Monday, June 18, 2018

Jinamizi la penalti lamnyima usingizi Messi

 

Lionel Messi ameeleza maumivu anayosikia baada ya kukosa mkwaju wa penalti katika mchezo dhidi ya Iceland.

Mshambuliaji huyo alikosa penalti katika mchezo ambao Argentina ilitoka sare ya bao 1-1 na Iceland katika Fainali za Kombe la Dunia.

Mkwaju huo wa penalti umeibua mjadala kila kona ya dunia hasa baada ya hasimu wake Cristiano Ronaldo kuifungia Ureno mabao matatu dhidi ya Hispania.

Mamia ya mashabiki Argentina wamepokea matokeo hayo kwa hisia tofauti wengine wakimpa lawama mshambuliaji huyo wa Barcelona na baadhi walimtetea.

Messi amekuwa katika mazingira magumu ya kuivusha Argentina katika mashindano makubwa ya kimataifa licha ya kucheza vyema katika kikosi cha Barcelona.

Mshambliaji huyo mwenye miaka 30, jana alitoa ya moyoni anavyopata uchungu, baada ya penalti yake kupanguliwa na kipa Hannes Halldorsson.

“Nina uchungu kukosa penalti. Tulikuwa na kila sababu ya kupata pointi tatu ambazo zingekuwa mwanzo mzuri kwetu. Kuanza kwa ushindi siku zote ni jambo jema, lakini tunapaswa kusahau na kujipanga kwa mchezo ujao dhidi ya Croatia,” alisema Messi.

Pia Messi alisema mchezo ulikuwa mgumu kwa kuwa wapinzani wao walicheza kwa kujilinda na kutotoa nafasi kwao kupata nafasi za kufunga.

Kauli ya mchezaji huyo bora wa dunia mara tano, imeungwa mkono na kocha Jorge Sampaoli aliyedai kuwa mbinu hiyo iliwanyima ushindi.

Wakati Messi akianza vibaya fainali hizo, Ronaldo alipachika mabao matatu ‘hat trick’ katika mchezo ambao Ureno ilishinda mabao 3-3 dhidi ya Hispania.

Wachezaji hao ambao kila mmoja ametwaa tuzo ya mchezaji bora mara tano, wanatupiwa jicho na mashabiki wengi duniani.

Messi anacheza Barcelona na Ronaldo Real Madrid ambapo kila mmoja anajiona bora zaidi ya mwingine katika medani ya soka.

Monday, June 18, 2018

Russia wafanya ubaguzi waziwazi

 

Fainali za Kombe la Dunia zimeanza huko Russia na zinaendelea, leo ni siku ya Kundi G japo kuna mechi moja ya Kundi F.

Mechi ya Kundi F, Sweden itacheza na Korea Kusini itakayochezwa kwenye Uwanja wa Nizhny Novgorod kuanzia saa 9:00 alasiri.

Lakini mechi ya kukatana shoka itakuwa kati ya wawakilishi wa Afrika, Tunisia dhidi ya England kwenye Uwanja wa Volgograd nayo ikianza saa 9:00 alasiri. Mpambano mwingine leo utakuwa kati ya Ubelgiji itakayokwaana na Panama lakini mechi hii ikichezwa kwenye Uwanja wa Sochi kuanzia saa 12:00 jioni.

Mechi zinaendelea, lakini huku nje ya uwanja, kumetolewa tangazo la kibaguzi kwa wale watakaokwenda kushuhuduia fainali za Kombe la Dunia hasa watu weusi. Tamara Pletnyova, mkuu wa masualaya bunge (familia) alisema Kamati ya Wanawake na Watoto ya Russia imewaonya wananchi za Russiakutojihusisha kimapenzi na mashabiki ama watu watakaokuja kwa ajili ya fainali hizi. Zaidi wameonywa wanawake wa Russia kutofanya mapenzi na wageni kwani inaweza kuwa kama ilivyokuwa Michezo ya 1980 ya Olimpiki kule Moscow.

“Kuna wasichana watakaokutana na wanaume, na matokeo yake watawapa mimba,” Pletnyova alisema: “Labda wakubaliane kuoana, na inawezekana hawatafanya hivyo. Sasa hapo watakaohangaika ni watoto, ambao walihaha kama ilivyokuwa Michezo ya Olimpiki ya Moscow.”

“Tangu kipindi hicho cha Soviet, watoto ndoo walikuwa wakihangaika.” (Kama ukifanya mapenzi, usijaribu kuchanganya rangi

Lakini Pletnyova alitahadharisha zaidi kwamba ikiwa mambo yatakwenda kama watu wanavyotaka, kutakuwa na watoto kibao nje ya ndoa.

Warusi wameshawatahadharisha wanawake wao kuwa wasitembee na watu weusi na kama wakishindwa kabisa watambee na watu weusi ili watoto watakaopatikana wawe wazungu. “Kama ni mtu wa jamii tofauti na mweupe, itakuwa mbaya zaidi,” Pletnyova alisema. “Lazima watoto wapatikane wenye asili yetu.”

Russia ina asilimia kubwa ya ubaguzi wa rangi hasa katika viwanja vya michezo na hii si mara ya kwanza kwa matukio kama haya kutokea Russia.

FIFA iliwahi kuitoza faini Russia Dola30,000 kwa mashabiki kuwafananisha wachezaji weusi sawa na kima wakati wa mashindano ya Mabara mapema Mei.

Mchezaji wa England, Danny Rose amewaambia wanafamilia yake kubakia hotelini muda mwingi kwa kuhofia masuala ya ubaguzi wa rangi. Hata hivyo, Russia imeahidi kuuzima ubaguzi.

Danny Rose, ambaye ni mwanasoka mweusi wa England, aliiambia Evening

Standard: “

“Kwa mimi sina shaka, lakini nimewaambia wasiwe wanatoka, watadhihakiwa. Kwa mimi sina shaka, ninaiangalia familia yangu.

Monday, June 18, 2018

MSIMU 2018/19: Changamoto ya timu 20 Ligi Kuu hizi hapa

 

By Charles Abel, Mwananchi cabel@mwananchi.co.tz

Msimu wa Ligi Kuu Bara wa 2017/18 umemalizika kwa Simba kutwaa ubingwa ikiwa ni mara ya kwanza baada ya misimu minne kupita.

Simba ilijipanga, imelazimika kufanya usajili ghali ili kutwaa ubingwa huo na kukata tiketiya Ligi ya Mabingwa Afrika kuanzia Desemba mwaka huu.

Michuano hiyo itaanza Desemba baada ya kumalizika hii inayoendelea na ni kutokana na Shirikisho la Soka Afrika (CAF) kufanyia mabadiliko uendeshaji wa mashindano yake.

Michuano ya klabu Afrika sasa itaanza Desemba na kumalizika Mei na mashindano mengine yataanza Septemba 2019 hadi Mei 2020.

Mabadiliko mengine ambayo CAF imeyafanya ni ya mashindano ya Mataifa ya Afrika (AFCON) ambayo sasa fainali zake zitakuwa zikifanyika kati ya Juni na Julai ya mwaka wa mashindano.

Hayo ni mambo ya Simba na Mtibwa kwa mashindano yao ya klabu Afrika.

Kikubwa hapa ni kumalizika kwa Ligi Kuu na sasa klabu zimeingia kwenye mapambano ya kunyang’anyana wachezaji na timu hutumika kuimarisha vikosi vyao.

Kwa wachezaji hasa wale ambao walifanya vizuri wakati msimu unaendelea, huu ni wakati wa mavuno kwao kwa kupata vitita vya fedha za kujiunga na timu nyingine au kuongeza mikataba ya kuendelea kuchezea klabu walizozitumikia msimu ilioisha.

Inatakiwa mchezaji ajiulize, mchezaji mwenzake au wenzake walikuwa timu moja, kwanini wagombewe? Kwanini asiwe yeye na anakuwa huyu. Bila kutafakari hapo, kwa mchezaji atakuwa na walakini.

Na kwa kutafakari, lazima kuonyesha utofauti ili msimu ujao unapomalizika, wavune mamilioni.

Mbali na usajili, kipindi kama hiki pia hutumiwa na timu kama wakati wa kufanya tathmini ya mwenendo na ufanisi wa kikosi katika msimu uliomalizika na ndio wakati wa kuandaa mipango mikakati kwa ajili ya msimu unaofuata kwenye ligi.

Hata hivyo tofauti na nyakati za nyuma, hesabu na mipango ya timu kuelekea msimu ujao wa Ligi Kuu vinatakiwa kuandaliwa kwa umakini mkubwa ili klabu ziweze kukabiliana na changamoto ambazo zitakumbana nazo kwenye ligi.

Hii ni kwa sababu idadi ya timu ambazo zitashiriki Ligi Kuu msimu ujao ni 20 hivyo ni wazi lazima kutakuwepo na changamoto ambazo timu itakayoshindwa kuzitatua itajiweka kwenye athari ya kushuka daraja.

Spoti Mikiki inakuletea changamoto kadhaa kwa namna moja au nyingine zina uwezekano mkubwa wa kuikabili ligi yetu msimu ujao kutokana na ongezeko la timu kutoka 16 hadi 20.

Gharama za uendeshaji

Ligi Kuu imepanuka wigo, kutoka timu 16 hadi 20 baada ya Alliance, JKT Tanzania, Lyon, KMC, Biashara Mara na Coastal Union kupanda Ligi Kuu.

Timu hizo zitaungana na hizi zilizopo za Ligi Kuu kutengeneza timu 20.

Hata hivyo, idadi kubwa ya timu za Ligi Kuu hazina wadhamini binafsi na nyingi zinategemea fedha kutoka kwa wadhamini wakuu wa ligi ambao ni kampuni za Azam Media, Vodacom na Benki ya KCB ambazo hutolewa kwa kila timu inayoshiriki ligi kama utaratibu ulivyo.

Hata zile ambazo zina udhamini binafsi, bado fedha wanazopata hazitoshi kuzifanya zimudu gharama za kuendesha timu kwa msimu mzima wa ligi katika kusimamia masuala kama usafiri, huduma za malazi, chakula, posho na mishahara kwa wachezaji, makocha na watendaji wengine wa timu.

Kuongezeka kwa idadi ya timu kwenye Ligi Kuu kutoka 16 hadi 20 kunamaanisha ongezeko la gharama za uendeshaji kwa kila timu ambayo itashiriki ligi hiyo.

Kuna uwezekano mkubwa baadhi ya timu zikajikuta zinakwama kujiendesha kabla hata ligi haijaisha na kikubwa hapo ni kufanya vibaya sambamba na kushindwa kuleta ushindani kwenye ligi.

Mashindano ya kimataifa

Mabadiliko ya mfumo wa uendeshaji mashindano wa CAF unamaanisha kuwa mechi za Ligi Kuu Tanzania Bara zitakuwa zinachezwa sambamba na mechi za kimataifa kwa klabu ambazo zitawakilisha Tanzania.

Pamoja na hilo, pia timu ya taifa ‘Taifa Stars’ na ile ya Tanzania Bara ‘Kilimanjaro Stars’ zitakuwa zinakabiliwa na mechi mbalimbali za kimataifa za kirafiki na zile za kimashindano.

Mechi hizo za kimataifa zinaweza kuchangia kwa kiasi kikubwa ratiba ya ligi kupanguliwa mara kwa mara jambo ambalo linaweza kupunguza ushindani na uhondo wake. Panguapangua ya ratiba itachukua nafasi kubwa kwa jinsi inavyoonekana.

Viwanja vibovu

Katika msimu uliopita, tumeshuhudia viwanja vichache tu ambavyo vina hadhi ya kutumika kwa mechi za Ligi Kuu huku idadi kubwa ya viwanja vilivyobakia vikiwa ni vibovu na vina hadhi ndogo ya kuchezeka kwa mechi za mashindano makubwa kama Ligi Kuu.

Idadi kubwa ya viwanja pia vina miundombinu isiyoridhisha ya utoaji maji taka lakini pia havina mazingira mazuri yanayoweza kusaidia na kurahisisha urushaji wa matangazo ya mechi kwenye luninga.

Kabla hata changamoto ya ubovu wa viwanja haijatatuliwa, Ligi Kuu imekutana na ongezeko la timu jambo ambalo huenda likachangia kwa kiasi kikubwa kuongeza uchakavu wa viwanja kwani vitalazimika kutumika kwa mechi za mfululizo bila kupata nafasi ya kufanyiwa ukarabati mdogo.

Kungekuwa na kamati ya kukagua viwanja, kamati huru na kutoa uamuzi wake ikiwemo hata kufungia viwanja husika.

TFF, Bodi ya Ligi na Kamati, ingefanya ukaguzi wa viwanja vya timu hizo 20 na kutoa mapendekezo ya haraka nini kifanyike.

Hivi mkoa wa Morogoro na raslimali zote ilizonazo, wanashindwa kuwa na pitch iliyosimama! Ligi zimemalizika hadi Agosti, kwanini viwanja visikarabatiwe? Uwanja wa Namfua, Uwanja wa Sheikh Amri Abeid ni mfano mzuri.

Inatakiwa Uwanja wa Biashara Mara wakati huu unakuwa katika hatua za mwisho mwisho tayari kwa Ligi Kuu. Itashangaza kuona uwanja unakuwa na vipara.

Kamati ingewasiliana na wamiliki wa viwanja katika mikoa husika pamoja na halmashauri kwani mechi zikichezwa sio wanakimbilia asilimia za mapato, pia maboresho yanatakiwa.

Hali ya kijiografia na miundombinu

Idadi kubwa ya timu zinatoka katika mikoa na maeneo tofauti ya nchi hivyo hulazimika kusafiri umbali mrefu kufikia vituo kwa ajili ya kucheza mechi husika.

Kutokana na idadi kubwa ya timu kutokuwa na nguvu ya kiuchumi, hulazimika kutumia usafiri wa ardhini ambao hukutana na changamoto za ubovu wa miundombinu hasa barabara jambo linalowalazimisha wasafiri umbali mrefu na kusababisha uchovu kwa wachezaji.

Hapo wachezaji wanatumia muda mrefu barabarani na wakifika saa 48 mechi, bila kujiandaa. Baadhi ya timu zinafungwa kwa mengi ukiacha masuala ya kiufundi.

Pamoja na hilo, changamoto nyingine ni hali ya hewa ambapo kuna nyakati ratiba ya ligi huangukia wakati wa masika na huwa na mvua nyingi ambazo husababisha mechi kuahirishwa mara kwa mara jambo ambalo huchangia kupanguliwa kwa ratiba ya ligi.

Majeraha & uchovu

Uwingi wa timu utalazimisha wachezaji kucheza idadi kubwa ya mechi mfululizo pasipo kupata nafasi ya kupumzika, kuweka fiti miili sambamba na kufanya programu za maandalizi kwa ajili ya michezo inayofuata.

Idadi kubwa ya timu hazina nguvu ya kiuchumi kuajiri wataalamu wa afya kwa ajili ya kuweka sawa miili na afya za wachezaji pindi wanapomaliza mechi.

Hili kwa kiasi kikubwa litachangia kuzalisha majeruhi sambamba na kusababisha uchovu kwa wachezaji jambo litakalozidhoofisha na kupunguza ushindani wa ligi.

Monday, June 18, 2018

Kama mchezaji hukupapatikiwa, hebu jitathimini



Ibrahim Bakari

Ibrahim Bakari 

Ligi Kuu Tanzania Bara imemalizika kwa timu ya Simba kutwaa ubingwa iliokuwa ikusaka kwa miaka mitano ndani ya misimu mine.

Simba ambayo imezawadia wachezaji wake kwa kazi nzuri, imeifanya kazi barabara kwa kutengeneza kikosi makini kwa ajili ya msimu uliopita wa Ligi Kuu Bara. Hata hivyo, hiyo si ishu sana, hapa nina majambo mawili ninayotaka kuyazungumza; Azam FC na wachezaji kujitathmini.

Nikianza na Azam. Imemaliza Ligi Kuu ikiwa nafasi ya pili na sababu kubwa ni baada ya kuboronga katika mechi zake na wakati mwingine mechi ambazo hata hazistahili kupoteza.

Inawezekana mtu akanishangaa kuwa haistahili kufungwa, kivipi wakati soka ina hali tatu. Sawa. Nikiangalia timu hii na timu nyingine za Ligi Kuu unaweza kusema ni sawa tu.

Maana yangu ni kwamba, nilitarajia kuiona Azam ikitikisa miamba ya soka Tanzania, Azam ilikuwa iwe timu moja kali na tishio hata Afrika Mashariki na Kati.

Wachezaji wa Azam wamebweteka, hawachezi kazi kazi, hawajitumia inavyotakikana ile ya kufia uwanjani kwa kuwa hawana wasiwasi na posho na mishahara inaingia. Hapa ni Kipre tu.

Hii ni mbaya. Matokeo yake gharama zinakuwa kubwa wakati timu haipafomu. Kuna kufungwa, lakini ilivyo Azam si ya kufungwa na Mwadui au kutoka sare na Ruvu Shooting, ilitakiwa hapo ni kukandamiza tu.

Maana yangu ni nini, Azam wana gym, bwawa la kuogelea, uwanja wa mazoezi na saa yoyote unajifua lakini angalia matokeo ya timu. Mfano, wachukue Mbeya City wageuze Azam na Azam wawe Mbeya City, huo mpira ninaamini watu watatafutana. Wachezaji wa Azam wameshakuwa mamwinyi.

Tuyaache. Baada ya ligi Kuu kumalizika, timu zinapambana kufanya usajili.

Kwa wachezaji sasa, inatakiwa mchezaji kujitathmini, kujiuliza, kwanini hupapatikiwi na mchezaji mwenzako anapapatikiwa? Umecheza naye timu moja, kwanini mwenzako analetewa mabulungutu ya noti wewe huletewi, mwenzako anagombewa wewe kwanini hugombewi?

Hiyo ni kwa sababu ana kitu cha ziada ameonyesha. Ukijiangalia utajiona kuwa wewe ni mvivu, hujitumi, huna vitu vya ziada na ndiyo maana huonwi, huonekani!

Ni ngumu sana kuwa na kitu cha ziada, kujituma, kucheza jihad na kisha usionekane.

Ndiyo maana nikasema wachezaji wajitathimini, waangalie wamekosea wapi na kuongeza bidii msimu ujao. Mimi naona wachezaji wanazikataa fedha wenyewe, wachezaji hawataki mabulungutu ya usajili, kama kweli unataka mamilioni, kwanini usijitume, kwanini usifanye vitu vya ziada. Cheza uonekane.

Mchezaji anaingia mazoezini amechelewa, kwa wanaoachiwa hawajichungi, hawazingatii muda wa kulala, chakula, miiko ya uchezaji na wenyewe ni kuendekeza starehe, matokeo yake wanachemka.

Hii ni changamoto kwao kwa msimu ujao. Kwanza kumshawishi kucheza kwa kujituma mazoezini, kuwa wabunifu uwanjani.

Inachotakiwa ni mchezaji kufanya mazoezi ya ziada na uzuri wachezaji watakuwa na ‘fatigue’ au kuumia kwa wale wa mara kwa mara kwa kuwa mechi ni nyingi, hivyo ni wakati wa kuonyesha uwezo.

Mchezaji lazima uangalie mwenzako ana kipi cha ziada? Kakuzidi nini akagombewa? Jiangalie, ukiona hivyo ujue una walakini.

Monday, June 18, 2018

Mohamed Salah, naitizama Altare

 

Aliwahi kuishi Neymar Jr kwenye kizazi alichokuwepo Lionel Messi na Cristiano Ronaldo, lakini kulikuwa na tatizo moja tu daima nalo liliitwa Barcelona.

Tatizo alilolipata Neymar ni kuwa yeye hakuwa kwenye ushindani wa hao wawili hivyo pamoja na ubora wake, bado alitakiwa kumfanya mfalme wa Barcelona, Lionel Messi aweze kumnyanyasa Cristiano Ronaldo.

Moja ya sababu kubwa zilizomwondoa Neymar katika klabu ya Barcelona ilikuwa hata wakati ambao Messi alienda likizo ya makusudi dhidi ya Paris St Germain bado kazi kubwa ya Neymar katika maajabu yale ya ushindi wa mabao 6-1 haikuzungumzwa.

Neymar aliamini kuwa alikuwa mrithi sahihi wa kizazi hiki cha wanaume hawa wawili mpaka alipoona miaka 25 inafika na hakuna dalili yoyote ya kukabidhiwa kijiti. Hapa hata mamlaka za Brazil zilianza kunong’ona na bahati nzuri kwao ni mfalme kuliko hata Messi alivyokuwa kwa taifa lake la Argentina. Bahati mbaya nyingine kwa Neymar ilikuwa kuingia kwenye klabu ya Paris St Germain kwa mikogo na kumkuta kocha Unai Emery ambaye majina ya wachezaji yalimzidi nguvu.

Wakati dunia ikiwa katika bumbuwazi pasi na kufahamu yupo ambaye angekuwa binadamu anayeweza kuwapa tabu wanaume hawa wawili, kulikuwa na kikosi ambacho hakuna aliyekuwa anakidhania. Wakiwa wanaimba nyimbo yao ya You’ll Never Walk Alone kwa mwaka wa 27 pasipokuwa na kombe la ligi, klabu ya Liverpool ilikuwa imemsajili mchezaji mmoja mzuri wa kawaida anayeitwa Mohammed Salah.

Hakuna ambaye alishitushwa na usajili huu na wengi walifahamu kuwa alikuwa ameletwa kuongeza unyumbulifu na kasi kikosini hapo kwani funguo zote zilikuwa mikononi mwa Philippe Coutinho ambaye angeamua kila tukio muhimu la klabu hiyo ndani ya uwanja. Uwezekano wa Mohamed Salah kuwa mchezaji bora kwenye kikosi cha Liverpool kwa msimu huu ulikuwa mdogo kuliko ule wa Leicester City kutwaa ubingwa wa Ligi kuu ya England. Ilikuwa haifikiriki, haikuwa inaleta maana na wala haikuwa hoja kuwa angeweza kutikisa katika ligi pia katika dunia ya leo.

Katika ligi ambayo Romelu Lukaku alisajiliwa Manchester United, Alvaro Morata akitua Chelsea na uwepo wa Aguero, Harry Kane, Kevin De Bruyne na Eden Hazard ni mwendawazimu pekee ambaye angeweza kuliwaza jina la Mohamed Salah mbele hata ya Sadio Mane ambaye ndiye aliyekuwa mchezaji bora zaidi wa Liverpool kabla hajapata majeraha msimu wa 2016/2017. Ni maisha ndivyo yalivyo, mwenye suti huonekana na fedha kuliko mavazi ya jinzi mtaani.

Miezi sita baadaye tangu aingize mguu wake ndani ya uwanja wa Anfield, kuna kituo cha mawasiliano ambacho kilikuwa kinatoa vifurushi vya bure vyenye jina kila akifunga, migahawa iliyopo Liverpool ikawa inatoa chakula anachokipenda bure kwa wanaokuwepo mgahawani muda anaofunga bure. Kijakazi akageuka mfalme, dunia ikageuka na kila alichoshika kikageuka dhahabu. Akageuza kila jiwe alilolikuta katika klabu ya Liverpool na kusimika misingi yake ambayo inaweza kudumu kwa muda mrefu kabla hajajitokeza mwingine kuivunja.

Wakati akiwapa Liverpool sababu ya kupaza sauti mpaka nyikani, huku nyumbani raia wa Misri walipata sababu kubwa zaidi za kupiga magoti na kuabudu. Alifunga kila bao muhimu lililowapeleka kwenye michuano ya Kombe la Dunia inayofanyika Urusi. Amewaweka kwenye ramani ambayo wengi wao wamekwisharidhika na mchango wake bila kujali nini kitatokea kwa ujumla wa matokeo ya kundi A lenye timu za Uruguay, wenyeji Urusi, Saudi Arabia na Misri wenyewe.

Katika hili ndipo ambapo Mohamed Salah anaweza kuwa salama zaidi. Sababu ya kufanya vyema kwenye klabu ya Liverpool ilikuwa kucheza bila presha ya kutizamwa kama ilivyokuwa wengine na hakuna ambaye alimpa nafasi kubwa hata kwenye kikosi cha Liverpool. Pamoja na kuwa amejipatia jina kubwa hapa alipo kuna madhabahu takatifu zaidi kuliko zile alizotoka. Hapa ndipo Messi anajaribu kufunika ufanisi wa Cristiano Ronaldo kwenye Ligi ya Mabingwa Ulaya, Ronaldo akijaribu kuhakikisha inakuwa nafasi yake ya kutwaa Ballon D’Or ya sita na kuwa mwanadamu wa kwanza kufanya hivyo huku Neymar akitaka kuwakumbusha watu kuwa anaishi.

Kwenye hesabu hizi ngumu, kila mmoja anamtazama, Mohamed Salah atafanya jambo gani hili kuhalalisha uwepo wa jina lake na kukamilisha utatu mtakatifu wa mwaka huu kwa maana ya yeye, Lionel Messi pamoja na Cristiano Ronaldo. Kundi ilipo Misri sio gumu lakini lina changamoto ya kila timu kuamini inayo nafasi kubwa. Nafasi pekee ya upendeleo aliyokuwa nayo Mohamed Salah dhidi ya wengine wote ni ufinyu wa kikosi chake ukilinganisha na washindani wake.

Mohamed Salah hatakiwi kuifikisha timu yake nusu fainali ili ajisimikie jina kubwa zaidi kwa mwaka huu. Madhabahu yake itapigiwa kila goti iwapo akifanikiwa kufika japo robo fainali kwa juhudi zake za wazi. Bahati nzuri nyota yake inaonekana kung’ara zaidi kwa sababu anapendeka kwa wengi. Hana makuu, hazungumzi kupita kiasi na ni muumini mzuri. Kuna wengi wanaopewa nafasi ya kufika mbali kutokana na uimara wa vikosi vyao, lakini kwenye moyo wa Salah ni tofauti. Roho inaniambia utakuwa muendelezo wa mwaka wake mzuri.

Haya mambo huwa yanaenda na nyota, na Salah ameshika kasi msimu huu. Iwapo kama wataweza kujilinda vyema basi anao uwezo wa kuwa na madhara makubwa kwa sababu hata timu yake inampenda na inacheza ikimtizama yeye. Naitizama Altare ya kombe la dunia, ninapata kila hisia kuwa itabarikiwa na miguu yake. Atakuwa na msimu bora.

Monday, June 18, 2018

Inakuwa vipi wanamichezo wasianzishe miradi yao?



Allan Goshashi

Allan Goshashi 

Wanamichezo ni watu wa kuigwa katika jamii, ni watu muhimu sana. Ndiyo, ni watu ambao wamefundishwa nidhamu kwa kiwango cha juu kwa sababu makocha wanapowafundisha ujuzi huwa wanahakikisha wanawafundisha umuhimu wa nidhamu katika maandalizi yao ili wapate wanayoyatarajia katika mchezo husika.

Ndiyo, wanamichezo ni watu wa kuigwa katika jamii kwa sababu wanafanya kazi yao kwa bidii.

Mwamichezo anapokuwa kwenye mazoezi, kocha wake humfundisha kufanya kazi ya mchezo husika kwa bidii ili kufikia kiwango cha juu katika mchezo huo.

Ndiyo, wanamichezo ni watu wa kuigwa katika jamii, pia ni muhimu kwa sababu ni watu wa kujitoa kwa dhati katika mchezo wanaoucheza na kutoa mchango kwa timu yao. Kwa kufanya hivyo, wanamichezo huacha mambo mengi kama kukaa vijiweni na marafiki zao, kushiriki katika starehe na mambo mengi mengine. Wanamichezo hufanya hivyo ili kujitoa kwa dhati katika mchezo kwa ajili ya kuwa na ujuzi mzuri na kuleta furaha kwa mchezo husika kwa wale watakaowatazama wakiucheza.

Ndiyo, wanamichezo ni watu wa kuigwa katika jamii na muhimu kwa sababu ni watu wanaofundishwa kushirikiana, kufanya kazi kitimu ili kupata mafanikio.

Kwa hiyo wanamichezo ni watu ambao wamefundishwa misingi ya umoja.

Ndiyo, wanamichezo ni watu wa kuigwa katika jamii kwa sababu wamefundishwa kuna kupata na kukosa au ninaweza kusema wamefundishwa kushinda na kushindwa. Wamefundishwa jinsi ya kufurahia ushindi wao bila kumdharau mpinzani wao. Wamefundishwa kutobweteka kwa mafanikio waliyoyapata katika mechi moja bali kuangalia mafanikio watakayoyapata mwisho wa mashindano. Pia, wamefundishwa kukabiliana na hali ya kushindwa katika mashindano au kukabiliana na hali ya kushindwa kufikia malengo yao. Wamefundishwa kuwa kushindwa ni jambo la muda mfupi kwa hiyo wanatakiwa kuboresha kazi zao ili kupata mafanikio wanayoyatarajia na siyo kudharau wengine.

Ndiyo, wanamichezo ni watu wa kuigwa katika jamii na muhimu kwa sababu wamefundishwa kupanga malengo yao na kuyapigania. Inafahamika kuwa watu wenye mafanikio ni wale waliopanga malengo ya muda mfupi na yale ya muda mrefu na kuhakikisha wanayakamilisha. Mwanamichezo huwa anafundishwa kuwa haijalishi kama ana kipaji au ujuzi mkubwa anachotakiwa ni kutimiza malengo.

Ndiyo, wanamichezo ni watu wa kuigwa katika jamii kwa sababu wanafundishwa thamani ya mazoezi na maandalizi kwa ajili ya kufikia malengo yao iwe binafsi au kitimu. Wanamichezo wanafundishwa kuwa uzoefu mzuri wa mafanikio hupatikana katika maandalizi sahihi. Pia, hufundishwa kuwa wanashindwa kwa sababu hawana umakini katika muda wanaouweka katika mazoezi yao.

Ndiyo, wanamichezo ni muhimu katika jamii kwa sababu hufundishwa jinsi ya kukabiliana na shida au taabu. Hili ni suala la akili ambalo hufundishwa wanamichezo ili kukabiliana nalo wakati wa mazoezi na katika mashindano.

Kwa kutazama sababu zote hizo zinazoonyesha wanamichezo ni watu wa kuigwa na pia ni muhimu katika jamii, inashangaza kuona hapa nchini hawathaminiwi, wanadhulumiwa na viongozi wa michezo nchini, Serikali haiwathamini inavyotakiwa, pia makampuni nchini na yenyewe hayajitokezi vya kutosha kuwekeza fedha kwa wanamichezo wetu.

Tunatakiwa kufahamu katika mchezo wowote mtu muhimu ni mwanamichezo na siyo kiongozi wa mchezo kwa hiyo tuwathamini wanamichezo wetu katika hali zote kwani tukiwekeza kwao na wakipata mafanikio wataanzisha miradi ambayo itatoa ajira kwa vijana wasomi na wasio wasomi.

Monday, June 18, 2018

Namna ya kudhibiti uchovu viungo



Dk Shita Samwel

Dk Shita Samwel 

Katika maisha ya kila siku ni kawaida kwa mfanyaji wa mazoezi au kazi ngumu kuwahi kupata hisia za uchovu wa viungo vya mwili kiasi cha kujihisi kuwa ana ugonjwa mkali.

Uchovu hujulikana kitabibu kama Muscle fatigue au Physical fatigue ni hali inayojitokeza mwilini pale misuli ya mwili inapofanyishwa kazi kupita kiwango chake.

Kujitokeza kwa uchovu unao ambatana na maumivu ni njia mojawapo ya mwili kujihami na kukupa ishara kuwa viungo vya mwili ikiwamo misuli imetumika kupita kiasi.

Uchovu unasababisha misuli ya mwili kukosa nguvu kama ilivyo kawaida yake. Tatizo hili linaweza kuambatana na maumivu yanayoweza kuwa ya wastani mpaka kuwa makali.

Hisia za uchovu huweza kuhisiwa zaidi katika maeneo ya maungio (joint), mgongoni, kiunoni, mapajani na magotini.

Muathirika anaweza kuhisi pengine ana ugonjwa mkubwa kumbe tu ni uchovu wa viungo vya mwili.

Uchovu unatokana na uwapo vitu vinavyoingilia hatua za utendani yaani kukunjuka na kujikunja kuwezesha matendo mbalimbali ikiwamo kukimbia, kuruka na kutembea.

Tatizo hili linaweza kusababishwa na mishipa ya fahamu kutosisimua vizuri misuli na uwepo wa mrundikano wa mabaki au taka mwili baada ya seli kutumia sukari ya mwili kupita kiwango chake.

Uchovu unaotokana na mwili kufanya kazi sana ni tatizo la muda tu ambalo linaweza kuisha endapo mambo mbali mbali yatafanyika.

Unapokuwa na uchovu unahitajika kulala masaa 6-8 pasipo usumbufu wowote ili kuepuka kukatika katika kwa usingizi.

Pumzisha mwili katika maeneo yenye hewa safi ikiwamo ufukweni au maeneo ya wazi kwani mazingira ya hewa chafu yanachangia kuongeza uchovu zaidi.

Kula mlo kamili ikiwamo vyakula vyenye protini, mboga za majani na matunda na vyakula vya wanga.

Lishe hii inasaidia kukurudishia nguvu iliyotumika, kurudishia akiba ya nishati katika misuli na kuwezesha ukarabati na uponaji wa vijeraha vya misuli.

Kunywa lita 1.5-3 kabla ya kufanya mazoezi magumu na fanya mazoezi mepesi kwa dakika 5-10 kabla ya kuanza mazoezi au shughuli za kila siku.

Fanya mazoezi ya viungo ya kunyoosha misuli ya mwili angalau dakika 10-15 huku ukiwa katika mkao sahihi kimwili ili kuondoa uwezekano wa kujijeruhi misuli.

Fanya huduma ya usingaji au utomasaji (massage) kwa mafuta ya kuchua ili kulainisha misuli na kuwezesha damu kutirika kwa wingi katika misuli ili kuzidondoa taka mwili au mabaki kirahisi katika misuli.

Oga kwa maji ya vuguvugu yanayotiririka kwa wingi au oga katika mabafu ya kisasa yenye kutoa mvuke wa joto.

Epuka mambo yatakayokupa shinikizo la akili au kukusababishia hisia hasi kwani yatakuongezea uchovu. Jichanganya katika mazingira ya burudani ili kukupa hisia chanya.

Monday, June 11, 2018

Giroud azimia uwanjani, kocha Ufaransa apata kiwewe

 

Mshambuliaji nguli Olivier Giroud, ameumia vibaya kichwa zikiwa zimebaki siku chache kabla ya kuanza fainali za Kombe la Dunia nchini Russia.

Mshambuliaji huyo aliumia katika mchezo wa kirafiki uliokuwa wa kujiandaa na fainali hizo ambao timu hizo zilitoka sare ya bao 1-1.

Mchezaji huyo wa Chelsea, ameibua hofu kama anaweza kupona kwa wakati kabla ya kuanza michuano hiyo Alhamisi wiki hii.

Giroud alitokwa damu nyingi baada ya kugongana vichwa na mchezaji wa Marekani Matt Miazga katika mchezo wa kirafiki uliopigwa juzi usiku nchini Ufaransa.

Giroud na Miazga walipoteza fahamu na wote walitokwa damu nyingi kabla ya kupata huduma ya kwanza.

Mfaransa huyo alionekana kuzidiwa na maumivu na alilala chini kwa dakika tano akitibiwa jeraha la kichwa.

Kocha Didier Deschamps, alishuhudia mshambuliaji huyo mkongwe, alitolewa kwa msaada akiwa amezungushiwa bandeji kichwani.

Tukio hilo lilitokea kipindi cha pili, lilimtoa Giroud nje ya uwanja na nafasi yake kujazwa na Ousmane Dembele.

Deschamps anasubiri ropoti ya madaktari kuona kama mchezaji huyo wa zamani wa Arsenal kama atapona kwa wakati kabla ya kuanza fainali hizo.

Nahodha wa Marekani Julian Green, alianza kuifungia bao timu hiyo kabla ya mshambuliaji kinda Kylian Mbappe kusawazisha.

Ufaransa itafungua pazia la fainali hizo kwa kuvaana na Australia kabla ya kuzivaa Peru na itamaliza mechi za makundi dhidi ya Denmark.

Mshambuliaji huyo alijiunga na Chelsea, baada ya kukosa namba ya kudumu katika kikosi cha Arsenal kabla ya kutimkia Stamford Bridge katika usajili wa dirisha dogo Januari ili kupata nafasi ya kuitwa timu ya Taifa.

Monday, June 11, 2018

Uso kwa uso na Katibu Mkuu wa Cecafa

 

By Eliya Solomon, Mwananchi

Baada ya miaka miwili bila ya mshindano ya Klabu Bingwa Afrika Mashariki na Kati ‘Kagame Cup’, hatimaye kombe hilo limerejea tena kwa Tanzania kuwa na mwenyeji wa mashindano hayo makubwa kwa ukanda huu.

Mara ya mwisho kwa mshindano hayo kufanyika ilikuwa 2015 nchini hapa ambapo Azam FC, ilitwaa ubingwa huo kwa kuifunga Gor Mahia ya Kenya kwenye fainali kwa mabao 2-0.

Kombe la Kagame lilianzishwa 1974 kwa lengo la kuinua soka la ukanda wa Afrika Mashariki na Kati.

Mara ya kwanza kufanyika mashindano hayo, inatajwa ni 1967 lakini hayakuwa mashindano rasmi.

Wakati yakifanywa kuwa mashindano rasmi, 1974 Simba ambao ni mabingwa wa kihistoria kwenye mashindano hayo kwa kutwaa mara sita ndio iliyokuwa timu ya kwanza kuchukua kombe la Klabu Bingwa za Afrika Mashariki na Kati.

Udhamini wa rais wa Rwanda, Paul Kagame kuanzia mwaka 2002 ulifanya michuano hiyo mikongwe Afrika kupachikwa jina la kiongozi huyo ambaye ameiongoza nchi yake kwa zaidi ya miaka 10.

Hii ni awamu ya 13, Tanzania kupata uwenyeji wa kombe hilo ambao litaanza kutimua vumbi Juni 28 hadi Julai 13 kwenye Uwanja wa Taifa na Azam Complex jijini Dar es Salaam.

Tanzania inawakilishwa na timu tatu, ikiwemo Simba ambayo imepata nafasi ya upendeleo kwa kuwa Tanzania ndiyo mwenyeji.

Rais wa shirikisho la mpira wa miguu Tanzania (TFF,) Wallace Karia: “Tuna nafasi ya timu tatu kushiriki kwenye mashindano hayo, kwanza Azam anashiriki kwa bingwa mtetezi, Yanga ni bingwa wa ligi kwa msimu wa 2016/17”.

“Simba amepata nafasi ya ziada ya tatu kwa sababu tuna uwenyeji wa mashindano hayo.”

Makundi ya Kagame yamepangwa matatu na yatatoa timu mbili zitakazo fanya vizuri kwenye kila kundi huku kukiwa na nafasi kwa timu mbili za upendeleo ‘best loser’ ili kupata timu nane zitazocheza robo fainali.

Kundi A ni JKU (Zanzibar) , UGA (Uganda) , Azam (Tannzania) na Kator FC (Sudan Kusini).

Kundi B ni Rayon (Rwanda), Gor Mahia (Kenya), Lydia Ludic (Burundi) na Port (Djibout).

Kundi C ni St. George (Ethiopia), Dakadaha(Somalia), Yanga na Simba za Tanzania.

Spoti Mikiki ilifanya mahojiano na Katibu Mkuu wa Baraza la Vyama vya Soka Afrika Masharikina Kati (Cecafa), Nicholas Musonye.

Swali: Cecafa mmekuwa kimya kwa kipindi kirefu, nini changamoto mlizokumbana nazo?

Musonye: Kuna watu tuliwabaini walikuwa wanaturudisha nyuma kwa hiyo tumeamua kuachana nao ili tuendelee kupiga hatua, kama inavyofahamika tayari tuna uongozi mpya ni vyema kuupa nafasi ya kuona ni vitu gani vizuri ambavyo vipo mbele.

Swali: Mpango wa Cecafa ni upi hasa kujijenga kiuchumi?

Musonye: Tumepita kwenye kipindi kigumu. Tumekuwa tukipanga mambo mbalimbali lakini tunakwama kiuchumi na zaidi ni kukosa udhamini. Lakini pamoja na hayo, udhamini wa Azam ambao wamepata haki za kurusha matangazo ya moja kwa moja kwa njia ya Television, umesaidia kwa kiasi chake kwenye kuandaa haya mashindano.

Swali: Kwanini wadhamini wamekuwa wa kuvuta kwa kamba?

Musonye: Inawezekana ni hali ya kiuchumi, lakini pia gharama za kufanya mashindano ni kubwa, tukisema tuwaachie hawa wadhamini wawili pekee hatutoweza kufikia malengo.

Swali: Nini mkakati wenu wa kupata wadhamini zaidi?

Musonye: Niseme tu bado milango ipo wazi kwa wadhamini wengine kuja kuongeza nguvu, kwa sababu lengo ni moja kuona Cecafa inapiga hatua.

Swali: Huoni kuna haja ya wewe kuwajibishwa kwa kukosa kufanya mashindano mara kwa mara?

Musonye: Kama nilivyosema, tatizo ni wafadhili, lakini kama zikipatikana, mashindano yatafanyika kama kawaida.

Swali: Vipi kuhusu wahujumu wa baraza hili?

Musonye: Kuna matatizo mengi, lakini tunadhani sasa wakati umefika kwa kila atakayekuwa analihujumu baraza atakuwa akiwajibishwa ili yaliyotokea kwa kipindi cha miaka miwili nyuma bila ya mashindano hayo yasijirudie.

Swali: Kama Cecafa, mna mipango gani endelevu?

Musonye: Kuhusu mipango endelevu, tunajipanga kuona kuwa Cecafa inakuwa na uwezo wa kuandaa mashindano mbalimbali bila ya kutegemea wahisani pamoja na mfumo wa uendeshaji wa mashindano hayo.

Swali: Nini mikakati ya uongozi mpya kwa sasa?

Musonye: Uongozi mpya utatengeneza mikakati ya kuhakikisha wanakuwa na mifumo mizuri pamoja na kuboresha zaidi ligi hiyo lakini hilo pamoja na mengine mengi ni mambo ambayo yapo chini ya uongozi mpya.

Swali: Kuna mipango yoyote ambayo Cecafa inataka kuleta kama mambo mapya ya uongozi mpya?

Musonye: Mabadiliko yanahitaji muda kwa hiyo, kuna kazi mbele ya kufanywa na uongozi mpya na mengi yameanza kujadiliwa kwenye vikao vilivyopita, tutayaweka wazi.

Monday, June 11, 2018

Ali Ali, ana umbo dogo lakini mambo makubwa

 

By Imani Makongoro, Mwananchi

Ukimuuliza John Bocco, Emmanuel Okwi (Simba), Obrey Chirwa na Ibrahim Ajib (Yanga), watakujuza shuguli ya beki wa Stand United ‘Chama la Wana’ Ali Ali ambaye alikuwa anavuruga mipango yao, walipokutana kwenye mechi Uwanja wa Taifa, Dar es Salaam.

Simba ilitoka sare ya mabao 3-3 na Chama la Wana, wakati Yanga iliibuka na ushindi wa mabao 3-1, mechi zote zilichezwa Uwanja wa Taifa, jijini Dar es Salaam, beki huyo alikuwa mwiba kwa mastraika wa timu hizo.

Spoti Mikiki imefanya mahojiano na Ali Ali ambaye amezungumzia safari yake ya soka na ndoto zake za badae katika soka, ilikuwa kama ifuatavyo.

Ali Ali anasema alikuwa anacheza soka kama kujifurahisha na hakujijua kama ana kipaji, mpaka makocha walipomwambia aelekeze nguvu katika kazi hiyo na kwamba atafika mbali.

“Akili ya utoto ilikuwa ya ajabu, nilikuwa si mpenzi sana na shule, wala nilikuwa sitilii manani sana soka, mpaka nilipokuja kuambiwa na meneja wangu anayeitwa Kamali Manji kwamba nina kipaji natakiwa kuzingatia mazoezi, alikuwa makini kuninunulia vifaa vya michezo,”anasema.

Akizungumzia ratiba yake kwa siku anasema anaanza na mazoezi, akimaliza anaoga na kupumzika, ifikapo mchana anapata chakula kidogo kinachokuwa kimepatikana kwa wakati huo, lakini matunda na maji anatumia kwa wingi.

“Sio mpenzi wa kunywa chai asubuhi, mchana nakula kidogo sana ila kwa usiku unakuwa ni mlo wa kutosha na maji mengi kwa wastani namaliza katoni tatu kwa usiku tu,” anasema.

Ali aliyeanzia soka yake Mkunazini ya Zanzibar 2012, pia alichezea Vikokotoni ya Daraja la pili 2014 na kuhamia Gulioni kati ya 2015-16 na Stand United mwaka 2017-18.

Ndoto yake anasema kabla ya kupata nafasi ya kucheza nje, anatamani apitie timu moja wapo kati ya Azam, Simba au Yanga.

Monday, June 11, 2018

Unataka uwe kama Samatta? Pita humu

 

By Eliya Solomon, Mwananchi

Ukweli usiopingika ni kwamba, nahodha wa Taifa Stars, Mbwana Samatta ‘Samagoal’ anayeichezea, KRC Genk ya Ubelgiji amekuwa mfano mzuri wa kuingwa na vijana wengi wanaochipukia kwenye soka la Tanzania.

Asilimia kubwa ya vijana wanaochipukia kwenye soka wanatamani kufikia mafanikio ya mshambuliaji huyo wa zamani wa Simba mwenye tuzo mikononi mwake ya mchezaji bora wa Afrika kwa wachezaji wa ndani ambayo aliitwaa 2015.

Haikuwa lele mama kwa Samatta kutwaa tuzo ya Afrika na mpaka kufikia hatua ya kucheza soka barani Ulaya, wapi alipatia nahodha huyo wa Taifa Stars kwenye uchezaji wake soka?

Spoti Mikiki inakuletea mambo matano yaliyomtengeneza Samagoal na ndiyo maana leo hii amekuwa mfano mzuri kwa wachezaji wengi wa Tanzania na hata Afrika Mashariki na Kati.

Menejimenti

Samatta yupo chini ya Kampuni ya Sportbank ambayo imesambaa kwenye mataifa mbalimbali ndani na nje ya Afrika, kampuni hiyo ambayo pia ofisi zake zipo, Ubelgiji imeweka wazi majukumu yake kuwa ni kusimamia ndoto za wachezaji, makocha na kushauri wazazi kwenye masuala ya soka.Sehemu ya mafanikio ya mchezaji yeyote ni kuwa chini ya watu makini, ukiachilia mbali Samatta kuwa chini ya Kampuni hiyo pia baba yake mzazi, Mzee Ally pamoja na washauri wake wa karibu wamekuwa msaada mkubwa kwa nyota huyo na zaidi ni usikivu.Hilo ni eneo kubwa ambalo Samatta amefanikiwa tofauti na wachezaji wengi wa ndani ambao wamekuwa kwenye mikono ya wapigaji ambao hawatazami malengo ya mchezaji na hupenda kujitizama wao wenyewe ili kujinufaisha kwa kupata cha juu.

Hakuchezea nafasi

Wakati wawakilishi wa TP Mazembe wanatua nchini kwa ajili ya kumnasa Samatta mwaka 2011, mshambuliaji huyo hakuingia mitini kwenye dili hilo kama ilivyokuwa kipindi cha nyuma ambacho ilitajwa Mrisho Ngassa aliingia mitini pindi ambapo vigogo wa Al-Merrikh SC walipotua.

Uamuzi sahihi

Kutochezea kwake nafasi kulimfanya kuwa sahihi kwenye uamuzi wa kujiunga na TP Mazembe, usahihi wake ni kwenye umri ambao alikuwa nao kwa kipindi hicho.

Samatta ambaye kwa sasa ana miaka 25 aliondoka Simba akiwa na miaka 18, hicho kilikuwa kipindi sahihi kwake kuanza kukabiliana na changamoto mpya za soka sehemu nyingine kabla ya kutua Ulaya.

Kujitambua

Samatta ni miongoni mwa wachezaji wachache wa Kitanzania ambao wanajitambua kwenye hilo, mshambuliaji huyo wa zamani wa African Lyon kabla ya kujiunga na Simba amekuwa na mlolongo mzuri wa historia yake ya soka, inayomfanya kuwa na mafanikio ya hali ya juu.

Kujituma

Juhudi zake zilimfanya kuwa bora na kujiwekea ufalme wake nchini DR Congo , Samatta aliiongoza TP Mazembe kutwaa mataji saba kwa kipindi cha miaka mitano aliyoitumikia klabu hiyo.

Mataji hayo ni kombe la Ligi Kuu ‘Linafoot’ nchini humo mara nne kwenye miaka ya 2011, 2012, 2013, 2014, Super Coupe du Congo mara mbili katika miaka ya 2013, 2014 na Ligi ya

Mabingwa Afrika mara moja.

Samatta alijituma na ndio maana alifanikiwa kuwa mchezaji bora wa Afrika kwa wachezaji wa ndani mara baada ya kuiwezesha Mazembe kutwaa ubingwa wa Ligi ya Mabingwa Afrika mwaka 2015. Alisajiliwa na KRC Genk kwa dau la Dola800,000 ikiwa ni msimu wake wa tatu klabuni hapo.

Monday, June 11, 2018

Tuliwapa Hasheem Thabeet, wanatupatia Nba Africa Game

 

Jioni moja tulivu ya Alhamisi ya Juni 25, 2009 Watanzania tuliungana kwa lugha moja kusimama na kuishi kwenye nchi ya Marekani hata kama wengi wetu hatujawahi kuigusa kwa maana ya kusafiri safari ya masaa ishirini na kutua.

Tulikuwa tumetulia tukisuri kusikia namna gani ligi kuu ya mpira wa kikapu nchini Marekani, NBA ilikuwa inampokea Mtanzania wa kwanza kucheza kwenye ligi hiyo na ambaye alikuwa anakuwa balozi wa kwanza ambaye angetambulika kimataifa katika kizazi hiki cha teknolojia na mitandao ya kijamii.

Naam akiwa amevaa suti nadhifu, kwenye eneo la kuita wachezaji wakati wa uchaguzi wa wachezaji wanaotoka vyuoni na kwenye ligi mablimbali kuingia NBA, kamishna wa NBA kwa wakati huo, David Stern alisoma jina la Hasheem Thabeet katika chaguo la pili na kwenda kwenye klabu ya Memphis Grizzlies.

Kwa Watanzania huu ulikuwa ushindi. Huu ulikuwa wakati wa furaha na huu ulikuwa wakati tulioamini kuwa tunaweza kutumia michezo mingine zaidi ya soka peke yake. Ulikuwa wakati ambao ulituma ujumbe kwa vijana wadogo kuwa tunaweza kufanya mengine nje ya soka kama ambavyo kipindi cha akina Filbert Bayi kilivyopata watu wnegi zaidi wanaopenda mchezo wa riadha.

Kuna tatizo moja pekee nyuma ya ligi hii ya NBA nalo ni muda wa michezo yake dhidi ya muda wetu huku Tanzania na Afrika kwa ujumla.

Michezo mingi inachezwa usiku wa manane au alfajiri kwa masaa yetu lakini uwepo wa Hasheem ulifanya kila mtu ajaribu kufahamu ni kitu gani kilikuwa kinatokea.

Sio kila mchezaji anayekuja na “potential” kubwa kwenye NBA basi hutokea kuwa mchezaji bora, na hili lilikuwa suala kwa Hasheem Thabeet ambaye bahati mbaya hakufanya vyema ikilinganishwa na wachezaji alioingia nao kwenye NBA kwa mwaka 2009.

Swali pekee lililobaki kwa Watanzania ni tulitumiaje nafasi hii kuweza kuwafanya watoto wafahamu umuhimu wa elimu ukihusishwa na mchezo wa mpira wa kikapu.

Katika kipindi kirefu ambacho Hasheem hakuwa gumzo NBA ni kama hata vyombo vya habari Tanzania vilimsusa, hakuna aliyetaka kumfanya balozi wa Taifa tena na tulikosa mafiga ya kuinjika chungu ambacho ni vipaji vya mpira wa kikapu Tanzania.

Miaka saba baadae yaani 2015 tangu Hasheem aanzishe safari ya Watanzania kwenda Marekani kimasomo kwa ndoto tuliyoanza kuamini kuwa inawezekana ya kuingia NBA tayari kuna jambo jema lilikuja Afrika nalo ni NBA AFRICA GAME.

Ikiwa ni sehemu ya kujitangaza na kutafuta soko la Afrika, NBA waliona kuna haja ya kutupatia fursa ambayo tumekuwa tukiikosa muda mrefu. Tayari wlaikuwa wameanzisha nyenzo za kusaka vipaji kama Basketball without boarders (mpira wa kikapu bila mipaka) program iliyozalisha wachezaji wengi wa NBA kama Joel Embiid, lakini pia Junior NBA ambayo imelenga kusimamia vijana wa miaka 14 kushuka chini na pia NBA Academy ambayo inasimamia wachezaji wenye vipaji waliokusanywa maeneo mbalimbali na kuwekwa pamoja.

Kuwa na vitu hivi peke yake haikuwa inatosha kwa sababu bado wahenga walisema kuona ni kuamini.

Badala ya kusafirisha hawa vijana wote kuwapeleka Marekani kushuhudia michezo ya NBA, ilitakiwa ifanywe kuwa rahisi zaidi na ndipo wazo la NBA AFRICA GAME lilipozaliwa.

Huu ni mchezo unaohusisha wachezaji wenye asili ya Afrika waliopo kwenye NBA dhidi ya wachezaji wa mataifa mengine. Kuanzia mwaka 2015 ulianza kufanyika pale Afrika Kusini na vijana kutoka kwenye Basketball without Boarders, JR NBA na NBA Academy hupata nafasi ya kufundishwa na makocha na wachezaji wa NBA kwa muda wa wiki moja.

Hii huwajenga vijana na kuwapa ndoto kubwa zaidi. Baada ya Hasheem Thabeet hatuna kisingizio kuwa hatuwezi kupata balozi wa kuliongoza taifa na kulifikisha mbali. Kwenye uwanja wa Jakaya Kikwete Youth Park kuna kituo mahususi ambapo vijana wa mashuleni wana nafasi ya kushiriki mashindano ya JR NBA.

Binti wa Kitanzania, Jessica Ngisayise naye alipata kuwepo kwenye Basketball Without Boarders na kushuhudia mchezo wa NBA AFRICA 2017, kitu ambacho naamini kilibadilisha fikra zake na hata wenzie waliamini kila jambo linawezekana.

Kwenye mboni zangu nilimwona Jessica akipata mafunzo kutoka kwa wachezaji kama CJ McCollum, Joel Embiid, Kristaps Porzingis na makocha Eric Spoelstra ambaye ni bingwa wa NBA mara mbili. Sio jambo dogo hata kidogo.

Bahati mbaya nyingine ni kuwa, hata vyombo vya habari navyo havijapata nguvu ya kusukuma matukio makubwa kama haya na kuna fursa nyingi wanazoweza kupata kuhakikisha kuwa wanaweza kuwa sehemu ya matuko kama haya.

Wizara zinaweza kushirikiana nasi na kuwapa nafasi ya kuwatumia hawa nasi pia tunatakiwa kuwa jirani kusaidia serikali.

Wakati tukiwa tumeanza kusahau umuhimu wa Hasheem Thabeet katika kuhamaisha vijana wetu, wao NBA wala hawajivungi naye, na wanamtumia kweli. Mapema mwezi huu Juni wamemtumia kutangaza kurejea kwa mchezo wa NBA AFRICA tena. Akiwa na Didier Mbenga, Mkongo aliyewahi kuchezea Los Angeles Lakers walitangaza kila ambacho NBA watafanya wakati huo.

NBA wala hawajajisahaulisha, wametangaza tayari kuwa NBA AFRICA GAME 2018 inarejea tena Afrika katika jiji la Pretoria nchini Afrika Kusini Agosti 4, 2018, wachezaji kama Joel Embiid na DeMar Derozan wakiwa manahodha. Hata mheshimiwa Kigwangala anaweza kutumia nafasi hii kuwafikia pasipo kwenda Marekani.

Ni wakati wa kufikiria namna ya kutumia hizi fursa bila kutupa lawama sehemu moja. Hata Hasheem ni rafiki wa moja kwa moja wa nyota kama Russell Westbrook, Kevin Durant na Stephen Curry, kwa bajeti nzuri anaweza kuwaleta.

Sio lazima tufanye ya VISIT RWANDA kwenye jezi za Arsenal. Tuitumie Agosti 4, 2018 vyema kwani wachezaji wa NBA watakuwa hapo Afrika Kusini tu. Hasheem Thabeet atakuwa balozi wao, tumtumie pia.

Monday, June 11, 2018

Kazi yetu ni moja tu, kugawana timu za kushangilia



Allan Goshashi

Allan Goshashi 

Kila mara zinapofanyika Fainali za Kombe la Dunia ni kawaida yetu Watanzania kuchagua timu za kushangilia kwani timu yetu ya Taifa haijawahi kufuzu kushiriki fainali hizo tangu zilipoanza 1930.

Alhamisi ya wiki hii (Juni 14), Fainali za Kombe la Dunia 2018 zitaanza rasmi na kumalizika Julai 13 mwaka huu huku timu 32 zikiwania kutwaa ubingwa wa dunia.

Mechi zitaanza siku hiyo pambano la wenyeji Russia kukwaana na Saudi Arabia lakini timu za Afrika, Misri na Tunisia ni siku ya pili yake.

Fainali hizo kubwa, za pekee na za aina yake kwa timu za taifa, hufanyika mara moja kila baada ya miaka minne, mara ya mwisho zilifanyika Brazil mwaka 2014, na Ujerumani ilitwaa taji baada ya kuichapa Argentina bao 1-0 katika mechi ya fainali kwenye Uwanja wa Maracana.

Baada ya kumalizika kwa fainali hizo za dunia huko Brazil, watu wengi tulitarajia Tanzania, pia itaanza mikakati ya muda mfupi na mrefu kuhakikisha tunafuzu kushiriki fainali za 2018 na 2022.

Hata hivyo, hilo halikufanyika na tukajikuta tunatolewa mapema katika hatua ya kufuzu kushiriki fainali za 2018, na wala hatuna programu za kuhakikisha tunafuzu Fainali za Dunia 2022!.

Siku zote hakuna kinachoshindikana wala njia ya mkato, kinachotakiwa ni kuanza programu za muda mrefu sasa, kwani programu ya miaka minne ingawa ni kipindi kifupi, walau inaweza ikatusaidia kufikia malengo yetu ya kufuzu 2022.

Kucheza Kombe la Dunia kunahitaji mipango, malengo na maandalizi ya wachezaji kwa muda mfupi na muda mrefu, lakini siyo kufanya maandalizi kwa hisia au maandalizi ya zimamoto.

Hatuwezi kufuzu kama hatuna dhamira ya dhati kufikia malengo hayo. Tunatakiwa tuandae wachezaji vijana wa umri tofauti wenye vipaji wanaoweza kushindana katika kiwango cha juu.

Kama ni mtu unayefuatilia wachezaji wetu wa Tanzania wanapocheza mechi mbalimbali za kimataifa, lazima utabaini wachezaji wetu wa kizazi hiki wanakosa mambo matatu.

Mambo hayo ni akili ya mchezo, mwili sahihi na stamina. Wachezaji wanatakiwa kutumia akili nyingi kutoa pasi na kupokea mpira, kufunga mabao, kuzuia, kushirikiana, kukokota mpira, kupiga mashuti, kuusoma mchezo kwa haraka, kutumia mipira iliyokufa, kujiamini na kufanya uamuzi wa haraka.

Wachezaji wetu wanatakiwa pia kuwa na stamina itakayowawezesha kuwa na nguvu na kasi hali itakayowawezesha kucheza soka la kuvutia na kuuzungusha mpira kwa haraka uwanjani katika mpangilio wa hali ya juu.

Vilevile wachezaji wetu wanatakiwa kuwa na miili ambayo imefanyishwa mazoezi kwa ajili ya kupambana ili kupata ushindi.

Hali hiyo itaonyesha wachezaji wanaotambua umuhimu wa vipaji vyao na kutunza miili yao.

Ukiacha hayo mambo matatu, pia wachezaji wetu wanatakiwa kujua umuhimu wa kujituma, uzalendo na kulipigania taifa, kuacha ubinafsi na kushirikiana kutafuta ushindi kwa lengo moja.

Mimi huwa naamini hakuna kinachoshindikana chini ya jua, kwa hiyo bado naamini ipo siku Tanzania itafuzu kucheza Kombe la Dunia, lakini siyo kwa mipango hii tuliyonayo hivi sasa!.

Ni lazima kujifunza kutokana na makosa tunayofanya mara kwa mara, kwani bila kufanya hivyo hakuna linaloweza kufanikiwa na fainali hizo za Kombe la Dunia zitaendelea kuwa ndoto kwetu.

Dah, nitafanyaje sasa, Tanzania haipo, kwa hiyo kama ilivyo kawaida yetu, kuanzia wiki hii tutaanza kugawana timu za kushangilia katika Fainali za Kombe la Dunia 2018 zinazofanyika Russia.

Mimi nitazishangilia Morocco, Brazil na Ufaransa..., wewe utashangilia timu zipi?.

Monday, June 11, 2018

Kutilia mkazo maumivu mbele ya goti kwa mwanamichezo



Dk Shita Samwel

Dk Shita Samwel 

Patellofemoral Pain Syndrome kifupi PPS ni neno lakitabibu linalomaanisha maumivu katika eneo la mbele ya goti kuzunguka kifupa kidogo cha duara kijulikanacho kama Patela au Kneecap.

Tatizo hili linawakuta mara kwa mara wanamichezo wakimbiaji, waruka vihunzi, wapanda milima pamoja na washiriki wa michezo wa kila siku hasa wanawake na vijana wadogo.

Tatizo hili huambatana na mkazo na maumivu mbele ya goti hivyo kusababisha ugumu kupanda ngazi, kupiga magoti na kufanya kazi za kila siku.

Goti ndiyo ungio kubwa kuliko yote mwilini na limeumbwa kwa ufanisi wa hali ya juu.

Ungio hili lina mfupa wa paja, wa ugoko na wa nyuma ya ugoko na kifupa duara cha goti inayounganishwa na nyuzi za ligamenti na tendoni.

Tendoni huunganisha misuli kwenye mifupa, tendoni ya misuli minne ya mbele ya paja huunganisha sehemu ya mbele ya paja na kifupa duara cha goti (Patella)

Unapoonyoosha goti lako chini ya kifupa duara cha goti unaweza kugusa tendoni yake ambayo imeunganishwa na mfupa mkubwa wa ugoko.

Maumivu haya mbele ya goti yanatokea baada ya mishipa ya fahamu kupata msisimko wa hisia za maumivu katika tishu laini na mifupa inayoizunguka kifupa cha goti.

Chanzo cha tatizo hili ni kutumika kulikopitiliza kunakosababishwa na mazoezi magumu kama vile kukimbia sana, kuchuchuma na kupanda vilima au ngazi mara kwa mara. Vile vile mabadiliko na kuongezeka kwa ghafla kwa mazoezi au mafunzo ya mchezo.

Mambo mengine ni pamoja na kufanya mbinu mbaya za mafunzo ya michezo, kutumia vifaa visivyosahihi na kubadili viatu au eneo la kuchezea.

Udhaifu wa misuli ya mbele ya paja , wakati wa kupinda na kunyoosha goti tendoni ya misuli hiyo hushindwa kudhibiti kifupa cha goti katika pango lake hivyo kukaa vibaya.

Hitilafu ya mguu kutojipanga sawa sawa kati ya hipsi na kifundo cha mguu husababisha kifupa cha mguu kwenda uelekeo hasi.

Dalili ni pamoja na mkazo na maumivu mbele ya goti yanayoanza taratibu na kuongezeka unapofanya kazi, huweza kutokea kwa goti moja au yote mawili.

Kupata maumivu wakati wa mazoezi au shughuli za kila siku zinazokufanya kupinda goti kama kupanda ngazi na kukimbia.

Maumivu baada ya kukaa muda mrefu na kupinda goti ikiwamo kukaa ofisini au kusafiri katika magari, treni au ndege.

Maumivu yanayojitokeza pale unapobadili kasi na kiwango cha mazoezi, eneo la kuchezea au vifaa vya mazoezi.

Kusikia mlio wa mgongano katika goti unapopandisha ngazi au vilima.

Tatizo hilo linaweza kupona bila dawa kwa kufanya mabadiliko ya mazoezi yanayosababisha maumivu gotini, kutumia matibabu salama ya nyumbani au mazoezi tiba ya viungo.

Monday, June 11, 2018

Wachezaji, makocha Kombe la Dunia ni darasa tosha



Ibrahim Bakari

Ibrahim Bakari 

Fainali za Kombe la Dunia zinaanza Alhamisi wiki hii kwa timu mbili kukata utepe.

Mpambano wa kwanza, wenyeji Russia watacheza na Saudi Arabia.

Inasemwa kuwa ni timu dhaifu kwa kuwa imepoteza mechi zake nyingi za majaribio, ikiwemo waliyofungwa mabao 2-1 na Ujerumani.

Hata kocha wa Ujerumani, ametilia wasiwasi timu yake, wakati Saudi Arabia inaonekana kuwa timu dhaifu, Joachim Low anasema wasiwasi wake ni kama timu yake itatetea ubingwa.

Iliifunga kwa mbinde Saudi Arabia mechi za kupasha kabla ya kuanza kwa michakato ya Kombe la Dunia.

Zipo timu nyingi ambazo zitaaga mapema, zipo ambazo zitaishia katikati na zile zitakazoingia fainali.

Kuna zitakazofanya maajabu, timu haikupewa nafasi lakini ikapenya na kufika mbali.

Si ajabu fainali za mwaka huu zikashuhudia timu vipenzi zikiaga mapema kabisa na hata kuondosha ladha ya mashindano, lakini soka ndivyo ilivyo. Lazima baadhi ya timu zitoke ili wengine wasonge mbele.

Mpira una hali tatu, kufungwa, kushinda na kutoka sare.

Kuanza kwa fainali hizo kuna mengi, wapo watakaokuwa wakivuna pesa kwa kuonyesha mpira na mengine mengi.

Lakini mimi ninadhani ni wakati wa makocha na wachezaji makini kutuliza akili na kuchukua mechi za Kombe la Dunia kama darasa.

Mwezi mmoja wa kushuhudia fainali hizo ni wa kutosha kwani kuna mechi zaidi ya 60 za kujifunza.

Kwa makocha kuna kujifunzo mifumo mbalimbali ya timu, kuona upi una faida na upi ambao kama ukitumika pia unaweza kuleta faida.

Makocha si kwenda au si kukaa na kushabikia timu. Hapa ni kuchukua mbinu na kuona aina ya soka linalopigwa na timu moja na nyingine katika fainali hizo.

Kwa mbinu, njia zote hizo zinatengeneza mfumo ambao kama wakitumia kwa wachezaji wao, iwe kwa timu kubwa ama ndogo, italeta mafanikio, labda kocha asijue jinsi ya kuusoma mchezo.

Kingine ninachokiona ni kwa wachezaji wenyewe.

Bila kuweka ushabiki, kuanzia makipa, mabeki, viungo na washambuliaji, kuna mengi ya kujifunza.

Wakati gani sahihi wa kufanya uamuzi, wakati gani sahihi wa kuacha kufanya uamuzi, nini kifanyike kwa wakati gani.

Makipa wasome mbinu na jinsi ya kulinda milango, wakidaka wanafanya nini baada ya hapo.

Kwa mabeki, ni wakati gani kuna presha na wakati gani hakuna na nini cha kufanya kwa wakati gani.

Kwenye viungo. Kuna mengi ambayo ni ya darasa kwa jumla.

Kwa mifumo mbalimbali ya soka, siku hizi viungo wanafanya kazi gani, wanakwendaje, vyote hivyo ni wachezaji wenyewe kujifunza kutokana na wachezaji wa timu mbalimbali.

Inapendeza kusoma kwa kuwa michezo inafuatana tofauti na zile mechi za kila baada ya muda.

Kwa washambuliaji. Tatizo la kufunga, linamalizwa vipi, wakati gani mchezaji anapiga golini, wakati gani wa kuua offside.

Je, mipira iliyokufa karibu na goli inapigwaje hadi kufunga, penalti zinatengenezwaje bila kujitupa na kupata kadi.

Vyote hivyo tunavitaraji kubadilisha wachezaji, lakini kwa wenye dhamira ya dhati kutaka kujifunza. Kombe la Dunia litumike kama darasa na matokeo tuyaone.

Monday, June 4, 2018

MABAO YA KIZEMBE: Kwanini Youthe Rostand anafungwa mipira mepesi?

 

By Mwandishi Wetu, Mwananchi

Siku chache alizokaa na klabu ya Yanga, Kocha wa Yanga, Mwinyi Zahera, raia wa DR Congo amemwangalia kipa wa timu hiyo, Youthe Rostand, akamwangalia kwenye ‘clip’ akatingisha kichwa, akasema hajamwelewa kabisa.

Akamwangalia kwenye mechi na USM Alger, akasema haya mabao anayofungwa kuna mawili; ama abadilike haraka au apotee kikosini.

Zahera aliangalia mechi tatu katika mikanda ya video ya mechi za timu hiyo kisha akasema Rostand ni tatizo kubwa na hakubaliani na mabao anayofungwa ukilinganisha na umbile na urefu alionao Rostand.

“Kwa sasa ninataka kukutana na uongozi wa klabu tujadili hilo kwa kina ambao wamemwambia kuna dawa ya kipa huyo wanaifanyia kazi.

“Kwa umbile lake, Rostand alipaswa kuwa tishio kwa washambuliaji anaokutana nao kwa urefu mzuri aliokuwa nao, lakini pia alitakiwa kuwa bora kukabiliana na mipira ya krosi zote zinazopigwa ndani ya eneo la sita kitu ambacho hakifanyi.

Kocha huyo anasema tayari ameshaanza kazi na upungufu huo kwa kuzungumza na kocha wa Rostand, yaani Juma Pondamali. Hata hivyo, kocha huyo anasema Pondamali, kipa wa zamani wa Taifa Stars, alimwambia, tatizo la Rostand ni kutobadilika. Anamfundisha, anampa maelekezo kwa makosa anayofanya, aina ya magoli, lakini habadiliki.”

Mkongo huyo anasema anataka kufuatilia aina ya mazoezi anayopewa kumbadilisha na kama hatabadilika nafasi yake Yanga itayeyuka.

Alipotafutwa Pondamali moja kwa moja kumzungumzia ishu ya kipa wake kufungwa magoli mepesi, anasema: “Siwezi kuzungumza kwa sasa labda kama yeye azungumze, kukosa ubingwa kwa sasa ndani ya klabu hakujatulia hivyo tunageuzia akili zetu mechi za kimataifa,” anasema.

Hata hivyo, Pondamali aliwahi kuhojiwa na jarida hili na kusema kwa ujumla, “Matatizo makubwa ya makipa ni ‘diving na timing’, kwamba kipa arukeje ni tatizo.

KUBWA ni ‘timing’ kwamba hapa sasa kipa katoka langoni kuucheza mpira, lakini amejiweka sawa, amejipimia muda wa kutoka golini kuufuata mpira?”

Rostand afunguka

Awali Rostand aliwahi kuzungumza na gazeti dada na hili (Mwanaspoti), alikaririwa akisema kwamba huo ni wakati wa mpito tu.

“Kuna muda matokeo yanakuwa mabaya lakini wanashindwa kuelewa pia kuna mambo gani yanaendelea, kikubwa namuomba Mungu aendelee kunipigania tu,” anasema.

Hali ilivyo

Lakini ukitaka kupishana na mashabiki wa Yanga, basi wewe zungumzia kuhusu kipa wao, Youteh Rostand, ambaye amekuwa akitajwa sana midomoni mwa mashabiki wa soka nchini wakati Ligi Kuu ikiendelea.

Rostand msimu uliopita akiwa na kikosi cha African Lyon, alikuwa katika kiwango bora katika uchezaji wake, hali ambayo uongozi wa Yanga haukusita kumsajili katika kikosi chao.

Lakini tangu ajiunge na kikosi hicho, amejikuta akifungwa magoli ya kawaida sana kiasi cha kuwafanya mashabiki waanze kumchukia na hasa anapofungwa magoli ya aina moja mara kwa mara na zaidi ni ya krosi.

Spoti Mikiki liliwatafuta baadhi ya makipa wa zamani waliocheza soka nchini pamoja na nyota wa zamani, kuzungumzia juu ya mwenendo wa kipa huyo na matatizo ya makipa kwa ujumla.

Idd Pazi ‘Father’

Kipa na kocha wa zamani wa Simba, anasema tofauti kati ya Rostand na Manula, Rostand ni kipa wa mazoezi na Manula ni kipa kipaji, hivyo anapokuwa anakosa mazoezi sahihi lazima asumbuke.

“Rostand inabidi apate mazoezi ya kutosha kupitiliza, tena pale ambapo anafanya kosa ndio kosa hilo hilo asimamiwe nalo, tofauti na Manula,” anasema.

Aliongeza kwamba, wanaweza kumwacha na kuwabakiza vijana Ramadhan Kabwili na Beno Kakolanya, kisha wakawatafutia kipa mwenye kipaji na mwalimu wa kuwafundisha.

Peter Manyika

Manyika aliwahi kuwa kipa wa zamani wa Yanga, alikuwa akifundisha makipa wa timu za taifa hapa nchini kuanzia ile ya Wanawake ‘Twiga Stars’ pamoja na ya wanaume ‘Taifa Stars’.

Nyakati fulani aliiinoa pia Yanga na pia ana kituo chake cha kuibua na kuendeleza vipaji vya makipa (Tanzania Goalkeeping Center).

Anataja matatizo makuu ya kiufundi ambayo makipa wengi wanayo ni kucheza mipira ya krosi, kuokoa mipira ya kurudishiwa na wachezaji wenzake pamoja na kujipanga langoni.

“Ninaweza kusema hayo ndio matatizo ambayo makipa wengi niliowanoa na hata ninaowafundisha hivi sasa wanayo.

“Hata hivyo, hakuna tatizo moja kati ya hayo ambalo makipa wote wanalo. Kila kipa ana udhaifu wake na ubora wake. Unaweza kukuta mwingine hawezi kuokoa krosi na mwingine akawa na uwezo wa kukoa lakini ana tatizo la kuokoa mpira wa kurudishiwa hivyo wanatofautiana,” anasema Manyika

Ben Kalama.

Kipa wa zamani wa kimataifa wa Uganda anataja tatizo la kuokoa mipira ya krosi kuwa sugu kwa makipa wengi wale wanaochezea timu kubwa.

“Makipa wengi wana vipaji lakini suala la kucheza krosi na kona ni tatizo kubwa kwao na hili nimeliona hata kwa wale waliopo timu za taifa kushindwa kujipanga…ndio maana mimi kwa upande wangu, kitu cha kwanza ambacho huwa ninaanza nacho kwenye kuwanoa makipa ni kuwaelekeza jinsi ya kuokoa aina hiyo ya mipira,” alisema Kalama.

Mfaume Athuman

Aliyewahi kuwa kocha wa makipa wa Yanga na Coastal Union, Mfaume Athuman naye anataja tatizo la kuokoa krosi kuwa sugu miongoni mwa makipa wengi hapa nchini.

“Ni kweli mipira ya krosi ni tatizo kubwa kwa makipa wetu na hii inatokana na wengi wao kutopenda kufanya mazoezi binafsi na magumu ambayo yanaweza kuwabadilisha mpaka wakaweza kumudu kuokoa aina hiyo ya mipira,” anasema Mfaume.

Mussa Mbaya ‘Moloto’

Aliwahi kuwa kocha wa makipa wa Ndanda FC, katika mahojiano aliwahi kusema: “Wapo wenye tatizo la jinsi ya kujipanga langoni na kuwapanga walinzi wake, kufanya makadirio ya mpira (ball timing) na pia kulipunguza lango pale unapokuwa ana kwa ana na mshambuliaji.

Haya ni matatizo ambayo kwa kiasi kikubwa yamechangiwa na kutokuwepo kwa makocha ambao walisomea taaluma ya kuwanoa makipa,” anasema Moloto

Choki Abeid

Kocha wa zamani wa makipa wa timu ya Toto Africans, Choki Abeid anataja matatizo makuu matatu ambayo amekutana nayo kwa makipa wengi wa Kitanzania ambao wamepitia mikononi mwake kuwa ni kutokuwa wanyumbulifu, kuokoa mipira ya krosi pamoja na kutokuwa na uwezo wa kupiga hesabu ya kuuwahi mpira.

“Makipa wengi hawawezi kucheza krosi lakini pia hawana ule unyumbulifu wa kurukia mipira (diving) ambalo nadhani linachangiwa na uzito wa miili yao. Wengi wanashindwa kupiga hesabu nzuri pale wanapotaka kuuwahi mpira ambao mshambuliaji anauwania ile wanaita 50-50. Haya ni matatizo ambayo hayarekebishiki kwa siku moja bali yanahitaji muda kidogo,” anasema Abeid.

Razack Siwa

Kocha wa zamani wa makipa wa Yanga, Razack Siwa. Yanga inafikiria kumleta kikosini kwa sasa kwa ajili ya kuchukua nafasi ya Pondamali.\

Siwa anataja tatizo la kuokoa krosi kuwa ni sugu kwa makipa wengi nchini.

“Wengi wana matatizo ya kucheza krosi, imekuwa ni shida kwa makipa wengi hapa Tanzania. Hili nadhani linachangiwa na kutopata mafunzo ya hii fani tangu walipokuwa na umri mdogo,” anasema Siwa.

Monday, June 4, 2018

Issa Juma, straika kiraka wa Mtibwa Sugar

 

By Eliya Solomon, Mwananchi

Mtibwa Sugar inajivunia kiungo wake, Issa Juma ambaye licha ya kucheza eneo la kiungo wa kati pia ana uwezo wa kucheza kwenye maeneo yote ya ushambuliaji.

Kiungo huyo aliitwa kwa mara ya kwanza na Salum Mayanga kwenye kikosi cha Taifa Stars kwenye mchezo wa kirafiki dhidi ya Malawi, Oktoba 7 ili kuziba nafasi ya Orgeness Mollel wa FC Famalicao ya Ureno ambaye alishindwa kuwasili.

Issa mwenye asili ya Zanzibar amezungumza na Spoti Mikiki na kuelezea mambo kadhaa ambayo wadau wengi wa soka hawafahamu kuhusu yeye hasa alipoanzia kucheza soka na tabia yake kwa ujumla. “Kuna timu moja ya mtaani inaitwa Jamaica ya Zanzibar hiyo ndiyo nilianza kuichezea wakati nikiwa mdogo, 2010 hadi 2013 ambapo nilianza sasa kuangaikia kwa kutafuta timu kubwa ya kuichezea,” anasema Issa.

Changamoto

“Nimepitia mengi sana lakini kikubwa ni changamoto ya kutokuwa na jina kubwa, ilinifanya kuwa na wakati mgumu sana, hakuna aliyekuwa anajali kuhusu mimi mpaka pale atakaponiona nacheza.

“Mtibwa nilifanya majaribio na kufuzu ila ilibidi kuanza kuonyesha kwa nguvu zote ili nianze kujijengea jina, kwa kiasi chake nimefanikiwa, ukiwa haufahamiki ningumu sana kwenda sehemu na kupata nafasi moja kwa moja,” anasema.

Mavazi

“Sio mtu wa mambo mengi kwenye mawazi, mara kwa mara navaa tisheti na jinzi ila sio kwamba ndiyo nguo ninazo zipenda, huwa napenda sana kuvaa suti ila tatizo lile ni vazi ambalo huwezi kulivaa kila wakati,” anasema Issa.

Msosi

“Mmmmh!! Huniambii kitu kwenye wali na samaki, hakuna chakula ninachokipenda zaidi ya hicho,” anasema kiungo huyo aliyezaliwa Desemba 17, 1995.

Malengo

“Wachezaji wengi wa hapa nyumbani maisha yao ya mpira huishia Yanga na Simba, sipendi na kwangu iwe hivyo natamani sana kama nitashindwa kufika Ulaya basi nicheze hata Ligi ya Afrika Kusini,” anasema Issa.

Monday, June 4, 2018

Simba, Yanga zina umasikini wa kutengeneza

 

By Ibrahim Bakari, Mwananchi

Nigeria haipewi nafasi kubwa ya kufanya vyema Fainali za Kombe la Dunia zinazoanza Juni 14 huko Russia, lakini wamezindua jezi za fainali hizo kwa mbwembwe.

Unaambiwa watu milioni tatu wameagiza jezi hizo tena kabla ya hata hazijatoka. Kila mmoja amepatwa na kimuhemuhe cha jezi.

Shirikisho la Soka Nigeria (NFF) lilitangaza kuwepo kwa misururu mirefu ya mashabiki wakitaka kununua jezi hiyo tena hiyo ni London katika maduka ya wadhamini wao, Nike.

Kila mtu mweuzi alikuwa akiziwania.

Uliza bei sasa. Kila jezi ilikuwa ikiuzwa kwa Pauni64.95. Fanya Tsh3,200x64.95= 204,800 kwa pesa ya Tanzania. Jezi moja inauzwa Sh204,800.

Jezi zimetengezwa kwa mbwembwe. Kuna picha ya bawa la ndege tai, (eagle) ambalo limekuwa kivutio kwa kila mtu. Jezi inapendeza kwani hata wazungu wamepanga foleni kutaka kuinunua.

Hilo ni eneo moja. Mwaka 2010 fulana ya mshambuliuaji wa Real Madrid, Cristiano Ronaldo ilivunja rekodi ya mauzo. Iliingizia klabu zaidi ya Euro 100 milioni na hizo ziliuzwa kwenye mji wa Madrid pekee.

Wakati anasajiliwa, unaambiwa duka la Real Madrid lililoko Bernabeu na maduka mengine maduka yaliyoko Plaza del Sol yalifurika mashabiki wakitaka kununua.

Madrid wana rekodi nzuri ya kuuza jezi zenye majina ya Luis Figo, Zinedine Zidane, Ronaldo na David Beckham lakiniu jezi ya Cristiano Ronaldo ilikuwa maneno mengine.

Iliuza hadi wauzaji wanashangaa hayo mahela yanavyomiminika klabuni.

Hili ni eneo la jezi pekee ambalo klabu za Simba na Yanga zinashindwa kujitajirisha na kuachia watu wengine kufaidika badala ya klabu.

Kabla ya Simba kucheza na Al Masry, Kombe la Shirikisho Afrika, nilikutana na Kaimu Rais wa Simba, Salim Abdallah ‘Try Again’, nikamuuliza maswali mengi tu maendeleo ya klabu, lakini moja lilikuwa la jezi za klabu kuuzwa kiholela na wajanja.

Alichonijibu ni kwamba hilo we acha tu. Simba imezidiwa ujanja na watu wengi, na wanajinufaisha kwa nembo za klabu. Hata hivyo, akasema kuwa kama klabu, wanajaribu kuliweka sawa katika mabadiliko ya uendeshaiu wa klabu kwa sasa.

Anasema kuwa suala la jezi ni tatizo kwamba wapo watu wanachukua jezi ya Simba, wanakwenda China wanazalisha za kutosha na kuingiza nchini kinyemela na kuanza kuzipiga. Hii inaikosesha Simba mamilioni.

Lakini hapo kabla, niliwahi kumuuliza Charles Boniface Mkwasa, Yanga lini wataanza kunasa wauza jezi, akaniambia kuwa bado hadi hapo mambo ya Kampuni ya Macron watakapoanza kufanya kazi yao klabuni.

Kitu cha kwanza, Simba na Yanga zingefungua maduka yao na kupiga marufuku jezi zao kuuzwa kiholela na kutumia wanachama kutoa taarifa ili wahusika wanaswe. Wawepo

mawakala maalumu kama ni mikoani na maeneo yawe yanatambulika.

Wanachama watumike kutoa taarifa za wauza jezi tena nyingine feki na wachukiliwe hatua. Jezi zipatikane kwenye maduka ya klabu yatakayoanzishwa lakini pia watakaopewa kibali maalumu.

Tumeona hapo juu kwamba katika mji wa Madrid baada ya jezi kukosekana, maduka ya klabu na yale yaliyopewa kibali yaliyopo Plaza del Sol ndiyo yalikuwa yakiuzwa na jezi ilikuwa ikitafutwa. Hakuna kuuzauza jezi kiholela.

Simba na Yanga zinapocheza mikoani, wapo wanaotandika jezi kuanzia za wakubwa hadi watoto wakiuza kwa bei wanazotaka. Simba au Yanga inafahamu nani kazitengeza? Nani katoa kibali cha kuzitengeneza na kuuza?

Timu hizi kubwa pamoja na nyingine kama Mbeya City zingepata fedha kwa kuweka utaratibu wa kuuza jezi. Labda kwa kuwa timu nyingi hazina vitengo madhubuti vya masoko, hapa ndipo pa kupatia hela kwenye usajili. Timu zinasajili, zinaweza kutengeneza jezi kwa wachezaji hao na kuziweka sokoni kwenye maduka yao na kuingizia fedha klabu.

Mchezaji wa zamani wa Yanga, Boniface Ambani aliwahi kuandika katika gazeti la Mwanaspoti kuwa Wakati anacheza Yanga, alishangaa kuona jezi za klabu ya Yanga zinavyouzwa kwa wingi.

Ninamnukuu: “Hebu fikiria, Yanga ingekuwa ndio inajiuzia hizo Jezi. Shilingi ngapi ingekuwa inajitengenezea. Ni mapato mengi sana. Lakini wameachia wafanyabiashara Tanzania kote kutumia nembo yao kujinufaisha bila wao wenyewe kupata chochote.

“Fikiria Jezi, bukta, traksuiti, soksi, na vitu vingi tu vyenye nembo ya Yanga, Kama kofia zinazouzwa, Yanga na Simba zingekuwa na maduka zao za kuwauzuia wateja kwa jumla faida kiasi gani wangekuwa nayo?

“Hela ngapi wangekuwa wanaingiza kwa siku? Jameni hizi klabu zitakuwa zinalia hadi lini? Hakuna mtu hata mmoja aliye na fikra ya vile hizi klabu zinaweza jitegemea bila kutumia mfuko wa mtu.” Mwisho wa kumnukuu.

Ni utaratibu ukiwekwa na kupiga pini kila mahali, kwamba mali za klabu ziundiwe utaratibu wake na kila mwanachama atakuwa mlinzi.

Eneo lingine linaloweza kuingizia fedha klabu za Simba na Yanga ni uwekezaji. Simba na Yanga zinaweza kutengeneza maeneo mbalimbali ya uwekezaji na kuwaingizia fedha.

Yanga na Simba zinatakiwa kuwa na majengo yao kama; SIMBA SC TOWER au MSIMBAZI TOWER la ghorofa 20 au vyovyote vile likiwa na mambo mbalimbali sawa na Yanga. Yanga inaweza na yenyewe kuwa na YANGA TOWER au JANGWANI TOWER.

Klabu zinatakiwa kujenga maeneo la biashara yakiwa yapo kisasa zaidi. Humo sasa kuwemo na maduka makubwa ya super market, butiki, hoteli, ofisi, kumbi za mikutano, harusi, casino, gym, baa na hata hospitali. Hiyo ni kwa klabu si lazima Msimbazi au pale Jangwani. Kuna maeneo mbalimbali ya uwekezaji. Pia kingine cha kuwekeza fedha ni kuanzisha kijiji cha Simba na Kijiji cha Yanga.

Mfano mdogo tu, ukiangalia klabu ya ASEC Mimosa ya Ivory Coast, wanamiliki kijiji cha Asec ambacho kina shule zote za U-12 hadi U-23 na timu za wakubwa na ASEC yenyewe, sasa hayo yanatakiwa kuonekana Simba na Yanga.

Lakini kuwa na kijiji cha Yanga na Kijiji cha Simba ni kitega uchumi tosha, kitakuwa na faida kubwa kwa Simba kama ilivyo Mlimani City kwamba kila kitu ni pesa na timu zote zitaondokana na umasikini, itasajili mastaa wakali na ikiwa na fedha za kutosha itamiliki hata ndege yake, ndiyo kwani si mipango tu.

Kijiji cha Simba au Yanga, mbali na viwanja, kiwe hata na zoo la Simba watu wawaone huku wakiingiza fedha, eneo la kuegesha magari la kulipia kama ilivyo Uwanja wa Ndege, hoteli na gym ambayo itapangiwa wachezaji na watu wengine wa nje.

Pia, ukumbi wa mikutano, harusi, ofisi, benki, zahanati, maduka makubwa, ukumbi wa sinema na sehemu za kupumzikia pamoja na kuchezea watoto. Hizi ndizo Simba na Yanga za kisasa

Kwa Simba hujazungumzia aliyopanga kuyafanya Mohamed Dewji ambayo baada ya kupitishwa aliahidi mbele ya wanachama zaidi ya 1,300 waliokusanyika kwenye Ukumbi wa Mwalimu Nyerere.

Mara baada ya kutangazwa mshindi wa zabuni, MO alitangaza mambo saba ambayo atayafanyia kazi klabuni hapo ikiwemo ujenzi wa viwanja viwili vya mazoezi na kimoja kitakuwa cha nyasi bandia na kingine cha nyasi za kawaida.

Pia ujenzi wa hosteli yenye vyumba 35 ambavyo ndani vitakuwa na kila kitu, ujenzi wa mgahawa na eneo la kujiburudisha kwa wachezaji, studio ya kuzalisha vipindi vya televisheni vya Simba, gym pamoja na akademia za timu za vijana ili waweze kuuza ndani na nje ya nchi.

Simba na Yanga hazipaswi kuteseka kuwa hazina fedha.

Monday, June 4, 2018

HIMIDI MAO MKAMI: Maisha mapya ndani ya Petrojet SC

 

By Eliya Solomon, Mwananchi

Dar es Salaam. Kusajiliwa kwa aliyekuwa nahodha wa Azam, Himid Mao kwenye klabu ya Petrojet SC ya Misri kumeendelea kuongeza idadi ya wachezaji wa Kitanzania wanaocheza soka la kulipwa nje ya nchi.

Himid amejiunga na Petrojet SC, Juni mosi kwa kusaini mkataba wa miaka mitatu ya kuitumikia timu hiyo ambayo msimu uliomalizika wa 2017/18 imemaliza nafasi ya 12 kwenye msimamo wa Ligi Kuu nchini humo.

Kampuni inayomsimamia Abdi Banda na Jonas Mkude ya Siyavuma Sports imetajwa kuhusika na uhamisho wa Himid kujiunga na klabu hiyo ambayo ilianzishwa na kampuni ya mafuta ya Misri (Egyptian Petroleum) mwaka 2000. Kabla ya kutua Misri ambako alikuwa alihitajika kwenda mapema mwanzoni mwa mwaka huu, Himid aliwahi kufanya majaribio ya kucheza soka la kulipwa barani Ulaya kwenye klabu ya Randers FC ya Denmark.

Hata hivyo, kiungo huyo mkabaji hakupata nafasi ya kujiunga na miamba hiyo ya soka nchini Denmark hivyo ilibidi arejee kuipigania klabu yake ya Azam ambayo imemaliza ligi kwenye nafasi ya pili, nyuma ya Simba.

Spoti Mikiki tunakuletea mwenendo wa klabu mpya ya Himid, Petrojet SC namna alivyoanzishwa na kampuni ya mafuta ya Egyptian Petroleum mpaka kuwa moja ya timu ya kiushindani kwenye soka la Misri.

Mara baada ya kuanzishwa, Petrojet SC na kampuni ya Egyptian Petroleum kwenye mji wa Suez, unaotajwa kuwa na wingi wa watu wapatao, 497,000 Kaskazini mwa nchi hiyo, iliwachukua miaka mitano kupanda madaraja tofauti hadi kuibukia Ligi Kuu.

2006/07 ulikuwa msimu wa kwanza wa Petrojet SC , kucheza Ligi Kuu ya Misri na kwenye msimu huo, walimaliza nafasi ya saba huku wakipigana vikumbo na vigogo wa ligi hiyo, Al Ahly, Al-Aluminium na Asmant Suez, waliomaliza kwenye nafasi ya kwanza hadi ya tatu.

Msimu uliofuta wa 2007/08 Petrojet SC walimaliza ligi kwenye nafasi ya tano wakishinda mechi 13 na kutoka sare mechi saba, kupoteza mara 10 tofauti na msimu wao wa kwanza ambao walishinda mara tisa, sare 13 na kufungwa mara nane.

Mafanikio makubwa ambayo waliyapata, Petrojet SC ni kumaliza kwenye nafasi ya tatu, msimu wa 2008/09 ambao walishinda jumla ya michezo 13, sare mara 12 huku wakitoka sare mara tano. Mara baada ya kumaliza kwenye nafasi ya tatu kwa msimu huo, walipata nafasi ya kushiriki Kombe la Shirikisho Afrika kwa mara yao kwanza, 2010 na kuishia hatua ya 16 bora.

Petrojet SC iliwaondoa Miembeni ya Zanzibar kwenye hatua ya awali kwenye mashindano hayo kwa kuwafunga jumla ya mabao 4-2, mchezo wa kwanza walitoka sare ya mabao 2-2, Tanzania na katika marudiano walishinda kwa mabao 2-0.

Walipotinga raundi ya kwanza, waliitoa Khartoum kwa jumla ya mabao 5-1, mechi ya kwanza walishinda 3-0 na kwenye marudiano wakashinda 2-1, ugenini.

Ushindi huo uliwafanya kuingia kwenye hatua ya 16 bora ambayo kwa msimu huo pia Simba nayo ilitinga baada ya kuifunga Lengthens kwa jumla ya mabao 5-1.

Wakati Simba wakicheza na Haras El Hodood nchini Misri, Petrojet SC ilikuwa ikicheza nchini humo na CS Sfaxien ya Tusinia kwenye hatua hiyo ya 16 bora.

Petrojet SC ilitolewa kwenye hatua hiyo na CS Sfaxien kwa jumla ya mabao 2-1 baada ya sare ya bao 1-1 nyumbani na kukutana na kipigo ugenini cha bao 1-0.

2015 walirejea tena kwenye mashindano hayo kwa mara ya pili lakini walijikuta wakiishia kwenye raundi ya kwanza.

Wanachoweza kujivunia, Petrojet SC ni kutoa wafungaji bora kwenye msimu miwili tofauti ambayo ni 2007/08 ambapo alikuwa Alaa Ibrahim aliyefunga mabao, 15 na Eric Bekoe aliyefunga mabao 13 kwenye msimu wa 2009/10.

Monday, June 4, 2018

Southgate asema hakuna wa kumzuia Kane Russia

 

Harry Kane ametajwa ni kiongozi sahihi ambaye ana uwezo mkubwa wa kuivusha England katika fainali za Kombe la Dunia nchini Russia.

Kocha Gareth Southgate amemtaja Kane ni mshambuliaji wa aina yake na anaweza kuiongoza vyema England.

Kauli ya Southgate imekuja muda mfupi, baada ya mshambuliaji huyo kufunga mabao mawili katika ushindi wa England dhidi ya Nigeria.

England ikiwa nyumbani kwenye Uwanja wa Wembley, ilishinda mabao 2-1 ukiwa ni mchezo wa kujiandaa na fainali hizo.

Nahodha huyo wa England, alicheza kwa kiwango bora na alikuwa chachu ya ushindi katika mchezo huo.

Kane alifanya kazi kubwa licha ya kushambulia, alikuwa akirudi nyuma kusaidia ulinzi na wakati mwingine alikwenda katikati kuchukua mipira.

Hii ni mara ya kwanza Kane kucheza kwa kiwango cha aina yake tangu alipoteulikuwa nahodha rasmi wa England.

“Ana uwezo wa kufunga kila anapopata nafasi, anajiamini. Hiyo ndiyo sifa ya kiongozi,” alisema Southgate.

Pia alisema mshambuliaji huyo siyo mchoyo wa kutoa pasi na amekuwa na ushirikiano mzuri katika eneo la hatari la wapinzani.

Southgate alitoa mfano kwamba Kane alikuwa na ushirikiano mzuri na Dele Alli katika mchezo dhidi ya Nigeria.

Alisema mchezaji huyo ni hodari anapokuwa eneo la ushambuliaji na amekuwa akiitendea haki nafasi ya ushambuliaji. Kocha huyo alisema Kane ana tabia ya kusema ukweli timu inapocheza chini ya kiwango na amekuwa akisema waziwazi wachezaji wanaofanya makosa ndani ya mchezo.

Southgate alisema ujasiri wa mchezaji huyo umempa sifa ya kupenda mafanikio katika mechi za kimataifa.

Kane amemaliza ligi akishika nafasi ya pili kwa ufungaji katika Ligi Kuu England msimu uliomalizika akifunga mabao 30 nyuma ya Mohamed Salah wa Liverpool.

Baada ya kushindwa kutema cheche katika fainali za Kombe la Ulaya mwaka 2006, Kane ana matumaini ya kung’ara katika Kombe la Dunia nchini Russia.

Mchezaji huyo wa Tottenham Hotspurs anapewa nafasi ya kutamba katika fainali hizo zilizopangwa kuanza Juni 14.

Monday, June 4, 2018

Wanamichezo wachanga, inapendeza kupima afya



Dk Shita Samwel

Dk Shita Samwel 

Hapa nchini wanamichezo wachanga wa kuanzia miaka mitano kuendelea wamekuwa wakipata mafunzo ya michezo mbalimbali ikiwamo soka na kikapu kuanzia shuleni, shule maalumu za michezo na klabu za mitaani.

Michezo ni mojawapo ya shughuli zinazohusisha mwili mzima kufanya kazi, ili kushiriki kikamilifu mwili wa mwanamichezo na unatakiwa kuwa imara kiafya.

Katika nchi zilizopiga hatua katika michezo wanamichezo wachanga kabla ya kuingizwa katika shule za michezo maarufu kama sports Academy ni lazima kufanyiwa uchunguzi wa afya.

Dhumuni lao ni kuhakikisha kuwa vijana hao wanashikiri mafunzo ya michezo hiyo wakiwa hawana matatizo yoyote ya kiafya au kama wanayo basi hatua madhubuti huchukuliwa.

Uchunguzi huu unasaidia kubaini mapema matatizo ya kiafya ambayo kucheza kunaweza kumsababisha kushindwa kumudu aina ya mchezo anaojifunza ama kumwatarisha na vifo vya ghafla uwanjani.

Vile vile kubaini dosari za kimaumbile zinazoweza kumfanya ashindwe kucheza, mfano ni umbile paba la nyayo au dosari za mifupa na misuli zinazoweza kumfanya kupata majeraha kirahisi.

Maeneo ya mwili yanayochunguzwa ni pamoja na afya ya moyo, magonjwa ya ndani, utendaji kazi wa viungo vya mwili, lishe, kinywa na meno, macho na afya ya akili. Uchunguzi hufanyika katika vituo vya huduma za afya au katika vituo maalum vya kisasa vyenye vifaa vya kisasa au kliniki zinazotembea na gari maalumu.

Kwa kawaida uchunguzi hutegemea na umri wa mchezaji kijana, afya yake kiujumla, historia ya familia na mienendo na mitindo ya kimaisha anayoishi pamoja na wazazi au walezi.

Uchunguzi hujikita kwa kuangalia zaidi matatizo ya mfumo wa moyo na mzunguko wa damu, mfumo wa upumuaji, mfumo wa fahamu, mfumo wa mifupa na misuli na mengineyo.

Uchunguzi unaweza ukaanzia katika historia ya mwanamichezo mchanga kama ana dalili zozote au historia ya magonjwa sugu au ya kurithi katika familia yake ikiwamo pumu au selimundu (sickle cell).

Vile vile uchunguzi wa kimwili ikiwamo upimaji wa msukumo wa damu, kasi ya upumuaji, joto la mwili na mdundisho wa damu katika mshipa.

Vipimo vya uzito, urefu ili kubaini matatizo ya uzito wa mwili na upimaji wa ukubwa wa misuli mikubwa ya mwili. Vipimo vya kisasa huweza kutumika kuweza kubaini matatizo ya kiafya yaliyojikita kwa ndani zaidi ikiwamo vipimo vya CT na MRI.

Kwa upande wa uchunguzi wa mwili unaweza ukahusisha maabara na vipimo vya picha.

Vipimo kama vya wingi wa damu na kundi la damu, kipimo cha kupata taswira nzima ya damu, kiwango cha sukari ya mwili na vipimo vya kubaini magonjwa ya kuambukiza ikiwamo VVU.

Vilevile uchunguzi wa picha za mwili ikiwamo picha ya kifua ya xray, vipimo vya uchunguzi vya moyo ikiwamo kipimo cha picha ya moyo na kipimo cha kuona ufanyaji kazi wa moyo. Matokeo ya uchunguzi wote huandikwa katika ripoti, mapendekezo au ushauri wa daktari huzingatiwa na kufuatwa.

Inawezekana bado tuna changamoto ya huduma za afya na gharama kuweza kufanya uchunguzi kwa wanamichezo wachanga lakini chunguzi unaweza kufanywa na wataala waliopo katika vituo vya afya.

Monday, June 4, 2018

Mameneja wa viwanja watafutiwe shughuli nyingine



Allan Goshashi

Allan Goshashi 

Kutokana na sababu za kihistoria, wananchi wa Tanzania hawakushiriki kikamilifu katika shughuli za uchumi kabla ya uhuru, kwa kuwa walinyimwa fursa.

Hali hii ilikuwepo wakati wa ukoloni na wananchi wengi waliwekewa vikwazo kushiriki katika uchumi ili watawalike kirahisi.

Wananchi walilazimika kujishughulisha na uchumi wa sekta isiyo rasmi wakati sehemu kubwa ya sekta rasmi ilishikwa na watawala wa kikoloni na wageni.

Wakoloni walitumia mbinu mahsusi kuwaendeleza wazungu na wananchi wachache. Mbinu hizo ni pamoja na utoaji wa mikopo, utoaji wa elimu, ugawaji wa ardhi na utoaji wa leseni za biashara.

Baadhi ya mbinu hizo zinaweza kutumika hivi sasa kurekebisha hali hiyo na kuwawezesha wananchi kumiliki sehemu kubwa ya uchumi.

Uhuru ulipopatikana mwaka wa 1961, wananchi walipata madaraka ya kisiasa, lakini sehemu kubwa ya uchumi bado ilibaki mikononi mwa wageni na baadhi ya Watanzania.

Hali hiyo ilileta kero na ni mojawapo ya sababu muhimu ya kutangazwa kwa Azimio la Arusha, mwaka wa 1967. Azimio hilo lilikuwa mkakati muhimu wa kuhakikisha kwamba wananchi kwa pamoja kupitia dola wanashika njia kuu za uchumi.

Shughuli zote za uzalishaji na utoaji wa huduma ziliundiwa mashirika ya umma.

Hata hivyo, mashirika ya umma mengi yaliendeshwa kwa hasara na yaliendesha shughuli za kiuchumi kwa kutumia mtaji na ruzuku kutoka Serikalini.

Mwaka wa 1992, Sera ya Ubinafsishaji ilianzishwa na Serikali baada ya kuona kwamba mashirika ya umma yalikuwa mzigo kwa Serikali ambayo haikuwa na fedha za kuyaendesha na kuyaendeleza hata kufikia uamuzi wa kuyarekebisha na mengine kuyabinafsisha.

Katika ubinafsishaji huo, sehemu kubwa ya wananchi hawakushiriki ipasavyo katika zoezi hilo kwa kuwa hawakuwa na elimu ya biashara, ujuzi na mitaji.

Pia, mwaka 1992 Tanzania iliingia katika mfumo wa vyama vingi vya siasa hivyo kuondoka katika mfumo wa kuwa chini ya chama kimoja cha siasa ambacho ni Chama cha Mapinduzi (CCM) kilichokuwa na dhamana ya kuunda Serikali na mpaka sasa kina dhamana hiyo.

Baada ya kuingia katika mfumo wa vyama vingi, ilibidi mali za Serikali na CCM zitenganishwe hivyo viwanja vyote vya michezo vilivyopo mikoani vilivyojengwa, wakati nchi yetu ilipokuwa ikiongozwa na chama kimoja vilihodhiwa na CCM na mpaka sasa bado vipo chini ya CCM ambayo imewaweka mameneja kusimamia viwanja hivyo.

Ninaamini, umefika wakati sasa viwanja hivyo viwe na utaratibu mpya wa usimamizi kwa ajili ya kusaidia Watanzania wengi, viwanja hivi virudishwe serikalini na Serikali itafute wazabuni wa kuviendesha ili kuviendeleza kwa manufaa ya umma.

Athari kubwa ya viwanja hivyo kumilikiwa na chama cha siasa ni kwamba haviendelezwi ipasavyo na mameneja waliopo hivyo hali yake kubaki duni, majukwaa yake yamechoka, sehemu ya kuchezea ni mbovu, hali ya vyoo ni mbaya huku vikiingiza mapato kidogo kwa sababu ya kukosekana ubunifu.

Wote tunafahamu kwamba katika kila Mkoa wa Tanzania kuna kiwanja kikubwa cha michezo, hivyo kiwanja hicho ni chanzo kikubwa cha mapato na ajira. Hebu angalia hali ya Uwanja wa Ali Hassan Mwinyi.

Ndiyo, unapokuwepo uwanja ni lazima utakuwa na barabara nzuri za kuelekea na kutoka katika uwanja huo, umeme, huduma za mawasiliano, hoteli zitautegemea uwanja huo, hospitali au kituo cha afya, kituo cha polisi, maduka mengi, huduma ya maji, chakula na shughuli nyingine nyingi ambazo zitatoa ajira na kuweka mazingira ya kupata mapato, lakini mameneja waliopo hawaoni hili. Ni bora wapewe kazi nyingine mbali na viwanja.

Monday, June 4, 2018

Msikimbilie kuwekewa mabulungutu ya fedha mezani



Ibrahim Bakari

Ibrahim Bakari 

Ligi Kuu msimu wa mwaka 2017/18 imefika tamati hivi karibuni, baada ya Simba kutwaa ubingwa huku wakiwaacha mdomo wazi watani zao Yanga ambao msimu huu haukuwa mzuri kabisa kwao.

Kumalizika kwa ligi hiyo, kumeweka bayana mambo mawili ambayo ni timu zilizoshuka na kupanda daraja. Timu zilizopanda zitaungana na zingine 14 zilizokuwepo kwenye ligi hiyo.

Miongoni mwa timu zilizopanda ni Biashara Mara, KMC, African Lyon, Coastal Union, Alliance na Tanzania JKT.

Hata hivyo, suala la usajili limeanza kunukia. Tunachokisikia kwenye vyombo vya habari na kusoma kwenye mitandao ya kijamii ni tetesi za usajili. Joto la usajili ndiyo habari ya sasa kwenye nyanja ya michezo hapa nchini hasa baada ya ligi kumalizika.

Miaka iliyopita tulisikia matatizo kadhaa yaliyotokana na wachezaji kusajiliwa zaidi ya timu moja na wengine kudhulumiwa fedha zao.

Kupitia usajili, wachezaji wamekuwa wakipata fedha kwa ajili ya kuendeshea maisha na familia. Pia watambue kwamba kujitengenezea matatizo kwa sababu ya kusajili timu zaidi ya moja hilo ni jambo ambalo linaweza kuhatarisha maisha yao ya soka.

Miongoni mwa mambo ambayo yamekuwa yakijitokeza kwenye usajili ni mbwembwe za kuwawekea wachezaji maburungutu mezani.

Mtindo huo wa usajili huenda ni mbinu ya kuwapumbaza wachezaji. Hii ni kutokana na baadhi yao kwa kuwa hawajawahi kukutana na kiwango hicho cha fedha. Siyo jambo la ajabu klabu kuita waandishi wa habari na kumpiga picha mchezaji akisaini, huku pembeni yake likionekana burungutu la fedha ya usajili.

Huo kama ni utaratibu au utamaduni wa klabu, lakini wachezaji wanapaswa kuwa makini. Mbinu itakayowaokoa wachezaji kuepuka kurubuniwa kwenye usajili huo ambao wakati mwingine fedha hizo huishia kuzisikia tu, ni kuwatumia wanasheria.

Wachezaji wanapaswa kuwatafuta wanasheria ambao watahusika kupitia mikataba yao na waajiri wao. Wanataaluma hao watawasaidia kupitia kipengele kwa kipengele kabla ya kusaini.

Pia, mchezaji anaweza kuchagua mtu anayemuamini kuwapo kwenye makubaliano ya mkataba wakati wa kusaini. Jambo hilo litasaidia kuondoa migogoro na manung’uniko.

Baadhi ya wachezaji waliopo Ligi Kuu au klabu za daraja la kwanza, huenda wamekuwa waathirika wa jambo hilo ambalo limekuwa likiwarudisha nyuma kimaendeleo. Kutokana na umuhimu wa usajili kwa mchezaji, hata kama mkataba ni siri na mwajiri wake, wahusishwe wanasheria ili kuondoa malalamiko.

Wachezaji waupuke kuingia kichwa kichwa kwenye mikataba isiyo na manufaa kwao. Ni dhahiri kuna baadhi ya wachezaji huishia kusajiliwa na kukalia benchi, huku vikitolewa visingizio kwamba kumekuwapo na ushindani wa namba.

Hayo yote mahali pa kujadiliwa ni kwenye mkataba. Wachezaji wa klabu za Ligi Kuu waamke kwa kufanya kazi yao kisasa.

Pia ninadhani, kuepuka kujaza wachezaji, kiwepo na kipengele cha kulazimisha ama kucheza au kumruhusu mchezaji kuondoka au kutafuta timu kama hapati namba kama ilivyo mikataba ya Ulaya. Wachezaji, watambue kwamba maburungutu kuwekwa mezani haiwasaidii iwapo mkataba hauna manufaa kwa maisha yao ya soka ya baadaye.

Monday, June 4, 2018

Tanzania inaweza kuzalisha akina Amadou Gallo

 

Nikiwa napita kwenye mitaa ya Dakar Senegal, kuna jambo kubwa ambalo nimejifunza na la kipekee kupita kiasi. Binadamu wa eneo hili wana uungwana kuliko ilivyokuwa kawaida, wanaipenda nchi yao na wanaamini kuwa wanaweza kufika mbali kwa pamoja na kufanikisha kila lililokuwa jema.

Lakini katika msingi huo kuna watu waliopata fursa wanaotaka kuhakikisha kuwa wenzao ambao ni vijana wadogo pia wanafanikiwa kufika mbali.

Kwenye fukwe zao wameweka “gym” za bure kabisa ambazo kila kijana anaweza kuingia na kutumia. Hakuna anayeiba vyuma ili kwenda kupima kwa sababu wanakuzwa wakiamini ukakamavu ni sehemu ya maisha ya Wasenegali na wanatakiwa kufanya hivyo ili kufika mbali. Hii ni sababu kubwa kwanini ni wengi wao ni wakakamavu kuliko ilivyokuwa kawaida.

Watoto wanakua wakiamini kuwa ndoto ya michezo inawezekana, wanaupenda utamaduni wao na wanapenda kila kitu kinachobeba unyumbani kuliko “uleo” na ndio sababu hata msanii mkubwa kwao ni Youssou N’Dour ambaye anaimba kila kitu ambacho sikuelewa hata kidogo kutokana na kutokuwepo kwa maneno ya lugha ya Kiingereza ndani yake.

Wao hawajali kitu ambacho wageni mnajali, ndio maana hata teksi zao zimechakaa lakini wanazipenda na imenibidi hata mimi nizipende. Kubwa zaidi ni mwamko wa michezo katika nchi hii, jambo ambalo ni lenye kuvutia na zuri kwa kujifunza.

Nimeletwa huku na NBA, lakini kupitia makamu wa Rais wa NBA na mkurugenzi Mtendaji wa NBA Africa, Amadou Gallo. Huyu anaishi mchezo wa mpira wa kikapu, anaamini katika kukuza elimu ya vijana kupitia michezo hasa mpira wa kikapu na pia anaamini kuwa vijana hawatakiwi kuishi wakiamini kuwa lazima wacheze kwenye NBA lakini hii itawapa fursa ya kusoma na kufika mbali zaidi.

Hii imekuwa tabia ya nchi kwa ujumla sasa. Amadou Gallo amekuwa akiendesha programu inayoitwa SEED PROJECT kwa miaka 20 sasa. Lengo la hii programu ni kukuza vijana wa kike na wale wa kiume wakiwalea katika misingi ya kujifunza mpira wa kikapu lakini pia kupata elimu iliyokuwa bora na inayoweza kuwafikisha kwenye kiwango cha juu kwenye vyuo vikubwa duniani.

Vijana hawa wanakuzwa wakiwa na ndoto kubwa na mpira wa kikapu ndio chanzo cha ndoto zao. Wanakuzwa wakisimamia misingi ya kutambua mazingira yao, kuwa na ndoto za kufika kwenye NBA lakini pia kwenda kusoma kwenye vyuo vikubwa Marekani na iwapo hawatofika kwenye NBA basi huja kuwa wafanyakazi wakubwa kwenye kampuni kubwa duniani.

Kwenye mboni za vijana hawa wanaolelewa kukuza vipaji na elimu yao kwenye kituo cha SEED wanaona sura ya Gorgui Dieng ambaye ni muhitimu wa kituo hiki cha michezo na elimu, ambaye anacheza kwenye ligi ya NBA kwenye klabu ya Minnesota Timberwolves.

Huyu anarejea kila mara kuendelea kuwatia nguvu vijana hawa na kuhakikisha kuwa wanabaki wanajitambua na kufika mbali zaidi. Pembeni yake wapo wachezaji wengine kama Poppes, Olumide, Luol Deng ambao wote ni kutoka Afrika na wamefika kwenye NBA ambao wote wanawaeleza jambo moja tu kuwa maisha yao yanategemea vipaji vyao lakini wahakikishe kuwa elimu hawaiachi iende zake.

Kwa mabinti wa kike, kuna wanawake waliofanya vizuri kwenye NBA ambayo ni NBA ya wanawake wakiongozwa na Ruth Riley na Astou lakini pia Mkurugenzi wa Masoko wa NBA anayeitwa Pam El ambayo yote ni majina makubwa na pengine ambayo wengi hawakuwahi kutarajia kuyaona. Vijana wanaonyeshwa njia sahihi ya maisha kwa vitendo, wanawaona waliofanikiwa kupitia njia walizopo wao na kinachokuwa vichwani mwao ni kupambana zaidi.

Hii ni aina ya maisha ambayo tunaikosa Tanzania, vijana hawapati fursa za kuwekwa kwenye mazingira haya.

Ipo JR NBA ambayo inaendelea kila mwisho wa wiki pale JMK Park lakini ni wachache wanaoifuatilia, lakini hili ni eneo ambalo wazazi inabidi walitizame na wawapeleke watoto wao.

Ni maisha haya ambayo Senegal wanayachukua kwa nguvu kubwa na kuhakikisha kuwa hayawaponyoki kwenye viganja vyao, wanafanya kila linalowezekana kufika inapotakiwa kuwa.

Nikiwa najiuliza hii safari ya miaka 20 ya Amadou Gallo katika kufanya mpira wa kikapu kukua na kufika katika hatua kubwa kwa Senegal, ananitambulisha kwa rafiki yake kipenzi anayefanya kazi kama yake lakini kwenye soka. Huyu anaitwa Saer Seck, ambaye anamiliki kituo kama SEED kinachoitwa Diambars Academy ambacho pia kinasimamia klabu ya Diambars FC.

Huyu amejitolea kusaidia vipaji vya Senegal kwenye mpira wa miguu, huyu amekuza majina makubwa kwenye soka Ulaya kupitia kituo chake hiki na klabu aliyoamua kuanzisha ya Diambars FC.

Kwenye mikono yake wamezaliwa wachezaji wanaofanya vyema Ulaya kama Pape Souaré, anayechezea klabu ya Crystal Palace, Idrissa Gueye, kiungo wa Everton, Kara Mbodj, anayekipiga R.S.C. Anderlecht, Saliou Ciss, wa Angers, Badou (Papa Alioune Ndiaye), wa Stoke City, na Vieux Sané wa Buraspor. Wote hawa ni vijana wanaowafanya wengine wa kiuo hiki kuwa na ndoto.

Huu ni utamaduni mkubwa kwa Senegal na hawaoni aibu kurejea nyumbani na kupigania wenzao wafike mbali. Na bahati nzuri wanashirikiana kwenye michezo tofauti. Mchezo mwingine mkubwa Senegal ni mieleka na kwenye matukio haya ya SEED PROJECT walikuja kuunga mkono juhudi za wenzao.

Undugu, kusaidiana na kupambania ndoto moja ndio msingi wa watu hawa kwenye michezo. Na pengine sio ajabu kusikia rafiki mkubwa wa Amadou Gallo huyu ni El Hadj Diouf ambaye alikuwa nyota wa mpira wa miguu wa timu ya Taifa na vilabu kama Liverpool.

Kwao mieleka, mpira wa kikapu mpaka mpira wa miguu wanazungumza neno moja nalo ni kuhakikisha kuwa vijana wanapata fursa zaidi za michezo na elimu na kufika mbali iwezekanavyo.

Safari ya Amadou ilianza miaka 20 iliyopita mpaka leo Senegal inamtizama kama mwokozi wao na NBA inalitizama taifa hili kukuza wachezaji wa mpira wa kikapu. Tunalo la kujifunza kwenye hili.

Monday, May 28, 2018

Huyu ndiye ‘babu’ aliyetisha ligi ya msimu huu

 

By Eliya Solomon, Mwananchi

Ama kweli ng’ombe hazeeki maini pamoja na umri kumtupa mkono, nahodha wa Kagera Sugar, George Kavila mwenye miaka 39, ameendelea kutesa Ligi Kuu Tanzania Bara kwa kutimiza mwaka wake wa 20.

Mkongwe huyo, alianza kucheza ligi mwaka 1998 akiitumikia Coastal Union ya Tanga ambayo ndio timu yake ya kwanza kumtambulisha kwenye soka la ushindani.

Kavila alijiunga na Kagera Sugar mwaka 2009 na ameweza kudumu kudumu kwenye kikosi cha kwanza kwenye timu hiyo chini ya makocha watatu tofauti ambao ni Salum Mayanga, Abdallah Kibadeni ‘King Mputa na sasa,Mecky Maxime.

Pamoja na ukongwe wake, Kavila amezichezea timu tano kwenye soka ambazo ni Coastal Union ya Tanga, Twiga ya Dar, Polisi Moro ya Morogoro, Villa Squad ya Dar na Kagera Sugar ya mkoani Kagera ambako amedumu hadi leo.

Jarida hili limefanya mahojiano na Kavila ambaye anasema siri iliyomfanya bkucheza soka kwa kipindi kirefu zaidi tofauti na wachezaji wengi wa Kitanzania ambao wameshindwa kulinda viwango vyao kwa zaidi ya miaka 15 kwenye soka la ushindani.

“Nimekuwa makini na matumizi ya mwili wangu, niseme kwa uwazi kuwa mwili kwa mchezaji mpira ni kama ofisi ambayo inahitaji matunzo kama yakikosekana, matokeo yake unakuta mchezaji anacheza kwa muda mfupi na kupotea.

“Sikufichi bado najiona kuwa na nguvu pamoja na kasi ya kushindana na vijana, sijihisi kuchoka ila najikuta maarifa yanapungua kutokana na umri kusogea ila nguzo kubwa kwangu ni uzoefu nilionao.

“Mazoezi ambayo nimekuwa nikiyafanya mara kwa mara yamekuwa msaada kuendelea kuwa kwenye kiwango cha ushindani,” alisema nyota huyo.

Kuhusu kutundika daluga, Kavila anasema atakapoona mwili hautaki tena soka atageukia mambo mengine lakini kwa sasa bado ataendelea kuitumikia Kagera Sugar.

Ushauri wake kwa vijana wanaochipukia kwenye soka, Kavila anasema wanatakiwa kujituma na kulinda miili yao ili wacheze soka la ushindani kwa kipindi kirefu zaidi.

Monday, May 28, 2018

MSIMU WA 2017/2018: Vijimambo vilinogesha na kusononesha Ligi Kuu

 

By Charity James, Mwananchi

MSIMU wa 2017-2018 umemalizika kwa Simba kuibuka na ubingwa wa Ligi kuu Tanzania Bara, ligi iliyokuwa na timu 16 huku kila timu ikivuna ilichopanda.

Simba wametwaa ubingwa huo baada ya kukaa miaka mitano bila kuutwaa na mara ya mwisho ilikuwa msimu wa 2011/2012. Msimu huu walijipanga na kusajili kikosi cha ushindani hatimaye wamefanikiwa.

Katika makala haya najua wajua lakini nataka kukujuza zaidi matukio kumi yaliyojitokeza mwanzo hadi mwisho wa msimu.

1- JPM kukabidhi kombe kwa mara ya kwanza

RAIS wa Jamhuri ya Muungano Tanzania, John Magufuli, kwa mara ya kwanza tangu aingie madarakani amewakabidhi mabingwa wapya wa Ligi Kuu Tanzania Bara Simba na tukio hilo limechukuliwa kama la kihistoria.

Pia upande wa pili baadhi ya mashabiki walizua maswali mengi kwani waliona kama si haki kwani walitwaa ubingwa mara tatu mfululizo lakini hakukuwa na tukio kubwa kama hilo.

Mbali na Simba kukabidhiwa kombe na Rais pia waliitwa bungeni kwa ajili ya kufurahia ubingwa na baadhi ya wabunge ambao ni wapenzi wa klabu hiyo jambo ambalo liliendelea kuwaumiza mashabiki wa Yanga ambao wengi.

2-Yondani kumtemea mate Kwasi

Katika mchezo wa watani wa jadi Simba na Yanga uliomalizika kwa mabingwa Simba kuibuka na ushindi wa bao 1-0, beki kisiki wa Yanga Kelvin Yondani alimtemea mate mchezaji wa Simba Asante Kwasi jambo ambalo ni kinyume cha uanamichezo.

Kila mmoja kwa nafasi yake anatakiwa kutoa elimu kwa wachezaji kucheza mpira wa kuzingatia sheria na kusitokee matukio kama hayo. Yondani amesimamishwa hadi hatua zaidi zitakapotangazwa.

3-Okwi kukosa Penati mbele ya Rais.

Mshambuliaji huyo hajakosa penati hata moja tangu ligi imeanza na alikuwa ni mchezaji ambaye aliaminiwa katika kikosi chake kila ikitokea nafasi ya penati alikuwa anapewa kipaumbele apige lakini alishindwa kuisaidia timu yake kuambulia walau pointi moja katika mchezo wao wa ligi baada ya kukosa penati.

Lwandamina Kuikimbia Yanga

Katika hali isiyokuwa ya kawaida aliyekuwa kocha Mkuu wa Yanga, George Lwandamina aliwatoroka viongozi wa klabu hiyo na kutokomea nchini kwao Zambia huku akiiacha timu ikiwa katika hari mbaya kutokana na matokeo mabaya waliyokuwa wakiyapata.

Baada ya kocha huyo kuondoka maneno mengi yaliongelewa ambao wengi wao waliweka wazi kuwa mwalimu huyo ameikimbia timu hiyo kutokana na kukabiliwa na ukata.

Taarifa ziliokuwa zinatolewa na uongozi wa Yanga zilikuwa zinaeleza kuwa mwalimu amekwenda Zambia kwenye msiba na atarejea lakini hadi hivi sasa mwalimu hajarejea.

Simba mechi 27 bila kupoteza

Si jambo jipya kwa Simba kufanya ivyo ila ni jambo la kupongweza kutokana na ubora a timu hiyo kwa msimu huu walicheza mfululizo michezo 27 bila kupoteza kabla ya kuharibiwa na Kagera. Simba walistahili kufanya ivyo kutokana na upana wa kikosi walichokua nacho ikiwa ni pamoja na ubora wa golikipa wao Aishi Manura ambaye ameweza kuhimili lango hadi alipokuwa nje ya uwanja ndipo timu yake ikaruhusu nyavu zao kutikiswa.

Kagera kutibua rekodi ya Simba

Wababe wao hivi ndivyo unaweza kusema mara baada ya kuwatibulia Simba misimu miwili mfululizo wakiwa katika mafanikio, msimu uliopita Kagera waliwaharibia Simba kushindwa kutwaa ubingwa baada ya kuwafunga mabao 2-1.

Simba walimkomalia mchezaji wa Kagera Sugar Mohamed Phaki alikuwa na kadi tatu za njano na alicheza mchezo huo ambao wao walifungwa na Shirikisho la Mpira wa Miguu Tanzania (TFF) lilishindwa kufuta matokeo na kuwapa ushindi Simba. Msimu huu pia Kagera Sugar ameendelea kuwa mwiba kwa Simba mara baada ya kumtibulia rekodi yake kwa kumfunga bao 1-0 mbele ya Rais Magufuli.

Yanga na wachezaji wawili benchi

Ni tukio ambalo si la kawaida, Yanga iligawanyika, ikaenda Mbeya kucheza na Prisons, Mtibwa ambako mechi zote walipoteza.

Yanga ilikuwa na wachezaji wawili tu wa akiba ambao ni Amiss Tambwe na Yusuph Suleiman.

Aibu ya mwaka hivyo ndio unaweza kuema baada ya Yanga kuwa na wachezaji wawili tu katika benchi lake na Tambwe alicheza mechi yake ya pili tangu mwaka huu ulipoanza kwani alikuwa majeruhi kipindi kirefu.

Okwi ashindwa rekodi ya Msuva

Kinara wa mabao msimu huu Mganda Emmanuel Okwi pamoja na kufanikiwa kufunga idadi kubwa ya mabao na kuwa kinara msimu huu bado ameshindwa kuvunja rekodi ya winga Saimon Msumva na Amisi Tambwe.

Okwi hadi sasa ana mabao 20 rekodi ya Tambwe msimu wa 2014-2015 akifungwa mabao 21 idadi ambayo Okwi amebakiwa na bao moja tu ili aweze kumfikia na endapo ataweza kufunga bao katika mchezo wa Majimaji anaweza kufikia idadi hiyo.

Simba kumkabidhi timu MO

Wanachama zaidi ya 900 kwa umoja wao walipitisha Katiba inayomfanya tajiri kijana Mohammed Dewji MO kupewa hisa 49 huku 51 wakibaki nazo wanachama.

Agosti 20 Simba wamefikia uamuzi huo baada ya kukaa na wanachama pamoja na kuishirikisha Serikali na kutoa uamuzi huo kwa kukubali mabadiliko ndani ya timu kutoka kuwa mfumo wa wanachama hadi kuwa kampuni.

Simba kutwaa kombe baada ya miaka mingi

Utani ulipungua na baadaye baadhi ya mashabiki wa Yanga alianza kutamba kwa kuweka wazi kuwa hawawezi kuwa na utani na Simba ambao hawakuwa na ushindani ndani ya misimu mitano mfululizo.

Simba mara ya mwisho kutwaa ubingwa ulikuwa ni msimu wa mwaka 2011-2012 ndani ya misimu hiyo Yanga ambechukua mara tatu mfululizo wakati Azam wakitwaa mara moja.

Monday, May 28, 2018

Simba iliongoza kila kona

 

By Mwandishi Wetu, Mwananchi

Ligi Kuu Bara inaelekea ukingoni na Jumatatu ya leo ndio utachezwa mzunguko wa mwisho lakini tayari bingwa ameshajulikana na vita ipo katika timu ambayo itamfuata Njombe Mji katika Ligi Daraja la Kwanza msimu ujao.

Ndanda na Majimaji moja kati ya hizo lazima itaungana na Njombe Mji katika kucheza Ligi Daraja la Kwanza msimu ujao.

Simba ndiyo timu pekee ambayo msimu huu inajivunia mafanikio makubwa.

KUONGOZA LIGI

Tangu Ligi Kuu Bara msimu huu kuanza mwezi Agosti mwaka jana kwa Simba kuanza na ushindi wa mabao 7-0.

Hadi Yanga wanakubali kupoteza dhidi ya Tanzania Prison na rasmi Simba kuwa mabingwa walikuwa wanaongoza ligi mwanzo mwisho japokuwa walipata wakati mgumu.

Simba msimu uliopita waliongoza katika msimamo wa ligi kwa muda mrefu na wakaja kukubali kupoteza katika mechi za mwisho hasa Kanda ya Ziwa na watani zao Yanga wakaja kupindua meza na wakachukua ubingwa kwa kuwazidi magoli ya kufunga japo walifungana kwa pointi.

OKWI KILELENI

Kinara wa mabao wa Ligi Kuu Bara Mganda, Emmanuel Okwi licha ya kukosa baadhi ya mechi kwa sababu mbalimbali ambazo zilimuweka nje ya uwanja, aliweza kubaki kileleni katika mbio za ufungaji.

hadi ligi inapomalizika leo, Okwi anaongoza akiwa na mabao 20 wakati anayemfuatia, John Bocco ana mabao 14. Marcelo Kaheza ana mabao 13.

Simba ilistahili kuwa mabingwa msimu huu lakini Okwi nae alistahili kuwa mfungaji bora msimu huu kwa kushindwa kusogelewa na mastraika wengine katika mbio za kufumania nyavu msimu mzima.

UTATU MTAKATIFU HATARI

Washambuliaji watatu wa Simba Okwi, Bocco na Shiza Kichuya ndio waliotengeneza safu matata ya Simba na kwa kiasi kikubwa ndio walioibeba Simba msimu huu.

Ilikuwa safu hatari ya kufumania nyavu kwani hao pekee walifunga magoli yaliyokuwa hazina kubwa kwa Wanamsimbazi hao.

Okwi alifunga 20, Bocco 14 wakati Shiza Kichuya akifunga saba, na watatu hao kwa msimu huu kabla ya kucheza mechi ya mwisho dhidi ya Majimaji walikuwa wamefunga jumla ya magoli 41, na kuwa safu hatari ya ushambuliaji kuliko timu yoyote.

Halitakuwa jambo la kushangaza kwa wachezaji hao kuwepo katika tuzo mbalimbali za Ligi Kuu msimu huu kwani wametoa mchango mkubwa kwa timu yao kutwaa ubingwa.

WAMEFUNGWA MOJA

Katika mechi 28, ambazo Simba wamecheza msimu huu ndio timu iliyofungwa magoli machache kwa kufungwa magoli 14, kwa maana hiyo ndio timu ambayo ilikuwa na safu kali ya ulinzi huku langoni akisimama, Aishi Manula.

Simba mbali ya kufungwa magoli machache lakini katika timu 16, imepoteza mechi moja tu iliyopita dhidi ya Kagera Sugar.

Simba ilichukua pointi katika mechi ngumu dhidi ya Yanga na Azam baada ya zile mechi za mzunguko wa kwanza kutoka sare lakini za mzunguko wa pili alizifunga zote za kurahisisha safari ya kuchukua ubingwa.

KUTAWALA KATIKA TUZO

Wachezaji wa Simba msimu huu wanawastani mkubwa wa kutawala katika tuzo kwani ukiangalia kikosi chao kina kila sababu ya kutwaa tuzo ya mchezaji mmoja mmoja na kuongoza.

Niwazi kipa bora msimu huu atakuwa Manula, Mfungaji Bora atakuwa Okwi, mchezaji bora anaweza kuwania Bocco na Kichuya ingawa haya nyota wengine wote waliokuwa katika kikosi hicho kwa ubora waliouonyesha wanaweza kunyakuwa.

Simba pia walitawala katika tuzo za mchezaji bora wa mwezi kwani wachezaji wao wawili Okwi, Bocco walinyakuwa tuzo hiyo ambayo utolewa na Azam Media kila mwisho wa mwezi wakati Ligi ikiwa inaendelea.

KUONGOZA KATIKA PASI

Wachezaji wawili wa Simba Erasto Nyoni, Kichuya ndio wanaongoza katika orodha ya wachezaji waliotoa pasi nyingi za kufunga msimu huu kuliko wachezaji kutoka katika timu yoyote ile.

Nyoni ametoa pasi tano za kufunga wakati Kichuya ametoa pasi kumi ambazo washambuliaji wenzake walifunga na ndio anaongoza katika wachezaji waliotoa pasi nyingi za mabao masimu huu.

Monday, May 28, 2018

Yanga ilikata pumzi baada ya dakika ya 2,000

 

By Mwandishi Wetu, Mwananchi

Mabingwa wa zamani wa Ligi Kuu Tanzania Bara, Yanga hawataisahau Tanzania Prisons kwani iliwafanyia kitu mbaya, kwanza kuwatemesha ubingwa, pili kuwafunga mchezo wa pili, lakini tatu ni kama iliwatia nuksi na kuanza kupoteza mechi mfululizo.

Mchezo wa Tanzania Prisons ulikuwa wa 24 ambao ni sawa na dakika 2,160 na kukubali kuliachia kombe kwa Simba na kupoteza mwelekeo.

Yanga iliyokuwa na wachezaji wachache Mbeya huku wengine wakibaki Dar es Salaam kwa maandalizi ya mchezo na Rayon Sports, Kombe la Shirikisho Afrika, ilipoteza mchezo huo ambao awali zilikuwa zikipigwa hesabu kali kwa Yanga na Simba, kwamba nani atatwaa ubingwa.

Mchezo wenyewe ulikuwa hivi, Simba ilikuwa ikihitaji pointi mbili huku ikiwa na pointi 65 kwamba kama wakizipata wanakuwa mabingwa. Hizo pointi za Simba ni kutokana na kwamba, Yanga ingefikisha pointi 66 na kutetea ubingwa wake endapo ingetokea Simba kuchemsha.

Yanga ilikuwa ijitutumue zaidi lakini endapo tu ingeshinda mchezo huo ambao ungeipa Simba kazi sasa mchezo wake na Singida kwa kuwa bado ilikuwa na uhai.

Yanga ilikuwa inajipa moyo kushinda kwani kama ingefanya vizuri michezo yake, ingefikisha pointi 66 na kuizidi Simba pointi moja. Ilivyo sasa, Yanga ikapigwa na shughuli ya kupiga hesabu ikafia hapo na kwamba Yanga sasa hata kama ingeshinda mechi zote, ingefikisha pointi 63 ambazo tayari zilishavukwa na Simba.

Hapo sasa ndiyo pumzi ikakatika kabisa. Yanga ikapigwa 1-0 na Mtibwa, ikaenda kwa Mwadui Shinyanga wakalambwa bao 1-0 wakajitutumua kwa Mbao ikashinda 1-0 kabla ya kupapasana na Ruvu Shooting na kutoka sare ya 2-2.

Yanga imekata pumzi kabisa na leo inamalizana na Azam katika mchezo wa Ligi Kuu kuanzia saa 2:00 usiku kwenye Uwanja wa Taifa.

Yanga ikipoteza ubingwa, hesabu sasa zinahamia kwa timu zinazoshuka. Hesabu ni zilezile kama ilivyokuwa kwa Simba.

Hapa mchezo uko kwa Majimaji na Ndanda. Majimaji ina pointi 24 wakati Ndanda ina pointi 26. Njombe mji tayari wao chali.

Simba ikiifunga Majimaji itakuwa imeipeleka shimoni moja kwa moja lakini endapo Majimaji itashinda, itakuwa ikiombea Ndanda ifungwe na Stand na yenyewe kubakia Ligi Kuu na Ndanda kuaga.

Salama ya Ndanda ni kushinda mchezo wake kwani matokeo yoyote ya Majimaji hayawezi kuwaathiri kwani watakuwa na pointi 29 ambazo Majimaji hawezi kuzifikia. Tusubiri baada ya dakika 90 wa kuungana na Njombe Mji.

Monday, May 28, 2018

Ligi Kuu katika namba

 

By Charles Abel,Mwananchi cabel@mwananchi.co.tz

Pazia la Ligi Kuu Tanzania Bara linafungwa rasmi leo na jumla ya mechi nane zitachezwa kwenye viwanja mbalimbali kuhitimisha ligi hiyo huku Simba ikiwa ilishatwaa ubingwa ikiwa na pointi 65 tu wakati Njombe Mji yenyewe imeshashuka daraja ikiwa na pointi 22.

Simba watakuwa uwanja wa Majimaji kucheza na wenyeji Majimaji FC, Azam itacheza na Yanga kwenye Uwanja wa Taifa jijini, Mtibwa na Mbeya City (Manungu Complex), Ndanda itaialika Stand United (Nangwanda Sijaona) wakati Lipuli itacheza na Kager Sugar kwenye uwanja wa Samora.

Mechi nyingine ni kati ya Njombe Mji na Mwadui, Mbao na Ruvu Shooting wakati Prisons itakuwa nyumbani kuwakaribisha Singida United.

Kuna usemi unaosema ‘namba hazidanganyi’ na kwa kuzingatia hilo, makala hii inakuletea uhusiano baina ya namba tofauti na matukio, rekodi au takwimu mbalimbali zilizowekwa kwenye Ligi Kuu msimu huu.

04

Idadi ya washambuliaji walioweka rekodi ya kufunga mabao matatu kwenye mchezo mmoja ambao ni Obrey Chirwa wa Yanga, Emmanuel Okwi (Simba), Marcel Boniventure (Majimaji) na Shaban Iddi (Azam FC).

Lakini pia namba hiyo inasimama kama idadi kubwa ya mabao yaliyofungwa na mchezaji mmoja katika mchezo mmoja wa ligi ambapo ilikuwa ni katika mchezo qmbao Simba iliibuka na ushindi wa mabao 7-0 dhidi ya Ruvu Shooting ambapo Okwi alifunga mabao manne peke yake.

26

Jumla ya michezo mfululizo ambayo Simba iliyotwaa ubingwa ilicheza na kufunga bao kwenye Ligi Kuu msimu huu kabla ya kuja kutibuliwa na Kagera Sugar ambayo iliwadhibiti kwa kuwazuia kufumania nyavu katika mechi iliyoisha kwa bao 1-0 ambayo Simba walifungwa, Mei 19.

Lakini pia inasimama badala ya mabao 26 ambayo mshanbuliaji wa zamani wa Yanga na timu ya Taifa ‘Taifa Stars’, Mohammed Hussein aliyafunga kwenye Ligi Kuu mwaka 1999.

Mabao hayo yalimfanya aweke rekodi ya kuwa mchezaji aliyefunga idadi kubwa ya mabao ndani ya msimu mmoja wa ligi ambayo imeshindikana kuvunjwa msimu huu.

17

Viwanja vilivyotumika kwa mechi za Ligi Kuu msimu huu ambavyo ni Kaitaba, Kambarage, Mwadui Complex, CCM Kirumba, Namfua, Jamhuri Dodoma, Jamhuri Morogoro, Samora, Sokoine, Sabasaba Njombe na Majimaji Songea.

Viwanja vingine ni Nangwanda Sijaona, Mabatini, Uhuru, Azam Complex, Taifa na Manungu Complex.

Lakini pia namba 17 inasimama kama idadi ya mabao ambayo timu ya Njombe Mji imefunga hadi sasa ikiwa ndio ya kwanza kushuka daraja.

Inakuwa ndio timu iliyofunga mabao machache zaidi kwenye Ligi Kuu msimu huu kulinganisha na nyingine.

13

Idadi ndogo kuliko zote ya wachezaji waliowahi kutumika na timu kwenye mchezo mmoja wa ligi tofauti na ile ya wachezaji 18 iliyozoeleka ambapo 11 huanza kikosi cha kwanza huku saba wakikaa benchi.

Timu iliyotumia idadi ya wachezaji 14 kwenye mchezo mmoja ni Yanga ambayo ilifanya hivyo dhidi ya Prisons, ikianzisha 11 huku kwenye benchi wakiwepo wachezaji wawili tuu.

15

Mbeya City ndio timu iliyoongoza kwa kutoka sare kwenye idadi kubwa ya mechi kulinganisha na nyingine ambapo imepata matokeo hayo katika mechi 15 ikifuatiwa na Kagera Sugar iliyotoka sare mara 13 huku Majimaji, Prisons na Mwadui zikishika nafasi ya tatu kwa kupata sare 12.

41

Mabao 41 ambayo Njombe Mji na Majimaji wamefungwa hadi sasa yamewafanya wawe timu ambazo nyavu zake zimetikiswa mara nyingi zaidi kuliko nyingine wakifuatiwa na Mwadui iliyofungwa mabao 38 huku Ruvu Shooting wakiruhusu nyavu zao kutikiswa mara 36.

07

Idadi kubwa zaidi ya mabao ambayo timu ilifungwa katika mchezo mmoja wa ligi. Ni mabao ambayo Ruvu Shooting walifungwa katika mechi ya ufunguzi wa ligi dhidi ya Simba ambapo walifungwa mabao 7-0.

06

Idadi ya mechi ambazo Yanga ilicheza mfululizo bila kuibuka na ushindi katika Ligi Kuu msimu huu ikiwa inafanya hivyo kwa mara ya kwanza.

Mechi hizo ni dhidi ya Singida United, Mbeya City, Simba, Prisons, Mtibwa na Mwadui FC.

08

Kulikuwa na makocha nane tu wazawa ambao wamesimamia mabenchi ya ufundi ya timu mbalimbali za Ligi Kuu huku waliosalia wakiwa ni raia wa kigeni

Makocha hao nane wa wazawa kati ya 16 waliofundisha timu za Ligi Kuu ni Ally Bushiri wa Njombe Mji, Zubeiry Katwila (Mtibwa Sugar), Mohammed Abdallah (Prisons), Abdulmutick Mohammed (Ruvu Shooting), Amri Said (Lipuli), Mecky Maxime (Kagera Sugar), Malale Hamsini (Ndanda FC) pamoja na Peter Mhina wa Majimaji.

01

Inawakilisha mechi ambazo Simba imepoteza katika Ligi Kuu msimu huu yakiifanya iwe timu iliyofungwa mechi chache zaidi kuliko nyingine, ikifuatiwa na Azam FC iliyopoteza mechi nne wakati Yanga ikiwa imefungwa michezo mitano.

41

Mabao ambayo ‘Utatu Mtakatifu’ wa Simba unaoundwa na Shiza Kichuya, Okwi na John Bocco umeyafunga kwenye Ligi Kuu msimu na kuwafanya wawe safu hatari zaidi kulinganisha na nyingine katika kupachika mabao.

Idadi hiyo ya mabao ambayo yamefungwa na nyota hao watatu, inazidi jumla ya mabao ambayo timu za 13 za Ligi zimefunga kila moja.

30

Inawakilisha idadi ya wachezaji ambao walitangazwa wiki iliyopita katika orodha ya awali ya nyota wanaowania tuzo ya Ligi Kuu msimu huu. Orodha hiyo ambayo ilitangazwa baada ya mapitio ya takwimu na rekodi mbalimbali yaliyofanywa na Kamati ya Tuzo za Ligi Kuu inajumuisha nyota tisa waliofanikiwa kutwaa tuzo ya mchezaji bora wa mwezi na wengine 21 ambao wameonyesha kiwango bora kwenye timu zao msimu huu.

05

Makocha watano walishindwa kuendelea kuzinoa timu ambazo walianza nazo msimu huu kutokana na sababu mbalimbali zikiwemo kutimuliwa ama sababu binafsi.

Walioshindwa kumaliza msimu ni Joseph Omog wa Simba, George Lwandamina (Yanga), Etienne Ndayiragije (Mbao FC), Aristica Cioaba (Azam FC) na Hassan Banyai (Njombe Mji).

Lakini pia inawakilisha idadi kubwa ya pointi ambayo timu moja imefanikiwa kuvuna dhidi ya vigogo vya soka nchini, Yanga na Simba.

Timu iliyofanya hivyo ni Mtibwa Sugar ambayo katika pointi 12 ambazo ilipaswa kuchukua kwenye mechi nne dhidi ya vigogo hivyo, imezoa tano huku kukiwa hakuna timu nyingine yoyote iliyoweza kufanya hivyo msimu huu.

21

Rekodi iliyowekwa na nahodha na mkongwe wa Kagera Sugar, George Kavila ya kucheza Ligi Kuu Tanzania Bara kwa muda mrefu zaidi kuliko mchezaji mwingine yeyote wa ligi hiyo msimu huu. Kavila amecheza Ligi Kuu kwa miaka 21 tangu alipoanza kucheza kwa mara ya kwanza kwenye kikosi cha Coastal Union mwaka 1997.

508

Idadi ya mabao ambayo yamefungwa na timu zote 16 zinazoshiriki Ligi Kuu kabla ya mechi za leo ambazo zitahitimisha msimu huu huku Simba ikiwa kinara wa kufumania nyavu ikifanya hivyo mara 61 ambayo ni sawa na asilimia 12 ya mabao yote yalifungwa kwenye ligi.

11

Idadi ya mechi za ushindi na sare za Singida United kabla ya mechi ya leo.

Monday, May 28, 2018

Huyu hapa mchezaji mdogo kuliko wote VPL

 

By Eliya Solomon, Mwananchi

Kiungo wa Lipuli ya Iringa, Shaaban Ada, 17, ndiye kinda aliyecheza mechi nyingi zaidi Ligi Kuu Tanzania Bara msimu huu wa 2017/18, unaomalizika leo.

Ada ambaye alizaliwa 2001 alianza kuichezea timu ya taifa chini ya miaka 17, Serengeti Boys kabla ya kujiunga na Lipuli ambayo ameichezea mechi 20 za Ligi Kuu Tanzania Bara.

Kiungo huyo, anasema kwenye mazungumzo maalumu na jarida hili la Spoti Mikiki anavutiwa na uchezaji wa Thabani Kamusoko na mara zote amekuwa akijifunza vitu vingi kutoka kwake.

“Jamaa napenda uchezaji wake, anajua kucheza kwa nafasi, huwa natumia muda wangu mwingi kumtazama, Kamusoko kwa lengo la kuchota ujuzi,” anasema kinda huyo.

Ada ambaye kwa sasa anaichezea timu ya taifa chini ya umri wa miaka 23 ‘Ngorongoro Heroes’ anasema Lipuli ndiyo timu yake ya kwanza kuichezea Ligi Kuu Tanzania Bara.

“Lipuli ilivutiwa na kiwango changu kwenye yale mashindano ya Afcon nchini Gabon, nilivyorudi fasta walinitafuta na kufanya mazungumzo ya kujiunga nao, watu wangu wa karibu walinishauri kwa umri wangu kuwa niende huko ili niwe na muda mwingi wa kucheza.

“Isingekuwa rahisi kupata nafasi ya kucheza mara kwa mara kwenye vikosi vya Simba na Yanga kama ningeamua kujiunga nao, nashukuru sana benchi langu la ufundi la Lipuli kwa kuniamini na kunipa nafasi ya kuonyesha uwezo wangu,” anasema Ada.

Ada anasema msingi wa mpira wake ulianzia Uswahilini kabla ya kujiunga na kituo cha Karume ambacho mara nyingi kilikuwa na program mbalimbali za vijana nyakati za asuhubi hasa mwishoni mwa juma.

“Buruguni kulikuwa na timu inaitwa Barcelona, hiyo ndio niliyoanza nayo nikiwa mdogo kabisa na kabla sijajiunga na Serengeti Boys nilipitia pale JMK Park baada ya Karume,” anasema.

Mwisho kabisa, Ada anasema pamoja na changamoto zilizopo kwenye soka ndoto yake ni kucheza soka la kulipwa barani Ulaya.

Monday, May 28, 2018

Hebu sikia maneno ya hawa manahodha

 

By Olipa Assa, Mwananchi

John Bocco-Simba

Msimu huu ulikuwa wa mafanikio ya hali ya juu kwa upande wetu, na kikubwa ni kutokana na umoja kuanzia kwa viongozi, wachezaji, makocha na mashabiki kwa ujumla.

“Ukweli ni kwamba ligi ilikuwa ngumu, kila timu ilikuwa inahitaji kufikia malengo, na ninaamini sisi tumebebwa na usajili wa maana na umoja wa kuwa kitu kimoja, kama nahodha nawapongeza mashabiki kwa kuwa na timu kipindi chote.”

Ally Sonso-Lipuli

Ugumu wa ligi umetufikisha hapa, sisi kama Lipuli tumejifunza lakini tunajivunia kubaki kwenye Ligi Kuu na kwamba licha ya kuwa wageni lakini tulipambana.

Mwisho wa ligi hii ni mwanzo wa msimu mpya, kwangu mimi ninaamini tumepata funzo kujua jinsi ambavyo tunatakiwa kujipanga na kujiandaa kwa kushindania taji na sio kushuka daraja kama tulivyokuwa mzunguko wa kwanza.

Himid Mao-Azam FC

Haukuwa msimu mzuri kwetu na kwani tumekosa taji la ligi na FA.

Lengo letu kwa msimu huu ilikuwa ni kuweka historia ya kuchukua mataji yote mawili, lakini kwa bahati mbaya haijawa hivyo na ndio maana nasema kwa upande wetu malengo hayajatimia.

Nadir Haroub ‘Cannavaro’-Yanga

Katika miaka ambayo tunatwaa ubingwa, ushindani ulikuwepo lakini si kama wa safari hii. Kila timu ilipania na hii inasaidia kuleta ushindani katika soka la Tanzania.

Ingawa kwetu tulikuwa na changamoto za hapa na pale, lakini kwa ujumla ligi ilikuwa nzuri, naamini ligi ijayo itakuwa nzuri na vijana wataonyesha uwezo wao.

Erick Mulilo-Stand United

Ushindani niliouona katika ligi ya msimu huu, ninaamini soka la Tanzania limepiga hatua ambayo itawafanya wachezaji kufika mbali zaidi kutokana na jinsi ambavyo wanajituma.

“Hakuna timu ambayo ilikuwa na uhakika wa matokeo, hilo lilifanya timu kufanya maandalizi ya nguvu ambayo yalikuwa na matunda ya ushindani uwanjani.

George Kavila-Kagera Sugar

Timu kupata udhamini umechangia kuwepo na ushindani ambao umesaidia timu kupata maandalizi ya kutosha.

“Binafsi niliupande sana ushindani uliokuwepo kwani uliibua chipukizi ambao wameonyesha viwango vya hali ya juu kama Shiza Kichuya, Shaaban Iddy Chilunda wa Azam FC na wengineo na pia ningependa uendelee zaidi na zaidi kwani itasaidia kuwa na timu ya Taifa imara.

Laurian Mpalile-Prisons

Msimu huu, wale ambao wamejipanga kucheza Ligi Kuu wamevuna mafanikio yao na zaidi ni ushindani wa kupata matokeo.

Changamoto katika kitu chochote haziwezi kukosekana, kikubwa ni kujua namna ya kuzikabili, binafsi nimepanda jinsi ligi ilivyokuwa ilifanya tucheze kwa kujituma na kujiandaa vema japo mambo hayakuwa mazuri sana.

Jacob Masawe- Ndanda FC

Tulicheza vyema lakini kwa sisi, migogoro waliokuwa nayo viongozi wa timu, ilituathiri kwa kiasi kikubwa na ninapongeza wachezaji kwamba wanastahili kuitwa wanaume wa nguvu kwani walistahimili kila mapito.

“Nimefurahia ushindani, timu nyingi zilifanya vizuri na umakini wa waamuzi uliongozeka tofauti na siku za nyuma. “Pia niwapongeze Simba kwa ubingwa walioupata, hii inaonyesha walikuwa na maandalizi ya kutosha kwani walipata matokeo hata mikoa ambayo awali ilikuwa na changamoto kwao.

Peter Mapunda-Majimaji

Ligi ilikuwa na changamoto kubwa, kutokana na kikosi chetu kushindwa kuwa na matokeo mazuri akiwemo na ukata ambao ulitufanya baadhi ya mambo yashindwe kufanyika kwa wakati.

“Sina budi kuwapongeza waliotwaa ubingwa Simba, soka ndivyo lilivyo wakati mwingine unalia basi kilio chako ndio kicheko kwa mwenzako, ilikuwa zamu yao Wanamsimbazi, wengine tujipange.

Monday, May 28, 2018

Tuliipenda njombe mji lakini ligi iliwakataa

 

By Thomas Ng’itu, Mwananchi

Thomas Ng’itu, Mwananchi

Masikini Njombe Mji, ndiyo basi tena. Hakuna aliyekuwa akiwapigia hesabu kama watashuka Ligi Kuu ikiwa ni msimu wa kwanza. Hakuna. Pamoja na kuanza ligi vibaya, suala la kushuka halikuwepo. Njombe walipanda pamoja na Lipuli ya Iringa na Singida United ya Singida. Wenzake wametisha kibabe katika msimamo. Kabla ya mechi za leo, Singida wako nafasi ya tano na Lipuli nafasi ya saba, mbali kabisa.

USHINDANI

Kimsingi Njombe ndiyo ilikuwa timu dhaifu katika ligi kutokana na ushindani mdogo walioutoa licha ya kuwepo pia Ndanda ya Mtwara na Majimaji ya Songea.

Msimu ujao kutakuwa na wageni wengine Alliance Fc, Biashara Utd, KMC, Coastal Union na Afrika Lyon, ambao nao wanaangaliwa kwa jicho kubwa kwamba wanakuja na kitu gani cha tofauti.

Spoti Mikiki ambayo imekuwa na ukaribu mkubwa na Ligi Kuu, limeangalia sababu kadhaa ambazo zinazifanya timu nyingi zinapanda na kushuka licha ya kwamba huwa wanatumia nguvu katika kupanda.

MAANDALIZI MABOVU

Klabu nyingi zinatumia nguvu katika kupanda lakini baada ya kupanda huwa wanasahau kufanya maandalizi muhimu ambayo yatawafanya wakomae katika Ligi Kuu. Njombe Mji ilikuwa inastahili kabisa kushuka kwasababu walikuwa hawana kikosi chochote badala yake walilkuwa wakitafuta wachezaji kwa kuwafanyisha majaribio.

Nusu ya kikosi cha Njombe kilipatikana kwa kufanyiwa mchujo wa wachezaji katika majaribio yao, hali hiyo ilienda Lipuli lakini wao walikuwa makini pia katika kusajili wachezaji kwa kutumia fungu la pesa.

Upande wa Singida wao walianza maandalizi mapema kwani walimtambulisha kocha Hans Pluijm mapema na kupokea ripoti ya aina yake wachezaji anawaowahitaji na walifanikiwa katika hilo.

Klabu ambazo zimepanda nazo bado zipo kimya katika maandalizi ya msimu ujao inawezekana hawana fungu kubwa la pesa ili kuwaweka wachezaji kambini, lakini wangeonyesha hata kwa wachezaji wenyewe ili kuwa na utayari.

MIUNDOMBINU MIBOVU

Miundombinu ni kitu muhimu sana kwa timu zinazoshiriki ligi yoyote hapa nchini, klabu vingi zinakosa sehemu ya kufanyia mazoezi (uwanja), lakini pia hata katika suala zima la usafiri.

Timu zenye usafiri wa uhakika katika Ligi Kuu ni Azam, Yanga, Singida, Simba na Mbeya City ndio wana magari ya kisasa ambayo wanaweza kuvumilia umbali wa Kilomita zozote watakazo safari.

Inaendelea UK 19.

Hawa wakina Njombe Mji, Majimaji na wengineo wao wanajivuta vuta hivyo wanajikuta wakisafiri kutoka mkoani kwao kwenda mkoa wa mbali wanatumia siku nyingi njiani, hali inayowafanya wanachoka na wakiingia uwanjani wanajikuta wanashindwa kupambana dhidi ya wenyeji wao mwisho wa siku wanapoteza.

Klabu ambazo zitakuwa wageni katika msimu ujao wanabidi walitafakari hilo kwasababu litakuwa jambo geni kwao, lakini vile vile pia hata hawa wenyeji ambao wamekuwa wakilalamikia umbali mrefu wanaokuwa wanasafiri wanabidi.

MAKUNDI (MGAWANYIKO WA VIONGOZI)

Kitu kikubwa ambacho wanatakiwa kuhakikisha kwa klabu zilizopanda Ligi Kuu msimu huu ni kuhakikisha wanakuwa pamoja bila kutengenza makundi ndani ya timu yao.

Umoja wao ndio utawasaidia kutengeneza kitu kizuri kwa kusikilizana lakini kama kukiwa na migawanyo kwa vyovyote watakuwa wakipingana katika kufanya kitu ambacho kitaleta maendeleo.

Umoja wa Amri Said na Seleman Matola ulipotaka kuvunjika ungeiweka sehemu mbaya Lipuli, lakini walikaa chini na kuona kabisa kwamba wana kila sababu ya kuendelea kukaa katika benchi pamoja na wameisadia timu yao kwa namna kubwa.

Tetesi zinasema kwamba ndani ya Njombe kulikuwa na mvurugano mkubwa viongozi kwa viongozi kuhusu wachezaji wa kucheza katika kikosi cha kwanza, kwani walijikuta wamebadilisha mpaka wachezaji waliokuwa wanacheza kwenye kikosi cha kwanza kisa tu mvutano wa wao kwa wao.

UKATA

Suala la fedha ni tatizo kwa klabu zinazoapanda Ligi Kuu kwani wanakuwa wamepambana kuja juu lakini wanakosa ufadhili wa maana katika kuendesha timu.

Klabu nyingi zinategemea pesa ya Vodacom pamoja na Azam Tv katika kuendesha timu hali ambayo wanajikuta wanakuwa wanahangaika unapomalizika mzunguko wa kwanza katika ligi.

Kikubwa timu zote ambazo zimepanda ligi kuu wanatakiwa wahakikishe wanajiimarisha katika suala zima la udhamini na kujua kabisa watakuwa wanashiriki Mashindano Ligi Kuu Bara na Fa, hivyo wawe na pesa za kutosha kuendesha timu.

Ukata ndio huchangia wanakosa pesa za kufanya usajili wa maana mwisho wa siku wanaingia katika ligi wakiwa hawana vikosi vya ushindani badala yake wanakuwa na wachezaji wa kawaida.

Hii inafanya mwisho wa siku wanashindwa kushindana na timu pinzani.

Unapokuwa na timu ya kawaida ambayo haiwezi kushindana katika mashindano zaidi ya mawili wanakuwa kama wasindikizaji tu, kikubwa timu zote zinabidi wajiandae kutafuta kampuni na kuzishawishi kuwekeza katika timu zao kwani itasaidia kuongeza nguvu ya ziada.

Monday, May 28, 2018

Hiki ndicho makocha wa kigeni walichokiona kwenye ligi yetu

 

By Eliya Solomon, Mwananchi

Jumla ya michezo 240, inatamatishwa leo kwa timu zote 16 zinazoshiriki Ligi Kuu Tanzania Bara kutupa karata zao za mwisho wa msimu wa 2017/18 kwenye viwanja nane tofauti.

Kinachowaniwa kwenye hizo mechi nane zinazochezwa leo ni kumaliza kwenye nafasi nne za juu ambazo huwa na zawadi zake pamoja na kujinasua kushuka daraja kwa Ndanda na Majimaji.

Tayari Njombe Mji wamesharejea walipotoka msimu uliopita na mchezo wao wa leo dhidi ya Mwadui wanakamilisha ratiba kwa sababu hata kama wakishinda ushindi wa aina yoyote hautoweza kuwanasua.

Pamoja na yote hayo, makocha wa Kigeni, wameongea na jarida hili na kutoa tathimini zao kuhusu msimu huu ambao umalizika lao huku Simba wakiwa mabingwa wa ligi hiyo.

Masoud Djuma

Kocha msaidizi wa Simba, Masoud Djuma mwenye uraia wa Burundi anasema licha ya kuchukua ubingwa wa Ligi Kuu Tanzania Bara kwa mara ya 19 wamekutana na upinzani wa kutosha.

“Tuliwekeza nguvu kubwa kwenye ligi kwa sababu hatukuwa na sehemu nyingine ya kupigania ubingwa ndio maana tumefanikia lakini kiujumla ushindani ulikuwa mkubwa na tulikuwa tukitumia mbinu za ziada katika michezo ya mikoani.

“Viwanja vingi vya mikoani vipo tofauti kwa hiyo hata namna ya uchezaji na kutafuta matokeo lazima ibadilike,” anasema Masoud.

Noel Mwandila

Kocha msaidizi wa Yanga, Mzambia Noel Mwandila anasema mwishoni kiwango chao kimeathiriwa na ugumu wa ratiba na ndiyo maana waliamua kutoa nafasi kwa vijana wao wengi.

“Wachezaji wetu wengi walikuwa wakisumbuliwa na majeraha na ukiangalia ugumu wa ratiba kwa kuzingatia ushiriki wetu wa mashindano ya kimataifa ilituwia vigumu kuwa kwenye kiwango chetu cha juu mwishoni mwa msimu.

“Ushindani ni mkubwa na haukuwa kwa timu kubwa pekee hadi timu ndogo zilikuwa zikicheza kwa mpangilio wa kutafuta ushindi,” anasema Mwandila.

Hans van der Pluijm

Kocha wa Singida United, Hans Van der Pluijm anasema ligi ya msimu ilikuwa nguvu na ushindani wa soka la Tanzania umeendelea kukua taratibu.

“Wakati tunajiandaa na msimu tulitarajia kukutana na upinzani wa kutosha na ndicho kilichotokea kwa uzoefu wangu soka la Tanzania linaendelea kukua kuna mambo madogo madogo ambayo kama yatafanyiwa kazi litakuwa kwa kasi zaidi,” anasema kocha huyo wa Kiholanzi.

Nsanzurwimo Ramadhani

Mmalawi Nsanzurwimo wa Mwadui anasema kama wangezembea wangejikuta wapo kwenye hatari ya kushuka daraja na kilichowasaidia ni mipango yao madhubuti ya kutaka kumaliza vizuri msimu.

“Msimu ulikuwa mgumu lakini tunashukuru Mungu kwa sababu ulitupa nguvu na uhai wa kupambana, niseme wazi kuwa mashabiki wetu wamekuwa na mchango mkubwa kwetu,” anasema kocha huyo.

Ally Bizimungu

Bizimungu wa Mwadui ya Shinyanga anasema ugumu wa ligi uliwafanya kupata sare 12 msimu huu ambao unamalizika leo huku wakicheza na Njombe Mji.

“Makosa yanapotokea hutuoa funzo kwa maana hiyo msimu ujao utakuwa wa tofauti,” anasema Mnyarwanda huyo ambaye aliwahi kuifundisha Bugesera ya nchini kwao.

Monday, May 28, 2018

Bingwa lakini hapa, shughuli waliipata hapa

 

By Charles Abel, Mwananchi

Zilipigwa hesabu nyingi tu, Simba ikishinda itakuwa hivi, Yanga akishinda zote, Simba akifungwa iko hivi, ikawa Yanga akipoteza au Simba ikipoteza Azam itakuwa hivi, lakini mwisho wa Siku Simba ikamaliza mchezo.

Lakini pamoja na kumaliza mchezo wote, safari ya ubingwa ya Simba haikuwa nyepoesi kama ambavyo mashabiki walivyokwenda uwanjani na kushangilia pointi tatu.

Simba imepitia katika kipindi cha miezi minne migumu ambayo kama timu hiyo isingekaza buti, Ubingwa wa Ligi Kuu msimu huu ingeusikia hewani.

Ilikuwa miezi ya tabu, Simba imepitia hadi ikautwaa Ubingwa wa Ligi Kuu msimu huu ambayo ni Septemba, Oktoba, Novemba na Desemba mwaka jana ambayo ilijikuta ikipambana na upinzani mkali kutoka kwa washindani wake Azam, Yanga na Mtibwa.

Katika kipindi hicho cha miezi minne, Yanga, Mtibwa na Azam FC zilionekana kula sahani moja na Simba na kufanikiwa kukaa kileleni mwa msimamo wa ligi, jambo ambalo lilipelekea iwe vigumu taswira ya timu itakayotwaa ubingwa msimu huu kutoonekana.

Simba ambayo ilianza kuongoza msimamo wa ligi mwezi Agosti, ilijikuta ikiondolewa kileleni na Mtibwa Sugar, wiki za mwanzoni mwa mwezi Septemba baada ya kutoka sare ya bila kufungana na Azam FC katika mechi ya raundi ya pili, jambo lililoipa faida timu hiyo kutoka mkoani Morogoro kuongoza baada ya kupata ushindi kwenye mechi zake mbili mfululizo.

Hata hivyo baada ya Mtibwa Sugar kuanza kutetereka mwishoni mwa mwezi Septemba, Simba ilikutana na upinzani mwingine kutoka kwa Yanga ambayo ilipata matokeo bora kwenye mechi zake ilizocheza kipindi hicho huku ikitumia vyema matokeo ya sare ambayo Simba iliyapata dhidi ya timu za Mbao na Lipuli.

Katika kipindi hicho Yanga ilikaa kileleni kwa muda lakini baadaye iliyumba na kuwaruhusu Simba wawe pointi sawa hadi mwezi Oktoba.

Simba na Yanga waliendelea kukabana koo kileleni hadi wiki za mwishoni mwa mwezi Oktoba kila moja ikiwa na pointi 15, lakini baadaye pumzi za Yanga zilikatika na kuwaacha watani wao wakiendelea kupambana.

Kukata pumzi kwa Yanga bado hakukuipa unafuu Simba kileleni mwa msimamo wa Ligi ilijikuta ikipata upinzani mpya kutoka kwa Azam FC ambayo ilisogea ghafla kileleni na kupambana jino kwa jino na Simba, vita ambayo ilidumu kwa miezi mitatu hadi Desemba.

Katika kipindi hicho, Azam na Simba zilipigana vikumbo kileleni zikiwa na pointi sawa, vita iliyoendelea hadi Deisemba lakini baada ya hapo, mambo yaligeuka kuanzia Januari hadi sasa na Wekundu wa Msimbazi walitwaa ubingwa.

Baada ya kusota kwa miezi minne ya kupigana vikumbo na Yanga, Azam na Mtibwa Sugar, Simba haikupata changamoto tena kileleni mwa msimamo wa ligi kwani kuanzia Januari hadi sasa imeongoza ligi bila kupata upinzani wowote.

Kuanzia Januari mwaka huu hadi pale ilipotangaza Ubingwa, Mei 10 baada ya washindani wao wakuu katika mbio hizo, Yanga kupokea kichapo cha mabao 2-0 kutoka kwa Prisons mkoani Mbeya, Simba ilionekana kutopata upinzani kutokana na kupata ushindi kwenye idadi kubwa ya mechi jambo lililoifanya izidi kutanua pengo la pointi baina yake na washindani wake.

Kufanya vizuri kwa Simba katika kipindi hicho kulionekana kuchangiwa kwa kiasi kikubwa na mabadiliko ya benchi la ufundi ambayo iliyafanya baada ya kuachana na kocha wake Joseph Omog mwishoni mwa mwaka jana, pale ilipotolewa na timu ya Green Warriors kwenye raundi za mwanzoni za Kombe la FA, na nafasi yake kukaimiwa na aliyekuwa msaidizi wake Masoud Djuma kutoka Burundi ambaye alikuja na mabadiliko kadhaa ya mbinu za kiufundi yaliyoonekana kuibeba timu hiyo.

Tofauti na mfumo wa 4-2-3-1 ambao Omog alikuwa anapendelea kuutumia, Djuma aliutambulisha mfumo wa 3-5-2 ambao ulizoeleka haraka huku timu hiyo ikiumudu vyema jambo lililofanya ifanye vizuri kwenye michezo yake iliyobakia.

Kama vile haitoshi, Simba iliongeza nguvu kwa mara nyingine tena baada ya kuingia mkataba na Mfaransa mwenye uzoefu wa hali ya juu wa soka la Afrika, Pierre Lechantre aliyekalia rasmi nafasi ya Omog kama kocha mkuu huku Djuma akirudishwa kwenye majukumu yake ya ukocha msaidizi, lakini pia Mfaransa huyo alikuja sambamba na kocha wa viungo, Mohammed Aymen.

Lechantre alichokifanya ni kuuboresha zaidi mfumo huo ulioanzishwa na Djuma kwa kufanya mabadiliko kadhaa ya kiuchezaji ambayo yalionekana kuiimarisha zaidi Simba hasa kwenye safu yake ya kiungo ambayo ilizidi kuwa imara kwa kumiliki mpira kwa muda mrefu na kutengeneza idadi kubwa ya nafasi za mabao ambazo ziliwasaidia kufunga idadi kubwa ya mabao ambayo yamekuwa chachu kwao kutwaa ubingwa.

Mchambuzi na Kocha wa Soka, Kennedy Mwaisabula anasema kilichochangia Simba kupata mteremko kuanzia Januari ni uelewano wa kitimu ambao walikuwa nao.

“Mwanzoni timu ziliongoza ligi kwa kupishana kwa sababu idadi kubwa ya wachezaji wa Simba walikuwa wapya hivyo bado walikuwa hawajaelewana vizuri. Lakini baadaye walizoeana na ndio kama hivyo unavyoona wamekuwa na muendelezo mzuri wa kupata matokeo.

Lakini pamoja na hilo, Simba wamekuwa na utulivu wa hali ya juu kipindi hiki jambo linalowafanya wachezaji wapate maandalizi mazuri kulinganisha na timu nyingine,” alisema Mwaisabula.

Beki wa zamani wa Simba, Boniface Pawasa alisema timu hiyo ina kundi kubwa la wachezaji waliopevuka ambao wanaweza kuipa matokeo katika nyakati ngumu.

“Kikosi cha Simba msimu huu kina wachezaji wazoefu ambao wanaifahamu vyema ligi hivyo inakuwa rahisi kwao kufahamu wafanye nini na kwa wakati gani. Ukiangalia vikosi vya timu nyingine, vina wachezaji wa kawaida ambao hawana uimara wa kuhimili vishindo vya ligi msimu mzima,” alisema Pawasa.

Monday, May 21, 2018

Ahsanteni kwa kutuamini

 

Julai 2, 2017, Kamati ya Utendaji ya klabu ya Simba, iliwateua wajumbe wa kamati hiyo, Abdallah Salim na Iddy Kajuna kuwa wasimamizi wa majukumu ya Simba.

Hatua hiyo ni baada ya Rais Evans Aveva na Makamu wake, Geofrey Nyange kushikiliwa na vyombo vya dola kwa sababu mbalimbali.

Salim amechukua nafasi hiyo ingawa Kassim Dewji ndiye alikuwa ameteuliwa, lakini alikataa kuwa hayuko tayari kutokana na majukumu yanayomkabili.

Salim maarufu ‘Try Again’ anakaimu nafasi hiyo licha ya kudaiwa kuwa Dewji amekataa kwa kuwa ana majukumu mengi ya kifamilia lakini taarifa zinaeleza, hakutaka kuanzisha migogoro kwa kuwa kuna makundi yanampinga.

“Kwanza ninawashukuru watu wote zaidi wanachama kwa kutuamini, lakini niseme kwa kifupi tu kwamba tumefanikiwa katika maeneo mbalimbali tangu tuichukue Simba na sasa mabingwa.

“Wakati tunaichukua Simba ilikuwa kipindi cha usajili, tulihangaika kuitengeneza Simba, tumefanya usajili wa wachezaji tunaoamini watatusaidia na kuipa Simba mafanikio na sasa mabingwa.

“Yako mengi ya mafanikio kwa kweli, tumefanya tamasha la Simba Day. Ilikuwa tukio la aina yake kutambulisha wachezaji wetu, tumefanya mkutano wa wananchama wa kujitambulisha lakini pia kuwaomba baraka zao kuelekea kwenye Ligi Kuu, wakatupa na mafanikio haya ni kwa ajili yao.

“Tumecheza Ngao ya Jamii, tumewafunga Yanga na tunaona ligi inamalizika na Simba kutwaa ubingwa na mechi mkononi, lakini raha zaidi kumfunga mtani.

“Yako mengi, mengi...tumefanya mabadiliko benchi la ufundi, tumebadilisha walimu sasa Simba inanolewa na Pierre Lechantre na Masudi Djuma, ilishtua mashabiki na wapenzi wa soka kumwondoa Joseph Omog na Jackson Mayanja, lakini yote ni katika kuweka sawa. Kuna mengi ya mafanikio Msimbazi.”

Monday, May 21, 2018

Icheki, hii hapa First 11 ya Wekundu wa Msimbazi

 

1- Aishi Manula

Hakuna ubishi, ndiye mchezaji aliyecheza mechi nyingi mpaka sasa katika kikosi cha kwanza cha Simba. Amecheza mechi 28 na kuruhusu nyavu zake kutikiswa mara 13. Haitashangaza mwisho wa msimu kutajwa kipa bora.

2- Shomary Kapombe

Alianzia katikati ya msimu na katika mechi yake ya kwanza dhidi ya Kagera Sugar ambayo walishinda mabao 2-0. Tangu hapo amekuwa mchezaji wa kutumainiwa kikosi cha kwanza.

3- Asante Kwasi

Simba wamemsajili katika dirisha dogo akitokea Lipuli ya Iringa. Ameongeza nguvu kwa kiasi kikubwa akifunga mabao mawili. Kikubwa ni kuwa ana namba yake kikosini.

4- Erasto Nyoni

Amesajiliwa na Simba msimu huu akitokea Azam. Amekuwa mchezaji wa kikosi cha kwanza na licha ya kucheza nafasi ya beki ameifungia timu yake mabao matatu muhimu moja dhidi ya Yanga juzi tu hapa.

5- Yusuph Mlipili

Msimu wake wa kwanza Simba, alisajiliwa akitokea Toto Africans ambayo ilishuka daraja. Hakuwa na msimu mzuri chini ya Joseph Omog, alikuwa hapati nafasi lakini kuondoka kwa kocha huyo kumemfungulia njia.

6- Jonas Mkude

Kama Mlipili, hakuwa akipangwa sana chini ya Omog, lakini tangu alipoondoka, mambo yakanyooka na amecheza mechi 20 akiwa katika kikosi cha kwanza na ndiye mhimili.

7- Nicholas Gyan

Amesajiliwa na Simba akitokea nchini Ghana mwanzo wa msimu kama fowadi, lakini tangu alipokuja kocha Pierre Lechantre amekuwa akimtumia kama mlinzi wa kulia.

8- James Kotei

Kiungo Mghana wa Simba nae aliongeza mkataba wa miaka miwili mwanzo wa msimu na ameendelea kusalia katika kikosi cha kwanza kwa kuonyesha ubora wake.

9- John Bocco

Straika aliyesajiliwa akitokea Azam msimu huu. Amekuwa na maelewano makubwa na Emmanuel Okwi na peke yake amefunga magoli 14 yaliyosaidia kuipa ubingwa.

10- Emmanuel Okwi

Kinara wa mabao katika Ligi Kuu Bara. Amefunga magoli 20 na amekuwa na mchango mkubwa katika timu na wakati mwingine akikosekana, mbele kunapwaya na iko hivyo.

11- Shiza Kichuya

Winga na kiungo wa Simba, amefunga mabao saba katika Ligi Kuu Bara anongoza kwa kutoa pasi za mwisho akiwa ametoa pasi 17 nyingi kuliko mchezaji yoyote katika Ligi.

Monday, May 21, 2018

Unaambiwa usajili wa Sh1.3bil umelipa Msimbazi

 

By Eliya Solomon, Mwananchi

Baada ya misimu minne bila kutwaa ubingwa hatimaye Simba imetawazwa ubingwa wa Ligi Kuu Tanzania Bara kwa msimu wa 2017/2018.

Ubora wa kikosi cha wekundu hao wa Msimbazi umetokana na nguvu kubwa ya fedha zilizowekezwa kwenye usajili wa kikosi chao chenye thamani ya Sh1.3bilioni.

Mwanzoni mwa msimu huu, Kaimu Mwenyekiti wa klabu hiyo, Salim Abdallah ‘Try Again’ alielezea mchakato mzima kwenye mkutano wa kawaida wa kila mwaka wa wanachama uliofanyika kwenye Ukumbi wa Kituo cha Kimataifa cha Mikutano cha Julius Nyerere (JNICC), Dar es Salaam.

Alisema kwamba wamesajili kikosi madhubuti kwa gharama kubwa, lengo likiwa ni kurejesha heshima ya klabu yao huku akitoa mchanganuo kuwa wachezaji wa kigeni pekee wamewagharimu Sh679milioni. Hapo ni kabla ya Ahsante Kwasi kusajiliwa.

Wachezaji walioigharimu Simba fedha hizo ni kipa Aishi Manula aliyesajiliwa kutoka Azam kwa lengo la kuchukua mikoba ya Daniel Agyei ambaye alionekana kutofanya vizuri na Peter Manyika ambaye naye alitimkia Singida United na Simba ilipoamua kumsajili, Emmanuel Mseja kutoka Mbao FC na kumpa mkataba wa miaka miwili ili kuziba nafasi ya Manyika.

Hata hivyo, Simba iliongeza nguvu kwenye eneo hilo kwa kumsajili kipa bora wa kombe la Cosafa 2017, Said Mohamed ‘Nduda’ aliyetokea Mtibwa Sugar.

Shomary Kapombe ambaye amehusika kwa kiasi kikubwa na mafanikio ya Simba kwa kucheza kama beki na wakati huo ni winga alitua ndani ya klabu hiyo kutoka Azam akiwa majeruhi kabla ya hali yake kutengemaa.

Usajili mwingine ambao Simba iliufanya kwenye dirisha kubwa ni kumnasa beki wa kushoto wa Mbao, Jamal Mwambeleko ambaye alitua kama msaidizi wa Mohammed Hussein ‘Tshabalala’.

Lakini mambo yaliwaendea kombo mabeki wote hao wa kushoto pale ambapo Asante Kwasi kutoka Lipuli alipotua ndani ya klabu hiyo kwenye dirisha dogo na kufiti kwenye mfumo wa kisasa wa benchi la ufundi la timu hiyo.

Kiraka Erasto Nyoni ambaye alikuwa akitizamwa kama mkongwe ambaye hatoweza purukushani na vijana alisajiliwa Simba akitokea Azam na kuingia moja kwa moja kwenye kikosi hicho kwa kucheza kama beki wa kulia na kushoto kabla ya kutumika kwenye nafasi ya beki wa kati.

Simba ilihitaji kujenga eneo lake la ulinzi ambalo liliondokewa na Abdi Banda ambaye alitimkia Afrika Kusini kwenye klabu ya Baroka inayoshiriki ligi kuu nchini humo.

Kujenga kwao eneo la ulinzi mbali na kumchukua Erasto pia ilimsajili Salum Mbonde na Ally Shomary wote kutoka Mtibwa Sugar.

Ukiachilia mbali walinzi hao wawili ambao hawajawa na msimu mzuri pia Simba ilitumia mwanya wa kushuka daraja kwa Toto Africans ya Mwanza kwa kumsajili, Yusuph Mlipili ambaye amefanya vizuri kwenye eneo la beki wa kati.

Simba walipoondokewa na mshambuliaji wao, Ibrahim Ajib kwa kuhamia Yanga, ilifanya usajili uliozua mijadala mingi nchini kwa wapenda soka kwa kumnasa, Haruna Niyonzima kutoka Yanga.

Hata hivyo, Mnyarwanda huyo alikuwa akisumbuliwa na majeraha yaliyomfanya kwenda nchini India kufanyiwa matibabu ya kawaida japo awali alitajwa kwenda na hakufanyiwa upasuaji.

Nyota mwingine ambaye Simba ilimsajili ni mshambuliaji kinda, Nicholas Gyan kutoka Ebusua Dwarfs ya Ghana ambaye alianza kwa kusuasua ndani ya kikosi hicho kabla ya kuwa mmoja wa wachezaji muhimu wa Simba msimu huu kwa kutumika kwenye nafasi tofauti.

John Bocco naye alikuwa ingizo jipya ndani ya klabu ya Simba akitokea Azam ambayo iligoma kumuongezea mkataba, kutokana na mahitaji ya wekundu hao wa msimbazi mshambuliaji huyo ameitendea haki jezi nyekundu kwa kufunga mabao 14.

Wakati Bocco akifunga idadi hiyo ya mabao pia pacha wake anayecheza naye kwenye safu ya ushambuliaji, Mganda Emmanuel Okwi ambaye na yeye alisajiliwa kipindi hicho akitokea SC Villa amefunga mabao 20 na sasa ndiyo mabingwa Bara.

Monday, May 21, 2018

Simba ilikomba pointi 20, Kanda ya Ziwa na Nyanda za Juu Kusini

 

By Olipa Assa, Mwananchi

Ni mwaka wao. Hii ndio kauli unayoweza kuwaambia Simba ambao ndoo yao ya ubingwa wamekabidhiwa juzi na Rais John Magufuli kwenye Uwanja wa Taifa jijini Dar es Salaam licha ya kupigwa bao 1-0 na Kagera.

Haikuwa rahisi miaka ya nyuma, Simba kupata mteremko katika mechi zake za mikoani hasa Kanda ya Ziwa na Nyanda za Juu Kusini.

Toto Africans iliwapa shida, kadhalika Kagera Sugar na Mbao lakini katika harakati zao za ubingwa msimu huu, mambo yalikuwa ubwete kwa sana. Simba iliingia Uwanja wa Kaitaba wakawapiga Kagera mabao 2-0 kwa mabao ya kawaida kabisa, wala hawakupata tabu licha ya wenyewe kulipa kwa 1-0.

Timu nyingine ngumu Kanda ya Ziwa ni Mbao FC, waliowafunga Yanga mabao 2-0, lakini wao walijitutumua na kutoka sare ya mabao 2-2 huku wakiipa kipigo cha mabao 5-0 Uwanja wa Taifa jijini Dar es Salaam. Simba iliibutua Stand United ‘Chama la Wana’ ambao waliwafunga mabao 2-1 katika dimba la Kambarage, na wakatoka sare ya mabao 3-3, Uwanja wa Taifa jijini Dar es Salaam.

Mabingwa hao waliwachapa Mwadui mechi zote, iliifunga mabao 3-2 Dar es Salaam na kwenye marudiano wakawapiga 2-0 huko huko Shinyanga.

Nyanda za Juu Kusini sasa. Simba ilivuna pointi sita Uwanja wa Sokoine kwa Prisons na Mbeya City, wakifungwa bao 1-0 kila mmoja, lakini katika mechi za marudiano Taifa, City iliambulia kipigo cha bao 2-0, wakati Prisons ikipigwa 3-1. Simba walikumbana na magumu kwa kutoka kwa Lipuli, huku wakivuna pointi sita za Njombe Mji, wakiwafunga 4-0 Uwanja wa Taifa na ugenini wakitoka mabao 2-0.

Simba watamaliza mchezo wao na Majimaji ya Songea ambao waliilaza 4-0 jijini Dar es Salaam.

Monday, May 21, 2018

Iliposhangaza makocha walipopishana ‘Airport’

 

By Eliya Solomon, Mwananchi

Alikuwepo kocha Dylan Kerr na Jackson Mayanja msimu wa 2015/16. Baada ya Kombe la Mapinduzi, Kerr akatimuliwa akabakia Jackson Mayanja hadi msimu wa 2016 ukamalizika.

Msimu wa 2017/18, Simba iliuanza msimu chini ya Jackson Mayanja kabla ya kuletwa Mcameroon, Joseph Omog lakini Jackson Mayanja akabakia kuwa kocha msaidizi.

Baada ya muda vuguvugu la kutimuliwa likaanza. Kila mmoja akashangaa, Jackson Mayanja akatema kibarua, ilikuwa Oktoba mwaka jana huku akidai anakwenda kuangalia familia Uganda, lakini papo hapo anapishana na Masoud Djuma aliyekuwa Rayon Sport Uwanja wa Ndege wa Kimataifa wa Julius Nyerere (JNIA). Maswali yakawa mengi, imekuwaje, ina maana mipango ilishafanyika! Mayanja hakurudi na Simba ikawa chini ya Djuma.

Mara akaletwa Pierre Lechantre, Masoud akabakia msaidizi.

Kuja kwa Lechantre ni baada ya Simba kumfungishia virago kocha wao mkuu, Omog baada ya kuvuliwa rasmi taji la FA na Green Worriors.

Lakini kabla ya Lechantre kutua, mikoba ya Omog ilibebwa na Masoud ambaye aliibadili Simba na kutumia mfumo wa kisasa, mabeki wa kati watatu, viungo watano na mastraika wawili (3-5-2).

Hata baada ya Lechantre kufika, kikosi hicho hakikuwa na mabadiliko ya uchezaji kimfumo zaidi ya maboresho machache.

Mfumo huo umeifanya Simba kuwa na uwiano wa uchezaji kuanza nyuma hadi kwenye safu yao ya ushambuliaji na ndiyo iliyoipa ubingwa.

Monday, May 21, 2018

Ni mambo ya fedha tu pale Msimbazi

 

By Charles Abel,Mwananchi cabel@mwananchi.co.tz

Achana na asilimia za posho baada ya kushinda, achana na mishahara, unaambiwa Msimbazi wachezaji walikuwa wakiogelea noti ile mbaya msimu huu.

Kuna wale wanaocheza kila mmoja alilamba Sh300,000, waliovaa tu Sh200,000 na kuna wasiocheza wale nao walikula kilo na nusu.

Ndivyo unavyoweza kusema kwa jinsi nguvu ya fedha ilivyoipa jeuri Simba kuvunja unyonge wa kucheza misimu mitano mfululizo pasipo kunusa harufu ya ubingwa wa Ligi Kuu

Hakuna namna unayoweza kutenganisha mafanikio ambayo Simba imeyapata kwenye Ligi Kuu msimu huu kwa kutwaa ubingwa na nguvu kubwa ya kiuchumi waliyokuwa nayo kulinganisha na timu nyingine.

Simba ilikuwa imara kifedha jambo lililowasukuma wafanye usajili mzuri ulioipa kikosi chenye ubora msimu huu. Maandalizi ya kutosha kabla ya kuanza kwa msimu lakini pia timu ilipata huduma zote muhimu kama mishahara na posho, matibabu, kambi pamoja na usafiri kwa wakati na zinazokidhi viwango.

Kaimu Rais wa Simba katika moja ya mahojiano na Spoti Mikiki alisema wachezaji Simba hakuna mwenye deni na klabu.

Hata hivyo, fedha hizo ambazo zimechangia kwa kiasi kikubwa Simba kutwaa ubingwa wa Ligi Kuu msimu huu, hazikuokotwa barabarani bali zimetokana na nguvu ya ushawishi ambayo uongozi wa klabu hiyo ulikuwa nao kwa wadhamini na wafadhili.

Makala hii inakuletea wanaoipa Simba jeuri ya fedha hata kuondolea wachezaji msongo wa mawazo.

MO Dewji

Nani asiyefahamu jinsi mfanyabiashara huyu mkubwa nchini ambaye pia ni shabiki na mwanachama wa Simba alivyorudisha heshima ya Simba msimu huu kutokana na jinsi alivyotoa fungu kubwa la fedha kuhakikisha timu hiyo inatikisa Ligi Kuu msimu huu?

Pia vyanzo vya mapato vya Simba kupitia udhamini na michango ya wadau havifiki hata asilimia 40 ya bajeti yote ambayo klabu hiyo iliweka msimu huu

Kiasi kikubwa cha fedha ambacho kilibakia ili Simba itimize bajeti yake ya Shilingi 4.7 bilioni ambayo ilitengwa kwa ajili ya msimu huu kilitolewa na Dewji ambaye alichangia zaidi ya asilimia 70 ya bajeti ya Simba.

SportPesa

Bajeti ya Simba msimu huu ilikuwa ni takribani Sh4.7 bilioni ambayo inajumuisha masuala kama usajili, kambi, mishahara na posho kwa wachezaji, maofisa wa benchi la ufundi pamoja na wafanyakazi wa klabu, huduma za matibabu pamoja na gharama za uendeshaji.

Sportpesa ni miongoni mwa wadau wakubwa waliofanikisha pakubwa Simba kutwaa ubingwa msimu huu.

Sportpesa imewapa Simba Sh 950 milioni kama fedha za udhamini ambazo ni sawa na asilimia 20 ya bajeti yote ya klabu hiyo msimu huu.

Bajeti ya usajili ya Simba msimu huu ni takribani Sh 1.2 bilioni hivyo fedha ambazo Sportpesa wanawapa ni kama zaidi ya asilimia 79 ya bajeti nzima.

Azam Media

Kampuni ya Azam Media nayo ni miongoni mwa wadau walioibeba Simba msimu huu kupitia fedha za udhamini ambazo wameipa kama malipo ya haki za matangazo ya televisheni.

Azam Media wameipatia Simba takribani Sh 499 milioni ambazo ni malipo ya haki za matangazo ya Ligi Kuu ambapo kila klabu inapewa kiasi cha Sh 184 milioni lakini pia Sh 315 milioni ambazo Simba wanapewa kwa ajili ya malipo ya kipindi cha televisheni cha Simba TV ambacho kinarushwa na Azam TV.

Vodacom

Kampuni ya mawasiliano ya Vodacom ambayo ndio mdhamini mkuu wa Ligi Kuu Tanzania Bara, yenyewe inaipatia Simba kiasi cha Sh 108 milioni ambazo pia kila timu ya Ligi Kuu hupatiwa.

Michango ya mashabiki

Pia Simba imekuwa ikipata fedha ambazo hukusanywa na mashabiki, wapenzi na wanachama wake kupitia makundi mbalimbali ya kwenye mitandao ya kijamii.

Fedha zinazotolewa na mashabiki wa Simba ni motisha ya Sh 10m na wahusika wakuu ni Simba Headquarters.

Monday, May 21, 2018

Mizuka ilipanda mashabiki mechi za mahasimu

 

By Olipa Assa, Mwananchi

KILA linapofika pambano la mahasimu, mizuka ya mashabiki hupanda. Tambo za kila aina zitasikika kila mmoja akimtambia mwenzake.

Simba na Yanga zimegawanya Watanzania katika makundi mawili, yanayokinzana kishabiki na kulazimisha wengine wasipende kutumia vitu vyenye rangi za kijani au nyekundu.

Simba na Yanga, zinapokuwa zinajiandaa kukutana, kunakuwa na shamra shamra za aina yake, mfano tambo za mashabiki kila mtu akivutia ushindi kwa timu yake, zinaibua mastaa na kushusha thamani ya baadhi ya wachezaji, kambi zinakuwa na ulinzi mkali na wakati mwingine makocha, viongozi kutimuliwa.

Kambi za klabu hizo kwa msimu huu, ziliwekwa katika mkoa wa Morogoro au Pemba na Unguja, huku baadhi ya wakazi wakisimamisha shuguli zao kwa muda, ili kwenda kushuhudia jinsi ambavyo timu zao zinajifua.

Lakini kabla ya mechi, utasikia mashabiki wanapigana vikumbo kulinda uwanja usiku kucha. Hilo lkinafanyika sasa ole wako uonekane unakatiza katikati ya uwanja usiku...

Katika msimu huu Simba ndio ilionekana kujiamini zaidi kutokana na usajili walioufanya kilichofanya mashabiki wake kutamba mitaani kuona hawawezi kusumbuliwa na Yanga.

Unaweza kuona hawa wamebeba jeneza na bendera ya timu husika.

Mechi ya kwanza iliyokuwa na tambo za kutosha, hakuna aliyetoka mbabe dhidi ya mwingine, baada ya dakika 90 kuamua sare ya bao 1-1, Obrey Chirwa akiwa ameifungia Yanga kipindi cha kwanza na winga machachari wa Simba, Shiza Kichuya akijibu mapigo kipindi cha pili, hivyo mashabiki wa pande zote wakitoka roho kwatu katika dimba la Taifa jijini Dar es Salaam.

Kabla ya mechi hiyo, matokeo ya mechi zao mwisho yalifanana, Simba wakiifunga Majimaji ya Songea, mabao 4-0 Uwanja wa Taifa, huku Yanga wakiibuka kidedea katika ardhi ya Shinyanga kwa kuwashushia kipigo wenyeji wao, Stand United ‘Chama la Wana’ cha mabao 4-0.

Matokeo hayo ni kama yalijenga ujasiri kwa timu zote , kuona zipo vizuri kushindana kiuwezo na pia kuwafanya mashabiki wao kutambia, huku waliokuwa mikoani kupata ujasiri wa kutua jiji la Dar es Salaam, kushuhudia mtanange huo.

Kwa mechi ya mzunguko wa pili, Simba ilionekana kuwa imara zaidi kutokana na mfululizo wa ushindi waliokuwa wanaupata, ukiachana na mechi yao ya mwisho na Lipuli ya Iringa ambayo walitoka sare ya bao 1-1.

Mashabiki wa Yanga, hawakuwa na msisimko mkubwa wala amsha amsha, kwani ilitokana na aliyekuwa kocha wao, George Lwandamina kurejea nchini kwao Zambia na kikosi kubaki kwa makocha wasaidizi na mechi yao ya mwisho kabla ya kukutana na Simba, walicheza na Mbeya City na matokeo yake yakawa sare ya bao 1-1.

Katika mechi ya mzunguko wa pili, Simba iliibuka na ushindi wa bao 1-0 dhidi ya Yanga na kufanya kumaliza msimu kishujaa kwa kuchukua ubingwa na kuweka historia ya kuwafunga mahasimu wao Yanga.

Monday, May 21, 2018

Simba itakuwa na ratiba ngumu mechi za CAF

 

Kwa kutwaa ubingwa wa Ligi Kuu Tanzania Bara msimu huu, Simba itawakilisha Tanzania kwenye michuano ya Ligi ya Mabingwa Afrika ikiwa ndiyo michuano mikubwa kwa klabu Afrika.

Simba italazimika kwenda resi kwa kuwa michuano hiyo itaanza Desemba mwaka huu baada ya kumalizika michuano hii inayoendelea ya Ligi ya Mabingwa na Kombe la Shirikisho ambalo Yanga inashiriki.

Hatua hiyo ya Simba ni baada ya CAF kutangaza mabadiliko ya uendeshaji wa michuano ya klabu Afrika, Kombe la Shirikisho na Ligi ya Mabingwa.

CAF imefanyia mabadiliko kuanza kwa michuano hiyo ya klabu Afrika, Ligi ya Mabingwa na Kombe la Shirikisho kwamba sasa itakuwa ikianza Septemba na kumalizika Mei ya mwaka mwingine.

Taarifa ya CAF ilisema kuwa michuano ya mwaka huu ya Ligi ya Mabingwa na Kombe la Shirikisho inafanyika kama ilivyopangwa kuanzia Februari hadi Desemba na baada ya michuano hiyo, michuano mingine itaanza Desemba hiyo hiyo kumalizika Mei 2019.

Taarifa ya CAF ilisema: “Tumeifanya hivyo na michuano itaanza Desemba 2018 hadi Mei 2019 kabla ya kuanza ratiba rasmi sasa kwa mwezi Septemba 2019 hadi Mei 2020 na kuendelea,” CAF ilisema.

Kwa maana hiyo, Simba itakuwa na ratiba ngumu kuanzia Desemba kwamba kwa kuwa baada ya kuanza mechi za Ligi Kuu Agosti italazimika kusitisha baadhi ya mechi zake kwa ajili ya michuano ya kimataifa ifikapo Desemba 2018.

Mwezi huo hadi mwakani mwanzoni itakuwa na mechi za Kimataifa na Kombe la Mapinduzi.

Kwa kuwa CAF inataka mechi zake zote, Shirikisho na CAF zimalizike Mei mwakani hadi bingwa, na ni wazi kutakuwa na msongamano wa ratiba tofauti na mechi kuanza Februari hadi Desemba.

Baada ya bingwa kupatikana kwa mechi za Ligi ya Mabingwa Afrika na Kombe la Shirikisho Mei mwakani, michuano kwa ratiba ya CAF, sasa itaanza Septemba 2019 na kumalizika Mei 2020, na hiyo itakuwa mfumo mpya wa CAF.

Rais John Magufuli amewaambia Simba anataka kuona ubingwa wa Afrika ukitua Tanzania.

Monday, May 21, 2018

Mechi tano ziliwalaza Simba SC na viatu

 

By Eliya Solomon, Mwananchi

Ukisema mwaka huu ulikuwa mwepesi kwa Simba hadi kutwaa ubingwa, utakuwa umebugi. Mambo hayakuwa mepesi kihivyo.

Pamoja na Simba kutwaa ubingwa huo wa 19 ikiwa na michezo mitatu mkononi, Simba ilipambana kwa jasho na damu katika mechi hizi tano na kupata matokeo au kuambulia pointi moja.

Simba vs Mtibwa Sugar

Mechi zote za Simba na Mtibwa, ile ya Oktoba 15 mwaka jana ambayo ilimalizika kwa sare ya 1-1 na mchezo wa marudiano ambao Simba ilishinda bao 1-0 kwenye Uwanja wa Jamhuri.

Katika mchezo wa kwanza, Simba ilikiona cha moto kwa kulazimisha sare ya bao 1-1 kwenye Uwanja wa Uhuru jijini Dar es Salaam mbele ya Mtibwa Sugar ambao walionekana kuwa na msimu mzuri.

Stamili Mbonde aliifanya Mtibwa Sugar kuongoza kwenye kipindi cha kwanza, Simba ilitumia nguvu kubwa kusawazisha bao hilo ndani ya dakika tatu za nyongeza kupitia kwa Emmanuel Okwi.

Okwi alipiga mpira wa faulo nje ya 18 na kuujaza upande wa kushoto wa kipa Benedict Tinocco, ikawa ahueni ya Simba siku hiyo.

Mchezo wa pili, kama ilivyotarajiwa, ulikuwa mgumu kwa Simba ambao walicheza kwa jitihada zote kuhakikisha wanashinda. Hata walipofunga bao dakika ya 23 kupitia kwa Okwi tena, Simba hawakuwa na uhakika wa maisha kutokana na Mtibwa Sugar kuwapeleka puta na kucheza kwa tahadhari hadi dakika ya 90.

Singida United vs Simba

Pamoja na kwamba Simba ilishinda mabao 4-0 na tayari wana ubingwa, na ulikuwa mchezo wa heshima kwa Simba lakini ulikuwa mgumu kutokana na Singida kutaka kulipa kisasi na Simba kuweka heshima.

Bao la Shomari Kapombe lilitosha kuwafanya Wekundu hao wa Msimbazi kupumua na hata kuibuka na ushindi wa bao 1-0.

Simba vs Yanga

Mchezo wa duru la kwanza wa ligi ulimalizika kwa sare bao 1-1 haukuwa wa presha kutokana na mazingira ya mchezo huo.

Shughuli ilikuwa Aprili 29, mechi ya duru la pili, kulikuwa na mtifuano wa kutosha kwa timu hizo mbili. Hata hivyo Simba ilishinda kwa bao 1-0 la Erasto Nyoni, japo lilikuwa bao jepesi, lakini Simba walihangaika kiasi chake.

Simba vs Lipuli

Simba iliingia mechi na Lipuli kwa tahadhari, waliikamia na walipata pointi mbili tu , walitoka sare ya 1-1 mechi zote, Dar es Salaam na Samora mjini Iringa.

Monday, May 21, 2018

Bocco, Okwi utawaambia nini Simba?

 

By Olipa Assa,Mwananchi

Msimu uliopita wa 2016/17 ishu ilikuwa Kichuya. Kila kona Kichuya, Kichuya. Utawaambia nini Simba.

Msimu huu sasa, kila mahali John Bocco na Emmanuel Okwi. Ndiyo habari ya mjini.

Wakati wanasajiliwa Simba, unajua kila mmoja alikuwa akipondea. Bocco walisema makapi ya Azam lakini wapo waliosema Okwi mzee, Okwi mhenga, lakini wenyewe wakalifuta jina la mhenga kimyakimya.

BOCCO SI CHOCHOTE

Bocco alikataa dharau za mashabiki kisomi na kuwaonyesha kwamba kamati ya usajili chini ya Zacharia Hanspoppe, haikukosea kumleta Msimbazi baada ya kuanza kuzifumania nyavu kwa kasi na kuamua baadhi ya mechi ngumu. Bocco ana mabao 14 hadi sasa.

KAULI YA BOCCO

Alitaja vitu viwili kuhakikisha Simba inachukua ubingwa na kiatu cha ufungaji kinaenda kwa Okwi.

“Nilikuwa najitahidi kumtengenezea Okwi nafasi za kufunga nikimuona ndani ya 18, lengo nilitaka vitu viwili muhimu vitimie, ubingwa na mfungaji bora vitoke Msimbazi,” anasema.

OKWI MHENGA

Tangu Okwi aondoke Simba, msimu wa 2014/15 na kujiunga na Sønderjyske ya Sweden, Wanamsimbazi walikuwa wanatamani arejee ili aongeza nguvu baada ya kuukosa ubingwa ndani ya miaka minne mfululizo.

Okwi hakutaka kujibizana na mashabiki waliomtunga jina la mhenga, badala yake aliwaonyesha kazi iliyowafanya wanyamaze nakuendelea kumuona mfalme ndani ya kikosi hicho.

KAULI YA OKWI

Anasema kila anachokifanya ni kwa ajili ya maendeleo ya Simba na sio yeye binafsi, akisisitiza hata mabao aliyofunga yametokana na ushirikiano wa timu nzima.

“Furaha yangu ni Simba kuchukua ubingwa na sio kuonekana mimi niwe zaidi ya timu na hilo ndio kiu ya mashabiki ndani ya miaka minne,” anasema.

Monday, May 21, 2018

Hizi zilipigwa ndani-nje na Mnyama

 

By Olipa Assa, Mwananchi

ZIPO timu zilizoonja joto ya jiwe kutoka kwa Simba ilipokuwa inasaka heshima ya kutwaa ubingwa kwa msimu wa 2017/18, zilifungwa ndani na nje kwa maana ya mechi za nyumbani na ugenini.

RUVU Shooting -mabao 10

Ruvu Shooting ndiyo timu iliyochezea kipigo cha maana kutoka kwa Simba msimu huu. Itakumbukwa mzunguko wa kwanza ilifungwa 7-0 kabla ya kupigwa 3-0 marudiano.

Simba ilipata mabao yake yakifungwa na Emmanuel Okwi na John Bocco.

NJOMBE MJI-mabao 6

Njombe ilianza kucheza ugenini dhidi ya Simba, ikiwa ndio msimu wake wa kwanza ikajikuta ikiambulia kipigo cha mabao 4-0 Uwanja wa Taifa, jijini Dar es Salaam.

Kwa mechi ya mzunguko wa pili ilipunguza idadi ya mabao ya kufungwa badala ya manne, ikafungwa 2-0 na kujikuta imegawa pointi sita na jumla ya mabao sita.

PRISONS-mabao 3

Prisons ilianza kupata kipigo kwenye Uwanja wa Sokoine na Simba iliibuka na ushindi wa 1-0.

Mechi yao ya mzunguko wa pili, haikufurukuta baada ya kufungwa tena dimba la Taifa jijini Dar es Salaam mabao 2-0 na kujikuta ikigawa pointi sita.

MBEYA CITY- mabao 4

Katika mzunguko wa kwanza Simba, ilikuwa mgeni wa Mbeya City kwenye Uwanja wa Sokoine ambako waliibuka na ushindi wa bao 1-0 na baadaye kurudiana Taifa na kushinda kwa mara nyingine mabao 3-1 na kujikuta ikiachia pointi sita Msimbazi.

NDANDA FC -mabao 3

Katika Uwanja wa Nangwanda Sijaona, John Bocco aliwalazama mapema wenyeji wao kwa kuwafunga mabao 2-0 wakati katika mechi ya marudiano Dimba la Taifa jijini Dar es Salaam bado Simba ilimaliza dakika 90 kibabe kwa kuibuka na ushindi wa bao 1-0.

SINGIDA UNITED-mabao 5

Kilichowakuta Singida United, ilipokuwa imecheza na Simba Uwanja wa Taifa jijini Dar es Salaam, kiliwaacha mdomo wazi baada ya kupata kipigo cha mabao 4-0, tofauti na walivyokuwa wamefikiri kabla ya mchezo.

Badaye Simba waliifuata Singida United na kuwafunga katika Uwanja wao wa Namfua bao 1-0.

MWADUI FC Mabao 5

Mwadui ilifungwa mabao 3-2 mchezo wa kwanza kwenye Uwanja wa Taifa, lakini kwenye Uwanja wa Kambarage wakapigwa kiulaini kabisa mabao 2-0. Mchezo wa mwisho ni Simba na Majimaji mjini Songea na Simba ilishinda 4-0 Dar.

Monday, May 21, 2018

Kombinesheni za hawa usipime

 

By Thobias Sebastian, Mwananchi

Mashabiki wakiingia uwanjani, cha kwanza walikuwa wakiangalia watu watatu hasa kule mbele, Emmanuel Okwi, John Bocco na Shiza Kichuya.

Wenyewe wanajua tu kwamba nani anafanya nini na nani wa kutupia katika mazingira yapi.

Mechi ya juzi na Kagera, wapo waliooshangaa Bocco kuanzia benchi lakini ni mambo ya kocha anavyoamua. Simba ililala bao 1-0.

Okwi/Bocco

Hawa wawili waliibeba Simba kwa kiasi kikubwa. Pacha yao imeshatupia mabao 34.

Ilikuwa safu moja matata kuliko timu yoyote na kufanikisha kwa kiasi kukubwa kutwaa ubingwa.Okwi ndio kinara wa mabao amefunga 20 mpaka sasa huku Bocco akiwa wa pili na mabao 14. Ni wazi Okwi na Bocco ndizo pacha kali msimu huu zilizoibeba Simba.

Mlipili/Nyoni

Beki kiraka Erasto Nyoni ni miongoni mwa wachezaji waliotoa mchango mkubwa msimu huu.

Nyoni mwanzo wa Ligi alikuwa akicheza namba yoyote nyuma na sasa ana maelewano makubwa na chipukizi Yusuph Mlipili.

Mlipili amekuwa pacha na Nyoni katika nafasi ya ulinzi wa mabeki wa kati na kuruhusu mabao 14 likiwemo la Kagera Sugar juzi.

Monday, May 14, 2018

Stuttgart yachafua rekodi Bayern Ujerumani

 

Kocha Jupp Heynckes amemaliza vibaya mechi za Ligi Kuu Ujerumani akiwa nyumbani, licha ya kutwaa ubingwa.

Kocha huyo alishuhudia Bayern ikichapwa mabao 4-1 na VfB Stuttgart katika mchezo wa mwisho wa mashindano hayo msimu huu.

Mchezo huo ulikuwa wa kwanza kwa miamba hiyo ya soka Ujerumani kufungwa kwenye uwanja wake wa nyumbani Allianz Arena baada ya miaka miwili.

Timu hiyo ilicheza mchezo ikiwa tayari imetwaa ubingwa, lakini kipigo cha juzi usiku kimetia doa rekodi ya Bayern.

Mabao ya Daniel Ginczek (mawili) na mengine yaliyowekwa wavuni na Anastasios Donis, Chadrac Akolo yalitosha kuipa ushindi mnono Stuttgart. Bao la Bayern lilifungwa na Corentin Tolisso.

Heynckes alitangaza kustaafu na mchezo wake wa mwisho msimu huu utakuwa wa Jumamosi dhidi ya Eintracht Frankfurt. Kocha Niko Kovac anachukua nafasi yake.

Licha ya kufungwa, sherehe za klabu hiyo ziliendelea kama kawaida na wachezaji wa timu hiyo walimwagiana bia za kutosha huku kocha Heynckes akipagawa kwa furaha.

Bayern moja ya klabu kongwe duniani, ina utamaduni kwa wachezaji na benchi la ufundi kumwagiana bia uwanjani ikiwa ni sehemu ya kunogesha sherehe hizo.

Jerome Boateng, Manuel Neuer, Argen Robben na Thiago Alcantara waliwaongoza wenzao katika sherehe hizo.

Hakuna mchezaji aliyekwepa glasi ya bia, kila mchezaji alimwagiwa kichwani au sehemu ya mwili wakati wa sherehe hizo zilizofanyika uwanjani hapo.

Monday, May 14, 2018

Morocco iko katikati Kombe la Dunia 2026

 

Wasema hawapoi, Blatter aibuka aitetea kinamna Wazungu waanza zengwe Rais wa Shirikisho la Kimataifa la Soka (Fifa) Gianni Infantino amesema kuwa Fainali za Kombe la Dunia 2026 litakuwa na nchi 48 na tayari zimeshagawanywa kwenye makundi mbalimbali.

Taifa la Morocco likaseimama, linasema wanataka kuwa wa kwanza kuandaa fainali hizo.

Wakati wakisema hayo, zikaibuka Marekani, Canada na Mexico kutaka fainali hizo kwa minajili kwamba wanataka kuandaa kwa pamoja.

Lakini Rais wa zamani wa Fifa, Sepp Blatter aliibuka na kuitetea Morocco kiaina akisema kuwa Fifa hairuhusu sana nchi mbili kuwa mwenyeji wa fainali moja.

BLATTER AIBUKA

Blatter aliyeiongoza Fifa kwa miaka 17 kabla ya kuondolewa kwa kashfa ya rushwa 2015, alisema Kombe la Dunia liliwahi kuandaliwa na Korea Kusini na Japan mwaka 2002, mashindano ambayo Blatter alisema ni kama muujiza.

Alisema kama Fifa waliwahi kuzipiga chin nchi zilizoomba kwa pamoja kama Libya na Tunisia (2010), na Hispania na Ureno ziliomba pamoja kadhalika Ubelgiji na Uholanzi ziliomba Fainali za 2018, na siku zote Fifa hawazipi nafasi nchi zinazoomba kwa kushirikiana.

MSIMAMO WA MOROCCO

Morocco pamoja na kuomba na kutokuwa na uhakika wa kupata uwenyeji wa fainali hizo, wamesema kuwa hawataacha kufanya kile walichokipanga kutaka uwenyeji wa Fainali za 2026.

Morocco inayopambana na Marekani, Canada na Mexico, uamuzi wa nani atakuwa mwenyeji wa fainali hizo utafanyika Juni 13.

Mkuu wa kampeni za Morocco, Hicham El Amrani, alisema kwamba hawawezi kuishia katikati kwa kuwa walishapanga ujenzi wa miundombinu ya michezo tayari kwa Fainali za Kombe la Dunia .

“Tutaendelea na ujenzi wa miundombinu yetu kwa ajili ya taifa letu na Afrika kwa jumla na kwa ajili ya baadaye, si kwa ajili ya Kombe la Dunia pekee,” aliiambia BBC Sport.

“Tunataka kitu kimoja - kushinda, lakini hata kama hatukushinda kuwa mwenyeji, tutaona sawa lakini na sisi tunaendelea na yetu.

“Mwisho wa siku mambo yatakuwa mazuri tu, tunaamini kwa hikki kinachofanyika, baadaye Morocco itakuwa bora.”

Kati ya mambo yanayofanyiwa kazi na kuboreshwa ni pamoja na ujenzi wa barabara, majengo kurekebishwa, ujenzi wa reli ya kasi pamoja na upanuzi wa viwanja vya ndege.

Taifa hilo la Kaskazini mwa Afrika linafanyia maboresho viwanja 14 vitano kati ya hivyo vitaboreshwa na vitajengwa vingine tisa vipya.

Viwnaja sita katti ya hivyo, vitaongezwa mashabiki lakini baada ya fainali hizo, vitapunguzwa na kuwa kama ilivyo kawaida yake.

El Amrani alisema kwamba hawafikirii sana kama mataifa ya Afrika yataibeba Morocco kwa kuwa wenyewe wanafanya mambo yao wanavyojua wao.

Mataifa ya Algeria, Kenya na Gambia yametangaza kutuunga mkono wakati Afrika Kusini wameshasema hawawezi kutuunga mkono.

ZENGWE KATIBU WA FIFA

Kwa kuwa ni Mwafrika, Katibu Mkuu wa Fifa, Fatma Samoura, inaelezwa ameundiwa zengwe na tayari amepekwa kwenye Kamati ya Maadili ya Fifa.

Samoura, aliteuliwa na Rais wa Fifa, Gianni Infantino mwaka 2016, anadaiwa kuvunja sheria za utendaji kazi wake “kutoa taarifa za ndani, ushirikiano na mgongano wa kimaslahi.

Madai ya kwanza ni kwamba amekuwa akiibeba Morocco kuwa mwenyeji wa Fainali za Kombe la Dunia 2026. Taifa hilo la Kaskazini mwa Afrika linapigana vikumbo na Marekani, Canada, na Mexico.

Wajumbe wa Fifa ambao hivi karibuni walizitembelea nchini hizo zinazotaka kuwa mwenyeji kwamba kulikuwa na kauhusiano kati ya Samoura ambaye jina lake ni Fatma Samba Diouf Samoura na mchezaji wa zamani wa Liverpool El Hadji Diouf, ambaye anafanya kazi ya kuinadi Morocco kuwa mwenyeji akiwa kama balozi.

Wote kwa pamoja Samoura, 55, na Diouf wanatoka Senegal na kwamba hapa kunaingia suala la maadili.

Chanzo cha habari ndani ya Fifa kiliiambia BBC Sport madai hayo yapo na kwamba Samoura alisema kuwa anafahamu kila kitu na ameshamjua ambaye anatengeneza zengwe hilo.

Aliongeza: “Taifa zima la Senegal litacheza kusikia maadili ya Fifa kwamba kila mmoja anafahamu El Hadji Diouf huko Senagal anatoka wapi.”

Mtoa habari huyo wa ndani ya Fifa ambaye hakutaka kutajwa alisema pia kuwa Infantino alinatajwa kwenye zengwe hilo kwa kuwa aliwaambia wakaguzi kuwa waseme hasa nini kinachoifanya Morocco ishindwe kuwa mwenyeji.

Inadaiwa kwamba Infantino anataka kuingilia kati kwa kuwa anataka kulibeba taifa la Afrika kwa ajili ya kupata fedha na kwamba mataifa ya Marekani, Canada na Mexico tayari yameendelea kiuchumi.

Monday, May 14, 2018

Marcel: Niliondoka Simba nipate uzoefu

 

By Eliya Solomon, Mwananchi

Miongoni mwa washambuliaji ambao wameanza kuzungumzwa kuelekea dirisha la usajili ni Marcel Boniventure wa Majimaji mwenye mabao 13, Ligi Kuu Tanzania Bara.

Marcel ambaye amebeba matumaini ya Majimaji ya Songea kusalia Ligi Kuu Bara kutokana na uwezo wake wa kupachika mabao alizaliwa Kahama,Shinyanga miaka 24 iliyopita.

Mshambuliaji huyo ameyeweka wazi maisha yake ndani na nje ya uwanja kwenye mazungumzo na Spoti Mikiki kwa kusema Simba ndio iliyomjenga kuwa mshindani.

“Huo ni ukweli kwa sababu kabla ya kuja Majimaji nilikuwa mchezaji wa Simba, nilianzia kwenye timu ya vijana ambayo nilikaa nayo kwa mwaka mmoja na nusu.

“Nilipandishwa lakini sikuwa na nafasi ya kucheza kikosi cha kwanza ndo nikatolewa kwa mkopo kwa hiyo niseme nilikaa Simba kwa miaka miwili,” anasema Boniventure.

Mshambuliaji huyo bora wa Ligi Kuu Tanzania Bara kwa mwezi, Aprili anasema changamoto kubwa ambayo amekutana nayo kwenye uchezaji wake soka ni kutokuaminiwa. “Unakuta mtu unajituma mazoezini lakini likija suala la mechi unakosa nafasi ya kucheza, hilo nimekutana nalo sana mpaka kuja kuanza kuaminika imechukua muda,” anasema.

Pamoja na kukutana na changamoto nyingine nyingi lakini mshambuliaji huyo anasema amejiwekea melengo ya kwenda kucheza soka la kulipwa nje ya nchi.

“Tayari nina ofa, Msumbiji kwa hiyo nitaangalia na kwingine kabla ya kufanya maamuzi mwisho wa msimu,” anasema nyota huyo Majimaji. Kumbe Boniventure naye hayupo nyuma kwenye mavazi na misosi kwa kusema aina ya nguo ambazo anapenda kuvaa na vyakula ambavyo mara kadhaa vimekuwa vikimtoa udenda.

“Daaah !! Vyakula vingine vyote unaweza kuninyima na nisivimezee mate lakini wali nyama na maharage ni misosi ambayo siwezi kuichoka kula.

“Napenda kuvaa kawaidan ila kwa mpangilio, sipendi kuvaa hovyo na nimekuwa mtu wa kupangilia mawazi kutokana na maeneo husika ambayo pengine nataka kwenda.

“Lakini kiujumla huwa navaa T-shert na Jinzi kwenye mizunguko ya kawaida,” anasema mshambuliaji huyo ambaye anahusudu kucheza kikosi kimoja na Jonas Mkude wa Simba.

Monday, May 14, 2018

NGUVU MPYA KIKOSINI Makocha, wakongwe wawataja mapro zaidi ya Msuva na Samatta

 

By Eliya Solomon, Mwananchi

Uzoefu wa michezo ya kimataifa kwa wachezaji wa Kitanzania ni mwarobaini unaotajwa kuwa utaisaidia Taifa Stars kuwa moto wa kuotea mbali ndani na nje ya Afrika.

Asilimia kubwa ya vigogo ambao wanatawala kwenye soka la Afrika vikosi vyao vya timu za taifa zimeundwa na wachezaji wengi wanaocheza soka la kulipwa nje ya mataifa yao kwenye ligi zenye ushindani zaidi.

Mchambuzi wa kituo cha luninga cha Sky Sports, Thierry Henry ambaye aliwika enzi zake za uchezaji soka na klabu kama Monaco, Juventus , Arsenal na Barcelona aliwahi kutoa mtazamo wake juu ya mafanikio ya mataifa makubwa duniani.

Henry ambaye anaamini kwenye uwekezaji wa vijana anasema kuwa kujengeka kwa wachezaji hutegemea kiwango cha ushindani na idadi ya mechi wanazocheza kwa msimu mzima ni rahisi kocha kutengeneza muunganiko kwa wachezaji ambao wako tayari kiushindani.

Idadi ya nyota wa Kitanzania ambao wanacheza soka la kulipwa nje ya nchi ni kubwa kulingana wale ambao wamekuwa wakiitwa kila siku huku wengine wakionekana kufungiwa vioo.

Miongoni mwa nyota hao ni beki wa zamani wa Simba, Emily Mgeta anayechezea VFB Eppingen (Ujerumani); John Lema wa Sturm Graz (Austria), Said Muhando wa Chiasso FC (Uswisi), Maurice James wa Eletrico FC (Ureno), Ali Bwando wa Roda (Uholanzi), na Gloire Amanda anayechezea Whitecaps ya Canada.

Hao ni baadhi ya msururu wa wanasoka ambao jarida hili lina mawasiliano yao, ukiacha Mbwana Samatta aliyezoeleka, wachezaji wa Tanzania wako wengi ambao pamoja na kwamba hawaitwi, wenyewe shauku yao kubwa ni kuitumikia timu ya taifa.

Jarida hili limefanya mahojiano na nyota wa zamani wa Ligi Kuu Bara pamoja na makocha mbalimbali wamemtaka Mayanga kuendelea kutoa nafasi kwa nyota wanaocheza kwenye ligi za ushindani.

Maneno ya nyota wa zamani

Beki wa zamani wa Simba, Boniface Pawasa amesema moja ya nguzo inayoweza kutusaidia ili kuwa na nguvu ya kushindana na mataifa makubwa ni kuwaita nyota wote wa Kitanzania wanaocheza nje ya nchini.

“Kuna mataifa yanagombania wachezaji kwa hiyo inatakiwa tutambua umuhimu wao, kama tungekuwa na ligi bora na yenye ushindani ingetusaidia wachezaji wetu kujengeka.

“Lakini huko kwenye ushindani huo hatujafika bado kwa hiyo kilichopo ni kuwageukia nyota wetu ambao wanacheza nje ili kutumia uzoefu na uwezo wao wa ushindani,” anasema Pawasa.

Nyota wa zamani wa Yanga, Sekilojo Chambua amesema tunaweza kuwa taifa la ajabu kama tutashindwa kuwatumia wachezaji wetu wa Kitanzania wanaocheza nje.

“Ukifuatilia wenzetu Ghana, Mali, Tunisia, Senegal, Nigeria, Uganda na mataifa mengineyo karibu nusu wa wachezaji wao wanatoka Ulaya na wamekuwa wakiitwa mara kwa mara kwenye timu zao za taifa.

Hiyo ilimsaidia kocha wa Uganda alikuwa akiwaita na waliisaidia Uganda kucheza Fainali za Afrika baada ya muda mrefu. Mara ya mwisho ilikuwa 1978 na ikacheza fainali za mwaka jana huko Gabon japo hawakufanya vizuri sana.

“Ushauri wangu, ungetengwa mchezo hata mmoja wa kirafiki halafu wakaitwa wachezaji wote wa Kitanzania ambao sura zao ni ngeni kwetu ili watizamwe, tunaweza kupata wachezaji wa kutusaidia kwa kiwango kikubwa,” anasema Chambua.

Kiungo wa zamani wa Yanga, Ali Yusuph ‘Tigana’ anasema kuitwa kwa wingi kwa nyota wa Tanzania wanaocheza nje kutaongeza changamoto kwa wachezaji ndani.

“Kimsingi wanatakiwa kuitwa ili walisaidie taifa, lakini pia natizama kama moja ya njia ambayo itawafanya wanaocheza ndani kuona kumbe inawezekana na mwishowe wakaongeza juhudu ili wapige hatua na wao kutoka,” anasema Tigana.

Anasema kuwa inawezekana wachezaji wa Tanzania hawana moto wa kutoka nje kutokana na kwamba hakuna kinachowahamasisha. “Motisha pekee ni kama hiyo ya kuwaita wachezaji wengi wa Tanzania wanaocheza nje na tuone vitu vyao na kuwavuta wengine.

“Hata tukitumia wachezaji wa nje, kunashtua mataifa mengine. Wao wataleta wakali wao na sisi tukileta wakwetu labda tukawachanganya kidogo na wa hapa kwa kuwa na wao wana vipaji, tunaweza kufika mbali

Nyota wa zamani wa Yanga, Ally Mayay ‘Tembele’ ambaye kwa sasa ni mchambuzi wa soka anasema kuwaita ni jukumu la kocha kutokana na mipango yake.

“Hatuwezi kumpangia kocha wachezaji wa kuwaita lakini ni vyema kutoa nafasi kwa sura mpya ambazo zinaweza kusaidia pindi ambapo Samatta na Msuva wakitokea wamepata majeraha waweze kuokoa jahazi,” anasema mchambuzi huyo.

Hata hivyo, Tembele anasema mataifa mengi yamekuwa na utaratibu wa kuwaamini wachezaji wao wanaocheza soka la kulipwa kwenye ligi kubwa barani Ulaya.

Naye mshambuliaji wa zamani wa Simba na Yanga, Zamoyoni Mogella ‘Golden Boy’ametoa angalizo kwa kusema hao nyota wanaocheza nje wafuatiliwe vya kutosha.

“Sio kila mchezaji anatakiwa kucheza timu ya taifa, kuna wengine wanacheza nje ya nchi lakini unaweza ukakuta nidhamu zao ni mbovu, kiukweli wachezaji wa kimataifa tunauhitaji nao mkubwa, lakini wafuatiliwe na sidhani kama kuna utamadunia wa kufuatilia watu,” anasema mshambuliaji huyo.

Wanachosema makocha wa Ligi Kuu

Kocha wa Njombe Mji, Ally Bushiri anasema lazima tumpe muda Mayanga wa kufanikisha mipango yake na sio kumuingilia kwa kumpangia yale ambayo tunayaona kwetu ni sahihi.

“Kuwa na wachezaji wanaotoka kwenye ligi za ushindani ni faida kwenye taifa lolote lakini hutegemea sana na mipango ya kocha, unaweza kuwa na wachezaji wenye majina makubwa lakini mafanikio yasipatikane,” anasema Bushiri.

Kocha wa Tanzania Prisons, Abdallah Mohammed amesema kutoa nafasi kwa wachezaji wapya wa Tanzania ambao wanacheza kwenye ligi kubwa kunaweza kukiimarisha kikosi.

“Inaweza kuchukua muda kuelewana lakini kama wakiwa anatoa nafasi kwa mmoja baada ya mwingine mara kwa mara basi tunaweza kuwa na kikosi bora maana hao wanaocheza nje watakuwa na uwezo mkubwa wa ushindani,” anasema kocha huyo wa Tanzania Prisons.

Kocha msaidizi wa Majimaji ya Songea, Habibu Kondo anasema wachezaji wanao cheza nje wanaweza kuongeza ushindani wa namba Taifa Stars.

“Kama wapo waitwe maana wakiwepo watatufanya kuwa na machaguo mengi na hata kocha hatoumizwa kicha kama akishindwa Samatta na Msuva basi watafanya kazi wengine ambao wana uwezo kama hao,” anasema.

Kocha msaidizi wa Simba, Masoud Djuma anasema kuwa mchezaji anayecheza kwenye ligi kubwa anaweza kuwa na vitu vingi vya ziada ambavyo vinaweza kwenda na mipango ya kocha.

Naye kocha wa JKT Tanzania, Bakari Shime amesema kupata taarifa sahihi za wachezaji wanaocheza nje inaweza kuwa changamoto kwa benchi la ufundi la Taifa Stars.

“Kungekuwa na wepesi kama kocha angekuwa anahusika mwenyewe kwenye ufuatiliaji kwa maana ya kwenda viwanjani, lakini vinginevyo ni ngumu kuchukua uamuzi wa kumwita mchezaji ambaye hujamwona.

“Pengine atengewe uwezeshwaji wa kuwatembelea wachezaji hao na kuona viwango vyao pindi wanapokuwa wakicheza,” anasema kocha huyo.

Wasikie Ninje na Mayanga

Kocha wa Ngorongoro Heroes, Ammy Ninje anaamini kuwa utaratibu wa kuwa na wachezaji Taifa Stars na vikosi vingine vya vijana vinaweza kusheheni nyota wengi wa Kimataifa kutokana na ufuatiliaji unaoendelea.

“Wapo Watanzania ambao wanacheza nje ni kweli lakini asilimia kubwa wamechukua uraia wa mataifa mengine, nashirikiana na Mayanga wanaoendelea kupatikana tutawatumia.

“Binafsi nimeanza na Abdul Nasry kutoka Senegal kwenye Akademi ya Aspire, milango kwa wengine ipo wazi,” anasema Ninje.

Hata hivyo naye, Mayanga anayeinoa Taifa Stars anasema kuwa Watanzania waendelee kumpa muda kwa kuwaita mmoja mmoja nyota wenye uraia wa Tanzania ili kuona ni kwa namna gani wanaweza kuisaidia nchi.

“Mpango nilionao ni kutoa nafasi kwa wachezaji ambao wanacheza nje ya nchi lakini nafasi hiyo siwezi kutoa kwa wakati mmoja eti niwaite wote, ikumbukwe nina kazi ya kuendelea kuijenga timu.

“Nikisema nifanye hivyo imna maana nitaharibu na kazi ambayo tayari nimeianza na tumefika pazuri, wachezaji ambao nina mawasiliana nao na wanacheza nje nafuatilia maendeleo yao,” anasema kocha huyo wa zamani wa Mtibwa Sugar.

Monday, May 14, 2018

Mjukuu wa Mambosasa, anayeisubiri simu ya Mayanga

 

By Eliya Solomon, Mwananchi

Kungekuwa na usafiri wa ndege ya moja kwa moja kutoka Sweden kuja Tanzania yenye wastani wa kukimbia kwa kasi ya 560 miles kwa saa, basi ingemchukua, Adam Kasa saa nane na nusu kutua nchini.

Kasa (25) ni mchezaji wa Kitanzania anayekipiga IFK Haninge ya Daraja la Nne nchini Sweden. Kasa ni mjukuu wa kipa wa zamani wa Simba ambaye kwa sasa ni marehemu, Athumani Mambosasa.

IFK Haninge anayoichezea Kasa inaongoza msimamo wa Ligi daraja la nne nchini humo wakiwa na pointi 11 ambazo wamezivuna kwenye michezo mitano

Anachosubiri kwa sasa beki huyo wa kushoto ni simu kutoka kwa kocha wa Taifa Stars, Salum Mayanga kwa ajili ya kuichezea Tanzania kwenye michezo ya mashindano mbalimbali.

Kama kawaida ya jarida la Spoti Mikiki pekee limekuwa mstari wa mbele kuibua na kukuletea maendeleo ya wachezaji wa Kitanzania wanaocheza soka la kulipwa nje ya nchi leo limeibuka na mjukuu huyu wa kipa wa zamani wa Simba.

Akizungumzia shauku yake ya kutaka kuichezea Taifa Stars, Kasa anasema amekuwa na ndoto ya kukichezea kikosi hicho cha Mayanga kwa muda mrefu, lakini hakuwa na mawasiliano na shirikisho la mpira wa miguu Tanzania.

“Kuna muda niliwaza kujileta mwenyewe Tanzania na kujitambulisha pengine ingekuwa njia nzuri ya Watanzania kunitambua na hata viongozi wa soka nchini humo, lakini nikaona inapendeza zaidi kama kocha akikuona.

“Nimezaliwa huku na kukulia huku, Sweden lakini moyoni najiona kama bado naishi nyumbani Tanzania kutokana na mapenzi makubwa niliyonayo na nchi yangu,” anasema beki huyo wa kushoto.

Hata hivyo, Kasa anaamini hawezi kupata shida ya kuendana na staili ya uchezaji wa wachezaji wengi wa Kitanzania kutokana na mazingira ya soka aliyokulia toka akiwa mdogo.

“Nimekulia kwenye vituo vya soka na nilisaini mkataba wangu wa kwanza nikiwa na miaka 19 kwenye klabu ya Djurgårdens IF ambayo ilikuwa inashiriki Ligi Kuu Sweden kwa kipindi hicho.

“Sikuwahi kucheza kikosi cha kwanza na badala yake walinitoa kwa mkopo na kwenda IK Frej ambayo ilikuwa inashiriki Ligi Daraja la Tatu, nilicheza kwa msimu mzima.

“Baada ya msimu kumalizika na mkataba wangu na Djurgårdens IF ulimalizika niliamua kujiunga na Arameiska ambayo muda mwingine huitwa Syrianska ya daraja la nne,” anasema Kasa.

Beki huyo aliichezea Arameiska kwa nusu msimu na mkataba wake ulipomalizika akajiunga na Nacka FF pia ikiwa daraja la nne kama Arameiska.

Januari 26,2016 aliihama Nacka FF na kujiunga na Nyköping ambayo na yenyewe iliicheza kwa msimu mmoja na kujiunga na Enskede IK ambayo ilikuwa daraja moja na timu aliyotoka.

“Nimezichezea timu nyingi mpaka kufika IFK Haninge kwa hiyo kama uzoefu wa kuichezea Taifa Stars ninao wa kutosha, labla kinachoweza kuniathiri ni mazingira ambayo na yenyewe bila shaka naweza kuyazoea kwa haraka,” anasema Kasa

Beki huyo wa IFK Haninge anasema moja ya mipango yake ni kujiunga na klabu za madaraja ya juu zaidi kwa lengo la kuonyesha kipaji chake ili kupata nafasi ya kucheza nje ya taifa hilo.

“Uwezekano wa kuonekana na kupiga hatua ni mkubwa, na ninachosubiri ni msimu umalizike ili nijiunge na moja ya timu kubwa ambayo inaweza kusaidia kufanikisha malengo yangu mengine,” anasema.

Kuhusu wachezaji wengine wa Kitanzania kuingia Sweden na kucheza ligi za madaraja mbalimbali, Kasa anasema inategemea na namna watakavyoingia nchini humo.

“Wanao kuja kimatembezi au biashara na kugeukia soka ni ngumu kucheza ligi za madaraja ya juu kutokana na vipengele vyao kuwazuia, pengine uje na vielelezo vyote vya uhamisho wa Kimataifa kutoka TFF.

“Kuna Watanzania wengi ambao nafahamiana nao wanacheza ligi ambazo sio rasmi yote hiyo ni kutokana na kanuni za huku kuwazuia ,” anasema.

Mjukuu huyo wa Mambosasa ambaye alikuwa akisifika kwa uwezo wa kudaka mpira kwa mkono mmoja anasema kuwa miongoni mwa wachezaji wa Kitanzania anaowafahamu ni nahodha wa Taifa Stars, Mbwana Samatta.

Kasa anadai Samatta ambaye anacheza mpira wa kulipwa Ubelgiji kwenye klabu ya KRC Genk angefika mbali zaidi kama angepata bahati ya kuanzia soka lake nje ya nchini kutokana na kipaji alichonacho.

Monday, May 14, 2018

Yanga ilipopigwa 7-0 ndani ya siku 12

 

By Charles Abel,Mwananchi

Achana na matokeo ya jana ya Ligi Kuu Bara kati ya Mtibwa Sugar na Yanga kwenye Uwanja wa Jamhuri, Morogoro.

Yanga ilikuwa na kazi ya kumalizia viporo vyake, mechi za Ligi Kuu baada ya kuwa na majukumu ya kimataifa, michuano ya klabu Afrika.

Achana na hayo, kikubwa ni hili la Yanga kupoteza mechi tatu mfululizo, mbili za Ligi Kuu na moja ya klabu Afrika, ni kwamba kuna eneo Yanga mambo hayaendi sawasawa.

Yanga inapambana na Rayon Sports keshokutwa kwenye Uwanja wa Taifa, ikiwa ni mchezo wake wa pili wa michuano hiyo ya klabu Afrika. Yanga ina kazi kubwa ya kufanya kuhakikisha inashinda mchezo huo.

UDHAIFU

Benchi la ufundi la Yanga lina kazi ya kurekebisha udhaifu wa safu yake ya ulinzi kabla ya mchezo huo muhimu wa hatua ya makundi ya Kombe la Shirikisho Afrika.

Safu ya ulinzi ya Yanga imejikuta ikiruhusu mabao saba katika mechi tatu ilizocheza ndani ya siku 12.

Mabao hayo saba ambayo Yanga imefungwa katika mechi dhidi ya Simba, USM Alger pamoja na Prisons yameifanya timu hiyo kuandika rekodi mbovu ya kufungwa idadi kubwa zaidi ya mabao ndani ya siku chache kuliko nyakati nyingine zote tangu klabu hiyo ilipoanzishwa.

Baada ya kukosa ubingwa wa Ligi Kuu ambao umechukuliwa na Simba, mashindano pekee yaliyobaki kwa Yanga ni Kombe la Shirikisho Afrika na wamepangwa kundi D sambamba na timu za Rayon Sports, Gor Mahia na USM Alger.

Yanga inayoshika mkia kwenye Kundi D ikiwa haina pointi, inatakiwa kuibuka na ushindi dhidi ya Rayon Sports kwenye mchezo wake unaofuata kwenye kundi hilo ili ifufue matumaini ya kufuzu hatua ya robo fainali.

Hata hivyo wakati Yanga wakipewa nafasi kubwa ya kuibuka na ushindi dhidi ya Rayon, hofu kubwa kwa wawakilishi hao wa Tanzania kwenye mashindano hayo ni safu yake ya ulinzi ambayo imeruhusu idadi hiyo ya mabao saba ndani ya kipindi kisichozidi wiki mbili.

NGOME KUKOSA UMAKINI

Nuksi kwa Yanga ilianzia Aprili 29 ambapo Yanga ilipoteza kwa bao 1-0 dhidi ya Simba katika mchezo wa Ligi Kuu Tanzania Bara kipigo ambacho sio tu kiliwaongeza kasi wapinzani wao kwenye mbio za ubingwa bali pia kilihitimisha rekodi nzuri ambayo Yanga walikuwa nayo ya kufunga bao katika mechi tano mfululizo dhidi ya Simba kwenye Ligi Kuu.

Baada ya kupoteza dhidi ya Simba, safu ya ulinzi ya Yanga iliendelea kuonyesha udhaifu wake baada ya kuruhusu nyavu zake kutikiswa mara nne katika mchezo wa ugenini wa Kombe la Shirikisho dhidi ya USM Alger uliochezwa Jumapili iliyopita ambapo ilifungwa mabao 4-0.

Siku nne baada ya mchezo dhidi ya USM Algers, safu ya ulinzi ya Yanga ilijikuta inaendeleza unyonge wake baada ya timu hiyo kufungwa mabao 2-0 dhidi ya Prisons katika mchezo wa Ligi Kuu uliochezwa juzi, Mei 10.

WASHAMBULIAJI YANGA

Wakati safu ya ulinzi ya Yanga ikionekana kushindwa kuhimili vishindo vya timu pinzani, ile ya ushambuliaji nayo imeweka rekodi mbovu ya kucheza mechi tatu mfululizo bila kufunga bao.

Kukosekana kwa wachezaji wake kama Ibrahim Ajib, Obrey Chirwa, Amiss Tambwe na Donald Ngoma ambao walisajili mahsusi kwa ajili ya kutupia, kumesababisha timu hiyo kuwategemea wachezaji wasiokuwa na uzoefu sana, Pius Buswita, Yusuf Mhilu ambao hawana uzoefu wa kutosha na mikikimikiki ya Ligi Kuu na mechi za kimataifa. Ushindi dhidi ya Rayon Sports utaiondoa Yanga mkiani mwa Kundi D na kuisogeza ama kileleni, kwenye nafasi ya pili au ya tatu kutegemea na matokeo ya mechi kati ya Gor Mahia na USM Alger ambayo nayo itachezwa siku hiyohiyo ya Julai 19 jijini Nairobi.

Baada ya mchezo dhidi ya Rayon ambao itachezwa keshokutwa, Yanga itasubiri hadi Julai 18 ambako itakuwa Kenya kukabiliana na Gor Mahia kabla ya kurudiana nao tena jijini siku 11 baadaye.

Ikimalizana na Gor Mahia, itaendelea kubakia jijini ambako itawakaribisha USM Alger kwenye mchezo utakaochezwa Agosti 19 na baada ya hapo itaenda Rwanda kufunga hesabu dhidi ya Rayon Sports.

KAULI YA NSAJIGWA

Kocha msaidizi wa Yanga, Shadrack Nsajigwa anasema pamoja na kupoteza mechi zake hasa ya USM Alger bado wana nafasi ya kufanya vizuri kwa mechi za kimataifa.

“Yanga ilipoteza mechi zake ikiwemo kipigo kibaya cha mabao 4-0 ikiwemo ya USM Alger lakini nafasi kwetu bado ipo, tuna mechi nyingine tano za kufanya vizuri, kwa hiyo isiwe ishu sana ya kukata tamaa,” alisema alipozungumza na mtandao wa Goal.com

NYIKA AKUBALI

Mwenyekiti wa Kamati ya Mashindano, Hussein Nyika alisema kuwa Yanga kutofanya vizuri katika kipindi hiki ni kutokana na sababu mbalimbali ikiwemo kupoteza ubingwa wa Ligi Kuu.

“Tunakubali mwaka huu kiujumla si mzuri kwetu, timu haifanyi vyema sana lakini tutajipanga vizuri zaidi msimu ujao kwani asiyekubali kushindwa si mshindani,” anasema Nyuika kwa kifupi.

KESSY ALONGA

Beki wa Yanga, Hassan Kessy alisema kilichoiangusha timu yao katika kipindi cha hivi karibuni ni kuwakosa wachezaji wake tegemeo wa kikosi cha kwanza kutokana na majeruhi na matatizo mengine. Ukiondoa mechi dhidi ya Simba, hizo zilizofuata hatukuwa na kikosi kilichokamilika na hata hao waliocheza bado wengine walikuwa na majeruhi.

Mbali na hilo lakini pia kuna suala la uchovu ambao umetokana na kucheza idadi kubwa ya mechi mfululizo. Naamini tutakaa sawa na tutafanyia kazi makosa yetu na mechi dhidi ya Rayon Sports tutafanya vizuri,” anasema Kessy aliyesajiliwa Yanga akitokea Simba.

Monday, May 14, 2018

Tunawezaje kujikinga na haya maumivu ya shingo



Dk Shita Samwel

Dk Shita Samwel 

Maumivu ya shingo ni moja ya tatizo ambalo wanamichezo na watu wa kawaida limewahi kuwapata katika maisha yao ya kila siku, tatizo hilo huwa na maumivu ya wastani mpaka makali yasiyovumilika.

Shingo kwa ujumla imeundwa na pingili za vifupa vidogo vilivyoanzia katika fuvu la kichwa. Katika ya vifupa hivyo huwa na santuri plastiki (cervical disc) ambazo hukaa kati ya pingiri moja na nyingine kazi yake ni kunyonya shinikizo la uzito na kuzuia msagiko.

Vifupa, nyuzi ngumu za ligamenti na misuli ya shingo kazi yake ni kutoa msaada kwa kichwa na kuwezesha miendo mbalimbali ikiwamo pembeni na kujizungusha.

Hivyo basi hitilafu, shambulizi au majeraha yoyote yanaweza kusababisha maumivu ya shingo.

Chanzo kikubwa cha kujitokeza kwa tatizo hili ni kujeruhiwa kwa misuli ya shingo pale unapokuwa katika ulalo mbaya kama vile wakati wakulala usiku, wakati wa kucheza au mazoezi, kutumia kompyuta muda mrefu au kukaa katika viti vya katika gari, ofisini na nyumbani.

Pia tatizo hili linaweza pia likawa ni shambulizi la mifupa pingili za shingo kutokana na kutumika na kulika kwa mifupa hiyo. Kuwahi kupata ajali, magonjwa ya shingo na matatizo ya mishipa ya fahamu.

Hutokea mara chache kwa baadhi ya watu wenye dalili ya maumivu ya shingo likawa ni tatizo kubwa, mara nyingi huwa ni maumivu ya kawaida tu yanayoweza kuisha kwa siku chache.

Kwa kawaida maumivu ya kawaida ya shingo huwa yanaweza kuchukua siku 2-5 yakawapotea yenyewe. Maumivu haya huwa ni kero na yanaweza kuwa makali kwa sababu shingo inapitisha mamia ya mishipa ya fahamu ndio maana huwapo na hisia kali za maumivu.

Maumivu yanaweza kuwa makali kiasi cha kuingilia mwenendo wako wakawaida wa kila siku.

Yako mambo ya msingi yanayoweza kufanyika nyumbani ili kumsaidia mtu kutatua tatizo hilo au kulipunguza makali mpaka litakapoisha lenyewe.

Njia rahisi katika siku za awali unaweza kuweka barafu na kuweka kwa dakika 10-15 katika eneo lenye kuuma, barafu iwekwe ndani ya katika mfuko wa kitambaa na unaweza kurudia kadiri ya uwepo wa maumivu.

Baada ya hapo siku za mbeleni unaweza kutumia na kukanda kwa maji ya moto kwa kutumia kitambaa, au mfuko maalum wa maji moto au kuoga maji ya moto.

Si mbaya kufanya usingaji (masaji) au kuchua kwa kutumia mafuta maalum au kutumia dawa za maumivu za ute mzito za kuchua.

Mwisho unaweza kutumia dawa za kawaida za maumivu kwa ajili ya kukupa utulivu. Pata mapumziko ya kutosha na hakikisha unasitisha shughuli za kuchokoza maumivu haya.

Epuka kulalia mto mpaka upone, epuka matumizi ya vitu kama kompyuta kwani vinachangia shingo kupinda wakati wakutumia na vile vile vitu vingine vitakavyosababisha kuinamisha shingo.

Monday, May 14, 2018

Timu zetu kuna mahali zinakosea usajili wa kimataifa



Ibrahim Bakari

Ibrahim Bakari 

Nimewiwa kuzungumzia kwa mara nyingine usajili wa klabu zetu, zinazokata tiketi ya michuano ya klabu Afrika, Simba katika Ligi ya Mabingwa na Singida au Mtibwa Sugar moja itacheza Kombe la Shirikisho.

Ni wazi kuwa hakuna ubishi kwamba Simba imejifahamu na inasubiri hadi Desemba kuanza mikiki mikiki ya michuano hiyo.

Nimekuwa nikizungumzia masuala haya ya usajili wa klabu zinazotuwakilisha katika michuano ya kimataifa, lakini naona ugonjwa wa kila mwaka unajirudia.

Kila mara, baada ya ligi kumalizika, klabu mbalimbali hujipanga kufanya usajili kuziba mapengo katika timu zao na kuziboresha tayari kwa msimu ujao wa ligi na michuano ya kimataifa.

Hapa zaidi ninachotaka kusema ni hili suala la makocha kusajili wachezaji na aina ya wachezaji wa kusajiliwa kwa michezo ya kimataifa.

Kila mmoja alishuhudia Simba, Yanga na Azam zilivyoporana wachezaji wa kusajili. Nilichoka. Sitaki kuwataja wachezaji lakini hiki kinachoonekana kila mara kuporana wachezaji, hakisaidii kwa kuwa wanatakiwa wachezaji wenye uwezo.

Tusidanganyane, mafanikio katika michuano ya kimataifa lazima kuwepo na aina ya wachezaji ambao wakati mwingine hawapatikani hapa Tanzania.

Achana na wakina Emmanuel Okwi au Chirwa lakini hakuna wachezaji waliopikwa ambao wakiliona goli, wao ni kufunga kama ilivyokuwa enzi za kina Zamoyoni Mogella, Peter Tino, Makumbi Juma.

Simba na Yanga na Azam zimekalia kusajiliana, leo hawa wameizidi kete hawa, kesho wale wameizidi kete wale, basi, usajili ndiyo hivyo hivyo na ndiyo Yanga na Azam zinateseke katika ligi huku Yanga ikilia kimataifa.

Sasa, kuendelea kusajiliana wachezaji, kunyang’anyana wachezaji ili tu kuonyeshana kuzidiana kete, hakusaidii lol ote kwa timu yoyote.

Narudia kusema, ukweli timu za wenzetu zinasajili kwa malengo. Hebu angalia TP Mazembe, kwa mfano mwingine, ina wachezaji quality kutoka nchi mbalimbali za Afrika.

Hawa, wamesajili kwa malengo. Kila wanapozunguka wanaangalia wachezaji wanaodhani watawasaidia katika mashindano yao.

Ukweli unabaki palepale, timu zetu, zinasajili bila malengo. Hii iwe tahadhari kwa Simba na mwingine wa Kombe la Shirikisho atakayepatikana.

Kinachochekesha, Ok, watasema wanasajili kutoka nje, sasa angalia aina ya wachezaji wanaowasajiliwa, sasa sijui zinasajili mchangani, yaani hadi inakera.

Sababu kubwa ni kwamba wanasajili bila kuwaona. Wanasajili kwa hisia, tofauti na timu za wenzetu ambazo zikilenga mchezaji ni kweli mchezaji, tena wa timu ya taifa na wamecheza naye. Angalia wanaosajiliwa, angalia Yanga inavyotaabika na kipa wake, Youthe Rostand, hatishi kabisa. Binafsi napinga hii ya kuokota wachezaji.

Simba imetwaa ubingwa na inacheza Ligi ya Mabingwa, lazima kusajili wachezaji wanaofanana na Ligi ya Mabingwa kama alivyo Okwi na wakina James Kotei.

Wana kikosi kipana hatukatai, lakini wapo ambao wanatakiwa kutolewa kwa mkopo na kuleta majembe ya Ligi ya Mabingwa.

Pamoja na kushangilia ubingwa, kikubwa ni kutengeneza timu imara na makini kwa ajili ya Ligi ya Mabingwa.

Sitaki kusema nani hafai Simba, lakini ieleweke kuwa Ligi ya Mabingwa Afrika wanahitajika wachezaji wanaofanana na ligi hiyo.

Monday, May 14, 2018

Hakionekani kinachofanywa na maofisa michezo wetu



Allan Goshashi

Allan Goshashi 

Hivi sasa vijana wengi hawana sehemu za kufanya michezo, ila wanaona baa zimejaa mitaani kwa hiyo wanaamua kuingia baa kunywa pombe kuliko kujishughulisha na mazoezi.

Ni kweli kuna uhaba mkubwa wa viwanja vya michezo mitaani!, pia Serikali imekubali maeneo mengi ya wazi yaliyokuwa yakitumiwa na watoto na vijana kugeuzwa kuwa sehemu za biashara au makazi ya watu hivyo watoto na vijana kukosa sehemu za kufanyia mazoezi.

Mara kwa mara nimekuwa nikisema wazo la kutenga fedha na kuanzisha miradi ya michezo na utamaduni katika halmashauri zetu siyo la kupuuziwa hata kidogo, kwa sababu miradi ya michezo na utamaduni ikianzishwa na kusimamiwa ipasavyo itasaidia kutoa ajira kwa vijana wengi, itatoa burudani na itasaidia afya za wananchi wengi kwani kinga ni bora kuliko tiba.

Ndiyo, michezo siyo kwa ajili ya afya tu, ila michezo ni muhimu kwa ajili ya maendeleo kwa upana wake, yaani maendeleo kiuchumi, kiafya, kielimu vyote vinasukumwa na michezo.

Serikali kupitia halmashauri zake za Mikoa na Wilaya inatakiwa kutenga fedha za kuanzisha miradi ya michezo, ila jambo la msingi ni kwamba halmashauri zikitenga fedha kwa ajili ya miradi ya michezo na utamaduni zijitahidi kuwashirikisha wananchi katika uanzishwaji wa miradi hiyo.

Halmashauri zetu zisikae vikao vyake vya juu na kuwaanzishia wananchi miradi ya michezo na utamaduni ambayo haitawasaidia.

Naamini, wananchi wakishirikishwa katika maeneo yao wataibua miradi mizuri ya michezo na utamaduni ambayo itawasaidia kwa muda mfupi na muda mrefu.

Ukilitazama suala la michezo kwa undani hapa nchini utabaini kuna ukosefu mkubwa wa mambo ya msingi ambayo yanasababisha michezo mingi kushindwa kuendelea kwa uhakika.

Moja ya jambo la msingi linalokosekana ni viwanja vya michezo mbalimbali, viwanja vya kufanyia mazoezi, mabwawa ya kuogelea yenye viwango vya michezo ya olimpiki, majumba ya sanaa za maonyesho n.k.

Pia, kuna maeneo nchini yanatajwa kuwa ni viwanja vya michezo lakini hayana hadhi ya kuitwa viwanja vya michezo bali ni maeneo ya wazi yanayotumiwa kwa shughuli mbalimbali kama mikutano ya kisiasa, matamasha, mabonanza ya mziki, minada ya maonyesho, kuuzia mitumba, pombe na mengine yanatumika pia kama stendi ya magari.

Pia, hivi sasa unaweza kutembea umbali mrefu sehemu mbalimbali nchini usione watoto wakicheza mitaani kwa sababu kuna viwanja vichache vya michezo mitaani.

Vilevile tatizo lingine la msingi ni ukosefu wa uongozi bora wa michezo hasa katika ngazi za chini serikalini.

Mwenye kuibua, kuratibu na kusimamia miradi yote ya maendeleo katika ngazi ya Wilaya ni halmashauri. Ndiyo, Kimsingi, mamlaka pekee inayogusa maisha ya wananchi moja kwa moja katika ngazi ya Mkoa na Wilaya ni halmashauri, kwa hiyo hapo ndipo wapo viongozi wetu wa michezo na utamaduni pia.

Watanzania, tunaishi na kupata huduma kupitia halmashauri zetu ziwe za Vijiji, Mitaa, Wilaya, Miji, Manispaa na Majiji, lakini kwa muda mrefu sasa halmashauri zetu zimeshindwa kuwapa wananchi huduma bora ya michezo na utamaduni kwa sababu ya kuwa na viongozi wanaoshindwa kutimiza wajibu wao.

Ndiyo, hivi sasa Mikoa na Halmashauri zimeajiri maafisa michezo ambao kazi yao ni kusimamia na kuhamasisha michezo katika ngazi za Mikoa na Wilaya.

Hata hivyo, hatuoni chochote wanachofanya wakati katika ngazi za Mikoa na Wilaya ndiyo chimbuko la vipaji vingi vya michezo.

Utawasikia tu wanaratibu Umisseta au Umitashumta baada ya hapo ndiyo basi tena.

Monday, May 7, 2018

Kipigo chaacha majonzi Stoke City, mastaa wamwaga chozi

 

Vilio, huzuni na majonzi vimechukua nafasi kubwa kwa wachezaji wa Stoke City, baada ya timu hiyo kuporoka daraja.

Mabao mawili ya Crystal Palace yameishusha daraja timu hiyo katika Ligi Kuu England.

Kocha wa Stoke City Paul Lambert anatarajiwa kubaki katika kikosi hicho licha ya kupata matokeo mabaya msimu huu.

Mshambuliaji mrefu Peter Crouch na kipa wa Jack Butland waliongoza vilio kwa wachezaji wa timu hiyo baada ya mwamuzi Martin Atkinson kupuliza filimbi ya kumaliza mchezo.

Baada ya filimbi hiyo, wachezaji wa Stoke City walilibujikwa machozi na wengine walishindwa kutoka uwanjani mapema kabla ya kupata usaidizi kutoka kwa wenzao.

Pia mashabiki wa klabu hiyo wakiwemo watoto walishindwa kujizuia kutokwa machozi kadri dakika za mchezo huo zilivyokuwa zikiyoyoma kabla ya filimbi ya mwisho.

Stoke City ikicheza nyumbani, iliduwazwa kwa mabao yaliyofungwa na wachezaji James McArthur na Patrick van Aanholt.

Awali, Stoke City ilianza kupata bao lililofungwa na Xherdan Shaqiri, lakini timu hiyo ilishindwa kulinda ushindi wake katika mchezo huo.

Timu hiyo iliyoanzishwa miaka 155 iliyopita, haikuwa na matokeo mazuri msimu huu na imeporomoka ikiwa na pointi 30.

Ingawa Lambert atabaki Stoke City, lakini anatarajiwa kuwapoteza nyota sita wa kikosi cha kwanza ambao hawatakubali kucheza Ligi Daraja la Kwanza.

Baadhi ya nyota wanaotarajiwa kuondoka ni Joe Allen, Xherdan Shaqiri, Badou Ndiaye na Jack Butland .

Charlie Adam, Glen Johnson, Stephen Ireland na Ibrahim Afellay wanaweza kuondoka kwa kuwa walicheza kwa mkopo.

Beki Kurt Zouma anatarajiwa kurejea Chelsea baada ya kutolewa kwa mkopo na kocha Mtaliano Antonio Conte.

“Ukirejea matokeo ya mwezi Julai na Agosti, hatukuwa kwenye kiwango bora, unaposhindwa kupata ushindi katika kipindi hicho lazima utakuwa kwenye matatizo,” alisema Lambert.

Timu nyingine zilizopo kwenye janga la kucheza mchangani ni Heddersfield Town, Swansea City, Southampton, West Bromwich Albion.

Monday, May 7, 2018

Liverpool na Madrid rekodi hazifungamani

 

KILA kona ya dunia, swali liko moja, nani atatwaa ubingwa wa Ligi ya Mabingwa Ulaya? Wenye majibu rahisi wanaweza kuwa nayo.

Jibu linaweza kuwa rahisi tu, bingwa ni Liverpool au jibu linaweza kuwa bingwa ni Real Madrid.

Inawezekana mtoa majibu akawa na sababu zake. Zipo nyingi tu za kuhalalisha ubingwa wa upande mmoja, lakini mwamuzi wa bingwa ni filimbi ya mwisho ambayo mwamuzi wake atateuliwa na mwamuzi matata, Pierluigi Collina.

FAINALI YA MEI 26

Machi na masikio ya mashabiki wa soka yataelekezwa kwenye mji wa Kiev huko Ukraine kwa wababe wa soka Ulaya kuumana katika fainali.

Real Madrid, chini ya kocha wake, Zinedine Zidane ilishinda mechi zake mbili dhidi ya Tottenham na kufungwa kwenye Uwanja wa Wembley wakamaliza wa pili kwenye kundi lao. Licha ya kupoteza kwa Paris St Germain lakini wakashinda kwa jumla ya mabao 5-2 walipokwenda Bernabeu, na kuingia hatua ya 16 na kuibandua Juventus kibabe, kwa mabao ya Cristiano Ronaldo licha ya kupigwa mabao 3-1 nyumbani.

Nusu fainali, mchezo wa kwanza walishinda mabao 2-1 dhidi ya Bayern Munich na marudiano ngoma ikamalizika kwa sare ya 2-2 na kuipeleka timu hiyo kwenye fainali ya Kiev.

Liverpool sasa, yenyewe ilianza kuvuuka kwa Hoffenheim na kutoka sare mechi ya kwanza. Waliing’oa Sevilla kabla ya kuiharibu Maribor na baadaye Spartak Moscowna kuwa juu katika Kundi E. Waliitandika Porto 5-0 katika mechi za 16 Bora, na kuitoa Manchester City ikishinda mechi zote. Ikaja Roma nao wakang’oka kwa jumla ya mabao 7-6, walishinda mabao 5-2 mchezo wa kwanza kabla ya kufungwa 4-2 marudiano.

WACHEZAJI NYOTA

Kwa Real Madrid, hilo si la kuuliza. Wana nyota wao ambaye katika siku nza karibu alitwaa Tuzo ya Ballon d’or. Cristiano Ronaldo na Liverpool labda wanaweza kumpata baadaye.

Ronaldo ndiye mfungaji bora wa Ligi ya Mabingwa akiwa ameshafunga mabao 120 LIgi ya Mabingwa, ndiye mfungaji mara zote wa Real Madrid na amshatwaa mara nne vikombe vikubwa. Ronaldo, 33, ameshaifungia klabu mabao 42 msimu huu.

Huku kuna Mwarabu anaitwa Mohamed Salah. Tayari ameshavuka rekodi hiyo ya mabao. Winga huyo wa zamani wa Roma amekuwa na msimu bora pale Anfield, na kuvunja rekodi mbalimbali na amekuwa mchezaji tatu Liverpool katika historia kwa kufunga mabao zaidi ya 40 katika msimu mmoja. Kama ataweza kumfunika Ronaldo pale Kiev, anaweza kupata za maana na kutengeneza jina kubwa.

Makocha

Zidane na Jurgen Klopp wana uzoefu mkubwa wa kucheza fainali kama hizi. Zinedine Zidane ameshacheza na kutwaa ubingwa, upande wa Klopp ameshaingia fainali na kupoteza karibu zote, ikiwemo Europa League dhidi ya Sevilla kwa misimu miwili.

Taktiki

Real ilikuwa na msimu mbaya uliomalizika kwa Barcelona kutwaa ubingwa, wakati wachezaji wao bora (Gareth Bale, Karim Benzema na Ronaldo) walikuwa kamili pamoja na Luka Modric na Toni Kroos wakisimama katikati.Ni moja ya kikosi marara. Beki wa katis Sergio Ramos na Raphael Varane na viungo wakabaji Casemiro wako imara chini ya Zidane wamekuwa wakimtegemea zaidi Ronaldo kwa kuwafanyia maajabu.

Klopp hakuwa vizuri sana wala hakuwa vibaya sana, tatizo mchezaji wake, Salah aliibuka katikati ya msimu, Roberto Firmino na Sadio Mane hawakuibeba timu inavyotaka. Mzuka uliwapanda katikati ya msimu. Liverpool wanaweza kushinda kwa staili yao ya kushambulia kwa kushtukiza.

Historia

Fainali hii inazikutanisha timu zenye kujipambanua katika hali tofauti. Hakuna ubishi, Real Madrid ndiyo wenye rekodi ya maana, wametwaa ubingwa mara 12. Los Blancos wametwaa mara tano kati ya 1956 na 1960 na mwaka jana waliweka historia kwa kuwa klabu ya kwanza kutetea ubingwa wa Ligi ya Mabingwa. Ni Real na AC Milan zimetwaa mara nyingi viikombe vya Ulaya zaidi ya Liverpool. Mabingwa hao mara tano walishangaza mwaka 2005 walipoilaza AC Milan, na ikajirudia 2007. Waliwahi kuwafunga Real mwaka 1981 wakati huo, Alan Kennedy ndiye aliyeipa ushindi Liverpool.

Monday, May 7, 2018

KOMBE LA DUNIA 2018 Majeraha yalivyozima ndoto za mastaa safari ya Russia

 

Juni 14, 2018, ni takribani siku 37 zimesalia kutoka sasa kabla ya kipenga kupulizwa cha mpambano wa Russia na Saudi Arabia, mechi pekee ya ufunguzi itakayopigwa kwenye dimba la Luzhniki katikati ya jiji la Moscow.

Mashabiki wa soka, ndicho kipindi cha kushangilia timu zao pamoja na wachezaji ambao hakuna kitu wanakitilia maanani kama kucheza fainali za Kombe la Dunia.

Ni kipindi ambacho wachezaji wengi hawapendi kukikosa. Ni kama ‘picnic’ ya ushindani ambayo wachezaji wakali hukutana huko kwa ajili ya kazi moja tu, kutwaa ubingwa wa dunia.

Kuna timu zilizopitia katika majaribu mengi, ni kipindi cha kumalizia kazi lakini zipo timu zimeingia fainali hizi kiulaini, lakini watakutana na mziki wa maana, kwa timu zilizokuja kikazi zaidi.

Mkusanyiko huu wa bonanza ambao hutokea mara mmoja baada ya miaka minne, ndiyo wachezaji wanautaka. Lakini wapo ambao walipania kufika huko, lakini majeraha yamewakatili na hawawezi tena kuwemo kwenye bonanza hilo la mwezi mzima.

Lakini mtu pekee ambaye angalau anaweza kuwemo ni Neymar. Mchezaji huyo,juzi alikwenda Ufaransa kwa ajili ya kuanza mazoezi na timu yake. Aliumia tangu Februari mwaka huu na kipindi chote alikuwa akijiuguza.

Neymar alifanyiwa upasuaji mapema Machi baada ya kuvunjika mfupa wa kidole kikubwa cha mguu, metatarsal pamoja na enka alipokuwa akiitumikia timu yake ya Paris Saint-Germain.

Daktari wa timu ya taifa ya Brazil, Rodrigo Lasmar, alisema atakuwa nje ya dimba kwa miezi mitatu lakini PSG walisema anaweza kupona mapema Mei na kweli amekwenda Ufaransa. Mchezaji huyo anaweza kucheza mechi ya mwisho ya ligi Mei 19 dhidi ya Cean.

Wafuatao ni mastaa waliokatiliwa na majeraha kufika Russia kwa fainali za Kombe la Dunia 2018.

Alex Oxlade-Chamberlain (England)

Unaweza kusema ana bahati mbaya. Atakosa kuweka historia Fainali ya Ligi ya Mabingwa Ulaya na hii inayokuja ya Kombe la Dunia.

Chamberlain ni mmoja wa viungo matata wa Liverpool aliyesajiliwa kutoka Arsenal, amepata majeraha ya goti katika mchezo wa kwanza wa nusu fainali ya Ligi ya Mabingwa Ulaya dhidi ya AS Roma.

Taarifa ya klabu iliweka wazi. “Msimu wa Chamberlain umemalizika, hawezi tena kucheza.

Kwa maana hiyo, mchezaji huyo hatokuwemo kwenye kikosi cha England kitakachokwenda Russia.

Jakob Johansson (Sweden)

Kiungo wa klabu ya AEK Athens ameumia goti katika mchezo wa pili kuwania kufuzu Kombe la Dunia dhidi ya Italia.

Johansson ambaye alifunga bao la kwanza katika mchezo huo wa kwanza, ndiye aliyeibeba nchi yake lakini mwenyewe hatakuwepo kwenye fainali hizo.

Taifa hilo haliwezi kumsahau kwani bao lake ndilo lililoikatili Italia kufuzu Kombe la Dunia baada ya kipindi kirefu. Italia haikuwahi kukosa Kombe la Dunia kwa muda mrefu.

Laurent Koscielny (Ufaransa)

Kati ya wachezaji watakaokuwa wanalaani ni huyu beki wa Arsenal. Amepata maumivu ya aina mbili, kwanza timu yake imefungwa na Atletico Madrid lakini pia atakosa fainali za Russia.

Mfaransa huyu ameumia Achilles tendon mechi ya marudiano juzi tu huko Hispania. Mshambuliaji wa Atletico Madrid ambaye ni rafiki yake mkubwa, Antoine Griezmann, alionekana kuumizwa zaidi na kuumia kwa Koscielny.

Mathias Corujo (Uruguay)

Kiungo wa Penarol ambaye amepata majeraha, japo hayakuelezwa kuwa ameumia wapi, taarifa ya klabu ilisema kuwa lazima awahishwe chumba cha upasuaji kwa ajili ya kurekebisha majeraha yake.

Kwa hali hiyo, moja kwa moja, hatokuwemo kwenye kikosi cha Kombe la Dunia kule Russia.

Youssef Msakni (Tunisia)

Anachezea klabu ya Al Dhail ya Qatar. Huyu hawezi kabisa kushuka kule Russia kwa sababu maumivu yake si ya mchezo. Unajua ameumiaje, goti lake la kushoto liligeuka katika moja ya mechi ya ligi mwezi uliopita.

Si mchezaji anayefahamika sana Ulaya, lakini ni kati ya mastaa tegemeo wa Tunisia.

Zlatan Ibrahimovic (Sweden)

Amekuwa mtata katika siku za karibuni. Mshambuliaji wa Sweden mwenye heshima, lakini FA ya nchi hiyo imeshatoa taarifa kuwa hatakuwepo.

Mchezaji huyo ambaye kwa sasa anakipiga Los Angeles Galaxy, kwa muda mrefu amekuwa nje ya dimba kutokana na kuwa majeruhi na ndiyo sababu kubwa ya kupigwa chini Manchester United, hatokuwepo kwenye bonanza la Russia 2018.

Lars Stindl (Ujerumani)

Anatakiwa kufanyiwa upasuaji haraka. Hatokuwepo kwenye Fainali za Kombe la Dunia kutokana na maumivu makali ya misuli.

Pamoja na kwamba si mchezaji wa mara kwa mara kwenye kikosi cha Ujerumani, ameitwa mara zote kwenye mechi za kirafiki za Hispania na Brazil na alipocheza alionyesha soka ya hali ya juu.

Karim Benzema (Ufaransa)

Baada ya kumalizana na matatizo yaliyomkuta ya kisheria huko Ufaransa na pia kumalizana na mikwaruzo na kocha wake, Didier Deschamps, imeshawekwa wazi kwamba hatakuwemo kwenye kikosi cha Russia 2018.

Danilo Pereira (Ureno)

Danilo Pereira, mmoja wa wachezaji wenye namba zao katika kikosi cha FC Porto, atakosa mechi za Russia kutokana na kuumia achilles tendon.

Aleksandr Kokorin (Russia)

Atabakia kwenda kuangalia uwanjani akiwa na magongo yake. Ameumia goti na ameumizwa kwa ndani hiyo itamchukua muda mrefu kupona. Hatoisahau mechi ya Leipzig ambayo ndiyo iliyomsabishia yote hayo, na aliondoka Zenit bila kuwa na huduma yake.

Atakosa mechi zote za Kombe la Dunia tena akiwa nyumbani.

Zouhair Feddal (Morocco)

Feddal tayari amefanyiwa upasuaji kutokana na kuumia achilles tendon wakati wa mchezo dhidi ya Villarreal, Ligi Kuu ya Hispania.

Mchezaji huyo wa Morocco amejitathimini na mnwenyewe akasema hawezi kucheza Fainali za Kombe la Dunia na atasubiri wakati mwingine.

Marco Reus (Ujerumani)

Mshambuliaji huyo wa Borussia Dortmund, hakuwemo kwenye kikosi cha Ujerumani kilichofanya vizuri Fainali za Brazil 2014 kutokana na matatizo ya enka na fainali za Russia 2018 ni kama zimemtupa mkono.

Kwa sasa Marco Reus anapambana na hali yake kuwemo kwenye kikosi cha Joachim Low kwani amekuwa nje ya dimba kwa mwaka mzima akiuguza goti.

Santi Cazorla (Hispania)

Amefanyiwa operesheni nane ambazo zimemsababishia kupata maambukizi mengine, mchezaji huyo wa Arsenal hawezi kuwemo kwenye kikosi hicho cha Hispania.

Ana matatizo ya muda mrefu ya enka na goti na amekuwa akisumbuliwa taratibu tangu mwaka 2013.

Jerome Boateng (Ujerumani)

Kocha wa Ujerumani, atalazimika kupangua safu ya ngome baada ya kuumia kwa beki wake huyo. Boateng ameumia nyama za paja, ambazo zimemweka nje ya dimba kwa kipindi chote cha ligi.

Beki huyo wa kati wa Bayern Munich atakuwa nje ya dimba kwa wiki sita, na ni wazi hawezi kuwemo kwenye kikosi cha Ujerumani.

Fernando Gago (Argentina)

Alikuwa kwenye kikosi cha Argentina kilichomaliza wa pili Kombe la Dunia mwaka 2014 lakini uwezekano wa safari hii kuwemo kwenye kikosi cha Jorge Sampaoli kwa safari ya Russia 2018 haupo.

Mchezaji huyo wa Boca Juniors,31, kiungo wa zamani wa Real Madrid,aliumia mwishoni mwa mwaka jana na amekaa nje ya dimba hadi Aprili alipoanza mazoezi mdogomdogo.

Michy Batshuayi (Ubelgiji)

Ubelgij inakwenda Fainali za Kombe la Dunia bila mpachika mabao wake, Michy Batshuayi baada ya kuumia enka, wakati akiitumikia klabu yake ya Borussia Dortmund kwa mkopo akitokea Chelsea.

Aliumia Aprili na hakuweza kumaliza mechi za msimu na hawezi kwenda Russia lakini Dortmund imekataa kusema hawezi kucheza Kombe la Dunia.

Gylfi Sigurdsson (Iceland)

Iceland itakwenda katika fainali za Kombe la Dunia kwa mara ya kwanza katika historia, lakini itamkosa kiungo wa Everton, Gylfi Sigurdsson. Kwa mara zote, ameonyesha kiwango kwa kocha, Heimir Hallgrimsson lakini goti limemlazimisha kubakia kuzishuhudia fainali hizo kwenye televisheni.

Sigurdsson anajipa matumaini kwamba anaweza kucheza, lakini suala la goti ni kitu kingine.

Manuel Neuer (UJerumani)

Alikuwa kwenye kikosi cha Kombe la Dunia 2014 Brazil, lakini amekuwa kwenye majeraha ambayo ni wazi yatamlazimisha kulikosa Kombe la Dunia.

Aliumia metatarsal (vifupa vya vidole vya mguu) lakini Aprili akapona na kurejea uwanjani japokuwa kocha wake, Joachim Low alisema kwa jinsi kipa mwingine, Marc-Andre ter Stegen alivyoonyesha kiwango, Neuer hawezi tena kuchukua ukanda kama kipa namba moja.

Alvaro Morata (Hispania)

Kocha wa Hispania, Julen Lopetegui, atakuwa na uamuzi wa kumleta kundini mshambuliaji wa Chelsea, Alvaro Morata ambaye anasumbuliwa na maumivu ya nyama za nyuma za paja

Wengine wanaotajwa kuikosa tripu ya Russia ni pamoja na Hector Bellerin wa Hispania pamoja na beki wa kushoto wa Ufaransa, Benjamin Mendy. Pia Serge Gnabry na Emre Can.

Monday, May 7, 2018

Firmino: Mpini haupati sifa kama yalivyo makali

 

Kuna neno zuri ambalo hubeba maana kubwa kwenye tasnia yoyote ama kwenye utendaji kazi wa taasisi yoyote ile unaitwa nyuma ya pazia.

Nyuma ya pazia ni kule ambako hatukutazami kutokana na uwepo wa pazia ambalo huchukua “attention” yetu ama hukamata fikra zetu. Sifa ya mwanadamu ni kutazama kwa makini vile ving’aavyo kuliko vile visivyokuwa na mwanga.

Kwenye tasnia ya habari sifa anapewa mtangazaji kuliko mzalishaji, kwenye tasnia ya uigizaji sifa za anayeigiza kuliko anayetayarisha na hata kwenye kilimo jembe hupata sifa kubwa kuliko mpini.

Ni bahati mbaya lakini hivi vyote lazima vitokee ili shughuli ikamilike, yule anayechafuka hasemwi kuliko aliyekuwa msafi na aliyekuwa nyuma hazungumzwi kama anayekuwa mbele akitazamika.

Kwenye soka haya ni maisha ya kawaida pia na maisha yaliyozoeleka kila kukicha. Katika dunia ya Cristiano Ronaldo huwezi kumzungumza Toni Kroos, dunia ya Lionel Messi huwezi kumtaja Andres Iniesta kwa heshima anayostahili na hata katika dunia ya Pogba na Lukaku ni wazi utashangaa De Gea anaonekana anatimiza wajibu wake.

Ni jambo la kawaida na lililozoeleka kwa sasa, hata mmea unaostawi huwa tunavutiwa kwa kiasi kikubwa na maua yake, matunda yake na muonekano wake kuliko kazi kubwa iliyofanywa na mizizi ama shina kuhakikisha kuwa mti ule unakuwa imara na upo mahala pake.

Huwezi kuizungumza dunia ya soka kwa sasa pasipo kumtaja Mohamed Salah, mshambuliaji hatari zaidi kwa sasa. Binadamu pekee ambaye kila anachokunywa kina ladha ya zabibu, kila anachoshika ni dhahabu na sauti yake akizungumza inakuwa na mvuto wa chombo cha muziki ambacho bado hakijagunduliwa duniani. Yupo katika dunia ya kifikra ambayo watu wengi waliisubiri, dunia ambayo itaongezeka katika dunia mbili za Lionel Messi na Cristiano Ronaldo.

Amefunga mabao mengi zaidi ya raia yoyote wa Afrika katika msimu mmoja wa klabu bingwa Ulaya, amefunga mabao mengi zaidi kwenye msimu mmoja wa Ligi Kuu ya England.

Ametwaa kila tuzo anayotaka kuipata kwa msimu huu wa ligi na mwaka 2018 haujawa mwaka wa Jeff Bezos kutangazwa kuwa tajiri namba moja duniani bali umekuwa wa Mohamed Salah kuwa mwanadamu anayejeruhi kila lango linalopita mbele yake.

Amejenga urafiki na nyavu kuliko ngedere alivyokuwa na urafiki na miti, mabao yanafuata mkondo wa Mohamed Salah kuliko maji yanayotiririka mtoni kwenda baharini. Hakuna mwanadamu anayefanya maajabu ambayo hayakutegemewa kama Mohamed Salah kwa sasa, amegusa kila nyoyo na ameipa faraja ndani ya Anfield na mpaka kuitwa mfalme kwao Misri.

Lakini huyu anabaki kuwa kioo cha televisheni na hakuna anayetazama uchogo uliojificha, anabaki kuwa eneo limulikalo mbele kwenye kurunzi na hakuna anayejali betri zimekaa wapi. Anayo makali ya upanga kukata kilichokuwa mbele yake na wakati mwingine kuwa shoka anapokutana na vitu vigumu zaidi lakini hakuna anayejali mpini upo wapi. Anafanya madhara makubwa lakini kuna mwanaume ambaye ni muhimu zaidi ili nyumba anayoishi Mohamed Salah inayoitwa Liverpool iwe salama na inayokalika.

Huyu ndiye binadamu anayeamuru nguvu inayoweza kutumika siku hiyo kwenye kikosi cha Liverpool, anaamua kasi ya kukimbia ndani ya uwanja na anaamua kama iwe siku ya kivivu. Yeye ndio jiko ambalo linatoa pishi la Liverpool linaloitwa “Geggenpressing” mfumo maarufu unaotumika na Liverpool katika kuizingira timu pinzani ili kupokonya mipira kwa haraka. Anaitwa Roberto Firmino, Mbrazil anayefanana na wenzake katika kupenda starehe lakini akitofautiana nao katika uchapakazi.

Kwenye macho ya Brendan Rodgers, Firmino alikuwa namba 10 ambaye asingeweza kutulia kwenye mfumo wake kwa sababu eneo hilo alitaka mbwembwe za akina Coutinho na Lallana zaidi.

Bahati mbaya matokeo mabaya ya Liverpool kwa wakati huo yakasababisha Firmino awe muhanga wa kutumiwa kwenye nafasi tofauti zaidi na kila mtu akaona hii ilikuwa hasara nyingine mpaka alipofika Jurgen Klopp.

Klopp alimweka katika nafasi ambayo binadamu wengi tunaotizama soka kupitia majukwaani na kwenye luninga tulimpinga kwa nguvu. Katika dunia wanayosajiliwa akina Lukaku, Morata unamweka vipi Firmino kama mshambuliaji wa kati?

Muda hausimami na majibu yapo mbele ya macho yetu na tunaona aibu kurejea kauli zetu ili tuzifute. Aibu zaidi ni kuwa bado huyu mtu haimbwi kwa sababu ni ngumu kuupima mchango wake kwa kutumia macho peke yake tofauti na Mohamed Salah.

Kwenye Ligi Kuu ya England, Roberto Firmino amekuwa mchezaji pekee kufanya “tackles” zaidi ya 60 na kutengeneza nafasi za kufunga zaidi ya 50i.

Anafanya haya huku pia akiwa amefunga mabao kumi na tano na zaidi na akiwa ametoa pasi za mabao zaidi ya saba. Ni huyu huyu ambaye amefunga mabao 10 sawa na Mohamed Salah kwenye klabu bingwa Ulaya huku pia akiwa ametoa pasi za mabao saba, tatu zaidi ya Mohamed Salah.

Kwa lugha pana zaidi ni kuwa Roberto Firmino akiwa katika safu ya ushambuliaji kwenye ligi kuu ya England pekee ni nusu ya Mohamed Salah kwenye mabao, ni nusu ya Kevin De Bruyne kwenye kutoa pasi za mabao, ni nusu ya Wilfred Ndidi na Ng’olo Kante kwenye kukaba na nusu ya Mesut Ozil kwenye kutengeneza nafasi za kufunga. Tafsiri kamili ni kuwa kwenye mwili wa Roberto Firmino kuna nusu ya Salah, Nusu ua De Bruyne, nusu ya Kante na nusu ya Ozil kwa pamoja. Unataka nini zaidi?

Hii ndio sababu kwanini Jurgen Klopp aliwahi kuona kitu ambacho wengi hatuoni, ndio sababu kipenzi cha kwanza Klopp sio kipenzi cha kwanza cha watazamaji.

Kwenye mfumo wa Klopp, hakuwezi kuwepo kwa Liverpool inayocheza uwanjani bila Firmino, kwenye macho ya Klopp hakuna mfumo wa Liverpool bila mtu huyu na kwenye Oblongata yake Klopp hakuna balaa la ushambuliaji la Liverpool bila Firmino.

Firmino anabaki kuwa mpini unaoshikilia makali ya Liverpool, mpini ambao ndio ushikwa na kuelekeza makali yafanya lipi na kwa nguvu ipi. Lakini bahati mbaya anakuwa nyuma, nyuma kama betri zinapotoa chaji ili kurunzi (tochi) iweze kuwaka. Anafanya kazi kubwa ambayo ni ngumu kuigundua kupitia mboni za macho peke yake.

Mane alikuwa mchezaji bora msimu uliopita kwa sababu ya Firmino, Salah amekuwa hatari kuliko ilivyotegemewa kwa sababu ya Firmino na anaweza kuja mwingine akafanya makubwa kwa sababu yake huyu. Aina yake ya uchezaji inawapa nafasi kubwa wachezaji wengine kufanya mambo ya msingi tu huku barabara ngumu zote akipitia yeye. Hapewi heshima yake.

Monday, May 7, 2018

Msuva Ataka Ligi ya Mabingwa imtoe kama Samatta

 

By Eliya Solomon, Mwananchi

Mshambuliaji wa Kimataifa wa Taifa Stars, Saimon Msuva ametimiza miezi tisa sawa na siku siku 276 tangu ajiunge na Difaa El Jadida ya Morocco ambako amekuwa gumzo katika mitaa ya Jadida na Rabat.

Msuva,24, alijiunga na Difaa inayoshiriki Ligi Kuu nchini humo ambayo ni maarufu kama Batola Pro akitokea Yanga, Julai 28 mwaka jana na kusaini mkataba wa miaka mitatu.

Ndani ya miezi hiyo tisa, Msuva mwenye mabao tisa kwenye ligi ameanza kuwindwa na baadhi ya vigogo wa Morocco kama Raja Casablanca ambao aliwafunga kwenye mchezo wa duru la pili, Aprili 22, wakati Difaa ikiibuka na ushindi wa mabao 2-1.

Spoti Mikiki imefanya mazungumzo na Msuva kutoka jijini Jadida ambaye ameongelea kutimiza kwake miezi hiyo tisa, siri ya kumudu soka lao, namna alivyoweza kupambana na changamoto ya vyakula na Lugha.

“Sina mpango wa kuondoka Difaa na kujiunga na timu nyingine ya Morocco, ndoto yangu ni kucheza mpira wa kulipwa barani Ulaya, baada ya kucheza nyumbani ilibidi nije huku kwa madhumuni ya kujitengenezea njia.

“Najivunia kutimiza miezi hiyo tisa, haikuwa kazi nyepesi kuendana na soka lao, nilipofika Morocco kilikuwa ni kipindi cha maaandalizi ya msimu, nilijitahidi kuwasoma wenzangu wanavyocheza ili niendane nao,” anasema Msuva.

Mshambuliaji huyo wa zamani wa Yanga, anasema wakati anajitahidi kuendana na soka lao, walisafiri na kwenda Hispania kwa ajili ya kuweka kambi ya muda mfupi.

Wakati wakiwa Hispania kocha wa Difaa, Abderrahim Talib aliamua kumtengeneza, Msuva kwa kuanza kumtumia kama mshambuliaji na sio winga kama alivyozoeleka kucheza.

“Nilitumika Hispania kwenye mechi za kirafiki kwa kucheza kama mshambuliaji wa mwisho mara nyuma ya mshambuliaji wa mwisho, uzuri hizo hazikuwa nafasi ngeni sana kwangu kwa sababu niliwahi kuzicheza mtaani,” anasema.

Msuva mwenye sifa ya kuwa na kasi kwenye ushambuliaji wake alijikuta kwenye nafasi hiyo mpya kifunga mara kwa mara kitu kilichomstua kocha na kumweleza hakutegemea kama kwa muda mfupi angezoea namna yao ya uchezaji.

“Tuliporejea tukaanza msimu na kasi yangu ya ufungaji ambayo nilikuwa nayo kwenye michezo ya maandalizi ya msimu iliendelea kwenye Ligi na hata Kombe la Mfalme,” anasema mshambuliaji huyo. Kisaikolojia Msuva anasema alijipanga na changamoto za Morocco hasa kwenye Lugha kutokana na asilimia kubwa ya wakazi wa nchi hiyo kuongea Kiarabu na Kifaransa.

“Nilijisema kuwa safari hii kazi ninayo maana sikuwa najua Kiarabu wala Kifaransa, Kiingereza kuna mazingira kilikuwa kinanisaidia lakini kiukweli nimetumia sana lugha ya ishara ili kuelewana na wachezaji wenzangu.

“Tukiwa uwanjani hutupishani kwa sababu soka ni mchezo wa vitendo ambavyo vinaanzia mazoezini, siku zilivyokuwa zinasogea nilijikuta nazoea mazingira hayo na kuanza kuyajua baadhi ya maneno yao muhimu ya Kiarabu,” anasema Msuva.

Kutokana na uwezo wa Msuva kucheza mpira kwa njia ya vikatuni (playstation) ambayo wachezaji wengi hutumia kwenye muda wao wa ziada kulimfanya kuendelea kuwa karibu zaidi na wachezaji wenzake ambao alikuwa akiwafunga mara kwa mara.

Changamoto ambayo Msuva