ukufunzi wa Omog ilitinga hatua ya makundi ya Ligi ya mabingwa Afrika na kupangwa katika kundi moja na timu mbili zilizocheza fainali; Al Ahly ya Misri (bingwa) na Orlando Pirates ya Afrika Kusini.

KOCHA MSAIDIZI

George Lwandamina amejiunga na Yanga, Desemba 2016, akitokea Zesco ya kwao Zambia, aliyoifundisha kwa mafanikio makubwa na kuifikisha nusu fainali ya michuano ya Ligi ya mabingwa Afrika na kutwaa mataji mawili mfululizo ya Ligi Kuu ya Zambia.

Ugeni wake haukumzuia kuchukua ubingwa wa Ligi Kuu Tanzania Bara msimu uliopita, mbinu za Lwandamina na Omog hazina utofauti sana kutokana na makocha hao kuamini kwenye kujilinda kwanza.

Hivyo wanaweza kuendana na kufanya kazi kwa pamoja na kutengeneza muunganiko wa kikosi chetu cha wachezaji wa kigeni wanaocheza Ligi Kuu Tanzania Bara.

Monday, November 20, 2017

Utampenda tu, Kichuya huyu huyu

 

By Olipa Assa, Mwananchi

Katika siku za karibuni, inawezekana kabisa kwenye mechi ya mahasimu, Yanga hawapati usingizi wakisikia jina la Shiza Kichuya limo kwenye listi wanaoanza. Ndiyo, hata ukiguna.

Simba na Yanga zinapocheza, Kichuya hawaachi Yanga salama hata mara moja. Kati ya mabao yatakayofungwa, lake moja halikosekani.

Ni katika Kombe la Mapinduzi tu hakuwafunga. Simba ilishinda mikwaju ya penalti 4-2 zilizowekwa kimiani na Jonas Mkude, Kipa Daniel Agyei, Muzamil Yasin na Bokungu wakati ile iliyopigwa na Mwanjali iliokolewa na kipa wa Yanga, Munishi.

Mechi hiyo ilikuwa ya nusu fainali ya Kombe la Mapinduzi, ilipigwa Januari 8.

Nyuma kidogo, Oktoba Mosi 2016, Simba ilitoka sare ya 1-1 na Yanga ambayo iliongoza hadi dakika ya 87, Kichuya akachonga kona iliyokwenda moja kwa moja kimiani.

Februari 25, Simba iliichapa Yanga mabao 2-1, moja Laudit Mavugo na lingine la ushindi kapiga Kichuya.

Ikaja Ngao ya Jamii, Agosti 23, kama miezi sita hivi baada ya pambano ya Februari. Mechi hii ya kukunjua pazi la Ligi Kuu. Simba ilishinda mikwaju ya penalti 5-4.

Walofunga ni; Method Mwanjale, Emmanuel Okwi, Haruna Niyonzima, Shiza Kichuya na Mohamed Ibrahim ‘Mo’ walifunga wakati Mohamed Hussein ‘Tshabalala’ mkwaju wake wa penati ukidakwa na golikipa wa Yanga.

Si umeona hapo, Kichuya hakuwaacha salama Yanga, alitupia penalti yake.

Haya, juzi tu hapa, Oktoba 28, mechi ya Ligi Kuu, Simba ilianza kufunga, na aliyetupia ni huyo huyo japo bao lake halikudumu, Obrey Chirwa akalichomoa kama dakika tatu hivi baadaye. Unaweza kusema ni mbaya wa Yanga.

Jina la winga huyo wa Simba, lilipata umarufu muda mfupi baada ya kutua Msimbazi msimu uliopita akitokea Mtibwa Sugar.

Alifanya mambo si ya kawaida hata akatupiwa jicho na wadau wa soka nchini kwani alifunga zaidi ya magoli 10, katika msimu wake wa kwanza tu.

Mechi mbili za watani wao Yanga, mzunguko wa kwanza na wa pili zilimpa ufalme baada ya kufunga magoli mawili ya kihistoria katika mechi zote mbili.

Spoti Mikiki, imefanya mahojiano maalumu na winga huyo, amezungumzia maisha yake kwa mwaka huu baada ya ongezeko la mastaa wapya ndani ya kikosi cha Simba ambao majina yao yamekuwa yakitajwa kila inapoitwa leo na wadau wa soka ndani na nje ya nchi.

Simba aliyoingia na hii

“Ingizo jipya la wachezaji wazoefu ndani ya Simba, limeibua changamoto ya mimi kujituma kwa bidii kuhakikisha uwezo wangu haushuki bali unaongezeka na kupata nafasi ya kucheza katika kikosi cha kwanza kama ilivyokuwa msimu uliopita.”

Emmanuel Okwi na Haruna Niyonzima ni kati ya wachezaji ambao Kichuya anakiri wana uzoefu wa juu ambao unamfanya akili yake iwaze kwa mapana kutambua majukumu yake kwa kina.

“Wachezaji wote Simba ni wazuri, lakini angalia wanaotajwa na mashabiki mara kwa mara, unakuta ni Okwi na Niyonzima, kutajwa kwao ni somo kwangu kwamba wana kitu cha ziada kinachoonekana machoni kwao, lazima nijue kocha anataka nini kwangu ndipo naweza kufika mbali,” anasema.

Anafafanua kwamba hana maana ya kuwaogopa bali anaheshimu uzoefu walionao tofauti na mchezaji ambaye ana hamu na kutoka ili afikie mafanikio yao.

“Kila msimu una utofauti na ndiyo maana usajili wa msimu huu una wachezaji tofauti na mwaka jana, hilo linatosha na ninatakiwa kuwa mjanja wa kusoma nyakati na kuendana nazo ili nisiachwe na ushindani wa kazi bora,”anasema.

Mpenda kuthubutu

“Huwa sijifikirii mara mbili, mimi napenda kujaribu nione kama ninaweza na ndiyo maana ninakuwa na hatua kila ninapocheza.

“Natumia fursa ya kujifunza kwa mchezaji aliyekaribu yangu, nikiamini nitapata hatua moja mbele, uwepo wangu Simba najituma ili nijifunze kitu kitakachonipa hatua moja mbele,”

“Siogopi kumfuata mchezaji na kumuuliza siri ya mafanikio yake ili nijifunze, unaambiwa uoga wako ndiyo umaskini wako,” anasema.

Utajiri wake

Anaweka wazi kwamba licha ya jina lake kujulikana na wadau mbalimbali nchini, lakini bado maisha yake ni ya kawaida tofauti na wadau wanavyomchukulia, kumuona ni mtu ambaye ana maisha ya kifahari.

“Ufahari wangu ni uwanjani, siwezi kusema sina hatua ila ni ndogo siwezi kujifananisha na hao wanaomiliki magari ya kifahari na majumba makubwa, bado nina safari ya kusaka mafanikio, ninaamini ipo siku moja nitafanikiwa,” anasema.

Jamii yake

“Ninaishi maeneo ya Mabibo, awali majirani zangu walikuwa wananitarajia kuwa mtu wa bata, ajabu wanaona nikitoka uwanjani ama mazoezi napitiliza kulala, kuniona ni wakati wa kula, iliwapa shida awali ila kwa sasa wananiona kawaida tu,” anasema.

“Watu wengi wanashindwa kufanikiwa na wanaishi maisha ya kuigiza kwa kupenda sifa yaani kuwa mjuaji wa kila kitu kisa wanafahamika.”

“Ustaa wangu mwisho uwanjani,nikirejea kitaa ni maisha ya kawaida,” anasema

Taifa Stars

Tangu ajiunge na Simba, amekuwa bandika bandua kwenye kikosi cha Taifa Stars na kumemsaidia kuwa na mtazamo wa kuwa mchezaji wa kimataifa.

”Nikiwa Stars, nakutana na timu za nchi tofauti na wanaocheza klabu tofauti, naona jinsi ambavyo wanaishi na namna ambavyo soka limewalipa na kuwa watu wa heshima”

“Unapojichanganya na watu ndivyo unavyozidi kupanuka kiakili ndiyo maana ninasema kwa sasa ninaanza kutazama ndoto zangu kuwa mchezaji wa kimataifa.”

Monday, November 27, 2017

Tunaweza kuwawahi akina Poulsen

 

Moja ya waandishi wachache ambao hawajawahi kukaa mbali na habari mchanganyiko kutoka Afrika hasa habari za michezo anayefahamika kama Ed Dove aliwahi kutoa ushauri kwa namna gani ambayo soka la Afrika linaweza kukua.

Dove alikuwa ameguswa na kiwango cha mataifa mengi ya Afrika kwenye fainali za Kombe la Dunia kule Brazil. Inawezekana kabisa akawa na macho yenye mboni kali na ambayo yanatizama kesho katika soka letu.

Kwenye makala yake mojawapo kati ya makala zake nyingi kuhusu soka letu alitoa sababu saba ambazo yeye alizipatia jina la mabadiliko ambayo aliamini kama yangefanyika basi soka la Afrika lingekuwa katika nafasi nzuri zaidi ya kufanya vyema kuliko ilivyoeleka ambako tunakuwa kichwa cha mwendawazimu alichotaja mzee wetu Ali Hassan Mwinyi siku moja.

Katika wino aliamua kumwaga juu ya mataifa yetu yote, alitaja sababu zake kuwa kuimarisha ubora wa ligi za ndani, kuachana na kukariri majina na badala yake kutazama uwezo wa wakati husika, kuongeza umoja wa wachezaji na kuepuka majina makubwa kutawala madogo kiuamuzi.

Suala la uwazi na kuaminiana kwenye ngazi ya uongozi, kutibu ugonjwa wa kifedha unaoibuka kabla ya mashindano, kutumia maarifa wakati wa kuchagua makocha na kubwa zaidi kushawishi wachezaji wa Afrika wenye uraia wa mataifa mengine kurudi na kucheza nyumbani kwenye asili yao.

Ni miaka mitatu sasa tangu Dove atoe ushauri huu na wakati mengine yakiwa yanaendelea kuibuka na kuja taratibu hili la kupata wachezaji wenye asili ya Afrika wanaoweza kutumikia mataifa yetu linaonekana kuwa rahisi zaidi.

Timu ya Taifa ya Zimbabwe ilipitisha sera ya kuhakikisha kuwa inamtambua kila raia wa Zimbabwe duniani kote mwenye kipaji ili arejee kuchezea taifa hilo.

Katika mpango huo haraka haraka shirikisho la soka nchini Zimbabwe liliwaita wachezaji Macauley Bonne anayechezea klabu ya Leyton Orient, Admiral Muskwe aliyepo katika kikosi cha Leicester City, kiungo wa Celtic, Kundai Benyu, na beki wa Nottingham Forest, Tendai Darikwa huku pia wakituma wawakilishi kumshawishi mchezaji anayekuja vyema kwenye kikosi cha Arsenal, kinda anayefahamika kama Reiss Nelson.

Kwenye akili ya Wazimbabwe wanauamini ukweli ambao hausemwi kwa kiwango kikubwa kuwa mataifa mengi makubwa ya Ulaya yamenufaika kwa kiasi kikubwa na vizazi vya Afrika kabisa na wamekuwa wakipiga hatua kila uchwao.

Hii ni kuanzia miguu ya Zinedine Zidane ambayo iliipa Ufaransa ubingwa wa dunia kisha Ulaya mpaka ikafika kwa Vieira mpaka leo Kante na Pogba wakiwa viungo bora zaidi wakitokea huku nyumbani.

Lakini hili lililowahi kutajwa na Ed Dove wala halikomi na kugota katika timu ya Taifa ya Ufaransa pekee ambayo pengine wengi wanaitizama zaidi bali mpaka kwa Ubelgiji. Kikosi cha leo cha Ubelgji ambacho kinaaminika kuwa na kizazi cha dhahabu zaidi kuwahi kutokea, kinaweza kuanzisha takaribani nusu ya wachezaji muhimu wa kikosi cha kwanza wanaozungumza Kilingala.

Wachezaji Vincent Kompany, Youri Tielemans, Michy Batshuayi, Romelu Lukaku, Christian Benteke mpaka kwa Jordan Lukaku wote wangeweza kuwa katika kikosi cha leo cha Jamhuri ya Kidemokrasia ya Congo na kufanya maajabu ambayo hakuna ambaye angeweza kutegemea.

Lakini ni taifa hili pia ambalo wachezaji kama Steven N’Zonzi, Steve Mandanda, Presnel Kimpembe na Eliaquim Mangala wangeweza kulichezea kwa furaha kuliko kusubiri kuitwa na Didier Deschamps katika kikosi cha Ufaransa ikiwa haijulikani kama itakuwa leo au kesho.

Wote hawa ni vijana na ambao wangeifanya Congo iwe timu tishio zaidi duniani kwa sasa, lakini nani anajali?

Ed Dove aliona mbali, alitizama ambako wengi walipapuuza na ndio maana ni heri kuona vijana wanaokosa nafasi England kama Alexander Iwobi, Wilfred Zaha wakikumbuka na kurejea nyumbani kuchezea mataifa ya asili yao.

Tatizo linaweza kuwa moja tu mpaka sasa ambalo pengine mwandishi Marieme Jamme akiwanukuu na waandishi wakongwe kama Chinua Achebe, Amadou Hampâté Ba na Ousmane Sembene alilisema kuwa Afrika haipati maendeleo kwa sababu hata walioko nje wanaamini kuwa wakija huku wanajifunza utamaduni pekee na hakuna Maendeleo yoyote bali kufahamu tunaishi vipi katika mazingira haya.

Ndio sababu kubwa ambayo hata hawa wachezaji vijana wanaogopa kurejea huku kwa sababu kuna maisha wanayoyasoma kwenye majarida na vitabu kuwa Afrika haijaendelea na bahati mbaya zaidi wakitizama vyema wanakuta andiko ambalo linaonyesha namna gani timu ya Taifa ya Cameroon ilivyogoma kusafiri kwa sababu ya posho.

Huwezi kumshawishi Lukaku kurejea kuchezea Jamhuri Ya Kidemokrasia Ya Congo kirahisi wakati anafahamu kuwa timu ya Taifa ya Togo waliwahi kutekwa kwenye moja ya misitu maeneo hayo.

Mchezaji wa klabu ya RasenBallsport Leipzig inayofahamika kwa jina maarufu kama RB Leizpig bwana Mtanga huyu Yussuf Poulsen, alizaliwa kwa baba Mtanzania na mama raia wa Denmark, moja ya wachezaji vijana wanaokuja vyema kwenye ligi ya Ujerumani ya Bundesliga.

Alikuwepo Tanzania miezi kadhaa nyuma kabla ya msimu wa 2017/2018 kuanza, lakini hata angepatikana akiwa kijana ungemshawishi vipi aukane uraia wa Denmark ili achukue wa Tanzania kwa sababu haturuhusu uraia pacha.

Miaka inasogea na vijana wanaendelea kuingia kwenye miji ya watu, akina Yussuf wapo wengi duniani huko, lakini hawafahamu wanarejea vipi Tanzania na sera haziwaruhusu “kula bata” Dar Es Salaam na Paris kwa wakati mmoja yaani kuwa na uraia wa zaidi ya nchi moja.

Inawezekana shirikisho la soka Tanzania linafahamu kuhusu sera hii, inawezekana linajaribu kufuatilia lakini hawa wachezaji wa Jamhuri ya Kidemokrasia ya Congo wamenitia tamaa.

Jirani zangu hawa wamesababisha mate yamenitoka mdomoni kwa sababu wachezaji wote niliowataja wana wastani wa umri usiozidi miaka 26 na wananufaisha mataifa mengine huku wao wakiondolewa na Tunisia.

Sitegemei na Tanzania siku moja tujikute huku, Ed Dove alisema miaka mitatu nyuma, wapo walioanza kujifunza kama Zimbabwe nasi tuwatafute akina Yussuf. Naamini wapo na tunaweza kuwawahi huko kwenye “academy”.

Monday, November 27, 2017

Jacob: Ninacheza soka Kenya lakini sitaki kudumu hapa

 

By Eliya Solomon, Mwananchi

Kiu ya kuhitaji mafanikio kwenye soka la kimataifa ni moja ya sababu ambayo inaweza kutajwa na wachezaji wengi ambao wamekuwa wakitoka kwenye mataifa yao na kwenda kwingine kucheza soka.

Tanzania ni miongoni mwa mataifa ambayo watu wake kwanza wana kiu ya mafanikio, pia wachezaji wake wamekuwa na kiu ya kutaka mafanikio zaidi kwa kucheza soka la kimataifa, Wiki iliyopita tuliona vile ambavyo Daud Aboud na Adolf Bitegeko walivyoipa ubingwa, LCC Men’s Soccer ya Marekani.

Kwenda kwao huko ni juhudi za kutaka mafanikio,Leo tunaye Benedictor Jacob ambaye anaichezea Palos FC ya Ligi Daraja la Kwanza nchini Kenya, Palos ipo kwenye mazingira mazuri ya kupanda Ligi Kuu msimu ujao.

Watanzania wengine ambao wanacheza Kenya ni Abdul Hilal wa Tusker, Abdallah Hamis (Sony Sugar), Aman Kyata (Chemelil Sugar) za Ligi Kuu, Hamad Mbumba wa Stima FC ambayo imeshuka daraja msimu huu na Juma Mpondo wa KCB FC nayo ya Daraja la Kwanza.

Bene amezungumza na Spoti Mikiki na kusema safari yake ya soka ilivyoanza hapa nchini mpaka kufika Kenya ambapo na kwenyewe amepanga kuendelea kupatumia kama njia ili aweze kupiga hatua zaidi.

“Tupo nafasi ya nne kwenye msimamo wa ligi, tunahitaji kushinda mchezo wetu wa mwisho kisha walio juu yetu wapoteze ili tumalize kwenye nafasi ya tatu, kama ikiwa hivyo inamaana tutakuwa na nafasi ya kucheza mchujo.

“Mchezaji wa daraja la kwanza moja kwa moja mpaka timu ya Taifa ni jambo gumu kidogo, labla kama ningekuwa nacheza Ulaya kwa sababu ngazi ya ligi za chini Ulaya ni kubwa mno ukilinganisha na hizi za Ligi Kuu hasa Ukanda wa Afrika Mashariki na Kati.

“Kama nitafanikiwa kuipandisha timu daraja, ninajua nami nitakuwa kwenye nafasi nzuri ya kuichezea Taifa Stars, inawezekana na kikubwa ni kuendelea kuwa na uvumilivu mpaka mwisho, mbona Hilal na Hamis wameitwa,” anasema Bene.

Hata hivyo Bene mwenye miaka 21 ambaye ana uwezo wa kucheza mshambuliaji wa mwisho ‘9’ au winga wa kulia ama kushoto, amesema kupata nafasi kwa Hilal na Hamis kwenye timu ya Taifa kumewafanya kuamini kuwa inawezekana.

”Mwanzo kulikuwa na ugumu wa kuita mchezaji ambaye anatoka kwenye ligi za maeneo ya karibu na Tanzania, siwezi kusema kuwa kocha alikuwa akiita timu kwa mazoea ila naona kama mlango wa fursa, umefunguliwa,” anasema mchezaji huyo.

African Lyon inaonekana ni kama kiwanda cha kutoa wachezaji wengi ambao wamekuwa na bahati ya kupata nafasi ya kucheza nje, hata Mbwana Samatta alipitia hapo kabla ya kujiunga na Simba kisha TP Mazembe.

“Mwanzo wangu kabisa ulikuwa DYOC, halafu ndiyo nikajiunga na African Lyon ambayo ilinifanya kupata nafasi ya kwenda nje kwa mara ya kwanza kwenye maisha yangu ya soka na kujiunga na AFC Lupopo ya Congo.

“Msimu wa 2014-2015 nilipata majeraha ya goti kwa hiyo ilinibidi kukaa nje mwaka mzima,nilivyopona majeraha yule mwalimu wangu wa Kituo cha DYOC, Aluko aliniambia kuna nafasi Kenya ya kujiunga na Palos.

“2016 nilijiunga nao na hadi leo bado nipo timu hiyo ya daraja la kwanza, mchezaji ni sawa na mkulima, siku zote mkulima mzuri hatakiwi kuchagua jembe, sikuona haja na mimi ya kuchagua timu,” anasema Bene.

Hata hivyo, Bene ameuzungumzia msimu huu ambao unaelekea ukingoni kwa madaraja ya chini na kudai itakuwa vyema kama watafanikiwa kuipandisha daraja timu hiyo.

“Binafsi nimeifungia timu mabao matano na kutengeneza matatu, ligi ilikuwa ngumu na nimekuwa nikicheza kwenye nafasi tofauti, kuna muda kocha anaweza kunitumia kwenye maeneo ya ulinzi, endapo labla mchezaji muhimu wa eneo hilo amekosekana.

“Wastani wa mabao niliofunga sio mkubwa ila nitauchukulia kama changamoto ya kunifanya kuongeza makali kwenye ufungaji na utengenezaji wa nafasi zaidi,” anasema Bene.

Ni ngumu kujua timu gani itapanda daraja, amesema Bene kutokana na ushindani ulivyo kwenye ligi hiyo, hakusita kusema unaweza kuipa sana nafasi timu fulani lakini mwisho wa msimu inaweza kukosa hata kwenye nafaso 10 za juu kwenye msimamo.

Bene alimalizia kwa kusema amejiwekea malengo ya kwenda kufanya majaribio miezi kadhaa ijayo ili kuona kama anaweza pia kuanza kukumbana na changamoto mpya za soka.

“Siwezi kukaa kwenye hii timu kipindi chote cha maisha yangu,hapana. Napenda sana kupiga hatua hivyo itanibidi kwa siku za hivi karibuni kwenda kufanya majaribio sehemu nyingine, nitalenga nchi za Afrika Magharibi,” anasema mchezaji huyo.

Monday, November 20, 2017

Watanzania wanavyofanya kweli Marekani, watwaa ubingwa

 

By Eliya Solomon, Mwananchi

Wachezaji wa Kitanzania wanaocheza soka Marekani, Daud Aboud na Adolf Bitegeko wameiwezesha timu yao ya LCC Men’s Soccer kuchukua ubingwa wa ligi ya Golden Valley Conference.

Kuchukua kwao ubingwa huo, kumeifanya timu ya Watanzania hao kupata nafasi ya moja kwa moja kwenda kushiriki mashindano ya mabingwa wa kanda mbalimbali nchini humo.

Spoti Mikiki imefanya mawasiliano na vijana hao ambao wamezungumza mengi kuhusu namna walivyochukua ubingwa huo.

“Asante ila natanguliza shukrani zangu za dhati kabisa kwa Mungu ambaye amekuwa akitusaidia, pili Spoti Mikiki kwa kuwa pamoja na sisi kwenye kila hatua yetu, mmetuongezea uthamani mbele ya macho ya Watanzania.

“Hatuna uwezo wa kuwalipa ila mbarikiwe sana, furaha yangu ni kushinda, haikuwa kazi nyepesi lakini imewezekana,” anasema Daud ambaye awali alikuwa na Mtanzania mwingine, Ronald Mkaramba ambaye kwa sasa yuko TUMUT FC iliyoko Jimbo la Texas, Marekani.

“Daud nimekuja huku, nilimweleza sipendi kushindwa na niliwataka wachezaji wenzangu tushirikiane ili kwa pamoja tufanikishe kuwa mabingwa ndicho kilichotokea,” anasema Bitegeko aliyeanzia soka yake katika kituo cha vijana cha Azam kilichoko Chamazi.

Msimu ulivyoanza

“Dalili za kutwaa ubingwa zilianza kutokea, timu yetu ilikuwa imefanyiwa maboresho kwa kuongezwa wachezaji kadhaa ambao walikuwa wanaonekana wana uwezo, hapo ilikuwa bado hajafika Bitegeko.

“Kila timu ilikuwa inataka kuanza vizuri msimu hivyo ilibidi tufanye kazi ya ziada kupata matokeo ya ushindi kwenye michezo yetu ya mwanzoni mwa msimu,” anasema Daud.

Daud amefunga mabao saba na kutengeneza 10 huku Bitegeko ambaye hakuuanza msimu na timu hiyo akifunga mabao matano na kutengeneza mengine matatu.

Ushindani ulivyo

“Japo tumepoteza mchezo mmoja na kutoka sare mitatu, ila ushindani ulikuwa mkubwa sana, ujue kuna watu ukiwaambia tumepoteza mchezo mmoja pekee anaweza kudhani kuwa ligi ni nyepesi,” anasema Daud

“Ushindani ulikuwa wa pande mbili, wa kwanza ni ule wa timu yangu na hizo nyingine, pili ni mimi binafsi ambao ulikuwepo kuhakikisha napata nafasi ya kucheza mara kwa mara.

“Nilipofika nilikuta ligi inaendelea hivyo ilibidi nijitume sana ili niwe napata nafasi ya kucheza,nilicholenga nilifanikiwa hivyo kiujumla ushindani wa ndani ya timu umenijenga pili wa ligi umetufanya kuwa bora zaidi ndiyo maana tumekuwa mabingwa,” anasema Bitegeko.

Chachu ya ubingwa

“Kuna uwezo wa wachezaji binafsi, mbinu za makocha pamoja na muunganiko wetu wa uchezaji, matokeo ya yote hayo naamini yametufanya kuchukua ubingwa,” anasema Bitegeko ambaye ni mchezaji wa zamani wa Azam.

“Kilichotukwamisha msimu uliopita ndicho ambacho kocha wetu amekifanyia kazi, ninaamini sana kupitia mbinu vingine ni ziada japo vinaweza kuchangia kwa kiasi chake upatikani wa matokeo,” anasema Daud.

Mawakala wawanyemelea

“Kibaya au kizuri ni kwamba tupo chini ya LCC Men’s Soccer hivyo suala la kuchuliwa kwa kipindi hiki ni gumu kwa sababu tupo kwenye mafunzo, tukishahitimu tutakuwa huru kuuzwa au kutafuta timu za kujiunga nazo.

“Mfano, mimi nina madili matatu mpaka sasa lakini siwezi kwenda huko kwa sababu sijahitimu, mbali na kucheza kwetu soka nadhani unakumbuka kama hapa tunapata masomo ya kawaida hivyo sio rahisi kuondoka.

“Ukisema uondoke, ina maana unakuwa umekatisha masomo ambayo baadaye yanaweza kuja kuwa msaada hasa baada ya kumalizika maisha ya mpira, kiufupi mawakala wapo ambao wananisumbua,” anasema Daud.

Ishu za wachumba zikoje?

“Ha ha ha ha ha!! umenifanya nifurahi aisee, mimi ni mgeni labla mwenzangu Daud ambaye nimemkuta,kingine hata watu ninao fahamiana nao ni wachache na hakuna hata msichana mmoja ambaye nina mazoea naye,” anasema Bitegeko.

“Wasichana wapo wengi sana, kati ya vitu ambavyo huwa najiepusha navyo ni hao, najua ili kufikia malengo ninayoyataka ni lazima nijitunze, ngoja nikwambie jambo tangu nifike huku sijawahi kuwa na mahusiano ya kimpenzi na msichana yeyote.

“Nikiendekeza hapa hayo mambo inamaana nitakuwa nacheza na maisha yangu, wazazi,ndugu jamaa na marafiki wamekuwa wakinisisitizia kufanya kilichonileta huku, sisemi kama sintokuwa na msichana hapana ila mpaka muda sahihi utakapofika,” anasema Daud.

Ratiba za siku

“Saa 12 alfajiri huwa tunapata chai na saa 1 asubuhi tunakwenda kufanya mazoezi binafsi kisha tukitoka huko tunajiandaa kwa ajili ya kwenda darasani, mida ya mchana, kuanzia saa saba ni kwenda mazoezini na timu.

“Baada ya mazoezi na timu, tunaamua siku moja moja kwenda kufanya mazoezi ya gym, hayo ni mazoezi ambayo huchukua saa moja kisha tunarudi nyumbani kuendelea na ratiba ndogo ndogo,” anasema Bitegeko.

“Hiyo ndiyo ratiba yetu ilivyo, vingine vinaweza kuwa vya kawaida mfano kucheza game, kuangalia muvi lakini vyote hivyo hufanyika tukiwa nyumbani,” anasema Daud.

Monday, November 20, 2017

Kibiga; kiungo anayebebwa na changamoto za soka

 

By Eliya Solomon, Mwananchi

Moja ya viungo wanaochipukia kwa kasi msimu huu wa Ligi Kuu Tanzania Bara ni Yakubu Kibiga wa Majimaji ya Songea ambayo msimu uliopita ilinusurika kushuka daraja.

Kiungo huyo, 21, katika mahojiano na Jarida la Spoti Mikiki anasema changamoto huwa zinamjenga ili kufikia malengo yake.

“Nilikuwa mzee wa mechi za ndondo tu mitaani, hata Majimaji waliuona uwezo wangu kwenye mashindano hayo, mbali na Majimaji ambayo naichezea pia wakati ninasoma niliwahi kuichezea, Ashanti United ya Ilala.

“Wanasoka wengi hasa ambao tunatokea mitaani,tunakutana na changamoto nyingi sana, moja ya changamoto hizo ni nafasi, unaweza kuwa na uwezo mzuri lakini usipate timu ya kuichezea.

“Binafsi changamoto za namna hiyo zilikuwa zinanifanya kucheza kwa juhudi zaidi, popote pale ili niwe na ushawishi wa uwezo, ukifanya kuliko kawaida, hawawezi kukuacha,” anasema kiungo huyo.

Kibiga ameonyesha kuvutiwa mno na uchezaji wa kiungo wa Ruvu Shooting, Shaaban Kisiga na kusema wakati anakua kisoka alitamani siku moja kucheza soka kama analocheza kiungo huyo mkongwe. “Yule jamaa unaweza ukasema ni kijana, uwezo wake bado unamruhudu kucheza soka la ushindani,” anasema Kibiga ambaye kidunia nzima anamhusudu, Bastian Schweinsteiger wa Chicago Fire.

Nyota huyo wa Majimaji pia amesema hana neno juu ya kuzichezea Simba na Yanga kikumbwa ni wao kutekeleza mahitaji yake muhimu ambayo atayahitaji.

“Kila siku huwa nawaza namna ya kupiga hatua zaidi, ukweli haufichiki kuwa wachezaji wengi wanaweza kucheza Simba,Yanga na Azam kwa sababu ni timu kubwa.

“Ndoto zangu ni kucheza nje ya nchi lakini ikitokea moja ya timu hizo wamenihitaji, mbali na yote nitakuwa tayari kutumia nafasi hiyo kama njia, hizo ni timu ambazo zinacheza mashindano ya kimataifa.

“Nachojua mashindano ya kimataifa yanaweza kuwa fursa kwa mchezaji kujitangaza,” anasema mchezaji huyo ambaye alianza kucheza soka la utotoni kwenye timu ya Shababiy ya Kigamboni.

Monday, November 20, 2017

Baada ya fitna za FDL, Ligi Kuu kuna haya

 

By Thobias Sebastianr, Mwananchi

Kama ulikuwa haujui nakukumbusha tu mzunguko wa pili wa lala salama wa Ligi Daraja la Kwanza ulishanza kitambo na timu mbili za juu katika kila kundi zitapanda Ligi Kuu msimu ujao wa 2018-19.

Msimu ujao zitashuka timu mbili na kupanda sita ambazo zitatimiza timu ishiriki zitakazokuwepo katika ligi tofauti na msimu huu ambao una timu kumi na sita na kwa maana hiyo mechi za ligi zitaongezeka.

Wakati ligi ikiendelea, kumekuwa na fitna mbalimbali, ambazo ama zinatengenezwa au ni uamuzi wa mtu anaamua inakuwa hivyo kuhakikisha timu fulani inafika.

Spoti Mikiki linawakumbusha tu, viongozi, wachezaji, wapenzi na mashabiki ambao timu zao zitapata nafasi ya kupanda Ligi Kuu msimu, wakumbuke kuna mambo ambayo lazima watakutana nayo na wanatakiwa kukabiliana nayo hivyo wakipiga fitna wajue kujipanga.

Timu bora

Katika kila msimu, lazima kutakuwa na timu ambayo itakuwa bora kama msimu huu ni wazi kwamba Simba ndio timu bora kutokana na kikosi chao jinsi kilivyo licha ya kuwa na changamoto za hapa na pale ambazo klabu yoyote lazima ikubali kukutana nazo.

Hapa ndio nawakumbusha kuwa katika timu ambazo zitapata bahati ya kupanda Ligi Kuu wajue kuna mnyama.

Pia zinatakiwa kujipanga na kuwa timu bora kama ilivyo Singida United kwa sasa au Mbeya City ilivyopanda Ligi Kuu msimu wa 2013-14.

Pia kuna timu kama Yanga, Azam ambazo hazifanyi makosa kwa timu ndogondogo na wanaopanda wajipange wanaweza kupigwa mabao hata zaidi ya matatu hadi saba.

Kama wakishindwa kuwa miongoni mwa timu bora watakuja Ligi Kuu kama kushanga na kupita tu kwani watakuwa timu ya kugawa pointi na kurudi walipotoka yaani Ligi Daraja la Kwanza.

Vikosi vya thamani

Timu za Daraja la Kwanza zinaweza kuwa na vikosi vya Sh6milioni au hata Sh10milioni, huwezi kukuta timu ambayo inatoka Ligi Daraja la Kwanza kuwa na kikosi kilichokuwa na thamani kubwa.

Singida United imepanda ikichechemea, lakini wadhamini wamewabeba na kuleta ushindani haswa kwa klabu kubwa za Simba, Yanga na Azam.

Singida United wamejipanga vya kutosha na wana wadhamini ambao watasaidia kuendesha timu yao bila shaka.

Timu zitakazopanda Ligi Kuu lazima zikutane na vikosi vyenye thamani na wachezaji wenye majina makubwa kama Emmanuel Okwi, Obrey Chirwa, Aishi Manula, Ibrahim Ajib au Himid Mao.

Mchezaji mmoja mkali

Ukiangalia katika timu zote zilizokuwa katika Ligi Kuu ambazo zinafanya vizuri lazima zitakuwa na mchezaji mmoja au zaidi ambao ndio unaweza kusema nyota wa timu kwani anatoa mchango mkubwa wa kuisaidia timu.

Wapo wengi lakini kwa ufupi Yanga kuna Ibrahim Ajib na Obrey Chirwa, Simba Shiza Kichuya na Okwi, Azam Mbaraka Yusuf na Himid Mao, Tanzania Prison kuna Mohammed Rashid na Mbeya City kuna Eliud Ambokile.

Hao ni baadhi ya wachezaji ambao wanafanya vizuri katika timu zao sasa nawakumbusha tu kuwa kama timu za Daraja la Kwanza zinakuja huku tayari zije zimeshajiandaa kisaikolojia kuwa zinatakiwa kuja kupambana na wachezaji wakali na tayari wako juu katika anga za soka hasa Ligi Kuu Bara.

Gharama za usafiri

Timu za Daraja la Kwanza zinapanda kwa mbwembwe lakini ligi ikichanganya si jambo la kushangaza kusikia wamekwama katika sekta ya uchumu.

Matatizo hayo ya kiuchumi yanaweza kuwa kushindwa kulipa mishahara na posho wachezaji na kushindwa hata kusafirisha timu kutoka mkoa waliokuwepo kwenda mkoa mwingine na tumeshasikia baadhi ya timu msimu uliopita kukwama katika usafiri.

Nawakumbusha tu, zinatakiwa kujipanga mapema kutafuta kusaka wafadhili kama vipi kuwapa basi ili wawe na uhakika wa safari kama ilivyo kwa Singida, Mbao, Mtibwa, Mbeya City, Yanga, Simba na klabu nyingine kuwa na gari la uhakika la kusafiria muda wowote kwenda mahala popote ambako mtakuwa mnacheza mechi ya ligi au FA.

Waamuzi

Si jambo la kushangaza katika Ligi Daraja la Kwanza kusikia mwamuzi kachezea kichapo kisa kachezesha vibaya au mwamuzi kuamuru maamuzi ambayo hayakuwa sahihi ili kufaidisha timu fulani kupata matokeo.

Jambo hili katika Ligi Kuu halifanyiki waziwazi kama ilivyo huko katika Daraja la Kwanza ila nachukua jukumu la kuwakumbusha haya mambo huku napo yapo pia ingawa si mara kwa mara ila manatakiwa kuchukua tahadhari na kijipanga.

Kuna penalti, kuna magoli ya offside, kuna wakati bao tamu lakini linakataliwa. Huku hakuna kuhamaki, unatuli tu kama mgonjwa anapopigwa sindano.

Zomeazomea

Simba, Yanga ndio klabu zenye mashabiki wengi kwa sasa hapa nchini na wala si jambo la kushangaza kuona mnacheza na timu hizo moja ya mchezaji wenu ambaye anacheza vizuri akawa anazomewa katika Uwanja wa Taifa, Uhuru na hata kiwanja chenu cha nyumbani.

Nawakumbusha huku kuna zomea zomea ya mashabiki ambayo watakumbana nayo

wachezaji na makocha na kama mkishindwa kuvumilia mnaweza kujikuta mnashindwa kuhimili na kurudi mlipotoka lakini vinginevyo timu itafanya vizuri kama Mbao, Singida na hata Azam walipopanda Ligi Kuu 2008.

Jamvi la wageni

Si kitu cha kushangaza kuona timu ilikuwa kinara Ligi Daraja la Kwanza na kucheza msimu mmoja tu Ligi Kuu na kurudi walipotoka na hii yote kutokana na kutojipanga katika maandalizi ya michuano hiyo.

Katika misimu kadhaa, tumewahi kuona timu zinapanda Ligi Kuu lakini zinashindwa kuleta ushindani na inakuwa timu ya kugawa tu pointi katika kila mechi na mwisho wa msimu kujikuta katika zile timu tatu ambazo zinashuka.

Timu itakayobahatika kupanda Ligi Kuu, inatakiwa kukaza buti na kama ikishindwa kufanya hivyo timu yenu itakuwa ya kugawa pointi tu na kuitwa jamvi la wageni.

Monday, November 20, 2017

Utajiri ronaldo ni pesa popote

 

Kati ya wachezaji wanaoongoza kwa kipato ni Cristiano Ronaldo, lakini vilevile Lionel Messi naye ni mmoja wa wachezaji wanaopata pesa nyingi kutokana na mikataba na fedha anazolipwa na klabu yake. Messi anapata jumla ya Dola 80milioni kwa mwaka.

Mwingine ambaye chati yake imepanda ghafla ni mshambuliaji wa PSG, Neymar. Mbrazil huyo kwa sasa anaingia kwenye kundi hilo akipokea kitita cha Dola37milioni. Neymar pia ana mikataba mbalimbali yote ni hela.

Monday, November 13, 2017

Msikie Samatta-Mambo yanaanza kunyooka

 

By Mwandishi Wetu, Mwananchi

Achana na kuumia, achana na kupasuliwa goti na kukaa nje ya dimba kwa wiki nane, mshambuliaji na nahodha wa Taifa Stars, Mbwana Samatta anaamini mambo yanafunguka.

Kwanza habari mbaya kwa Samatta ni kwamba amefanyiwa upasuaji baada ya kuumia goti. Alifanyiwa upasuaji wiki iliyopita na atalazimika kukaa nje ya uwanja kwa wiki nane.

Samatta aliyewashukuru madaktari kwa tiba, alilazimika kutoka katika mchezo kati ya KRC Genk dhidi ya Lokoren. Mechi hiyo ya Ligi Kuu ya Ubelgiji.

Mshambuliaji huyo alipumzishwa katika dakika ya 40 na nafasi yake kuchukuliwa na Nikolaos Karelis.

Kutokana na hali hiyo, Samatta amekosa mechi ya jana ya Taifa Stars na Benin na akipata nafuu vizuri, ataanza kuonekana uwanjani mwakani ikiwemo mchezo wa Machi 23 dhidi ya Uganda wa kutafuta nafasi ya kufuzu Fainali za Afrika (Afcon).

Anachokisema

Samatta, anasema ndoto ya kutambulika katika medani ya soka duniani inatarajia kutimia muda mfupi ujao.

Anasema hatua ya jina lake kuwemo katika orodha ya nyota 30 wanaowania tuzo ya mchezaji bora wa Afrika mafanikio makubwa.

“Nina matumaini ya kufanya vizuri, huu ni mwanga ninaouona. Nimefurahi kwa kuwa kile ninachokifanya hapa Ubelgiji kinaonekana, ninaamini pamoja na kuteuliwa kuwania tuzo, ni kama mambo yamefunguka na ni njia ya kufika mbali zaidi ya hapa nilipo.”

Monday, November 13, 2017

Bado siku 47 tu

 

London, England. Msimu wa majira ya kiangazi umewadia kwa klabu za Ulaya kuingia vitani kuwania saini ya wachezaji nyota kuanzia Januari Mosi hadi 30.

Kila kocha ana shauku kubwa ya kutaka majina makubwa ya wachezaji wanaovuma kwa lengo la kuimarisha kikosi katika usajili wa majira ya kiangazi.

Majina makubwa yanayotawala midomoni mwa makocha maarufu ni Philippe Coutinho na Alexis Sanchez.

Coutinho anayewika Liverpool amekuwa akitakiwa kwa udi na uvumba na klabu ya Barcelona iliyomtupia ndoano mara tatu bila mafanikio.

Baada ya kushindwa kumsajili majira ya kiangazi, Barcelona imeongeza dau hadi kufikia Pauni 134 milioni zinazoonekana kukubaliwa na klabu hiyo ya Liverpool.

Pia Sanchez ameiteka dunia tangu alipoweka ngumu kumwaga wino Arsenal akishinikiza kutaka kuondoka kabla ya klabu hiyo kumbania.

Arsenal imemuwekea ngumu mchezaji huyo wa kimataifa wa Chile kuondoka licha ya kuwekewa mzigo wa maana na matajiri wa Etihad Manchester City.

Mbali na washambuliaji hao, libero wa Southampton Virgil van Dijk anaumiza vichwa vya makocha wengi Ulaya, baada ya kucheza kwa kiwango bora msimu huu.

Kocha wa Liverpool, Jurgen Klopp, amekuwa na mapenzi makubwa na beki huyo wa kati kutoka Uholanzi akitaka kuimarisha ngome.

Usajili wa wachezaji hao umekuwa gumzo kutokana na umuhimu wa nyota hao ambao wote waligoma kutia saini mkataba wa kubaki katika klabu zao.

Usajili wa majira ya kiangazi, unatarajiwa kuiteka dunia kwa kuwa makocha wengi wameingia vitani kuwania saini za nyota wanaotaka kwenda kuimarisha vikosi vyao.

Philippe Coutinho (Liverpool)

Ni kiungo mshambuliaji wa timu ya taifa ya Brazil ambaye amekuwa kwenye kiwango bora msimu huu.

Mchango wake Liverpool umekuwa mkubwa tangu alipojiunga na kigogo hicho kutoka Inter Milan ya Italia. Barcelona ina amini Coutinho ndiye chaguo sahihi wa kuziba pengo la Neymar aliyetimkia Paris Saint Germain (PSG).

Coutinho amejenga kombineshi bora Liverpool licha ya kushambulia na kufunga mabao, lakini amekuwa chachu ya mafanikio ya nyota Sadio Mane na Mohamed Salah.

Alexis Sanchez (Arsenal)

Arsenal inahaha kumbakiza Sanchez majira ya kiangazi, baada ya kugoma kuongeza mkataba licha ya kuahidiwa nyongeza ya mshahara na posho.

Kocha Arsene Wenger alimsajili Sanchez akiwa na nia ya kuwaziba mdomo mashabiki waliokuwa wakimdhihaki baada ya kumpiga bei nahodha wake Robin Van Persie kwenda Manchester United.

Baada ya kutamba katika msimu wa kwanza akitokea Barcelona kiwango cha Sanchez kimeporomoka baada ya kuibua mzozo wa kutaka kuondoka majira ya kiangazi msimu uliopita.

Manchester City imeingia vitani kuwania saini ya nyota huyo katika usajili mpya wa majira ya kiangazi ikitaka kujaribu tena bahati yake.

Kocha wa Man City, Pep Guardiola aliyewahi kuinoa Barcelona, ni shabiki mkubwa wa Sanchez na ameapa kula sahani moja na Arsenal. Klabu hiyo ilitenga Pauni 50 milioni.

Virgil van Dijk (Southampton)

Southampton imeapa kutompiga bei beki huyo wa kati kutokana na ubora wake katika safu ya ulinzi akiwa mmoja wa vitasa mahirin duniani.

Licha ya Liverpool kutoa Pauni 60 milioni, lakini klabu hiyo ilimuwekea ngumu majira ya kiangazi msimu uliopita kabla ya libero huyo kugoma.

Van Dijk aligoma kuitumikia klabu hiyo na alirejea nyumbani Uholanzi wakati timu hiyo ikiwa katika maandalizi ya mechi za kirafiki za kujiandaa na msimu ujao.

Hata hivyo, Liverpool imedai itapambana kufa au kupona kuhakikisha beki huyo wa Southampton anangoka majira ya kiangazi msimu ujao.

Riyad Mahrez (Leicester City)

Misimu miwili iliyopita, iliibuka klabu moja kutoka King Power, Leicester City isiyokuwa na jina katika medani ya soka kwenye Ligi Kuu England.

Kocha Mtaliano Claudio Ranieri, aliibuka shujaa wa aina yake baada ya kuipa ubingwa wa Ligi Kuu England kwa kuvipiku vigogo vya soka nchini humo.

Ranieri aliyetua Nantes baada ya kufukuzwa ndiye aliyewaibua kina Riyad Mahrez ambaye amekuwa gumzo duniani kutokana na ubora wake.

Mahrez, mchezaji wa kimataifa wa Algeria, alikuwa nguzo ya Leicester City na mabao yake yalikuwa chachu ya mafanikio ya klabu hiyo.

Baada ya klabu za England kushindwa kupata saini yake msimu uliopita, Real Madrid imeingia vitani kutaka huduma yake msimu ujao wa majira ya kiangazi.

Zidane ambaye ana asili ya Algeria, anamtaja kiungo huyo wa pembeni ni mchezaji mwenye sifa ya kucheza Santiago Bernabeu kama anavyomtaja Harry Kane.

Ross Barkley (Everton)

Bila shaka Ronald Koeman atakuwa kwenye lawama kubwa baada ya kugoma kumpiga bei kiungo huyo.

Barkley alipambana sana kuondoka Makao Makuu Goodison Park, lakini kocha huyo aliyetimuliwa alimwambia ‘No’.

Chelsea ilitaka kwa udi na uvumba, lakini Koeman alimwambia huondoki ng’o huku akitishia kumuweka benchi endapo ataendelea kumsumbua.

Bila shaka dau lake la awali kutoka Pauni 25 milioni linaweza kuongezeka baada ya kufukuzwa Koeman.

Tottenham Hotspurs imerusha ndoano kutaka saini yake katika majira ya kiangazi huku ikimuahidi nyongeza ya mshahara kutoka Pauni 100,000 anaolipwa Everton.

Jonny Evans (West Brom)

Beki hakuwa na jina kubwa Manchester United licha ya kupewa nafasi katika safu ya ulinzi akicheza pacha na Chriss Smalling au Phil Jones.

Baada ya kupigwa bei kujiunga na West Ham Brom, thamani ya beki huyo wa kati imeongezeka na sasa anawindwa kwa nguvu Ulaya.

Manchester City imejaribu mara mbili kupata saini yake bila mafanikio, lakini msimu ujao wa majira ya kiangazi bila shaka itaongeza kasi kumng’oa West Brom.

Pep Guardiola anamtaka Evans kuziba pengo la nahodha Vincent Kompany na kwenda kuongeza nguvu katika safu ya mabeki wa kati akicheza sanjari na John Stones na Nicolas Otamendi.

Monday, November 13, 2017

Hawa wanaweza kucheza ligi popote duniani

 

By Thobias Sebastian @Mwananchi.

Shirikisho la Soka Afrika (CAF), wiki iliyopita lilitangaza majina ya wachezaji ambao wanacheza Ulaya ila ni wa Afrika kwa maana ya kumtafuta mmoja ambaye atakuwa mchezaji bora wa Afrika kwa mwaka huu.

Nyota wa Tanzania Mbwana Samatta ametajwa katika wachezaji hao akiwa sambamba na wakina Mohammed Salah na Sadio Mane wa Liverpool ya Uingereza na nyota wengine wengi wanaocheza Ulaya.

Samatta anaweza kuwa chachu kwa wachezaji wa Tanzania kupenda kucheza nje kama ilivyo kwa wakina Saimon Msuva, Farid Mussa na wengine wengi waliotamani zaidi mafanikio ya kisoka.

Gazeti hili linakuletea wachezaji ambao unaweza kufikiria kuwa kama wakikaza na wakiwa na roho ya kutaka mafanikio katika soka na kuacha kufikiria zaidi klabu za Simba, Yanga na Azam wanaweza kufika mbali.

Aishi Manula, Simba

Unaweza kusema ndiye golikipa namba moja kwa sasa hapa nchini kwani bila shaka ndio kipa ambaye amecheza katika kiwango chake cha juu bila ya kushuka kwa wakati wote akiwa katika klabu yake na timu ya Taifa.

Manula ndio kipa namba moja wa Simba na timu ya Taifa alisajiliwa na kikosi hiko akitokea Azam, mwanzoni mwa msimu huu lakini amedumu katika kiwango kilele licha ya kucheza timu yenye presha kubwa ya mashabiki.

Ukweli usiopingika Manula kwa uwezo wake, umbile lake, na umri wake ni wazi kwamba anaweza kuwa miongoni mwa wachezaji ambao wasipolewa sifa za mashabiki wa Simba na kufikiria kucheza nje na wakafanikiwa.

Erasto Nyoni, Simba

Ana uwezo wa kucheza nafasi nyingi kama baki, kiungo mkabaji na mshambuliaji na kadumu katika kikosi cha timu ya Taifa katika makocha wote waliowahi kufundisha tangu alipoitwa kwa mara ya kwanza na Mbrazil Marcio Maximo.

Japo umri umemtupa mkono, na kama haitoshi, Erasto ameendelea kuwa mahiri na kudumu katika kiwango chake kile kile tangu alipokuwa na Azam na sasa Simba na ameweza kuwa mchezaji mwenye mchango mkubwa katika kikosi hiko na amehusika katika nusu ya magoli ambayo wamefunga.

Sababu kubwa ambayo Erasto anaingia katika wachezaji ambao wanaoweza kucheza popote duniani, ni uwezo wake wa kutumia miguu yote miwili bila shaka na kuweza kucheza nafasi zaidi ya moja uwanjani jambo ambalo kwa dunia ya sasa kuna wachezaji wachache sana kama yeye.

Mohammed Hussein, Simba

Hakuanza vizuri msimu huu kwani ameanza na majeraha katika kikosi chake cha Simba jambo ambalo alikuwa na nafasi ya kusuasua katika kikosi chake lakini mambo yameanza kukaa sawa na ameanza katika mechi tatu zilizopita katika kikosi cha kwanza.

Ana uwezo mzuri wa kucheza katika eneo la fulubeki wa kushoto jambo ambalo anaingia katika wachezaji wenye uwezo wa kucheza katika nchi yoyote Ulaya na kwa umahiri wake mkubwa wa kukaba na kushambulia anaweza kupata mafanikio zaidi kama atapata nafasi ya kucheza huko.

Tshabalala ana uwezo pia wa kupiga krosi ambazo straika hawezi pata tabu ya kumalizia na kuweka kambani jambo ambalo tunaona wapo wachezaji Ulaya wanacheza kama yeye kwahiyo kama atakubali kuziacha kelele za mashabiki wa Simba anaweza kuwa miongoni mwa wachezaji ambao wanacheza nje.

Kelvin Yondan, Yanga

Beki kisiki mkongwe wa kati wa Yanga. Ana uwezo wa kucheza mipira ya juu na chini lakini kama haitoshi ni hodari kuwazuia mastraika wote wasumbufu, pia anauwezo wa kucheza mpira wa nguvu na wa kistarabu.

Uzoefu na uwezo wa Yandon ni wazi kwamba ana uwezo mkubwa wa kucheza ligi yoyote Ulaya kwani ni miongoni mwa mabeki wa kati waliokuwa imara tuliokuwa nao hapa nchini takribani miaka mitano sasa.

Aggrey Morris, Azam

Si mwongeaji sana lakini kazi yake inatosha kabisa kumwelezea vya kutosha kwani msimu huu ametengeneza ngome ngumu ya ulinzi na Yakub Muhammed, lakini si hiyo tu amekuwa bora wakati wote katika kikosi cha Azam.

Morris amehimili mikikimikiki ya Ligi Kuu kwa uwezo mkubwa kabisa kwani amewazuia mastraika wote wasumbufu raia wa kigeni na wazawa pia, na kwa uwezo huo anaingia katika wachezaji ambao wanaweza kucheza ligi nje ya Tanzania.

Himid Mao, Azam

Kiungo mkabaji wa Azam na Taifa Stars huwezi kutaja kiungo mkabaji kwa sasa hapa nchini ukaacha jina na Himid ambaye amekuwa akiimarika kila inapoitwa leo katika kila mechi ambayo anacheza unaweza kusema ni mchezaji mpya.

Himid ndio kiungo bora kwa sasa hapa nchini kuliko kiungo yoyote yule na kabla ya msimu huu kuanza alikwenda nchini Denmark ambako alifanya majaribio katika klabu ya Randers FC, kufuzu lakini masuala ya kimaslahi yalikwamisha dili hiyo.

Shiza Kichuya , Simba

Msimu mmoja na nusu tu alichokuwa katika kikosi cha Simba ametosha kuonyesha kuwa ni mchezaji mwwa aina gani. Amefunga magoli 12, msimu uliopita kwenye ligi kuu Bara.

Kichuya pia msimu huu licha ya kikosi cha Simba kutawaliwa na wachezaji nyota kama Haruna Niyonzima na Emmanuel Okwi amekuwa katika kiwango chake kile kile kwani hadi sasa ameshafunga mabao matano huku akiifunga Yanga katika mechi tatu mfululizo.

Mkataba wa Kichuya unamalizika mwisho wa msimu huu na kiwango alichoonesha ndani ya Simba ni wazi kwamba kutakuwa na timu nyingi ambazo zinahitaji huduma yake kutoka nje na huu ndio wakati wake wa kwenda kucheza nje na nchi yoyote anaweza kucheza.

Said Ndemla, Simba

Kiungo fundi wa Simba mwenye nidhamu nje na ndani ya uwanja bila shaka kwa uwezo wake wa kucheza mpira wa kupiga pasi ndefu na fupi ndio kiungo ambaye anahitajika katika timu yoyote ile duniani na sina shaka kusema kuwa anastahili kwenda kucheza soka Ulaya na kutia ufundi zaidi.

Ndemla ana uwezo wa kupiga mashuti makali nje ya 18 pia ana uwezo wa kutoa pasi za mwisho na kupiga mipira ya azabu na huko Sweden ambako anakwenda kufanya majaribio, hakuna shaka ni wazi atafanya vizuri na kusajiliwa katika klabu ya AFC Eskilstu anayokwenda kujaribiwa.

Mzamiru Yassin, Simba

Kiungo wa Simba mwenye kipaji kikubwa cha kupiga pasi za mwisho na uwezo mkubwa wa kukaba ni wazi kwamba ameonyesha uwezo kwani kila inapoitwa leo amezidi kuimarika anapokuwa katika kila mechi hata katika kikosi cha Stars pia.

Mzamiru amekuwa muhimili katika kikosi cha Simba na ni sehemu ya mafanikio ya kikosi cha timu hiyo, mkataba wake unamalizika mwisho wa msimu huu bila ya kupepesa macho ni miongoni mwa wachezaji wanaoweza kucheza nje kwani amukuwa na kiwango kinachoimarika kila wakati.

Mbaraka Yusuf, Azam

Straika wa Azam ambaye walimsajili kutoka Kagera Sugar msimu uliopita alifunga magoli 12, na kuisaidia timu yake kumaliza katika nafasi ya tatu katika msimamo wa Ligi Kuu Bara.

Ameanza msimu mpaka sasa ameshafunga mabao matatu na kwa uhodari wake wa kufunga na kusumbua walinzi. Ana uwezo wa kucheza soka nje ya Tanzania na kakubalika, kasi, nguvu na upigaji mashuti na zaidi ya yote ni umbo lake.

Mbaraka amekuwa msumbufu kwa mabeki mahiri kama Yondani, ambaye mbele yake aliweza kufunga mabao mawili, Juuko Murshid ambaye alimsumbua na kufunga bao mbele yake, ni moja ya sababu ambayo inanipa nguvu kubwa ya kuona kuwa ana uwezo kwa kwenda kucheza nje ya Tanzania kwani walinzi wa huko ni kama hawa wakina Juuko, Yondani na Mwanjali.

Raphael Daud, Yanga

Kiungo mpole wa Yanga aliyesajiliwa akitokea Mbeya City, si muongeaji wala mambo mengi lakini kazi yake ni kubwa anapokuwa kiwanjani kwani ni fundi wa kupiga pasi za mwisho na hata kwenye kukaba pia.

Raphae kabla ya kwenda Yanga alikuwa hakiitajika na baadhi ya timu kutoka Afrika Kusini lakini pengine maslahi yalikuwa madogo kuliko ya alipochagua kwenda lakini bado hajatoka kwenye orodha ya wachezaji ambao wanaweza kucheza nje.

Ibrahim Ajib, Yanga

Straika fundi wa Yanga mwenye uwezo mkubwa wa kuchezea mpira na kufunga alisajiliwa na timu hiyo akitokea Simba mwanzo wa msimu huu, na amekuwa msaada mkubwa katika kikosi hicho kwani mpaka sasa ameshafunga mabao matano.

Ajib ameshakwenda nchini Misri na Afrika Kusini kufanya majaribio mara kwa mara jambo ambalo linanipa imani kuwa kama ataamua kuacha sifa ambazo anapata hapa nchini anastahili kwenda kucheza kwenye nchi yoyote Ulaya.

Hakuna mpenzi wa soka asiyefahamu shughuli ya Ajib ni miongoni mwa wachezaji tuliojaliwa Tanzania anakipaji kikubwa ila anayelewa sifa za mashabiki wa hapa Bongo lakini anauwezo mkubwa wa kwenda kucheza soka hata kwenye mataifa yaliyopiga hatua za soka.

Monday, November 13, 2017

Juma Mpongo;Alisugua benchi Yanga,sasa tegemeo la KCB FC

 

By Eliya Solomon, Mwananchi

 Inawezekana kwa siku za usoni kikosi cha Taifa Stars kikaundwa na wachezaji wengi kutoka nje,maana kadri siku zinavyosogea kumekuwa na wimbi kubwa la wachezaji wa Kitanzania ambao wanasaka mafanikio ya soka nje ya nchi.

Mafanikio yanayo tafutwa ni kucheza ligi kubwa kwenye nchi mbalimbali zilizoendelea, kwenye harakati za utafutaji wa mafanikio hayo wapo ambao tayari wamefika mbali kama Mbwana Samatta ukilinganisha na wanao mfuata nyuma.

Kazi ya Spoti Mikiki ni kuwaibua nyota wa Kitanzania ambao wapo nje ya nchi kwenye utafutaji wa mafanikio ya soka, nyota hao wapo ambao shauku yao ni siku moja kuja kulitumikia Taifa lao kupitia vipaji ambavyo Mungu amewapa.

Katika mfululizo wa Makala zetu za wachezaji hao, tuliona wiki iliyopita namna ambavyo safari ya winga wa Kitanzania, Hamad Mbumba wa Stima FC alivyopigania nafasi ya kucheza Ligi Kuu Kenya. Stima iko Daraja la Kwanza.

Leo tunaye kipa wa KCB FC, Juma Mpongo (31) ambaye naye anacheza Ligi Daraja la Kwanza Kenya, kipa huyo mzoefu amewataka wachezaji wenzake kuitumia vizuri nafasi ya kuichezea timu ya Taifa.

“Sio kila mchezaji anaweza kucheza timu ya Taifa na hakuna asiyependa kucheza timu ya Taifa lake labla awe na mambo yake mengine, inatakiwa kwa kila anayebahatika kupata hiyo nafasi kuonyesha kweli na sio kuvimbia hiyo nafasi.

“Bado nina uwezo wa kucheza timu ya Taifa, inawezekana kwa sababu msimu ujao tunaweza kuanza kucheza Ligi Kuu, tupo nafasi ya tatu na upishano wetu wa alama ni mdogo na ambao wametutangulia mbele.

“Michezo imebaki mitatu na mfumo wetu wa timu zitakazofuzu huwa ni mbili moja kwa moja alafu itakayoshika nafasi ya tatu itacheza mchujo na ile ambayo iliteleza kwa bahati mbaya kuwa kwenye hatari ya kushuka, mshindi wa hapo hupanda,” anasema.

Mpongo amewahi kuichezea Yanga na timu nyingine kibao za hapa Tanzania kabla ya kwenda kucheza kwenye ligi za mataifa mengine jirani kama vile DR Congo na Rwanda.

“Timu yangu ya kwanza kuicheza Ligi Kuu Tamzania Bara ilikwa Tanzania Prisons mwaka 2002, nikicheza hapo kwa msimu mmoja na kujiunga na Twiga Sports ya Kinondoni ambayo ilikuwa kama daraja kwangu la kujiunga na Yanga, 2004.

“Yanga sikukaa sana, niliondoka baada ya msimu mmoja kuisha na kwenda DR Congo kujiunga na DC Virunga ambayo ilikuwa ligi kuu, kuna mambo hayakuwa sawa Congo hivyo 2009, nilirejea Bongo na kujiunga na Moro United.

“2010 nilipata ofa ya kujiunga na S.C. Kiyovu Sports ya Rwanda, niliichangamkia ofa hiyo na kuona huo ni mwendelezo wa kuendelea kucheza soka la Kimataifa,” anasema kipa huyo.

Msimu uliofuata wa 2011/2012 mpongo amesema kutoka na uwezo aliouonyesha kwenye ligi alizivutia timu kadhaa na hatimaye akasajiliwa na Rayon Sports F.C.

“Mkataba wangu ulivyomalizika nikarudi Tanzania kuzichezea Coastal Union ya Tanga na Ashanti United ya Dar es Salaam kisha nikatimkia zangu Uarabuni ambapo na kwenyewe nilicheza kwa msimu mmoja na nikasajiliwa na hii timu ambayo naichezea mpaka sasa Kenya, “ anasema.

Akizungumzia ugumu wa ligi ambazo amezichezea, Mpongo amesema ni mdogo ila ligi ya Congo itabaki kuwa ligi yake bora kutokana na ushindani uliopo kwenye ligi hiyo.

“Mmmh!! Wakongo wametuacha mbali, ligi yao ni bora zaidi ndiyo maana hata kwenye mashindano ya Kimataifa yani klabu bingwa na shirikisho wamekuwa wakitoa timu nyingi kushiriki.

“Ukiondoa hiyo ligi naona Kenya, Rwanda na Tanzania zina viwango ambavyo havipishani sana, kuanzia uwezo wa wachezaji binafsi na hata namna ambvyo timu zinavyocheza.

“Kwa upande wa hamasa nje ya uwanja, Tanzania ni namba moja kwa ligi za Afrika Mashariki,ila kiuwezo wa ushindani inaweza kuwa ya pili mbele ya Kenya kisha Rwanda naweza kuiweka nyuma yetu ,” amesema

Mpongo alimalizia kwa kuwataka wachezaji wa Kitanzania kutokuwa na uoga wa kwenda kufanya majaribio nje ya nchi kwa sababu mpira unaochezwa ni ule ule kinachobadilika huwa ni falsafa za uchezaji kwa nchi husika.

“Kuna Mataifa yana utamaduni wa kupenda kucheza soka la kasi, hivyo kama mchezaji unatakiwa kujua mapema na kujiandaa na soka lao, utakapoenda kufanya majaribio usishindwe,” anasema.

Monday, October 30, 2017

Kaanzia Azam FC Academy, sasa anakipiga Marekani

 

By Eliya Solomon, Mwananchi

Siri ambayo Neymar wa Brazil aliisema kwa vijana wanaochipukia kwenye soka ni kuamini kupitia ndoto zao; kuna uwezekano wa kuwa kama nyota wanaowahusudu, kikubwa ni kujituma kwa kutafuta mafanikio, inawezekana bila kukata tama.

Adolf Bitegeko ni Kinda la Kitanzania ambalo leo tunalo kwenye rada zetu za Spoti Mikiki ambazo huwa zinawanasa wachezaji wa Kitanzania wanaotafuta maisha ya soka nje ya nchi, nyota huyo anamhusudu sana Paul Pogba wa Manchester United akisema anaweka bidii na anaamini siku moja atafikia kiwango chake.

Tukurejeshe nyuma kabla ya kuendelea mbele na Bitegeko, wiki iliyopita tulikuwa na Aman Kyata ambaye ni Mtanzania wa tatu kuwa naye kati ya wengi wanaocheza Ligi Kuu Kenya. Kyata anaichezea Chemelil Sugar F.C alielezea anavyotamani kuichezea timu ya Taifa Stars.

Leo tunaye Bitegeko ambaye yupo nchini Marekani kwenye Kituo cha Lassen Soccer ambako pia yupo Aboud Doud ambaye tuliwahi kuwa naye miezi kadhaa iliyopita katika ukurasa huu wa wachezaji wa Tanzania wanaokipiga nje ya nchi.

Bitegeko anaamini kupitia siri ambayo amewahi kuisema nyota wa PSG ya Ufaransa, Neymar na ndiyo maana kila siku amekuwa akipambana kuhakikisha anayafikia malengo yake.

Kabla ya kuzungumzia alivyopata nafasi ya kujiunga na kituo cha Lassen Soccer ambacho pia huwajenga wachezaji kwa kuwapatia elimu ya darasani kama kipaumbele cha kwanza alianza kwa kusema ataona fahari siku moja kama akipata nafasi ya kuichezea timu ya Taifa.

“Kuichezea timu ya Taifa ni lengo langu la pili, kwanza kufanikiwa kucheza mpira wa kulipwa, siwezi kuwa mchezaji wa Taifa Stars kama sitokuwa nacheza mpira kwenye ngazi ya ushindani.

“Najua kuwa haitoshindikana kwa sababu ninamwamini sana Mungu, kupitia yeye hakuna jambo ambalo linaweza kumshinda, wote ambao walikuwa na dhamira ya kweli Mungu naye amewasaidia.

“Tanzania sio nchi kubwa kwenye soka hivyo hakuna idadi kubwa sana ya wachezaji wa Kitanzania wanaocheza nje hivyo hata kwenye ufuatiliaji haitokuwa mgumu sana,” alisema mchezaji huyo ambaye anacheza nafasi ya kiungo mkabaji.

Kupata nafasi kwa Bitegeko ya kujiunga na Lassen Soccer haikuwa kwa ujanja na uwezo wake binafsi wa kucheza soka kwa sababu kama uwezo kuna kundi kubwa la wachezaji wa Kitanzania wenye uwezo zaidi yake.

“Nina bahati niseme hivyo kwa kifupi, Mungu amekuwa akinisimamia kuanzia hatua yangu ya kwanza mpaka hapa nilipofika, nimezaliwa 26 Februari 1999 na kukua kisoka nikiwa Karume jijini Dar es Salaam tangu nikiwa darasa la tatu.

“Waliokuwa wakinisimamia ni Eugene Mwasakami, Rogasian Kaijage pamoja na Maalim Salehe. Nimekulia pale mpaka nilipofikakidato cha nne, lakini nilipata nafasi kuchezea timu ya ligi daraja la kwanza ya Ashanti united ila kutokana na shule sikuwa na muda wa kutosha kuwa pamoja na timu.

“Baada ya kumaliza kidato cha sita nikapata nafasi kule Azam FC na nilijiunga na kituo chao na nilikaa kwa takriban mwaka mzima. ni sehemu bora zaidi Tanzania kwa kijana kukaa na kujifunzia soka kutokana na mazingira.

Alijifunza mengi akiwa na Azam na kilichompa nguvu zaidi ya kujengeka, Bitegeko amesema ni ushindani uliokuwepo baina ya wachezaji kwa wachezaji kwa kuwa kila mtu alikuwa anataka kuonyesha uwezo zaidi na kumshawishi kocha wa vijana.

“Ni kwa neema tu ya Mungu nilipata nafasi ya kuchaguliwa kuja kujiunga na hiki chuo ambacho kwa sasa hivi kimetufanya kuwa bize sana na masomo,kila mtu anasomea anachopenda kisha na kucheza mpira.

“Wamerekani hawapendi ujinga kama unakipaji alafu huna elimu ni sawa na bure kama unapenda kucheza mpira basi lazima usome ili maisha ya mpira yakimalizika uweze kumudu kuendesha maisha binafsi nje ya soka.

“Nina miezi minne sasa tangu nijiunge nao, haikuchukua muda kwangu kuendana na mazingira yao japo ni tofauti sana na mazingira ambayo nilikuwa nimezoea kuishi nikiwa Tanzania, kuanzia mwakani nitakuwa kwenye hatua nyingine,” anasema Bitegeko.

Marekani wamelijenga soka lao la chini kwenye mfumo wa vyuo ambao umekuwa ukitambulika sio soka pekee bali hata kwenye upande wa mpira wa kikapu na kwenyewe wanatambua uwepo wa vyuo.

Kuna ngazi tofauti ambazo zimekuwa zikitumika kabla ya mchezaji kuhitimu na kupata timu ya kuichezea ligi (MLS), Ronald Mkaramba naye yupo kwenye mpangilio huo lakini yeye kidogo ni tofauti na wakina Daud na Bitegeko ambao wapo chini yake.

. “Kucheza soka Marekani kunauhitaji wa mambo manne ambayo nimeyaona kupitia vyuoni, usajiliwe kama mchezaji wa kulipwa na timu husika, uanzie kwenye kituo husika cha timu au upitie vituo vichache vilivyopo ambavyo hutoa elimu ya soka tu. “Ubaya wa vile vinavyotoa elimu ya soka pekee sio rahisi mtu kupata timu za MLS pekee.

Monday, October 30, 2017

Messi aitaka Super Eagles Kombe la Dunia

 

Staa wa Barcelona, Lionel Messi amesema hamu yake kubwa ni kupangwa Kundi moja na timu ya Taifa ya Nigeria, Super Eagles kwenye Fainali za Kombe la Dunia za 2018 nchini Russia

Winga huyo wa Argentina, alifunga mabao muhimu dhidi ya Ecuador katika mechi za kufuzu na kuipa tiketi ya Russia na kusema hamu yake wapangwe na Nigeria watakapokuwa Russia.

Messi alikaririwa na gazeti la National Helm la Argentina akisema, mechi dhidi ya Nigeria ni kati ya mechi bora kwake.

Amewahi kucheza dhidi ya Nigeria mwaka 2005 katika mashindano ya ubingwa wa dunia kwa vijana na mwaka 2008 kwenye Michezo ya Olimpiki ya Beijing na mara zote wameshinda.

Ukubwani sasa, ameshafunga mara tatu katika mechi walizocheza na Nigeria ikiwemo Kombe la Dunia Brazil na bao lingine walipocheza mechi ya kirafiki nchini Malaysia mwaka 2012.

“Alisema baada ya mchezo wake aliopiga hat-trick kwa Argentina dhidi ya Ecuador, na alipoulizwa kuhusu mechi anayopikumbuka ya Kombe la Dunia, alisema ni dhidi ya Serbia ambayo Argentina ilishinda mabao 6-0, na mechi ya Olimpiki ya Beijing walioshinda bao 1-0 dhidi ya Nigeria, na mechi dhidi ya Ecuador,” mwandishi wa Sky Sports’ Guillem Balague alisema.

Waliokata tiketi

Mataifa yaliyofuzu Kombe la Dunia kutoka Asia ni

Iran, Korea Kusini, Japan na Saudi Arabia wakati Afrika ni Misri na Nigeria.

Amerika Kaskazini Ukanda wa Concacaf ni Mexico, Costa Rica na Panama wakati Amerika Kusini ni Brazil, Uruguay, Argentina na Colombia.

Mataifa ya Ulaya yaliyokwisha kufuzu ni wenyeji Russia, Ufaransa, Ureno, Ujerumani, Serbia, Poland, England, Hispania, Ubelgiji na Iceland.

Monday, October 30, 2017

Tatizo Stars hili hapa

 

By Charles Abel,Mwananchi cabel@mwananchi.co.tz

Katika siku za hivi karibuni, timu ya taifa, ‘Taifa Stars’ chini ya kocha Salum Mayanga, haichezi katika kiwango cha kuridhisha kwenye mechi inazocheza za mashindano mbalimbali.

Matokeo ya Stars yamekuwa yakiwasononesha Watanzania, baada ya kushindwa kupata ushindi au kucheza katika kiwango kinachotakiwa katika mechi za kimataifa.

Pamoja na Stars kupoteza mchezo mmoja, kushinda mechi saba na kutoka sare mara saba tangu Mayanga apewe jukumu la kuinoa, presha kubwa imekuwa ikielekezwa kwake.

Mayanga amekuwa akipata shinikizo la kutakiwa kujiuzulu kwa kile kinachodaiwa kiwango cha Stars hakitoi dalili njema ya kufanya vizuri katika mashindano itakayoshiriki siku za usoni.

Kumekuwa na sababu mbalimbali zinazotajwa kama chanzo cha Stars kuyumba licha ya kubadilisha makocha kwa nyakati tofauti bila mafanikio.

Uchunguzi uliofanywa na gazeti hili umebaini kuwa chanzo cha Stars kuvurunda ni kukosekana uti wa mgongo wa timu (muungano wa kikosi).

Muungano unaotajwa unaundwa na kipa, beki namba tano, viungo wawili (namba sita, nane) na washambuliaji wawili wanaocheza namba tisa na kumi.

Timu yoyote duniani inapokuwa na muungano mzuri wa wachezaji bora wanaocheza katika nafasi hizo ni chachu ya kufanya vyema katika mechi zao tofauti na Stars.

Taifa Stars inaundwa na wachezaji wasiokuwa na muunganiko mzuri kwa kuwa wanacheza timu tofauti wakiwa hawajawahi kucheza pamoja muda mrefu.

Wachezaji wanaojenga uti wa mgongo Stars ni kipa Aishi Manula

kutoka Simba, beki Abdi Banda (Baroka, Afrika Kusini), Hamisi

Abdallah (Sony Sugar, Kenya) Himidi Mao (Azam FC), Mzamiru

Yassin (Simba) na Mbwana Samatta (KRC Genk, Ubelgiji).

Kumbukumbu zinaonyesha Stars inayotajwa kuwa bora ilikuwa chini ya kocha Kim Poulsen, ikiwa na muungano mzuri wa wachezaji waliozoeana muda mrefu.

Kipa alikuwa Juma Kaseja, beki namba tano Kelvin Yondani, waliocheza muda mrefu katika kikosi cha Simba kabla ya libero huyo kuhamia Yanga huku akiendeleza makali yake na kuaminiwa kuwa ni kati ya wachezaji mkoba makini.

Kiungo namba sita alikuwa Frank Domayo aliyekuwa akicheza na Yondani kikosi cha Yanga na sasa yuko Azam wakati kiungo namba nane alikuwa Abubakar Salum ‘Sure Boy’ ambaye bado yuko Azam.

Itakumbukwa ‘Sure Boy’ na Samatta aliyekuwa akicheza namba tisa, walicheza timu ya taifa ya vijana chini ya miaka 17 ‘Serengeti Boys’ iliyokuwa chini ya Poulsen.

Hii inamaanisha kati ya wachezaji watano waliounda uti wa mgongo Stars, watatu walizoeana kabla ya kuwemo katika kikosi hicho ambao ni Domayo, ‘Sure Boy’ na Samatta.

Mfano mwingine upo kwa timu ya taifa ya Hispania ilipotwaa Kombe la Ulaya mwaka 2008 ilikuwa na muungano mzuri kwa asilimia 80 ya wachezaji kutoka Barcelona.

Kipa alikuwa Iker Casillas wa Real Madrid, namba tano (Carles Puyor, Barcelona), namba sita Sergio Busquets (Barcelona), namba nane (Xavi Hernandez, Barcelona). Namba tisa kivuli alitumika Cesc Fabregas aliyekulia Barcelona.

Kocha na mchambuzi wa soka, Joseph Kanakamfumu aliunga mkono uchunguzi wa gazeti hili huku akitaja sababu mbili zilizochangia Stars kukosa uti wa mgongo.

“Kwanza hakuna muendelezo mzuri wa viwango kwa wachezaji wetu. Leo mchezaji anaweza kufanya vizuri kesho akacheza vibaya, jambo linalofanya makocha wa klabu au timu ya taifa

kufanya mabadiliko ya vikosi vyao na kusababisha kuanza upya kila siku kutengeneza timu.

“Lakini kingine ni timu zetu kubwa ambazo zinategemewa kuzalisha wachezaji wa Stars, kujaza na kuwatumia wachezaji wa kigeni jambo linaloipa wakati mgumu timu ya taifa kwa sababu inalazimika kutumia wachezaji wanaopata nafasi katika timu tofauti hatua inayochangia kutokuwepo muunganiko mzuri.

Kanakamfumu alisema rekodi zinaonyesha katika miaka ambayo Stars ilifanya vyema idadi kubwa ya wachezaji walitoka klabu moja.

Alidokeza mwaka 1993 Stars ilipotwaa Kombe la Chalenji, wachezaji wengi walitoka Simba iliyokuwa katika ubora na 1998 ilipofanya vyema katika mechi za kufuzu Kombe la Dunia Yanga ilitoa nyota wengi.

Kocha John Tegete alisema ili Stars iondokane na tatizo hilo ni vyema kuacha mfumo wa kutegemea wachezaji kutoka Simba, Yanga na Azam FC.

“Timu ya taifa inaonekana ya Dar es Salaam kwa sababu inajaza wachezaji wengi wa klabu hizo zinazojiita kubwa hata kama uwezo wao ni mdogo, wachezaji wazuri wanaachwa katika timu za mikoani,” alisema Tegete.

Kwa mujibu wa kanuni za Shirikisho la Soka Tanzania (TFF), klabu moja inaruhusiwa kusajili wachezaji saba wa kigeni, lakini wanaotakiwa kucheza katika mchezo mmoja ni watano.

Bila shaka TFF inatakiwa kuangalia upya utaratibu wa klabu moja kusajili wachezaji wachache wa kigeni ili kutoa fursa kwa wazawa kupata nafasi katika klabu zao hatua inayoweza kuimarisha timu za taifa.

Taifa Stars kwa sasa inajiandaa na mchezo na Benin utakaofanyika Novemba 11 ikiwa ni pambano lililo ndai ya kalenda ya shirikisho la soka la kimataifa, Fifa.

Monday, October 30, 2017

Mafuru ataka mpira wa wavu umtoe

 

By Eliya Solomon, Mwananchi

Ubora wa vikosi vya Jeshi Stars na Magereza kwenye mpira wa wavu ni sawa na Simba na Yanga kwenye soka, kupata nafasi ya kucheza kwenye timu hizo sio jambo jepesi, Joseph Mafuru ni kijana ambaye amewashangaza wapenzi wa mchezo huo kwa kuingia haraka kwenye kikosi cha kwanza cha Magereza.

Vikosi vya Magereza na Jeshi Stars vilikuwa vimezoeleka kusheheni wachezaji wengi wakongwe lakini kwa kipindi cha hivi karibuni vijana nao wanaonekana kuamka.

Spoti Mikiki imezungumza na Mafuru ambaye ameyaweka wazi maisha yake na mchezo huo yalivyo pamoja na alivyoweza kwa haraka kuingia kwenye kikosi cha kwanza cha timu yake.

“Nilizaliwa April 28, 1996 mkoani Mara wilaya ya Bunda katika kijiji cha Majita kabila langu ni Mjita. Elimu ya msingi niipata shule ya msingi Bwiru iliyopo Mwanza na nikachaguliwa kujiunga na kidato cha kwanza katika shule ya Sekondari ya Mnarani iliyopo Mwanza.

“Baada ya kumaliza kidato cha nne, 2011 nikajiunga na chuo cha elimu ya biashara( CBE)mwaka 2012. Safari rasmi ya kuanza kucheza mpira wa wavu ilianza kidato cha nne na nilikua nikiichezea timu ya B.O.T iliyopo jijini Mwanza, niliitumikia timu hiyo kwa miaka miwili na kushiriki katika mashindano mbalimbali.

“Nakumbuka kwenye Ligi ya Mkoa tulitwaa ubingwa na kupata tuzo binafsi ya mtengenezaji bora (best setter) pia nilichaguliwa timu ya chuo na kwenda nayo katika Michezo ya vyuo (SHIMIVUTA) mkoani Tanga,” anasema Mafuru.

Huko ndipo nilipo mvutia kocha wa Magereza, Edwin Masinga ambaye naye aliamua kunijumuisha kwenye kikosi cha Magereza 2014.

“Nilijiunga na timu hiyo na nikabadilishiwa nafasi nikawa mshambuliaji wa pembeni ninashukuru Mungu nimefanya vizuri katika nafasi hiyo na katika ligi ya mkoa wa Dar es Salaam, 2017 nimechaguliwa kuwa mshambuliaji bora na kuiwezesha timu yangu kutwaa ubingwa.

“Mambo yaliyonisaidia kupata nafasi ya kucheza kikosi cha kwanza ni kujifunza kupitia wengine.Ndoto yangu ni kuwa mchezaji wa kulipwa nje ya nchi na sio vinginevyo,” anasema.

Monday, October 30, 2017

SOKA YA KULIPWA Sikia hii Watanzania wanaopasua anga za kimataifa

 

By Eliya Solomon, Mwananchi

Japo sio kama ilivyo kwa mataifa ya Afrika Magharibi yalivyo na nyota wengi wa kimataifa, kipindi hiki Watanzania nao wanaweza kujivunia kwa kuwa na nyota kadhaa wa kimataifa ambao wanafanya vizuri kwenye mataifa mbalimbali.

Ni wazi kuwa zama zimebadilika, awali kulikuwa na uhaba wa wachezaji wa kimataifa ambao wamekuwa na manufaa makubwa kwenye mataifa yanayo fanya vizuri katika mabara yote duniani.

Mabingwa wa Kombe la Dunia, Ujerumani pamoja na ligi yao ya Bundesliga kuwa bora lakini wamekuwa na utaratibu wa kuwaita nyota wake wote muhimu wanaocheza soka la kimataifa nje ya Ujerumani kama Mesut Özil wa Arsenal (Uingereza), Toni Kroos wa Real Madrid (Hispania) na wengine kibao.

Nyota wa kimataifa wanaaminika kuwa uwezo wa ziada kwenye vikosi vingi vya timu za Taifa kutokana na namna walivyojengeka kiushindani hasa kwa wale ambao wanacheza kwenye ligi zilizoendelea.

Spoti Mikiki inakuletea nyota wa Kitanzania wanaofanya vizuri kwenye ligi mbalimbali kuanzia Ulaya na yupo Mbwana Samatta hadi Afrika kwenye mataifa kama Morocco, Afrika Kusini, Kenya na mengineyo.

Mbwana Samatta (KRC Genk/Ubelgiji)

Kuna kipindi Samatta (24) alikuwa ameandamwa na ukata wa mabao na kuandamwa kwake na ukata huo kwa kiasi fulani uliifanya timu yake ya Genk kuyumba kwa kushindwa kupata matokeo ya ushindi kwenye michezo mfululizo.

Urejeo wa mshambuliaji huyo kwenye makali yake baada ya siku 72 bila bao ambazo ni sawa na miezi miwili tuliona namna alivyofunga kwenye mchezo uliopita dhidi ya Club Brugge, tuachane na huu ambao wamecheza na Kortrijk, ugenini.

Kabla ya mchezo huo ambao Samatta alifunga bao la pili kwenye ushindi wa 2-0 pia alitengeneza bao kwenye mchezo wa nyuma yake ambao waliifunga Anderlecht, ugenini kwa bao 1-0.

Makali ya Samatta yameifanya timu yake kwa mara ya kwanza kushinda michezo mfululizo kuanzia huo ambao alitengeneza dhidi ya Anderlecht na ambao alifunga na Club Brugge.

Michael J. Lema (Sturm Graz/Austria)

Kinda Lema (18) anayechipukia kwenye kikosi cha Sturm Graz alipandishwa na ilikuwa aweke rekodi ya kuwa Mtanzania wa kwanza kucheza Ligi ya Mabingwa Ulaya hatua ya awali.

Kwa bahati mbaya hakupata nafasi ya kucheza kwenye mechi zote mbili na kuishia kushudia kwenye benchi la wachezaji wa akiba timu yake ikiondoshwa kwenye mashindano hayo na Fenerbahçe ya Uturuki kwa jumla ya mabao 3-2.

Majeruhi yalimfanya kinda huyo kurudishwa kwenye kikosi B ili kutafuta ufiti kabla kuendelea na ratiba ya kikosi cha kwanza cha timu hiyo ambayo imekuwa na mwenendo mzuri kwenye ligi.

“Nacheza kikosi cha vijana ambacho kipo madaraja ya chini sijui lini wataona nimeshakuwa fiti ili nirejee kikosi cha kwanza, majeruhi yameniharibia kwa sababu ndiyo kwanza nilikuwa nimepandishwa.

“Sikupata hata muda wa kucheza mechi japo moja ila ninaamini mambo yatakuwa sawa, ni kiasi cha muda tu,” anasema Lema kutoka Austria.

Farid Mussa (CD Tenerife/Hispania)

Farid (21) bado hajawa kwenye kikosi cha kwanza CD Tenerife ambayo inacheza Ligi Daraja la Kwanza Hispania maarufu kama Segunda, kuna kipindi kulikuwa na tatizo la kupata kibali cha kucheza ligi hiyo hasa baada ya kudaiwa kupandishwa kikosi cha kwanza.

Mambo yanaonekuwa kutokuwa mazuri kwa winga hiyo wa zamani wa Azam kwa sababu amesalia kwenye kikosi B cha timu hiyo ambacho kinacheza daraja la nne Hispania kama sehemu ya kuwajenga wachezaji kiushindani kabla ya kupandishwa vikosi vya kwanza.

Mataifa mengi ya Ulaya yamekuwa na utaratibu huo ambao umekuwa pia ukiwasaidia hasa vijana wao kwa kupata muda wa mwingi wa kucheza.

Orgeness Mollel (FC Famalicão/Ureno)

Mwanzoni mwa msimu wa 2017/2018, Mollel (19) alipandishwa kwenye kikosi cha kwanza cha Famalicão, kutokana na kutopata kwake nafasi ya kucheza kwenye kikosi cha kwanza ilibidi atolewe kwa mkopo na kwenda AD Ninense.

Kwa sasa winga huyo wa kulia yupo AD Ninense, amekuwa na wakati mzuri akiwa na timu yake hiyo ambayo kwa mujibu wa kipingele kilichopo kwenye mkataba wake inawezekana kwa gharama za fedha za Kitanzania ambazo ni sawa na Sh68milioni.

Albert Mandari (ASF/Ukraine)

Mandari (23) alivunja mkataba wake na PFC Nyva Ternopil ya Ligi Daraja la Kwanza nchini Ukraine, yote hiyo inadaiwa kuchangiwa na anguko la kiuchumi la timu hiyo hivyo ilibidi wachezaji wote kupunguziwa mishahara yao.

“Sikuwa tayari na kuamua kuvunja mkataba, nipo kwenye kituo cha ASF ambacho kipo chini ya Wahispania nimeomba nafasi ya kuwa nafanya nao mazoezi ili kujiweka fiti, ningepata timu ila kibaya kipindi cha usajili kilikuwa kimepita.

“Mpaka sasa nina ofa mbona ya kujiunga na timu ya Ligi Kuu Ukraine, Olympic Donetsk na mkataba wa awali nimeshasaini nasubiri dirisha la usajili lifunguliwe ili niingie nao makataba rasmi,” anasema Mandari.

Hata hivyo kiungo huyo amekuwa akipata nafasi ya kucheza michezo ya kirafiki na kituo hicho ambacho na chenyewe kimejiingiza kwenye dili la Mtanzania huyo ili kiweze kunufaika kwa mauzo yake.

Martin Tangazi (Gazişehir Gaziantep FK/Uturuki)

Moja ya nyota wa Kitanzania ambaye naye ni zao la kituo cha Aspire. Martin (19) yupo Uturuki anacheza soka kwenye kikosi B cha Gaziantep.

Kinda hilo limekuwa likitajwa kuwa na uwezo mzuri wa kuutumia mguu wake wa kushoto kwa kucheza kama beki/mshambuliaji wa kushoto.

Gazişehir Gaziantep FK ipo kwenye mazingira mazuri ya kupanda daraja hivyo huenda mchezaji huyo wa Kitanzania akaanza kupata nafasi kwenye kikosi cha kwanza wakati ikiwa ligi kuu.

Saimon Msuva (Difaâ Hassani El Jadidi/Morocco)

Wamorocco wanamfananisha Msuva na Mane wa Liverpool kutokana na kasi aliyonayo na uwezo wa kufunga mabao,tangu atoke Yanga na kujiunga na Difaâ amekuwa mchezaji muhimu kwenye kikosi hicho chenye maskani yake mjini El Jadidi.

Msuva alikuwa chachu ya Difaâ kusonga mbele kwenye robo fainali ya Kombe la Mfalme ‘Coupe du Trone’, kama si uwezo wake binafsi wa kutengeneza na kufunga huenda wasingetinga hatua hiyo.

Difaâ ilipoteza ugenini na wenyeji Chabab Rif Hoceima kwa mabao 2-1, Msuva ndiye alifunga bao lao ambalo liliwafanya kuwa na matumaini ya kupindua matokeo, kwenye mchezo wa marudiano ambao walishinda 2-0 alipika bao la pili.

Uwezekano wa kutinga hatua ya fainali ni mkubwa kwa timu ya Msuva kutokana na mwanzo wao kwenye mchezo wa nusu fainali ya kwanza ugenini walitoshana nguvu ya bila kufungana 0-0 na RSB Berkane.

Kwa mujibu wa ratiba ya kombe hilo la mfalme watakuwa nyumbani Jumanne ya Oktoba 31 kumalizia mchezo wa nusu fainali ya pili, ushindi wa namna yoyote utawafanya kutinga fainali ambapo wanaweza kucheza na mshindi jumla kati ya Raja Casablanca au FAR Rabat.

Abdi Banda (Baroka FC/Afrika Kusini)

Banda (22) amekuwa ni kama nguzo kwenye timu ya Baroka ambayo inashiriki Ligi Kuu Afrika Kusini ‘PSL’ kwenye sehemu ya ulinzi.

Baroka ikiwa na Banda ilicheza michezo nane bila ya kupoteza mpaka pale ambapo Bidvest Wits ilipovunja rekodi hiyo kwenye mchezo wa tisa kwa kuwafunga nyumbani bao 1-0.

Elias Maguri (Dhofar/Oman)

Japo amekuwa hafungi mara kwa mara lakini amekuwa sehemu ya msaada mkubwa kwa Dhofar kuwa nafasi ya kwenye msimamo wa ligi hiyo ambayo ina jumla ya timu 14.

Salum Shebe (Al-Midhaibi/Oman)

Sio kazi nyepesi kujinasua kutoka nafasi ya mwisho kwenye msimamo hadi nafasi ambazo zinamfanya Shebe na timu yake hiyo ngeni Ligi Kuu Oman wapumue.

“Kushinda michezo mfululizo kumetusaidia ilikuwa tupo kwenye hali mbaya hasa baada ya kufungwa michezo mingi ya mwanzoni mwa msimu,”anasema Shebe.

Abdul Hilal (Tusker/Kenya)

Hilal amesimama kwa niaba ya Watanzania wengine wanaocheza Ligi Kuu Kenya kama Aman Kyata wa Chemelil Sugar F.C., Himis Abdallah wa Sony Sugar na wengine kibao.

“Ligi ipo ukingoni, zimebaki mechi 3 kabla ya kumalizika kwa msimu, tulikuwa kwenye mazingira mazuri ya kuchukua ubingwa lakini imeshindikana kwa sababu hata kama tukishinda michezo iliyosalia hatuwezi kufikia pointi za Gor Mahia.

“Gor Mahia ndiyo mabingwa, wenzagu wakina Aman na Hamis timu zao hazipo kwenye nafasi mbaya kwenye msimamo,binafsi namshukuru Mungu hata kama tumekosa kuwa mabingwa, tutamaliza kwenye nafasi ya pili,” anasema Hilal.

Monday, October 23, 2017

Ukarabati Jangwani Yanga mpya inakuja na kuondoka

 

By Thobias Sebastian, Mwananchi

Desemba 2010, aliyekuwa mfadhili wa Yanga, Yusuf Manji alianza ukarabati wa jengo ikiwamo kupakwa rangi ili liendane na hadhi yake na baada ya hapo, aligeukia ukarabati wa Uwanja wa Kaunda.

Manji alisema, anataka kuifanya klabu kuwa ya kisasa kwa gharama ya zaidi ya Sh900m. Klabu hiyo chini ya aliyekuwa mwenyekiti wake, Imani Madega, anasema uwanja wa Kaunda, hadi kukamilika kwake ulitakiwa kuwa na uwezo wa kuchukua mashabiki 15, 000 waliokaa.

Itakumbukwa Madega alisema baadhi ya mechi za Ligi Kuu kuanzia mzunguko wa pili wa msimu huu zichezewe Uwanja wa Kaunda.

Vilevile, ikumbukwe kuwa mwishoni mwa Novemba 2010, Manji aliwahi kutishia kujitoa kuifadhili klabu hiyo huku akiwalalamikia watendaji wa Yanga wamekuwa wazito katika kuchangamkia vitu vya maendeleo akitolea mfano duka la klabu hiyo ambalo ni wazi hadi leo halijapangishwa.

Kuliundwa kamati ya kuhakikisha watu waliovamia kiwanja cha Yanga, Mitaa ya Twiga na Jangwani wanaondolewa ili ujenzi wa uwanja uanze mara moja, lakini watu hao wamekuwa wazito kitu ambacho kinamkatisha tamaa.

Awamu mpya

Ikaja awamu nyingine. Mwaka 2013/14 Yanga ikaja na mpango mkakati wa kuitengeneza Jangwani mpya. Ilikuwa ianze kwenye jengo.

Mkakati ukaandaliwa na wazee wa Yanga, walipanga kufanya maandamano kwenda Ikulu kukutana na Rrais Jakaya Kikwete iwapo ofisi ya Meya ya Manispaa ya Ilala itashindwa kuwajibu ombi lao la kuongezewa eneo ili wajenge Uwanja wa kisasa wa michezo katika eneo la Jangwani pembeni ya klabu yao.

Katika kuonyesha imedhamiria kufanya mabadiliko, wazee waliandaa maandamanao na uongozi wa Yanga uliiandikia Polisi barua kuomba kibali ili wafanye maandamano hayo leo.

Itakumbukwa barua hiyo ilisainiwa na Katibu Mkuu wa Yanga, Benno Njovu ilisema kuwa uamuzi wa kuitisha maandamano hayo umetokana na Manispaa ya Ilala kuchelewesha maombi yao ya kuongezewa eneo la ujenzi wa Uwanja, hivyo wao wameamua kuandamana kisheria.

Aliyekuwa Meya wa Ilala wakati huo, Jerry Slaa akilizungumzia suala hilo la Yanga kushindwa kuongezewa eneo ili wajenge uwanja, alisema suala la uwanja wa Yanga lina wadau wengi likiwamo Baraza la Taifa la Hifadhi na Usimamizi wa Mazingira (NEMC) na Wizara ya Ardhi, kwani yeye binafsi ana nia ya dhati kuhakikisha jambo hilo linakwisha, lakini hawezi kufanya bila ya kufuata taratibu.

Alisema moja ya taratibu ni kujadiliana na viongozi wa Yanga, pia uongozi wa Manispaa ya Ilala kufanya ziara Jangwani kukagua eneo ambalo Yanga wanataka waongezewe na kutoa uamuzi.

Uongozi wa Manispaaa ya Ilala unataka kukagua eneo hilo la Jangwani kwa sababu unataka kujua eneo ni lipi, lina ukubwa gani, linaathiri nani, uwanja wa aina gani na mengine mengi.

Desemba mwaka 2011, uongozi wa Yanga ulitoa ahadi ya kujenga uwanja wa kisasa eneo la Jangwani huku ikimtangaza mkandarasi, Kampuni ya Beijing Constructions Engineering Group iliyojenga Uwanja wa Taifa, Dar es Salaam kwamba ndiye atakayejenga uwanja huo mpya.

Kwa mujibu wa makubaliano hayo, ujenzi huo wa uwanja unatakiwa kuwa na uwezo wa kuchukua mashabiki 30,000 hadi 40,000, lakini hadi sasa hakuna hata dalili za kuanza huku viongozi wa Yanga wakisema Serikali inawanyima eneo la nyongeza kwa sababu eneo la sasa ni dogo.

Ukiacha uwanja wa mpira wenye viti 40,000, Yanga pia wanadai wanataka kujenga katika eneo hilo hosteli, ya wachezaji na shule/akademia ya soka, viwanja vya mazoezi, eneo la kuegesha magari, hoteli na sehemu ya makazi, ukumbi wa mikutano, maofisi, benki, zahanati, maduka makubwa, ukumbi wa sinema na sehemu za kupumzikia.

Mipango hiyo ni kama imekufa na sasa Yanga inakuja na mipango mingine. Hebu fuatilia.

Mikakati inayoendelea

Unaweza kusema ni habari zinazotia matumaini japo mwanga wake uko mbali. Hakuna mkakati hasa unaounganisha mkandarasi na fedha za ujenzi wa uwanja wa kisasa kama ilivyotajwa kwenye mkakati wa pili uliokwama.

Kwa sasa viongozi wa timu hiyo wameamua kujitoa kipaumbele katika kusimamamia matengenezo ya Uwanja wa Kaunda ambao upo katika makao makuu ya klabu hiyo.

Gazeti hili lilitembelea makao makuu ya klabu hiyo yaliyopo Jangwani ambapo ndipo unapatika uwanja huo na viongozi wa mabingwa hao wa kihistoria wa ligi kuu Bara, walifunguka kuhusu uwanja pamoja na jengo la makao makuu ya klabu.

Kila kiongozi alifunguka kwa nafasi yake na kueleza matengenezo ya uwanja na jengo hilo ambalo miaka ya nyuma lilikuwa likitumika na wachezaji kwa kuweka kambi na shughuli nyingine nyingi kwa manufaa ya klabu.

Kauli za viongozi kwa sasa, Clement Sanga, Kaimu Mwenyekiti wa Yanga anasema kuna makundi zaidi ya 400, ya mashabiki wa Yanga wanataka kutumia mashabiki hao ili kubadili klabu ambao wapo tayari kujitolea kuisaidia klabu yao kwa hali na mali.

Ukarabati wa uwanja unaendelea na upo katika hatua za awali kuhakikisha tunakuwa na kiwanja chetu kama ilivyokuwa miaka ya nyuma lakini licha ya kuwa na marekebisho ya uwanja kuna marekebisho mengine ya jengo tunayafanya.

“Mashabiki wa Yanga wakae mkao wa kula mambo mazuri yanakuja juu yao ila wanatakiwa kuwa sambamba na klabu ili kuhakikisha wanajitoa na kukamilisha zoezi la kujenga uwanja wa Kaunda na jengo la makao makuu ya klabu,” anasema Sanga.

Charles Boniface Mkwasa, Katibu mkuu wa Yanga anasema kila kitu kinakwenda sawa katika kuhakikisha Uwanja wa Kaunda unakamilika na kuwa moja ya viwanja vidogo vya kisasa ambacho kitakuwa chanzo cha mapato kwa klabu.

Mkwasa anasema: “Tumewekeza nguvu ili kuhakikisha uwanja wetu unakamilika ambao utatupunguzia gharama za kulipia viwanja vya watu ili kufanya mazoezi lakini itakuwa kitega uchumi kwa wale ambao watakuwa wanataka kutumia uwanja huu.

“Tukiwa na mipango madhubuti ya kuhakikisha uwanja unakamilika tuna malengo mengine ya kuhakikisha jengo la klabu linabadilika na kuwa la kisasa,” anasema Mkwasa.

Naye Ofisa habari wa Yanga, Dismas Ten anasema ili uwanja wa Kaunda ukae levo, vinahitajika kuingia vifusi lori 2,250, na mpaka sasa wameshamwaga robo ya uwanja huo kwahiyo wanaomba wapenzi na mashabiki wa soka kujitokeza ili kuongeza nguvu katika jambo hilo la kimaendeleo.

Ten anasema mipango iliyokuwa katika uongozi wa Yanga ni kuhakikisha wanakamilisha ujenzi wa Uwanja huo kabla ya msimu ujao kuanza ili kutumia uwanja huo katika mazoezi msimu unaokuja.

“Baada ya kukamilisha kuweka vifusi, kwanza tunataka kulikamilisha kabla ya Desemba na kuingia Junuari inakuwa kazi ya kuotesha nyasi na kukamilisha mambo mengine ya muhimu kama majukwaa,” anasema.

“Si jambo rahisi ila tumeamua kuteua kamati ya ujenzi ambayo itasimamia uwanja jinsi gani ya kumwaga vifusi na kuusimamia mpaka hatua ya mwisho utakapokamilika lakini kamati hiyo itasimama pia kurekebisha jengo la klabu kuwa la kisasa,” alisema.

“Gharama rasmi mpaka uwanja unakamilika hatutakuwa nayo kwani hili zoezi la vifusi kuna watu wengine wanatupatia bure na wengine tanawapoza kwahiyo gharama rasmi haijajulikana bado.

“Kamati ya ujenzi itakuwa na wahandisi ambao ndio watatoa gharama kamili ya ujenzi wa uwanja pamoja na jengo ila kwa sasa hakuna hesabu yoyote iliyokuwa kamili ya kipesa ambayo tumeitumia au tutaitumia.

“Si vizuri kutaja idadi ya wanachama ila tunaomba wanachama na wale ambao siyo wanachama kuja kuisaidi Yanga katika jambo kama hili la kimaendeleo katika soka la nchi hii,” anasema Ten.

Monday, October 23, 2017

Neeke anavyowaza makubwa mpira wa wavu

 

By Eliya Solomon, Mwananchi

Kuna kundi kubwa la vijana wanaochipukia kwa kasi mpira wa wavu, David Neeke amekuwa akizungumzwa na wadau wa mchezo huo unaokua kwa kasi.

Neeke ambaye anaichezea Jeshi Stars, alifanya vizuri kwenye mashindano ya Nyerere Cup 2017 kwa kuiwezesha timu yake kushika nafasi ya pili baada ya kupoteza kwenye mchezo wa fainali dhidi ya APR ya Rwanda.

Chipukizi huyo amezungumza na Spoti Mikiki akisema alianza kuucheza mchezo huo tangu akiwa shule ya msingi kwenye michezo ya Umitashumta mwaka 2007.

“Kutokana na kuona kaka yangu Bulugu Neeke anacheza nikazidi kushawishika kuupenda mchezo ndio nikaamua kuanza kujifunza lakini nisingeweza mwenyewe nilienda kwa kocha, Safari Yabunika.

“Nikajifunza kwa Kocha huyo lakini yeye pia alishangaa kuona nina uwezo kubwa wa kucheza mchezo huo kwa hiyo hakupata shida kunifundisha na ninakumbuka alitamani sana niwe mtengenezaji (setter) lakini sikupenda.

“Nilipenda kucheza kama mshambuliaji, tuligombana kwa suala hilo lakini baadaye aliona ninaweza kucheza nafasi hiyo ndipo akaniamini.

“Uwezo wangu ulinisababisha kuchaguliwa kwenye timu ya Shule za Sekondari kwa ajili ya michezo ya Umisseta, Kanda ya Ziwa ilikuwa 2010,” anasema Neeke.

“Baada ya kumaliza kidato cha nne Neeke alipata nafasi ya kuanza kufanya mazoezi na timu ya Jeshi Stars na ndipo ulipokuwa mwanzo wa safari ya kutoka Mwanza na kuja Dar es Salaam.

“Nilifanya nao mazoezi kwa kipindi fulani na ukafika muda wa kusajiliwa, changamoto ilikuwa kwenye kupata nafasi ya kucheza mara kwa mara, bidii ya mazoezi ilifanya nipate nafasi huku nikiwa mchezaji mdogo kuliko wote.

“ Ninapenda kumshukuru kocha wangu, Lameck Mashindano na wachezaji wote wa Jeshi Stars kwa ushauri na sapoti yao kwangu, pia ninawashukuru Mama na Baba wamekuwa mashabiki wangu namba moja wakati wote,” anasema kinda huyo.

Monday, October 23, 2017

La Mayanja linaibua maswali kibao

 

By Oliver Albert, Mwananchi

Unajiuliza, kabla ya mechi na Njombe Mji juzi, Simba ilikuwa nafasi ya ngapi, jibu, ni ya kwanza.

Kuna mahali wameharibu? Huku tulio nje tunajijibu, hapana, kuna mgogoro Simba? Tunaoangalia jibu hapana wakati ligi ikiingia mzunguko wa saba, hatuoni tatizo.

Simba iko nafasi ya kwanza ikiwa na pointi 15 na mabao 19, kocha mkuu ni Joseph Omog, inakuwaje msaidizi anakuwa bomu zaidi ya mkuu? Maswali mengi yanayotokana na Mayanja yanazalisha majibu mchanganyiko.

Juzi kocha msaidizi wa Simba, Mganda Jackson Mayanja alipanda ndege kwenda Uganda akisema ana matatizo ya kifamilia.

Licha ya kocha huyo kutoa sababu hizo, bado mashabiki wa klabu hiyo haiwaingii akilini na kuona kama viongozi wameamua tu kumtimua kocha huyo maarufu kama Mia Mia.

Tetesi za Mayanja kuondoka Simba zilianza kabla ya msimu huu wa Ligi Kuu kuanza huku kocha wa Mbao, Etienne Ndayiragije akitajwa kuwa msaidizi wa Omog, lakini akakataa hilo. Akambeba Mayanja lakini leo kaletewa Masudi Djuma.

Naye utajiuliza, kama Mayanja hakutimuliwa, Djuma wameongea naye saa ngapi, hivi apigiwe simu aje tu kipindi kifupi? Haiingii akilini.

“Kama nilivyosema hapo awali naondoka kutokana matatizo ya kifamilia, yalianza muda mrefu lakini sasa yamefikia pabaya. Sitaweza kufanya kazi vizuri, Simba inahitaji kocha anayekuwepo muda wote, kocha ambaye anaweza kujitoa na kujituma muda wote, kwa sasa sitakuwa na uwezo huo,” anasema Mayanja

Chanzo cha kuondoka kwake

Licha ya kwamba sababu ya kifaimilia ndio imetajwa kumuondoa kikosini kocha huyo lakini habari zinapasha kuwa alikuwa hana maelewano mazuri na wachezaji wengi katika kikosi hicho cha Wekundu wa Msimbazi.

Inadaiwa kuwa Mayanja ni kocha mkali asiyependa kuyumbishwa na wala huwa hana masihara hasa katika masuala ya nidhamu jambo ambalo mara nyingi lilimuingiza katika mifarakano ya mara kwa mara na wachezaji wa klabu hiyo. Si tumezoea uzembeuzembe! Indaiwa kocha huyo ni mtu mwenye mazoezi magumu, mkali na mwenye msimamo jambo ambalo wachezaji wengi ndani ya klabu hiyo walikuwa hawalifurahii. Mayanja hapendi wachezaji wavivu wa mazoezi na wasio na nidhamu na hakusita kuwapa adhabu wachezaji wengi waliokwenda kinyume na utaratibu wake.

Aliwahi kumpa adhabu beki Abdi Banda ambaye aligoma kuingia uwanjani kuchukua nafasi ya Mohamedy Hussein ’Tshabalala’ akidai bado Tshabalala alicheza vizuri na alimuondoa mchezaji huyo katika mipango yake na kuibua mgawanyiko ndani ya timu hiyo wengine wakipinga na wengine wakikubaliana na uamuzi wa kocha huyo.

Pia Mayanja amekanusha maneno yaliyokuwa yakizushwa kuwa alikuwa akimuongoza kocha mkuu Joseph Omog katika uamuzi kadhaa. Beki wa zamani wa Simba, Boniface Pawasa anasema licha ya sababu ya kifamilia kutajwa kumuondoa Mayanja ndani ya timu hiyo lakini anachojua sababu kubwa iliyomuondoa ni kutokuwa na maelewano mazuri na wachezaji.

“Nilikaa na baadhi ya watu wa karibu na timu na walisena Mayanja hakuwa na maelewano mazuri na wachezaji na hiyo ni moja ya sababu iliyofanya kuondolewa. Sawa kocha lazima uwe na misimamo lakini si wakati wote.

Monday, October 23, 2017

Viwango vya Olimpiki, Madola hapa hapa Tanzania

 

By Imani Makongoro, Mwananchi imakongoro@mwananchi.co.tz

Sio muujiza lakini sasa unambiwa kwenda Ulaya itakuwa ni matakwa ya mwanariadha mwenyewe kutaka tu kubadili mazingira, lakini kama suala la kutafuta viwango, hakuna haja ya kusafiria nje.

Kila kitu kitamalizikia pale Kilimanjaro iwe kusaka viwango vya Olimpiki, Michezo ya Jumuioya ya Madola na hata vile vya mbio za dunia.

Tangu Uhuru 1961, wanariadha wa Tanzania walikuwa wakitoka kushiriki mbio za kusaka viwango ambavyo vinatambuliwa na Shirikisho la Riadha la Kimataifa (IAAF), lakini sasa mambo ni hapa hapa.

Anayesubiriwa kwa sasa ni Katibu Mkuu wa Chama cha Kimataifa cha marathoni na mbio ndefu (AIMS), Hugh Jones kuithibitisha Kilimanjaro International Airport Marathon (KIA Marathon) na baada ya hapo itakuwa na hadhi kama zilivyo mbio za marathoni za Berlin, Amsterdam na London.

KIA Marathon na IAAF

Mtaalamu wa masuala ya njia ambaye aliwahi kuwa mwanafunzi wa Jones katika upimaji njia kwenye riadha, John Bayo anasema kitu ambacho AIMS inaangalia kwanza ni njia ambazo zinatumika, lakini pia hali ya hewa ya mahali husika ambako haitakiwi kuwa na upepo mkali.

“Pia inatakiwa kuwa na nyuzi joto kati ya 21 na 25 ili kuwa na mazingira rafiki kwa mkimbiaji, ukiwa na vigezo hivyo na mtaalamu wa AIMS akathibitisha na kutoa taarifa IAAF , mbio zako zinakuwa za kimataifa na zitakuwa zikitoa viwango vya Olimpiki, dunia na hata madola,” anasema Bayo.

Anasema, njia ambayo inatumika kwenye mbio za KIA Marathon haina tofauti na ile ambayo inatumika kwenye mbio za Berlini, Amsterdam na London marathon ambako bingwa anaweza kukimbia kwa saa 2:03 na kuvunja rekodi kutokana na njia kuwa rafiki kwa mwanariadha.

“Kitaalamu, njia ambazo ni tambarare huwa na mazingira rafiki kwa wanariadha na wengi na huwa wanapenda kwenda kuchuana katika mbio ambazo njia za tambarare zinazosaidia kuvunja rekodi, KIA marathon imebahatika kwenye hilo,” anasema Bayo.

Mchakato utakavyoanza

Rais wa Shirikisho la Riadha Tanzania (RT), Anthony Mtaka anasema hiyo ni bahati kwa Tanzania kwani katika mbio zote zinazofanyika nchini hakuna ambayo inatoa viwango vya kufuzu kushiriki Olimpiki, Madola wala mashindano ya dunia.

“KIA Marathoni imekidhi vigezo hivyo, lakini sasa ili kujitofautisha na mbio nyingine kwanza inapaswa kusajiliwa ili zitambulike kimataifa, hatua hii inaanza kwa waandaaji kukutana na uongozi wa RT kwa ajili ya kuanza mchakato huo.

“Baada ya mbio za msimu huu (zinafanyika Novemba 19 ambazo zitakuwa mbio za kwanza nchini kuanzia KIA na kumalizikia hapo), tutajadili mpango huo,” anasema Mtaka.

Anasema kauli mbiu ya mbio hizo ni utalii kwanza, hivyo itakapokuwa ya kimataifa itavutia wanariadha wengi maarufu duniani kuja kushiriki kutokana na njia zake, lakini pia hali ya hewa ya mikoa ya Kilimanjaro na Arusha ambako zile za Kilomita 21 zitapitia Kilimanjaro na zile za Kilomita 42 zitapitia Arusha.

Wanariadha, Nchi watanufaika vipi

Mtaka anasema KIA Marathoni itakapopata hadhi hiyo, kwanza itapunguza mzigo wa gharama kwa Shirikisho na wanariadha katika mchakato wa kusaka viwango.

“Upande wa KIA wenyewe ambao ndiyo waandaaji kupitia kampuni yao ya KADCO, mbali na kutangaza mbio zao kuwa za kimataifa, lakini pia itautangaza Uwanja wa Ndege wa Kilimanjaro, vivutio vya utalii vilivyopo hapa nchini.

“Wakazi wa Kilimanjaro, Arusha na mikoa jirani watanufaika kwa kufanya biashara, lakini pia nchi itaingiza fedha za kigeni kwani katika riadha wale mastaa wa dunia uwa watafuta mahali pa kufanyia mazoezi lakini pia wanapigia hesabu ya kushiriki mbio za kufuzu katika nchi watakayokuwa wameweka kambi.

“Huwa wanakuwa kambini si chini ya miezi sita, Tanzania tulikosa fursa hiyo kwani tunayo maeneo ambayo mazingira yake ni rafiki kwa kufanyia mazoezi ya riadha, lakini tulikosa mbio ambazo baada ya mazoezi watakimbia kwa ajili ya viwango.

“Hivyo mkimbiaji anaona kero kuja ‘kupasha’ Tanzania halafu aende Morocco au Ujerumani kwa ajili ya kushiriki mbio za viwango, ndiyo sababu tulikosa fursa hiyo, Kenya wanafanikiwa kwa kuwa wana mbio za Nairobi Marathon ambazo zina viwango, tukikamilisha usajili wa KIA Marathon tutakuwa ‘tumelamba dume’,” anasema Mtaka.

Mchakato wa usajili kuanza 2018

Kwa mujibu wa Bayo, IAAF huwa haina ugumu katika kuzipa hadhi mbio kuwa za kimataifa ili mradi tu njia zake ziwe zimethibitishwa na AIMS, lakini Mtaka anafafanua kwamba itakapopewa hadhi hiyo itabidi iwe na udhamini wa kutosha ikiwano kuweka zawadi nono kwa bingwa ili kuwavutia nguli wa riadha ulimwenguni.

“Ikiwezekana bingwa kwa kuanza wampe hata Dola 15,000 au hata 20,000 na kuendelea, hii itawavutia wanariadha maarufu duniani kuja kushiriki, lakini itakuwa ni miongoni mwa mbio chache ulimwenguni ambayo inaanzia uwanja wa ndege na kumalizikia uwanja wa ndege,” anasema.

Monday, October 16, 2017

APR walivyoacha vumbi Dar

 

By Eliya Solomon, Mwananchi

Kama timu za Tanzania zilikuwa zinadharau bila kuyapa uzito mashindano ya wavu ya Nyerere, basi APR za Rwanda kwa maana wanawake na wanaume hawakuja kutania.

Walifanya kweli. Timu zote zilionekana kujiandaa kwa mashindano, na ndiyo maana zilitwaa ubingwa kwa wanawake na wanaume.

Kuadhimisha kumbukumbu ya miaka 18 ya kifo cha Baba wa Taifa, Mwalimu Nyerere, Chama cha mpira wa Wavu Tanzania, TAVA, iliandaa mashindano ya kimataifa ya mchezo huo, yaliyofanyika Uwanja wa Ndani wa Taifa.

Timu za APR zimetwaa ubingwa wa mashindano hayo na kuziacha timu za hapa nyumbani vichwa chini kwa kuambulia nafasi za pili na mshindi wa watatu.

Mashindano hayo ambayo yalianzishwa miaka 15 iliyopita kwa lengo la kumuenzi Baba wa Taifa na mwaka huu, yalianza kutimua vumbi Oktoba 10 huku yakishirikisha jumla ya timu 13 kwa wanaume na 6 wanawake.

Wanaume walianza kucheza kwa hatua ya makundi. Kundi A lilikuwa na timu za APR (Rwanda), Nyuki (Zanzibar), Chui, Mjimwema na Makongo ya Dar es Salaam.

Kundi B lilikuwa na timu za Jeshi Stars , JKT (Dar es Salaam), Police (Zanzibar) na Kigoma wakati Kundi C lilikuwa na Magereza (Dar es Salaam), Shinyanga (Shinyanga) , Pentagon na Flowers (Arusha) na kwa upande wa wanawake wenyewe waliocheza kwa mfumo wa Ligi kulikuwa na APR (Rwanda), Makongo, Magereza, Jeshi Stars, Mjimwema na JKT za Dar es Salaam.

Michezo ya fainali ya mashindano hayo ambayo kilele chake kilikuwa juzi Oktoba 14 ilikuwa kati ya timu za majeshi ambazo ni APR na Jeshi Stars kwa wanaume na wanawake.

APR imeonyesha kuwa hawakuja kimatembezi kwa kushinda michezo yote miwili ya fainali ya wanaume na wanawake kwa seti 3-0,3-0.

Kocha APR, Nkuranga Alexis anasema kuwa japo mashindano yalikuwa na ushindani lakini wamepata walichotaka na haikuwa bahati kwao kushinda mataji hayo.

“Tulipoanza safari ya kuja Tanzania tuliweka malengo ya kufanya vizuri kwa kutwaa mataji ndicho kilichotokea, Tanzania ina timu nzuri ambazo zinaweza kushindana,” anasema kocha huyo.

Kocha wa Jeshi Stars wanaume, Lameck Mashindano anasema kuna haja ya timu za Tanzania kushiriki mashindano mengi ya kimataifa ili kujijenga zaidi kiushindani na kujiamini.

“Tumeshindwa kutetea taji lakini ndiyo michezo ilivyo ukikosa leo unaweza kupata kesho, mashindano ya kimataifa yatazijenga timu zetu, APR ilikuwa bora na ubora wao umechangiwa na kushiriki kwao mashindano mengi ya kimataifa.” anasema kocha huyo.

Nahodha wa APR, Mwizere Ezic anasema siri ya wao kufanya vizuri kwenye mashindano hayo ni uzoefu ambao wamekuwa nao wa kushiriki mashindano mengi ya kimataifa.

Naye nyota mwingine wa APR kwa wanawake, Kihozo Lyuzozo amezifisia Makongo, Magereza na Jeshi kwa kusema wana timu nzuri ambazo kama zikiendelea kukaa pamoja zinaweza kuja kufanya vizuri kwenye mashindano yajayo.

Monday, October 16, 2017

Echesa: Nikikumbuka nilivyowanyonga Yanga nacheeka

 

By Vincent Opiyo, Mwananchi

 Kati ya wachezaji ambao hawasahau historia ya soka Tanzania ni straika wa zamani wa Simba, Hilary Echesa, anasema akikumbuka anacheeka.

Echesa raia wa Kenya, katika mahojiano maalumu jijini Nairobi anasema amecheza mechi nyingi, lakini mechi ya Simba na Yanga ambayo Simba ilipiga mabao 4-3, hatoisahau maishani.

Echesa akiitumikia Simba SC alipachika bao la ushindi dhidi ya Yanga kwenye debi la Dar es Salaam mwaka 2010.

“Ninahisi ni kama jana. Nimecheza nchi nyingi lakini sijapata mazingira matamu kama yale Uwanja wa Taifa wa Dar es Salaam.

“Wakati huo nilikuwa na Wakenya wenzangu Jerry Santo na Mike Baraza waliokuwa wamesajiliwa Simba.

“Ilikuwa mechi ngumu, mara tatu tuko nyuma ghafla bin vu Okwi (Emmanuel) akanitolea pasi, nikaiunganisha hadi wavuni, tena nilifunua dari.

“Nilifurahi kiasi cha kwamba nilivua jezi bila kufahamu tayari nilikuwa na kadi ya manjano na ndivyo mechi yangu ilivyoisha nilipopigwa kadi nyekundu.

“Sasa angalia, wakati nakwenda katika chumba ya kubadilisha mavazi, refa si akamaliza mchezo, mbio nikarudi uwanjani kuzidi kushangilia ushindi huo mnono.

“Yanga walinywea sana, walichoka maana hawakuamini kama nitawatungua. Walijua kuwa mchezo utamalizika kwa sare ya 3-3, nikawatandika lile bao.”

Echesa anaamini kwamba wachezaji wa Kenya bado wanaweza kuonyesha makali yao nchini Tanzania licha ya tetesi za hivi karibuni kwamba wengi wanashindwa sababu ya nguvu za gizani.

“Wapo wachezaji kama Allan Wanga (Azam FC), Joseph Shikokoti na Paul Kiongera (Simba SC) ni baadhi yao walioteseka sana Bongo.

“Nafikiri kila kitu kipo akilini mwa mtu. Watanzania wanachukulia soka lao siriaz na pindi tu utakaposaini klabu mojawapo kubwa utakuwa nyota wa mjini.

“Si magazeti, si mashabiki wote watakufuata ni wajibu wako kujichunga. Mfano Ambani (Boniface) alipachika magoli mengi sana Ligi Kuu ya Tanzania kumaanisha alifahamu kazi yake na aliiaminika, mambo mengine ya nje ya uwanja ni stori tu.”

Akizungumzia Wakenya wanaocheza soka nje, Echesa anasema: “Zaidi ya Wakenya 20 wanapiga soka la kulipwa nje ya nchi. Ni mazingira tofauti sana na nyumbani kila mtu akikutana na utamaduni tofauti inakuwa ni miongoni mwa changamoto nyingine kwa mchezaji husika.

Echesa anayekipiga Sofapaka FC inayoshiriki Ligi Kuu hivi sasa. Ni huyu Echesa mmoja amesafiri mataifa kadha wa kadha na lengo la kusaka posho.

“Miongoni mwa nchi nilizocheza, sitasahau maisha yangu nchini Damascus. Hata sikumbuki ni klabu gani nilichezea huko lakini maisha yalikuwa magumu kweli. Ndani ya miezi mitatu niliyokuwa huko, lugha ngumu pia ubaguzi wa rangi,” anasimulia Echesa (36).

“Singapore, Indonesia, Malaysia na mataifa mengine angalau maisha hayakua mabaya. Kule hata nilijifunza maneno mawili matatu ya lugha yao na nilikawia sio kama Damascus.

“Kitu cha kuhuzunisha sana nje ni uende majaribio na Wakenya wenzako kisha wafeli.

Cheki niliitwa Malaysia majaribio ya majuma mawili katika klabu ya Police de Raja Malaysia na wenzangu Eric Muranda, John Baraza, Abdi Simba na Francis Chinjili.

Ni mimi tu nilikabidhiwa kandarasi wengine hawakuwahi, kwa kweli iliniuma sana lakini bahati nzuri walipata klabu nyingine.”

Katika maisha ya mchezaji, Echesa anakiri wakala ni mtu muhimu sana. Ni wajibu wake kumtaftia mchezaji wake klabu alimradi umuheshimu na kumwamini.

“Kilicho cha msingi ni kwamba mnaelewana na wakala wako na unaheshimu kandarasi mlionayo kati yenu.

“Wakati mwingi wachezaji hukosana na mawakala wao kwa sababu ya kutoelewana lakini kwangu sikuwahi kukosana naye tangu nimpate kupitia mwenzangu Muranda (Eric). Wakala Ahmad alinifaidi sana wakati wangu nikiwa nje,” Echesa anasema.

Kwa sasa Echesa anaishi maisha mazuri tayari amejenga kwao na kuanzisha biashara kadhaa

Monday, October 16, 2017

Issa Juma: Straika matata Mtibwa Sugar

 

By Eliya Solomon, Mwananchi

Mtibwa Sugar inajivunia kiungo wake, Issa Juma ambaye licha ya kucheza eneo la kiungo wa kati (8) pia ana uwezo wa kucheza nyuma ya mshambuliaji (10) na hata kwenye eneo la ushambuliaji wa mwisho.

Kiungo huyo aliitwa kwenye ule mchezo wa kirafiki dhidi ya Malawi na kocha wa Taifa Stars, Salum Mayanga ili kuziba nafasi ya Orgeness Mollel wa FC Famalicao ya Ureno ambaye alishindwa kuwasili.

Issa mwenye asili ya Zanzibar amezungumza na Spoti Mikiki na kuelezea mambo kadhaa ambayo wadau wengi wa soka hawafahamu kuhusu yeye hasa alipoanzia kucheza soka na tabia yake kwa ujumla.

“Kuna timu moja ya mtaani inaitwa Jamaica ya Zanzibar hiyo ndiyo nilianza kuichezea wakati nikiwa mdogo, 2010 hadi 2013 na nilianza sasa kuangaikia kwa kutafuta timu kubwa ya kuichezea,” anasema Issa.

Changamoto

“Nimepitia mengi sana lakini kikubwa ni changamoto ya kutokuwa na jina kubwa, ilinifanya kuwa na wakati mgumu sana, hakuna aliyekuwa anajali kuhusu mimi mpaka pale atakaponiona nacheza.

“Mtibwa nilifanya majaribio na kufuzu ila ilibidi kuanza kuonyesha kwa nguvu zote ili nianze kujijengea jina, kwa kiasi chake nimefanikiwa, ukiwa haufahamiki ningumu sana kwenda sehemu na kupata nafasi moja kwa moja,” anasema.

Mavazi

“Sio mtu wa mambo mengi kwenye mavazi, mara kwa mara navaa tisheti na jeans ila sio kwamba ndiyo nguo ninazo zipenda, huwa napenda sana kuvaa suti ila tatizo lile ni vazi ambalo huwezi kulivaa kila wakati,” anasema Issa.

Msosi

“Mmh!! Huniambii kitu kwenye wali na samaki, hakuna chakula ninachokipenda zaidi ya hicho” anasema kiungo huyo aliyezaliwa Desemba 17, 1995.

Malengo

“Wachezaji wengi wa hapa nyumbani maisha yao ya mpira huishia Yanga na Simba, sipendi na kwangu iwe hivyo natamani sana kama nitashindwa kufika Ulaya basi nicheze hata Ligi ya Afrika Kusini,” anasema Issa.

Monday, October 16, 2017

Utatu Mtakatifu- Hakuna tena kama ilivyokuwa MSN

 

Ulaya nzima, hakuna kilichokuwa kinapingana na hiki kifupi, ‘MSN’.

Katika Ligi ya Mabingwa, klabu inayopangiwa na Barcelona, akili ya kwanza ni kwa Messi, Suarez na Neymar. Hakuna tena utatu kama huo, lakini sasa umesambaratika.

Barcelona ilitwaa ubingwa ikiwa na MSN, ilinyanyasa klabu za dunia ikiwa na MSN, lakini sasa nguvu yake imemeguka.

Imekwanyuka kwa kuwa Neymar katimkia Paris Saint-Germain kwa dau kubwa, Euro 466 milioni ambako huko sasa wanataka kutengeneza utatu wao matata Neymar, Edinson Cavani na Kylian Mbappe.

Wafuatao ni wachezaji wanaotengeneza utatu katika klabu zao kwa sasa, ukiacha MSN ambayo imepanguka.

REAL MADRID: Karim Benzema, Gareth Bale, Cristiano Ronaldo.

Tangu Gareth Bale ajiunge na Karim Benzema, Cristiano Ronaldo mwaka 2013, maswali mengi yaliibuka kuhusu safu ya ushambuliaji Real Madrid itakuwa katika ubora gani.

Ronaldo amekuwa katika ubora wake muda mrefu na mabao yake yamekuwa yakichagizwa na Benzema wanaocheza pacha katika safu ya ushambuliaji.

Hata hivyo, safu imekumbwa na maswali mengi kuhusu uwezo wao wa kufunga mabao kwa kuwa imekuwa ikimtegemea zaidi Ronaldo ingawa huwezi kumbeza Benzema na Bale.

BARCELONA: Lionel Messi, Luis Suarez, Ousmane Dembele

Licha ya kumkosa Neymar, lakini safu ya ushambuliaji Barcelona ni moto wa kuotea mbali kwa kuwa bado Lionel Messi yuko kwenye ubora wake.

Mpaka sasa, Messi amefunga mabao 11 katika mechi saba zamwanzo na anatarajia kuendeeleza moto huo. Pia Luis Suarez bado ana kiwango bora.

Barcelona imeongezewa nguvu na kinda wa miaka 20 Ousmane Dembele ingawa winga huyo wa Ufaransa ameanza vibaya baada ya kupata majeraha yaliyomuweka nje mapema.

PSG: Kylian Mbappe, Edinson Cavani, Neymar.

Paris Saint Germain inatajwa kuwa ndiyo timu yenye washambuliaji watatu mahiri duniani. Ikitumia fedha nyingi kunasa saini zao.

Timu hiyo inapewa nafasi ya kutwaa ubingwa wa Ufaransa baada ya kunasa saini za Mbappe, Neymar na Messi.Licha ya kuibua mzozo na Edinson Cavani, wachezaj hao wakuwa tishio katika safu ya ushambuliajiwakiongozwa na Mbappe.

Haitakuwa ajabu kwa miamba hiyo ya soka Ufaransa kutwaa ubingwa msimu huu kutokana kwa mahasimu wao Monaco.Harry Kane, ameiteka dunia baada ya mabao yake kuing’arisha Spurs na tayari ameanza kufananishwa na wachezaji nyota Lionel Messi au Cristiano Ronaldo.

Akicheza mbele ya kiungo nyota duniani, Dele Alli, 21, Kane ameanza kuwa gumzo Spurs. Pia Christian Eriksen, 25, amekuwa chachu ya mafanikio.

Kane aliyepewa kitambaa cha unahodha wa England, anatarajiwa kung’ara msimu huu na ameingia katoka orodha ya wafungaji bora England.

MAN CITY: Gabriel Jesus, Sergio Aguero, Raheem Sterling.

Man City inaongoza Ligi Kuu England kutokana na safu yake ya ushambuliaji kuwa imara na kuzipiku timu zingine ikiwemo Manchester United.

Timu hiyo inapambwa na washambuliaji watatu wakali Sergio Aguero aliyefunga mabao sita nyuma Romelu Lukaku, licha ya kucheza dakika chache 163.

Mbali na Aguero, Man City inatambia Raheem Sterling mwenye mabao matano na Gabriel Jesus manne. Timu hiyo ina straika wengine hodari David Silva, Leroy Sane Bernardo Silva.

MAN UNITED: Marcus Rashford, Romelu Lukaku, Juan Mata

Jose Mourinho ana kikosi bora cha ushambuliaji hakuna ubishi, ana kila kitu. Romelu Lukaku, haraka amekuwa tegemeo Man United akiwa amefunga mabao 11 katika mechi 10.

Marcus Rashford ni mchezaji mwenye kipaji na chipukizi akishambulia kutoka kushoto pembeni mwa uwanja, wakati Juan Mata ni hodari akitokea upande wa kulia.

Man United ina muungano mzuri kutoka kwa viungo Henrikh Mkhitaryan anayecheza nyuma yao. Baada ya kumkosa Zlatan Ibrahimovic, Man United imelamba dume kwa kupata saini ya Lukaku.

CHELSEA: Alvaro Morata, Pedro, Eden Hazard

Edin Hazard ameanza msimu mpya vibaya baada ya kushindwa kutamba kutokana na majeraha hatua ambayo ilimkosesha amani kocha Antonio Conte wa Chelsea.

Ingawa Hazard amerejea uwanjani hivi karibuni, bado hajaanza kufanya vitu vyake na ni mchezaji tegemeo wa Chelsea.

Hata hivyo, Conte ana mbadala Chelsea Alvaro Morata aliyemsajili majira ya kiangazi kutoka Real Madrid baada ya kubaini udhaifu katika safu ya ushambuliaji.

Morata raia wa Hispania ameanza kuwa gumzo, baada ya kucheza kwa kiwango bora katika michuano tofauti ikiwemo Ligi Kuu England.

Mhispania huyo anatajwa kuwa na uwezo mzuri wa kufunga na akicheza na Pedro atajenga muungano mzuri wenye tija kwa Chelsea katika michuano mbalimbali.

LIVERPOOL: Roberto Firmino, Mohamed Salah, Sadio Mane, Philippe Coutinho

Kocha Jurgen Klopp hana shida ya kusaka namba tisa bora katika kikosi chake msimu huu kwa kuwa ana straika wa ukweli wenye uwezo mkubwa duniani.Salah, Firmino na Mane wamekuwa wakifanya kazi nzuri Liverpool ingawa wameshindwa kufunga mabao mengi katika Ligi Kuu England.

Mbrazil Coutinho amekuwa chachu ya mafanikio Liverpool akicheza nyuma yao akiwa chanzo cha mashambulizi ndani ya kikosi hicho.

Pamoja na kushindwa kutamba, lakini Liverpool imeingia katika orodha ya washambuliaji nyota wenye uwezo mzuri wa kufunga mabao.

Wakati Mane ni hodari wa kufunga mabao, Coutinho ni hodari wa kuanzisha mashambulizi ndio maana Barcelona hadi leo wanalia naye kutoka saini yake muda mrefu.

BAYERN MUNICH: Robert Lewandowski, Arjen Robben, Thomas Muller

Tangu alipojiunga na Bayern Munich akiwa mchezaji huru kutoka Borussia Dortmund, Lewandowski ameipa ubingwa mara tatu mfululizo wa Ligi Kuu Ujerumani chini ya kocha Jurgen Klopp.

Lewandowski amefunga mabao 30 katika misimu kadhaa yakiwemo matano aliyofunga ndani ya dakika tisa katika mchezo wa ligi akitokea benchi dhidi ya Wolfsburg mwaka 2015.

Pia huwezi kumuweka kando mkongwe Arjen Robben kwa kuwa Mholanzi huyo ameonenyesha bado ana kiwango bora cha kutisha duniani.

Mbali na kina Lewandowski, Bayern Munich inatambia Franck Ribery na James Rodriguez ambao wamekuwa chachu ya m mafanikio katika kikosi hicho kutoka Makao Makuu Allianz Arena.

JUVENTUS: Mario Mandzukic, Gonzalo Higuain, Paulo Dybala.

Juventus haiko nyuma katika safu ya ushambuliaji, ina straika hodari wenye majina makubwa wanaotamba Ulaya na miongoni mwao ni Mario Mandzukic, Gonzalo Higuain na Paulo Dybala.

Mandzukic na Higuain wamekuwa katika kiwango bora na nwamekuwa hodari wa kufunga mabao katika timu hiyo maarufu m‘Kibibi Kizee’ cha Turin.

DORTMUND: Andrej Yarmolenko, Pierre-Emerick Aubameyang, Christian Pulisic

Baada ya mshambuliaji nyota Marco Reus kupata majeraha, Dortmund ina mchezaji mwenye nguvu na akili anayeweza kuziba vyema pengo hilo ambaye ni Andrej Yarmolenko.

Yarmolenko anaweza kucheza vyema katika safu ya ushambuliaji akicheza na Pierre-Emerick Aubameyang, Christian Pulisic anayetokea pembeni.

Nyota hao watatu na Maximilian Philipp, wametengeza pointi 15 za Dortmund na kupata mabao 21 katika Ligi Kuu Ujerumani msimu huu.

Kwa wastani wa wachezaji watatu katika kila mchezo, wamelingana na Manchester United na kuingia katika rekodi ya kuwa moja ya timu bora Ulaya.

ARSENAL: Alexandre Lacazette, Mesut Ozil, Alexis Sanchez

Katika miaka mitatu iliyopita Arsenal haikuwahi kuwa na washambuliaji nyota wanaoweza kubadili sura ya mchezo au kuwa tishio dhidi ya mabeki wa timu pinzani.

Lakini kocha Arsene Wenger, amekuna kichwa na kupata safu imara ya ushindi baada ya kuvuna straika watatu mahiri kina Alexandre Lacazette, Mesut Ozil na Alexis Sanchez.Ingawa Ozil anacheza nafasi ya kiungo mshambuliaji, lakini mchango wake wa kulisha mipira kwa kina Lacazette na Sanchez umekuwa na manufaa msimu huu katika Ligi Kuu England. Ozil anatajwa ni mchezaji mjanja mwenye uwezo wa kuchezesha timu, Sanchez ana nguvu na Lacazette ni hodari wa kumalizia mipira.

Monday, October 16, 2017

Abdul Hilal; Kutoka African Lyon hadi Tusker

 

By Eliya Solomon, Mwananchi

Mafanikio ya nyota kadhaa wenye majina makubwa duniani kama Christiano Ronaldo wa Ureno na hata Lionel Messi wa Argentina yametokana na juhudi zao kwenye utafutaji wa maisha ya soka.

Kuonyesha msisitizo, Diego Maradona ambaye 1982 alijiunga na FC Barcelona kwa dau lililoweka rekodi ya dunia Dola5mil aliwahi kusema kuwa ili mafanikio yaje ni lazima kuwepo na juhudu hakuishia hapo aliendelea kwa kudai bahati haipaswi kutegemewa.

Juhudi za wachezaji wa Kitanzania wanavyojitahidi kutafuta maisha ya soka nje ya mipaka ya Tanzania zinaweza kuja kuzaa matunda kwa siku za usoni kuanzia kwao wenyewe na hata kwa Taifa.

Spoti Mikiki tunaendelea kukuletea nyota hao wa Kitanzania wanaoonyesha juhudi kwenye utafutaji wao, wiki iliyopita tulikuwa na Salum Shebe ambaye anaichezea Al-Mudhaibi ya Oman, wiki hii tunaye Abdul Hilal wa Tusker ya Kenya.

Abdul (22) aliitwa kwa mara ya kwanza Taifa Stars na kupata dakika kadhaa za kucheza kwenye mchezo wa kirafiki wa kimataifa ambao ulimalizika kwa sare ya bao 1-1 na Malawi, Uwanja wa Uhuru.

Winga huyo wa Tusker amezungumzia mazingira yalivyokuwa kwa mara ya kwanza alivyopata taarifa za kuitwa timu ya Taifa Stars,maisha ya kambini yalivyokuwa kwake na hata alivyopata nafasi ya kucheza mchezo ule wa kirafiki.

“Nilikuwa nafahamu kama kocha alikuwa ananifuatilia na uzuri Ligi yetu ya Kenya inaonyeshwa na vituo vya Luninga ambavyo hata kwa Tanzania vinapatikana, nilichokiamini ni kuwa kutakuwa na wepesi wa kuniona.

“Kilichokuwa kinanipa moyo ni kuamini kwangu kuwa inawezekana mbona rafiki yangu Hamisi Abdallah wa Sony Sugar aliitwa kwenye mchezo wa nyuma ule, niliamua kujituma na mwishowe muda ulipofika nikapata taarifa za kuitwa timu ya Taifa.

“Nilishtuka na kuona hatimaye naenda kulitumikia Taifa langu, nilifurahi sana na mara moja nilianza taratibu za kuja Tanzania kwa ajili ya kujiunga na kambi ya timu ya Taifa, nilivyofika mara moja niliwasili kambini na kukutana na wachezaji wengine wakubwa,” anasema Abdul.

Mchezaji huyo aliendelea kwa kusema alifurahi na kubadilishana mawazo na wachezaji wengine ambao walikuwa wamepiga hatua zaidi yake hivyo alijua maisha yao yalivyo huko wanapocheza soka.

“Niliona ni nafasi nzuri kujua mengi kutoka kwa Mbwana Samatta, Saimon Msuva na hata wengine wa ndani, kitu ambacho ninacho huwa napenda kujifunza vitu vipya kutoka kwa ambaye nipo naye ngazi moja, niliyemzidi na aliyenizidi.

“Maisha ya mpira yanaweza kubadilika hivyo ni muhimu sana kujua mengi ambayo yapo ndani ya mpira na hata nje, maisha ya kambini niliyafurahia sana kwa sababu tulikuwa wote kama familia moja,” anasema.

Hata hivyo, alimalizia kwa kusema alivyoingia kucheza kwenye ile mechi ya kirafiki na Malawi aliingiwa na shauku ya kutaka kubadilisha hali nzima ya mchezo kwa kuisaidia Taifa Stars ambayo hata hivyo iliishia kusawazisha bao lenyewe kupitia Saimon Msuva.

Hapa anaelezea safari yake ya kucheza mpira wa kulipwa nje ya Tanzania ilivyokuwa mpaka akapata nafasi ya kujiunga na Tusker inayoshiriki Ligi Kuu nchini humo.

“Kuna kituo hivi kinaitwa D.Y.O.C kipo maeneo ya Sigara TCC Chang’ombe hapo ndipo nilipoanza kucheza mpira wakati nikiwa mdogo na makocha walikuwa, Aluko Simango, Sizza Mpunda, Eddo na Brown Elnest.

“Hiyo ilikuwa 2002 na nilikaa kwenye hicho kituo kwa miaka nane baada ya hapo maisha yalisogea na nilikuwa miongoni mwa wachezaji ambao walichanguliwa kwa ajili ya mashindano ya Copa Coca-Cola kwa Temeke ilikuwa 2010, tuliambulia nafasi ya tatu.

“Baada ya mashindano nilijiunga na African Lyon, kwa mara ya kwanza nilisaini mkataba wa miaka miwili, nilikuwa mdogo lakini nilikuwa napata nafasi ya kucheza kwa kipindi hiko ilikuwa tayari ipo Ligi Kuu,” anasema winga huyo tegemeo wa Tusker kwa sasa.

Maisha yake yaliendelea akiwa na Lyon lakini anadai kuwa ndoto yake ilikuwa ni kucheza soka la kimataifa kwa kucheza nje ya nchi hivyo ilibidi aanze mchakato wa kwenda kufanya majaribio kwenye mataifa ya karibu.

“Nilianza Congo kwenye timu ya FC Lupopo, nilifanya majaribio vizuri na rais wa timu ile alionyesha nia ya kunisajili kwenye timu yake na moja ya vitu ambavyo aliahidi kuvifanya kama akipita kwa sababu walikuwa kwenye uchaguzi mwingine ni pamoja na kunisajili. “Mambo yalienda fyongo na aliingia rais mwingine na kukosa nafasi ya kujiunga nao, ilibidi nijiongeze kwa kwenda Kenya, sikupata wakati mgumu kwenye majarinio ya Tusker kwa sababu ilipogusa mpira wangu wa kwanza waligundua kuwa mimi ni mchezaji hivyo waliamua kuniweka pembeni.

“Hawakutaka kabisa niendelee na majaribio waliamua kunipa kabisa mkataba na nikaanza kuichezea timu yao, nahitaji kuendelea kupiga hatua kwa kwenda kwenye Ligi nyingine kubwa zaidi kasha kama Mungu akipenda nicheze hata England,” anasema Abdul.

Monday, October 16, 2017

Guardiola: Muumini anayebadili rangi ya ngozi yake

 

Mwaka 2008, klabu ya Barcelona chini ya Rais Joan Laporta na Mkurugenzi wa ufundi wa klabu hiyo, Txiki Begiristain ilikuwa inafanya uamuzi bora zaidi baada ya miaka 20.

Mchana utakaokumbukwa zaidi katika klabu hiyo, siku ambayo kocha mpya asiyekuwa na uzoefu Pep Guardiola maarufu kama Pep alikuwa anatambulishwa kama kocha mpya wa klabu hiyo.

Inawezekana ulikuwa uamuzi ambao ulinyanyua nyuso za watu wengi kwa sababu ya kocha aliyekuwa anaondoka, Frank Rijkaard, lakini kiuhalisia huu ndio uliokuwa uamuzi bora uliofanywa na Barcelona kwa kipindi cha miongo miwili tangu walipomteua kocha Johan Cruyff kuwa kocha wa klabu hiyo mwaka 1988.

Guardiola aliibadili Barcelona katika kile ambacho wengi hukisahau, na kushinda mataji 14 katika misimu minne tu huku pia akishinda kila fainali aliyofika isipokuwa moja tu ya Copa Del Rey iliyoamuliwa na bao la Cristiano Ronaldo.

Ni Pep huyu ambaye alishinda mataji 14 kati ya mara 19 alizoshiriki katika michuano yoyote ile kwa maana akikosa mara tano tu kati ya 19.

Huyu ambaye aligeuka kuwa kocha ambaye alifanikiwa zaidi katika historia ya Barcelona na kufunika hata nyota ya mkufunzi wake Johan Cruyff.

Inawezekana kabisa rekodi zote hizi zikawa matusi ya “nguoni” kwa kocha Jose Mourinho kwani kabla ya uteuzi wa Guardiola, Rais Laporta pamoja na mkurugenzi wake wa ufundi Begiristain walishazungumza na Mourinho na kumuahidi kuwa nafasi ya Rijkaard ingekuwa yake, uamuzi ambao usingeweza kushangaza wengi.

Lakini waliamua kucheza “kamari” kutokana na ushauri wa Johan Cryuff ambayo iliwalipa, waliweka mkeka ambao ulikuwa “jackpot” na pengine ambao unaweza usitokee tena katika kipindi ambacho kizazi cha sasa kitaendelea kupumua.

Ni ngumu kupata akili ya Guardiola, hasa kutokana na ukweli kuwa aliishi miaka yote akijaribu kuhitimu na kufaulu masomo ya Johan Cryuff na kuleta somo lake jipya kwenye soka.

Medulla Oblongata ya Guardiola ni aina ya kina Albert Einstein ambaye aliishi akiamini kuwa “tafakuri ni bora kuliko maarifa, kwa sababu maarifa yana ukomo au mwisho lakini tafakari inaizunguka dunia.”

Pep Guardiola alifahamu kuwa alifundishwa falsafa ya “Total Football” tangu akiwa mdogo na Johan Cryuff, falsafa ambayo Cryuff aliweza kuifahamu kupitia mbabe wa zama hizo Rinus Michel.

Kwa Guardiola, falsafa hii haikuwa na nguvu tena kwa sababu iliishi miaka takribani 40 tayari, hivyo wakati wake ukifika alitakiwa kuwa na kitu tofauti na ambacho kingeweza kumfanya aiweke dunia katika mabega yake na atoe amri ni wapi aitue ili afanye mengine.

Ndipo hapa ambapo kichwa chake kinachokiuka yaliyosemwa na wahenga kuwa akili ni nywele, kikauboresha mfumo na kulifanya jina la Tik-Taka kuwa maarufu kupindukia.

Guardiola alileta ladha tofauti na waliyofanya wengine na kusababisha dunia kuungana kutafuta majibu dhidi ya mitihani aliyoweka mbele yake ikiwemo mfumo maarufu wa Jose Mourinho wa “Park The Bus” ambao mara kadhaa uliwahi kujaribu kuwa jawabu la baadhi ya maswali ikiwemo ile Inter Milan iliyotikisa msimu wa 2009/2010.

Maisha hayakuwahi kuwa magumu kwenye moyo wa Guardiola, alikuwa na kikosi ambacho kila kocha alikitamani, alikuwa na kikosi ambacho kilikuwa na wachezaji watatu ambao ungeweza kuwapa uchezaji bora duniani wakati wowote na hakuna ambaye angelalamika, wakiwa ni Lionel Messi, Andres Iniesta na Xavi Hernandez.

Barcelona hii ambayo baada ya kumtetemesha Sir. Alex Fergusson pale Wembley na kisha yeye mwenyewe kukiri kuwa ni timu pekee aliyowahi kukutana nayo na “ikawaweka mafichoni” kwa wakati wote wa mchezo, ilikuwa imesajili wachezaji 14 tu mpaka Guardiola anaacha kuifundisha mwaka 2012.

Guardiola akiwa mwanafunzi bora wa Cryuff na akiwa ametokea kwenye timu ya vijana aliamini kuwa hakukuwa na ubora ambao angeweza kuutengeneza kwa kutumia wachezaji wa nje, yaani waliokuzwa kwa tamaduni tofauti.

Kwenye akili ya Guardiola, alikuwa anakumbuka namna Cruyff alivyotengeneza kikosi kilichoitwa “Dream Team” huku yeye akiwa miongoni mwa vijana waliopandishwa.

Guardiola alinunua wachezaji 14 peke yake, huku akipandisha wachezaji 22 katika kikosi cha kwanza ambao walimpa kila alichotaka. Vijana ambao angewaambia kuwa nimewafundisha soka bora zaidi duniani na wao wakatii.

Miaka ikaondoka zake, kama ilivyo ada, wakati huondoka na zama zake.

Guardola tangu hapo ameamua kutafuta maisha kwingineko akipita Bayern Munich ambako wengi wanaweza kupaita hakuna ushindani, na sasa yupo England panapoitwa Jehanamu kutokana na tabia ambayo klabu ya Burnley inaweza kufungua msimu kwa kuifunga Chelsea inavyotaka, kitu ambacho ni nadra kukikuta La Liga.

Guardiola aliamua kuja kuiaminisha dunia kuwa hakuna jangwa ambalo hawezi kuishi kwa sababu nundu yake ni imara.

Kwenye moyo wake hakutaka kubadili imani yake ya ngozi kutokubadilika, kwake aliamini angeweza kutumia vijana na maisha yakasogea.

Aliamini kila kitu kinawezekana na hakuna sababu ambayo Kelechi Ihenacho akashindwa kufanya kile ambacho Aguero anafanya kama akimfundisha.

Wazungu wanasema “too bad” wakati anafika, ndicho kipindi pia ambacho ligi kuu ya England ilikuwa inawapokea kikamilifu, Antonio Conte pale darajani na Chelsea, Jurgen Klopp akileta kumbatio lake Liverpool pamoja na Jose Mourinho katika klabu ya Manchester United.

Hawa wote ni washindi na hawa wote walitolea macho kile alichokitamani pia.

Wakati akiamini kuwa rangi ya ngozi haibadiliki, kikosi chake kilikuwa na wastani wa umri unaokaribia miaka 30 huku safu yake ya Ulinzi ikiwa imezidi umri huo. Hakuwa na vijana, na pamoja na kuwa falsafa zake zilianza vyema, baada ya muda misuli ya “wachezaji wake wa makamo” haikuweza tena kuhimili vishindo na maisha yakawa magumu.

Hao ndipo kengele ya kumbukumbu ilipogonga kichwani kwake, hapo ndipo alipogundua moto anaojaribu kuuzima na ni wakati huu alipopata majibu juu ya namna ambayo watu wengi bado wanamjaribu.

Akitizama mfumo wa klabu ya Manchester City iliyopo chini ya usimamizi wa ufundi Txiki Begiristain, mtu ambaye alimleta Barcelona, haufanani na Barcelona na hakuna vijana wengi wenye vipaji.

Medulla yake inayofanya kazi kwa kasi ya kipekee ikampa jibu moja tu, kuwa kwa sasa Kaisari kaachiwa ulimwengu wa soka autawale na kuwa watoto hawana nafasi kubwa kwa sababu fedha alizozisema Ben R Mtobwa, zinanuka harufu kali kweli.

Maisha mafupi, akayatafutia njia ya mkato, akaamua kubadili rangi ya ngozi, akasahau wazo la kupandisha vijana na kuamua kusajili kwa kiasi cha paundi milioni 220.

Sasa ameweka swali jipya na gumu zaidi, wakati timu inapambana na akili ya Guardiola ambayo inafanya kazi kwa kasi ya kipekee, unakuwa unapambana na fedha zilizokuwa nyuma yake pia. Maisha yamebadilika na Guardiola kabadili rangi ya ngozi yake.

Friday, July 21, 2017

JEURI YA MAYWEATHER: Amwambia McGregor, we maskini tu

 

LONDON, England. Floyd Mayweather jeuri sana aisee. Pesa aliyo nayo ndiyo inampa ujeuri. Unajua hii ikoje, juzi alimwambia mpinzani wake, McGregor, “Wewe masikini tu.”

Mabondia hao wako kwenye kulinadi pambano lao na juzi walikuwa SSE Arena kwenye Uwanja wa Wembley, na katika tambo zao, Money Man alimwambia mpinzani wake, Conor McGregor “Wewe ni masiki tu na hunifikii kwa fedha.”

McGregor hakuwa na cha kusema zaidi ya kucheka na kujitetea akisema subiri ulingoni.

Mayweather alimwonyesha saa yake na kumwambia: “Ushahidi wa kwanza kuwa wewe ni masikini ni saa uliyovaa. Wewe ni masikini ndio maana unavaa saa za bei rahisi.”

Bondia huyo ilibidi anywee kwani wakati akisema hayo, alikuwa akimwonyesha saa yake iliyotengenezwa kwa vito vya almasi aina ya Hublot ikiwa na thamani ya Dola 1.4milioni (Sh3,136bil), na alikuwa akimwonyesha mara kwa mara.

Akizungumza baada ya kupewa kipaza sauti, Mayweather alimwambia McGregor: “Wewe ni mtu mwepesi, angalia.”

Bondia huyo alinunua saa hiyo Hublot alipokuwa katika matembezi Dubai mwaka  2015 na amekuwa akiivaa mara kwa mara katika matukio muhimu.

Si kwa saa tu, bondia hiyo ambaye amepigana mara 40 na hajawahi kupigwa amekuwa akivaa shingoni vito vya thamani na mkononi pia. Pia anautajiri unaofikia Dola550milioni.

Bondia hiyo anatarajia kuingoza Dola78m akipambana na McGregor mpambano utakaofanyika T Mobile Arena mjini Las Vegas Agosti 26.

Friday, July 21, 2017

ZIARA: Everton walivyotikisa D’salaam kwa saa 40

 

By Charles Abel, Mwananchi cabel@mwananchi.co.tz

Dar es Salaam. Ujio wa klabu ya Everton inayoshiriki Ligi Kuu ya Uingereza wiki iliyomalizika, ndio habari iliyotokea kuteka hisia za wapenzi wa soka na vyombo vya habari, ndani na nje ya Tanzania.

Timu hiyo ilitua nchini na kukaa kwa siku mbili chini ya udhamini wa kampuni ya SportPesa na ilicheza mchezo maalumu wa kirafiki dhidi ya timu kongwe ya Kenya, Gor Mahia katika mchezo ambao Everton waliibuka na ushindi wa mabao 2-1.

Gor Mahia ilipata bahati hiyo baada ya kuilaza AFC Leopards mabao 3-0 katika mchezo maalumu wa timu zinazodhaminiwa na Kampuni ya SportPesa.

Simba, Yanga, Jang’ombe Boys zilitolewa katika mashindano hayo pamoja na Tusker na Nakuru AllStars.

Msafara wageuka gumzo

Safari ya Everton kuja nchini ilianzia kwenye Uwanja wa Ndege wa kimataifa wa John Lennon uliopo jijini Liverpool ambao unashika nafasi ya 13 kwa ubora katika orodha ya viwanja vya ndege nchini Uingereza.

Msafara huo ukiwa na jumla ya watu 84 ambao ni wachezaji 25, maofisa wa benchi la ufundi na utawala, waandishi wa habari pamoja na wataalamu wa tiba na lishe, walilazimika kusafiri takribani saa 10 angani na kuanzia nyakati za usiku na kutua Jumatano asubuhi kwenye Uwanja wa Ndege wa Kimataifa wa Julius Nyerere jijini.

Tofauti na misafara ya timu nyingine ambayo hulazimika kupitia kwenye geti la kawaida ambalo abiria wengine hutokea, msafara wa Everton ulishukia katika eneo la watu maalumu (VIP) huku ulinzi ukiwa mkali kila kona uwanjani hapo.

Muda mfupi baada ya kutua, msafara huo ulipokewa na Waziri wa Habari, Sanaa, Utamaduni na Michezo, Dokta Harrison Mwakyembe na baadaye uliondoka kwenda katika Hoteli ya kifahari ya Sea Cliff ambako ndiko timu ilipangwa kufikia.

Ofisa habari wa Shirikisho la Soka Tanzania (TFF), Alfred Lucas alisema kuwa ujio wa timu hiyo umewapa elimu ya kutosha ambayo shirikisho itatumia katika kuleta maendeleo ya soka nchini.

“Wenzetu wamepiga hatua kubwa na kama mlivyoona kuwa kuna tofauti kubwa kati yao na sisi. Naamini klabu zetu pamoja na TFF tumepata darasa tosha ambalo tukilifanyia kazi tutapiga hatua kubwa,” alisema Lucas.

Nidhamu ya ratiba

Kila ambacho Everton kwa siku zote mbili walizokuwepo Tanzania, kilikuwepo ndani ya ratiba ambayo iliandaliwa na kutolewa mapema kabla hata timu hiyo haijatua nchini ikitokea Uingereza.

Hakuna ambacho kilifanyika nje ya utaratibu uliowekwa na walijitahidi kuzingatia muda kama ulivyopangwa   kwa mujibu wa ratiba yao ilivyoonyesha jambo ambalo ni elimu tosha kwa timu zetu.

Hata baada ya kuwasili, wachezaji waliingia kwenye basi na kutulia, hakukuwa na mchezaji aliyekuwa akitangatanga kuonyesha kuwa naye yupo ama kufungua dirisha, wote walikuwa ndani wametulizana.

Baada ya kuwasili kwenye hoteli waliyofikia, wachezaji na maofisa wa benchi la ufundi na wale wa utawala walioambatana na timu hiyo walianza kujigawa katika makundi tofauti yaliyokwenda kushiriki matukio mbalimbali kama ratiba yao ilivyokuwa inaonyesha.

Kundi moja lililojumuisha maofisa wawili sambamba na wachezaji wanne, Ademola Lookman, Idrisa Gueye, Yannick Bolasie na nahodha Leighton Baines lilikwenda kutembelea kwenye shule ya walemavu ya Uhuru Mchanganyiko na kushiriki shughuli mbalimbali za kijamii.

Kwanza kwa Bolasie, Wacongoman wenzake walijipanga kumlaki, walimshangilia kuanzia JNIA hadi Sea Cliff walikofikia na walicheza muziki kumkumbusha nyumbani DR Congo.

Ratiba yao ya baada ya kufika, kwanza walitembelea kujionea majengo na vifaa vilivyotolewa na ubalozi wa Uingereza shule ya Uhuru Mchanganyiko, kucheza mechi ya kirafiki na watoto wenye ulemavu wa macho na kisha waligawa mito ya kulalia, wanasesere pamoja na skafu zenye nembo ya klabu hiyo kwa watoto hao.

Kundi lingine la wachezaji lilikwenda Uwanja wa Uhuru ambako lilifanya mazoezi ya pamoja na wachezaji wa timu ya watu wenye ulemavu wa ngozi (albino), huku wachezaji wengine wakishiriki katika semina maalumu ya mapishi iliyofanyika katika hoteli ya Sea Cliff.

Ukiondoa makundi hayo ya wachezaji ambayo yalitawanyika kwenye maeneo mbalimbali, baadhi ya maofisa wa Everton walifanya semina maalumu kwa wanahabari huku makocha wawili wa timu hiyo wakiendesha kliniki ya soka kwa watoto wadogo pamoja na wachezaji wa vikosi vya vijana kwa timu za Yanga na Simba.

Siku ya pili, msafara wa Everton ulianzia kwa kutembelea Hospitali ya Pugu Kajiungeni na baadaye ulitembelea kituo cha utamaduni wa jamii ya Wamasai kabla ya kurudi hotelini Sea Cliff kujiandaa kwa mchezo dhidi ya Gor Mahia.

Mwalimu mkuu wa shule ya msingi ya Uhuru Mchanganyiko, Anna Mshana alisema ziara ya wachezaji wa Everton shuleni kwake umekuwa na tija kwao.

“Tumezoea kuwaona kwenye luninga wakiwa wanacheza, lakini leo tumewaona moja kwa moja. Kwa kweli sisi imetupa hamasa sana kwamba kumbe tuwe tunaendelea kuwaangalia kwa sababu leo tumewaona kama mlivyo.

“Misaada mnayotupa tunaithamini sana lakini tunaomba muendelee kutupatia kwa sababu wale watoto wanatoka katika mazingira magumu kwa hiyo wanahitaji misaada mingi na hata kusoma kwao ni kwa shida na serikali peke yake haitoweza.”

“Tunapowapata wadau kama nyinyi tunapata faraja kubwa kwamba kumbe wale watoto nao wanajiona wanathaminiwa kama binadamu wengine.

“Tumefurahi na tunawashukuru sana na tunawakaribisha kwa mara nyingine,” alisema Mwalimu Mshana.

Rooney aimbwa kila kona

Si vyombo vya habari vya ndani au vile vya nje ya Tanzania pekee ambavyo vilikuwa vinalitaja bila kuchoka jina la mshambuliaji Wayne Rooney ambaye Everton imemsajili hivi karibuni akitokea Manchester United bali pia mchezaji huyo alivuta hisia za kundi kubwa la mashabiki wa soka nchini katika siku zote ambazo Everton walikuwa nchini.

Kila shabiki wa soka alitamani kupata nafasi ya ama kugusana na mshambuliaji huyo au kupiga picha ingawa hilo lilitimia kwa watu wachache kutokana na ulinzi mkali ambao mshambuliaji huyo alikuwa nao.

Kutokana na hamu ambayo mashabiki wengi walikuwa nayo ya kumuona Rooney, haikushangaza kuona mmoja wa mashabiki aliyevaa jezi ya Manchester United akivamia uwanjani na kwenda kumkumbatia mshambuliaji huyo ambaye alifunga bao la kwanza la Everton katika mchezo huo.

JK, Mwinyi waibuliwa na Everton

Mgeni rasmi wa mechi baina ya Everton na Gor Mahia alikuwa ni Makamu wa Rais wa Jamhuri ya Muungano wa Tanzania, Mama Samia Suluhu Hassan lakini vigogo wengi walijitokeza kuungana naye katika kutazama mechi hiyo.

Baadhi ya viongozi waliojitokeza mbali na Mama Samia ni Rais wa awamu wa Pili, Mzee Ali Hassan Mwinyi, Rais wa awamu ya nne, Dokta Jakaya Mrisho Kikwete, Waziri wa Mambo ya Ndani, Mwigulu Nchemba sambamba na aliyekuwa Rais wa Shirikisho la Soka Tanzania (TFF), Leodegar Tenga.

Gor Mahia, Everton wagawana vipindi

Pengine Gor Mahia wangekuwa makini kutumia nafasi walizozipata kwenye kipindi cha kwanza, wangeweza kuandika historia ya kupata ushindi kwenye mchezo huo ambao hata hivyo walikuja kupoteza.

Timu hiyo ya Kenya ilitawala vilivyo kipindi cha kwanza huku wachezaji wake Dan Walusimbi na Karim Nizigiyimana wakionyesha uwezo wa hali ya juu. Hata hivyo kipindi cha pili kilitawaliwa na Everton baada ya kufanya mabadiliko ya kikosi kizima.

Fursa za biashara/Utalii

Kama alivyosema Dk Mwakyembe, ujio umekuwa na faida kwa Tanzania kutangazika nje kwani ambaye haifikirii wala kuizungumza Tanzania ameisoma na kuifuatilia kote duniani ambako Everton inafuatiliwa.

“Ni fursa kwa Tanzania kujitangaza, ujio wa Everton ni neema kubwa, tumefanikiwa na kipindi kijacho, tunataka kuona Everton inacheza mechi na timu za Simba au Yanga au timu nyingine ili Tanzania itangazike pekee,” alisema Dk Mwakyembe katika moja na mazungumzi yake.

Fursa nyingine ni kwa wafanyabiashara wa jezi, skafu, usafirishaji pamoja na hoteli ni miongoni mwa watu walionufaika na ujio wa Everton kutokana na kufanya vizuri kwa biashara zao wakitumia fursa ya ujio wa kundi kubwa la watu kutoka nje na ndani ya nchi.

“Binafsi ningependa hao Everton wakae hapa Tanzania hata kwa wiki nzima kwani biashara ya jezi zao imekuwa ikituendea vizuri kwani mashabiki wamekuwa wakizinunua kwa wingi ili wanapokwenda kutazama mechi waonekane wamevaa sare na wachezaji,” alisema mfanyabiashara Riziki Selemani.

Wasemavyo makocha

Kocha wa Everton Ronald Koeman alisifu mapokezi na uungwaji mkono ambao timu yake ilipata katika kipindi chote ambacho ilikuwa nchini na kukiri kuwa umewapa faida.

“Tulihitaji mahali tulivu ambako tungeweza kufanya baadhi ya programu zetu za kitimu na nashukuru tumefanikiwa katika hilo. Ninawashukuru Watanzania kwa ukarimu na upendo mkubwa ambao wametuonyesha ndani ya hizi siku mbili tulizokuwa hapa.

Mechi yetu dhidi ya Gor Mahia ilikuwa nzuri na tumecheza na wapinzani ambao walijitahidi kuonyesha kiwango bora ingawa Everton tulikuwa bora zaidi yao,” alisema Koeman.

“Nimefurahia kurudi tena Tanzania ambako nimepokelewa vizuri na kupewa heshima kubwa na mashabiki. Ingawa tumepoteza mchezo, nimefurahishwa na jinsi mashabiki wa hapa wanavyopenda soka na ni kitu cha kipekee,” alisema kocha wa Gor Mahia, Dylan Kerr.

Friday, July 21, 2017

Kocha Wenger Kaanza mapema, autaka ubingwa

Arsene Wenger akizungumza na wachezaji wake

Arsene Wenger akizungumza na wachezaji wake wakiwa Austria kwa mechi za maandalizi. 

Inawezekana ana kumbukumbu ya mabango ya mashabiki uwanjani, inawezekana ana kumbukumbu ya maandamano ya kutaka ang’olewe na inawezekana pia anakumbuka ndege zilizokuwa zinapita juu ya utosi wake zikiwa na mabango yanayomtaka aondoke.

Pamoja na hayo, kikubwa zaidi, inawezekana pia Wenger nafasi aliyoshika ya tano katika msimamo na kumkosesha Ligi ya Mabingwa kwa mara ya kwanza, pengine ndiiko kulikomfanya aanze na tizi la kufa mtu.

Kikosi cha Arsena kimeanza ziara ya mbali, kimetua Australia na baadaye ziara ndefu ya China kabla ya kurudi London kwa ajili ya michuano ya Emirates Cup ambayo inafanyika London na Arsenal ni mwenyeji.

Michuano ya Emirates inashirikisha timu zote zinazodhaminiwa na Emirates mbali na Arsenal, ni pamoja na AC Milan, Real Madrid, Paris Saint-Germain. Emirates walianza kuidhamini Arsenal 2004.

Katika ziara yake hiyo ya pre-season, Arsenal itakuwa Australia na China ikiwa ni maandalizi ya Ligi Kuu msimu wa 2017-18 na pia itatoa nafasi kwa mchezaji mpya, Alexandre Lacazette ambaye atakuwa katika fulana ya Gunners kwa mara ya kwanza.

Lacazette ameungana na Sead Kolasinac katika kikosi hicho cha London na kutengeneza ladha kwa ajili ya msimu ujao.

Ilivyo sasa

Australia wataipokea Arsenal. Watacheza mechi mbili kwenye mji wa Sydney dhidi ya timu za A-League, Sydney FC waliyoichapa 2-0 na Western Sydney Wanderers na mechi zote zitachezwa kwenye Uwanja wa ANZ wenye uwezo wa kuchukua mashabiki  83,500. Uwanja huo ulitimika kwa Michezo ya Olimpiki mwaka 2000.

Baada ya mechi hizo, itasafiri kwa saa 10 kuitafuta Shanghai, China, watakakocheza na Bayern Munich kwenye Uwanja wa Shanghai.

Baada ya mchezo huo, timu itasafiri kwenda Kaskazini mwa Beijing kucheza na Chelsea, ni kama mechi ya Ngao ya Hisani, kwani itacheza na Chelsea Julai 22. Mechi hiyo itachezwa Uwanja wa Bird’s Nest – Uwanja ulioandaa Michezo ya Olimpiki 2008.

Arsenal ambao ni mabingwa wa FA watacheza na bingwa wa Ligi Kuu, Chelsea Agosti 6 kwenye Uwanja wa Wembley.

Baada ya hapo, timu itarejea London kwa ajili ya michuano ya Emirates Cup na kabla ya mashindano, itakuwa na mechi mfululizo.

The Gunners itajigawanya mara mbili na itakwenda kucheza na Benfica na Sevilla, pamoja na RB Leipzig imealikwa kwenye mashindano lakini haitacheza na Arsenal.

Ozil: Nitabaki Arsenal

Kumbe zilikuwa mbwembwe za kutingisha ili aonekane naye yupo, Mesut Ozil amesema kuwa anataka kubaki Arsenal wakati mwenzake, Alexis Sanchez amebakishwa kusubiri warudi kwani alikuwa kwenye Kombe la Mabara na Chile.

Pamoja na kwamba timu nyingine za Ligi Kuu England zitakuwa muda mwingi ugenini, Arsenal itatumia muda mwingi London, kushir

Monday, July 17, 2017

Namba nyingine ya Taifa Stars hii hapa, iko Austria

By Eliya Solomon, Mwananchi

Dar es Salaam. Wiki iliyopita, Kocha wa Taifa Stars ambaye juzi alikuwa na majukumu ya mashindano ya CHAN dhii ya Rwanda, alisema ataanza kuwaita wachezaji wa Tanzania wanaocheza nje ya nchi.

Alisema kuwa ni wakati sasa wa kuwatumia Watanzania hao waliotawanyika klabu mbalimbali za duniani, Ulaya, Amerika, Afrika na kwingineko.

Spoti Mikiki limekuwa mstari wa mbele kuwaibua wachezaji hao ambao kutoka pembe za dunia na katika mahojiano, kila mmoja anataka japo aitwe kwenye timu ya taifa kwa kuwa bado wanakumbuka fadhila pamoja na kuchangia uwezo wa uwanjani kuipigania Taifa Stars.

Wiki iliyopita, Spoti Mikiki ilifanya mahojiano na mchezaji wa Tanzania, Orgenes Mollel anayecheza soka la kulipwa nchini Ureno kwenye klabu ya Daraja la Kwanza ya F.C. Famalicão ambaye aliomba Mayanga amjumuishe timu ya taifa.

Ni kama Kocha Mayanga amesikia ombi lake kwani alisema kuwa Mollel ni kati ya wachezaji wa mwanzo watakaokuwa kwenye hesabu ya kuitwa kwenye mechi za kalenda ya Fifa, baadaye Septemba.

Spoti Mikiki limemuibua mchezaji mwingine wa Tanzania, ambaye ni hazina ya Taifa Stars kwani ni kijana mdogo na uchanga wa umri na uzoefu wa nje, ni faida kwa Taifa Stars, Michael  John Lema (18)  ambaye anacheza soka la kulipwa nchini  Austria

Pata undani wake sasa

Katika mahojiano na Spoti Mikiki kutoka Graz, Austria, Lema (18)  anasema anacheza soka la kulipwa katika  timu ya SK Sturm Graz ya Ligi Kuu Austria.

Austria ni moja ya mataifa yaliyoendelea kisoka chini ya Shirikisho la Soka  Ulaya (UEFA) na mara kadhaa timu za nchi hiyo zimekuwa zikipata tiketi ya kucheza Ligi ya Mabingwa Ulaya.

Lema anasema kuwa wakati wowote anaweza kupandishwa kikosi cha kwanza kutokana na kiwango kizuri alichokionyesha  msimu uliopita  wa 2016/2017 ambapo aliichezea  SK Sturm Graz II Ligi Daraja la Tatu ngazi ya taifa.

Kwa mfumo wa Austria, timu za Ligi Kuu zina nafasi ya kutoa vikosi vyao B ili kushiriki Ligi Daraja la Tatu kwa lengo la kuwapa nafasi vijana wao kupanda viwango na hata timu hizo zikifanya vizuri hazipewi  nafasi ya kuwa Ligi moja na timu mama.

Ndivyo ilivyo kwa SK Sturm Graz na  timu yao  B ambayo ni SK Sturm Graz II inashiriki ligi hiyo.

Kiu ya Taifa Stars

Lema anaelezea namna anavyotaka kuitumikia Taifa Stars japo aliwahi kuichezea timu ya Taifa la Austria chini ya miaka 19.

“Sihitaji kuendelea kuichezea Austria, nilichezea timu zao za vijana  kwa kuwa nilijua bado nitakuwa na nafasi ya kuichezea Tanzania kwa siku zijazo ndio maana nimesema sina nia ya kutaka kuendelea kuichezea timu yao tena isije kutokea utata baadaye.

“Mimi ni Mtanzania kabisa wa asilia ambaye nimezaliwa  Itigi mkoani Singida, wazazi wangu wote ni Watanzania na wanaishi wote nchini Tanzania.

“Ujio wangu huku ulikuwa nikusoma na nilikuja 2009 na kwa sababu ya kipaji changu ilinifanya kuwa najihusishe na soka, kwa bahati nzuri walinichukua kwa kunifundisha kuanzia ngazi ya  akademi,” anasema Lema.

Winga huyo anayeishi nchini humo kwa rafiki wa mama yake anaelezea pia matumaini yake ya kupandishwa kwenye kikosi cha kwanza cha timu yake hiyo inayoshiriki Austrian Bundesliga.

“Kocha wa timu ya kikosi cha kwanza, Franco Foda amekuwa akivutiwa na uwezo wangu na ilikuwa nipande msimu uliopita lakini alitaka nikomae zaidi kwanza mara baada ya kupanda kutoka kwenye akademi.

“Kucheza kwangu daraja la tatu na SK Sturm Graz II kumenikomaza na kunifanya kuwa na uwezo wa kupambana dakika zote bila kuchoka wala kuhofia chochote.

“Ninachosubiri ni  kupandishwa awamu hii ili nicheze kikosi cha kwanza, ujue hata kocha wangu wa timu B Joachim Standfest ameniambia jina langu ni miongoni mwa majina aliyoyapendekeza kupandishwa.” anasema mchezaji huyo.

Hata hivyo Lema alimalizia kwa kusema mzalendo ni yule ambaye  yupo tayari kupigania taifa lake katika mazingira  yoyote na kwamba yuko tayari kuja endapo kocha wa Taifa Stars atamuita hata kwenye timu ya U-20

Kupita hoja hiyo, anaamini kuwa yeye ni mzalendo na kusema kuwa anatarajia kuja Tanzania kwa mapunmziko hivi karibuni na hatosita kulitembelea Shirikisho la Soka Tanzania, TFF, ili wamtambue na pia kuonana na kocha wa Stars, Mayanga.

Friday, July 21, 2017

‘Hata kwenye wavu kuna mahasimu’

By Eliya Solomon, Mwananchi

Dar es Salaam.  Unapozungumzia  mahasimu wa soka la Tanzania  moja kwa moja  utagusia wakongwe  ambao ni Simba na Yanga, yote hiyo inatokana na historia kubwa iliyopo nyuma yao.

Kama ilivyo kwenye soka, basi hata kwenye mpira wa wavu na kwenyewe kuna miamba miwili ambayo ni Jeshi Stars na Magereza ‘Tanzania Prisons’.

Miaka ya nyuma, kulikuwa na timu kali za wavu na ilikuwa zikicheza, jiji zima linafahamu kuwa leo kuna kazi, ni timu moja ilikuwa inaitwa, Vyuma na tiomu ya kiwanda cha kusafisha mafuta cha Tipper.

Zilipokuwa zinacheza, mpira wa wavu ulitikisa anga za Tanzania wakati huo TAVA ikiwa chini ya mwenyekiti wake, Patrick Sombe. Kwa sasa timu hizo hazipo tena.

Ikutanapo miamba  hiyo, unaweza  dhani mpira utapasuka kutokana na mikwaju ya mashambulizi inavyoachiwa huku upande mwingine ukitumia nguvu nyingi kuzuia mikwaju hiyo.

Spoti Mikiki ilifanya utafiti mdogo kubaini uhasama wa timu hizo mbili moja ikiwa ya Jeshi na nyingine ya Magereza ulianzaje  pia tuliwafikia wadau wa mchezo huo ambao walitoa maneno yao juu ya upinzani wa timu hizo.

Chanzo cha Uhasama

Kocha wa Magereza, Edwin Masinga anasema uhasama wao umechangiwa na ubora wa timu zao  kwa nyakati hizo na upinzani ulikosekana kwa timu nyingine zilizokuwa zinachipukia.

“Sisi ni wakongwe nchini kwenye mchezo wa wavu, upinzani wetu nakumbuka ulianza rasmi mwaka 2003, upinzani wetu ni ndani ya uwanja mara baada ya mchezo huwa tunaendelea na urafiki  wetu.

“Kilichochangia upinzani ni ile shauku kwa kila timu kutaka kuwa juu ya mwenzake, ninakumbuka mechi yetu ya kwanza kukutana ilikuwa ni katika mashindano ya klabu bingwa ya Taifa.

“Mashindano hayo yalifanyaka Moshi, Kilimanjaro, ule mchezo ulikuwa wa piga nikupige maana ilikuwa tukishinda wanasawazisha na wakishinda tunasawazisha ile mechi ilibidi kwenda mpaka seti ya tano lakini tulishinda Magereza.” anasema.

Edwin aliongeza, kuanzia hapo upinzani uliongezeka zaidi kwa sababu Jeshi ilijawa na hasira za kutaka kulipa kisasi na ilikuwa kila wakikutana mchezo unakuwa wa kuvutia kutokana na upinzani wao.

Lengo la Uhasama

Kocha wa Jeshi Stars, Lameck Mashindano anasema lengo la upinzani wao ni kuleta msisimko kwenye mchezo huo ambao ulianza kuchezwa hapa nchini kwa miaka ya 1990.

“Upinzani wetu umezaa ushindani na tukikutana mchezo huwa na ushindani wa aina yake, kupitia ushindani huo watu huvutika na kuanza kuupenda mchezo wa mpira wa wavu.

“Tunashukuru Mungu kwa kiasi chake tumefanikiwa kupata mashabiki japo sio wengi sana lakini wamekuwa wakitoa sapoti kwa kutushangilia.

“Tunaheshimiana na tumekuwa hatuvunjiani heshima, tunawaheshimu kama  wapinzani wetu na wao nadhani wanatuheshimu ” anasema Lameck.

Wadau

Wadau wa  mchezo huo nao wamezungumza na kudai sio kazi nyepesi kutokomeza upinzani wa  timu mbili hata kama kutatokea timu nyingine bora zaidi yao.

Roggesern Joseph amesema upinzani wa timu hizo umeufanya mchezo huo kuwa na radha kama ilivyo kwenye soka upinzani wa Simba na Yanga.

“Wakutanapo Simba na Yanga muda mwingine huwa ni upinzani wa vurugu lakini kwetu huwa ni ushindani wa uwezo na sio vurugu.

“Kabla ya kutolewa kwenye Ligi ya mkoa timu ya Jeshi Stars kwa kosa la kukeuka kanuni, katika mechi zao nne ambazo wamekutana hivi karibuni, Jeshi kashinda 3 na Magereza akishinda 1.” anasema Joseph.

Naye Wasike Edwin amedai kuwa huwa wanainjoi michezo  baina ya timu hizo mbili na umekuwa ukiwafanya kujivunia walau Tanzania inatimu nzuri upande wa wavu.

“Japo kwa sasa kuna timu kama Chui, Makongo na nyinginezo zinazo fanya vizuri lakini upinzani wa hao jamaa hufanya baadhi ya shughuli za mji kusimama kwa ajili yao.

“Hakuna mdau ambaye yupo tayari kukosa mchezo  baina ya timu hizi,wanamakocha wenye uzoefu na hata wachezaji wenye viwango bora na nguvu za uchezaji.” anasema Wasike.

Monday, April 3, 2017

Mbappe ananunua wachezaji hawa 11

 

By Mwananchi

Manchester City imekuwa kwenye mbio za kumnyakua mchezaji huyo nyota wa raia wa Ufaransa, lakini pia timu hizo zinazomuwania zinapaswa kujitahadhari kutokana na wakati mwingine kujikuta wakiwekeza nguvu nyingi kwenye usajili ghali kwa mtu mmoja.

Mkataba uliomalizika mwaka jana haufikii wachezaji 11 ambao wote kwa pamoja thamani yao haifikii thamani ya usajili wa kumtoa Mbappe klabuni hapo.

1. Kipa, Jasper Cillessen (Pauni 11 milioni)

Kipa huyo anayedakia Barcelona na timu ya Taifa ya Uholanzi, alihama kutoka Ajax msimu uliopita kwa uhamisho wa Pauni 11 milioni.

Alitwaa mataji mawili akiwamo medali kwenye mashindano ya Kombe la Dunia ya mwaka 2014.

Amekuwa kipa tegemeo katika kikosi cha Barcelona msimu huu na anafahamika zaidi kwa jina la Jasper.

2.Beki wa kulia, Thomas Munier ( Pauni 5 milioni)

Ni raia wa Ubelgiji mwenye miaka 25, anacheza beki ya kulia. Alichukuliwa kutoka klabu ya PSG msimu uliopita wa kiangazi kwa thamani ya Pauni 5 milioni kwenda klabu ya Brugge.

Mchezaji huyo amekataa ofa ya kucheza Ligi ya England badala yake ametua Ufaransa ambako anakipiga kwenye Ligi

        3.Beki wa kushoto, Raphael Guerreiro (Pauni 10 milioni)

Dotmund ndiyo walioula kumsainisha mkataba mchezaji huyo. Unaweza ukasema ni mkataba mnono kwake.

Mchezaji huyo mzaliwa wa Ufaransa mwenye uraia wa Ureno, alijiunga na kikosi cha Thomas Tuchel baada ya kutia saini mkataba wa thamani ya Pauni 10 milioni wakati wa msimu wa kiangazi mwaka 2016.

Katika Ligi hiyo ya Bundesliga, amecheza michezo 16 akifumania nyavu mara nne, huku akiwa ametoa mapande matano yaliyozaa mabao.

4. Beki wa kati, Florian Lejeune (Pauni 1.5 milioni)

Lejeune (25) aliondolewa Manchester United alikokuwa anasugua benchi na kujiunga na Basque wakati wa msimu wa kiangazi na akachomoza kwenye La Liga na alijiimarisha zaidi akiwa kama beki wa kati hatari.

Mlinzi huyo ana umbo kubwa lililokwenda hewani, kuna taarifa za kuwapo machakato wa kurejea katika Ligi Kuu ya England kwenye klabu ya Arsenal au Tottenham msimu ujao. Dau lake kumng’oa katika klabu hiyo inaweza kuongezeka zaidi ya kiwango alichosajiliwa awali.

5. Beki wa kati, Antonio Rudiger (Pauni 7.5 milioni)

Mchezaji mwenye asili ya Ujerumani lakini baba na mama yake ni raia wa Sierra Leone. Rudiger alichomolewa Stuttgart na kwenda Roma msimu uliopita wa kiangazi. Mchezaji huyo awali alitokea kwenye kituo cha vijana cha michezo cha Dortmund na hivi sasa yupo chini ya kocha Luciano Spalletti.

Rudiger, kwa sasa ni mchezaji wa kimataifa wa Ujerumani na hivi karibuni amekuwa akihusishwa kuhamia klabu za England hususan Chelsea na Liverpool.

6. Kiungo wa kati, Idrissa Gueye (Pauni 7 milioni)

Ligi Kuu ya England ina mtu anayeitwa, Gueye anayechezea Everton. Unaweza kusema ndiye N’Golo Kante mpya raia huyo wa Senegal. Wote kwa pamoja wamesajiliwa England ndani ya msimu mmoja lakini yeye ni mkongwe kuliko nyota huyo wa Chelsea.

Wakati macho yote yakiwa kwa Romelu Lukaku ambaye anatarajiwa kuondoka msimu huu kurudi Chelsea, kuna Guaye ambaye naye ni kati ya mafundi wa soka katika klabu hiyo.

7. Kiungo wa kati, Victor Wanyama (Pauni 11 milioni)

Ni vigumu kuamini kwamba ni mmoja wapo wa wachezji wa Ligi Kuu anayeweza kumeza thamani ya mchezaji mmoja. Mchezaji huyo wa Tottenhm ana thamani ya Pauni 11 milioni na ndiyo imetokea kwa Mbappe thamani yake kuweza kuunganisha na kupata kikosi kizima.

8. Kiungo wa kati, Marcelo Brozovic (Pauni 4 milioni)

Mchezaji huyo ni miongoni mwa chipukizi ambao wanaonekana kutisha kwenye safu ya kiungo. Mchezaji huyo raia wa Croatia alijiunga na Inter Milan akitokea Dynamo Zagreb mwaka 2015 kwa mkopo.

Hata hivyo, amejihakikishia namba kwenye kikosi hicho kwenye msimu wa kiangazi akiikaribia thamani kwa asilimia 4.4 ya mchezaji ghali Paul Pogba.

Amecheza mechi 17 za Ligi Kuu katika msimu huu akirekebisha makosa yake ya awali na kuhimili mikiki ya bosi wake mpya, Stefano Pioli.

9. Kiungo mshambuliaji, Serge Gnabry (Pauni1 milioni)

Mshambuliaji huyo mwenye miaka 21 alikuwa kimya kwa takriban mwaka mzima. Gnabry ametokea Arsenal akiwa mchezaji wa kimataifa na mfungaji mahiri wa ‘hat trick’.

Hat trick yake ya kukumbukwa aliipiga wakati timu yake ilipokutana na San Marino, hata hivyo amepelekewa kwa mkopo West Brom.

10. Kiungo mshambuliaji, Ousmane Dembele (Pauni 12.5 milioni)

Dembele ataweza kujilinganisha ubora wake na Mbappe katika mashindano ya Ligi ya Mabingwa Ulaya hatua ya robo fainali mechi itakayocheza Aprili.

Dembele raia wa Ufaransa, amekuwa akifananishwa na mshambuliaji huyo wa Monaco kwa kuwa ni miongoni mwa wachezaji wanaochipukia Ulaya.

Aliwahi kushinda ubingwa wa Ligue 1 na kutangazwa kuwa mchezaji chipukizi kwa mwaka 2016. Aliwahi kuingizwa kati ya orodha ya wachezaji bora 50 akishika nafasi ya nane katika uchambuzi wa Gazeti la Daily Mail.

11. Straika Monalo, Gabbiadini (Pauni 14.5 milioni)

Straika wa Southampton, ameshuka kiwango chake tangu alipotua Napoli mwezi Januari.

Mchezaji huyo raia wa Italia amefanikiwa kushinda kwenye michezo saba aliyopangwa uwanjani akiwa Seria A. Pia akiwa kwenye maisha mapya ya soka England, alishinda mara mbii Kombe la EFL wakati timu yake ilipokutana na Manchester United kwenye fainali.

Wachezaji wote hao thamani yao jumla yake inafikia Pauni 88 milioni.      

Monday, April 3, 2017

Ni wakati mwingine wabunge kutetea michezo

 

By Mwananchi

Wiki iliyopita,Waziri wa Fedha na Mipango, Dk. Philip Mpango aliwasilisha bungeni mapendekezo ya mpango wa maendeleo wa Taifa kwa mwaka 2017/18 na mwongozo wa kuandaa mpango na bajeti ya Serikali kwa mwaka 2017/18.

Waziri alilipa Bunge kazi ya kujadili mapendekezo ya mpango wa maendeleo wa Taifa kwa mwaka 2017/18 na mwongozo wa kuandaa mpango na bajeti ya Serikali kwa mwaka 2017/18.

Katika mapendekezo hayo, Waziri aliainisha vipaumbele vya Serikali ambavyo ni makaa ya mawe Mchuchuma, Chuma Liganga, kuanza ujenzi wa reli ya kati kwa Standard Gauge na matawi yake, kuboresha Shirika la Ndege la Tanzania, ujenzi wa mitambo ya kusindika gesi mkoani Lindi, uanzishwaji wa kanda maalum za kiuchumi, uanzishwaji wa kituo cha biashara cha Kurasini, kusomesha vijana katika stadi maalum (mafuta na gesi, uhandisi na huduma za afya), uanzishwaji wa mji wa kilimo Mkulazi, ununuzi na ukarabati wa meli kwenye maziwa makuu, ujenzi wa barabara za Kidahwe-Kanyani-Kasulu-Kibondo-Nyakanazi (km 310) na Masasi-Songea-Mbamba Bay (km 868.7).

Mapendekezo mengine ni uendelezaji wa maeneo ya viwanda vidogo (SIDO) katika mikoa ya Morogoro, Dar es Salaam, Mbeya, Mwanza na Arusha, uendelezaji wa eneo la viwanda TAMCO na EPZ/SEZ, bandari kavu (Pwani), mradi wa magadi soda (bonde la Engaruka), kufufua kiwanda cha General Tyre, mradi wa bomba la mafuta kutoka Uganda hadi bandari ya Tanga na uwekezaji wa sekta binafsi katika viwanda hasa vile vinavyotumia malighafi zinazozalishwa hapa nchini.

Waziri Mpango alitaja vipaumbele vingine ni elimu na mafunzo ya ufundi, afya na maji. Pia, katika mazingira wezeshi kwa uendeshaji biashara na uwekezaji, Serikali itaendelea na miradi iliyoanza kutekelezwa katika mpango wa maendeleo wa taifa kwa mwaka 2016/17 na miradi itakayotekelezwa chini ya utaratibu wa ubia kati ya Serikali na sekta binafsi.

Maeneo mengine yatakayozingatiwa katika mapendekezo ya vipaumbele hivyo ni kuhamishia shughuli za makao makuu ya Serikali Dodoma, mazingira na mabadiliko ya tabianchi, utawala bora na utawala wa sheria, miradi katika maeneo ya wanyamapori, misitu, ardhi, nyumba na makazi na madini.

Katika vipaumbele hivi utaona, Serikali haijataja kabisa miradi ya maendeleo ya michezo na utamaduni kuwa ni moja ya vipaumbele vyake katika mapendekezo iliyotoa kwa wabunge.

Sasa, ni wajibu wa wabunge kuhakikisha wanaingiza miradi ya maendeleo ya michezo na utamaduni katika mapendekezo ya mpango wa maendeleo wa Taifa kwa mwaka 2017/18 na mwongozo wa kuandaa mpango na bajeti ya Serikali kwa mwaka 2017/18.

Wabunge wanatakiwa kuelewa kwamba michezo nchini haiwezi kufanikiwa bila Serikali kusaidia. Serikali inatakiwa kusaidia kwa kutenga fedha za kutosha katika bajeti ya Wizara inayohusika na michezo kila mwaka kwa ajili ya miradi ya maendeleo ya michezo. Miradi hiyo ni viwanja mbalimbali vya kawaida vya michezo tofauti mitaani, elimu kwa walimu wa michezo watakaofundisha michezo kwenye shule na mitaani na miradi mingine mingi ya michezo.

Serikali na wabunge wanatakiwa kuelewa kwamba michezo inatoa ajira pana, pia michezo ni biashara kubwa inayotoa kazi kwa watu mbalimbali.

Wabunge wanatakiwa pia kuhakikisha Serikali inaipa kipaumbele michezo kwani bila hivyo, michezo yetu itaendelea kupoteza dira, kwani hakuna mchezo ambao tunaweza kusema unaafadhali kimataifa, hakuna mbadala wa wachezaji, hakuna programu za vijana, yaani inafikia mahali kijana mwenye kipaji anakosa mahali pa kwenda kwa kuwa hakuna mifumo mizuri ya kuwaendeleza. Hatujachelewa, tusimamie hapa.     

Monday, April 3, 2017

Ni muhimu wachezaji kupata mlo kamili

 

By Mwananchi

Tunaposema mlo kamili ni ule uliozingatia kanuni za wataalamu wa lishe ambao una makundi yote ya vyakula ikiwamo vyakula vya wanga, protini, mafuta, vitamini, madini na virutubisho mbalimbali.

Baadhi ya wanamichezo unaweza kuwakuta katika mitaani wakila kiholela katika sehemu za nyama choma, chipsi mayai, vijiwe vya supu na huku wakibugia soda au vinywaji vya kutengenezwa viwandani.

Ulaji wa vyakula hivi vinaweza kumweka katika hatari ya kunenepa au kuongezeka uzito uliokithiri kwani vyakula hivyo vina wanga kwa kiasi kikubwa, mafuta mengi na sukari nyingi.

Wataalamu wa lishe wanashauri wanamichezo kuepuka vyakula hivyo na badala yake mwanamichezo ajikite kutumia matunda au juisi za matunda freshi na mboga mboga na nafaka za mbegu.

Lishe ya wanamichezo huwa ni tofauti na ya mtu wa kawaida, wao wanatakiwa kula mlo kamili na huku akipangiwa ratiba na aina ya vyakula kwa kila mlo mkuu anaokula.

Katika ratiba hiyo, hutakiwa kula vyakula ambavyo vitamjenga mwili na kumpa nguvu pasipo kupata uzito uliokithiri au kumnenepesha.

Uzito au unene unaweza kumfanya kushindwa kuhimili vishindo vya mchezo anaoshiriki, kushuka kiwango au kutopanda kiwango.

Kwa kawaida angalau inatakiwa mlo wa mwanamichezo uwe na milo mikuu mitatu na milo mitatu ya katikati kabla ya mlo mkuu (snacks).

Vyakula vya katikati ya mlo ni kama vile matunda, juisi, mboga mbichi na vyakula jamii ya karanga.

Ikumbukwe kuwa michezo karibu yote inahitaji kuwa na nguvu, ukakamavu, mwili unaodumu na kustahimili mchezo kwa muda mrefu kwa kiwango kile kile.

Lakini mambo haya hayawezi kuja kirahisi hivi hivi bila kufuata na kushikamana na ushauri wa wataalamu wa afya, wataalamu wa mazoezi ya viungo na wataalamu maalumu wa lishe.

Wapo watalaamu ambao wao wamejikita tu katika lishe za wanamichezo ambao kitaalam hujulikana kama sports nutritionist lakini si vibaya katika maeneo yetu kuwatumia wataalam wa lishe waliopo.

Wapo wataalamu wa lishe katika idara za afya za halmashauri za miji na ambao hawajaajiriwa waliomaliza katika vyuo vikuu ikiwamo Chuo kikuu cha sokoine, ni vizuri klabu za michezo kuanza kuwatumia.

Wataalamu hawa ndio wanaoweza kukushauri aina ya vyakula vya kula na kukupangia ratiba maalum ya mlo kamili utakayoifuata na huku pia akikifuatilia mwenendo wa uzito wa wachezaji.

Mlo kamili unaofuata ratiba maalumu huku ukiandaliwa kwa kuzingatiwa kanuni za afya ni chachu ya kumpa mafanikio mwanamichezo.

Mwanamichezo atahitajika kuwa na nidhamu kukabiliana na kutekeleza jambo hili.

Haipendezi kwa mwanamichezo kula ovyo na wakati mwingine vyakula vya mafuta huzibisha mishipa na damu haisukumwi inavyotakiwa.     

Monday, April 3, 2017

Yussuf: Bao la Taifa Stars limeniwekea rekodi

 

By Eliya Solomon, Mwananchi

Mshambuliaji wa kutumainiwa kwenye kikosi cha Kagera Sugar, Mbaraka Yussuf ambaye alipachika bao la ushindi kwenye mchezo wa kirafiki dhidi ya Burundi, akiitumikia Taifa Stars ameanza kujitengenezea rekodi CV na klabu kadhaa zikianza kumpigia hesabu.

Kinda huyo aliyezaliwa Oktoba 2, 997, alicheza mchezo wake wa kwanza kwenye kikosi cha Stars chini ya Salum Mayanga na alifunga bao katika mazingira magumu kiasi. Yussuf katika Ligi Kuu ana mabao yake 10.

Katika mahojiano mafupi, anasema siri ambayo imekuwa ikimuongoza kwenye uchezaji soka na kugusia mengineyo yanayomhusu.

Siri ya soka lake

“Ninanufaika kutokana na kuzingatia kile ninachofundishwa na kuelekezwa.

“Kwenye klabu yangu kuna wachezaji ambao wamecheza sana soka la Tanzania wamekuwa wakinisaidia kimawazo na yamekuwa msaada sana kwenye soka langu, pia nimekuwa msikivu kwenye maelekezo ya kocha huku nikiongeza juhudi zangu kwa kujituma” anasema mshambuliaji huyo.

Kokote kambi

“Mimi ni mchezaji hivyo sichagui timu ya kuichezea ikitokea timu itakayofuata utaratibu na wakiweka dau nono mezani nitakalo vutiwa nalo, sidhani kama kutakuwa na kipingamizi cha kuhamia timu hiyo.

“Ila ndoto yangu kubwa ni kucheza soka nje ya nchi, ninaamini kuwa inawezekana kwa kuwa nina nia ya kweli na siku zote Mungu hamtupi mtu mwenye dhamira ya kweli,” anasema mkali huyo wa mabao.

Taifa Stars

Mbaraka anasema mazingira ya namna ambavyo aliweza kupachika bao lake Taifa Stars na kusema anawapa Watanzania kwa kuwa ni furaha kupangwa mara ya kwanza na kufungia Tanzania.

“Nilimwona Msuva akiwa na mpira nilichoamua kufanya ni kujiweka kwenye nafasi ili anipasie, kwa kuwa aliona nilichokuwa ninafanya kwa haraka alipiga piga pasi mahali sahihi na hapakunipa shida kuupokea mpira, nikiwa ninatazamana na kipa nilichagua na kupiga mpira ambao uligonga mwamba na nikaumalizia.”     

Monday, April 3, 2017

Tutawalaumu tu Msuva, Ajib hawafungi mabao T. Stars

 

By Mwananchi

Mwalimu Nyerere wakati anatengeneza viongozi, ilikuwa lazima wapitie Chuo cha Maendeleo ya Uongozi, IDM Mzumbe na wakati mwingine walikuwa wakipitia Chuo cha Chama Kivukoni. Huko watu walikuwa wakipikwa, walifundishwa maadili, misingi na taratibu za uongozi wa umma.

Ilikuwa ngumu kumpata kiongozi ambaye hakupita Kivukoni. Kila mmoja alikuwa na nidhamu. Tanuru la Kivukoni liliivisha viongozi wa Tanzania. Kila aliyetoka Kivukoni alisimamia misingi ya haki na uadilifu, kama waliokiuka walikuwa wachache tu.

Viongozi wengi walisimamia kwenye misingi na wengine hadi wanastaafu. Tofauti na sasa, unaambiwa kuwa ni kizazi cha dotcom, mabadiliko ya sayansi na teknolojia. Tunakwenda hivyo hivyo.

Nimeyafikiria hayo naona yanafanana na soka yetu na wachezaji wetu. Wachezaji tulionao, wengi wao hawakupitia kwenye tanuru la kupikwa wakaiva. Hatuwezi kuwa na wachezaji wazuri ambao hawakupikwa, haiwezi kutokea hata wawe wazuri.

Wakitokea wana namna hiyo, basi tutatumia nguvu nyingi kupata mafanikio. Kwa mfano, watu wana vipawa vya uongozi, lakini hawana maadili ya uongozi, hawana misingi ya uongozi kwa hiyo wanashindwa kusimamia misingi taratibu za kiutawala.

Hiyo ni sawasawa na vijana wetu, kwamba hawakwenda katika akademi za soka, sasa hawana mbinu, hawana misingi ya soka, hawana mwelekeo na watumia nguvu kupata mafanikio.

Nimejaribu kuangalia hali ilivyo kwenye kikosi cha timu ya taifa ya Tanzania, Taifa Stars, huwa ninajiuliza, kwanini Stars haina mafanikio? Kwanini haifanyi vizuri mashindano ya kimataifa?

Kingine, wachezaji wanakosa misingi, halafu ukiangalia, tuna kocha mmoja wa timu ya taifa, hiyo haipo duniani. Siku hizi mafanikio hayaji kwa kocha mmoja kuanzia ngazi ya klabu hadi timu ya taifa. Huwezi kuwa na kocha mmoja katika klabu au timu ya taifa.

Kwa mfano, ukiangalia Misri, na klabu zake wana makocha wa taifa karibu sita, Mayanga angekuwa kama overall kwa mfano.

Timu ya taifa inatakiwa kuwa na kocha wa makipa ambaye ninafahamu yupo, inatakiwa kocha wa mabeki huyu atashugulika na ngome yote. Beki gani akipanda nani anashuka, nani afanye nini kwa wakati gani.

Katika viungo; kiungo cha juu na cha chini. Wakati gani wapande, wakati gani washushe mipira, ikitokea wamepaki basi wafanyeje, njia ni zipi, wanaunganika vipi na washambuliaji, hilo ndilo kubwa, nao kocha wake.

Kunakuwa na kocha wa washambuliaji. Wanafungaje, wanapigaje mipira katika maeneo yapi, faulo za dead-balls zipigweje, huo ni mfano tu. Kunakuwa na yule wa mazoezi ya viungo, halafu kunakuwa na kocha wa kuungaisha timu kama Mayanga sasa.

Kwa kuangalia soka ya Tanzania kwanza hakuna muunganiko wa kusema, mchezaji ataanzia kwenye shule za soka, atacheza kila hatua ya mashindano ya umri hadi kufikia ukubwani kuchezea timu ya wakubwa. Hakuna.

Wachezaji hawana misingi ya soka, hatuwezi. Wewe angalia wenzetu, makocha wa kutosha, sisi wa makipa tu.

Ukweli ukiangalia kwa umakini, hatuwezi kufika mbali kwa staili hii. Inatakiwa kubadilika ili kuleta tija, lakini kwa kuwa tumezoea hivi, twendeni tu inawezekana Mungu akatuona siku moja.     

Monday, April 3, 2017

Samatta ni kila kitu aisee

 

By Charles Abel, Mwananchi

       Miaka ya 2006 hadi 2010 ukitaja Taifa Stars, jina linalofuata ni Marcio Maximo, na ukimtaja Maximo kinachofuata ni soka ya Taifa Stars. Kipindi ilea cha kabisa, angalau tuliambulia kucheza Fauinali za Chan, zilizofanyika Ivory Coast.

Kama si uzembe wa mabeki, tulishailaza Zambia 1-0, lakini waliposawazisha dakika ya 90+ ikatumaliza, tukatoka kwa kuwa pointi zetu hazikutosha, Zambia ikaenda robo fainali.

Hivi sasa, katika kundi la mashabiki 10 wa soka Tanzania wanaoizungumzia Taifa Stars, wanane kati yao hawawezi kumaliza mazungumzo yanayohusu mchezo huo unaoongoza kwa kupendwa ulimwenguni bila kulijumuisha jina la Mbwana Samatta.

Si jambo la kushangaza na kwa vyovyote ni lazima iwe hivyo kutokana na mafanikio makubwa ambayo mshambuliaji huyo ameyapata katika medani ya soka katika miaka ya karibuni kulinganisha na wachezaji wenzake waliomtangulia sambamba na wale wa kizazi cha sasa.

Ubora wake katika soka ulimsaidia kutwaa tuzo ya mwanasoka bora Afrika kwa wachezaji ambao wanacheza ligi za ndani.

Amekuwa mfungaji bora wa mashindano ya ngazi ya klabu Afrika mara mbili lakini pia ametwaa ubingwa wa Ligi ya Mabingwa Afrika akiwa na timu yake ya zamani TP Mazembe.

Pengine mafanikio hayo makubwa ambayo Samatta ameyapata ndani ya uwanja ndio yaliishawishi timu ya KRC Genk inayoshiriki Ligi Kuu ya Ubelgiji kumsajili nyota huyo wa zamani wa timu za Simba na Mbagala Market.

Si KRC Genk tu, bali hata benchi la ufundi la timu ya taifa ya Tanzania ‘Taifa Stars’ lilimpa jukumu zito la unahodha mshambuliaji huyo huku pia akiwa ndio tegemeo kwenye upachikaji wa mabao kwenye kikosi cha timu hiyo.

Samatta ni jicho la timu ya taifa na amekuwa akitazamwa na kila mmoja kuanzia wachezaji wenzake, makocha pamoja na mashabiki wa soka nchini. Ni aina ya lulu ndani ya Taifa Stars.

Spoti Mikiki lilimfuatilia kwa karibu Samatta hasa wakati wa mazoezi. Ni mchezaji anayeonyesha ushirikiano na wenzake. Maisha yake ya Ulaya hayajamweka mbali na wenzake tofauti na wengine ambao wanaona kucheza Ulaya ndiyo kila kitu.

Hufanya mazoezi yake na wakati mwingine huwa na wachezaji wenzake muda mwingi hasa pale kocha anapowahitaji kwa mazoezi ya pamoja. Hana maringo wala kujidai, ana nidhamu na ni mchezaji anayetamani kuona mwingine akipiga hatua.

Aliwahi kusema kuwa anaona wachezaji wana vipaji, lakini anaumizwa kuona hawana utayari kucheza soka nje.

Picha halisi ya maisha ya Samatta nje ya uwanja imeonwa hata wachezaji wenzake wa Stars ambao wamekuwa wakiishi naye kwenye kambi ya timu ya taifa pindi inapoitwa.

Mshambuliaji wa Yanga, Saimon Msuva anafichua kuwa Samatta ni mtu wa aina yake anapokuwa kwenye kambi ya timu ya taifa, ni mchezaji ambaye anajiheshimu na kufanya vitu kwa umakini mkubwa jambo linalomfanya awe mfano bora kwao.

“huyu jamaa kila anachokifanya ni kwa utaratibu, anahakikisha kinakwendana na muda na ana nidhamu ya hali ya juu pamoja na kumheshimu kila mmoja.”

Kama ni wakati wa kula, anahakikisha yeye anakuwa wa kwanza kufika sehemu iliyoandaliwa kwa ajili ya chakula. Muda wa mazoezi yeye anakuwa wa kwanza kuvaa na kuingia uwanjani na pia hata kulala yeye analala kwa muda ule ule uliopangwa bila kuzidisha. Lazima utaona aibu, nawe utafuatisha vile, sisi huku hatujafikia hatua hiyo.

“Kiukweli tunajifunza mambo mengi sana kupitia yeye na maisha yake ni mfano tosha kwetu sisi kwa mwanasoka na kama ni mchezaji wa kulipwa, wengine ambao tuna ndoto na malengo ya kupiga hatua kwenye mchezo wa soka, inabidi kujipanga sana,” anasema Msuva.

“Msuva anafichua kuwa Mkwasa hakukosea kumpa Samatta unahodha wa Taifa Stars, ukweli anastahili.

“Samatta ni kiongozi halisi ni mfano wa kuigwa kwani pia licha ya kuwa kiongozi wa uwanjani, pia amekuwa akiwashauri mambo mbalimbali na jinsi ya kufanikiwa kimaisha na zaidi kupitia soka.

“Mimi binafsi amekuwa akinishauri mambo mengi na kwa kiasi kikubwa amenibadilisha maisha yangu ya kisoka tofauti na hapo nyuma.

“Amekuwa akituasa na kutuhamasisha tujitume na kutokata tamaa ili tuweze kusonga mbele zaidi na pia amekuwa akitusisitiza tuwe na nidhamu ya maisha.

“Unajua wengine wakishapata nafasi wanajisahau na kuona kuwa wao ndio wao. Samatta anaipinga sana hiyo,” anasema Msuva.

Mshambuliaji wa Kagera Sugar, Mbaraka Yusuf safari hii alipata fursa ya kuitwa kwenye kikosi cha Stars baada ya kufanya vyema kwenye Ligi Kuu msimu huu na ndipo alipata fursa ya kukutana na Samatta ambaye anamuelezea kama mtu mwenye tabia za kipekee.

“Hii ndio mara ya kwanza kwangu kuwemo kwenye kikosi cha Stars na kuzoeana na Samatta lakini kikubwa ambacho nimefaidika nacho kutoka kwake, ni jinsi ya kuishi maisha ya kisoka nje na ndani ya uwanja.

Ni mchezaji anayejua nini anachokifanya na hapendi kuona mwenzake anakata tamaa au kushindwa kufanya jambo fulani. Hana tatizo na mtu na kila mchezaji anampa heshima sawa kama anavyofanya kwa wengine. Kiukweli najivunia kucheza naye pamoja,” anasema Yusuf.

Andrew Vincent anasema: “Nimejifunza mengi kupitia yeye pindi tunapokutana kwenye kambi ya timu ya taifa ambayo kimsingi yananijenga kwenye maisha yangu ya soka.”

“Ni mchangamfu kwa wachezaji wenzake na hajisikii. Kwa ufupi tumekuwa tukiishi naye vizuri na hana maringo,” anasema beki wa Yanga, Andrew Vincent ‘Dante’.

Vincent anasema kuwa licha ya kucheza soka ya kulipwa kwenye timu kubwa Ulaya, Samatta hana majivuno na maringo kwa wenzake na mara zote amekuwa akijichanganya na wenzake wakati wote na ninavyomwangalia anatamani sana tuwe na kiwango sawa na chake.

Mshambuliaji wa Simba, Shiza Kichuya anasema kuwa kinachomkosha zaidi kwa Samatta ni jinsi anavyowajenga wenzake kisaikolojia na pia anavyoleta umoja ndani ya timu.

“Yeye ndiye mhamasishaji wetu mkuu na anapenda kuwa mfano bora kwa kila jambo linalohusu timu ndio maana anaheshimika na kila mmoja kwenye kikosi. Mimi binafsi ninamheshimu kwa jinsi anavyoishi vizuri na sisi, mnapiga stori, asipoelewa anauliza, mnacheka yaani iko hivyo,” anasema Kichuya.     

Monday, March 27, 2017

Harusi ya Messi na Antonella acha kabisa

 

Kwa mazingira yetu ambayo hatujazoea, ikitokea mwanamke au msichana anaingia na mtoto uwanjani, kila mmoja atashangaa. Mshangao wenyewe utakuwaje, kwa vyovyote mtoto atakuwa analia.

Pengine hafahamu mazingira yale. Kumbe mama kamleta mtoto kwa kuwa mchezaji fulani kazaa naye, halafu kamsusa, sasa anachotaka kufanya ni kumsusia mtoto uwanjani. Wapo wenye mawazo hayo japokuwa haijatokea lakini matukio ya wanawake kususia wanaume watoto yamewahi kutokea mara kadhaa.

Kwa wenzetu ni tofauti. Hata wapenzi wakitengana, heshima inabakia huko huko.

Nzuri zaidi ni pale mama anapokuja na mtoto au watoto kisha kupiga picha na mwenza wake ambaye ni mchezaji.

Tumeshaona kwa wenzetu wachezaji wakibeba watoto wanaingia uwanjani baada ya mechi wanapiga picha na wenza wao. Sasa, hebu tuchukue mfano huo kwa hapa kwetu, si itakuwa ugomvi kila siku.

Kwanza kuna maeneo maalumu wanatengewa wake za wachezaji, hapa kwetu ikitokea hivyo, wakatengewa, wapo watakaokuwa na staha zao lakini kwa wachezaji vicheche, sijui itakuwaje.

Lionel Messi na Antonella

Lionel Messi amepiga sana picha na mpenzi wake hasa baada ya mechi, walipopata mtoto kisha watoto waliendelea hivyo, na leo hii wanapanga kufunga bonge la harusi, itakayofanyika siku ya kuzaliwa Messi, Juni 24, 2017 siku ambayo atakuwa anatimiza miaka 30.

Wawili hao wamepanga kufanya harusi yao nchini Argentina; katika Kanisa la Basilica Shrine of Our Lady Del Rosario ikiwa ni katika mji aliozaliwa na sherehe nyingine imepangwa kufanyika kitongoji cha Arroyo Seco, Hispania ambako ndiko Messi anakoishi.

Harusi hiyo inafungwa Rosario, ambako pia ndiko walikokutana kwa mara ya kwanza. Messi akiwa bado yanki, alikuwa akienda kucheza mtaa ambao Antonella alikuwa akiishi na mpwa wake, Lucas Scaglia.

Wamepanga harusi yao kuwa ya aina yake, na wamealika watu zaidi ya 700, wakiwemo wanasoka kutoka kila pembe za dunia, waandishi wa habari, marafiki na wanafamilia wa Messi na Antonella.

Lionel na Antonella walioishi pamoja kupika na kupakua tangu 2010 nchini Hispania, wana watoto wawili, Thiago na Mateo.

 

Harusi funga kazi

Antonella amemwambia Messi kuwa anataka harusi ya mfano, harusi funga kazi ambayo haijawahi kutokea.

Kwa mujibu wa Jarida la Primicias Ya, wawili hao wameanza kufanyia kazi jambo hilo kuhakikisha inakuwa harusi kubwa. Kitu kikubwa ni kwamba wameshafahamu kuwa itafungwa lini na wapi, kwamba mji alikozaliwa wa Rosario ndiko harusi itafungwa.

Hiyo ina maana ya kwamba, harusi itafungwa mahali ambako watu watajirusha kwa kula na kunywa huko Argentina.

 

Mnuso mwingine Hispania

Kwa mujibu wa televisheni ya mji wa Catalan katika kipindi chake cha Arucitys de la cadena 8TV, baada ya harusi hiyo nchini Argentina, maharusi watahamia Hispania kufanya mambo mengine kwa marafiki zake watakaoshindwa kwenda Argentina ambako ni umbali wa maili 6,500 kutoka Hispania.

Messi ana marafiki wengi na wako vizuri, haitarajiwi kama watashindwa kwenda Argentina kushuhudia akichukua jiko lake, na hata mwenyewe anasema kuwa anataraji marafiki wengi kufika kwenye shughuli yake.

Marafiki zake wakubwa ni pamoja na wachezaji wenzake ambao wengi wameshathibitisha kuwa watakwenda Rosario.

Kitu cha kufurahisha zaidi, waandaazi wa misosi kwa shughuli zote za Argentina na Hispania, watatoka kwenye mji wa Catalan, Hispania na watasafirishwa kwenda Argentina kwa ajili ya kuhudumia vyakula na vinywaji.

Kampuni hiyo ndiyo ilitoa huduma hiyo kwenye harusi ya mchezaji mwingine wa Barcelona, Carles Puyol mwaka 2014.

 

 

Kinachosikitisha

Kitu cha kusikitisha ni kwamba, rafiki yake mkubwa Messi, Gerard Pique hatahudhuria harusi hiyo ya mshkaji wake huyo.

Hiyo ni kwa kuwa mpenzi wa Pique, Shakira na mchumba wa Messi, Antonella hawaivi.

Sababu kubwa ni kwamba Antonella alikuwa rafiki wa mpenzi wa zamani wa Pique, Nuria Tomas, sasa inawezekana Shakira anahisi Antonella anafanya ukuwadi kwa jamaa yake, Pique.

Pique na Messi ni marafiki, lakini hasira za Shakira kwa Antonella, inabidi awe mpole tu na wafanye mambo mengine wakati washkaji wengine kwenye timu wakiwa kwenye mnuso.

Pique na Shakira walikutana wakati Nuria bado akiwa mpenzi wa Pique lakini mapenzi motomoto ya Pique na Shakira yalinoga wakati wa Fainali za Kombe la Dunia 2010.

Katika mahojiano na TV3 Oktoba mwaka jana, Pique alisema: “Nimekutana na Shakira mjini Madrid wakati tunajiandaa na Fainali za Kombe la Dunia 2010 baada ya kumwona kwenye video yake ya Waka Waka.

 

Messi kuaga kwa harusi?

Harusi ya Messi inafungwa wakati ligi mbalimbali zimemalizika, wachezaji wakiwa katika mapumziko na wakati huo dirisha kubwa la usajili litakuwa wazi.

Haijathibitishwa lakini huenda Messi akatumia harusi hiyo kuaga wachezaji wenzake, mashabiki na viongozi wa Barcelona kwa kuwa kuna tetesi anataka kumfuata kocha wake wa zamani, Pep Guardiola ambaye kwa sasa anainoa Manchester City.

Guardiola anamhusudu Messi kupita kiasi kwa kuwa alimbeba kipindi alipokuwa akiinoa Barcelona, alimpa heshima ya mataji kwa kufunga mabao katika mechi muhimu.

Pamoja na hayo, inaelezwa kuwa Messi hakukurupuka kusema kuwa anatakiwa na Manchester City, aliuambia uongozi wa juu wa Barcelona kilichopo mbele yake na azma ya Guardiola kwake.

 

Messi na Antonella walianzaje?

Mara nyingi, mtu yeyote hata wachezaji, wanakuwa hawana kitu, sasa wanapopata maisha mazuri, wanasahau walikotoka, wanataka vizuri vipya, lakini hiyo ni tofauti kwa Messi.

Messi ana pesa za kutosha, ana utajiri lakini hakumsahau mtu wake walioanza naye siku nyingi.

Unajua walianzia wapi? Baba yake Antonella alikuwa anamiliki duka kubwa la mahitaji mbalimbali na vyakula, supermarket mtaani kwao walipokuwa wanaishi.

Malavidavi yao hasa (Messi na Antonella) yalianza mwaka 1996, wakati Messi akiwa mdogo tu wa miaka tisa.

Rafiki mkubwa wa Messi hapo mtaani kwao alikuwa mpwa wake, Antonella, Lucas Scaglia, walikuwa wakicheza pamoja na pia walikuwa pamoja kwa mambo mengi ikiwamo kuwa katika shule moja iliyokuwa inaitwa Newell’s Old Boys, katika mji wa Rosario.

Mara nyingi, Messi alikuwa akiaga nyumbani anakwenda kwa akina Scaglia kwa kuwa naye alikuwa akifahamika nyumbani kwao.

Wakati mwingine walikuwa wanakwenda kutembea pwani ya Mto Parana. Messi pamoja na kwamba alikuwa dogo wa miaka tisa, lakini alikuwa kamzimia Antonella.

Iliendelea hivyo na walizoeana vizuri kwa kuwa Antonella alipenda kwenda nao (Messi na Scaglia) wakiwa katika matembezi kama hayo ya ‘beach’ na walirudi nyumbani.

Wakiwa beach pamoja na kuwa wanapiga stori za kawaida za mtaani na hata mazingira ya beach na mengine, kumbe moyo wa Messi ulishamdondokea Antonella siku nyingi lakini Antonella hajui kitu.

Kwa kuwa walikuwa na mambo ya kitoto, Messi alikuwa na tabia ya kumwandikia Antonella barua za mapenzi, akimwambia angetamani siku moja awe mpenzi wake. Mambo yale ya enzi za shule.

Kama unavyojua, wenyewe walielewana lakini kwa kificho, walikuwa wapenzi wa sirisiri hadi Messi alipotimiza miaka 21, ikaja kufahamika kuwa kumbe Messi alikuwa na uhusiano wa kimapenzi na Antonella.

Mapenzi siku zote hayafichiki, hayana siri, kipindi cha televisheni cha ‘Hat Trick Barça’, iliyoko kwenye mji wa Catalan channel ‘TV3’, kiliweka wazi hayo na hiyo ilikuwa Januari 2009.

Siku moja Messi alikuwa akihojiwa, si unajua inapofika wakati wa maswali ya kizushi, akaulizwa, “Una rafiki wa kike?” Na Messi akajibu “Ndio, ninaye rafiki. Yuko Argentina. Ukweli ni kwamba yuko vizuri na sina presha naye.”

Si unajua wadaku, wakamwambia wamesikia Messi amekutaja, na Antonella naye alikuwa akifuatilia kila anachofanya Messi na kila kinachoandikwa kuhusu Messi.

Baada ya kuelezwa alichosema Messi, akaanza sasa kuonyesha malavidavi na mawasiliano kila siku, ‘I miss u’ nyingi zikaanza kwa kuwa alijihakikishia kuanzia hapo.

Antonella, alikuwa akisoma Latin American Education Centre, na hata hivyo haikumchanganya sana, kwani akiwa na miaka 13, Leo alikwenda Barça kwenye Mji wa Catalan.

Kipindi Messi anaanza kuwa staa wa dunia na anasikika kila kona, Antonella wakati huo alikuwa na ‘mchepuko’ mmoja naye alikuwa akiishi kwenye mji huo wa Rosario, ni jirani tu na kwao, lakini mapenzi yao yalidumu kwa miaka mitatu.

Baada ya kimya cha muda, siku moja mtaani kwao hapo palitokea msiba, rafiki mkubwa wa Antonella alifariki kwa ajali na Messi alisikia akapanda ndege na kuhudhuria msiba ule, akitokea Hispania, hapo wakakutana tena na Antonella. Kuanzia kwenye msiba ule na hadi leo mambo ni bambam hadi harusi.

Jarida la ‘Infobae’, linasema kuwa Messi amekuwa akisafiri ‘fasta’ anaposikia kuna jambo limetokea mtaani kwao huko Argentina na wakati wote anakuwa karibu mno na Antonella.

Hapo kabla, unaambiwa mapenzi ndiyo kama hivyo, yalikuwa ya sirisiri lakini baadaye wakaja kuyaweka hadharani, kuwa Messi na Antonella ndio vile tena.

Baada ya maziko ya rafiki wa Antonella, Messi alirudi Barcelona, wakati huo Antonella naye alianza kusoma masuala ya Odontology yaani alitaka kuwa mtaalamu wa mfumo wa fizi na meno na magonjwa yake katika Chuo Kikuu cha Taifa cha Rosario.

Hata hivyo, aliona mambo magumu, akabadilisha kozi baada ya miezi sita, akaanza kusoma mawasiliano ya jamii, aliyosoma kwa mwaka mmoja.

Marafiki wa Antonella walisema kuwa rafiki yao alikuwa akiwaringishia kuwa yuko katika mahaba na Messi na hiyo ilikuwa Julai 20, 2007. Mapenzi yao yalizidi kunoga zaidi wakati wa Fainali za Kombe la Dunia 2010 zilizofanyika Afrika Kusini.

Baada ya fainali zile za Afrika Kusini, Messi aliamua kumbeba Antonella na kwenda naye Barcelona kwa mara ya kwanza.

Juni 2, 2012, baada ya Messi kufunga bao katika mechi dhidi ya Ecuador kwenye Uwanja wa Monumental, alifuatiliwa na siri ikafichuka kuwa Antonella alikuwa na ujauzito na mtoto aliyezaliwa alipewa jina la Thiago, mtoto huyo alizaliwa Novemba 2, 2012.

Msimu wa Ligi Kuu Hispania maarufu La Liga wa 2014/15, Messi aliandika kwenye mitandao ya kijamii kuwa Antonella anataraji kupata mtoto wa pili, atakayeitwa Mateo, huyu naye alizaliwa Septemba 11, 2015.

Huu ni ushahidi tosha kuwa maisha ya Messi na Antonella yanastahiki kuandikiwa hadithi nzuri ya mapenzi.

Messi anajua kuwa anapendwa, na Antonella anaonyesha mapenzi ya dhati kuwa anampenda au ana mapenzi ya kweli na Messi na sasa kitu pekee kilichobaki ni Juni 24, 2017.