Monday, September 17, 2018

Liverpool, Chelsea hazitanii England

 

London, England. Liverpool na Chelsea hazitaki masihara, zimeanza ligi kwa ushindi wa asilimia 100 wakati Manchester City imejikongoja kwa kuilaza Fulham na kupanda nafasi ya tatu.

Vijana wa Jurgen Klopp wanaoongoza wakiwa na pointi 15, waliiadhiri Tottenham kwenye uwanja wao wa Wembley kwa kuwachapa mabao 2-1, huku Eden Hazard akipiga hat-trick iliyoibeba Chelsea iliyokuwa nyuma dhidi ya Cardiff.

Mchezo huo wa Wembley uliokuwa wa kwanza, Georginio Wijnaldum na Roberto Firmino waliipa Liverpool mabao muhimu kabla ya Erik Lamela kufunga bao pakee la Spurs.

Kwingineko mabao ya kipindi cha pili ya Arsenal yaliilaza Newcastle 2-1.

Granit Xhaka alifunga bao la kuongoza kwa Arsenal baada ya kuachia fataki iliyokwenda moja kwa moja wavuni kabla ya Mesut Ozil kufunga la pili. Ciaran Clark alifunga bao la kufutia machozi kwa Newcastle.

Nayo Bournemouth iliyokutana na wachezaji 10 wa Leicester kuinyuka mabao 4-2.

Ryan Fraser alifunga mabao mawili ya kipindi cha kwanza na kuifanya Bournemouth kuongoza kabla ya Leicester, kumalizwa na Joshua King kwa kufunga bao la tatu.

Hii ni mbaya kwa Foxes kwani katika mchezo huo mchezaji wake, Wes Morgan alionyeshwa kadi ya pili ya njano dakika ya 68 kabla ya Adam Smith kumaliza kazi kwa kufanya matokeo kusomeka 4-0.

James Maddison na Marc Albrighton walifunga mabao mawili dakika za lala salama.

Naye Wilfried Zaha aliipa ushindi Crystal Palace ilipoibuka na ushindi wa bao 1-0 dhidi ya Huddersfield.

Watford ilipoteza nafasi kuungana na Liverpool na Chelsea juu baada ya kuchapwa 2-1 na Manchester United mpambano uliofanyika Vicarage Road.

Matokeo hayo ni ahueni kwa kocha wa Man United, Jose Mourinho ambaye anapigwa zengwe kuondoka kikosini hapo kwa mwenendo mbaya wa timu.

Cardiff iliishtukiza Chelsea kwenye Uwanja wake wa Stamford Bridge kwa kufunga bao la mapema kabla ya Hazard kushika ukanda.

Manchester City inayotaka kurudia ya msimu uliopita, ilianza kwa Leroy Sane bao la mapema kabisa kabla ya David Silva na Raheem kushehenesha ushindi.

Tottenham 1-2 Liverpool

Bournemouth 4-2 Leicester

Chelsea 4-1 Cardiff

Huddersfield 0-1 Palace

Man City 3-0 Fulham

Newcastle 1-2 Arsenal

Watford 1-2 Man Utd

Monday, September 17, 2018

Wanariadha wenye rekodi za kibabe duniani

 

By Yohana Challe,Mwananchi ychalle@mwananchi.co.tz

Wanariadha wamekuwa na sifa za pekee kila kukicha lakini ni watu ambao maisha yao ya nje huonekana ya kawaida, lakini ukweli ni moja ya watu wenye maisha ya kifahari kwa kutambulika duniani kutokana na mchezo huo.

Huko duniani kuna wanariadha wenye rekodi zao, kwa wakimbiaji wa Tanzania hawatii mguu. Wapo wakali kwenye mbio ndefu (marathoni zote, 21 na 42) hadi mbio fupi (mita 100) wakiweka muda bora ambao haujavunjwa kwa muda mrefu licha ya wengi kuhaidiwa pesa ndefu.

MARATHON

Mwanariadha ambaye anasifika kuwa na pumzi ya kutosha na kasi ya katika mbio ndefu ni Mkenya Dannis Kipruto Kimetto ambaye aliweka rekodi ya Dunia katika mashindano ya Berlin Marathon mwaka 2014 alipotumia saa 2:02:57 ambayo hadi sasa haijavunjwa.

Kimetto alivunja rekodi hiyo alipokuwa akishindana na Mkenya mwenzake Emmanuel Mutai aliyemaliza mbio hizo kwa kutumia saa 2:03:13 ikiwa tofauti ya sekunde 39 na kushika nafasi ya pili.

Paulo Radcliffe anashikiria rekodi hiyo kwa wanawake akiwa saa 2:15:25 aliyoiweka London marathon Aprili 13, 2003, pia pia Mwingereza huyo anarekodi ya dunia ya mwaka huohuo katika mbio za San Juan, Puerto Rico ya 10km kwa kutumia dakika 30:21.

NUSU MARATHON

Kwa upande wa mbio za nusu marathoni rekodi ya Muda ya dunia inashikiriwa na raia wa Eritrea Zersenay Tadese mwenye miaka 36 aliyoiweka huko Lisbon Nusu Marathon, Ureno mwaka 2010 ya dakika 58:23, akiweka pia rekodi ya Dunia huko huko ya 20 Km ya dakika 55:21.

Joyciline Jepkosgei raia wa Kenya ndio anashikiria rekodi kwa upande wa nusu marathoni, na kama haitoshi ana rekodi za Dunia nyingine nne, ya kwanza ni ya nusu marathoni ya saa saa 1:04:51 aliyoiweka huko Valencia Nchini Hispania.

Nyingine ni ile ya 20 Km ya saa 1:01:25, ya 15km ya dakika 45:37, na 10km ya dakika 29:43 na ile ya mwisho ya 5km ya dakika 14:32 zote akizeweka mwaka jana huko Phraha Jamuhuri ya Czech.

MBIO ZA MITA 10,000

Hii ndio mbio ndefu za uwanjani ambazo mwanariadha huuzunguka uwanja wa mpira mara 25 na huhitaji wanariadha wenye kasi na pumzi ya kutosha katika mashindano ya namna hiyo.

Mkongwe Kenenisa Bekele ndio mwanariadha anayeshikilia reodi ya mbio hizo aliyoiweka Brussels August 26, 2005 alipotumia dakika 26:17:53.

Ukiachana na Bekele, raia mwenzake wa Ethiopia Almaz Ayana ambaye ni ndio anashikilia kwa wanawake akifanya hivyo katika mashindano ya Olimpiki mwaka juzi huko Rio de Janeiro, Brazil alipotumia dakika 29:17:45, pia ndio Bingwa wa Dunia mwaka jana baada ya kutumia 30:16:32.

MBIO ZA MITA 5,000

Utofauti wa mbio hii na ile ya mita 10,000 kwamba mwanariadha huzunguka uwanja wa mpira mara 12.5 na Bekele ndio mwanariadha mwenye rekodi mbili za 5,000 mita, kwanza ni ile ya uwanja wa ndani (indoors) uwanja ambao mdogo kuliko wa mpira mwanariadha huzunguka mara 25 na hufunikwa juu hivyo hewa yake ni nzito.

Aliweka rekodi ya kwanza ya (indoors) februari 20, 2004 huko Birmingham aipotumia dakika 12:49:60 kisha Mei 31 mwaka huo huo huko Hengole alipotumia dakika 12:37:35 pia ndio anashikilia rekodi ya 2,000 mita (indoors) ya dakika 4:49:57 huko huko Birmingham mwaka 2007.

Tirunesh Dibaba Bingwa mara tano mbio za dunia (2003, 2005) mita 5000, na (2005, 2007 na 2013) mita 10,000, pi bingwa mara tatu wa Olimpiki (2008) kwenye 5,000 mita (2008 na 2012) 10,000 mita, ndio anashikilia rekodi ya mita 5,000 aliyoiweka Golden League huko Italia mwaka 2008 ya dakika 14:11:15

MBIO ZA MITA 3,000

Mbio za mita 3,000 zimegawanyika katika makundi kadhaa, kuna za kukimbia kawaida kwa kuuzunguka uwanja mara 7.5, lakini pia kuna zile za kukimbia huku unaruka maji (Steeplechase), pia kuna za uwanja wa ndani (indoors) na viwanja vya kawaida (outdoors) ambazo zote kwa wanaume zinashikiliwa na Daniel Komen, ya kwanza ni ile ya mwaka 1996 huko Rieti Italia ya dakika 7:20:67 (outdoors) na nyingine ni 7:58:61 (indoors) huko Budapest 1998.

Wang Junxia wa China ana rekodi ya kina dada aliyoiweka mwaka 1993 huko Beijing bado haivunjwa hadi leo lipotumia dakika 8:06:11 (outdoor), huku Genzebe Dibaba yeye akishilia ya indoors ya dakika 8:16:60 aliyoiweka mwaka 2014 huko Stockholm na Beatrice Chepkoech yeye akiweka ya kuruka maji (steeplechase) aliyoiweka Monaco Julai 17 mwaka huu ya dakika 8:44:32 mbio za Diamond League.

MBIO ZA MITA 1,500

Bingwa mara mbili wa Olimpiki na bingwa mara nne wa Mashindano ya Dunia, Hicham El Guerrouj raia wa Morroco ndio anashikilia rekodi ya 1,500 mita aliyoiweka mwaka 1998 huko Roma Italia ya dakika 3:26:00 ambaye ni Waziri wa Michezo nchini humo,Kwa wanawake inashikiliwa na Genzebe Dibaba ya dakika 3:50:07 aliyoiweka mwaka 2015.

MBIO ZA MITA 800

Mkongwe David Rudisha ndio anashikilia rekodi hiyo aliyoiweka mwaka 2012 ya dakika 1:40:91 katika Olimpiki ya London, huku rekodi ya wanawake ikidumu tangu mwaka 1983 ya dakika 1:53:28 iliyowekwa na Jarmila Kratochilova raia wa Solvakia katika Michezo ya Olimpiki iliyofanyika Helsink, Finland.

MBIO ZA MITA 400

Rekodi ya mbio hizi inashikiliwa na Mwafrika Kusini, Wayde Van Niekerk ya sekunde 43:03 huku Mjerumani Marita Koch akiweka ya kinadada ya sekunde 47:60.

Mbio za mita 200 na 100 zikiwekwa na Mjamaika Usain Bolt huko Berlin mwaka 2009 ya sekunde 19:19 (200 mita) na sekunde 9:58 (100 mita), huku Mmarekani Florence Griffith Joner akifanya hivyo mwaka 1998 huko Seoul kwa kutumia sekunde 21:34 (200 mita) na sekunde 10:49 katika mbio za 100 mita mwaka huo huo.

Monday, September 17, 2018

Samatta we’ funga, funga, funga

 

By Nicasius Agwanda

Dunia inakimbia kwa kasi kuzunguka jua, majira yanabadilika kwa kasi kutokana na hili, na haijakwama kuzunguka kwenye mhimili wake pia na usiku umekua haukeshi ili kupata mchana.

Kila kitu kimebadilika kuanzia tenkolojia mpaka tabia. Mfano wa enzi zetu ni kama umepitwa na wakati kwa sababu enzi zimebebwa na mabadiliko haya makubwa.

Nikiwa nimeketi na mzee wangu mmoja wa mtaani nikijaribu kumleta kwenye enzi mpya ambazo hazitaki za Instagram, iliibuka picha ya mchezaji wetu kipenzi Mbwana Samatta. Ilikuwa picha ambayo amepiga akiwa pembeni ya ndege ya klabu yake ya KRC Genk.

Matarajio yangu ilikuwa aelezee safari hii walikuwa wanaelekea mji gani kwa ajili ya mchezo unaofuata lakini maneno yake yalibeba ndoto yake kubwa.

Ndoto ambayo imehama majira na imebadili wakati, ndoto ambayo haikuwa sehemu ya wachezaji wa Tanzania kwa kipindi kirefu mpaka leo.

Samatta alikuwa anajipa changamoto mpya ya kuhakikisha kuwa ananunua ndege yake binafsi (private jet) na hata kama asipoweza basi walau kuwa alijaribu kufanya hili. Katika picha kubwa Mbwana Samatta alikuwa wala hazungumzii ndege kama ndege lakini alinifikirisha zaidi kwa namna msimu huu alivyofanya vyema.

Kwenye medulla ya Mbwana Samatta na kwenye mboni zake anajaribu kutizama misimu miwili nyuma hali ilikuwaje. Kumbukumbu zinaibuka kuwa alikuwa anacheza na wachezaji kama Wilfred Ndidi pamoja Leon Bailey ambao wakati huohuo pengine ngoma za masikio yake zikawa zinarejea utani ambao walikuwa wakimwambia.

Akitizama kwenye akaunti zao za Instagram anaona mabandiko ya kutia hasira kuwa wanacheza dhidi ya Bayern Munich akiwa na Bayer04 Leverkusen kwa upande wa Leon Bailey wakati Ndidi akiwa kaketi katikati ya dimba la Leicester City mahala ambapo aliishi na kujijengea ufalme bwana Ng’olo Kante kabla ya kutua Chelsea, na sasa yeye ndo bosi wa eneo la kiungo.

Inawezekana kabisa kwenye ujumbe mfupi wa maneno akiwa anazungumza nao wanamtusi na kumwambia kwanini unaringia Benz ya hapo Ubelgiji wakati sisi tayari tunamiliki ndege binafsi pamoja na magari anayomiliki Jay Z na tumenunua nyumba walizowahi kuishi akina Ng’olo na Michael Ballack?

Akitizama kwa undani zaidi anaona kuwa hawa ni wachezaji ambao walimwacha katika nyumba ambayo wazazi wake wamezalisha vipaji kama Kevin De Bruyne na kuviweka katika kilele cha mafanikio kwa tafsiri nyingine ni kuwa anaishi kwenye nyumba yenye Uzima wa Milele kwenye soka kwa wenye juhudi.

Ndani ya akili zake nikawaza pengine Samatta ametizama kiwango chake cha msimu huu na kufunga mabao zaidi ya nane kwenye michezo sawa na mabao yake, kisha akatizama namna washabiki wanavyoimba nyimbo yenye jina lake akagundua kuwa ufalme alioupata TP Mazembe umefika KRC Genk na muda umewadia kwenda kujenga kwingine kwenye changamoto zaidi?

Nikakuna kichwa na kuwaza kwa umri wake wa miaka 25 kuelekea 26 si ndio umri sahihi kabisa kwa mshambuliaji kutua La Liga, Bundesliga na Premier League? Bahati nzuri ana miguu isiyotofautiana kwa kiwango kikubwa na Kelechi Ihenacho ambaye anapata mshahara wa kununua ndege binafsi anayoiota Samatta.

Jambo pekee ambalo linatakiwa kumweka Samatta katika imani aliyonayo ni kiwango alichokionyesha kiendelee kupaa, afunge kwenye ligi lakini afanye makubwa zaidi kwenye Europa League ambayo inafuatiliwa na kila mtu. Ukifunga Ulaya unatambulika kuliko kwenye ligi yako ya kawaida, hii huwa naiita Cristiano Ronaldo Theory, na imefanya kazi msimu huu dhidi ya Messi ambaye alifunga alivyojisikia kwenye La Liga na dhidi ya Salah ambaye alijipatia ufalme Liverpool.

Funga funga funga magoli ndio kitu pekee ambacho Samatta anatakiwa kukiwaza kwa sasa, akikosa kufunga ajifungie chumbani alie kwa uchungu. Anatakiwa kuishi kwenye mawazo ya Bill Shankly. Aliwahi kusema kwa wachezaji wake kuwa ukiwa kwenye “Penalty Box” kwa wapinzania na huna uhakika ufanye nini na mpira, wewe upasie nyavuni tutakuja kujadili machaguo yaliyokuwepo wewe kufanya baadae.

Umefika muda ambao Samatta inabidi awe na hasira, hasira dhidi ya nyavu za wapinzani, inabidi awaze kwanini nisitwae kiatu cha mfungaji bora kwenye Europa League, inabidi afikirie kwanini nisiwe Awafu mwenye nguvu na nichane kila mdomo wa Simba utakaokuwa wazi.

Huu ndo uzito wa mawazo ninayojitahidi kuwaza kwenye alichokibandika Mbwana Samatta na ninajaribu kuamini kuwa ndio hasa mtihani aliojipatia ili kukimbizana na ndoto aliyojaribu kutushirikisha.

Ndoto ambayo nyuma yake kunatakiwa kuwa na maneno yenye maana ya magoli tu, awe amewaza kwa Kiingereza, Kiswahili ama lugha ya kwao na pengine Kifaransa, magoli ndio yatakayonunua Private Jet.

Nikiwa bado nawaza kwa kina na wakati najaribu kuleta picha za Farid Mussa, Shaaban Idd Chilunda na Saimon Msuva na ndoto walizonazo nasikia kibao chepesi mgongoni, kumbe yule mzee anahitaji kujua namna ya kubandika na yeye picha kama wanavyofanya wengine. Nilishasahau kazi iliyoniweka pale na kama ingekuwa yenye mshahara malipo yangu yasingetimia kwa kuwaza ndoto za wengine.

Nikiwa sijamtilia maanani bado mzee wangu huyu, nilijikuta namwambia ndoto ya private jet ni magoli. Nikaondoka zangu na kumuahidi nitamfundisha siku nyingine, acha nikasimulie wasomaji nilivyoota mchana nikiwa macho wazi. Ndoto ya private jet ni magoli. Funga Funga Funga.

Monday, September 17, 2018

Mastaa wengine hawa hapa wanamsubiri Amunike awaite

 

By Eliya Solomon, Mwananchi

Timu ya Taifa la Tanzania ‘Taifa Stars’ inaweza kuwa miongoni mwa mataifa 24 yatakayoshiriki mwakani kwenye Fainali za Afcon zitakayofanyika mwakani nchini Cameroon kuanzia Juni 7 hadi 30.

Taifa Stars ambayo ipo Kundi L, baada ya kuibana kwao Uganda na kurejea nchini wiki iliyopita na pointi moja, itakuwa na kabarua kingene kwenye mchakato wa kuwania ticketi ya Afcon, Oktoba 12 dhidi ya Cape Verde.

Timu hiyo ya taifa kwenye mchezo uliopita ilikuwa na wachezaji tisa wanaocheza soka la kulipwa nje ya nchi ambao ni Mbwana Samatta wa KRC Genk ya Ubelgiji, Saimon Msuva wa Difaa El (Jadida, Morocco), Farid Mussa na Shaaban Chilunda wa Tenerife ya Hispania.

Wengine ni Himid Mao (Petrojet, Misri), Rashid Mandawa (BDF XI, Botswana), Abdi Banda (Baroka FC, Afrika Kusini), Hassan Kessy (Nkana Red Devils, Zambia) na Thomas Ulimwengu wa Al Hilal ya Sudan.

Spoti Mikiki ambayo siku zote imekuwa mstari wa mbele kuvumbua wachezaji wa Tanzania wanaocheza nje ya nchi, inakuletea nyota wengine wanaocheza mara kwa mara kwenye ligi za mataifa yaliyoendelea.

Nyota hao wanaweza kuongeza nguvu kwenye kikosi cha Emmanuel Amunike ambaye ameonekana kuwa na imani juu ya wachezaji wanaocheza soka la kulipwa nje ya nchi hasa wale ambao wanacheza kwenye ligi kubwa zenye ushindani zaidi ya Ligi Kuu Tanzania Bara.

Orgeness Mollel/Tirsense (Ureno)

Winga wa zamani wa FC Famalicao ya daraja la kwanza Ureno, Orgeness Mollel ambaye amejiunga na Tirsense ya daraja la pili nchini humo, anaweza kuongeza nguvu kwenye kikosi cha Taifa Stars kama ataitwa kwa mara nyingine.

Awamu ya kwanza kwa winga huyo mwenye umri wa miaka 20 kuitwa timu ya taifa ‘Taifa Stars’ ilikuwa chini ya Salum Mayanga lakini hata hivyo hakutua nchini kutokana na sababu zilizokuwa nje ya uwezo wake.

Mollel amewahi kuitumikia timu ya taifa ya Tanzania chini ya umri wa miaka 20 ‘Ngorongoro Heroes’ pamoja na beki wa Yanga, Andrew Vincent ‘Dante’.

Yahya Al Ghanassi - Al Wahda, Falme za Kiarabu

Yahya Ali Said Al Ghassani ni Mtanzania ambaye hivi karibuni amesaini mkataba wake wa kwanza wa kucheza soka la kulipwa baada ya kufanya vizuri akiwa na kikosi cha timu ya vijana.

Ghassani amesaini mkataba wa miaka mitano ambao utamalizika 2023 akiwa na miamba hiyo ya soka inayoshiriki Ligi Kuu nchini humo, tayari mshambuliaji huyo ameifungia bao moja timu yake katika michezo miwili aliyoichezea Al Wahda inayonolewa na Laurențiu Reghecampf mwenye uraia wa Romania.

Adolf Bitegeko-KR Reykjavík (Iceland)

Adolf Bitegeko ni kiungo mkabaji anayecheza soka la kulipwa Iceland kwenye klabu iitwayo KR Reykjavík inayoshiriki Ligi Kuu nchini humo, nyota huyo alianza kucheza soka lake nchini kwenye akademi ya Azam, Chamazi kisha akapata nafasi Marekani ambako alikuwa akicheza soka la vyuo.

Adam Kasa - Enskede (Sweden)

Mjukuu wa kipa wa zamani wa Simba, Athumani Mambosasa (sasa marehemu), Adam Kasa ni beki wa kushoto anayecheza Ligi Daraja la Tatu, Sweden naye anaweza kutumika kutokana na uzoefu alionao wa kucheza soka la kimataifa.

Hamis Abdallah - Bandari (Kenya)

Miongoni mwa wachezaji kutoka nje ya nchi ambao walikuwa wakipata nafasi chini ya Salum Mayanga alikuwa ni Hamis Abdallah ambaye kwa kipindi hicho alikuwa akiichezea Sony Sugar. Hamis amekuwa kwenye kiwango bora ambacho kimeisaidia Bandari anayoichezea kwa sasa kuwa miongoni mwa timu zinazotisha kwani inashika nafasi ya pili nyuma ya Gor Mahia ambayo tayari imeshatwaa ubingwa wa Ligi Kuu Kenya.

Ayubu Lyanga - Zanaco (Zambia)

Ayubu Lyanga ni kiungo wa Kitanzania anayeichezea Zanaco ya Ligi Kuu Zambia, kiungo huyo anaweza kuiongezea nguvu Taifa Stars ya Amunike kama ataamua kumwita kwenye kikosi chake.

Juma Byabusha-Binghamton FC (Marekani)

Juma Byabusha ni kiungo anayefananishwa na Bakayoko wa Chelsea aliyejipatia umaarufu mkubwa akiwa na Monaco, Juma anayeichezea Binghamton FC ya daraja la tatu Marekani (NPSL) amekuwa akitajwa kuwa kwenye kiwango bora kwa sasa.

Taarifa tulizonazo ni kwamba kiungo huyo mwenye umri wa miaka 19 ameanza kuhusishwa na kujiunga na New York City FC ya Ligi Kuu Marekani mara baada ya kumaliza shahada ya uhandisi katika chuo kikuu cha Binghamton.

Monday, September 17, 2018

Mpepo: Nilikatishwa tamaa kucheza soka

 

By Eliya Solomon, Mwananchi

Mshambuliaji wa Singida United, Eliuter Mpepo ni mchezaji muhimu kwenye kikosi hicho kutokana na uwezo wake wa kuwasumbua mabeki, kufunga na kutengeneza mabao. Amejiunga n timu hiyo akitokea Prisons ya Mbeya.

Mpepo alisema baada ya mkataba wake kumalizika, alitafuta timu itakayomtoa na Singida wamemwona.

Eliuter alishirikiana vyema na Mohammed Rashid kwenye eneo la mwisho la ushambuliaji la kikosi cha Prisons. Rashid kwa sasa yuko Simba.

Mikiki imepata nafasi ya kufanya mahojiano na mshambuliaji huyo ambaye ameizungumzia safari yake ya soka huku akizitaja changamoto ambazo amekutana nazo.

Kabla ya kutua Prisons, Eliuter alizichezea Kinyerezi United ambayo ilikuwa madaraja la nne, Friends Rangers na Mbeya Kwanza za daraja la Kwanza.

Hata hivyo Eliuter anasema hawezi kusahau mazingira aliyapitia akiwa Friends Rangers kwa kusema ni kama yalimkomaza kisoka.

“Ulifika muda mpaka nikaanza kuwaza kuachana na soka, nilivyojiunga na Friends kuna baadhi ya viongozi walikuwa hawanipendi kabisa hivyo walinitengenezea majungu kwa hata kupandikiza chuki kwa mashabiki.

“Walifanikiwa kiukweli maana kila nilipokuwa naingia nilikuwa nazomewa, hali ya kuzomewa nilishindwa kuimudu mpaka ikaanza kuathiri uwezo wangu wa kawaida wa uwanjani nilipiga moyo konde lakini niliushinda ule mtihani,” anasema Eliuter.

Pamoja na kuonekana kuwa mmoja wa washambuliaji hatari kwa sasa, Eliuter amesema hana tatizo wala mapenzi kati ya Simba na Yanga kama ukitokea upande wowote kumwitaji atakuwa tayari kuusikiliza.

“Namshukuru sana kocha wangu wa Tanzania Prisons, Mohammed Abdallah kwa kuniamini na kunipa nafasi na hata Singida United wakaniona na sasa nakula maisha huku,” anasema.

Monday, September 17, 2018

Kama hatuna ligi bora tusitarajie makubwa Afrika



Allan Goshashi

Allan Goshashi 

Ligi iliyo bora huwezesha kupata wachezaji bora watakaounda timu bora ya Taifa itakayoweza kufanya vizuri kimataifa na pia kupata klabu zitakazotuwakilisha vyema katika mashindano ya kimataifa kwa ngazi ya klabu.

Kama tutakuwa na ligi bora itakayotuwezesha kuwa na timu bora ya Taifa na klabu bora zitakazotuwakilisha vyema kimataifa, basi mafanikio hayo yataweza kukuza na kuendeleza kiwango cha soka katika nchi yetu.

Ninaamini kabisa, Shirikisho la Soka Tanzania (TFF) wanafahamu na wanaamini kuwa soka ni mchezo wenye nguvu, unaopendwa na watu wengi duniani na unaoweza kuvutia watu wengi kuwekeza katika mchezo huo.

Na ndiyo maana TFF huweka kanuni na sheria katika Ligi Kuu kwa ajili ya kuufanya mchezo wa soka uwe na ladha katika kuucheza na pia uwe na ladha katika kuuangalia na hivyo kuufanya uwe na burudani zaidi.

Sasa tatizo tulilonalo katika Ligi Kuu yetu ni kuhakikisha kanuni, taratibu na sheria za soka zinafuatwa na kuheshimiwa na pia kanuni za uchezaji wa kiungwana zinazingatiwa na wachezaji, makocha, waamuzi, viongozi, mashabiki, n.k.

Ndiyo, nafahamu TFF wamekuwa wakiziagiza klabu, makocha, wachezaji na waamuzi kuzisoma kwa makini kanuni za ligi na kuhakikisha zinaeleweka na kufuatwa kwa faida ya mchezo wa soka nchini, lakini sidhani kama wahusika wamekuwa wakilichukulia suala hili kwa uzito mkubwa na hapa ndiyo tatizo la chanzo cha kukosa ligi bora nchini linapoanzia.

Ni wazi kuwa klabu, makocha, wachezaji, waamuzi na mashabiki wanatakiwa kuelewa soka kama ilivyo michezo mingine yote inalindwa na sheria pamoja na Kanuni.

Bila sheria na kanuni mchezo wa soka utakuwa ni vurugu tupu, pia utakuwa hauna heshima, uadilifu, adhabu hazitatolewa na mshindi hatapatikana uwanjani kihalali bali kwa kutumia njia chafu zisizokubalika.

Kwa mtazamo wangu, klabu za soka nchini zinatakiwa kuhakikisha kanuni hizi zinaeleweka vizuri kwa wachezaji na mashabiki wake na kuzitekeleza kwa asilimia mia moja.

Ndiyo, kama wachezaji wakizielewa vyema kanuni za ligi zitawasaidia kuwa wachezaji bora zaidi na wataepuka kuadhibiwa kwa makosa ambayo yanaweza kuepukika na nidhamu yao ndani na nje ya uwanja itakuwa kubwa.

Inaeleweka kwamba TFF huwa inazifanyia marekebisho kanuni za ligi ili kuziboresha ziendane na wakati.

Mabadiliko hayo lengo lake kuu ni kuwa na ligi iliyo bora zaidi, ambayo italeta ushindani kwa timu shiriki na pia kutoa burudani zaidi kwa watazamaji.

Pia ni pamoja na kuchochea wadhamini zaidi kujitokeza kwa ajili ya kudhamini ligi na timu shiriki.

Mimi ninaamini kwamba inachokifanya TFF kwa kuweka kanuni hizi hasa za Ligi Kuu na Ligi Daraja la Kwanza ni kitu kizuri ila ningewashauri wahakikishe wanazisimamia kanuni hizo kwa kiwango cha juu bila kumuonea mtu haya wala upendeleo.

Pia, ninao ushauri mwingine kwa TFF ambao ni kuhakikisha tunakuwa na ligi nyingine nyingi za ngazi ya chini ambazo zitakuwa na kanuni kali za kusimamia ligi hizo.

Ninasema hiyo kwa sababu kama tutakuwa na program nzuri za kuendeleza makocha au za kuendeleza vipaji vya wachezaji katika ngazi za chini halafu hatuna ligi mbambali bora kwa ajili ya makocha na wachezaji hao.

Tutakuwa hatujafanya jambo lolote la maana kwa makocha na wachezaji hao, kwani wachezaji wanahitaji mechi nyingi za ligi bora.

Monday, September 17, 2018

Sababu za maumivu ya nyayo kwa wakimbiaji



Dk Shita Samwel

Dk Shita Samwel 

Katika maisha ya mwanamichezo mkimbiaji ni kawaida kuwahi kukabiliwa na maumivu ya chini ya mguu katika mbonyeo wa nyayo.

Inawezekana pia Mwanariadha mstaafu wa mbio ndefu kimataifa Mzee Akwari kuwa na uzoefu na tatizo hili katika enzi za maisha yake ya ukimbiaji.

Tatizo hili hujulikana kitabibu kama plantar fasciitis au runner’s heel mara kwa mara huwapata wakimbiaji na kuwasababishia maumivu chini ya nyayo yanayochoma kama kitu chenye ncha kali.

Tatizo hilo hutokea baada ya kuwepo kwa shambulizi ndani ya nyayo kwenye bunda gumu la tishu iliyojitandika kama kitambaa kigumu na kuunganisha mfupa wa kisigino na dole gumba la mguu.

Baadhi ya watu hudhani pengine tatizo hili linawapata zaidi wakimbiaji wa mara ya kwanza au wenye uzito mkubwa lakini kumbe yoyote anayefanya zoezi la kukimbia anaweza kupata.

Karibu asilimia 10 hadi 20 ya wanariadha duniani inasemekana wamewahi kupata tatizo hili katika maisha yao na zaidi kwa wale wakimbiaji wenye umri wa zaidi ya miaka 35-40.

Wanariadha, umri mkubwa, uzito mkubwa, uvaaji viatu vigumu na soli ndefu, dosari ya kuzaliwa ya unyayo, aina ya mchezo na kazi ni sababu ya kuwa katika hatari ya kupata tatizo hili.

Wakimbiaji ambao ni wafanyakazi wa viwandani, walimu, wachuuzi wakutembeza bidhaa na askari ni makundi ya jamii ambayo aina ya kazi yao inawahatarisha kupata tatizo hili.

Dalili kubwa ni maumivu ya kuchoma katika eneo la kisigino na mbonyeo wa nyayo mara tu unapoamka asubuhi na kuanza kupiga hatua chache.

Baada ya hatua kuchanganya na unaposimama maumivu yanaweza kupotea kwa dakika kadhaa, huanza tena mara tu unapoanza kutembea tena.

Sababu ya maumivu haya kujitokeza asubuhi baada ya kuamka ni kutokana na tando ngumu ya nyayo wakati wa usiku huwa imesinyaa na kuwa ngumu hivyo unapoikanyagia ghafla nyuzi zake huvutika.

Kwa kawaida nyayo hufunikiwa na ngozi na kufuatiwa na tando ngumu ya tishu inayoshikamana na misuli, tando hii ndiyo inayoaminika kuathirika na kusababisha maumivu.

Kama ilivyo maeneo mengine ya mwili eneo hili ndani yake huwa na tishu zingine ikiwamo mishipa ya damu na ya fahamu, hivyo tishu hizi pia huweza kupata majeraha na kuongeza ukubwa wa tatizo.

Wakati wa kukimbia huwepo mgandamizo mkubwa wa uzito mwili katika nyayo, kulika na kuchanika kwa tishu za tando ngumu ya nyayoni husababisha mkereketo unaoleta maumivu.

Mara kadhaa tatizo hili huwapata wenye uzito mkubwa na sababu kubwa ni miguu inapotua chini hupata mgandamizo mkubwa na kupondwa na mfupa uliobeba mwil na matokeo yake huziponda nyama na kusababisha kupasuka.

Pamoja na tatizo hili kumstua muathirika kutokana na maumivu ya kukera linaweza kuondoka lenyewe bila matibabu yoyote. Wakati mwingine ni mtawanyiko wa tishu zenyewe na kwa kuwa unapokimbia ni kama inahama kwenye mgandamizo mkali na baadaye zinarudi na hapo ndipo kuna maumivu.

Tukutane Jumatatu ijayo nitaeleza njia salama za kulikabili tatizo hili.

Monday, September 17, 2018

Kwa hiyo Cecafa ndio mmemaliza mambo yenu!



Ibrahim Bakari

Ibrahim Bakari 

Makocha wa timu za taifa za mataifa mbalimbali hasa Afrika Magharibi huwa hawana kazi sana ya kuhangaika na wachezaji wa timu za taifa.

Mfano, makocha wa Senegal, Ivory Coast, Nigeria, Ghana, Mali, Algeria, Morocco unadhani hawa wana kazi ya kusaka wachezaji? Jibu rahisi, hakuna.

Cecafa haioni fahari kwa timu zake!

Baraza la vyama vya Soka Afrika Mashariki na Kati, Cecafa ni chombo cha juu cha kusimamia soka ukanda wa Afrika Mashariki na Kati, lakini haionyeshi kama kweli ina dhamira ya kuendeleza mchezo huo, kikanda.

Cecafa ninaweza kusema ni kama imejifia kwani wakimaliza eneo moja, basi miguu juu wanasubiri mwakani.

Niliwahi kuandika kuwa Cecafa haina mipango endelevu katika soka, haina mkakati wowote kusaidia mataifa yake wala kuyapa mbinu.

Inachojua Cecafa ni kuandaa mashindano ya Chalenji kwa timu za wakubwa, michuano ya vijana na ile ya wanawake na baada ya hapo inakuwa kazi imemalizika.

Pamoja na kazi nzuri iliyofanya ya kuendesha mashindano ya vijana, Cecafa kwa kipindi kirefu haikuwahi kuwatafutia wanachama wake kozi za juu ama hata za chini, hakuna kwa makocha, wakurugenzi wa maendeleo ya soka, madaktari wa michezo, viongozi wa vyama na mashirikisho wala waamuzi.

Hakuna huo mkakati, na inafika hatua Cecafa haina hata uhakika wa mashindano yake pindi mashindano ya kwanza yanapomalizika.

Kinachoshangaza ni kwamba, inafika hatua Cecafa haijui nani anafuata kuwa mwenyeji na pia haijui hata fedha za kuendesha mashindano yanayofuata na inachofanya ni kuishia kuahirisha mashindano kila mara.

Pamoja na matatizo ya kiuchumi kwa mataifa husika, lakini ikiamua mbona mashindano yanafanyika japokuwa kimkandamkanda? Basi mambo yaende hivyo.

Kikubwa ninachotaka kuzungumzia hapa ni Cecafa kuandaa utaratibu mpya wa mashindano kwamba kuwepo na mchanganyiko wa klabu mfano timu zake za Ligi ya Mabingwa na zile za Kombe la Shirikisho zikapambanishwa pamoja ili kuzipa mazoezi kabla ya michuano hiyo.

Kwa sasa kila mahali mfumo wa uendeshaji mashindano umebadilika, UEFA, Asia, CAF na ukiangalia Cosafa lakini angalia Cecafa, mambo ni yaleyale. Cecafa inafanya mambo yake kwa mazoea, hawana hata ubunifu, hawaangalii kinachotakiwa kufanyika walau kuinua soka Afrika Mashariki na Kati na kwa wakati gani.

Cecafa ingeandaa kongamano ambalo lingekutanisha na makocha, manahodha, mameneja kwa klabu zote zilizofuzu na kutengeneza mkakati maalum kwa ajili ya ukanda wa Cecafa.

Kuwapa morari, kuwapa hadidu rejea kwanini Cecafa imewaita na hata kuahidi zawadi nono kwa timu itakayofika mbali kama ilivyo sasa kwa Rayon Sport, lakini Cecafa imebakia kusubiri Chalenji na Kombe la Kagame na michuano ya vijana, basi.

Ilitakiwa Cecafa kuzishika mkono timu zake kwa njia moja ama nyingine, lakini hakuna hicho kitu.

Ni mpango mkakati wa ubunifu pekee ndio utakaosaidia timu kusonga mbele.

Kingine ninachoweza kusema ni kama tatizo lingine kwa Cecafa kwamba haina Kamati ya Masoko, haina Kamati ya Mipango na Uchumi na kama wangekuwepo hayo yote yangefanyika na kuleta msisimko katika ukanda wa Cecafa na timu zake za Afrika.

Monday, September 3, 2018

Mastaa 20 walioanza kuichezea Taifa Stars na umri mdogo

 

By Eliya Solomon, Mwananchi

Wakati wa Fainali za Kombe la Dunia nchini Russia, mshambuliaji wa Ufaransa, Kylian Mbappe (19) aliingia kwenye vitabu vya kumbukumbu kwa kuwa rekodi ya kuwa kinda aliyefunga bao kwenye mchezo wa fainali.

Mbappe aliweka rekodi hiyo, Julai 15 kwenye nyasi za uwanja wa Luzhniki kwa kuwa mchezaji wa pili mwenye umri mdogo zaidi kufunga bao kwenye mchezo wa fainali dhidi Croatia ambapo Ufaransa ilishinda kwa mabao 4-2.

Pele ndiye amesalia kama mchezaji kinda zaidi aliyefunga bao akiwa na miaka 17 kwenye mchezo wa fainali ya 1958 wakati Brazil ilipoilaza Sweden kwa mabao 5-2.

Spoti Mikiki linakuletea rekodi za wachezaji ambao wameitumikia Taifa Stars kwa vipindi tofauti wakiwa na umri mdogo zaidi kuanzia mwaka 2000.

Victor Costa ‘Nyumba’ v Sudan

Beki wa kati wa zamani wa Simba, Victor Costa ‘Nyumba’ aliweka rekodi hiyo Oktoba 12, 2002 kwenye uwanja wa CCM Kirumba jijini Mwanza pale ambapo Taifa Stars ilifungwa na Sudan mabao 2-1 katika mchezo wa kuwania mataifa ya Afrika

Costa alicheza mchezo huo ambao bao pekee la Taifa Stars lilifungwa na Mohamed Abdallah Rajab, wakati huo Costa akiwa na miaka 15 na siku 35.

Juma Liuzio v Gambia

Mshambuliaji Juma Luzio akiwa na umri wa miaka 16 na siku 287 aliingia dakika ya 61 kuchukua nafasi ya Khamis Mcha, Septemba 7, 2013 katika mchezo ambao Taifa Stars ilifungwa na Gambia kwa mabao 2-0.

Mchezo huo uliochezwa kwenye uwanja wa BANJUL nchini Gambia ulikuwa wa kuwania nafasi ya kufuzu Fainali za Kombe la Dunia 2014 zilizofanyika Brazil.

Said Maulid v Ghana

Said Maulid ‘SMG’ akiwa na umri wa miaka 16 na siku 55, Oktoba 28, 2000 aliichezea Taifa Stars kwenye mchezo wa kuwania nafasi ya tatu ya kwenye kombe la COSAFA Castle ambapo Stars iliifunga Ghana kwa mabao 3-2.

Taifa Stars ilijikuta ikimaliza pungufu kwenye mchezo huo uliochezwa kwenye uwanja wa Kasarani, Nairobi kutokana na Juma Khamis kuonyeshwa kadi nyekundu huku kwa upande wa Ghana Bilson Abeiku na Armando Adamu Baba walionyeshwa kadi nyekundu.

Juma Kaseja v Kenya

Kipa wa KMC kwa sasa, Juma Kaseja aliichezea Taifa Stars mchezo wake wa kwanza akiwa na miaka 17 na siku 223 kwenye mchezo michuano ya Cecafa dhidi ya Kenya, Novemba 30 kwenye Uwanja wa CCM Kirumba jijini Mwanza.

Taifa Stars iliibuka na ushindi wa bao 1-0 kwenye mchezo huo lililofungwa dakika ya tisa na Henry Morris.

Ulimboka Mwakingwe v Sudan

Ulimboka Mwakingwe ambaye alikuwa akisifika kwa vyenga enzi zake alianza kuichezea Taifa Stars akiwa na miaka 18 na siku 27, Desemba 2, 2002 kwenye Kombe la Chalenji la Cecafa.

Katika mchezo huo, Taifa Stars ilitoka sare ya bao 1-1 dhidi ya Sudan na bao la Stars lilifungwa na Salvatory Edward.

Uhuru Selemani v Zambia

Winga wa Biashara United, Uhuru Selemani aliivaa jezi ya Taifa Stars kwa mara ya kwanza Novemba 21, 2007 akiwa na miaka 18 na siku 69 kwenye mchezo wa kirafiki dhidi ya Zambia, uliochezwa Uwanja wa Taifa jijini Dar es Salaam.

Aliyeibuka shujaa kwenye mchezo huo, alikuwa Mika Chuma aliyeifungia Taifa Stars bao pekee lililoifanya timu hiyo ya taifa ya Tanzania kuibuka na ushindi wa bao 1-0.

Emmanuel Gabriel v Uganda

Mshambuliaji wazamani wa Simba, Emmanuel Gabriel aliichezea Taifa kwa mara ya kwanza akiwa na umri wa miaka 18 na siku 154, Oktoba 23, 2002 kwenye mchezo wa nusu fainali ya kombe la Castle Lager dhidi ya Uganda.

Taifa Stars iliyosheheni nyota wengine kama Salvatory Edward, Abdallah Juma, Edibilly Lunyamila, Steven Mapunda, Selemani Matola, Meck Maxime (nahodha), Suleiman Mbaruku na Gabriel akiwemo iliambilia kipigo cha mabao 2-0.

Farid Mussa v Kenya

Winga wa CD Tenerife ya Hispania, Farid Mussa aliichezea mchezo wake wa kwanza Taifa Stars dhidi ya Kenya, Disemba 10, 2013 kwenye uwanja wa wa taifa wa Nyayo, Nairobi nchini Kenya akiwa na umri wa miaka 18 na siku 203.

Katika mchezo huo wa nusu fainali ya CECAFA, Taifa Stars ilipoteza kwa bao 1-0 alilofungwa Ivo Mapunda dakika ya tano na Clifton Miheso.

Shadrack Nsajigwa v Zanzibar

Beki kisiki wa zamani wa Yanga, Shadrack Nsajigwa aliichezea Taifa Stars kwa mara ya kwanza akiwa na umri wa miaka 18 na siku 204, Septemba 2, 2002 dhidi ya Zanzibar kwenye mchezo wa kirafiki uliomalizika kwa sare bao 1-1.

Bao la Taifa Stars kwenye mchezo huo uliochezwa uwanja wa taifa jijini Dar es Salaam, lilikuwa la kusawazisha dakika ya 78 kupitia kwa Athumani Machupa baada ya kutanguliwa dakika 60 kwa bao la Ame Khamis wa Zanzibar.

Amir Maftah v Zambia

Maftah alivaa jezi ya Taifa Stars kwa mara ya kwanza kwenye michezo ya kimataifa dhidi ya Zambia akiwa na miaka 18 na siku 328, Novemba 21, 2007 ambapo Stars ilishinda kwa bao la Mika Chuma.

Adam Kingwande v Mauritius

Kingwande naye aliichezea Taifa Stars kwa mara ya kwanza akiwa na miaka 19 na siku tano, Septemba 6, 2008 kwenye mchezo wa kunawania kufuzu kwa kombe la Dunia dhidi ya Mauritius.

Taifa Stars iliibuka na ushindi kwenye mchezo huo kwa mabao 4-1, mabao hayo yalifungwa na Kigi Makasi, Jerson Tegete alifunga mara mbili na Nizar Khalfan.

John Kanakamfumu v Zambia

Kanakamfumu aliichezea Taifa Stars kwa mara yake ya kwanza akiwa na miaka 19 na siku 26, Novemba 21, 2007 kwenye mchezo wa kirafiki dhidi ya Zambia.

Mrisho Ngassa v Cameroon

Winga wa Yanga, Mrisho Ngassa alianza kuichezea Taifa Stars akiwa na miaka 19 na siku 40, Juni 14, 2008 pindi ambapo Tanzania ilikuwa ikiwania nafasi ya kucheza Kombe la Dunia mbele ya Cameroon ambao ilikuwa nayo Kundi I.

Ngassa alicheza kwa mara yake ya kwanza na kushindwa kuisaidia Taifa Stars kuibuka na ushindi kwenye mchezo huo uliomalizka suluhu Uwanja wa Taifa jijini Dar es Salaam.

Mudathir Abbas v Malawi

Abbas aliichezea kwa mara ya kwanza Taifa Stars akiwa na miaka 19 na siku 157, Oktoba 2015 dhidi ya Malawi.

Mchezaji huyo kwa sasa anaitumikia Azam.

Shaaban Nditi v Zanzibar

Mkongwe Nditi aliuvaa uzi wa Taifa Stars kwa mara ya kwanza akiwa na miaka 19 na siku 171, Septemba 2, 2002 kwenye mchezo wa kirafiki dhidi ya Zanzibar.

Erasto Nyoni v Zambia

Beki wa Simba mwenye umri wa miaka 30, alianza kuichezea Taifa Stars akiwa na miaka 19 na siku 197, Novemba 21, 2007 kwenye mchezo dhidi ya Zambia.

Shiza Kichuya v Kenya

Kichuya aliichezea Taifa Stars kwa mara ya kwanza akiwa na miaka 19 na siku 198, Mei 29, 2016 kwenye mechi ya kirafiki dhidi ya Kenya, iliyochezwa kwenye uwanja wa Kasarani.

Said Ndemla v Malawi

Kiungo wa Simba, Said Ndemla akiwa na umri wa miaka 19 na siku 213 ndipo alipoanza kuichezea Taifa Stars kwenye mchezo kuwania kufuzu kwa kombe la Dunia dhidi ya Malawi, Octoba 11, 2015 kwenye uwanja wa Kamuzu.

Jerson Tegete v Mauritius

Mshambuliaji wa zamani wa Yanga, Jerson Tegete aliichezea Taifa Stars akiwa na miaka 19 na siku 236, Mei 31, 2008 katika mchezo dhidi ya Mauritius.

Alikuwa kipenzi cha kocha Marcio Maximo kwani alimtengeneza baada ya kuona kipaji chake.

John Bocco v New Zealand

Mshambuliaji wa zamani wa Azam, John Bocco alivaa jezi ya timu ya taifa akiwa na miaka 19 na siku 302, Januari 3, 2009 kwenye mchezo wa kirafiki ambao ulichezeshwa na mwamuzi Odan Mbaga na kumalizika kwa ushindi wa Taifa Stars kwa mabao 2-1, yaliyofungwa na Jerson Tegete dakika ya 55 na Mwinyi Kazimoto dakika ya 89.

Saimon Msuva v Gambia

Mshambuliaji wa Difaa El Jadida ya Morocco, Saimon Msuva alivaa uzi wa Taifa Stars kwa mara ya kwanza akiwa na miaka 19 na siku 340, Septemba 7, 2013 dhidi ya Gambia.

Thomas Ulimwengu v Morocco

Ulimwengu naye aliichezea Taifa Stars kwa mara ya kwanza akiwa na miaka 19 siku 359, Juni 8, 2013 kwenye mechi ya kuwania nafasi ya Kombe la Dunia, iliyochezwa kwenye uwanja wa Marrakech mjini Marrakech.

Ulimwendgu bado anachezea Stars na yuko Sudan kwa sasa.

Monday, September 3, 2018

Poulsen katikati ya Serengeti Boys ya 2019

 

By Thomas Ng’itu, Mwananchi tng’itu@mwananchi.co.tz

Timu ya Taifa ya Tanzania chini ya miaka 17 ‘Serengeti Boys’ imeshika nafasi ya tatu mechi za kufuzu Fainali za Afrika kwa vijana chini ya umri huo zitakazofanyika mwakani, Tanzania ikiwa mwenyeji.

Serengeti Boys ililala kwa mabao 3-1 na Uganda mechi ya nusu fauinali na kusukumwa kuwania mshindi wa tatu na nne. Iliifunga Rwanda kwa mikwaju ya penalti 4-2.

Kikosi hicho ambacho kinanolewa na kocha mzawa Oscar Milambo, kilionyesha kandanda safi muda wote wa mashindano hayo, ukiondoa mechi ya Uganda pekee ambayo ndiyo waliyopoteza.

Spoti Mikiki lilikuwa likifuatilia kwa karibu michuano hiyo, linakuja na tathmini fupi kwa timu hiyo ya mwakani.

MPIRA WA UTULIVU

Benchi la ufundi lilijitahidi kwa sababu wachezaji walikuwa wakionyesha kutulia na kucheza soka la kueleweka. Hawakuwa na papara na walifanya kweli pale walipompata kibonde. Hawakumwacha salama.

Si beki, kiungo wala mshambuliaji ambaye alikuwa anabutua butua mpira, wote walikuwa wanatulia na mpira huku wakiangalia wapi wanatakiwa kuanzisha mashambulizi yao.

WACHEZAJI TEGEMEO

Katika timu, wachezaji wote ni tegemeo. Timu ni mfumo, lakini kuna wale ambao ni tegemeo zaidi. Agiri Ngoda na Kelvin John ‘Mbappe’ ni wachezaji ambao tayari wameonyesha kuwa ni hazina.

Ni wachezaji wanaoelewana katika kutupia. Hawakufanya kosa. Waliwasumbua vilivyo mabeki wa timu pinzani. Tatizo lililopo, ikitokea mmoja ana kadi na mwingine ameumia, kwa mfano, hakuna tena ‘striking force’ pale mbele.

Kocha wa timu hiyo, Oscar Milambo anatakiwa kutengeneza kombinesheni nyingine ama kwa kuwachezesha wawili wengine au kuwaunganisha na mmoja mmoja wa hao kuona wanaweza kushirikiana vipi.

Timu haiwezi kuwategemea Ngoda na Kelvin pekee, lazima kuwepo na wakali wengine wa kutupia na kufanya idadi yao kuwa watano au wanne.

MECHI ZA KIRAFIKI

Hapa sasa ndipo unaonekana mwangwi wa aliyekuwa Mkurugenzi wa timu za Vijana, Kim Poulsen ambaye ndiyo hivyo tena, hayupo.

Baada ya uzinduzi wa mashindano hayo mwaka juzi na Poulsen kushiriki kuchagua wachezaji, alisema wanatakiwa kucheza mechi ngumu 25 kabla ya fainali za 2019.

Poulsen hakwepeki hapa. Mfano mzuri ulionekana wakati wa mchezo wa nusu fainali na Uganda ambayo wachezaji walibanwa kila kona na kushindwa kufurukuta japokuwa walipata bao.

Timu ilionekana kupoteana, kukata pumzi mapema, kushindwa kubadilika baada ya kufungwa, kocha kukosa mbinu mbadala na timu kukatika.

Hiyo ni kutokana na timu kuwa ngumu. Achana na Burundi, Sudan, Sudan Kusini, Eritrea, hizo hazitakuja mwakani.

Mfano wa timu zitakaziocheza na Serengeti Boys ni pamoja na Cameroon ambao wamefuzu, Uganda hii hii, Mali mabingwa watetezi.

Ili kuingia katika kichwa cha Poulsen lazima Serengeti Boys icheze mechi na mataifa yaliyotimamu kwa timu za vijana kama; Algeria, Morocco, Ghana, Nigeria, Afrika Kusini, Senegal, DR Congo au hata nje ya Afrika bila kujali wamefungwa. Kushinda kila siku wakati mwingine si kipimo sahihi japo inatakiwa kuwa hivyo.

Kufikia 2019, itakuwa na wachezaji walioiva, wamezoeleka na wana mbinu kwa mechi za aina yoyote kama ilivyokuwa kwa Serengeti Boys ya Gabon 2017.

VIJANA WASIVUNJWE MOYO

Watanzania wanabidi wawe nao bega kwa bega muda wote katika mashindano hayo yanayotarajiwa kufanyika mwakani. Ni ngumu na inajulikana hilo kwa mashabiki wa Tanznaia kwamba wamekuwa na moyo mdogo pale timu inapokuwa inafanya vibaya.

Hilo limeonekana katika mchezo wa nusu fainali katika hatua ya kufuzu, kwani Serengeti ilipotolewa na Uganda, Mashabiki walianza kushusha lawama kwa baadhi ya wachezaji pamoja na benchi la ufundi (mwalimu), hafanyi mabadiliko kwa haraka.

Pamoja na hali hiyo, wachezaji wanatakiwa kutovimba kichwa kwa sasa kwa kuwa bado mziki haujachezwa. Mashindano ya Cecafa ni kama kusafisha ukumbi.

BENCHI LA UFUNDI

Kuna haja ya kuitengeneza timu kisasa. Pamoja na Milambo kuwa kocha mkuu, inatakiwa wapatikane wengine. Tayari kuna kocha wa makipa, Manyika Peter, lakini kuwepo wa viungo, awepo wa kunoa mabeki, viungo na mtaalamu wa safu ya ushambuliaji. Kila mmoja akisimama kwenye eneo lake, vijana wataiva.

Mabeki kuna mbinu zake, viungo wanavundishwa watawanye vipi mipira, washambuliaji wao ni kucheza na goli tu. Watupie vipi.

Kocha wa washambuliaji anakuwa na watu wake wanne au sita, anahangaika nao hao, hadi kufuikia 2019 watakuwa wamelizoea goli hadi kupitiliza. Mafanikio hayaji kwa kukimbiakimbia uwanjani kila mara na kuondoka, kesho tena. Lazima kuwepo na program za ufundi kwa kila eneo, makipa, viungo, mawinga na kila hatua.

Akizungumzia timu yake, Milambo anasema amepata vitu vingi vya kuongeza na kupunguza katika kikosi chake kupitia mashindano hayo ya CAF-Cecafa.

Anasema licha ya kwamba kikosi chake tayari kilikuwa kimeshafuzu katika Afcon U-17, walipambana katika kila mechi kupata matokeo.

Kuhusu kuongeza nguvu kwa wachezaji wengine kwenye safu ya ushambuliaji, anasema: “Wachezaji wapo lakini katika Mashindano haya nilikuwa nikiangalia kwanza kupata matokeo safi katika kikosi chake.

“ Sio kama hakuna wengine wa kucheza katika nafasi ile, wapo lakini Agiri na John wao walikuwa wanafanya vizuri katika mazoezi na ndio maana wakawa wanapata nafasi, ngumu Yule ambaye anafanya vizuri mazoeizini ukamuweka nje,” anasema.

MCHAMBUZI MAYAY

Mchambuzi na mchezaji wa zamani wa Yanga, Ally Mayay, anasema TFF wanatakiwa waiunge mkono Serengeti Boys kwa kufuata kanuni na mipango iliyokuwa imeachwa na Kim Poulsen.

“Poulsen alikuwa akishirikiana na Oscar na sasa Oscar ndio kocha mkuu, kwahiyo kinachotakiwa kufanyika kama ilikuwa timu ipate mechi nyingi za kirafiki kama ilivyokuwa kwa Serengeti wa Gabon.

Inatakiwa Serengeti hii, ipate mechi za kirafiki kutoka katika nchi ambazo zimetuzidi na sio sisi tulizozizidi,” anasema.

Mayay aliongeza kwamba Tanzania ikiwa kama ndio wenyeji wanatakiwa kuhakikisha wanafika nusu fainali kama sio kuchukua ubingwa.

“Wadau na mashabiki wanatakiwa kumuunga mkono Mwalimu Oscar Milambo, lakini pia mashabiki wawe pamoja na timu wasiikatishe tamaa zaidi ya kuwashangilia ili timu iweze kupata morali ya kusogea mbele,” alisema.

Monday, August 27, 2018

Liverpool, Arsenal zatakata

 

Unaweza kusema ilikuwa wiki ya Liverpool na Arsenal ambazo zimefanya mambo ya kubadilisha maisha yao.

Kwanza Liverpool, imewanyamazisha wababe wa Manchester United, Brighton kwa kuwafunga bao 1-0 lakini pili, Arsenal kwa mara ya kwanza imeshinda mechi yake ya kwanza Ligi Kuu chini ya Unai Emery.

Kwa upande mwingine, ilikuwa wiki mbaya kwa Everton baada ya Richarlison kulimwa kadi nyekundu mchezo na Bournemouth.

Kingine kilichonogesha wiki, Leicester City imefunga bao la usiku ikiilaza Southampton 2-1 wakati wachezaji 10 wa Huddersfield walitoka sare na Cardiff.

Mapema, wageni wa Ligi Kuu, Wolves waliishangaza Manchester City baada ya kulazimishwa sare ya 1-1, kwa Aymeric Laporte kufunga bao la kusawazisha kuwaokoa mabingwa kutoka kwenye aibu ya kufungwa baada ya Willy Boly kutandika bao la kuongoza.

Mechi nyingine iliyompunguzia machungu kocha wa Arsenal, Unai Emery ni baada ya timu yake kupata ushindi wa mabao 3-1 baada ya kupoteza mechi mbili mfululizo, dhidi ya Man City na Chelsea.

West Ham ilitangulia kufunga bao la kuongoza dhidi ya Arsenal kupitia kwa Marko Arnautovic kabla ya Nacho Monreal kusawazisha na Issa Diop kujifunga akiwa katika harakati za kuokoa shuti ya Alexandre Lacazette na Danny Welbeck kufunga bao la tatu lililohakikishia timu yake ushindi.

Everton ilikuwa ipata ushindi wa mabao 2-0 kwa mbaoa ya Theo Walcott na Michael Keane.

Hata hivyo, Bournemouth, waliokuwa na Adam Smith aliyetolewa kwa kadi nyekundi wakitangulia kufungwa walisawazisha, shukurani kwa mabao matamu ya Joshua King aliyefunga kwa mkwaju wa penalti na Nathan Ake.

Southampton ilianza kufunga bao dhidi ya Leicester kupitia kwa Ryan Bertrand, lakini Demarai Gray akasawazisha bao kwa vijana wa St Mary’s, huku mchezaji wa Saints’ Pierre-Emile Hojbjerg kutolewa nje kwa kadi ya pili ya njano.

Katika dakika ya 92, Harry Maguire aliifungia bao la ushindi Foxes.

Nyota wa Huddersfield, Jonathan Hogg alionyeshwa kadi nyekundu ya moja kwa moja katika mchezo uliomalizika kwa suluhu dhidi ya Cardiff.

Monday, August 27, 2018

UNAWAKUMBUKA?: Walivuma, wakapotea ghafla

 

By Eliya Solomon, Mwananchi

Msimu mpya wa Ligi Kuu Tanzania Bara umerejea na majina kadhaa ya wachezaji wa kigeni kwa Yanga yupo, Herietier Makambo na Simba kuna mtu anaitwa Meddie Kagere.

Makambo ambaye ni mchezaji wa zamani wa FC Saint-Éloi Lupopo ya DR Congo alitua Yanga kama mchezaji huru baada ya mkataba wake na klabu aliyokuwa akiichezea kumalizika.

Mshambuliaji huyo raia wa DR Congo ameonekana kuwa moto wa kuotea mbali na aliweka rekodi katika mchezo wa kwanza wa Yanga wa msimu ambao walicheza dhidi ya Mtibwa Sugar Uwanja wa Taifa jijini Dar es Salaam.

Rekodi hiyo, Makambo aliyoiweka ni ya kufunga bao la kwanza la msimu wa 2018/19 kwa upande wa Yanga ambayo inatajwa kuanza taratibu kurejea kwenye kasi yao ya ushindani.

Meddie Kagere naye aliweka rekodi mbili, Agosti 22 kwenye Uwanja wa Taifa jijini Dar es Salaam, rekodi ya kwanza ilikuwa ni kufunga bao la kwanza la msimu kwa upande wa Simba na nyingine bao lake limekuwa bao la mapema zaidi kufungwa msimu wa 2018/19.

Kagere aliiandikia bao Simba dakika ya pili kwenye mchezo dhidi ya Tanzania Prisons ambao wameuanza msimu bila ya washambuliaji wao hatari wa msimu uliopita, Mohammed Rashid ambaye yupo Simba na Eliuter Mpepo ambaye alitimkia Singida United.

Spoti Mikiki inakuletea nyota wa Kigeni ambao walitua nchini na mbwembwe kibao lakini mwisho wa siku walishindwa kuonyesha makali yao, je!! Kagere na Makambo nguvu zao ni za soda kama waliokuja na kuchemsha?

Kinachoweza kutoa jawabu la Swahili hilo ni muda hakuna kingine zaidi. Kundi la wachezaji wa kigeni waliochemsha nchini linaongozwa na Wabrazil wa Yanga, Andrey Coutinho na Genilson Santos ‘Jaja’ huku kwa upande wa Simba akiwa Laudit Mavugo.

Rostand Youthé/ Yanga

Mkameroon Rostand alijiunga na Yanga, Julai Mosi 2017 akitokea African Lyon ambayo msimu wa 2016/17 ilishuka daraja, kufanya kwake vibaya akiwa na watani hao wa Simba kulimgharimu kipa huyo ambaye mkataba wake umekatishwa wiki chache zilizopita. Akiwa Lyon alionyesha uwezo mkubwa ikiwemo kuwakatalia washambuliaji wa Simba na Lyon kuifunga Simba bao 1-0 na hapo ndipo Yanga ikamchangamkia.

Laudit Mavugo/ Simba

Mavugo alijiunga na Simba, Julai mosi 2016 akitokea Vital’O FC ya nchini kwao Burundi, mshambuliaji huyo alianza kwa kasi na taratibu akaanza kupoteza nafasi ya kucheza mara kwa mara kwenye kikosi cha kwanza cha timu hiyo.

Yahaya Mohammed / Azam

Mohammed ambaye ni raia wa Ghana alisajiliwa na Azam FC, aitokea Aduana Stars, lakini alishindwa kudumu katika kikosi cha Azam FC kutokana na kushindwa kuendana na kasi ya timu hiyo na mwishowe aliamua kurejea kwenye klabu yake ya zamani nchini kwao.

Justine Zulu/ Yanga

Yanga ilimnasa kiungo mkabaji wa ZESCO United, Zulu kwa lengo la kuziba pengo la kiraka Mnyarwanda mwenye asili ya DR Congo, Mbuyu Twite aliyekuwa akifanya vizuri kwenye eneo la kiungo mkabaji.

Kiungo huyo aliyejiunga na Yanga Novemba 30, 2016 aliondolewa kwenye kikosi hicho Januari mosi 2017.

Dan Sserunkuma/ Simba

Dan mwenye umri wa miaka 24, alitua nchini Januari 25, 2015 akitokea Gor Mahia FC ya Kenya kwa mbwembwe zote lakini alishindwa kuonyesha makali yake na kuamua kutimkia zake Armenia kwenye klabu ya Ulisses.

Allan Wanga / Azam

Mshambulizi wa timu ya taifa la Kenya Harambee Stars alionwa na matajiri wa Dar es Salaam, Azam FC alipokuwa anaitumikia timu yake ya Al-Merreikh ya Sudan na akasajiliwa na matajiri hao.

Wanga hakumaliza msimu Azam aliondolewa na baadaye akajiunga na Tusker msimu wa 2016/17 ambapo pia hakuwa na msimu mzuri na kuamua kujiunga na Kakamega Homeboyz ambapo ndio anacheza hadi sasa.

Saimon Sserunkuma / Simba

Mdogo wake na Dan, Saimon naye alichemsha na kaka yake kwenye kikosi cha Simba kwa pamoja msimu wa 2015/16.

Nyota hao waliondoka wakidai soka la Tanzania linamalizwa na mambo ya kishirikina ‘misumari’.

Mara baada ya Dan kutimkia Armenia na baadaye kuzichezea Bandari FC, Ittihad Tange, Express FC na Vipers SC, Saimon alijiunga na Express FC ya Uganda mara baada ya kuondoka Simba.

Genilson Santos ‘Jaja’/ Yanga

Kipindi alichotua Yanga, Marcio Maximo alikuja na wachezaji wawili wa Kibrazil akiwemo Jaja, mshambuliaji huyo alishindwa kuonyesha makali yake akiwa na kikosi hicho na mara baada ya kutimuliwa kwa Maximo naye akatimuliwa.

Raphael Kiongera/ Simba

Ni mshambuliaji ambaye alitua nchini kwa mbwembwe nyingi kama ilivyo kawaida kwa watani Simba na Yanga pale wanapomsainisha mkataba mchezaji kutoka nje ya Tanzania lakini hakuweza kufanya vizuri na baada ya kupata majeraha ndiyo malango wake wa kutokea ulipofunguliwa.

Kiongera alijiunga na Simba akitokea KCB ya nchini Kenya msimu wa 2014/15 hakuweza kudumu kikosini baada ya kupata majeraha na baadae akatolewa kwa mkopo na kurudishwa tena KCB ambapo pia hakudumu na kuamua kujiunga na A.F.C Leopald.

Andrey Coutinho/ Yanga

Coutinho ndiye angalau alianza kuwaingia mashabiki wa Yanga na hata baada ya Maximo kutimuliwa na Jaja alisalia kwa miezi kadhaa kabla na yeye kushindwa kuonyesha makali yake na kupoteza namba ya kucheza kwenye kikosi hicho.

Samuel Afful/ Azam

Afful alisajiliwa na Azam mwanzoni mwa Disemba, 2016 lakini hakufanikiwa kuingia kwenye kikosi cha kwanza cha timu hiyo na mara baada ya mkataba wake kumalizika akaachwa Februari 13, 2018 na kwenda kujiunga na Al-Talaba SC ya Iraq.

Kpah Sherman/ Yanga

Yanga ilimnasa Sherman aliyekuwa na umbile kubwa, 2014 akitokea Cetinkaya TSK ya Cyprus na alipotua alishindwa kuonyesha makali yake ya ufungaji na ilipofika Agosti 2, 2015 Yanga waliamua kuachana naye.

Sherman alitimkia zake Afrika Kusini kwa kwenda kuichezea Black Aces na baadaye akazichezea Santos FC, Cape Town City na MISC-MIFA ya Malaysia.

Stephan Kingue / Azam

Kingue alikuwa mmoja wa viungo bora wakabaji Ligi Kuu Tanzania Bara kipindi alichotua Azam, lakini majeraha yalimfanya taratibu kupoteza ubora wake na hatimaye kuchemka kwenye kikosi cha matajiri hao ambao waligoma kumuongeza mkataba mpya.

Kingue anatajwa kurejea kwao Cameroon kabla ya kiungo huyo kutua Azam Desemba 14, 2016 alizichezea klabu kadhaa nchini kwao zikiwemo Cotonsport na Racing Bafoussam.

Steven Bengo / Yanga

Yanga iliachana na Bengo, 2010 kutokana na kutokuwa na kiwango bora cha kuendelea kuitumikia timu hiyo, majeraha ya mara kwa mara yalihusishwa kuporomosha kiwango cha kungo huyo mzaliwa wa Rugaba nchini Uganda.

Bernard Arthur/ Azam

Arthur aliendelea kuwa kwenye rekodi za wachezaji wa Kighana ambao asilimia kubwa wamekuwa wakishindwa kuonyesha makali yao nchini hasa wale ambao wamekuwa wakisajiliwa na Azam.

Waghana pakee ambao wapo kwenye kiwango bora kwa muda mrefu kwenye kikosi cha Azam ni beki wao wa kati, Yakubu Mohammed na kipa Razak Abalora.

Kilichomtokea Arthur aliamua kukaa chini na viongozi wa klabu yake ya Azam na kuamua kukatisha mkataba wa kuendelea kuitumikia timu hiyo.

Hiyo ni baada ya kuanza kupoteza nafasi ya kucheza mara kwa mara kutokana na kutoonyesha makali katika michezo aliyokuwa akicheza kikosi cha kwanza.

Monday, August 27, 2018

Mo Banka apania makubwa Yanga

 

By Eliya Solomon, Mwananchi

Kiungo wa zamani wa Mtibwa Sugar, Mohammed Issa ‘Banka’ amejawa na shauku ya kuanza kuitumikia Yanga kwenye msimu mpya wa Ligi Kuu Tanzania Bara hadi kutwaa ubingwa.

Banka ambaye amejiunga na Yanga kwa kusaini mkataba wa miaka miwili anauwezo wa kucheza kama kiungo wa kati (8) pia nyuma ya mshambuliaji (10) na hata winga ya kulia au kushoto.

Issa mwenye asili ya Zanzibar amezungumza na Spoti Mikiki na kuelezea mambo kadhaa ambayo wadau wengi wa soka hawafahamu kuhusu yeye hasa alipoanzia kucheza soka.

“Kuna timu moja ya mtaani inaitwa Jamaica ya Zanzibar hiyo ndiyo nilianza kuichezea wakati nikiwa mdogo, 2010 hadi 2013 ambapo nilianza sasa kuangaikia kwa kutafuta timu kubwa ya kuichezea,” anasema Issa.

Changamoto

“Nimepitia mengi sana lakini kikubwa ni changamoto ya kutokuwa na jina kubwa, ilinifanya kuwa na wakati mgumu sana, hakuna aliyekuwa anajali kuhusu mimi mpaka pale atakaponiona nacheza. “Mtibwa nilifanya majaribio na kufuzu ila ilibidi kuanza kuonyesha kwa nguvu zote ili nianze kujijengea jina, kwa kiasi chake nimefanikiwa, ukiwa haufahamiki ningumu sana kwenda sehemu na kupata nafasi moja kwa moja,” anasema.

Mavazi

“Sio mtu wa mambo mengi kwenye mawazi, mara kwa mara navaa tisheti na jinzi ila sio kwamba ndiyo nguo ninazo zipenda, huwa napenda sana kuvaa suti ila tatizo lile ni vazi ambalo huwezi kulivaa kila wakati,” anasema Issa.

Msosi

“Mmmmh!! Huniambii kitu kwenye wali na Samaki, hakuna chakula ninachokipenda zaidi ya hicho” anasema kiungo huyo aliyezaliwa Desemba 17, 1995.

Malengo

“Wachezaji wengi wa hapa nyumbani maisha yao ya mpira huishia Yanga na Simba, sipendi na kwangu iwe hivyo natamani sana kama nitashindwa kufika Ulaya basi nicheze hata Ligi ya Afrika Kusini,” anasema Issa.

Monday, August 27, 2018

Rekodi zinaongea ufunguzi wa Ligi kuu

 

By Oliver Albert, Mwananchi

Hebu jiulize, si wageni wala wakongwe wa ligi, kuna timu imepigwa 3-0? Kuna timu imepigwa zaidi ya mabao mawili? jibu hakuna, matokeo ya mwisho ni timu kufungwa 2-0 lakini zaidi ya hapo ni mabao 2-1.

Majibu ya haraka haraka unaweza kusema ligi ya mwaka huu ni ngumu, kwa kuwa mwonekano wa asubuhi uko hivyo. Lakini kuna upande wa pili.

Unaweza kusema ni nguvu ya soda, kwa kuwa timu bado zina umotomoto wa ligi lakini moto ukipoa zinalegea. Ni jambo la kusubiri.

Mwanzo wa Ligi Kuu

Ligi Kuu Bara imeanza kwa kasi msimu huu huku timu nyingi zikionekana kujipanga vilivyo. Timu nane zimeanza kwa kisindo ligi hiyo kwa kupata ushindi wakati nne zikiambulia sare huku mabao 15 yakifungwa katika michezo ya kwanza.

Timu kama, Azam,Kagera Sugar,Yanga,Biashara United,Stand United, Prisons,Mtibwa,Mbao,Stand United na Mbeya City zilionyesha kiwango kizuri cha soka katika michezo yao wakati Simba, Ndanda,Coastal Union, Lipuli, JKT Tanzania, KMC, African Lyon, Alliance FC, Singida United na Mwadui zilionyesha kiwango cha wastani.

Meddy Kagere na rekodi murua

Mshambuliaji wa Simba, Meddy Kagere ameweka rekodi ya kuwa mchezaji wa kwanza kufunga bao la mapema zaidi kwenye ligi msimu huu akiwa amefunga dakika ya pili tu na kuipa ushindi wa bao 1-0 timu yake dhidi ya Prisons.

Criff Buyoya na Ramadhan Malima-Kadi nyekundu

Criff Buyoya wa KMC na Ramadhan Malima wa Mbeya City hawa wamekuwa na mkosi wa msimu, kwani kuanza na kuanza, wamekuwa wachezaji wa kwanza kuonyeshwa kadi nyekundu msimu huu.

Buyoya ndiye aliyeanza kuonyeshwa kadi katika mchezo ulioanza mapema kati ya KMC na JKT uliomalizika kwa suluhu akifuatiwa na Malima aliyeonyeshwa katika mchezo dhidi ya Azam uliomalizika kwa Mbeya City kulala kwa mabao 2-0.

Malima lipata kadi hiyo baada ya kumfanyia madhambu Tafadzwa Kutinyu katika mchezo ambao timu yake ililala kwa mabao 2-0 dhidi ya Azam.

Eliud Ambokile- Kukosa penalti

Mshambuliaji wa Mbeya City ameweka rekodi ya kuwa mchezaji wa kwanza msimu huu kukosa penalti. Mchezaji huyo alikosa penalti katika mchezo dhidi ya Azam ambao timu yake ililala kwa mabao 2-0.

Penalti hiyo ilitokana na kipa wa Azam, Razack Abalora kumwangusha Chunga Said wa Mbeya City wakati akitaka kuokoa mpira aliouanzisha vibaya ukanaswa na mchezaji huyo.

Yondani na rekodi ya penalti

Beki na nahodha wa Yanga, Kelvin Yondani ameweka rekodi ya kuwa mchezaji wa kwanza msimu huu kufunga penalti.

Yondani alifunga penalti hiyo dakika ya 40 na kuipa ushindi wa mabao 2-1 timu yake dhidi ya Mtibwa Sugar.

Yanga imeonekana ni moto

Yanga ambayo ilikuwa ikipewa nafasi ndogo ya kufanya vizuri msimu huu kutokana na usajili wake kusuasua imeanza ligi kwa moto baada ya kuifunga timu ngumu ya Mtibwa Sugar mabao 2-1 hivyo kuungana na Azam kuwa timu zilizofunga mabao zaidi ya moja mwanzoni mwa ligi.

Mabingwa hao wa zamani wa Ligi Kuu Bara walionyesha soka safi huku mshambuliaji Herietier Makambo akianza kuthibitisha kuwa atakuwa moto wa kuotea mbali kwenye ligi hiyo hivyo mabeki wa timu pinzani wajipange

Simba yawakera mashabiki.

Kama kuna timu ambayo ilifanya mbwembwe za usajili kabla ya msimu wa ligi kuanza basi ni mabingwa watetezi Simba.

Hata hivyo timu hiyo ambayo iliweka kambi Uturuki kwa ajili ya maandalizi msimu iliwakera mashabiki licha ya kupata ushindi wa kwanza wa ligi msimu huu kwa kuifunga bao 1-0 Prisons.

Kiwango kilichoonyeshwa na Simba katika mchezo huo hakikuwavutia mashabiki waliofika uwanjani siku hiyo na hivyo kuibua mijadala mikali kwenye mitandao ya kijamii wakiwaponda wachezaji na benchi la ufundi wakidai inakuwaje timu inashindwa kucheza soka la kueleweka na kupata mabao mengi.

Jambo hilo lilimtoa povu msemaji wa klabu hiyo Haji Manara ambaye alishusha utetezi mzito ingawa hata hivyo bado mashabiki waliendelea kumshambulia.

Kocha wa Simba, Mbelgiji Patrick Aussems amejitetea kwa kusema kuwa hajali kutopata ushindi wa mabao mengi anachoangalia ni kuvuna pointi tatu.

“Nafikiri mashabiki wetu wanapaswa kutulia na kuendelea kuisapoti timu kwani ligi ndio kwanza imeanza.

“Muhimu katika mechi ni kupata pointi tatu iwe tumeshinda bao moja au zaidi. Ligi ni ngumu kila timu imejiandaa hakuna timu rahisi, muhimu ni kupambana kwa nguvu,” anasema Aussems.

Kagera yaendelea kuwa mbabe wa Mwadui

Kagera Sugar imeanza kwa rekodi ya aina yake, imeanza ligi kwa kuongoza huku imeendelea kuwa kiboko ya Mwadui kwenye Ligi Kuu Bara hasa inapocheza katika Uwanja wake wa nyumbani wa Kaitaba Bukoba.

Timu hiyo ilianza ligi msimu huu vizuri baada ya kuichapa Mwadui mabao 2-1 na hivyo kuendelea kuwa kiboko ya timu hiyo kwenye Uwanja wa Kaitaba.

Tangu Mwadui ipande daraja kucheza Ligi Kuu mwaka 2015 haijawahi kupata ushindi au hata sare dhidi ya Kagera Sugar kwenye uwanja huo.Hiyo inakuwa mara ya nne timu hizo kukutana tangu 2015 na mara zote Kagera Sugar ilishinda ikianza kwa bao 2-0,1-0,1-0 na sasa 2-1.

Kocha wa Kagera Sugar, Mecky Maxime amewapa tano wachezaji wake kwa kupata ushindi wa kwanza msimu huu dhidi ya Mwadui huku akikiri ligi ya msimu huu itakuwa moto .

“Hakuna kitu kizuri kama kuanza mchezo wa kwanza wa ligi kwa ushindi kwani inaongeza morali katika kikosi changu. Ligi ya msimu huu itakuwa ngumu sana kwani kila timu imejipanga,” anasema.

Jina la Makambo lachomoza

Wakati ligi inaanza, kuna majina ya wachezaji yalitajwatajwa mno. Majina ya Meddie Kagere, Kichuya, Adam Salamba (Simba), Mrisho Ngassa (Yanga) na Ali Kiba wa Coastal Union lakini jina la Harietier Makambo, limeweka rekodi kwa kutajwa zaidi.

Makambo alisajiliwa kutoka Lupopo ya DR Congo na kutajika kwa kiasi kikubwa kwenye mitandao ya kijamii, magazeti, televisheni na redio.

Makocha wanena.

Kocha wa Singida United, Hemedy Morocco amesema ligi ya msimu huu imeanza kwa kasi na imeonyesha timu zimejiandaa.

“Jinsi ligi ilivyoanza inaonesha kuwa msimu huu mambo yatakuwa balaa, ukizembea basi kazi unayo.

“Licha ya kwamba kuna changamoto ya kukosa mdhamini wa ligi lakini bado timu zote zinapambana kuhakikisha zinafanya vizuri. Kama tukiendelea hivi basi ligi itakuwa na ubora mkubwa,” anasema Morocco.

Naye kocha msaidizi wa Stand United, Athuman Bilal’Billo’ anasema ligi ya msimu huu inaonekana itakuwa tofauti na mwaka jana kwani kila timu haitaki mchezo.

“Huu nimwanzo tu zinatoa picha jinsi mambo yatakavyokuwa magumu. Ukiangalia imeanza na mabao machache tofauti na msimu uliopita. Yaani timu unaona kabisa hata kama imepoteza mchezo basi ni bahati mbaya”alisema Billo.

Kocha wa JKT Ruvu, Bakari Shime anasema bado ni mapema kutabiri Ligi ya msimu huu itakuwaje kwani ndio kwanza kila timu imecheza mechi moja moja.

“Ni mapema sana, tusubiri labda hata tukicheza mechi tano kwa sababu ukiangali kuna timu bado ngeni zinacheza kwa presha, nyingine ni wazoefu wa ligi lakini bado hawajakaa sawa hivyo ni vigumu kutabiri”alisema Shime.

Kocha wa Mbeya City,Ramadhan Nswanzurwimo amelia na waamuzi wa Ligi Kuu kuwa wanatakiwa kuchezesha kwa haki na kuepuka kuwa na matokeo yao mfukoni.

“Ligi imeanza vizuri lakini ukiangalia tayari waamuzi wameshaanza mambo yao ya kuingia kuchezesha wakiwa na matokeo yao jambo ambalo sio zuri. Wafuate sheria na wachezeshe kwa haki ili ligi iwe bora na timu zionyeshe soka ili mwishoni mwa ligi bingwa apatikane kwa haki”alisema Nswanzurwimo.

Monday, August 27, 2018

Kumbe kuna Serengeti Boys nyingine ya ‘Ulaya’!

 

By Eliya Solomon, Mwananchi

Achana na matokeo ya kufungwa 3-1 na Uganda katika nusu fainali, kikosi cha Serengeti Boys, kimekuwa gumzo kutokana na kandanda safi wanalotandaza katika mashindano ya kuwania nafasi ya Afcon U17, yanayoendelea kutimua vumbi nchini kwa ukanda wa Afrika mashariki na kati.

Awamu ya kwanza kwa Serengeti Boys ambayo ipo chini ya kocha mkuu, Oscar Milambo kutandaza soka safi ilikuwa nchini Burundi katika mashindano ya Cecafa U-17 ambako walitwaa ubingwa baada ya kuwalaza Somalia mabao 2-0 katika fainali.

Vijana hao walianza kuonyesha kandanda la kuvutia kwenye mchezo wao wa kwanza katika mashindano hayo dhidi ya Uganda waliotoka nao sare ya bao 1-1, lakini mechi ya pili wakailaza Sudan mabao 6-0.

Katika hatua ya nusu nusu fainali, Serengeti Boys walipata ushindi wa mabao 2-1 dhidi ya Kenya katika mchezo uliopigwa katika uwanja wa Muyinga na baadaye kutwaa ubingwa.

Kabla ya kufungwa kwenye nusu fainali, ilizifuynga Burundi 2-1, Sudan 5-0 na Rwanda 4-0.

Asilimia kubwa ya kikosi cha Serengeti Boys iliundwa na wachezaji wa ndani lakini hapa, Jarida la Spoti Mikiki kama kawaida linakuletea nyota wa Kitanzania wenye umri chini ya miaka 17 ambao wapo kwenye akademi mbalimbali za soka kuanzia Afrika hadi Ulaya.

Nyota hao wanaweza kukiongezea nguvu kikosi cha Serengeti Boys katika Fainali za Afcon ambazo mwakani Tanzania inakuwa mwenyeji.

Samweli George/ Jomo Cosmos, Afrika Kusini

Anamudu kucheza nafasi ya kiungo mchezeshaji au winga wa kushoto na kulia atatimiza miaka 17 mwakani, kinda huyo yupo kwenye kikosi cha vijana cha Jomo Cosmos ya Daraja la Kwanza Afrika Kusini.

Suleyman Juma ‘Aguero’/Royal Lions, Afrika Kusini

Juma ni mshambuliaji mwenye umri chini ya miaka 17 ambaye yupo kwenye Kituo cha Royal Lions cha Afrika Kusini na ndoto yake ni siku moja kuwa mchezaji wa daraja la juu kama ilivyo kwa Mbwana Samatta.

“Afrika Kusini kuna mtandao mkubwa kwa wachezaji kupata nafasi ya kwenda Ulaya tofauti na nyumbani Tanzania naamini muda ukifika kila kitu kitakuwa sawa,” anasema Aguero.

Roberto Nditi/ Reading, England

Roberto (17) ambaye ni mdogo wa Adam Nditi anayekichezea kikosi cha vijana cha Reading chenye umri chini ya miaka 18 angeweza kuanza kutumika kwenye kikosi cha Serengeti Boys kutokana na kuzaliwa kwake Oktoba Mosi, 2000.

Kuanza kulitumikia Taifa tangu ngazi ya chini kungetengeneza mazingira ya kutompoteza mchezaji huyo ambaye amekuwa akifanya vizuri upande wa Ligi Kuu ya vijana nchini England.

Roberto ni beki wa kati mwenye matumizi mzuri ya nguvu na akili na ndiyo maana msimu uliopita licha ya umri wake mdogo aliombwa kuwaongezea nguvu kikosi cha Reading cha vijana wenye umri chini ya miaka 21.

Zion na Paolo Nditi/ Reading, England

Zion na Paolo ni watoto pacha wa Nditi ambao wanaumri wa miaka 13, wadogo hao wa Adam aliyewahi kuwa Chelsea kabla ya kupotea kwenye soka, wapo kwenye akademi ya Reading na kaka yao Roberto ambaye wanatofautiana naye daraja.

Adrian Kitare/ Barcelona, Hispania

Kitare anaweza kuiongezea nguvu Serengeti Boys ya mwakani kama ataaminiwa na kupewa nafasi hiyo, kinda huyo wiki chache zilizopita alitoka kufanya majaribio ya kujiunga na akademi ya FC Barcelona ‘La Masia’.

Kupata nafasi ya kufanya majaribio La Masia lazima mchezaji awe na ushawishi wa uwezo siyo kila mchezaji anaweza kupata nafasi ya kufanya majaribio kwa maana hivyo Kitare kwa umri wake anaweza kushirikiana vyema na Kelvin John anayefanya vizuri kwa sasa kwenye kikosi hicho.

Nasry Aziz/ Aspire, Senegal

Nasry (17) ambaye amewahi kuitwa kwenye kikosi cha Ngorongoro Heroes ana umri ambao utamfanya mwakani kucheza michuano ya mataifa ya Afrika.

Winga huyo wa kituo akademi ya Aspire Football Dream iliyopo katika mji wa Dakar nchini Senegal atatimiza miaka 18 baada ya kumalizika kwa michuano hiyo.

Malimi Majaliwa/ Man City Academy, England

Malimi mwenye umri chini ya miaka 15, aliitwa kwa mara nyingine na Manchester City baada ya kufanya majaribio ya wiki moja miezi kadhaa nyuma na kuambiwa asubiri majibu ya majaribio hayo.

“Kucheza Ulaya ni ndoto yangu na nashukuru sana wazazi wangu nyumbani na familia kwa ujumla kwa kunisapoti na nimetoa ahadi kwao kuwa sintowaangusha upande wa masomo, itakuwa ajabu kuwa mchezaji nisiye na elimu kichwani,” anasema kinda huyo.

Rashidi Udikaluka/ Spittal, Austria

Udikaluka ambaye ni kiungo wa Spittal ya Austria anaumri wa miaka 17, kinda huyo atatimiza miaka 18, Juni 13 kwa maana hiyo atakuwa na uwezo wa kukiongezea nguvu kikosi cha Serengeti Boys ambacho kitachuana kwenye Afcon, Mei 12 hadi 26 mwakani.

Monday, August 27, 2018

NBA imesafisha macho yangu ili nisimulie Watanzania

 

By Nicasius Agwanda

Katika safari isiyokuwa ndefu takribani saa nne na nusu kutokea Uwanja wa Ndege wa Kimataifa wa Julius Nyerere, nilitua kwenye Uwanja wa Ndege wa Kimataifa wa Oliver R. Tambo katika jiji la Johannesburg, Afrika Kusini.

Nilishuka kwa ajili ya kushuhudia na kutoa habari juu ya tukio kubwa la NBA Africa ambalo uhusisha wachezaji wa mpira wa kikapu Ligi ya NBA wenye asili ya Afrika wanaocheza dhidi ya wachezaji waliopo kwenye NBA kutoka katika mataifa mengine.

Kimsingi NBA wanatumia nafasi hii kusaka vipaji, kueneza jina lao kwa maana ya masoko na mahusiano ya umma na mwisho kuendelea kuvutia wawekezaji wengine kwenye miradi yao.

Safari yangu ilikuwa inahusu kazi yangu ya uandishi wa habari lakini ndani ya moyo wangu nilikwenda kujifunza mengi zaidi kuhusu namna wenzetu wanavyojua kuandaa mashindano, tafrija na matukio yao kwa ujumla.

NBA wanafahamu fika kuwa michezo yao mingi Afrika wengi hatutazami kwa sababu ya tofauti ya muda dhidi ya Marekani ambako michezo hii inafanyika hivyo suala la msingi kwao ni kufikia adhira hii ambayo ni kama imejitenga.

Katika kusafisha yangu macho, nimeshuhudia mashindano ya vijana chini ya umri wa miaka 17 yanayoendelea hapa hadi michezo mikubwa inayoandaliwa kwenye soka.

Kama haitoshi, mashindano ya kikapu kuanzia ligi za ndani mpaka michuano ya kimataifa tunayoandaa, na mashindano mengine kama gofu, mpira wa pete, riadha na mingine mingine.

Ukiacha ukubwa wa NBA AFRICA GAME ambayo huuza tiketi zote, huwezi kukuta mechi ya upinzani kati ya Kaizer Chiefs na Orlando Pirates ina ukawaida wa Simba na Yanga. Maandalizi ni ndani na nje ya uwanja kibiashara na wananchi wa Afrika Kusini wameshaaminishiwa kuwa matukio kama haya ni matukio ya kipekee na wanatakiwa kuyakumbatia kwani mara chache hutokea.

Unapotua uwanja wa ndege tu O.R Tambo, unapata hisia za tukio lililokuwepo hapo, watu wa PR na Masoko wanafahamu kazi yao. Uwanja umependeza na mabango, matangazo ya video ya mchezo huo na maelekezo ya mfululizo wa matukio pamoja na majina ya wachezaji mpaka wasanii watakaohusika kisha namna ya wewe kununua tiketi.

Hali hii unaikuta pia kwenye maeneo mengi yenye watu wengi kama Mlimani City zao, Kariakoo zao, Posta zao, vituo vya treni (ambayo kwetu ni vituo vya daladala) na kwenye maeneo mengine mengi. Ukiachana na hilo, kuna kazi kubwa inafanywa ya kuhakikisha matukio haya yana wadhamini (partners) wengi ambao wanatoa fedha nyingi ya kawaida na sio mdhamini mmoja ategemewe kutoa fedha yote.

Hii inatoa nafasi ya kukusanya mapato mengi zaidi lakini kila mdhamini anakuwa amewekewa eneo ambalo anaweza kupata thamani yake na kuonekana kwa chapa yake vyema. Kwenye hili ndio utakuta wiki ya NBA AFRICA GAME inaanzia kwenye kusaka vipaji kupitia vijana kutoka mataifa zaidi ya 30 inayoitwa basketball without borders.

Kwa Tanzania tulikuwa na vijana wawili Jessica Ngisayise na Atiki wakiwa na kocha wao ndugu Bahati Mgunda. Thamani ya kwanza anayopata mdhamini (NIKE) ni vijana hawa wakiwa mafunzoni kutumia vifaa alivyozalisha yeye tu na hakuna ingizo la vifaa vingine. Hapa kimsingi wanakuwa wanafahamu fika namna ambayo kwa wiki nzima watajenga hisia na fikra kichwani kwa hawa vijana takribani 160 kuwa hawa ndo wazalishaji bora wa jezi na viatu.

Lakini pia mashirika ya ndege yanayokuwa yameingia mkataba na NBA yanakuwa yanapewa haki ya kusafirisha vijana hawa. Nina uhakika ukienda leo kumuuliza mmojawapo wa vijana wa Tanzania hawa hawezi kutaja shirika lingine zuri la ndege la kwenda Afrika Kusini zaidi ya hilo lililowabeba. Hii ni thamani ambayo kwenye mashindano ya Tanzania hatujui kutengeneza.

Kisha inafika siku ya mchezo wenyewe ambayo wala hawapati watizamaji wengi kama wanaoweza kuingia uwanja wa Taifa kwa ajili ya mechi ya Simba na Yanga. Wao kwa Marekani watizamaji wao ni elfu ishirini mpaka thelathini na kwa Afrika kwenye mchezo huu huwa ni watizamaji elfu nane mpaka kumi ndo lengo lao.

Kwanini hawawazi viingilio? Sababu pekee ni kuwa tayari wametoa thamani kwa wawekezaji wengi na wameyapa mashindano ukubwa hali inayosababisha fedha ya kiingilio kutokuwa na hitaji lolote la msingi. Hili ni tukio la NBA ambapo kama unahisi ni maarufu unakuwa unajidanganya kwa sababu mchezo wa mpira wa kikapu kwa Afrika Kusini upo nyuma ya Soka, Cricket, na Rugby kwa umaarufu pengine hata na ndondi. Kinachowatofautisha wao na sisi ni jambo moja la ajabu nalo ni umakini katika utendaji kazi basi. Kila jambo lao wanalipa uzito, wanakupa sababu ya kuamini kuwa ni kubwa na la kipekee na kisha wanalipa thamani. Hawana jambo dogo hata kama ni kumpeleka mchezaji kuogelea baharini, watataka kukuthibitishia kuwa Yule mchezaji inabidi alipwe na bodi ya utalii kwa sababu anatangaza hilo eneo. Huu umakini sisi hatuna.

Nani alitudanganya kuwa mapato ya viingilio ndio chanzo kikuu cha mapato? NBA wametoka marekani wakaja kufanya balaa Afrika Kusini, wanaweza pia kuja Tanzania na wakafanya kubwa zaidi na hawayafahamu mazingira yetu lakini sisi hatuwezi. Umakini wetu upo chini mno. Nimesafisha macho, nimejifunza, nimefurahi na nimeona nizungumze na Watanzania kuhusiana na umakini na kufahamu namna ya kupangilia mipango yetu.

Monday, August 27, 2018

MZOZO: Kuna Paul Pogba, kuna Jose Mourinho na kuna Ed Woodward

 

Manchester, England. Hali ni tete huko kwenye viunga vya Old Trafford. Lilianza bifu la Jose Mourinho na Poul Pogba, hata kutaka kuamua kutimka pale Old Trafford.

Baada ya mechi ya kwanza na Leicester City walioshinda kwa mabao 2-1, Pogba alinukuliwa akisema kuwa kuna mambo yanaendelea, lakini hataki kuyasema na akisema atatozwa faini.

Kauli hiyo ilimkera mno kocha wake, Jose Mourinho, akatoka hadharani na kusema kama Pogba anataka kuondoka aandike barua ya kuondoka na anaweza tu kuondoka hakuna shaka.

Muda si muda, Mourinho akaibuka hadharani na kusema hakuwahi kukwaruzana na Pogba, wanaelewana vibaya mno na katika kipindi hiki, huwaambii kitu, wanapatana mbaya.

Alisema ataendelea kumpanga, atampa ushirikiano na wanaelewana kwani hata baada ya kurejea kutoka katika mapumziko ya Kombe la Dunia, ana siku tatu, alimuuliza kama yuko fiti acheze, akamkubalia na akampa dimba kwa dakika 80.

Baada ya hapo, likaibuka jingine. Manchester ilipigwa 3-1 na Brington, safari hii mziki ukahamia kwa mmoja wa vigogo wa klabu hiyo, Edward Gareth Woodward.

Mourinho amekuwa akilalamikia mabosi wake kwa kushindwa kumletea mabeki aliowataka na kusema timu hiyo itakuwa na msimu mmoja wa ovyo. Watafanya vibaya kutokana na ngome kuyumba na zaidi ni mabosi wake kumchunia usajili.

Ed Woodward aliibuka na kusema, alifanya makusudi kumchunia Mourinho kusajili, akidai alitaka awatumie mabeki waliopo ambao hata yeye (Mourinho) hawaamini tena. Bado Ed Woodward amemkalia kooni.

Mourinho alivyolimaliza la Pogba

Mwanzoni ilikuwa iko hivyo kuwa uhusiano wa Pogba na Mourinho ulitikiswa. Kiungo huyo aliyefanya mambo makubwa wakati akiitumikia, Juventus ya Italia kati ya mwaka 2012 na 2016 na kumshawishi Mourinho kumrejesha Old Trafford alipomsajili kwa ada iliyovunja rekodi ya Dunia ya Pauni 89 milioni mwaka 2016.

Hata hivyo muda mfupi baada ya kurejea Old Trafford, Pogba akaanza kukwaruzana na Mourinho kutokana na tabia yake ya utukutu nje ya uwanja ikidaiwa amekuwa mtu wa kujirusha na kukesha kwenye klabu za usiku bila kujali kuwa timu yake inakabiliwa na mechi muhimu za Ligi.

Katika msimu uliopita Mourinho alifikia hatua ya kumuweka benchi mchezaji huyo katika michezo kama njia ya kumrekebisha, hata hivyo haikumbadili chochote.

Mchezaji huyo ambaye anaonekana kuathiriwa na utoto na umaarufu alionao, anadai kuwa anacheza muziki ili kujipongeza baada ya kazi kubwa anayoifanya uwanjani na haendi huko kwa ajili ya starehe wala uhuni.

Kitendo cha kuwekwe benchi kikawafanya wengi kuamini kuwa kiwango chake kimeshuka lakini kile ambacho Pogba alikifanya kwenye kikosi cha timu ya Taifa ya Ufaransa katika fainali za Kombe la Dunia 2018, aliiwezesha nchi hiyo kutwaa taji huku akitajwa kwenye kikosi bora cha Dunia, jambo lililowafanya wengi kujiuliza kwa nini hakufanya vitu adimu kama hivyo akiwa na United.

Akijua nini kinaendelea kati yake na Mourinho, Pogba alimwambia wakala wake Mino Raiola, azungumze na klabu ya Barcelona kama itamuhitaji izungumze na United haraka atue Nou Camp, kwani hana furaha Old Trafford, mazungumzo yalifanyika na makubaliano yakafikiwa pia.

Hata hivyo Mourinho akaweka ngumu kumuuza, hadi dirisha la uhamisho kwa England likafungwa, lakini baada ya timu hiyo kucheza mechi moja tu ya Ligi Kuu England, mambo yameharibika tena na wawili hao wamebwatukiana tena.

Kwa desturi ya Mourinho akitofautiana na mchezaji humuadhibu kwa kutompanga katika mechi bila kujali timu itapata matokeo gani. Katika kuonyesha kuwa Pogba anajua anachokifanya, alisema hataka kama atawekwa benchi hatakubali kiwango chake kishuke, atajifua vya kutosha ili kuhakikisha anakilinda.

Katika kinachoonekana kuwa ni kukwepa majibizano ya moja kwa moja na Mourinho, Pogba mwenye miaka 25, jana alisema anadhani ni vizuri mazungumzo yote kuhusiana naye yapitie kwa wakala wake Mino Raiola.

Monday, August 27, 2018

Sekta ya michezo ina majibu mepesi yasiyojibiwa



Allan Goshashi

Allan Goshashi 

Kamwe sitachoka kuuliza hivi Tanzania tumefanya dhambi gani katika ardhi yetu yenye rasilimali nyingi ambazo zingeweza kusaidia katika sekta mbalimbali ikiwamo michezo?

Je, ni kwa nini Serikali haitaki michezo iwe ni moja ya kipaumbele chake katika mipango ya taifa ili kuiondoa michezo katika kundi la ajira zisizo rasmi?

Hivi Serikali haitambui kwamba michezo nchini haiwezi kufanikiwa bila Serikali kutia mkono? Je, ni kwa nini Serikali haitaki kuibadilisha sera ya maendeleo ya michezo nchini ambayo imepitwa na wakati?

Je, hivi Serikali Kuu haioni Halmashauri za Miji, Manispaa na Vijiji zinabadilisha matumizi ya maeneo ya wazi na viwanja vya michezo kuwa sehemu za biashara? Hivi ni kweli hakuna kiongozi wa Serikali anayeweza kuvirudisha viwanja hivyo kutumika kwa shughuli za michezo?

Je, kwa nini hatupati viongozi serikalini watakaojenga vituo vya michezo katika kila Wilaya? Je, ni kwa nini hatupati viongozi serikalini watakaowahamasisha Watanzania mijini na vijijini kuwa na viwanja vipya vya michezo kwa ajili ya watoto wao mitaani mwao?

Hivi ni kwa nini Serikali yetu haijiulizi kwa nini michezo nchini imekosa mikakati ya kibiashara, wadhamini na viongozi weledi? Pia, ni kwa nini wawekezaji wa ndani na nje ya nchi hawawekezi fedha zao katika sekta ya michezo nchini?

Je, ni kweli Baraza la Michezo la Taifa (BMT) linakidhi mahitaji ya wakati tulio nao? Ni kwa nini Wizara inayohusika na michezo isiwe ni Wizara ya Michezo na Utamaduni tu?

Je, ni kwa nini shule za msingi na sekondari nchini zinakosa viwanja vya michezo? Au ni kwa nini zile baadhi ya shule zenye viwanja vya michezo vinabadilishwa matumizi?

Je, ni kwa nini hatuyaboreshi mashindano ya Umitashumta na Umisseta? Je, ni kwa nini katika ngazi ya Wilaya, Mkuu wa Wilaya asihamasishe mashirika, viwanda na wafanyabiashara kudhamini mashindano hayo ya Umitashumta na Umisseta? Na kwa nini isifanyike hivyo hivyo katika ngazi ya Mkoa?.

Je, Serikali haioni kwamba kuna upungufu mkubwa wa makocha katika shule za sekondari na shule za msingi nchini? Je, Serikali haioni somo la michezo linahitajika kufundishwa katika shule za msingi mpaka sekondari kama masomo mengine?

Je, kwa nini Serikali inataka tufanye vizuri katika mashindano ya Afrika, Dunia, michezo ya Jumuiya ya Madola au michezo ya Olimpiki wakati inajua haina mfumo wa kumuandaa mwanamichezo nchini kutumia kipaji alichopewa na Mwenyezi Mungu kujikwamua katika lindi la umaskini?

Hivi ni kwa nini Serikali inakwepa gharama ya kuandaa wanamichezo wetu?, Je, haifahamu kwamba haiwezi kukwepa jukumu la kuweka miundombinu ya michezo tofauti tofauti nchini?

Je, ni kitu gani kinachowazuia wabunge kufanya kazi yao ya kuisimamia Serikali ili iweze kutenga kiasi kikubwa cha fedha katika miradi ya maendeleo ya michezo kama kuweka miundombinu ya michezo?

Je, viongozi wa michezo nchini wanajua majukumu yao kama viongozi wa michezo? Je, wanajua matatizo, changamoto na vikwazo vya maendeleo ya michezo nchini? Je, viongozi wetu wa michezo ni sehemu ya suluhisho au ni sehemu ya tatizo? Je, wana mipango bora ya kuwa na vyanzo vya mapato? Je, wana program bora za vijana na grassroots?

Nimalizie kwa kuuliza tena swali hili, Je, Tanzania tumefanya dhambi gani katika ardhi yetu yenye rasilimali nyingi ambazo zingeweza kusaidia sekta mbalimbali ikiwamo michezo?

Monday, August 27, 2018

Mambo nane yanayochochea majeraha kupona kwa haraka



Dk Shita Samwel

Dk Shita Samwel 

Tunapofanya mazoezi ya kila siku au kushiriki mashindano mbalimbali ni kawaida mwili kupata majeraha madogo madogo, ya kati mpaka makubwa ambayo yanatupa maumivu na homa.

Majeraha hayo yanaweza kuwa ya tishu laini ya wazi yenye mchaniko ama michubuko au kidonda, yanaweza kuwa butu yasiyo ya wazi, ya kuvunjika au kuteguka na pia yakawa mchanganyiko wa vyote.

Mambo 10 yafuatayo yanaweza kufanywa na majeruhi wa michezo ili kuongeza kasi ya uponaji wa majeraha kwa wakati.

Moja, kuacha mara moja kufanya mazoezi au shughuli zozote zinazoweza kusababisha kujitonesa, kujijeruhi au kupata jeraha jipya. Kupumzika sehemu salama na kulala masaa 6-8 kwa usiku mmoja.

Mbili, kushikamana na ushauri na matibabu ikiwamo matumizi sahihi ya dawa za mumivu, zakuzuia maambukizi na matumizi ya vidonge vya virutubisho maalum.

Tatu, utulivu wa kiakili unahitajika kwani shinikizo la kikakili au msongo wa mawazo huathiri kinga ya mwili ambayo ndiyo nguzo muhimu katika kukarabati na kulinda jeraha. Epuka mambo yote yanayokutikisa kiakili.

Nne, kuzingatia maonyo na makatazo yote ikiwamo mitindo mibaya kimaisha kama vile ulevi wa pombe, matumizi ya tumbaku na dawa za kulevya kwani vinaudhoofisha mwili na kuchelewesha uponaji.

Tano, kuzingatia usafi wa mwili ili kuepukana na uvamizi wa vimelea vya maradhi mengine ambayo uwepo wake unaudhofisha mwili kiafya hivyo kuchelewesha uponaji.

Sita, kuwa na mawasiliano ya karibu na wataalamu wa afya pamoja na wakufunzi wa michezo lengo ni kupata taarifa muhimu za tatizo lako na ushauri wa haraka pale unapoona viashiria au dalili zisizo za kawaida.

Saba, kula mlo kamili wenye vyakula mchanganyiko kwani mwili unahitaji virutubisho kwa wingi kwa ajili ya seli kufanya kazi ikiwamo kukarabati jeraha.

Virutubisho au viini lishe vinapatikana katika makundi saba ya vyakula ikiwamo protini, wanga, mafuta, mboga, matunda, vyakula vya nyuzi nyuzi na maji.

Wanga ni pamoja na ugali wali, viazi, ndizi na mihogo na vya mafuta ni kama vile mafuta ya mimea na wanyama. Vyote hivi hutupa nguvu na joto.

Protini ni kama vile samaki, kuku, nyama na jamii ya maharage. Vyakula hivi kujenga mwili na hivyo kusaidia jeraha kukarabatiwa na kupona haraka.

Mboga na matunda hutupa maji, vitamini, madini na virutubisho asili ambavyo ni muhimu kwa kujenga kinga imara ya mwili.

Kunywa maji safi na salama angalau lita 1.5-3 ili kuzuia upungufu wa maji na madini ambao unaweza kusababisha kukamaa misuli hivyo kujijeruhi zaidi.

Angalizo, vyakula hivi vinatakiwa kuandaliwa kwa kuzingatia kanuni za afya.

Nane, dhibiti kuongezeka uzito au kunenepa kiholela kwa kuepuka kula vyakula vyenye wanga nyingi, mafuta mengi na sukari nyingi ikiwamo vile vya mtaani, migahawa yakisasa na vya makopo.

Kumbuka uzito au unene mkubwa unaupa mwili shinikizo kubwa na hivyo kuwa katika hatari ya kujijeruhi. Pima uzito mara kwa mara ili kubaini hali hii.

Monday, August 27, 2018

Hapa Tamisemi wanakwepaje lawama kwa mfano



Ibrahim Bakari

Ibrahim Bakari 

Katika eneo ambalo limesahaulika ama halipewi sana uzito, ni hili la michezo. Kama chama cha michezo hakikuchangamka, basi kisitarajie kama kutakuwa na mkono mwingine wa kuwabeba.

Ukiachana na vyama vya michezo au mashirikisho, iko tofauti katika maeneo mengine. Mfano, ninachofahamu katika Michezo ya Shule za Msingi na Sekondari, inaratibiwa na Ofisi ya Rais, Tawala za Mikoa na Serikali za Mitaa, Tamisemi.

Napongeza katika hili. Michezo imekuwa ya ufanisi, nafahamu kuna kasoro, na inafahamika kwamba palipo na wengi si lazima mambo yote yasimame kwenye mstari.

Mikoa imekuwa ikitengeneza timu zake na Tamisemi inamaliza mchezo mzima kwa michezo ya fainali ambayo ndiyo ngazi ya taifa.

Michezo hiyo inafanyika na ndiyo tunayoiona Serengeti Boys hii inayotesa kwenye Michuano ya CAF-Cecafa inayoendelea na tuliambiwa wakati ule inafanyika Mwanza kuwa wachezaji kadhaa watachomekewa. Safi, hapa kazi imefanyika kwa hivyo tulivyoambiwa.

Pamoja na yote, kuna jambo moja nimeliona nataka kulisemea, Tanzania kushindwa kupeleka Rwanda wanamichezo wa Shule za Sekondari kwa michezo ya shule kwa nchi za Afrika Mashariki na Kati iliyomalizika huko wikiendi iliyopita.

Mashindano hayo yalifanyika Musanze nchini Rwanda, huku Kenya ikitwaa ubingwa wa jumla. Wakenya waliendeleza rekodi yao ya kutawala kanda hii kwa kufanya vizuri katika mashindano haya ya 17.

Kenya ilitwaa medali 28, kati ya hizo 10 za dhahabu, nane za fedha na 10 zingine za shaba wakati Uganda ilimaliza nafasi ya pili, walinyakua medali tisa za dhahabu, 10 za fedha na sita za shaba.

Wenyeji Rwanda walimaliza wa tatu na medali 16; nne za dhahabu, tano za fedha na saba za shaba.

Ilinisikitisha kusikia Tanzania haikupeleka wanamichezo wake ambao tuliwatengeneza katika Umitashumta na Umisseta mbili zilizofanyika Mwanza.

Mbali na Tanzania, mataifa mengine ya Afrika Mashariki ambayo hayakushiriki pia ni pamoja na Burundi na Sudani Kusini ambao walijiondoa kwa sababu zao za kibinafsi.

Ninakumbuka Kenya waliwahi kuandaa Tanzania ikapeleka wanamichezo wake na ilitumia pia michezo ya 2014 mashindano yaliyoandaliwa nchini Tanzania.

Ninachotaka kusema hapa ni kwamba tumewanyima haki wanamichezo wetu ambao ni wanafunzi kwenda kuonyesha umahiri wao.

Kama inavyoeleweka ni kwamba Michezo ya Umisseta ndiyo ya kutengeneza njia ya wanamichezo wa kutoka katika maeneo mbalimbali Tanzania.

Mfano, michezo huanzia ngazi ya wilaya hadi mkoa, sasa, hapo wanapatikana wanamichezo wa moja kwa moja.

Nakumbuka gazeti hili ndilo lililopeleka mwandishi wa kuripoti michezo hiyo Mwanza, Umisseta na Umitashumta na aliripoti rekodi mbalimbali kuvunjwa.

Kuna mikoa ilitengeneza rekodi zake, wanamichezo walifanya maajabu na wapo ambao vipaji vilionekana.

Sasa wale walitakiwa kwenda kuonyesha kweli wana vipaji, walitakiwa kwenda kuonyesha kuwa waliowateua hawakukosea.

Kenya wametwaa ubingwa wa jumla, Uganda na Rwanda ya tatu, ninaamini Tanzania ingekuwa ya kwanza na kuendeleza ubabe wa ukanda huu wa Afrika Mashariki kwani Kilimanjaro Queens mabingwa, Serengeti Boys mabingwa, Azam FC mabingwa hata hawa wangekuwa mabingwa tu. Kwa hapa Tamisemi wanakwepaje lawama?

Monday, August 20, 2018

Lionel Messi amchanganya dogo wa Tanzania huko Hispania

 

By Eliya Solomon, Mwananchi

Miaka kadhaa nyuma kulikuwa na ugumu kwa wachezaji wa Kitanzania kupata nafasi za kwenda kufanya majaribio ya kujiunga na klabu mbalimbali barani Ulaya.

Maisha yamebadilika na kama milango kwa nyota wa Kitanzania imefunguka maana kila kukicha kumekuwa na nafasi kadhaa ambazo zimekuwa zikijitokeza kwa nyota hao.

Hivi karibuni kinda la Kitanzania, Adrian Kitare lilitua Hispania kufanya majaribio ya kujiunga na akademi ya FC Barcelona ambayo inafahamika zaidi kama La Masia. Achana na Farid Mussa na Shaaban Idd Chilunda ambao wako CD Tenerife.

Spoti Mikiki imeongea na Kitare ambaye ametembelea ofisi zetu zilizopo Tabata jijini Dar es Salaam, mara baada ya kurejea na kuelezea mchakato mzima ulivyokuwa hadi akapata nafasi hiyo adhimu ambayo anadai ameitumia vyema.

Kitare anasema kuwa aliyehusika moja kwa moja ni baba yake ambaye siku zote anadai amekuwa mstari wa mbele kuhakikisha anafanikisha ndoto zake za kucheza soka Ulaya.

“Baba alianza kuniombea nafasi Marekani kwenye kituo chao kidogo, lakini mambo hayakwenda sawa na nikakosa visa, ikabidi tuombe nafasi ya upendeleo Hispania.

“Walitaka vielelezo vyangu kama vile picha na video zikionyesha uwezo wangu, haikuwa kazi kubwa maana tayari video nilikuwa nazo nyingi na nilizitengeneza nikiwa kwenye akademi ya Sunderland ile ya JKYP pale Kidongo Chekundu,” anasema.

Baada ya kutuma video zake, Kitare alikubaliwa kwenda Hispania kufanya majaribio hayo ambayo yalikuwa ni ya wiki moja kasoro.

Alitua Hispania na mara moja akaanza majaribio hayo akiwa na nyota wengine kutoka kwenye mataifa kama Argentina, Brazil, Denmark na kwingineko.

Kitare ambaye anamuda ushambuliaji, anasema alikuwa mchezaji pekee kutoka Afrika na hakukutana na changamoto ya lugha kutokana na waongoza majaribio hayo kuzungumza Kingereza na Kihispania.

“Tulikuwa tukifanya majaribio ya namna nyingi, nadhani hata nje ya uwanja walikuwa wakitupima maana nilikuwa nikiwaona wanarekodi vitu kwenye karatasi zao kipindi ambacho tulikuwa tukipiga stori nao za kawaida.

“Nidhamu na yenyewe walikuwa wakiipa kipaumbele kuna muda walikuwa wakiwatumia vijana wengine ambao wapo nje ya majaribio kwa lengo la uchokozi lakini nilitambua nini ambacho kimenipeleka pale, sina wepesi wa kuchukia kwa hiyo niliishia kucheza na kuachana nao,” anasema.

Kitare ambaye ni mwanafunzi wa kidato cha tano, St Mary ya Tabata anasema uwanjani walikuwa wakitazamwa namna ambavyo wanaachia mipira kwa wakati na walivyokuwa wakicheza kwenye nafasi.

Kinda huyo anasema kucheza kwa nafasi ni miongoni mwa vitu ambavyo alikuwa akifundishwa kwenye kituo cha Sunderland kwa hiyo hakikuwa kitu kipya kwake.

“Mjaribio yalienda hivyo kuanzia siku ya kwanza, lakini katika majaribio hayo kuna kipindi tulikuwa tukijigawa na kucheza kupasiana, kilichokuwa kikifanyika ni kwamba timu iliyokuwa inapiga pasi 15 bila ya mpira kuguswa ni bao.

“Lengo nadhani lilikuwa kwenye kuona ni kwa namna gani tulichokuwa tukikifanya cha kucheza kwenye nafasi tunaweza kukifanyia kazi, nilikuwa nikifungua na kuomba pasi na kuachia, sikutaka mambo mengi kwa kupiga vyenga,” ansema.

Kitare anadai walicheza mchezo wa kirafiki dhidi ya kituo kingine cha FC Barcelona ambao hakuwatambua kama nao walikuja kufanya majaribio au walikuwa ni wachezaji wao ambao wapo kwenye akademi.

Katika mchezo huo wa kirafiki, kinda huyo wa Kitanzania anasema alicheza na kufunga mabao mawili kati ya matano ambayo walishinda dhidi ya vijana wenzao na mwishowe akahojiwa na chombo kimoja cha habari.

Kabla ya kumalizika kwa majaribio, Kitare anasema walipata nafasi ya kumuona nyota wa Barcelona, Leonel Messi kwa mbali akiwa anaripoti kwa ajili ya maandalizi ya msimu mpya wa Ligi Kuu Hispania maarufu kama La Liga.

“Wenzangu walichachamaa wakagoma kuingia kwenye gari na wakaanza kumshangilia Messi ndipo aliposimama na kutupungia mkono huku akitabasamu baada ya hapo akaondoka ndipo wenzangu walipoingia kwenye gari.

“Nilitamani kumshika mkono kwa sababu ni mchezaji ninaye mpenda ila mazingira hayakuruhusu maana kulikuwa na uzio hata hivyo nilifurahi kumuona,” anasema kinda huyo.

Kitare anasema matarajio yake ni kupata nafasi ya kujiunga na akademi hiyo na kama asipopata atatumia mawasiliano aliyoyapata kwenye majaribio hayo kwa kuangalia uwezekano wa kujiunga na timu nyingine.

Dogo huyo anaweka wazi kuwa wakati alipokuwa akifanya majaribio alipata mawasiliano ya watu ambao walionyesha kuvutiwa na kiwango chake.

“Mzee ndiye msimamizi wangu kwa hiyo ataangalia kipi ni sahihi kwa wakati huo baada ya kutoka kwa majibu,” anasema Kitare mwenye umri wa miaka 17.

Ndoto kubwa za kinda huyo ni kupasua anga kwa kucheza soka la kulipwa barani Ulaya kama ilivyo kwa nahodha wa Taifa Stars, Mbwana Samatta anayekipa KRC Genk ya Ubelgiji.

Monday, August 20, 2018

Ronaldo aliamsha Serie A bila bao

 

Mshambuliaji wa Juventus ya Italia, Cristiano Ronaldo ameshindwa kufumania nyavu wakati akiliamsha katika Ligi Kuu ya Italia ya Serie A wakati timu yake ya Juventus ikiibuka na ushindi wa mabao 3-2 dhidi ya Chievo.

Real Madrid wameanza ovyo maisha bila Ronaldo kwa kufungwa mabao 4-2 na Atletico Madrd katika Uefa Super Cup, lakini Ronaldo mambo yake yalianza kwa neema baada ya kuibuka na ushindi huo wa mabao 3-2.

Kocha wa timu hiyo, Carlo Ancelotti naye ameanza maisha mapya Napoli kama kocha baada ya timu yake kuibuka na ushindi wa mabao 2-1 dhidi ya Lazio ikiwa ni mechi za ufunguzi wa msimu wa Ligi Kuu ya Italia, 2018-2019.

Ronaldo, 33, alijiunga na miamba hiyo ya Turin akitokea Real Madrid mwezi uliopita kwa dau la Pauni 100 milioni aliisaidia timu yake kushinda licha ya kuwa alipoteza nafasi nne muhimu za kufunga.

“Nimefurahi tumepata ushindi wa kwanza nikiwa na jezi ya Juve!” Ronaldo ali-tweet kwenye mtandao wake baada ya mchezo.

Mshambuliaji wa Italia, Federico Bernardeschi alifunga bao la ushindi dakika za majeruhi baada ya kipa wa Chievo, Stefano Sorrentino kugongana na mfungaji na kuwahishwa hospitali baada ya kupata maumivu makali.

“Kila mmoja alikuwa anasubiri bao lake. Ni aibu hakufunga lakini kikwazo kilikuwa kipa Sorrentino, alizuia michomo yake mingi tu...kimsingi amefurahi kwa kuwa tumeshinda,” anasema kocha wa Juventus, Massimiliano Allegri.

“Nimefurahishwa na kiwango chake na nimefurahishwa kwa jinsi alivyokuwa akicheza.”

“Bado tunaendelea kumsoma Ronaldo. Amecheza vizuri na (Paulo) Dybala leo na nimeridhishwa na kiwango chake alichoonyesha kwenye timu.”

Beki wa kushoto wa Brazil, Alex Sandro aliongeza kusema: “Nilikuwa nasikia amani sana kucheza naye (Ronaldo), na ni bonge moja la mchezaji.

“Tunafahamiana, na kwa kadri tutakavyozoeana, tutatengeneza timu moja matata. Tutakwenda vizuri tu.”

Katika mchezo huo, alikuwa Sami Khedira aliyefunga bao la kwanza katika mchezo huo uliofanyika kwenye Uwanja wa Bentegodi.

Emanuele Giaccherini aliifungia Chievo bao la pili dakika ya 56 lakini Mattia Bani akasawazisha na kuwa 2-2 kabla ya Bernardeschi kufunga dakika za mwishomwisho.

Matokeo mengine ya Serie A, Napoli ikiwa ugenini iliichapa Lazio mabao 2-1.

Monday, August 20, 2018

MAANDALIZI 2019 Utaipenda tu Serengeti Boys

 

By Charles Abel,Mwananchi cabel@mwananchi.co.tz

Ukiwaangalia Serengeti Boys wanavyocheza, wanavyoshinda na wanavyoonana, utatamani mpira usimalizike lakini Fifa wameweka dakika 90 labda iwe mashindano hadi dakika 120.

Hiyo ndiyo Serengeti Boys, timu ya Taifa ya vijana wenye umri chini ya miaka 17 ya Tanzania ambayo kesho inacheza na Rwanda mechi yake ya kusaka wa kwanza na wa pili katika Kundi A.

Tanzania na Rwanda zimeshafuzu kutoka kundi lao wakisubiri timu nyingine kutoka Kundi B.

Gumzo kila kona

Timu hii imegeuka gumzo kwenye mashindano ya kuwania kufuzu Fainali za Mataifa ya Afrika kwa vijana wenye umri huo kupitia Ukanda wa nchi zinazounda Baraza la Vyama vya Mpira wa Miguu Afrika Mashariki na Kati (Cecafa) yanayoendelea jijini kutokana na kiwango na matokeo bora ambayo wamekuwa wakiyapata.

Serengeti Boys inaongoza Kundi A la mashindano hayo ambayo mshindi wake atafuzu Fainali za Afrika mwakani ikiwa na pointi sita sawa na Rwanda inayoshika nafasi ya pili ingawa inabebwa na utofauti mzuri wa mabao ya kufunga na kufungwa iliyo nayo tofauti na wapinzani wao.

Mchezo wa kwanza iliibuka na ushindi wa mabao 2-1 dhidi ya Burundi kwenye Uwanja wa Taifa jijini kabla ya kupata ushindi mnono wa mabao 5-0 mbele ya Sudan katika mechi ya raundi ya pili ya kundi lake iliyochezwa Alhamisi ya wiki iliyopita.

Hata hivyo Serengeti Boys inashiriki mashindano hayo kama sehemu ya mazoezi tu kwani tayari imeshajihakikishia kufuzu Fainali za Afrika zitakazofanyika nchini mwakani kwa sababu zitaandaliwa hapa nchini hivyo na kikanuni, timu mwenyeji huwa inafuzu moja kwa moja.

Kiwango bora cha Serengeti Boys katika mashindano hayo kimetokana na muunganiko mzuri ambao timu hiyo imekuwa nao kuanzia kwenye safu ya ulinzi hadi ile ya ushambuliaji, jambo ambalo limeifanya iwe moto wa kuotea mbali katika kutengeneza nafasi na kufunga mabao lakini pia limepelekea kikosi hicho cha timu ya vijana wenye umri chini ya miaka 17 cha Tanzania kuwa miongoni mwa timu zenye safu imara zaidi za ulinzi, ikiwa imeruhusu nyavu zake kutikiswa mara moja tu.

Mbinu ambayo imekuwa chachu ya mafanikio kwa Serengeti Boys katika mashindano hayo ni ile ya kucheza soka la pasi nyingi zinazoanzia kwenye safu yake ya ulinzi kuelekea langoni mwa timu pinzani ambazo hupigwa huku wachezaji wa timu hiyo wakiwa wanapishana kwa haraka kwenye nafasi kwa lengo la kuchanyanya mabeki na kufungua ukuta wa wapinzani wao.

Kasi na uamuzi wa haraka ambao wachezaji wa Serengeti Boys wamekuwa nao, umesaidia kuifanyia kazi kwa ustadi mbinu hiyo ambayo imekuwa ikizaa matunda kwani mara kwa mara imekuwa ikiifanya mara wapinzani wao wasiwe wanashambulia na badala yake hulazimika kutumia muda mrefu wakiwa kwenye lango lao ili kudhibiti vijana hao wa Tanzania wasilete madhara.

Pindi Serengeti Boys inapokuwa na mpira, mawinga wake wamekuwa wakiingia ndani na kuacha nafasi kwa mabeki wa pembeni kupanda kwa kasi kupiga krosi au kutengeneza mashambulizi kutokana na pasi ambazo wamekuwa wakipigiwa na wachezaji wanaocheza safu ya kiungo.

Lakini pale wanapopoteza au mpira unapokuwa miguuni mwa timu pinzani, nyota hao wa Serengeti Boys wamekuwa ni wepesi kurudi kwa haraka nyuma kuwahi kuziba mianya ambayo inaweza kuwavutia wapinzani wao kutengeneza nafasi na kufunga mabao, mbinu ambayo imekuwa ikichangia lango lao kuwa salama katika sehemu kubwa ya mchezo.

Nyuma ya mafanikio haya ya Serengeti Boys liko benchi la ufundi linaloongozwa na Kocha Mkuu, Oscar Milambo anayesaidiwa na nyota wawili wa zamani wa Yanga, Maalim Salehe (Kocha Msaidizi) na Kocha wa Makipa, Manyika Peter.

Nyota muhimu

Sifa kubwa ya Serengeti Boys hii ya sasa ni kucheza kitimu lakini bado kuna nyota ambao kwa kiasi kikubwa wamekuwa ndio wakiiendesha timu kutokana na uwezo wao wa kusoma mchezo na kuwaongoza wenzao ndani ya uwanja katika kutengeneza mashambulizi na kumiliki mpira ambao ni viungo Morice Abraham, Mustafa Nankuku pamoja na mshambuliaji Kelvin John.

Mustafa Nankuku anayecheza namba sita, amekuwa na uwezo wa hali ya juu wa kung’amua mashambulizi pamoja na kutibua mipango ya timu pinzani lakini pia amekuwa na sifa ya kuchezesha timu kwa pasi zake ambazo zimekuwa zikifikia walengwa kwa usahihi.

Mbele ya kiungo huyo, yupo nahodha Morice Abraham ambaye ndiye mchezeshaji mkuu wa timu hiyo kutokana na ufundi wake wa kuwasoma na kuwapenya viungo na mabeki wa timu pinzani na kupiga pasi za mwisho kwenda kwa washambuliaji wa timu hiyo lakini pia amekuwa na uwezo wa kumiliki mpira kwa muda mrefu bila kupokonywa jambo ambalo husaidia kuipumzisha na kuituliza timu pale wenzake wanapoonekana kuchoka.

Lakini mwisho wa siku kuna juhudi za kitimu zimekuwa zikitendewa haki na mshambuliaji Kelvin John ambaye amekuwa na kipaji cha hali ya juu cha kufumania nyavu na kuwasumbua mabeki jambo ambalo limekuwa likisaidia kuwafanya wapinzani wasiwe wanapanda mara kwa mara ili kumchunga nyota huyo.

Udhaifu

Penye mafanikio huwa hapakosi changamoto na kasoro. Pamoja na ubora wa kikosi cha Serengeti Boys, wamekuwa na changamoto kubwa ya kujisahau na kupiga chenga zisizo na sababu hasa pale wanapokuwa wanaongoza jambo ambalo limekuwa likisababisha wapoteze mipira kwenda kwa timu pinzani ambayo ikiwa zingekuwa zinatumia vizuri nafasi, zingezaa mabao.

Changamoto nyingine ambayo benchi la ufundi la Serengeti Boys linapaswa kuifanyia kazi ni udhaifu wa safu ya ushambuliaji katika kujipanga pindi timu inaposhambulia, jambo linalopelekea ipoteze idadi kubwa ya nafasi za mabao ambayo inatengeneza ama kujikuta wanaotea mara kwa mara hakuna mmaliziaji.

Pamoja na kucheza ndani ya uwanja, inatakiwa mambo ya kiufundi, kama kupiga mipira iliyokufa. Fainali za Kombe la Dunia za Russia, mipira iliyokufa ilitumiwa kikamilifu kupata mabao. Wachezaji wa Serengeti Boys hawana utaalamu wa kutafuta engo ya nyuzi 90 au 80 ya goli kwa juu ambazo hakuna makipa wanaoweza kuzifikia.

Udhaifu mwingine unaotakiwa kurekebishwa haraka ni ufundi wa kupiga penalti. Penalti ya Salum Lupepo ilionyesha wazi kwamba vijana hawajaiva kwenye baadhi ya maeneo ikiwemo penalti.

Haitakiwi mtu mmoja awe fundi na katika kufanikisha hili, inatakwa kila baada ya mazoezi, dakika 10 za mwisho ni mikwaju ya penalti kwa kila upande.

Ukiacha hayo, vijana hao wanaonekana wanahitaji mechi nyingi za kirafiki dhidi ya timu kutoka nchi ambazo zimepiga hatua kubwa kisoka kama Nigeria, Tunisia, Morocco, Misri, Mali, Cameroon, Senegal, Ghana na Guinea ili wapate uzoefu utakaowafanya waingie kwenye fainali za Afrika wakiwa fiti na wamepevuka.

Utofauti na Serengeti Boys ya Gabon

Mwaka jana, Serengeti Boys ilishiriki fainali za Afrika kwa vijana wenye umri huo ambazo zilifanyika Gabon na kushika nafasi ya tatu kwenye kundi B lililokuwa na timu za Mali, Guinea na Angola.

Baadhi ya wadau wa soka nchini wamekuwa wakijiuliza ni kikosi kipi bora cha Serengeti Boys baina ya hiki cha sasa na kile cha mwaka jana kilichoshiriki Fainali za Afrika ambazo hata hivyo mwakani tutashiriki tena tukiwa kama wenyeji.

Serengeti Boys iliyoshiriki fainali za Gabon, yenyewe haikuwa inacheza soka la pasi nyingi lakini pia ilikuwa haimiliki sana mpira huku ikitumia nguvu kubwa katika kujilinda lakini hii ya sasa imekuwa ikicheza soka la kushambulia na kupiga pasi nyingi huku ikiufungua uwanja jambo linalofanya yenyewe iwe na mpira kwa muda mrefu kuliko timu pinzani.

Maoni ya wadau

Kocha wa Sudan, Zdravko Logalusic anaamini Serengeti Boys ni timu tishio zaidi kwa vijana wenye umri chini ya miaka 17 katika ukanda wa Afrika Mashariki na Kati ingawa ameshauri kuwe na mfumo mzuri utakaowafanya wawe tegemeo kwa timu ya taifa siku za usoni. “Ni vijana wadogo lakini wananyesha utofauti na wengine kwani wamepevuka na wanatambua wafanye nini na kwa wakati gani ingawa kuna muda wanajisahau na kucheza kama wanafunzi. Nadhani ndio timu iliyoandaliwa kwa muda mrefu na nawapongeza Tanzania kwa hilo lakini changamoto kubwa kwa bara la Afrika ni namna gani wachezaji hawa wataendelezwa hadi wawe nyota muhimu kwenye timu ya taifa,” anasema Logalusic.

Kocha wa timu ya taifa ya vijana wenye umri chini ya miaka 17 ya Rwanda, Rwasamanzi Yves alitoa ushauri kwa Shirikisho la Mpira wa Miguu Tanzania (TFF) kuitafutia Serengeti Boys mechi nyingi za kirafiki ili iweze kuimarika.

“Tanzania (Serengeti Boys) ni timu nzuri na ninaamini italeta ushindani kwenye mashindano ya Afrika lakini nadhani wanatakiwa kutafuta mechi za kutosha za kirafiki ili wazidi kupata uzoefu utakaowasaidia waweze kuhimili ushindani na kumaliza kwenye nafasi za juu,” alisema Yves.

Kabla ya kushiriki fainali zilizofanyika Gabon mwaka jana, Serengeti Boys iliweka kambi kwenye nchi za Madagascar, Shelisheli, Morocco na Cameroon ambako ilicheza idadi kubwa ya mechi za kirafiki ingawa hii ya sasa bado haijafanikiwa kutoka nje ya nchi kuweka kambi japo imekuwa ikicheza mechi za kirafiki na klabu mbalimbali hapahapa nchini.

Monday, August 20, 2018

Yanga haina damu, hewa na chakula

 

By Nicasius Agwanda

Tazama na hata zikawepo klabu za Simba na Yanga, nazo zikadumu kwa zaidi ya miaka 50 na zikawa zinakimbilia muongo mmoja wa maisha. Akatokea mtoto mmoja wa maajabu aitwaye Azam, akajaribu kuwapiku na maisha yake yakarejea katika “jalala la mazoea” ambalo halijawahi kuondoka kwenye mboni na akili zetu.

Na hata ilipokuwepo kasi ya Singida United kutaka kufanya mapinduzi ya kisoka, wakaisahau tabia njema nao wakafanya dhambi ya kuhusiana na Yanga na hata haikueleweka ni wapi wamepata akili ya kuleta utani kwenye usajili katika kipindi tulichotegemea watakuwa imara kujidhatiti. Ikawa usiku na ikawa asubuhi, Fei Toto aliyekuwa Singida United akatolewa msaada Yanga.

Naam, sio dhambi itakayowatafuna Singida United na Yanga peke yake bali itakuwa dhambi inayoendelea kutafuna soka la Tanzania na ambayo itatupeleka kuzimu kwenye adhabu ya milele ya kutokufanikiwa kwenye maisha ya soka wakati Sudan Kusini wakipanda taratibu na baadae watakuwa visiki tusivyoweza kuving’oa ili tufanikiwe.

Ni yupi aliyesema Tanzania hatukutakiwa kufanya vizuri katika soka tangu miaka hamsini iliyopita ambapo babu zetu walifanikiwa kwenda kwenye hatua ya mataifa ya Afrika? Yupi aliyeshindwa kuwa na aibu na kuhakikisha kuwa tunafanya vyema kwa maana ya vilabu vyetu kuweza kufika mbali katika hatua za klabu bingwa barani Afrika na Shirikisho?

Taifa lenye walau watu milioni 55 kwa sasa lilitakiwa kuwa kwenye misingi inayoeleweka. Unatamani “fly over” za TAZARA zingekuja wakati ambao Yanga na Simba tayari zina viwanja. Sahau kuhusu maandiko yote niliyoandika hapo juu kwenye kukufikirisha kiimani lakini dhambi inayonyanyasa roho yangu ni hii aliyokuwepo Yanga sasa hivi.

Yanga ni moja ya timu zilizofanya vibaya zaidi kwenye hatua ya makundi ya Kombe la Shirikisho kwa sasa. Wachezaji hawana motisha, viongozi hawaelewi kipi kinaanza na kipi kinamalizikia na mashabiki hawafahamu chanzo cha matatizo ni kipi. Kwa kifupi hakuna mwenye majibu ya maswali mengi ambayo yapo kwenye vinywa vya kila mmoja.

Angalia mduara huu. Wachezaji wana swali kwa uongozi, uongozi una swali kwa mashabiki, mashabiki wana swali kwa uongozi, kisha uongozi unahoji wachezaji na baadaye wachezaji wanahoji washabiki. Imekuwa sayansi ya mzunguko ambayo kila kimoja kinahusiana na kingine katika kushindwa kutekeleza yanayohitajika.

Lakini unamweka wapi shabiki ambaye hajatengenezewa msingi mzuri wa kuhudumia klabu yake? Unamlaumu vipi Mhilu ambaye ndo kwanza amepewa majukumu ya kuhakikisha anaifumua Gor Mahia wakati akiwa anasikia taarifa za nahodha wake Kelvin Yondani kuwa aligoma ili aongezewe mshahara?

Lakini tatizo kubwa lingine ni kuwa unamkata kichwa kiongozi yupi ambaye ameshindwa kutekeleza majukumu yake wakati mashabiki bado wanaamini kuwa mwokozi ni Yusuph Manji pekee?

Katika dunia ya kisasa, unaweza kusema Yanga ipo katika kitengo cha wagonjwa wanaohitaji uangalizi maalumu. Hawana hewa, hawana damu, na hawana chakula kwenye mwili wao. Kwa mahitaji yao, uwezo wa hospitali inayoweza kuwahudumia ni ngumu kuipata na itachukua muda kama watataka kupata suluhu ya yote haya kwa wakati mmoja.

Hakuna mahala Yanga inaweza kupata damu ya kutosha yaani fedha ya kuwatosha kujisimamia kama wanaamini kuwa washabiki wanaweza kuwa wanachanga kupitia njia za simu kisha walipie viingilio uwanjani.

Hakuna namna Yanga inaweza kupata hewa ya kuwapa uhai kwa maana ya uongozi kama hawawezi kuacha jinamizi la Yusuph Manji liondoke.

Na sioni njia yoyote ambayo Yanga inaweza kufanya vyema kimataifa na kitaifa iwapo wachezaji watakosa motisha na ukaribu ambacho ndio chakula cha msingi.

Yanayowakuta Yanga leo, yanaweza kuikuta timu yoyote kwa Tanzania. Hizi klabu zetu zimeundwa kwa porojo na sio misingi inayoweza kusimamia taasisi. Klabu hizi zimeundwa katika misingi ya Gozi la Ng’ombe, kwamba ni ukurasa ambao iwapo nitaondoka leo basi Mwananchi watapata tabu kuweka mrithi na badala yake walete kitu kipya kabisa.

Walitakiwa wawe kama gazeti la Mwananchi, kwa maana ya kwamba Gozi La Ng’ombe ni mojawapo ya kurasa zinazoliunda na hata nikiondoka, uzito wa gazeti hautopungua wala kubadilika na badala yake kutakuwa na msingi mpya wa kurithi ukurasa wangu na maisha yakasonga mbele.

Tofauti ya Simba na Yanga mpaka sasa ni kuwa huku yupo Mo Dewji na huku Manji kapumzika. Iwapo Simba hawatofanikisha taratibu zao, hakuna namna wanaweza kuwa na utofauti na Yanga kwa miaka mitano inayofuata.

Taasisi zinaongozwa na mifumo inayosimamiwa na watu lakini klabu zetu zinatengenezwa na watu wanaosimamiwa na mifumo. Vitu viwili tofauti kabisa na vinavyofanyika kinyume na inavyopasa kuwa.

Hii ndio sababu kubwa vilabu hivi havina uwanja wa mazoezi achilia mbali uwanja wa matumizi ya mechi rasmi. Haviwezi kufanua hivyo kwa sababu Manji aliahidi kuleta wahandisi kutoka China ili wajenge uwanja na sio mwenyekiti aliahidi Yanga italeta wahandisi.

Hizi klabu ni majina ambayo unaweza kuyafanyia biashara kuanzia ngazi ya matawi mpaka wachezaji na vyenyewe visinufaike bali watu husika.

Paul Pogba sio mkubwa kuliko Manchester United, Mohamed Salah sio mkubwa kuliko Liverpool, Cristiano Ronaldo hakuwahi kuikaribia thamani Real Madrid, Lionel Messi anaweza kuondoka Barcelona na maisha yakaendelea.

Haya ndo manufaa yanayotokana na kuwepo kwa mifumo inayosimamiwa na watu lakini wamepita Marais kadhaa Simba na maisha yao hayajawahi kuendelea bila Emmanuel Okwi.

Ni aibu inayoumiza nafsi na roho lakini ndio ukweli tulioamua kuishi nao kinafki kuwa vilabu hivi haviwezi kuishi kisasa. Yanga inafanya vibaya na haiwezi kujitutumua mbele ya Gor Mahia? Inaonekana ni Aston Villa inacheza na Lipuli na wachezaji unaona maumbo yao yanasema “Acha tukubali yaishe.” Inasikitisha kuona Yanga haina hewa, damu na chakula mwilini mwake.

Huu ni uchafu ambao ulitakiwa uwepo kipindi kile ambacho Azam haionyeshi michezo yao hivyo ilikuwa ngumu kwa babu yangu mzee Mallan Agwanda aliyepo Shirati Rorya kuiona. Lakini leo hii ambayo huwezi kumdanganya jezi mpya za Yanga zinafananaje, Yanga yenyewe inaishi kwa dhiki? Aibu kupita kiasi.

Monday, August 20, 2018

Mastaa waliipania EPL, lakini majeraha yamewaharibia

 

Unaweza kusema hii ni nuksi. Mchezaji amepania kucheza, kuonyesha uwezo wake na hata kumshawishi kocha ampange, lakini majeraha yakaharibu pozi.

Kati ya walioharibiwa pozi ni kiungo mahiri wa Manchester City, Kevin De Bruyne, ambaye ameumia goti Agosti 15, 2018, ikiwa ni baada ya kucheza mechi moja tu ya Ligi Kuu dhidi ya Arsenal.

katika mechiyo, mchezaji huyo wa Ubelgiji aliingia dakika ya 75 kipindi cha pili, aliumia goti wakati wa mazoezi ya timu hiyo Jumatatu iliyopita na sasa atakuwa nje ya dimba kwa miezi mitatu.

Madaktari wanaomtibu walisema De Bruyne atakaa nje ya uwanja hadi katikati ya Desemba, 2018, likiwa ni pigo kwake na kwa klabu kwa ujumla.

Spoti Mikiki linakuletea orodha ya majeruhi katika kila klabu ya Ligi Kuu England.

Arsenal

Mchezaji Nacho Monreal, anauguza goti aliloumia Agosti 4, 2018, anatarajiwa kurejea uwanjani mwezi ujao, Laurent Koscielny, anaugulia maumivu ya nyonga tangu Mei 3, 2018 atarejea dimbani Novemba mwaka huu. Majeruhi wengine ni Sead Kolasinac, goti aliumia Agosti Mosi, 2018 na atarejea dimbani Oktoba 2018. Mchezaji mwingine ni Ainsley Maitland-Niles alivunjika mguu Agosti 12, atarejea dimbani Oktoba 2018 na Carl Jenkinson anauguza kifundo cha mguu tangu Agosti 16 na atarejea Oktoba 2018.

Bournemouth

Tyrone Mings aliumia goti Mei 13, 2018 sawa na Kyle Taylor aliyeumia msuli Agosti 10, 2018. Junior Stanislas, aliumia goti Machi 31 na atarejea Septemba 2018.

Burnley

Robert Brady, alijiumiza nyama za paja Julai 29, 2018, Steven Defour aliumia nyonga Julai 22, 2018 atarajea hivi karibuni na Nick Pope, aliyetenguka bega Julai 26 anatarajiwa kurejea Oktoba 2018

Chelsea

Matthew Miazga alizimia mazoezini Juni 9, 2018, wakati kiungo Cesc Fabregas (goti) tangu Agosti 11, 2018. Mwingine ni Marco van Ginkel, (uvungu wa goti) tangu Juni 26, 2018 na kurudi ni Machi mwakani.

Crystal Palace

Chung-Yong Lee, aliumia kifundo cha mguu Juni Mosi 2018 haijulikani atarejea lini wakati Jonathan Williams, aliumia nyama za paja Agosti 10, 2018 na anatarajiwa kurejea mwishoni mwa mwezi huu hukua Connor Wickham aliyeumia nyama za paja Agosti 10, 2018 atarajea mwishoni mwa mwezi.

Everton

Beni Baningime aliumia kifundo cha mguu, Julai 14, 2018 na, Yannick Bolasie, (tumbo) tangu Julai 14, 2018 ataanza mazoezi hivi karibuni wakati Cuco Martina naye tumbo tangu Julai 20, 2018 na atarejea muda wowote. Wengine ni Richarlison de Andrade, (nyonga) tangu Agosti 11, 2018, Andre Gomes (msuli) aliumia Julai 28, 2018 anatarajiwa kurejea hivi karibuni.

Leicester

Çağlar Söyüncü msuli na nyonga tangu Julai 25, 2018 anatarajiwa kurejea hivi karibuni.

Liverpool

Ragnar Klavan (msuli) tangu Agosti 4, 2018 na anatarajiwa kurejea hivi karibuni, Dejan Lovren nyama za paja aliumia Julai 15, 2018 atarejea Septemba, mwaka huu.

Manchester City

Danilo Luiz da Silva, (kifundo cha mguu) Julai 5, 2018, Kevin De Bruyne, aliumia goti Agosti 15, anatarajiwa kurejea Desemba 2018.

Manchester United

Luis Antonio Valencia, (nyonga) tangu Julai 22, 2018 wakati Eric Bailly Bertrand, kifundo cha mguu tangu Agosti 5, 2018. Ander Herrera (msuli na nyama za paja) tangu Agosti 5, 2018. Atarejea mwishoni mwa mwezi huu.

Newcastle United

Florian Lejeune, aliumia vibaya goti Julai 24, 2018 bado anajiuguza wakati DeAndre Yedlin naye goti tangu Agosti 11, 2018.

Southampton

Ibrahim Afellay aliumia goti Julai 14, 2018 wakati Bruno Martins Indi naye aliumia Agosti 11, 2018.

Swansea

Declan John, aliumia Julai 17, 2018 na ameanza mazoezi mepesi na Kristoffer Nordfeldt, (nyonga) tangu Agosti 11, atarejea katikati ya Septemba 2018.

Tottenham

Joshua Onomah aliumia goti Agosti 9, atakaa nje hadi mwezi ujao, Victor Wanyama (goti) tangu Julai 24, 2018, Erik Lamela (msuli) tangu Julai 26, 2018, Cameron Carter aliumia nyonga Agosti 9, 2018. Mwingine ni Lucas, (nyonga) Agosti 11, 2018, Juan Foyth (nyama za paja) tangu Julai 24, 2018. Atarejea wiki chache zijazo.

Watford

Tom Cleverley ana uvimbe tumboni Julai 21, 2018 haijulikani atarejea lini na Ben Wilmot aliumia goti Agosti 10, 2018 naye haikutajwa atarejea lini.

West Bromwich Albion

Nacer Chadli (msuli) yaliyompata Julai 14, 2018 na Craig Dawson aliumia nyama za paja tangu Julai 28, 2018 .

West Ham United

Manuel Lanzini aliumia goti Juni 8, 2018 atarejea Januari 2019 na Andrew Carroll aliumia Julai 12, 2018 atarejea katikati ya Oktoba.

Monday, August 20, 2018

TFF, Serengeti Boys msibweteke na hizi mechi za CAF-Cecafa



Ibrahim Bakari

Ibrahim Bakari 

Sina sababu ya kuacha kuwapongeza wachezaji wa timu ya Taifa ya Vijana chini ya miaka 17 Serengeti Boys na benchi zima la ufundi chini ya Kocha Oscar Milambo kwa hicho tunachokiona.

Ninaipongeza Serengeti Boys pia kwa kuanza vema mechi zake za mashindano ya kufuzu fainali za Afrika kwa vijana wa umri huo yatakayofanyika nchini mwakani.

Japo tunafahamu kuwa Tanzania ina tiketi mkononi, lakini haizuii kupongeza kwa hapo ilipofikia.

Pamoja na kwamba mechi zinaendelea, na kesho wanacheza na Rwanda na matokeo yoyote hayawezi kuwaathiri kwa vyovyote.

Tumewashuhudia wakiwalaza Burundi mabao 2-1 na baadaye Sudan 5-0, inapendeza sana.

Pamoja na pongezi hizo lakini ninawatahadharisha wachezaji na benchi la ufundi la Serengeti Boys, kuhakikisha wanaongeza bidii mara dufu ili waweze kushinda mechi zote zilizosalia na kutwaa ubingwa huo.

Hata hivyo, ninalitahadharisha Shirikisho la Soka la Tanzania (TFF) pamoja na Serikali na kamati ya maandalizi kwa ujumla kuchukulia matokeo hayo mazuri kama chachu ya kuipa maandalizi ya uhakika zaidi ili timu hiyo, ili kinachofanywa leo kifanywe kwenye fainali za Afrika hapo mwakani.

Kwa kuwa mwakani tutakutana na timu bora zilizoandaliwa kwa uhakika ni vyema Serengeti Boys ikaandaliwa kwa umakini zaidi na kwa mechi nyingi ngumu kulinganisha hizi za CAF-Cecafa ambazo tunaziona kama si kipimo sahihi japo ni nzuri kwa kuiangalia timu nini inafanya na matarajio yake..

TFF na Kamati ya Maandalizi inapaswa kutekeleza ahadi za kuipa kambi ya maandalizi kwani ikiwemo kuipa mechi nyingi zaidi hasa mataifa ya Afrika Kaskazini, Afrika Magharibi na hata nje ya Afrika.

Kila mmoja ameona kuwa vijana wetu wana vipaji vya kuzaliwa navyo lakini pengine kutokana na udogo wa umri wao au kutopata mazoezi ya kutosha bado wanafanya makosa mengi ambayo wakikutana na timu bora watafungwa kirahisi.

Matokeo ya CAF-Cecafa si ya kuvimbisha vichwa kwa kuwa timu nyingi ni kama hazikuandaliwa na wala kutoa ushindani kama ilivyo kwa Somalia, Eritrea, Burundi na timu zote za Sudan na Sudan Kusini.

Timu inashinda, lakini inashindana na nani? Je wachezaji wanapata ile hali ya mechi?

Ikumbukwe kuwa Ukanda wa Cecafa soka lake lipo chini hivyo kucheza mechi nyingi za timu za Cecafa tunadhani si kipimo sahihi kujiandaa na mashindano yajayo.

Tunaweza kujiaminisha kuwa Serengeti yetu iko sawasawa lakini kumbe hakukuwa na umakini na kupata matokeo ya kushangaza na kuanza kujiuliza kinachotokea.

Bila shaka tukitekeleza hili la maandalizi ya uhakika tangu sasa tutapata furaha isiyokoma na hapo tutapata mwanzo mzuri wa timu. Mechi za CAF-Cecafa ziwe sehemu muhimu ya maandalizi.

Ninarejea kuwapongeza wachezaji wa Serengeti Boys kwa hatua hii waliyofikia ya kuingia nusu fainali kwamba hawakopeshi kitu wapinzani wao wanapokuwa wabovu.

Hii inaonyesha kuwa wana kiu ya kufunga na ukiangalia mechi ile walifunga mabao 10, lakini wanashindwa kujipanga kung;amua mtego wa kuotea japokuwa ni nzuri mwamuzi anaweza kujichanganya.

Ninawatakiwa kila la kheri katika mechi zao lakini pia kudumisha nidhamu na utii kwenye timu na kufanya maandalizi ya maana na akili zao kuelekeza fainali za mwakani za AFCON 2019, Tanzania ikiwa mwenyeji.

Monday, August 20, 2018

Fanya mazoezi rahisi ya kusaidia kuondoa kitambi



Dk Shita Samwel

Dk Shita Samwel 

Uwepo wa Kitambi mwilini ni kiashiria kimojawapo cha unene na ndiyo maana wataalamu wa afya hupima mzunguko wake kama moja ya njia ya kutathimini tatizo la unene.

Kitambi hujulikana pia kama kiribatumbo ni matokeo ya ulaji holela wa vyakula na kutoushughulisha mwili na mazoezi au kazi.

Wapo wanaokosa muda wa mazoezi kutokana na majukumu ya kazi na wengine kukosa maeneo ya mazoezi ili kukabiliana na vitambi.

Je unahitaji shilingi ngapi na eneo kubwa kiasi gani ili tu kumiliki kamba na kufanya zoezi la kuruka kamba?

Kuruka kamba ni moja ya zoezi rahisi lenye faida ambalo watu wengi hawalizungumzii kabisa kama ni moja ya kundi la mazoezi mepesi kitaalamu hujulikana kama aerobics exercise.

Kamba ya kisasa inapatikana kwa wafanya biashara ndogondogo kwa bei isiyozidi Sh10,000. Ina vishikilio ambavyo inarahisisha kuikunja vizuri na kuihifadhi katika begi la kiofisi au kazi.

Unahitaji dakika 15-20 kwa siku mara tano kwa wiki na eneo lenye ukubwa wa futi 4 kwa 6 kufanya zoezi hili linalokadiriwa kuchoma kiwango cha nishati kalori 10-15 kwa dakika.

Zoezi hili linafaida kubwa kiafya ikiwamo kukata kitambi, kuimarisha mfumo wa moyo na damu, hewa (mapafu), fahamu (ubongo) na kujenga misuli imara.

Ukiwa nyumbani, ofisini, vituo na viwanja vya wazi vya michezo ruka kamba eneo tambarare ukiwa umavaa raba ili usijijeruhi. Ongeza hamasa ya zoezi na mziki wa haraka haraka toka katika simu yako.

Kabla ya kuanza nyoosha kwanza viungo angalau kwa dakika 5 kisha jikadirie urefu wa mzunguko wa kamba na anza kuruka taratibu na baadaye ongeza kasi.

Ukiruka kamba kwa ufasaha na kujituma unaweza kuchoma kiwango kikubwa cha mafuta mwilini pengine kuzidi kile cha zoezi la kutembea au kukimbia umbali mrefu.

Tafiti zilizofanywa na Chuo kikuu cha Havard na kuchapishwa katika jarida la Science Daily zinaonyesha zoezi hili likifanywa dakika 30 kwa siku linawezesha viungo vingi mwilini kushughulika kikamilifu.

Hii ni faida kiafya kwani mafuta yaliyorundikana ikiwamo ya kiriba tumbo huchomwa na hivyo kukuepusha na magonjwa yasiyoambukiza ikiwamo ya Moyo, Kisukari, Kiharusi, Figo na Unene.

Kama utahitaji kujiweka fiti zaidi unaweza kuruka kamba dakika 30 zaidi kwa mfululizo na wale wanaoanza kujifunza watumie dakika 10 kwakuachana mpaka watakapozoea.

Zoezi hili lina tija sana ndiyo maana linapendelewa na mabondia wengi duniani kwasababu linawafanya kuwa na stamina, pumzi , wepesi na misuli imara yenye nguvu.

Litumie zoezi hili kupata matokeo makubwa kiafya kwani ni rahisi kufanyika na halihitaji gharama ukilinganisha na mengine.

Kufanya mazoezi ni kama wito kwa muhusika, inakuwa ngumu kufanya mazoezi kwa kujishauri, Kikubwa ni kuamua sasa ninafanya mazoezi haya kwa kutengeneza ratiba maalumu ya kila siku badala ya kuwa na ratiba yenye mapengo.

Monday, August 20, 2018

Viongozi wa michezo tambueni kuna kuibua vipaji



Allan Goshashi

Allan Goshashi 

Ni kawaida yetu kutafuta visingizio. Huwa tunatafuta visingizio tunaposhindwa, kwa tabia zetu mbaya, kwa nia zetu mbaya, kwa kuwaumiza wengine, kwa kuwa wabinafsi na kwa makosa yetu. Hatutaki kukubali kuwa tuna ujinga, ni wabinafsi, wakatili!, wavivu, wasumbufu na mengi mengine ila tunaweka visingizio kibao.

Tatizo la visingizo ni kwamba vinatuondoa katika mtazamo wa ukweli wa tatizo na hivyo kuzuia maendeleo.

Kwa mfano, linapotokea kosa sehemu ya kazi tunatumia muda na nguvu kujadili nani wa kumlaumu badala ya kuendelea na shughuli zetu na kutafuta ufumbuzi wa kutatua tatizo lililotokea.

Watu tunaofuatilia masuala ya michezo tunafahamu kuwa tuna tatizo kubwa la maendeleo ya michezo nchini na limekuwa likishughulikiwa kwa visingizio vingi badala ya kutafuta ufumbuzi.

Tumekuwa tukiwatafuta watu wa kuwalaumu badala ya kutafuta njia za kuendeleza vipaji vilivyopo nchini.

Tanzania ni kati ya nchi zenye wachezaji wenye vipaji vya hali juu (katika soka) kuliko ilivyozoeleka kuwa nchi za Afrika Magharibi ndiyo zenye vipaji vingi vya wachezaji wa soka Afrika, ila ni kweli ni watawala wa soka la Afrika.

Zipo sababu zinazofanya nchi za Afrika Magharibi kuwa watawala wa soka la Afrika, sababu kuu ni kwamba nchi nyingi za Afrika Magharibi zilitawaliwa na Wafaransa, ambapo Wafaransa wana sera ya kusambaza utamaduni wao katika makoloni yao, hivyo wachezaji soka na watu wenye vipaji vingine walipata na hupata nafasi ya kwenda Ufaransa kwa urahisi. Pia, Ufaransa tangu zamani ilikuwa ikichukua wachezaji katika eneo hilo la Afrika Magharibi kwa ajili ya kuwatumia katika mashindano mbalimbali Ulaya.

Sababu nyingine kuu inayofanya soka la Afrika Magharibi kuwa juu ni mawakala.

Eneo hili la Afrika Magharibi linatolewa macho na mawakala wakubwa.

Hali hiyo haijatokea kwa kubahatisha, ni suala la motisha iliyopo katika eneo hilo, wachezaji wa Kusini mwa Afrika au Afrika Mashariki na Kati hawana motisha, kwa mfano wachezaji wa Afrika Kusini hawana nia ya kutaka kucheza soka Ulaya, wanalipwa mishahara mizuri.

Vilevile wachezaji wa Afrika Mashariki na Kati hupata wakati mgumu kucheza nje ya maeneo yao, pia wachezaji wa maeneo ya Kaskazini mwa Afrika na Kusini mwa Afrika huona aibu kwenda kucheza soka nje ya maeneo yao.

Sababu nyingine ni kuwa klabu za nchi za Afrika Magharibi nyingi zinamilikiwa na mtu binafsi ambaye hutegemea kuendesha klabu kwa kuuza wachezaji, ni tofauti na Tanzania ambapo makampuni binafsi yanadhamini klabu na soka la kulipwa lipo juu kidogo kwa nchi za Afrika Mashariki.

Sababu kubwa nyingine ni umasikini na mifumo mibovu!.

Umasikini upo sehemu zote za Afrika, lakini eneo la Afrika Magharibi lina umasikini na mifumo mibovu Zaidi ya kuendesha soka.

Katika sehemu nyingine za Afrika kuna umasikini, lakini ligi zinaendeshwa kwa utaratibu mzuri kiasi na malipo kwa wachezaji siyo mabaya.

Hali hiyo ya umasikini na mifumo mibovu ya kuendesha soka ndiyo inawafanya wachezaji wa Afrika Magharibi kutoka katika nchi zao na kwenda nchi yoyote Afrika, Marekani, Asia au Ulaya kucheza soka.

Ni wazi kuwa wachezaji wa nchi za Afrika Magharibi wana vipaji vya asili kama walivyo wachezaji wengine wa Afrika, ila wachezaji wa Afrika Magharibi wanaendelezwa kwa njia mbalimbali bila kutafuta visingizio.

Kinachokwamisha Afrika Mashariki ni ukata ambao uchumi wa mataifa mengi ya ukanda huo yanafanana, lakini vilevile wachezaji nao wana utayari hata wakiibuliwa?

Monday, August 20, 2018

SportPesa inavyojivunia kuleta maendeleo ya soka Tanzania

 

By Majuto Omary, Mwananchi

Kampuni inayoongoza ya michezo ya kubahatisha nchini, SportPesa Tanzania inajivunia kuchangia maendeleo ya soka tangu ianze kufanya shughuli zake nchini.

SportPesa Tanzania ilianza kufanya biashara nchini Mei mwaka jana na mara moja ikasaini mkataba wa miaka mitano kila moja na wakongwe wa soka, Yanga na Simba.

Wakati Simba ikisaini mkataba wa miaka mitano wenye dhamani ya Sh 4.9 billioni, Yanga ilisaini mkataba wa miaka mitano wenye thamani ya Sh 5 billioni. Mikataba hiyo itamalizika msimu wa Ligi Kuu ya Tanzania Bara wa mwaka 2021/22.

Mkurugenzi wa Utawala wa SportPesa, Tarimba Abbas alisema kuwa malengo ya kusaidia maendeleo ya soka na sekta nyingine yameanza kuleta mafanikio klabu ya Simba imefanikiwa kutwaa ubingwa wa Ligi Kuu ya Tanzania Bara baada ya miaka kadhaa huku Yanga ikifanikiwa kuingia hatua ya makundi ya kombe la Shirikisho.

Alisema kuwa makocha na wachezaji vijana kadhaa wamefaidika kupitia shughuli zao mbalimbali nchini ikiwa pamoja na mafunzo yaliyoendeshwa na gwiji wa klabu ya Everton, Leon Osman.

“Kuna maendeleo ya soka nchini tangu tuanze shughuli zetu na klabu zimefaidika na wachezaji wameona mwanga wa kazi yao, ninaamini maendeleo zaidi yatapatikana kwani tumejipanga kufanya hivyo ili kufikia malengo yetu,” anasema Tarimba.

ZIARA YA EVERTON TANZANIA

Tarimba anasema kuwa ili kuleta hamasa kwa wachezaji, viongozi na mashabiki, kampuni yao iliandaa ziara ya Everton ambayo iliundwa na wachezaji nyota wa mataifa mbalimbali ikiwa pamoja na Wayne Rooney ambaye alikuwa amejiunga na timu hiyo.

Mashabiki wa soka hawakuamini kama timu hiyo na mastaa hao watakuja kucheza na mshindi wa mashindano ya SportPesa Super Cup na timu ya Gor Mahia ya Kenya ilishinda na hatimaye kucheza na Everton Uwanja wa Taifa.

Mashabiki wa soka walipata hamasa kuiona timu hiyo ikicheza kwa mara ya kwanza nchini ikiwa na wachezaji nyota. Ziara hiyo imeleta mtazamo chanya kwa soka ya Tanzania kuwa inawezekana kucheza soka nje ya nchi kutokana na vipaji vya wachezaji.

“Ziara ya Everton imeleta faida nyingi, ikiwa pamoja na kuitangaza Tanzania nje ya mipaka yake, kukuza utalii na pia kufanyia msukumo wa ukarabati Uwanja wa Taifa na kuwa wa kisasa duniani,” anasema Tarimba.

Anasema kuwa wachezaji wa Everton pia walishiriki shughuli mbalimbali za kijamii ikiwa pamoja na kutembelea hospitali ya Watoto ya Pugu, kuendesha mafunzi kwa klabu ya albino na mambo mengine.

TUZO

Mpaka sasa, kampuni yao imeshindanishwa katika tuzo mbalimbali ikiwa pamoja na tuzo ijulikanayo kwa jina la United Kingdom (UK) Business Football Awards na ile ya Best Brand Activation.

Kushindanishwa huko kumetokana na ushiriki wa kampuni hiyo kwa timu maarufu kama , Everton FC na ile ya Daraja la Kwanza (EFL Championships), Hull City Tigers.

Kampuni hiyo pia imeshindanishwa katika tuzo ijulikanayo kwa jina la Discovery Sport Industry Awards ambayo itafanyika leo (Agosti 17), kwenye ukumbi wa Sandton Convention Center, mjini Johannesburg, Afrika Kusini.

SportPesa pia imeshindanishwa katika kipengele bora cha udhamini katika bara la Afrika (The Best African Sponsorship).

SHUGHULI ZA KIJAMII

Mbali ya kujihusisha masuala ya michezo, kampuni ya SportPesa pia imewekeza katika masuala ya afya kwa kujenga hospitali itakayotumiwa na madaktari wawili wa kitongoji cha Kizimkazi Mkunguni, Zanzibar.

Mradi huo tayari umemvutia Makamu wa Rais, Mama Samia Suluhu Hassan ambaye ameipongeza kampuni hiyo baada ya kutembelea mradi huo.

Monday, August 20, 2018

Seseme ni mtambo wa mabao Mwadui FC

 

By Eliya Solomon, Mwananchi

Moja ya viungo bora kwenye kikosi cha Mwadui ya Shinyanga ni Abdallah Seseme mwenye uwezo wa kufunga na kutengeneza mabao kwenye kikosi hicho.

Kiungo huyo mshambuliaji aliyezaliwa Oktoba 29, ameweka wazi chimbuko la kipaji chake, namna ya uchezaji wake na mengineyo katika mazungumzo na jarida hili la Spoti Mikiki.

Kipaji

Seseme anasema namna ambavyo kipaji chake kilivyoibuliwa na Sifa United ya Manzese jijini Dar es Salaam.

“Kipaji changu kilianza kunolewa kwenye timu ya Sifa United ya Manzese maeneo ya tip top, ilikuwa mwaka 2005 na baadaye Simba ambapo ilikuwa 2009 nilianzia ngazi ya chini B ambayo ilinifanya kujua vitu vingi vya kimpira”anasema Kiungo huyo ambaye alizaliwa mwaka 1993.

 Uchezaji

 Wachezaji wapo wa aina tofauti na kuna wakati mwingine hubadilika kutokana na majukumu kwa upande wake anaelezea namna yake ya uchezaji.

 “Nimekuwa nikicheza kwenye nafasi ya kiungo mshambuliaji ambaye huwa nawajibika kwenye kutengeneza nafasi wakati mwingine ikitokea huwa nafunga, sasa hutegemea  upande ambao kocha anaweza nipanga kucheza”anasema Seseme.

 

Biashara

Upande wa baishara na kwenyewe Seseme yumo. Mchezaji huyo wa zamani wa Simba anasema amekuwa akijishulisha na ufanyaji wa biashara mbalimbali ambazo zimekuwa zikisaidia kuendesha maisha yake.

 “Ninabishara zangu ambazo zinanifanya niwe naingiza kipatao kwa njia nyinge, Mpira utabaki kuwa kazi yangu kuu ambayo hata hivyo  itafika kikomo lakini upande wa biashara nitaendelea,”anaeleza Seseme.

 Magari

 Seseme amekuwa mfuatiliaji mzuri wa aina za magari na anasema aina ya gari ambalo anatamani kuwanalo.

 “Napenda sana magari na siwezi ficha maana  natamani siku moja kuwa na  Toyota Altezza, ni gari fulani hivi lenye mvuto wa aina yake ambalo binafsi huwa sichoki kulitizama” anasema.

Monday, August 13, 2018

Chilunda ndani ya CD Tenerife

 

By Eliya Solomon, Mwananchi

Mshambuliaji wa Tanzania, Shaaban Idd Chilunda ameanza maisha yake mapya nchini Hispania kwenye klabu yake ya CD Tenerife itakayoshiriki Ligi Daraja la Kwanza nchini humo ambayo ni maarufu kama Segunda.

Chilunda ambaye aliibuka kuwa mfungaji bora wa michuano ya Kagame mara baada ya kutua Hispania alifanyiwa utambulisho mbele ya vyombo vya habari nchini humo.

Mshambuliaji huyo wa zamani wa Azam, Shabaan alitambulishwa Agosti 10 katika hafla iliyofanyika kwenye Ukumbi Hatusa (Red Volkswagen Canarias).

Chilunda amesaini mkataba wa mkopo wa miaka miwili CD Tenerife na mchana wa Agosti 11 alifanya mazoezi yake ya kwanza kwenye kituo cha Ciudad Deportiva Javier Perez.

Akizungumza mbele ya wanahabari, Chilunda katika utambulisho wake amesema ni faraja kwake kujiunga na klabu hiyo.

“Nilikuwa mwenye furaha kubwa tangu niliposikia CD Tenerife wananitaka nijiunge nao.

“Nipo katika kiwango kizuri na natambua kuwa mazoezi yatakuwa tofauti na yale niliyokuwa nafanya nyumbani Tanzania, lakini haitokuwa vigumu kwangu kuzoea kwa sababu nipo tayari kwa maisha mapya.

“Mimi ni mshambuliaji sipo hapa kwa ajili ya kufunga tu, nipo hapa kwa ajili ya kushirikiana na wenzangu, nitasaidia kutengeneza nafasi za kufunga na kila kitu kinatakachokuwa ninaelekezwa kufanya,” anasema Chilunda.

Anaendelea kwa kusema; “Nitajitoa kwa ajili ya wenzangu ninaamini haitachukua muda kuzoea hapa na kufanya kile ninachoelekezwa na kocha wangu.”

“Nitacheza kwa nguvu na kwa kiwango kizuri, hilo siyo tatizo kwangu, japokuwa najua Hispania itakuwa tofauti, ila nitazoea kwa haraka.”

“Faridi (Mussa) ni mfano mzuri kwangu, ninavyomuana nacheza sasa ni tofauti ilivyokuwa kabla,” anasema Chilunda katika mkutano huo mbele ya wanahabari.

Mkurungezi wa ufundi wa CD Tenerife, Alfonso Serrano naye ametia neno kwa kusema Chilunda yupo hapo kwa mkopo wa miaka miwili akionyesha kiwango cha juu basi watamnunua moja kwa moja.

“Tuna imani na kiwango chake na rekodi yake ataanza kucheza katika mechi ya Agosti 17 na tutamuangalia jinsi anavyozoea hapa hadi Desemba.

“Chilunda hakuja hapa kufanya majaribio, tutachukua uamuzi juu yake kadri muda unavyokwenda, wawakilishi wake wametupa muda mrefu wa kukaa naye, alitakiwa kuwa hapa mapema ila urasimu umemchelewesha” alisema Serrano.

“Tuna imani naye, lakini hatutompa presha ya kuzoea hapa haraka tunaamini baada ya muda atakuwa sawa. Ni mwepesi ana uwezo mkubwa wa kufunga mabao,” anasema Serrano.

Baada ya mazungumzo hayo, Spoti Mikiki na yenyewe imefanya juhudi za kuwasiliana na Chilunda ambaye anaoneka kuwa mwenye furaha huku akisema hawezi kuichezea nafasi ambayo ameipata ndani ya klabu hiyo.

“Ndoto yangu ilikuwa ni kucheza Ulaya, nilijipa muda kwa kujifunza mengi kutoka kwa kaka zangu, Mbwana Samatta na Saimon Msuva lakini pia Farid naye hakusita kunipa moyo.

“Nimekuwa na mawasiliano na Farid kwa kipindi kirefu kwa hiyo baada ya kupata hiyo nafasi amekuwa msaada kwa kuniambia nini cha kufanya ili kuendana na mpira wao,” anasema Chilunda.

Hata hivyo, Chilunda anasema kuwa Farid alimpa moyo kwa kumweleza ataweza kuendana na mpira wa Hispania kwa kipindi kifupi na kwa kuwa yeye ni mshambuliaji wa mwisho hatokuwa na mambo mengi.

Zaidi ya kufunga na kukaa kwenye nafasi, anasema kuwa ameelezwa beki wa kwanza kukaba ni mshambuliaji pindi na mpira wanapokuwa nao wapinzani.

Chilunda anadai kulitambua hilo tangu akiwa Azam na amekuwa akibadilika na kuwa beki wa kwanza kukaba pindi ambapo wapinzani wanapouanza mpira.

Kuhusu lugha, Chilunda anaamini taratibu atajifunza na mwishowe atakuwa kama Farid ambaye amekuwa na uwezo wa kukizungumza Kihispania japo sio cha ndani zaidi kama ilivyo kwa wazawa.

CD Tenerife ambayo itakuwa na Watanzania hao wawili kwenye msimu mpya wa Ligi Daraja la Kwanza unaotarajiwa kuanza Agosti 20, ilianzishwa mwaka 1912.

Timu hiyo inahistoria kubwa kwenye soka la Histania na Ulaya kwa ujumla, imewahi kutinga hatua ya nusu fainali ya Ligi ya Mabingwa Ulaya msimu wa 1996/97 kipindi hicho michuano hiyo ikiitwa kombe la UEFA.

Mafanikio mengine makubwa ambayo CD Tenerife imeyapata ni kutinga nusu fainali ya Copa del Rey mara moja ambapo ilikuwa msimu wa 1993/94 huku wakiishia katika hatua ya robo fainali mara nne.

Robo fainali hizo ilikuwa kwenye misimu ya 1960–61, 1961–62, 1975–76 na 1995–96.

Kama CD Tenerife itafanya vizuri msimu huu wa 2018/19 huenda washambuliaji wa Kitanzania, Farid Mussa na Shaaban Idd Chilunda wakacheza Ligi Kuu Hispania ‘La Liga’ msimu ujao.

Tenerife itaunza msimu wa daraja la kwanza Hispania kwa kucheza mchezo miwili ugenini wa kwanza utakuwa Agosti 20 dhidi ya Gimnàstic Tarragona na Agosti 26 dhidi ya Almería.

Monday, August 13, 2018

Kumbe John Bocco ana wababe wake!

 

By Eliya Solomon, Mwananchi

Dar es Salaam. Unaweza kusema mshambuliaji wa Simba, John Bocco ni tolu akiwa na futi sita na inchi mbili basi huyo ni mfupi unaambiwa, kuna huyu Mbelgiji, Kristof Van Hout amemzidi kwa inchi nane.

Hout mwenye urefu wa mita 2.98 ambaye ni kipa wa K.V.C. Westerlo ya Ubelgiji ndiye mcheza soka mwenye kimo kirefu zaidi duniani achana na Peter Crouch wa Stoke City ya England aliye na urefu wa futi sita na inchi saba.

Kipa huyo anayecheza ligi moja na nahodha wa Taifa Stars, Mbwana Samatta amekuwa akidaka kwa wepesi krosi na kona zinachongwa juu kutokana na urefu alionao.

Ukubwa wa umbile lake umekuwa ukiwatisha washambuliaji na muda mwingine hupoteza umakini pindi wanapokutana naye ana kwa ana, Hout pamoja na ubora wake wa kucheza mipira ya juu amekuwa wakifungwa kirahisi kwa mashuti ya chini.

Kuna wachezaji wengi wanaokaribia urefu wa Hout ambaye alizaliwa Februari 9, 1987 kwenye mji wa Lommel nchini Ubelgiji, Spoti Mikiki inakuletea nyota hao.

Paul Millar

Mscotland Millar aliyeachwa na Deveronvale FC anaurefu wa mita 2.07 (6 ft 9 in), nyota huyo wa amekuwa akicheza kama mshambuliaji na katika nafasi hiyo amekuwa na faida ya kufunga kwa wepesi mipira ya klosi na kona.

Hivi karibuni mshambuliaji huyo ambaye pia amewahi kuzichezea Formartine United na Elgin City amekuwa akisumbuliwa na majeraha ya goti yaliyomfanya kuwa nje ya uwanja kwa muda mrefu.

Vanja Ivesa

Ivesa ambaye anaichezea Istra 1961 ya Croatia, anaurefu wa mita 2.05 (6 ft 9 in) naye ni kipa kama ilivyo kwa kinara wa urefu Hout anayecheza ligi moja ya Ubelgiji na Samatta.

Kipa huyo mwenye uwezo wa kupangua mikwaju ya penalti ametumia miaka mingi kwenye uchezaji wake soka nchini Uturuki na klabu ya Eskişehirspor ambayo ameichezea kwa miaka mitano.

Yang Changpeng

Changpeng wa HN Jianye ambaye wenzake wamempachika jina la Crouch wa China, anaurefu wa 2.05 m (6 ft 8 1⁄2 in), mshambuliaji huyo amewahi kutumia mwezi mmoja nchini England akiwa na Bolton Wanderers kwa majaribio ambapo hata hivyo alipoteza nafasi ya kujiunga na timu hiyo.

Lacina Traore

Muivory Coast Traore mwenye umri wa miaka 28 ni Mwafrika ambaye ameingia kwenye orodha ya kuwa miongoni mwa wacheza soka wenye kimo kirefu zaidi duniani.

Mshambuliaji huyo wa Monaco ambaye amekuwa akitolewa kwa mikopo mara kwa mara toka ajiunge na timu hiyo akitokea Anzhi Makhachkala ya Russia anaurefu wa mita 2.03 (6 ft 8 in).

Costel Pantilimon

Pantilimon wa Nottingham Forest ya England anaurefu wa mita 2.03 (6 ft 8 in), kipa huyo aliwahi kuwa chaguo la pili kwenye kikosi cha Manchester City nyuma ya Joe Hart.

Monday, August 13, 2018

Pogba avunja ukimya unahodha Man United

 

Licha ya Paul Pogba kuvalishwa kitambaa cha unahodha kwenye mchezo baina ya Manchester United na Leicester City, Ijumaa iliyopita, kiungo huyo amefichua kuwa bado uhusiano wake na kocha Jose Mourinho hauko sawa.

Kiungo huyo wa kimataifa wa Ufaransa, aliiongoza Man United kupata ushindi wa mabao 2-1, katika mchezo wa ufunguzi wa Ligi Kuu England uliochezwa kwenye Uwanja wa Old Trafford.

Matokeo hayo yalipokewa kwa shauku kubwa na mashabiki wa Man United ambao awali, walikuwa na hofu kama timu yao itaibuka na ushindi.

Mourinho amekata tamaa baada ya kunyimwa fedha za usajili wa wachezaji wapya aliokuwa akiwataka katika majira ya kiangazi wakiwemo mabeki wawili wa kati.

Sakata hilo la usajili lilimkumba Pogba ambaye alikuwa akiwindwa kwa nguvu na Barcelona, lakini Mourinho aliweka ngumu akidai hawezi kumtoa kwa namna yoyote.

Hata hivyo, Pogba ametoa kauli inayoonyesha mambo hayajakaa vyema, jambo linalomfanya ashindwe kutimiza majukumu yake uwanjani kwa ufasaha kama alivyokuwa na timu ya Taifa ya Ufaransa.

“Unatakiwa kufahamu jambo moja. Mchezaji anapopewa nafasi ya kucheza huku akiwa na furaha, unakuwa na uhuru mkubwa kuliko anapokuwa hana furaha, mimi ni Pogba yuleyule wa Kombe la Dunia. Ile ni timu tofauti.

“Ninapenda soka na siku zote nimekuwa nikijitahidi kucheza kwa juhudi zangu zote. Unapokuwa na uhuru, watu wanakuamini na kichwani unakuwa sawa, inakuwa rahisi kutimiza majukumu yako,” alisema Pogba.

Pogba alisema kuna mengi yanaendelea lakini hayuko tayari kuweka hadharani akihofia adhabu.

Monday, August 13, 2018

Muda wa wakali wa kubet sasa ndio huu umewadia



Allan Goshashi

Allan Goshashi 

Michezo ya kubahatisha ni moja ya shughuli za kiuchumi zinazoendeshwa kwa mujibu wa sheria kama zilivyo shughuli nyingine. Pia, ni miongoni mwa biashara ambazo zinachangia pato la Taifa.

Kwa mujibu wa sheria, hakuna mtu au taasisi inayoruhusiwa kuendesha biashara ya Michezo ya Kubahatisha bila kuwa na leseni kutoka Bodi ya Michezo ya Kubahatisha pamoja na vibali vingine vinavyotolewa na mamlaka zingine za biashara.

Pia, sheria inakataza watoto wenye umri chini wa miaka 18 kushiriki, kuingia, kukaa au kuzururazurura karibu na maeneo ya michezo ya kubahatisha.

Ninafahamu pia dini mbalimbali hazikubali michezo ya kubahatisha na zina sababu zake, lakini ukweli unaposhiriki mara kwa mara kwenye michezo hii ina asili ya matumizi mabaya ya fedha. Ijapokuwa kuna mambo mengi ambayo yanaweza kuleta matumizi mabaya ya fedha.

Hata hivyo, ninavyofahamu ni kwamba michezo ya kubahatisha inaweza kubadilisha maisha ya mtu wakati wowote kama mtu anaweza kubashiri vizuri.

Kwa mfano hivi sasa mchezo wa kubahatisha katika mechi mbalimbali za soka za ligi tofauti umeshika kasi kutokana na ongezeko la vituo vya kamari ya soka maarufu kama ‘kubeti’.

Watu wa umri tofauti nchini wanashiriki katika mchezo huu na wale wanaobahatika kubashiri vizuri matokeo ya timu ndivyo wanavyopata fedha huku wengine wakiliwa fedha nyingi.

Ieleweke kwamba watu wengi wameingia katika mchezo huu kwa sababu ya kutaka fedha za haraka kwa ajili ya kuendesha maisha.

Ndiyo, wote tunafahamu kwamba hali ya maisha ni ngumu kwa hiyo watu wanatafuta njia mbalimbali mbadala za kujiongezea kipato ikiwamo kushiriki katika michezo ya kubahatisha ‘kubeti’.

Michezo hii, imekuwa ni chanzo cha kipato kwa vijana wengi hasa wa Dar es Salaam ambapo kampuni nyingi za michezo hii zinafanya shughuli zake.

Hii inatokana na kiwango cha fedha kinachotumika katika michezo hiyo ni kidogo ukilinganisha na kiwango ambacho mtu anakipata baada ya kupatia matokeo ya michezo aliyobashiriri.

Kiwango cha chini cha kucheza mchezo huu kwenye kampuni nyingi za kubeti hapa nchini ni Tsh 500, ambacho vijana wengi wanaweza kukimudu na kupitia kiwango hicho mtu anaweza kushinda mpaka Tsh laki moja (100,000) kama tu atapatia matokeo kwa usahihi.

Ifahamike kwamba hapa nchini mchezo huu wa kubahatisha hufanyika kwa ligi za kimataifa huku Ligi Kuu ya England (EPL), Ligi Kuu ya Hispania (La Liga), Ligi Kuu ya Ujerumani (Bundesliga), Ligi Kuu ya Italia (Serie A) na Ligi Kuu ya Ufaransa (Ligue 1) zikiwa maarufu zaidi na zinazovutia watu wengi pamoja na michezo ya timu za Taifa.

Hata hivyo, ligi hizi zilikuwa zimesimama kwa sababu ya kumalizika kwa msimu wa 2017-2018, hivyo watu wengi walizitumia Fainali za Kombe la Dunia 2018 kubeti na zenyewe zimeisha tangu mwezi wa saba.

Hivi sasa, mashabiki wa soka nchini na wale wanaoshiriki mchezo wa kubeti wameanza kufurahia tena kwani Ligi Kuu mbalimbali wanazozishabikia na zinazowapa fedha nyingi mojawapo ikiwa Ligi Kuu England zimeanza jana.

Ligi Kuu ya England (EPL) imeanza Agosti 10, 2018, Ligi Kuu ya Hispania (La Liga) inaanza Agosti 17, 2018, Ligi Kuu ya Ujerumani (Bundesliga) inaanza Agosti 24, 2018.

Pia kuna Ligi Kuu ya Italia (Serie A) inaanza Agosti 19, 2018 na Ligi Kuu ya Ufaransa (Ligue 1) ambayo imeanza jana Agosti 10, 2018. Zote watu wanasubiri kupiga pesa.

Monday, August 13, 2018

Cosmas: Adai jina la kaka yake linamtesa

 

By Imani Makongoro, Mwananchi

Akiwa na miaka 12, Cosmas Cheka anaanza kujifunza ngumi, wakati huo aliambatana na kaka yake, Francis Cheka ambaye hata hivyo kwa wakati huo hakuwa maarufu katika makonde.

Cosmas anasema alipenda kuambatana na kaka yake huyo ambaye amewahi kuwa bingwa wa Dunia wa WBF katika mazoezi ya ngumi na kujikuta akivutiwa kucheza masumbwi hivyo, baada ya kuhitimu darasa la saba, alijiunga na ngumi za ridhaa.

“Nikiwa kwenye ngumi za ridhaa, kaka yangu alitwaa ubingwa wa Afrika, kitendo kile kilinihamasisha na kujikuta nami nikitamani kujiunga na ngumi za kulipwa, niliongeza juhudi katika mazoezi.

“Ilipofika 2007, nilianza rasmi ngumi za kulipwa, nilifanya vile ili kufuata nyayo za Francis ambaye wakati huo hakuna bondia wa Tanzania aliyekuwa akimsumbua ulingoni,” anasema Cosmas.

Jina la Cheka limemgharimu

Cosmas ambaye amechangia baba na Cheka lakini mama zao wakiwa tofauti mara kwa mara hukutana na zomea zomea ya mashabiki wa ngumi ambao ni wapinzani wa kaka yake pale anapokuwa akipigana.

Cosmas anasema anakutana na changamoto nyingi hasa anapokuwa ulingoni anakumbana na wakati mgumu kutoka kwa mashabiki ambao hawampendi kaka yake ambao ugeuzia chuki hiyo kwake huku wengi wakiamini yeye Cosmas anabebwa na jina la Cheka ingawa hana uwezo wa kupigana ngumi wakati si kweli.

“Hata nikishinda wapo wanaoona nimependelewa labda sababu ya Cheka, wengi hawapendi kuona mimi nashinda na Cheka anashinda lakini pia wapo mabondia ambao wanakamia mno wanapocheza na mimi kwa sababu tu ya jina Cheka,” anasema Cosmas.

Tofauti na wanandondi wengine, lakini Cosmas alianza kujifunza ngumi akiwa mwanafunzi wa darasa la tano shule ya Msingi Kinondoni ya Dar es Salaam katikati ya miaka ya 1990.

Monday, August 13, 2018

Njia rahisi za kubaini kuwa na unene uliokithiri



Dk Shita Samwel

Dk Shita Samwel 

Kufanya mazoezi na kuushughulisha mwili mara kwa mara katika maisha yetu ya kila siku ni moja ya njia rahisi za kuufanya mwili kuwa imara kiafya.

Mazoezi yanatufanya kuwa na afya bora hivyo kuepukana na magonjwa yasiyoambukiza ikiwamo magonjwa ya moyo, kisukari na unene uliokithiri.

Wengi wafanya mazoezi watu wazima huwa na nia ya kukabiliana na unene au uzito uliokithiri kwani husababisha matatizo ya kiafya.

Ni kawaida watu walio wengi hufanya mazoezi lakini hutajui tuna uzito kiasi gani au kutofahamu unene alio nao mtu upo katika kundi gani la uzito.

Ni muhimu sana kwa mtu yoyote yule hata asiye mfanyaji mazoezi kufuatilia kwa karibu mwenendo wa uzito wa mwili ili pale unapozidi kiwango cha kawaidi hatua za mapema zichukuliwe.

Kitaalam zipo njia kadhaa ambazo mara nyingi hutumika kubaini unene uliokithiri au kujua mtawanyiko wa mafuta yaliyorundikana mwilini.

Njia hizo na njia za kimahesabu kwa upimaji wa mzunguko wa kiriba tumbo na kugawa kwa urefu wa mwili hujulikana kama waist circumference ratio.

Njia ya pili ni waist-hip ratio yaani uwiano wa mzunguko wa kiriba tumbo na mzunguko wa paja na ya tatu ni Body Mass Index (BMI) ambayo ni ulinganishaji wa uzito na urefu wa mwili.

Njia ya BMI ndio inatumika zaidi kutathimini uzito wa mwili kwa watu wazima, siku ya leo nitaelenga zaidi njia hii kwani ndiyo inatupa taswira ya unene mwilini.

Kwa kawaida hutumia fomula ya kimehasibu kwa kugawa wa uzito katika kilogramu na urefu katika mita kipeuo cha pili. Mfano mtu mwenye Kilo 65 na urefu mita 1.5, BMI ni 70 gawa kwa 1.5 mara 1.5.

Kwa kutumia fomula vipimo vya uzito na urefu zao linalopatikana baada ya kukokotoa ndiyo hujulikana kama BMI, njia hii inatuwezesha kubaini kama ni unene uliokithiri au ni uzito mdogo sana.

Kwa mujibu wa shirika la Afya duniani-WHO BMI inatuwezesha kuanisha uzito wa mtu katika makundi matano. Jibu linalopatikana baada ya kukokotoa ndilo linatoa ainisho la uzito.

Kwa watu wazima BMI ya 18.5-24.9 kitabibu ni uzito salama kiafya, 25.0-29.9 hapa ni uzito mkubwa, 30.0-39.9 hapa huhesabika kama ni unene na 40.0 kuendelea ni unene uliokithiri.

Endapo BMI itakuwa chini ya 18.5 maana yake ni kuwa mtu huyo ana uzito mdogo sana.

Katika BMI hapa tunaweza kutofautisha uzito uliokithiri, unene na unene uliokithiri hivyo wataalam wa afya huitumia njia hii kutathimini hatari za kiafya wanazoweza kuzipata watu baada ya matokeo ya BMI.

Njia hiii ya BMI ni rahisi na haina gharama, ni njia ambayo inawezesha kubaini mrundikano wa mafuta mwilini na uzito uliokithiri kirahisi.

Makampuni ya simu za smart wana mfumo laini ndani ya simu wenye kikokotozi cha BMI unachokifanya ni kujaza tu uzito (Kg) wako na urefu wako kisha inakupa majibu (m). Ingawa BMI si moja kwa moja inapima mrundikano wa mafuta yote mwilini lakini ni kiashiria muhimu kuonyesha kuwa katika hatari ya kupatwa na magonjwa yasiyoambukiza.

Monday, August 13, 2018

Nimeyasikia ya Cannavaro nikamkumbuka Esther Chabruma



Ibrahim Bakari

Ibrahim Bakari 

Hakuna asiyefahamu hali halisi ya sasa wanayopitia Yanga kwamba haikuwahi kutokea lakini kwa jinsi na mazingira, wanabakia kuyazoea.

Baada ya kuondoka mwenyekiti wa klabu hiyo , Yusuf Manji mapema mwaka jana, Yanga imekuwa ikiyumba, Yanga haijatulia hata mara moja.

Manji aliiweka Yanga mabegani, aliisaidia, aliionyeshea njia na mwisho wa siku aliipa mafanikio ambayo Yanga itayakumbuka katika historia ya klabu hiyo.

Lakini kuna kitu kimoja hapa. Kuyumba kwa Yanga ni kama ngoma iliyoanza, na wachezaji nao wakaingia jumla na kuanza kuicheza.

Pamoja na matatizo waliyokuwa nayo, wachezaji wa Yanga hawakupaswa kuicheza ngoma ile ambayo sasa imewafikisha pabaya.

Kuna timu ya Gor Mahia ya Kenya, wana matatizo kama Yanga, lakini angalia wachezaji wake, wanacheza kwa kujtuma wakijua kuwa mbele kuna mafanikio na kweli wameyapata na sasa wanasubiri mamilioni ya CAF kwa kufuzu kuvuka hatua ya makundi.

Hata juzijuzi nilisoma habari moja ya Bakari Malima, beki wa zamani wa Yanga ambaye pia aliwahi kuichezea Simba aliweka wazi kuwa tatizo ni kwa wachezaji wenyewe hawakutaka kujiongeza na hilo limetokana na baadhi ya wanachama, wakishirikiana na viongozi wasiokuwa na mtazamo wa maendeleo na timu na pengine kushawishi mambo yanayoigharimu timu.

Jembe Ulaya aliwashambulia moja kwa moja akisema kuwa wachezaji wa Yanga wamejimaliza wenyewe, hakuna mtu wa kuwalaumu na wasipokuwa makini watazidi kujiongezea matatizo mengi kwa sababu wanachotakiwa wao ni kucheza mpira.

Tuyaache. Hayo yalikuwa ya kushtua tu, lakini hapa hoja yangu ni kuhusu hili la beki wa timu hiyo, Nadir Haroub ‘Cannavaro’, ambaye ametangaza kustaafu soka Yanga.

Cannavaro amestaafu soka na jana alikuwa akiagwa na timu moja ya Mawezi Market ya Daraja la Kwanza.

Nilipoisikia Mawenzi nikamkumbuka mchezaji wa Twiga Stars, Esther Chabruma. Huyu aliagwa kishujaa, ilialikwa timu ya Malawi akacheza kidogo, akavua jezi na kuaga mashabiki.

Chabruma alikuwa kipenzi cha mashabiki kwa aina ya soka yake kiasi cha kumbatiza jina la ‘Lunyamila’.

Nikamkumbuka mchezaji mwingine, Sunday Juma wa Simba, aliagwa kishujaa, alikuwepo Mecky Maxime, Shaaban Nditi walipoachana na timu ya taifa, nikamkumbuka Fred Mbuna waliagwa kishujaa na timu walizocheza nazo zilikuwa zinaeleweka, siwadharau Mawezi Market, lakini si kwa Cannavaro kuagiwa huko vichochoroni.

Mchezaji ameitumikia Yanga muda mrefu, alikuwa nahodha wake na pia kwa timu ya Taifa Stars na Zanzibar Stars kwa wakati mmoja, leo hii anaagwa kwa namna hiyo. Hapa kiukweli Yanga hawakumtendea haki.

Cannavaro ameichezea Yanga kwa nidhamu, alikuwa akipambana kwa nguvu zote, aliumizwa sana Yanga ikifungwa, alikuwa kiongozi bora uwanjani, hakutaka kuona vitendo vya kihuni kupiga waamuzi vikifanyika na kuipa Yanga ubingwa zaidi ya mara tano. Sioni wapi Yanga wamepatia kumuaga Cannavaro kwa staili hiyo.

Nilitaraji ialikwe hata AFC Leopards ya Kenya, hata AS Vita ya Congo au hata kuandaa mechi ya Simba na Yanga au na Azam angalau madaraja yanafanana.

Labda isemwe hii ya Morogoro ni uwakilishi wa mikoani bado ya Dar inakuja, hapo nitaelewa, lakini kwa hili, hawakumtendea haki.

Monday, August 13, 2018

NADIR HAROUB ‘CANNAVARO’ Beki aliyeacha alama Jangwani

 

By Charles Abel,Mwananchi cabel@mwananchi.co.tz

Wakati Yanga ikimuaga rasmi nahodha Nadir Haroub ‘Cannavaro’ aliyestaafu soka, pengo lake linaweza kuchukua muda mrefu kuzibika ndani ya klabu hiyo licha ya yeye mwenyewe kusema kuwa Abdallah Shaibu ‘Ninja’ kuwa anaweza kuziba pengo lake.

Mafanikio aliyopata Yanga, nidhamu ya maisha nje, ndani ya uwanja na uhusiano uzuri baina yake na wachezaji wenzake ni miongoni mwa sifa zinazombeba Cannavaro.

Pia uhusiano wake na benchi la ufundi, viongozi na wadau wa soka nchini vinaonekana ni mfupa mgumu kwa wachezaji waliopo Yanga kufuata nyayo za beki huyo wa kati.

Wachezaji Kelvin Yondani, Juma Abdul, Andrew Vincent na Papy Tshishimbi mmoja ana nafasi ya kutangazwa nahodha mpya wa Yanga, yeyote kati yao atalazimika kufanya kazi kubwa kufikia daraja na hadhi aliyokuwa nayo Cannavaro.

Katika kipindi cha miaka 12 aliyocheza Yanga baada ya kujiunga nayo mwaka 2006 akitokea Malindi ya Zanzibar, Cannavaro ameshinda jumla ya mataji 15 yanayomfanya awe mchezaji mwenye mafanikio makubwa kuliko mwingine kwenye kikosi cha Yanga kuanzia mwaka 2000 hadi sasa.

Kama ilivyo kwa mchezaji mwingine wa Yanga muda mrefu miaka ya karibuni, Fred Mbuna, Cannavaro ameshinda mataji saba ya Ligi Kuu Tanzania Bara mwaka 2008, 2009, 2011, 2013, 2015, 2016 na 2017, mawili ya Klabu Bingwa Afrika Mashariki na Kati, manne ya Ngao ya Jamii na moja Kombe la FA.

Nguli huyo pia ameiongoza Yanga kufuzu hatua ya makundi ya Kombe la Shirikisho Afrika mara mbili mwaka 2016 na 2018.

Mafanikio hayo yalimfanya Cannavaro kupewa heshima kubwa Yanga kutoka kwa wachezaji, benchi la ufundi na mashabiki jambo ambalo lilimfanya awe na nguvu ya ushawishi katika uamuzi kwenye baadhi ya masuala muhimu.

Pamoja na staili yake ya kucheza soka la kutumia nguvu, Cannavaro ni miongoni mwa wachezaji ambao ilikuwa nadra kuadhibiwa kwa utovu wa nidhamu na mara kwa mara alionyeshwa kadi kwa rafu za kawaida mchezoni.

Beki huyo ndiye alikuwa kinara wa kuwatuliza wenzake wanapomzonga mwamuzi, mfano tukio la mwaka 2014 ambalo alifanya kazi kubwa kuwatuliza wachezaji walipotaka kumpiga mwamuzi Israel Nkongo katika mchezo dhidi ya Azam FC ambao Yanga ilipigwa mabao 3-1.

Ingawa Yondani anapewa nafasi ya kuwa nahodha atakayerithi mikoba, rekodi yake ya nidhamu haivutii na mara kwa mara amekuwa akijihusisha na vitendo visivyokuwa vya kiungwana uwanjani ambavyo vimekuwa vikichangia akutane na adhabu ya kufungiwa ama kupigwa kadi za mara kwa mara.

Upande mwingine ambao nahodha ajaye ana kibarua kigumu kufuata nyayo za Cannavaro ni uhusiano kwa vyombo vya habari, sifa ambayo nahodha huyo mstaafu wa Yanga imemtengenezea taswira nzuri kwa wadau wa soka nje na ndani ya nchi.

Akizungumza na gazeti hili, Cannavaro alisema anaamini Yanga itapata mtu sahihi wa kuziba nafasi yake na ametaja siri ya mafanikio yake kwa miaka 12 ndani ya klabu hiyo.

“Wachezaji wapo wazuri lakini kiukweli sifahamu nani anayeweza kuziba nafasi niliyoacha. Kikubwa niwaombe tu wachezaji wa Yanga wajitume, wawe na nidhamu na uvumilivu. Hiyo ndiyo siri ya mafanikio ambayo imenisaidia niweze kuichezea klabu kwa miaka 12 mfululizo.

Lakini pia nadhani tabia yangu ya kuheshimu mtu yeyote pasipo kuangalia mkubwa au mdogo nayo ni chachu ya mafanikio yangu.

Kingine ni kujitunza pindi wanapokuwa nje ya uwanja na kujiepusha na mambo yanayoweza kuhatarisha vipaji vyao kama vilevi, ngono na ulaji usiokuwa na mpangilio hasa vyakula vya mafuta,” alisema Cannavaro.

Beki huyo alisema kuwa hatasahau makali ya washambuliaji watatu waliokuwa wakimpa taabu uwanjani akiwemo nyota wa zamani wa Simba Haruna Moshi ‘Boban’.

“Nimekutana na washambuliaji wengi wazuri, lakini binafsi walionisumbua zaidi ni Samuel Eto’o wa Cameroon, Didier Drogba wa Ivory Coast na Haruna Moshi wa Simba,” alisema Cannavaro.

Alisema anajivunia kucheza pacha na Yondani, Salum Sued ‘Kusi’ akidai ni mabeki hodari ambao atawakumbuka katika kikosi cha Yanga.

Cannavaro alisema Yondani na Sued ni mabeki mahiri na hakuwa na presha walipounda safu ya ulinzi katika mechi husika.

Pia alimtaja beki wa Azam Aggrey Morris kuwa ni mmoja wa mabeki bora wa kati anayejivunia kucheza naye katika kikosi cha Taifa Stars.

Nahodha wa zamani wa Yanga na Taifa Stars, Ally Mayay alisema ingawa ni lazima Yanga iwe na nahodha mpya, hadhani kama Yondan ataweza kuvaa viatu vya Cannavaro.

“Uteuzi wa nahodha wa timu unalingana na utashi wa benchi la ufundi kwa kuangalia mchango wa mchezaji husika kikosini pamoja na uzoefu hivyo naona mtu kama Yondani anaweza kupata nafasi hiyo.

Lakini naona kabisa Cannavaro ameacha pengo kwa sababu ni mtu ambaye alikuwa na nguvu ya ushawishi na nidhamu iliyopitiliza, lakini kubwa zaidi ni utayari wake wa kujituma na kujifunza.

Cannavaro alikuwa na uwezo wa kuyabeba matatizo ya timu na kuyafikisha katika mahali sahihi pasipo kuathiri upande wowote ama wachezaji au uongozi. Na hii ni maana halisi ya nahodha kwamba unatakiwa ‘kubalansi’ mambo klabu inapopita katika kipindi kigumu,” anasema Mayay.

Monday, August 13, 2018

Amunike atatupeleka Cameroon 2019?

 

By Mwandishi Wetur, Mwananchi

Miaka 30 baada ya Mendonca kuachana na Barcelona, hatimaye staa wa Nigeria, Emmanuel Amunike aliweka rekodi ya kuwa Mwafrika wa pili kuvaa jezi ya Barcelona.

Aliivaa jezi hiyo kuanzia mwaka 1996 hadi mwaka 2000, kwanza chini ya kocha wa Kiingereza marehemu, Sir Bobby Robson kisha chini ya kocha maarufu wa Kidachi, Louis van Gaal. Alitwaa mataji sita na Barcelona katika kipindi chake cha miaka minne klabuni hapo.

Leo hii Amunike amepewa kazi kubwa Tanzania kwa ajili ya kuiandaa na kuifikisha Fainali za Afrika mwakani, Taifa Stars zitakazofanyika nchini Cameroon.

Amunike ameingia mkataba wa miaka mwiwili na atakuwa na kazi ya kunoa pia timu za vijana za U-17, U-20 na U-23.

Enzi za Amunike

Enzi zake Winga huyo mwenye miaka 47 aliyeichezea Super Eagles mechi 27 na kufunga mabao tisa kati ya mwaka 1993–2001 alijitosa kwenye ukocha mwaka 2008 akiwa kocha msaidizi wa klabu ya Al Hazm. Baadaye aliteuliwa kuwa Kocha mkuu wa Julius Berger ya Nigeria aliyoinoa kwa muda mfupi kabla yam waka 2009–2011 kuinoa Ocean Boys, mwaka 2014-2017 aliinoa timu ya Taifa ya vijana chini ya miaka 17 ya Nigeria na 2017–2018 aliinoa klabu ya Al Khartoum SC ya Sudan.

Kocha wa 11

Amunike anakuwa kocha wa 11 kuinoa Taifa Stars ndani ya miaka 16, akitanguliwa na Mshindo Msolla, Tanzania (2002–03), Badru Hafidh, Tanzania (2003–06) na Júlio César Leal, Brazil mwaka 2006.

Mwingine ni Márcio Máximo, Brazil (2006–10), Jan Poulsen, Denmark (2010–12) Kim Poulsen Denmark (2012–14), Salum Madadi (2014, kocha wa muda), Mart Nooij, Uholanzi (2014–2015), Charles Boniface Mkwasa, Tanzania (2015–2017) na Salum Mayanga ambaye ni Tanzania

(2017) na 2018 Amunike kutoka Nigeria.

Mzaliwa huyu wa Eziobodo, Nigeria, hakupata mafanikio sana kiuchezaji katika medani ya kimataifa kwani aliiwakilisha Nigeria kwenye fainali za Kombe la Dunia mwaka 1994, miaka Club career kwa ngazi ya klabu alianza kuwika akiichezea Julius Berger F.C ya kwao Nigeria kabla ya kuhamia Zamalek ya Misri mwaka 1994.

Kufanya kwake vizuri katika mchezo mmoja aliocheza wa fainali za Kombe la Dunia kukampa ulaji Sporting Clube ya Ureno alikofunga mabao saba katika msimu wake wa kwanza, bao

lililompa heshima ni alilofunga dhidi ya mahasimu wa jiji la Lisbon, timu ya Benfica katika ushindi wa 1–0 mchezo wa Desemba mosi 1994.

Desemba mwaka 1996 alisajiliwa na FC Barcelona kwa ada ya dola 3.6 milioni, katika

klabu hiyo licha ya kuanza vizuri hakupata mafanikio sana kwani aliumia goti lililomuweka nje kwa msimu mzima na mwaka 1997 klabu hiyo ikamtibia hadi mwaka 2000 ilipoamua kumuacha.

Baada ya kuondoka Barcelona alisajiliwa na Albacete Balompié pia ya Ligi Kuu Hispania lakini nako hakucheza sana kutokana na tatizo la goti ambako aliuzwa kwenda Busan I’Cons ya Korea Kusini, lakini alicheza kwa muda mfupi na kujiunga na Al-Wehdat SC ya Jordan, kabla ya goti hilo kumlazimisha kustaafu mwaka 2008.

Baada ya kustaafu aligeukia ukocha na akateuliwa kuwa kocha msaidizi wa timu ya Al-Hazm ya Saudi Arabia, lakini miezi michache baadaye aliiac ha baada ya kupokea ofa ya kuwa skauti wa timu ya Manchester United.

Hakufanya kazi ya uskauti kwa kipindi kirefu kwani Desemba 23, 2008, Amunike aliteuliwa kuwa Kocha Mkuu wa timu ya Julius Berger, licha ya United kumkubalia kufanya kazi zote kwa pamoja lakini aliamua kuchana na uskauti na kubakia kwenye ukocha.

Monday, August 6, 2018

Kipa mpya Liverpool amvuruga Klopp

 

Jurgen Klopp amesifu kiwango bora cha kipa Alisson Becker muda mfupi, baada ya Liverpool kuichapa Napoli mabao 5-0.

Alisson amejiunga na Liverpool katika usajili wa majira ya kiangazi na juzi alipewa nafasi ya kusimama katika milingoti mitatu.

Klopp alisema mchezaji huyo aliyetua kwa Pauni65 milioni kutoka AS Roma, ndiye kipa namba moja katika kikosi chake msimu ujao. Alisson alicheza kwa kiwango bora mchezo huo ukiwa ni wa kwanza tangu alipojiunga na klabu hiyo yenye maskani Anfield.

Mchezaji huyo ameingia katika rekodi ya kuwa kipa ghali zaidi katika mashindano ya Ligi Kuu England.

Kipa huyo alifanya mazoezi kwa siku tano kabla ya kupewa jukumu la kuikabili Napoli katika mchezo uliochezwa mjini Dublin.

Liverpool ilitawala mchezo kwa dakika zote tisini mbele ya mashabiki 51,512 waliojitokeza kushuhudia mchezo huo.

“Ni mchezaji bora. Kila mmoja ameshangaa kumuona akicheza kwa kiwango bora katika mchezo wa kwanza, amezoea haraka mazingira,” alisema kocha huyo wa zamani wa Borussia Dortmund.

Pia alisema mchezaji James Milner alicheza kwa kiwango bora akiwa chachu ya mafanikio ya kikosi hicho katika mchezo huo. Milner alianza kuifungia Liverpool bao la kwanza kabla ya Georginio Wijnaldum kuongeza bao la pili kwa mpira wa kichwa.

Mshambuliaji nyota na nahodha wa Misri, Mohamed Salah aliweka wavuni bao la tatu kabla ya Daniel Sturridge kuongeza jingine na Alberto Moreno alifunga bao la tano. Timu hizo zipo katika ziara ya michezo kujiandaa na msimu mpya.

Monday, August 6, 2018

Uwanja unavyowatesa viongozi Simba

 

By Charles Abel na Thobias Sebastian,

Achana na Tamasha la Simba Day litakalofanyika Agosti 8 kwenye Uwanja wa Taifa, hilo lipo, lakini kuna hili, makocha wa klabu ya Simba wameueleza uongozi wa klabu ya Simba kwamba hawataki kusikia wanacheza mazoezi kwenye viwanja vibovu visivyo na hadhi.

Mara kadhaa, makocha wamekuwa wakiwalazimisha kama si kuwakatalia viongozi viwanja vya mazoezi kwa kuwa havina ubora na vinasababisha majeraha kwa wachezaji na wakati mwingine kusababisha tatizo la enka.

Kwa muda mrefu sasa, Simba imekuwa ikihaha uwanja wa mazoezi na kufikia hatua ya ‘kudandadanda’ kwenye viwanja vya wengine kama ule wa Boko Veterans au Polisi Kurasini na wakati mwingine viwanja vya Gymkhana, Dar es Salaam. Gharama za kutumia uwanja wa Boko ni Sh300,000 kwa siku.

Kaimu Rais wa klabu ya Simba, Abdallah Salim ‘TryAgain’ anakiri kusema kati ya mambo yanayowaumiza kichwa ni suala la Simba kukosa uwanja, lakini akasema mwezi huu haumaliziki kwa kuwa makocha wamekuwa wakiwasumbua.

TryAgain anasema kuwa kuna suala la kesi ambalo liko mahakamani na hataki kulizunguzia na kwamba kwa mwelekeo wake, mambo yanaweza kufunguka na wakapata njia ya uwanja.

“Ninachotaka kusema ni kwamba watu wawe na subira, mwezi huu wa nane haumaliziki, tukimaliza Simba Day tunakwenda Bunju, hilo ndilo tunalotaka kulifanya kwa sasa, Simba klabu kubwa lazima kuwa na uwanja wake,” anasema.

Anasema makocha hawataki kupeleka wachezaji kwenye baadhi ya viwanja kwa kuwa havina ubora na akasema viwanja vizuri ni gharama hivyo ni wakati sasa Simba kupunguza ama kuondoa gharama hizo kwa kujenga uwanja wa kisasa wa Bunju.

Simba imekuwa ikihangaika uwanja wa mazoezi na huwa inatumia Uwanja wa Boko Veterans kwa ajili ya mazoezi ambao hutozwa Sh300,000 kwa siku.

Mikakati ya Uwanja wa Bunju

Uongozi wa klabu ya Simba kwa sasa upo katika maandalizi ya tamasha kila mwaka la Simba Day, sasa baada ya tamasha hilo, Simba itaanika mikakati ya ujenzi wa uwanja wao wa mazoezi huko Bunju nje kidogo ya jiji la Dar es Salaam.

Jambo hilo litakalomaanisha kuwa muda si mrefu ujao klabu hiyo itaachana na viwanja vya kukodi kwa ajili ya mazoezi, mechi za kirafiki na zile za mashindano.

Klabu hiyo inayoshikilia taji la ubingwa wa Ligi Kuu Tanzania Bara, kwa sasa inakaribia kujivunia uwekezaji uliofanywa na bilionea kijana Mohammed Dewji ‘MO’ ambaye amekuwa akimwaga pesa katika kufanikisha mambo ya kimaendeleo.

Akisisitiza hilo, Mjumbe wa Kamati ya Utendaji ya Simba, Said Tully naye amefunguka kwa kirefu kwa kubainisha kuhusu mpango wa kuanza ujenzi wa uwanja wao uliopo Bunju.

Tully anakiri kuwa kwa sasa wapo katika mchaka mchaka kwa ajili ya kufanikisha Simba Day, lakini wakimaliza watatoa tamka rasmi kuhusiana na maandalizi ya ujenzi huo.

Anadokeza kuwa katika ujenzi wa uwanja huo itahusisha uwanja wa mazoezi wa timu ya wakubwa, uwanja wa timu ya vijana wadogo, nyumba za kuishi wachezaji wanapokuwa kambini yaani Hosteli, sehemu ya kulia chakula, vyumba vya huduma ya kwanza na ukumbi wa mikutano.

Anasema ujenzi huu utachukua sehemu ndogo tu ya eneo lao lililopo Bunju na kwamba hapo baadaye wanatarajia kujenga uwanja mkubwa ambao utakuwa maalumu kwa mechi za mashindano ikiwemo Ligi Kuu Tanzania Bara na michuano mingine.

“Kama uongozi hili la kujenga uwanja ndilo jambo linalotuumiza vichwa kwa sasa, lipo katika mipango yetu mikuu, tayari tunazo nyasi za bandia kama utazikumbuka zile ambazo zilikwama kipindi kile pamoja na vitu vingine vyote, tukimaliza jambo hili lilitutinga klabu itawaiteni ili kutoa tamko rasmi kuhusu suala la ujenzi,” anasema na kuongeza.

“Mipango ikienda kama tulivyopanga nadhani Simba itakuwa na uwanja wake wa mazoezi wa kisasa na siku si nyingi tamko rasmi litatoka juu ya hili na haraka kazi ya ujenzi itaanza,” anasema Tully.

Anasema kuna mambo wanayaweka sawa upande wao na serikali kuhusu kujenga uwanja huo na wapo katika hatua za mwisho kabisa.

Anaelezea namna wanavyoshindwa kufikia malengo ya timu yao kutokana na kukosa uwanja na wakati mwingine kocha hulazimika kuahirisha program yake ya maandalizi kutokana na kutumia viwanja vya kukodi.

Simba klabu iliyoanzishwa mwaka 1936 hadi leo ingali inategemea viwanja vya kukodi kwa ajili ya mazoezi pamoja na mechi na hutumia Uwanja wa Taifa na ule wa Uhuru kama viwanja vya nyumbani katika kuchezea mechi zake za Ligi na michuano mingine.

Kutokana na kutokuwa na uwanja Simba hulazimika kufanya mazoezi kwa kuhamahama kutokana na sababu mbali mbali, kwa mazoezi imekuwa ikitumia zaidi viwanja vya Chuo cha Bandari, Chuo cha Polisi Kurasini, Klabu ya Gymkhana, White Sands Hoteli na Boko Veterans.

Gharama za kukodi uwanja ni kuanzia Sh 300,000, kwa awamu iwe ni mazoezi ya asubuhi au ya jioni na kama ni mara mbili kwa siku inamaanisha watatumia Sh 600,000 kwa siku kwa uwanja peke yake.

Monday, August 6, 2018

Mwashiuya alivyojipanga msimu wa Ligi Kuu 2018/19

 

By Olipa Assa, Mwananchi

“Mafanikio ya kitu chochote hayaji kirahisi”, hiyo ni kauli ya winga mpya wa Singida United, Geofrey Mwashiuya anayeamini kuondoka kwake Yanga sio mwisho wa ndoto yake ya kucheza soka nje ya nchi.

Mwashiuya angali anaikumbuka safari yake namna alivyotua Yanga, mwaka 2015 na kukiri kuwa hakutarajia kuvaa uzi wa klabu kongwe kama hiyo, yenye mashabiki lukuki akitokea timu ya Daraja la Kwanza, Kimondo FC ya Mbeya na kudai kama hiyo iliwezekana atashindwaje kucheza soka Ulaya ama kwingineko nje?.

Ameweza kufunguka mengi katika mahojiano maalumu na Spoti Mikiki kwamba kuachwa kwenye mpango wa kocha wa Yanga, Mwinyi Zahera kwa msimu wa 2018/19, hakumaanishi kama ndio mwisho wa safari yake ya kisoka bali anachukulia kama changamoto ya safari anayoelekea katika kilele cha ndoto zake. “Kila kitu kina wakati wake, mfano wakati nacheza Kimondo nilikuwa natamani sana, nije nicheze timu moja na Salum Telela wakati yupo Yanga, nilivyomkuta tu, kwangu ilikuwa muujiza mkubwa sana, kama nilichoweza kuwaza mwanzo na kikawa nitashindwaje kufika ninapotaka,”anahoji.

MIAKA MITATU YANGA

Alijiunga na Yanga, mwaka 2015 akitokea Kimondo FC ya Mbeya, inayoshiriki Ligi Daraja la Kwanza, amekiri kuwa hiyo ilikuwa hatua kubwa ya maendeleo ya kazi yake ya soka, kitu kikubwa kuliko yote alichokipata hapo ni kwamba klabu hiyo imemtambulisha katika medani ya soka ndani na nje ya nchi.

“Yanga ni klabu kubwa, jina lake tu ni utajiri tosha, hivyo kuvaa jezi yao na kuitumikia kwenye michuano ya Ligi ya Mabingwa Afrika, imenitambulisha na kulitangaza vilivyo jina langu.

“Kuna kipindi nilikuwa natafutwa sana na klabu za nje, naamini ipo siku moja ndoto hiyo itatimia, kwa sababu sijakata tamaa, naendelea kupambana ili kiwango changu kiwe juu,”anasema

Aliyekuwa kocha wa Yanga wakati huo, Hans Van Der Pluijm raia wa Uholanzi, aliyempokea Mwashiuya na kumpa nafasi aliwahi kukaririwa akisema kwamba, nyota huyo ni hazina kubwa kwa Taifa, endapo atajitambyua na kuwajibika ipasavyo kukiendeleza kipaji chake.

Kipindi hicho Pluijm alifananisha uwezo wa Mwashiuya na alivyokuwa Mrisho Ngassa ambaye alikuwa anatikisa ndani na nje ya nchi.

“Mwashiuya akizingatia kila anachoelekezwa atasikika anga nyingine, nimeona kitu katika mguu wake,” yalikuwa maneno ya Pluijm wakati huo.

SINGIDA UNITED

Anaitazama Singida United, kama kivuko cha kumpeleka ng’ambo kwa maana ya kucheza soka la nje ya mipaka ya Tanzania kama ilivyo kwa kina Simon Msuva anayecheza Difaa El Jadid ya Morocco, Mbwana Samatta aliyeko Genk ya Ubeligiji na Faridi Mussa aliyeko Getafe ya Hispania.

“Bado nina nafasi ya kucheza nje, ndio kwanza nina miaka 22, ninachotakiwa ni kujituma kwa bidii ili kuyaishi ninayoyakusudia, bila shaka nitafika hapo, njia ya kuyafikia ni kujituma na kutumia vema nafasi nitakayopata mbele ya kocha wangu mpya, Hemed Morocco,” anasema.

ANAVYOUONA MSIMU WA 2018/19

Anaitazama ligi ijayo yenye timu 20 kama itakayokuwa na ushindani wa hali ya juu, lakini kwake anaona ni kitu kizuri kitakachowapa wachezaji muda mwingi wa kutumika na kufanya wapate uzoefu mkubwa.

Monday, August 6, 2018

Mwambieni Klopp, supermarket ina laana

 

By Nacasius Agwanda

Akiwa anatua kwenye klabu ya Liverpool, Jurgen Klopp alikuwa anakuja kufanya kazi kwenye klabu yenye historia. Hilo ndilo jambo pekee ambalo Liverpool wangeweza kujivunia nalo na ambalo wamekuwa wanajivunia nalo kwa kipindi cha muda mrefu. Pengine kubwa Zaidi ni kuwa alikuwa anatua kwenye mandhari ambayo haikuwa na tofauti sana na alipokuwa anatoka.

Uwanja wa Anfield mara zote umekuwa ukiwa unapambwa na kelele za nyimbo yao maarufu ya You’ll never walk Alone, kelele ambazo kutokana na umoja wa washabiki, kutokukata tamaa na kuapa morali wachezaji ni wazi kabisa kuwa hazikuwa na tofauti na tabia za washabiki wa klabu ya Borussia Dortmund kwenye uwanja wao wa Signal Iduna Park. Bahati nzuri hawa nao pia kwa nayakati kadhaa uimba nyimbo hii ambayo imekuwa nembo ya Liverpool hasa kwa herufi nne za YNWA.

Pengine kumbukumbu kubwa Zaidi ambayo Liverpool walijivunia nayo ilikuwa fainali ya Instabul yam waka 2005 wakati wakiacha historian a majonzi kwenye mioyo ya washabiki wa AC Milan, huku Brendan Rodgers akijaribu kufanya maajabu yaliyowashinda kwa misimu Zaidi ya ishirini. Matokeo ya kuja kwa Jurgen Klopp ilikuwa ni safari kwenye barabara mpya ambayo John W Henry na washirika wake walijaribu kuitengeneza tangu walipoinunua klabu ya Liverpool iliyokuwa inaelekea kuanguka mwaka 2010.

Pengine safari yao ilianza kuchongwa na ujio wa kocha Sir Kenny Mathieson Dalglish ambaye ndani ya Liverpool neno Sir alilopewa karibuni na Malkia wa Uingereza, Elizabeth halina maana ukilinganisha na lile la King Kenny Dalglish. Huyu ndiye ambaye alikuja akiwa amebeba Imani za washabiki wa Liverpool, Imani zilizoingia kwenye akili mpaka kukutanisha fikra za waliokuwa wengi eneo moja. Ni huyu ambaye alisababisha mtaalamu Edo Kumwembe aandike moja ya Makala bora kwa wakati huo iliyobeba kichwa cha habari “Dalglish anaporudisha Ghetto la Uingereza.”

Kwenye fikra za Dalglish, Liverpool ilitakiwa kurejea kwa wenye uchungu nayo kwa kiasi kikubwa “Waingereza”, ilitakiwa pia iwe na falsafa yake iliyowafanya kuwa hapo walipo na ilitakiwa iwe na watu ambao ikiimbwa nyimbo ya You’ll Never Walk Alone basi wangeweza kuacha mguu ndani ya uwanja na damu kwenye kiatu cha adui.

Bahati mbaya ni kuwa Maisha yalishasogea kwa kasi, roho ya Steven Gerrard usingeweza kuipata kwa Henderson, miguu ya Ian Rush isingekuwa kwa Andy Carol na vijana wengi ambao aliwasajili hawakuwahi kuelewa maana ya chumba cha ufundi cha “bootroom” ambacho King Kenny alijaribu kuwakumbusha kuwa ndicho kilicholeta mafanikio makubwa.

Baada ya kushindwa kuwa dereva imara kutokana na mabadiliko ya sheria za barabarani ukilinganisha na wakati ambao yeye alikuwa imara, Liverpool chini ya Ian Ayre walitizama wakaona kuna kijana wa kisasa aliyeitwa Brendan Rodgers ambaye alikuwa analeta ladha ya Barcelona, TikiTaka ndani ya EPL. Kijana ambaye alikuwa na asili ya hapohapo nyumbani na ambaye alikuwa anacheza soka tamu kuliko kawaida.

Kwenye macho ya wamiliki wa Liverpool, fedha nyingi ilikwishatumika kwa Suarez, Caroll, Henderson na akina Downing hivyo walihitaji kocha ambaye angeweza kufanya kazi kwenye utaratibu wao wa filosofia ya “moneyball” ambayo inasimamia thamani ya fedha dhidi ya thamani ya mchezaji husika. Kwenye kichwa cha Brendan Rodgers, Liverpool haikuwa na presha kubwa na angeweza kuleta ubora wa Swansea ndani ya Anfield.

Hata baada ya msimu wa kwanza kuwa wa kawaida, alifanikiwa kuwanywesha Divai kupitia miguu ya Luis Suarez na ushirikiano na Daniel Sturridge na almanusura aweke historia ya kuleta taji ya EPL. Uzoefu wake ulimwangusha namna ya kumaliza ligi hasa Mourinho akiwa mbele yake lakini pia doa ambalo washabiki wengi wa Liverpool hujaribu kulisahau la utelezi wa Steven Gerrard ndilo lililoharibu sherehe. Kipindi chote hiki Rodgers alifanikiwa kwa kutumia fedha kidogo kwa kuwapata Coutinho, Sturridge na aina ya akina Allen. Shetani aliyeitwa fedha akaingia ndani ya Liverpool baada ya kutengeneza faida na alimwelemea Brendan Rodgers kwani alichoshika sokoni kiligeuka kuwa dhahabu au Almasi bandia.

Dereva wa pili huyu akashindwa kufikisha gari katika kilele cha ndoto. Mkono wa kwaheri ukawa ni haki yake na ndipo alipokuja Jurgen Klopp ambaye alijinasibu kuwa yeye ni the Normal One ili kumpiga kijembe Mourinho ambaye huitwa The Special One. Klopp aliahidi misimu mitatu isingemalizika bure ndani ya Liverpool.

Mwaka wake wa tatu unakamilika Oktoba mwaka hakuna kikombe ndani ya Liverpool lakini pengine kuna mwanga tofauti na waliomtangulia. Amefika kwenye fainali tatu katika kipindi hiki, Klabu bingwa Ulaya, Europa pamoja na kombe la ligi huku akifuzu klabu bingwa Ulaya mara mbili mfululizo. Klabu ya Liverpool inacheza vyema huku pia wakiwa na safu ya ushambuliaji nzuri.

Kubwa Zaidi ni kuwa chini yake Liverpool imekuwa inavutia wachezaji wengi wakubwa huku wakati huohuo akiwa amefanya biashara za wachezaji ambao wamefanya vyema kikosini tofauti na waliomtangulia na kuweza kupata ubora kwenye wachezaji walioanza kuonekana hawakuwa na lolote kama Firmino, Lallana na Emre Can aliyeondoka zake.

Liverpool inafanya kazi kwa faida, thamani yake imeongezeka maradufu tangu John Henry aipate kwa Paundi 300 milion tu na sasa anaweza kuiuza kwa zaidi ya bilioni moja na nusu. Ndoa ya wamiliki hawa na Klopp inaonekana kuwa takatifu lakini kuna kitu kimoja tu ambacho miaka yote kimekuwa dhambi kwenye ndoa za waliomtangulia, fedha.

King Kenny alifanya vyema akiwa kocha wa muda kutoka kwa Roy Hodgson mpaka alipopewa fedha za ukichaa, Brendan Rodgers alifanya vyema kwa bajeti ya dagaa mpaka alipopata fedha ya kununulia nyama. Na sasa Klopp amewekwa kwenye “supermarket” kabisa, amewapata beki ghali Zaidi duniani, Virgil Van Djik, amempata kipa ghali Zaidi duniani Allison huku pia akiwa amemwaga fedha kwa Naby Keita na kelele zikiwa anahitaji huduma za Nabil Fekir ambaye hatokuja kwa bei nafuu.

Maisha yamekua sawia na inaonekana kama fedha zote zilitumika vyema, na kwenye mikono yake hata Chamberlain aligeuka lulu. Kwa sasa presha itakuwa juu Zaidi, Liverpool itakabiliwa kwa umakini Zaidi, na kwake yeye ubingwa kwa msimu huu ndio mafanikio kwa sababu washabiki wameshaonja machungu ya fainali na machungu ya Gerrard kuteleza kwa kipindi cha misimu mitatu iliyopita.

Fedha siku zote imekuwa chungu kwa Liverpool na waliomtangulia walirudi kwao kila walipofunguliwa mlango wa Supermarket, ni kama iliachwa laana kwenye fedha ya manunuzi. Nina Imani kuwa kwake itakuwa tofauti na ataleta faraja. Kwenye karatasi, Liverpool ni timu hatari Zaidi EPL, tusubiri ndani ya uwanja na presha za Klopp.

Monday, August 6, 2018

Banda alivyoacha deni kwa Samatta, Msuva, Kichuya

 

By Eliya Solomon, Mwananchi

Soka ni miongoni mwa michezo inayotumia zaidi nguvu, akili, maarifa na ili mchezaji acheze kwa kiwango bora, anapaswa kuwa na utimamu wa mwili.

Baadhi ya wachezaji waliwahi kupata madhara na kuweka rehani vipaji vyao kwa kushindwa kutunza utimamu wa mwili na mmoja wa nyota hao ni Kevin Prince Boateng.

Mfungaji bora wa muda wote wa mabao Arsenal, Thierry Henry, aliwahi kukaririwa akisema nusura ndoa yake ihitimishe safari ya soka baada ya kuachana na mkewe.

Baada ya kudumu katika ndoa kwa miaka minne, Claire Merry, aliomba talaka mahakamani baada ya kushindwa kumaliza matatizo yao ya ndani.

Henry aliyelazimika kumlipa Claire Pauni8 milioni, anasema alipata mshituko uliompa msongo wa mawazo na moja ya sababu za kuihama Arsenal kwenda Barcelona ilikuwa kwenda kutuliza akili.

Hatari ya kutotunza mwili kunamfanya mchezaji kupata majeraha ya mara kwa mara, kuchoka haraka na wakati mwingine mchezaji anashindwa kuendelea na mchezo kutokana na uchovu.

Beki nguli wa Azam Aggrey Morris anasema siri kubwa ya kucheza muda mrefu kwenye kiwango bora inachangiwa na mkewe.

Mkasa wa Boateng ni fundisho kwa wachezaji wengine duniani wanaopenda starehe.

Boateng amekuwa akipenda kutumia mwili vibaya na mke wake, Melissa Satta amekuwa akilalamikia matukio ya mara kwa mara kuhusu mwenendo mbaya wa mchezaji huyo.

Matokeo ya kupenda starehe yalizalisha majeraha ya mara kwa mara ambayo yalimfanya kutimka AC Milan, baada ya kupoteza namba kwenye kikosi cha kwanza.

Wiki iliyopita mchezaji wa kimataifa anayecheza soka ya kulipwa Afrika Kusini, Abdi Banda, ameamua kuchukua ‘jiko’, baada ya kufunga ndoa na Zabibu Kiba.

Baada ya Banda anayecheza klabu ya Baroka ya Afrika Kusini, sasa ameacha deni kwa baadhi ya nyota hawa wa Tanzania ambao bado hawajaingia kwenye maisha ya ndoa.

SAIMON MSUVA

Mshambuliaji wa Difaa El Jadida ya Morocco, Saimon Msuva bado hajafunga pingu za maisha, nyota huyo za zamani wa Yanga ni miongoni mwa wachezaji waliotoa pongezi kwa Banda.

Akizungumzia mustakabali wake wa ndoa, Msuva anasema muda haujafika na utakapofika hatasita kufanya uamuzi wa kuachana na ukapera.

MBWANA SAMATTA

Nahodha wa Taifa Stars, Mbwana Samatta anayecheza KRC Genk naye ameachiwa deni na Banda ambalo anatakiwa kulilipa ili kufanikisha mipango ya kupata mafanikio katika mchezo wa soka.

SHIZA KICHUYA

Licha ya Kichuya wa Simba kuachwa mbali kiumri na mastaa wenzake akina Samatta na Msuva, pia anatakiwa kuanza kuwa na mikakati ya kujiandaa kuingia kwenye maisha ya ndoa ili kulinda kipaji chake kwa kutochosha mwili wake.

HASSAN KESSY

Nyota wa zamani wa Yanga, Hassani Kessy aliyejiunga na Nkana FC ya Zambia ni miongoni mwa wachezaji walioachiwa deni na Banda, beki huyo wa kulia bado ‘anaseti’ mipango yake sawa kabla ya kuingia kwenye ndoa.

JONAS MKUDE

Kiungo wa Simba, Jonas Mkude hajaingia kwenye maisha ya ndoa ambayo Morris anaamini yanaweza kumsaidia mchezaji kutulia na kuwa kwenye kiwango bora muda mrefu.

Monday, August 6, 2018

Ronaldo, mtambo wa mabao uliotua Juventus kusaka rekodi

 

By Eliya Solomon, Mwananchi

Mchezaji bora mara tano wa dunia, Cristiano Ronaldo ameanza maisha mapya katika klabu ya Juventus ‘Kibibi Kizee’ cha Turin.

Nahodha huyo wa Ureno, msimu ujao atakuwa na uzi mpya wa Juventus akiwania tena rekodi ya kufunga mabao katika Ligi Kuu Italia ‘Seria A’.

Wiki chache zilizopita dunia ilishitushwa na uhamisho wa Ronaldo aliyewahi kutamba na Manchester United kabla ya kutua Real Madrid mwaka 2009.

Baada ya kuwa mfungaji bora wa muda wote Real Madrid, nyota huyo ametimkia Juventus kwa ada ya Pauni105 milioni.

Ronaldo ametimka Real Madrid baada ya kuitumikia kwa miaka tisa akipata mafanikio lukuki ikiwemo kutwaa mara nne ubingwa wa Ligi ya Mabingwa Ulaya msimu 2013/14, 2015/2016, 2016/2017 na 2017/2018.

Ndani ya miaka yake tisa Real Madrid aliyojiunga nayo Julai Mosi 2009 akitokea Man United, Ronaldo ameweka rekodi ya kuwa mfuwngaji bora wa muda wote.

Mshambuliaji huyo mwenye miaka 33 anaongoza kwa kuwa mfungaji bora wa muda wote Real Madrid akifunga mabao 450 katika mechi 438.

Katika rekodi hiyo, amempiku aliyekuwa nahodha na shujaa wa zamani wa klabu hiyo, Raul Gonzalez aliyecheza Rea Madrid tangu mwaka 1994 hadi 2010 akiwa na mabao 323 aliyofunga katika mechi 741.

Pia Ronaldo ameweka rekodi ya kuwa mfungaji bora wa muda wote katika mashindano ya kimataifa ya dunia kwa klabu akiwa na mabao saba.

Nguli huyo amekuwa mchezaji wa kwanza kufikisha mabao 40 kwenye misimu miwili mfululizo akiwa ndiye mchezaji pekee aliyefunga 50 au zaidi katika misimu sita mfululizo.

Ukiachana na rekodi lukuki alizokuta wakati akitua Real Madrid na kuzivunja kwa kuweka zake, zifuatazo ni rekodi atakazokutana nazo nchini Italia katika kikosi cha ‘Kibibi Kizee’ cha Turin Juventus.

MFUNGAJI BORA MUDA WOTE

Ronaldo atakutana na rekodi ya mfungaji bora wa muda wote wa Juventus, Alessandro Del Piero mwenye miaka 43 ambaye alistaafu Oktoba 2015.

Piero ambaye ameitumikia Juventus kwa miaka 19 tangu mwaka 1993 hadi 2012 ndiye mfungaji bora wa muda wote Juventus akiwa na mabao 290 akifuatiwa na Giampiero Boniperti (179), Roberto Bettega (178), David Trezeguet (171) na Omar Sivori (167).

MABAO MSIMU MMOJA

Rekodi nyingine ambayo atakutana nayo Ronaldo ni ufungaji bora wa mabao mengi ndani ya msimu mmoja kwa upande wa Juventus anayeshikilia Ferenc Hirzer.

Hirzer aliyefariki dunia, Trento nchini Italia Aprili 28, 1957 akiwa na miaka 54 ana rekodi ya kufunga mabao 35 katika msimu 1925/1926.

Washambuliaji wengine waliotokea Juventus na kufunga idadi kubwa ya mabao ndani ya msimu mmoja ni Gonzalo Higuain 2016–17 (32), David Trezeguet 2001–2002 (32), Alessandro Del Piero 1997–1998 (32), Felice Placido Borel II 1933–1934 (31) , Omar Sívori 1957–1958 (31).

Wengine ni Roberto Baggio 1992–93 (30), John Hansen 1951–52 (30), Fabrizio Ravanelli 1994–95 (30), Omar Sívori 1959–60 (30) Felice Placido Borel II° 1932–33 (29), John Charles 1957–58 (29), David Trezeguet 2005–06 (29) na Carlos Tevez 2014–15 (29).

MABAO

Anayeshilia rekodi ya kufunga mabao mengi katika mchezo mmoja ni Muargentina Sivori ambaye kwa sasa ni marehemu, mshambuliaji huyo alifunga mabao sita.

Sivori aliweka rekodi hiyo ambayo ataikuta Ronaldo katika Ligi Kuu Italia kipindi hicho ikiitwa FIGC Serie A kwenye msimu 1960–1961, pale alipowaongoza dhidi ya Inter Milan.

Mchezo huo ulichezwa Juni 10, 1961 na Juventus ilishinda mabao 9-1 huku Sivora akitumbukiza kwenye nyavu za AC Milan mabao sita.

Nguli mwingine Fabrizio Ravanelli anafuata kwa kufunga mabao matano katika mchezo dhidi ya CSKA Sofia kwenye Ligi ya Mabingwa Ulaya wakati huo likiitwa Kombe la Ulaya ‘UEFA Cup’ msimu 1994–1995 kwenye mchezo wa raundi ya kwanza , Septemba 27 1994 ambapo Juventus ilishinda mabao 5–1.

‘HAT-TRICK’

Katika Ligi ya Italia wamepita zaidi ya washambuliaji 250 waliofunga mabao matatu ndani ya mchezo mmoja ‘hat-trick’, lakini Msweden Gunnar Nordahl na Mtaliano Giuseppe Meazza ndiyo wanaoshika rekodi ya ujumla ya kuwa washambuliaji waliofanya hivyo mara nyingi zaidi.

Nordahl aliyekuwa akicheza AC Milan na Meazza wa Inter Milan ambao wote ni marehemu waliweka rekodi kwa nyakati tofauti ya kufunga ‘hat trick’ 17 kwenye Serie A.

Ronaldo ataanza kukutana na rekodi ya Giovanni Vecchina aliyekuwa Juventus aliyeweka rekodi ya kufunga hat trick mara nne.

BALLON D’OR

Ronaldo ambaye ameshinda tuzo ya Ballon d’Or mara tano sawa na Lionel Messi, atakuwa na kibarua cha kufukuzia rekodi ya kuwa mchezaji wa sita kutwaa tuzo hiyo kubwa duniani akiwa na Juventus.

Nyota ambao wametwaa Ballon d’Or wakiwa Juventus ni Pavel Nedved (2003), Zinedine Zidane (1998), Roberto Baggio (1993), Michel Platini (1983, 1984 na 1985), Paolo Rossi (1982) na Omar Sívori (1961).

Ballon d’Or ni tuzo ambayo imekua ikitolewa na jarida la nchini Ufaransa toka mwaka 1956 na kura hupigwa na waandishi wa habari wapatao 173, duniani kote.

MCHEZAJI BORA ITALIA

Italia huwa wanatoa tuzo kwa mchezaji bora wa kigeni mara baada ya kumalizika kwa msimu pia na mchezaji bora wa mwaka, Ronaldo atakutana na rekodi za Zinedine Zidane na Andrea Pirlo.

Zidane anashikilia rekodi ya Juventus kwa kuwa mchezaji bora wa kigeni kwenye Ligi ya Italia mara mbili kwenye miaka ya 1997 na 2001 huku Pirlo akiwa na rekodi ya kuwa mchezaji wa timu hiyo aliyeshinda tuzo ya mchezaji bora wa mwaka mara tatu mfululizo, 2012, 2013 na 2014.

RONALDO NI NANI?

Ronaldo ni mzaliwa wa São Pedro kwenye mji wa Funchal na amekulia Santo António, ni mtoto wa Maria Dolores dos Santos Aveiro, ambaye alikuwa mpishi na José Dinis Aveiro, aliyekuwa mtunza bustani.

Nyota huyo wa Juventus kaka yake anaitwa Hugo na dada zake ni Elma na Liliana Cátia. Bibi wa bibi yake na mama wa baba yake Ronaldo, Isabel da Piedade, alitokea São Vicente, Cape Verde.

Akiwa mdogo Ronaldo aliichezea Andorinha ambayo ilikuwa timu ya mtaani kwenye miaka ya 1992 hadi 1995.

Kutokana na baba yake kufanya kazi ya ziada ya utunza vifaa vya klabu ya Nacional mwaka 1997 wakati huo Ronaldo akiwa na miaka 12, alijiunga na akademi ya klabu hiyo kabla ya baadaye kumpeleka kufanya majaribio ya siku tatu, Sporting CP.

Hapo ndipo ilipoanza safari rasmi ya Ronaldo ambaye 2002 alipandishwa kikosi cha kwanza cha Sporting CP ambacho alikichezea kwa mwaka mmoja na kusajiliwa na Manchester United ya England.

Monday, August 6, 2018

Je wajua haya ni mazoezi mepesi pia?



Dk Shita Samwel

Dk Shita Samwel 

Jamii inahimizwa kufanya mazoezi ili kukabiliana na magonjwa yasiyoambukiza Non-communicable Diseases (NCDs) ukiwemo ugonjwa wa moyo, kisukari, kiharusi, figo na unene.

Ikumbukwe mazoezi mepesi yakiwemo ya kutembea, kukimbia, kuogelea na kucheza muziki wa haraka ni moja ya nyenzo rahisi ya kukabiliana na magonjwa yasiyoambukiza.

Badala ya kwenda vituo vya mazoezi kulipia yapo mambo tunayofanya katika maisha ya kila siku pasipokujua ni mazoezi mepesi yasiyokuwa rasmi yanayoushughulisha mwili kimazoezi.

Upo utamaduni, hulka na tabia mbalimbali zisizozumgumziwa katika jamii ambazo watu hufanya katika maisha ya kila siku na kufanya mwili kujishughulisha na kuchoma sukari, mafuta ya mwilini.

Nikianza na utamaduni wa wafugaji ambao wana kawaida ya kutembea na kuswaga mifugo umbali mrefu kutafuta malisho.

Mtindo huu umewafanya kubeba tabia ya kupenda kutembea hata wanapofika mjini hutembea umbali mrefu, mfano mzuri ni jamii ya kabila la Kimasai.

Kabila la Masai ambalo lipo zaidi maeneo ya kaskazini ikiwemo Arusha na nchi jirani ya Kenya, wamekuwa wakionekana mjini wakitembea kwa miguu hata kama wana uwezo wa kukodi gari au kupanda usafiri wa daladala.

Kutembea ni mtindo bora kwa maisha kwa kuwa ni zoezi rahisi ambalo linaushughulisha mwili kwa kuchoma sukari au mafuta ya mwili. Tafiti zinaonyesha zoezi la kutembea huwafanya watu kuishi muda mrefu.

Maeneo ya mikoa ya Tanga, Pwani, Morogoro, Mwanza na Shinyanga ni maeneo ambayo watuwengi wa kawaida hupenda kutumia baiskeli. Kuendesha baiskeli kwa matumizi ya kubeba abiria, mizigo na kusafiria kutoka eneo moja kwenda jingine mara kwa mara kila siku ni moja ya zoezi linalofanywa pasipokujua lina tija katika afya zetu.

Mazingira tunayoishi na kufanya shughuli zetu za kila siku mara kwa mara ikiwamo maeneo yenye miinuko kama vile Lushoto, Marangu, Ludewa, Uluguru na Mahenge hufanya miili kufanya zoezi.

Wakati wa uzalishaji mali katika maeneo haya wakazi wengi hujikuta wakipanda na kushuka katika milima kutoka eneo moja kwenda jingine hivyo miili yao kujishughulisha kwa mazoezi pasipokujua.

Watu wanaoishi visiwani, kando kando mwa Bahari ya Hindi na Kanda ya Ziwa kuogelea ni sehemu yao ya shughuli za uvuvi au burudani lakini kumbe kufanya hivyo mara kwa mara ni zoezi lenye tija kiafya.

Utaratibu ambao umewekwa na baadhi ya dini na madhehebu ambao wana utaratibu wa kusali kila siku au mara kwa mara huku waumini wakitembea umbali kidogo kuifuata nyumba ya ibada.

Mfano kama nyumba ya ibada ipo kilometa moja kutoka makazi ya waumini kama wakienda na kurudi tayari mtu anakuwa ametembea kilometa mbili, hivyo tayari amefanya zoezi. Mambo mengine yanayochangia kuupa mwili mazoezi ni shughuli za kilimo, biashara za kutembeza, kazi za viwandani, kusukuma matoroli ya mizigo, bustani za umwagiliaji, kucheza ngoma za utamaduni, ufugaji wa nyumbani na ubebaji mizigo.

Mitindo na mienendo ya maisha kama hii ni mizuri kwa afya zetu kwa kuwa yanafanyika kila siku angalau kwa wiki mara tano kwa muda wa dakika 30-45, mtu atakuwa amefanya zoezi lenye tija ambalo litamfanya kukabiliana na magonjwa yasiyoambukiza.

Hivyo kwa wale watakaoshindwa kufanya mazoezi mepesi wanaweza kuiga mambo haya kushughulisha miili yao.

Monday, August 6, 2018

Wachezaji kuweni basi na mshawasha wa kucheza soka nje



Ibrahim Bakari

Ibrahim Bakari 

T angu Ligi Kuu Bara kumalizika na Kombe la Shirikisho ambalo Mtibwa ndiyo imetwaa ubingwa, nilichokiona hapa ni pilikapilika za klabu za Ligi Kuu kuwania usajili wa wachezaji kwa msimu ujao.

Sawa, hicho kilikuwa kipindi mchezaji alitakiwa kujiwahi, mchezaji kukomaa kuhakikisha kuwa anapata timu kwa ajili ya msimu ujao wa Ligi Kuu, kwani ikimalizika hapa, ndiyo basi tena.

Unajua, kumalizika kwa Ligi Kuu ni kama maji yamemwagika Jangwani, kila mmoja anayawahi kwa ajili ya kutii kiu yake. Nimechukulia mfano huo, kwa kuwa harakati zimekuwa kubwa kupitiliza.

Na harakati zimekuwa hivyo kwa kuwa kuna wachezaji ambao mikataba yao ilimalizika, kuna wachezaji walioachwa, kuna waliotaka kuondoka japo klabu iliwahitaji na kuna wale ambao wawepo sawa na lolote kwao sawa. Kipindi hicho ndiyo kile cha mavuno kwa waliokuwa wanajituma na kuonyesha kiwango. Ndiyo hapa unasema kuwa kuwa mchezaji anabebwa na kiwango chake.

Klabu haiwezi kusajili mchezaji mchovumchovu akataka awekewe Sh50milioni mezani, kama mchezaji alikuwa anaendekeza starehe, ataishia signing on fees ya Sh5mil au hata chini ya hapo. Ndio.

Ninachotaka kusema, pamoja na kuwania kucheza katika klabu mbalimbali kubwa na zile za kawaida, bado nasema wachezaji wa Tanzania kuangalia soka nje ya mipaka. Wachezaji wamekuwa na mtazamo wa ndani ya boksi kuwa ninyi ni Ligi Kuu na Ligi Kuu ni ninyi. Hilo hapana.

Hata hapo Kenya, wachezaji wanajaribu. Wanahangaika kusaka mawakala na si kusubiri neeme ikudondokee, ukihangaika na Mungu atakusaidia kama mchezaji.

Kama mchezaji ni mkali, utakubalika tu kama ilivyo Kenya kwa sasa wamejaa Waganda, Wanyarwanda wako huko na katika viwango vya Fifa, wako juu.

Zambia wako juu kisoka,

Ilikuwa nafasi ya kumsumbua aliyekuwa kocha wa Yanga, George Lwandamina kuwaunganisha kupata timu halafu mchezaji mwenyewe anaendelea ikiwemo kuwatafutia mawakala, lakini ajabu wachezaji wetu wanazitolea macho; Simba, Yanga, Azam au Mtibwa. Lwandamina anainoa Zesco kwa sasa.

Kuchangamka na kwenda kucheza nje, kuna faida mbili kubwa; Mosi, kwa timu ya taifa, itakuwa na wachezaji wengi wenye chgangamoto mbalimbali na hata inapokuja suala la timu ya taifa, wanakuwa wameiva kupitia ligi mbalimbali za nje.

Kama mchezaji anacheza nje, changamoto anazopata hawezi kuwahofia tena Ghana, Nigeria, Ivory Coast, Algeria au Senegal. Inapendeza, Inaundwa Taifa Stars yote inayocheza nje na waliopo nyumbani wanagombania namba ya CHAN wenyewe.

Siku hizi hata Uganda na Kenya sehemu kubwa wanatumia mapro wao tu kwenye timu ya taifa.

Pili; kucheza nje, mchezaji anaongeza kipato. Kucheza nje ni pesa, wachezaji wanashindwa tu kuelewa. Kama mchezaji ni kijana, unauweza, nini cha kuhofia? Anza madaraja ya chini, utapanda tu taratibu lakini ukifuata misingi ya soka.

Uzuri wa soka haichezwi chumbani kwamba utajificha, ni hadharani mbele ya kadamnasi ya mashabiki.

Kuwa na mawazo ya kucheza nje peke yake ni pesa kwa hiyo siamini kama mchezaji atakaa na kukomalia kuzitaka Simba, Yanga, Azam au Mtibwa na nyingine. Wachezaji wanatakiwa kufikiri nje ya boksi kila mara.

Monday, August 6, 2018

Klabu inayofanya usajili mbovu, mafanikio ni ndoto



Allan Goshashi

Allan Goshashi 

Kipindi cha usajili kimemalizika. Zilianza tetesi za usajili, tukasikia mchezaji fulani anatakiwa na klabu fulani, mchezaji fulani anaachwa na klabu fulani, wachezaji fulani mikataba yao imekwisha yaani kilikuwa ni kipindi cha wasiwasi mkubwa kwa baadhi ya wachezaji na pia ni kipindi kizuri kwa baadhi ya wachezaji.

Kipindi cha usajili ni kipindi cha mshtuko kwa wachezaji na mashabiki, kwani wachezaji huachwa kweli, wengine huachwa kiholela kwa chuki, hila, fitina na siyo kuangalia umuhimu wa mchezaji au kiwango chake na mara nyingi uamuzi huo haufanywi na kocha ila viongozi wa klabu.

Kwa mujibu wa kanuni ya 61 ya Kanuni za Ligi Kuu ya Tanzania kipengele cha tano, kocha wa timu ndiye mkuu wa shughuli zote za timu kuanzia usajili wa wachezaji, uandaaji wa timu, usimamiaji wa timu katika mashindano na mambo mengine yanayofanana na hayo.

Hata hivyo hapa nchini huwa ni kinyume chake kwa sababu viongozi huamua kuacha wachezaji na hutafuta wachezaji wa kusajili bila kumshirikisha kocha.

Pia, katika kipindi hiki cha masuala ya usajili, wapo wachezaji ambao hupelekwa kwa mkopo katika klabu nyingine bila mchezaji kushirikishwa huku klabu zikidai mchezaji hana uwezo wa kuhoji endapo atatakiwa kuhamishwa kwa mkopo kwenda klabu nyingine.

Kikimalizika kipindi cha usajili yaani wachezaji kuhamishwa kinakuja kipindi cha kupitia majina na kutangaza pingamizi, hapa ndipo huibuka suala la mchezaji fulani kasajiliwa mara mbili kwa sababu viongozi wa klabu zetu bado wamekuwa wakizuia maendeleo ya wachezaji badala ya kuwauza kwa klabu zinazowataka. Na baada ya hapo hufuata kipindi cha kuthibitisha usajili.

Kwa mtazamo wangu, kama kuna wakati muhimu klabu hazipaswi kufanya makosa kuelekea kucheza mashindano yoyote yale ni kipindi cha usajili wa wachezaji.

Umuhimu wa kipindi hiki uko wazi, kwani ndiyo wakati klabu hutumia fedha nyingi kununua wachezaji au kuingia nao mikataba mipya kuliko wakati mwingine wowote.

Ni kipindi cha hekaheka ya wachezaji kuzivuna klabu mamilioni ya fedha kutokana na ada za usajili na kwa upande mwingine ni kipindi cha klabu kuvuna wachezaji wazuri watakaoiletea mafanikio katika Ligi Kuu.

Ni wazi kuwa, klabu iliyowekeza fedha nyingi kwenye kusajili wachezaji wazuri na kuwa na kocha mzuri na uongozi mzuri ndiyo yenye kujenga mwelekeo jirani kupata mafanikio, kuliko klabu iliyokwenda kinyume chake.

Au, kwa maneno mengine, mafanikio ya timu kwenye mashindano yoyote hutegemea zaidi na jinsi ilivyoandaliwa, kwa maana maandalizi mazuri ndiyo kiini cha mafanikio kuliko badala yake.

Hata hivyo, jambo la kushangaza hapa nchini ni kwamba timu zimezoea kusajili kwa mazoea, zimejikuta zikisajili hata wachezaji wasio na viwango, tena wengine ni wachezaji wa kigeni!. Hii ni kwa sababu tu zimemezwa na utumwa wa mazoea ya kusajili. Hilo linatokea kwa sababu viongozi wa klabu wanasajili wachezaji bila kuzingatia mapendekezo ya kocha ambaye ndiye mwenye jukumu kubwa la kufundisha wachezaji hao.

Viongozi wanalazimisha kusajiliwa wachezaji wanaowataka kutokana na mapenzi binafsi, ukaribu, undugu, urafiki au kwa misingi ya rushwa badala ya kumuachia kocha kufanya usajili unaostahili kwa kutumia wang’amuzi wa wachezaji.

Klabu yoyote inayofanya usajili mbovu, mafanikio kwao huwa ni ndoto zisizo na tamati. Kila siku zitaota kufanikiwa bila kufanikiwa. Tusubiri Ligi Kuu ianze tuone kama usajili uliofanyika ulikuwa na faida.

Monday, July 30, 2018

Mabosi Man United wamvuruga Mourinho

 

Jose Mourinho amegeuka mbogo muda mfupi baada ya Manchester United kutunguliwa mabao 4-1.

Mourinho alisema hafurahishwi na mwenendo wa vigogo wa klabu hiyo ya Old Trafford kuhusu mchakato wa usajili wa majira ya kiangazi.

Kocha huyo alitoa kauli hiyo muda mfupi, baada ya Man United kucharazwa idadi kubwa ya mabao na watani wao wa jadi Liverpool katika mchezo wa kirafiki juzi usiku.

“Nilitaka wachezaji zaidi ya wawili hodari katika usajili wa majira ya kiangazi, tayari nina orodha ya majina ya nyota watano,” alisema Mourinho.

Mourinho alisema mkakati wake ni kujenga timu imara itakayoleta ushindani mkali katika mashindano ya Ligi Kuu England msimu ujao.

Kocha huyo alisema amechanganyikiwa kwasababu hajui hatima ya wachezaji anaotaka wakati dirisha la usajili likikaribia kufungwa Agosti 9, mwaka huu.

Alisema hana uhakika wa kupata wachezaji imara anaotaka katika usajili hata kama atapata fedha kutoka kwa vigogo hao kutokana na muda kupata mfupi.

Miongoni mwa wachezaji anaowataka ni shujaa wa Kombe la Dunia anayetamba katika kikosi cha Leicester City na England, Harry Maguire.

Mourinho anataka beki wa kati ili kuimarisha safu ya ulinzi baada ya ukuta wa Man United kuyumba msimu uliopita.

“Ningependa kusajili zaidi ya wachezaji wawili. Sina uhakika kama malengo yangu yatatimia, labda naweza kupata mmoja,” alisema Mourinho.

Kocha huyo raia wa Ureno, alisema alikabidhi majina ya wachezaji watano kwa mabosi wa klabu hiyo lakini hakuna kinachoendelea.

Monday, July 30, 2018

Himid aeleza tamu, chungu maisha Misri

 

By Eliya Solomon, Mwananchi

Baada ya kupambana muda mrefu akicheza soka ya ridhaa, hatimaye Himid Mao ‘Ninja’ amekuwa miongoni mwa wachezaji wa Tanzania wanaocheza soka la kulipwa nje ya nchi.

Baada ya kuiongoza vyema Azam akiwa ndiye nahodha wa kikosi hicho, Himid amepanua wigo na kuongeza idadi ya wachezaji wa Tanzania wanaocheza soka la kulipwa.

Kiungo huyo mkabaji, anafuata nyayo za nahodha wa Taifa Stars, Mbwana Samatta ambaye anatamba katika kikosi cha KRC Genk ya Ubelgiji, baada ya kung’ara TP Mazembe Englebert ya DRC Congo.

Kiungo huyo ambaye ni mtoto wa nyota wa zamani wa Pamba ya Mwanza, Mao Mkami, alikuwa na ndoto ya kucheza soka nje ya nchi ingawa mara kadhaa aliwahi kuhusishwa na Yanga.

Pamoja na kuhusishwa na Yanga, shauku ya Himid ilikuwa kucheza soka la kulipwa ndiyo maana kwa nyakati tofauti aliondoka nchini kwenda kufanya majaribio kwenye klabu za Randers inayoshiriki Ligi Kuu Denmark na Bidvest Wits ya Afrika Kusini.

Baada ya kugonga mwamba, Himid hakukata tamaa aliendelea kucheza kwa kiwango bora katika Ligi Kuu akiwa na kikosi cha Azam hadi msimu uliopita.

Baada ya kupambana muda mrefu, Himid amejiunga na Petrojet FC inayoshiriki Ligi Kuu Misri na tayari ameanza kuonyesha makeke nchini humo.

Nyota huyo amefanya mazungumzo na gazeti hili kuzungumzia maisha mapya anayoishi Misri na changamoto anazokutana nazo ndani na nje ya uwanja.

Katika mazungumzo hayo na jarida hili la Spoti Mikiki, Himid anasema ameanza kupata mafanikio na matarajio yake ni kutimiza malengo aliyoweka miaka mitano iliyopita.

“Lengo lilikuwa kucheza soka la kulipwa Ulaya, lakini mambo yamekwenda tofauti kwa hiyo imebidi niwe na njia mbadala ambayo ni kupitia huku Misri ambako wachezaji wengi wanaofanya vizuri wanakwenda kwa wepesi.

“Msimu uliopita wa Ligi Kuu Bara ilivyomalizika ilibidi nije huku kumalizana nao kwasababu walionyesha nia ya kunihitaji muda mrefu nilivyofika tulikubaliana baadhi ya mambo na kusaini.

“Wachezaji wengi wa huku wanazungumza Kiarabu hiyo ni changamoto ambayo nilitegemea lakini nashukuru Mungu wapo wachache ambao wanaongea Kingereza,” anasema Himid.

Mchezaji huyo anadokeza changamoto nyingine ambazo ni tofauti ya vyakula kati ya wenyeji wageni.

Joto pia ni miongoni mwa changamoto ambazo Himid amekutana nazo Misri, lakini amekuwa akipambana nalo kwa kuwa ni sehemu ya maisha.

Akizungumzia namna alivyopokewa na wachezaji wenzake wa Petrojet , Himid anasema alifarijika baada ya kupata mapokezi mazuri.

“Nilichangamkiwa na kila mmoja alinikaribisha kwa lugha ya Kingereza ingawa kilikuwa cha kubabaisha kwa wale ambao walikuwa hawana uwezo mzuri wa kukiongea, benchi zima la ufundi lilinipokea vizuri,” anasema Himid.

Kiungo huyo mkatabaji ambaye pia ana uwezo wa kucheza kama beki wa kati au mlinzi wa pembeni (2), amepanga kutumia vyema fursa aliyopata ya kucheza Ligi Kuu Misri kuwa daraja la kumvusha kwenda Ulaya.

Himid anayesifika kucheza kibabe, alianza kucheza soka ngazi ya chini ya timu ya vijana ‘Azam Academy’ iliyotwaa ubingwa wa mashindano ya vijana ‘Uhai Cup mara mbili mfululizo’.

Pia ametoa mchango kwenye makombe mengine ya Azam FC, kama vile Kombe la Ujirani Mwema mwaka 2012 nchini Congo DRC, Kombe la Ligi Kuu Tanzania Bara msimu wa 2013/2014, walilotwaa bila kufungwa.

Nyota huyo pia amechangia mafanikio ya Azam kutwaa ubingwa wa Kombe la Kagame Agosti, 2015 kwa rekodi ya aina yake ya kutofungwa bao na mchezo wowote.

Himid ambaye ni nahodha msaidizi wa Taifa Stars, amepitia timu zote za vijana za Tanzania za miaka chini ya 17, 20 na 23 akiwa mmoja wa wachezaji tegemeo.

Kocha wa zamani wa Taifa Stars, Marcio Maximo raia wa Brazil, ndiye aliyemuibua Himid katika Kituo cha Kukuza Vipaji cha TSA na kumjumuisha mara kadhaa katika kikosi cha wakubwa kupata uzoefu.

Himid ni wa mtoto wa kwanza kuzaliwa kati ya watoto watano akiwa na ndugu zake Femina, Rozmana, Feisal na Rahim.

Elimu yake ya msingi alipata katika Shule ya Msingi Kiwandani, Turiani, Morogoro darasa la kwanza na la pili na kuhamia Karume ya Dar es Salaam aliposoma hadi darasa la sita.

Mchezaji huyo alihama na kumalizia elimu ya msingi Shule ya Msingi ya Dk. Omary Ali Juma iliyopo Magomeni, Dar es Salaam kabla ya kujiunga na Shule ya Sekondari ya Tabata ambako alimaliza kidato cha nne mwaka 2011.

Monday, July 30, 2018

Abreu, kiboko ya Anelka aliyevunja rekodi duniani

 

By Eliya Solomon, Mwananchi

Wakati wengi wakimfahamu mshambuliaji nguli wa zamani wa Chelsea, Nicolas Anelka ndiye mchezaji aliyezitumikia klabu nyingi duniani, wanakosea.

Yupo mchezaji asiyekuwa na jina kubwa duniani, Sebastian Abreu raia wa Uruguay ndiye anayeshika rekodi ya kuzitumikia klabu nyingi duniani.

Anelka aliyezoeleka na muonekano wa upara kichwani amepita kwenye klabu 14 tofauti duniani akijumuisha na akademi tatu kabla ya mwaka 1996 kupandishwa kikosi cha kwanza Paris Saint-Germain.

Abreu aliyezaliwa Minas mjini Lavalleja, Urugaay amemzidi mara mbili Anelka kwa klabu alizocheza akiwa na umri wa miaka 41, lakini bado anapambana.

Nyota huyo wa klabu ya Deportes Magallanes inayoshiriki Ligi Daraja la Kwanza Chile maarufu ‘Primera B de Chile’. Mpaka sasa mkongwe huyo amezitumikia klabu 25 katika nchi 11 tofauti duniani.

San Lorenzo (Argentina), 1996-1998 na 2000-2001 (mkopo), Deportivo La Coruna (Spain), 1998-2004 Gremio (Brazil), 1998 (mkopo), Estudiantes Tecos (Mexico), 1999-2000 (mkopo) na 2004 (mkopo), Club Nacional (Uruguay), 2001 (mkopo), 2004-2005, 2013-2015, Cruz Azul (Mexico), 2002-2003 (mkopo).

America (Mexico), 2003 (mkopo), Dorados de Sinaloa (Mexico), 2005-2006, Monterrey (Mexico), 2006, San Luis (Mexico), 2007, Tigres UANL (Mexico), 2007, River Plate (Argentina), 2008 (mkopo) na 2008-2009, Beitar Jerusalem (Israel), 2008, Real Sociedad (Spain), 2009 (mkopo).

Aris Thessaloniki (Greece), 2009-2010 Botafogo Rio De Janeiro (Brazil), 2010-2012, Figueirense (Brazil), 2012 (mkopo), Rosario Central (Argentina), 2013-2014 (mkopo), SD Aucas (Ecuador), 2015 (mkopo), Sol de America (Paraguay), 2016, Santa Tecla (El Salvador), 2016.

Bangu Atletico Clube (Brazil), 2017 Central Espanol (Uruguay), 2017, Puerto Montt (Chile), 2017, Audax Club Sportivo Italiano (Chile), 2018.

Ngazi ya timu ya Taifa, Abreu ameichezea Uruguay mara 70, ikiwemo mwaka 2002 na 2010 katika michuano ya Kombe la Dunia nchini Japan/South Korea na Afrika Kusini.

Monday, July 30, 2018

Usajili mbovu Ligi Kuu England huu hapa

 

Dirisha la usajili linapofunguliwa klabu mbalimbali duniani zinapigana vikumbo kuwania saini za nyota ambao watakuwa msaada kwa timu zao kutimiza malengo.

Baadhi ya klabu zinalazimika kutumia fedha nyingi kusajili wachezaji hodari kwa matarajio ya kutimiza azma zao kulingana na aina ya mashindano zinazoshiriki.

Klabu nyingine zinasajili kuongeza nguvu katika kikosi katika mbio za kupigania ubingwa, hivyo zinahitaji wachezaji mahiri ambao watakuwa chachu ya mafanikio.

Ingawa mara nyingi wachezaji husajiliwa kutokana na mapendekezo ya benchi la ufundi, lakini kuna wakati hufanywa kwa matakwa ya mtu binafsi kocha, kiongozi na wakati mwingine utashi wa mmiliki wa klabu.

Baadhi ya kocha wamekuwa wakifukuzwa baada ya kushindwa kuzipa klabu zao mafanikio hasa kutwaa ubingwa licha ya kupewa fungu kubwa la usajili.

Kocha Pep Gurdiola wa Manchster City aliwahi kusema ‘Gabriel Jesus ni tikiti’ akiwa na maana amemsajili mshambuliaji huyo kinda baada ya kusifiwa tu na rafiki yake, lakini hakuwahi hata mara moja kumchunguza ili kujiridhisha, lakini amekuwa hodari katika kikosi hicho.

Robinho

Mshambuliaji huyo wa Brazil, alisajiliwa Man City kwa mbwembwe kutoka Real Madrid mwaka 2008 kwa Pauni32.5 milioni.

Robinho alikuwa mchezaji wa kwanza mwenye jina kubwa kutua Makao Makuu Etihad, akitua kwa bei mbaya na kuwa mchezaji ghali katika Ligi Kuu England.

Robinho alifunga bao zuri la faulo dhidi ya Chelsea na mashabiki walimpamba sana, lakini baada ya muda mfupi alionekana mzigo kwa timu kabla ya kupelekwa kwa mkopo Santos ya Brazil na baadaye alitimkia AC Millan ambayo iliilipa Man City Pauni15 milioni.

Andriy Shevchenko

Ni mshambuliaji wa Ukraine aliyekuwa akiujua mpira hasa katika kufunga mabao, kila mmoja alimshangaa kocha wa Chelsea wa wakati huo, Jose Mourinho kupinga uamuzi wa kusajiliwa kwa Pauni 30 milioni mwaka 2006.

Mourinho alikuwa na nyota mwenye kiwango bora Didier Drogba, lakini mmiliki wa Chelsea bilionea Roman Abramovich alimsajili Shevchenko kwa lazima kwa kuwa alikuwa rafiki yake mkubwa. Mshambuliaji huyo aliyefunga mabao 127 katika mechi 208 alizocheza AC Milan, hakufurukuta Chelsea baada ya kufunga mabao tisa pekee kwa miaka minne, mwisho alirudishwa kwa mkopo AC Milan kabla ya kupotea katika ramani ya soka.

Fernando Torres

Mabao 65 aliyoifungia Liverpool katika mechi 102 yalimpa nafasi ya kuhitajiwa na klabu zote kubwa Ulaya, mwaka 2011 bilionea Roman Abromovich aliingia mfukoni na kutoa Pauni 50 milioni kumsajili Torres siku ya mwisho ya usajili.

Licha ya kusajiliwa kwa mbwembwe na dau kubwa, Torres hakufua dafu alizimika ghafla kabla ya kuanza kuzomewa na mashabiki wa Chelsea katika mechi alizopangwa, baada ya kushindwa kucheza kwa kiwango bora.

Torres alifunga mabao 20 katika mechi 110, aliuzwa kwa mkopo kwenda AC Milan, ambako pia alishindwa kutamba kabla ya kudondokea katika timu iliyomuibua Atletico Madrid.

Juan Sebastian Veron

Baada ya kung’ara akiwa Lazio, Sir Alex Ferguson alitumia ‘umafia’ kumnasa Veron kwa Pauni28 milioni mwaka 2001. Kiwango chake kilikaribia kushusha heshima ya kocha huyo baada ya kucheza kwa kiwango cha chini.

Nyota huyo wa Argentina, alishindwa kuonyesha umahiri na mara kwa mara alikwaruzana na Ferguson alipowekwa benchi. Veron alicheza mechi 53, akifunga mabao saba kabla ya kuuzwa kwa hasara Pauni15 milioni kwenda Chelsea mwaka 2003 – 2007. Pia alicheza mechi saba na kufunga bao moja.

Robbie Keane

Wakati Benitez akiwa na Torres Liverpool, alihitaji mshambuliaji wa kusaidiana naye. Akamchomoa Robbie Keane kutoka Tottenham kwa dau nono lililofanywa siri mwaka 2008 - 2009 kutua Liverpool akawa kituko mechi 27 alizocheza alifunga mabao matano, akarudishwa Totenham.

Andy Carroll

Baada ya kung’ara akiifungia Newcastle United mabao lukuki, Liverpool imnasa kwa matumaini mwaka 2011 – 2013. Hata hivyo, Carroll ameingia katika orodha ya usajili mbovu kuwahi kufanywa na klabu hiyo.

Pauni 35 milioni walizomnunulia zilikwenda bure kwa kuwa katika mechi 44 alizocheza alifunga mabao sita kabla ya kupigwa bei kwa hasara kwenda West Ham United akiuzwa Pauni 17 milioni.

Steve Marlet

Fulham ilikuwa kati ya klabu za kuogopwa England. Mwaka 2001 iliipa Lyon Pauni 11 milioni ili kumnunua Steve Marlet, lakini mchezaji huyo hakung’ara kabla ya kuuzwa 2005 na alisababisha kocha Jean Tigana kufukuzwa na akihusishwa na tuhuma za rushwa.

Memphis Depay

Uholanzi aliitwa Ronaldo mpya, uwezo wake uwanjani uliwachengua wengi, Manchester United iliamua kumnunua kutoka PSV Eindhoven mwaka 2015 wakimtaraji kuwa mrithi wa Ronaldo na kumpa jezi namba 7.

Lakini, katika mechi 33 alizocheza alifunga mabao mawili, akabaki kununua magari ya kifahari na kubadili mitindo ya nywele, kocha Jose Mourinho aliamua kumuuza kwenda Olympique Marseille ya Ufaransa.

Cristian Benteke

Akiwa Aston Villa alionekana kuwa mfungaji tishio, klabu kubwa zilimmezea mate na moja kwa moja alitua Liverpool mwaka 2015, pengine kwa muda wote aliokaa Anfield, kocha Kenny Daglish alijutia usajili wa mbelgiji huyo mwenye asili ya DRC Congo, katika mechi 42 alizocheza alifunga mabao 10 tu. Liverpool ilimuuza kwa Pauni27 milioni kwenda Crystal Palace 2016.

Monday, July 30, 2018

Viungo watikisa usajili Ligi Kuu

 

By Charity James,Mwananchi cjames@mwananchi.co.tz

Wakati Klabu za Ligi Kuu Tanzania Bara zikisubiri kwa hamu uhakiki wa usajili zilizofanya, safu ya kiungo imetikisa mchakato huo uliokamilika Alhamisi iliyopita saa sita usiku.

Tathmini iliyofanywa na gazeti hili kwenye usajili wa baadhi ya timu zitakazoshiriki Ligi Kuu msimu ujao, imebaini kuwa idara ya kiungo imepewa kipaumbele cha kwanza na idadi kubwa ya klabu kulinganisha na safu za ulinzi na ushambuliaji.

Simba iliyotwaa ubingwa wa Ligi Kuu msimu uliopita, imeonekana kujikita zaidi katika kuimarisha safu ya kiungo kwa kujumuisha majina ya nyota 11 wanaocheza nafasi hiyo yakihusisha waliokuwemo msimu 2017/2018 na wapya walioongezwa kwenye dirisha kubwa la usajili.

Wachezaji wapya wanaocheza kwenye safu ya kiungo ambao Simba imewaongeza kikosini kupitia dirisha kubwa la usajili ni Hassani Dilunga, Claytous Chama, Abdul Hamisi na Marcel Kaheza.

Wachezaji hao wanaungana na akina Jonas Mkude, James Kotei, Mohammed Ibrahim, Shiza Kichuya, Haruna Niyonzima, Said Ndemla, Mzamiru Yassin na Rashid Juma ambao walikuwemo kwenye kikosi cha timu hiyo msimu uliopita.

Kilichofanywa na Simba ndicho kimetokea kwa wawakilishi wa Tanzania Bara katika Kombe la Shirikisho Afrika msimu ujao, Mtibwa Sugar ambayo imekamilisha usajili huku ikiwa na idadi kubwa ya wachezaji wanaocheza safu ya kiungo.

Mtibwa Sugar imejumuisha viungo 10 kwenye kikosi chake ambao ni Henry Joseph, Shabani Nditi, Salum Kihimbwa, Ismail Aidan, Haruna Chanongo, Ally Makarani, Salehe Khamis, Ayoub Semtawa, Abuu Juma na Abdul Yusuf.

Wakati Simba na Mtibwa ambazo zitaiwakilisha Tanzania Bara kwenye mashindano ya kimataifa msimu ujao zikijaza idadi kubwa ya viungo, Azam, Yanga na Singida United nazo zimefuata mkumbo kwa kusajili kundi kubwa la wachezaji wa viungo.

Yanga yenyewe imesajili jumla ya viungo 13 huku Azam ikiwasilisha majina ya viungo wanane wakati Singida United imesajili wachezaji 11 wa nafasi hiyo.

Viungo ambao wamejumuishwa kwenye usajili wa Yanga ni Thabani Kamusoko, Jafari Mohamed, Raphael Daud, Maka Edward, Said Juma, Deus Kaseke, Emmanuel Martin, Juma Mahadhi, Pato Ngonyani, Paul Godfrey, Feisal Salum na Papy Tshishimbi

Nyota wanaocheza nafasi ya kiungo ambao wamesajiliwa na Azam ni Stephan Kingue, Tafadzwa Kotinyu, Salum Abubakar ‘Sure Boy’, Frank Domayo, Enock Atta, Joseph Mahundi, Bryson Raphael na Ramadhani Singano ‘Messi’.

Wachezaji 11 wa nafasi ya kiungo ambao Singida United imewasajili ni Rashid Simkoko, John Tibar, Assad Juma, Lubinda Mundia, Mohammed Tello, Hans Koffie, Benedict Jr, Godfrey Mwashiuya, Frank Zakaria na Mohammed Titi.

Timu nyingine zilizojaza viungo ni Mbeya City yenye wachezaji 10 sawa na Ruvu Shooting yenye idadi kama hiyo ya wachezaji.

Usajili wa idadi kubwa ya viungo unatoa taswira kuwa huenda msimu ujao kukapatikana idadi kubwa ya mabao kwani mara kwa mara safu ya kiungo ndio imekuwa chanzo kikuu cha kutengeneza nafasi za mabao na kuifanya timu itawale mchezo jambo ambalo huchangia kwa kiasi kikubwa kuzalisha mabao.

Hata hivyo, wakati timu nyingi zikionekana kuimarisha safu yake ya kiungo, Biashara United iliyopanda Ligi Kuu kwa mara ya kwanza, yenyewe inaonekana inataka kuwa na safu imara zaidi ya ulinzi kuliko timu nyingine.

Timu hiyo kutoka mkoani Mara imesajili jumla ya wachezaji 14 wanaocheza kwenye safu ya ulinzi, idadi ambayo ni kubwa zaidi kuliko timu nyingine.

Baadhi ya mabeki kati ya hao 14 waliosajiliwa na Biashara United ni Joseph Mapembe, Sospeter Maiga, Derrick Mussa, Lenny Vedatus na Godfrey Malibiche.

Wengine ni Abdul Madjid, Lameck Abel, Kazee Maginga, Edgar Bwire na Frank Sekule.

Monday, July 30, 2018

Beki mpya Singida United afunguka

 

By Thomas Ng’itu, Mwananchi Tng’itu@mwananchi.co.tz

Beki mpya wa Singida United, Jamal Mwambeleko, yuko fiti kwa vita ya kuwania namba katika kikosi cha kwanza baada ya kutimka Simba.

Mwambeleko aliliambia Mwananchi, anaamini atakuwa katika wakati mzuri Singida United kwa kuwa ndio kama anaanza upya maisha ya soka.

“Hapa ni sehemu yangu mpya najua mashabiki wanataka kuona mengi kwangu kwa kweli sitaki kuwavunja moyo, nataka niwe katika wakati mzuri na hilo ndilo lengo langu,” anasema beki huyo wa kushoto.

Akizungumzia changamoto ya namba anayokwenda kukutana nayo dhidi ya beki Shafiq Batambuze, anasema anatambua uwezo wa nyota huyo wa Uganda, lakini atapambana.

“Ni mchezaji mzuri na uwezo wake kila mmoja anaujua lakini siwezi kumkwepa kwasababu changamoto ni kitu cha kawaida hasa katika mpira, watu wanabidi wakumbuke kuna mabadiliko katika benchi la ufundi kwahiyo naamini tunaanza upya wote katika kikosi,” anasema Mwambeleko.

Beki huyo aliyekosa namba Simba msimu uliopita baada ya kung’ara Mbao, anasema maisha ndani ya klabu yana changamoto na mchezaji anapaswa kuwa mvumilivu.

“Simba ni klabu ambayo mchezaji anapata mahitaji kwa wakati, huwezi kuiacha hata kidogo, lakini inabidi uwe na uvumilivu hasa kipindi unapokosa nafasi ya kucheza mara kwa mara,”anasema Mwambeleko.

Mchezaji huyo anasema hajutii kujiunga na Simba kwa kuwa imempa uzoefu wa kutosha baada ya kupita kwa makocha tofauti na wachezaji wa kigeni.

Beki huyo amejiunga Singida United kwa mkataba wa mwaka mmoja na atakuwa chini ya kocha Hemed Morocco, aliyejaza nafasi ya Mholanzi Hans van der Pluijm.

Monday, July 23, 2018

Hazard aziweka pabaya Chelsea, Real Madrid

 

London, England. Klabu ya Chelsea imesema kamwe Edin Hazard hawezi kutua Real Madrid kwa gharama yoyote.

Kauli hiyo imetolewa na kocha mpya wa timu hiyo Maurizio Sarri aliyesema atapambana kufa au kupona kumbakiza Hazard.

Real Madrid imekuwa ikimuwinda muda mrefu nahodha huyo wa Ubelgiji bila mafanikio, lakini msimu huu wa majira ya kiangazi imesema haikubali.

Chelsea imesisitiza licha ya mshambuliaji huyo kuwekewa mezani pauni150 milioni, lakini haondoki Stamford Bridge.

Hazard amegoma kutia saini mkataba mpya licha ya kuahidiwa mshahara mnono wa pauni 300,000 kwa wiki.

Sarri alisema Hazard hawezi kuwageuka na kujiunga na Real Madrid na matarajio yake ni kumuona akibaki Chelsea msimu ujao.

Mshambuliaji huyo alipandisha dau lake baada ya kucheza kwa kiwango bora Fainali za Kombe la Dunia nchini Russia.

Hazard aliiongoza Ubelgiji kushika nafasi ya tatu katika fainali hizo zilizomalizika Julai 15 na Ufaransa ilitwaa ubingwa.

Sarri aliyejaza nafasi ya Mtaliano Antonio Conte aliyefukuzwa, alisema haamini kama Hazard anaweza kuipa kisogo Chelsea katika usajili wa majira ya kiangazi.

Mshambuliaji huyo hayuko na kikosi cha Chelsea ambapo kimeweka kambi ya muda nchini Australia kwa maandalizi ya msimu mpya wa Ligi Kuu England.

Mshambuliaji huyo anaendelea kuponda raha nchini Hispania, baada ya kumalizika Fainali za Kombe la Dunia.

Hazard alijiunga na Chelsea mwaka 2012 kutoka Lille ya Ufaransa alikocheza kwa mafanikio kabla ya kutua Stamford Bridge.

Mchezaji huyo aliyekulia Ufaransa kabla ya kwenda Ubelgiji, alifunga mabao 36 katika mechi 147 alizocheza kwenye Ligi Kuu Ufaransa. Rekodi yake akiwa Chelsea inaonyesha alicheza mechi 208 na kufunga mabao 69.

Monday, July 23, 2018

Rais Croatia alivyochengua mashabiki Kombe la Dunia

 

Jina la Kolinda Grabar limeingia katika orodha ya majina maarufu yaliyochomoza katika Fainali za Kombe la Dunia zilizofanyika nchini Russia mwaka huu.

Kolinda amepata umaarufu na dunia imemtambua kutokana na aina ya uhamasishaji wake katika fainali hizo zilizochezwa nchini Russia.

Rais huyo wa Croatia ameacha gumzo katika fainali hizo, baada ya kuwa mstari wa mbele kuhamasisha wachezaji wa timu hiyo akipiga kambi nchini Russia.

Mbali na akina Luka Modric, Ivan Rakitic, Ivan Perisic au mkongwe Mario Mandzukic, Kolinda hakuwa mtu wa mchezo katika fainali za mwaka huu.

Croatia iliandika historia kwa kucheza fainali ya Kombe la Dunia licha ya kufungwa mabao 4-2 na Ufaransa.

Rais Kolinda alikuwa mmoja wa marais watatu waliopewa heshima na Shirikisho la Soka la Kimataifa (Fifa) kusimama mbele ya jukwaa kuu kutoa zawadi kwa washindi mbalimbali, akiungana na Emmanuel Macron wa Ufaransa na Vladimir Putin kutoka Russia.

Kolinda mwenye miaka 50, aliyeingia madarakani Februari 19, 2015, alisimama kidete bila kujali mvua katika siku ya fainali ambapo alishiriki hadi mwisho katika kazi ya kutoa medali kwa wachezaji wa timu zote mbili.

Alionyesha ujasiri wa hali ya juu kwanza kwa kustahimili mvua na pili kwa kufungwa nchi yake, tukio hilo limekuwa likiwekwa kwenye mitandao mbalimbali ya kijamii duniani kote.

Baada ya Croatia kutinga fainali, Kolinda aliongoza kampeni kuhamasisha wananchi wote kuiunga mkono timu hiyo, akimtumia pia mwanamuziki mahiri Marko Perkovc. Rais Kolinda amekuwa akiitangaza Croatia mbele ya viongozi wa mataifa mengine kwa mfano, aliwahi kuwapa jezi za timu yake ya Taifa, Kansela wa Ujerumani, Angela Mikel, Waziri Mkuu wa Uingereza, Theresa May, Rais wa Marekani, Donald Trump na siku ya fainali alimkabidhi jezi Rais wa Russia, Vladimir Putin.

Rais huyo aliwahamasisha wachezaji kupambana dakika 120 katika mechi zote za mtoano kuanzia ile ya 16 bora dhidi ya Denmark, robo fainali na Russia na nusu fainali dhidi ya England, kabla ya fainali kumalizika kwa dakika 90.

Kocha wa Croatia Zlatko Dalic, anamtaja Rais Kolinda ni kiongozi wa aina yake baada ya kuwahamasisha wachezaji wake kutetea Taifa lao.

Croatia ilianza kucheza mechi za kimataifa mwaka 1994 baada ya Taifa hilo kupata Uhuru, Juni 25, 1991 baada ya kuvunjika kwa Muungano wa Yugoslavia.

Croatia, Taifa lenye watu 4,154,200 kwa mujibu wa sensa ya watu na makazi iliyofanyika Oktoba 2017 inatambulika duniani kutokana na kazi nzuri ya Rais Kolinda.

Kolinda ana watoto wawili aliozaa na mumewe Jakov Kitarovic. Rais huyo ana uwezo kuzungumza lugha za mataifa mbalimbali yakiwemo Croatia, England, Hispania, Ureno, Ujerumani, Ufaransa na Italia.

Monday, July 23, 2018

Zilikuwa fainali za Mbappe na Modric

 

Moscow, Russia. Fainali za Kombe la Dunia 2018 zimemalizika na Ufaransa imetwaa ubingwa baada ya kuifunga Croatia mabao 4-2 mjini Moscow, Russia.

Fainali hizo zilianza Juni 14 na kumalizika Julai 15 ambapo mabao 169 yalifungwa na kuweka rekodi katika historia ya fainali hizo.

Fainali hizo hazikuwa za kufurahisha kwa mastaa Lionel Messi wa Argentina na Cristiano Ronaldo wa Ureno ambao walishindwa kuzing’arisha timu zao. Fainali za mwaka huu zimekuwa na maajabu mbali na wachezaji nyota kushindwa kutamba, timu zilizokuwa zikipewa nafasi ya kutwaa ubingwa ziling’olewa mapema.

Mchezaji Bora

Nahodha wa Croatia Luka Modric alitwaa tuzo ya mchezaji bora wa fainali baada ya kucheza kwa kiwango bora na kuisaidia timu hiyo kufika fainali. Kiungo huyo alikuwa mhimili wa Croatia katika fainali hizo baada ya kutengeneza pacha maridadi na Ivan Rakitic.

Mchezaji Bora Chipukizi

Mshambualiaji chipukizi wa Ufaransa, Kylian Mbappe mwenye miaka 19, anayecheza Paris Saint-Germain (PSG) alitwaa tuzo ya mchezaji bora chipukizi.

Kinda huyo anatabiriwa kuchomoza katika tuzo ya Mchezaji Bora wa Mwaka ‘Ballon d’Or’.

Mfungaji Bora

Harry Kane, alitwaa tuzo ya mfungaji bora baada ya mabao sita kuifikisha nusu fainali England.

Kane anastahili kuwa mshambuliaji bora wa fainali kwa kuwa licha ya kubeba dhama kubwa ya unahodha kwa mara ya kwanza akiwa na miaka 24.

Kipa Bora

Thibaut Courtois wa Ubelgiji alitwaa tuzo ya kipa bora wa fainali hizo baada ya kulinda vyema lango.

Thibaut Courtois, aliiwezesha Ubelgiji kufika nusu fainali na kushika nafasi ya tatu katika fainali hizo. Kipa huyo wa Chelsea, amefungwa mabao sita katika mechi saba alizocheza kuanzia hatua ya makundi hadi nusu fainali.

Kocha Roberto Martinez anamtaja Courtois ni hazina ya Ubelgiji baada ya kumzima nyota wa Brazil Neymar katika mchezo wa obo fainali.

Timu Bora

Hispania ambao ni mabingwa wa Kombe la Dunia mwaka 2010, iliaga mapema katika fainali lakini hatua hiyo haikuwazuia kutwaa tuzo ya timu bora.

Hispania imechaguliwa timu bora yenye mchezo wa kiungwana ‘fair play’, baada ya wachezaji wake kucheza kwa nidhamu na kutopata kadi ya njano.

Monday, July 23, 2018

4-4-2 ilivyozihukumu Croatia, Ufaransa

 

Mchezo wa fainali ya Kombe la Dunia baina ya Ufaransa na Croatia, ulikuwa na maajabu yake kwa kuzikutanisha timu zinazotumia mfumo sawa 4-4-2.

Ufaransa chini ya kocha Didier Deschamps, ilitumia mfumo huo kuanzia katika mechi za hatua ya makundi hadi fainali. Deschamps alinufaishwa zaidi na mfumo huo ingawa aliutumia kwa makini akitambua udhaifu kwenye safu yake ya ulinzi.

Washambuliaji wake walilazimika kurudi nyuma kusaidia ulinzi kabla ya kufanya mashambulizi machache ya kushitukiza ambayo yaliwapa matokeo mazuri huku Paul Pogba na N’golo Kante wakitumika kupenyeza mipira mirefu mbele. Mfumo huo ulichagizwa na kasi ya kinda Kylian Mbappe na Antoine Griezmann wenye uwezo mkubwa wa kukimbia na mpira langoni mwa adui.

Akifahamu anakutana na timu yenye safu nzuri ya ulinzi na mfumo sawa na wake, Deschamps, aliwaandaa washambuliaji wake kufanya kazi mbili kurudi nyuma kuzuia na kushambilia kwa kushituliza.

Croatia

Zlatko Dalic ni kocha mwenye uwezo wa kuwasoma wapinzani ndio maana aliziondoa Denmark, Russia na England, katika 16 bora, robo na nusu fainali.

Dalic enzi zake alicheza nafasi ya beki hatua iliyomuwezesha kujua namna ya kudhibiti mbinu za wapinzani na namna ya kuwakabili. Aliamini mfumo wa 4-4-2 tangu hatua za awali, akiwa na kikosi imara kwenye ulinzi na kiungo, hakuwa na washambuliaji wenye uwezo wa kufunga mabao, lakini mbinu zake zilificha udhaifu huo.

Kutokana na aina ya wachezaji alionao alibainisha tangu mwanzo wa fainali hizo kuwa alitua Russia akiwa na malengo ya kufika 16 bora.

Ingawa aliyasema hayo mapema hakuna aliyefikiri au kuamini kama angetimiza malengo hayo.

Dalic alifanya maajabu na mbinu zake zikakifikisha kikosi hicho fainali licha ya kufungwa mabao 4-2 na Ufaransa katika mchezo uliokuwa na ushindani mkali.