Zijue faida muhimu za meno ya bandia kwa afya ya kinywa

Muktasari:

  • Zifuatazo ni miongoni mwa sababu zinazoweza kumsababishia mtu kupoteza meno yake ya asili.

Meno ya bandia kama yanavyoitwa ni mbadala wa meno asilia. Meno haya huwekewa watu ambao ama wamepoteza meno kadhaa ama yote kinywani. Unapoyavaa kinywani huonekana kama meno asilia na yamejipatia umaarufu miongoni mwa watu ambao kwa namna moja ama nyingine hawana meno kadhaa ama yote ya asili kwenye vinywa vyao.

Ni nini kinachosababisha mtu kufikia hatua ya kupoteza meno yake ya asili

Zifuatazo ni miongoni mwa sababu zinazoweza kumsababishia mtu kupoteza meno yake ya asili.

Kwa mfano, maradhi ya fizi, meno kutoboka, kuoza na kisha kung’olewa, ajali za barabarani au michezoni pamoja na ugomvi kati ya wanajamii kwa sababu mbalimbali, ni miongoni mwa sababu zinazoweza kumfanya mtu akapoteza meno au jino lake la asili.

Lakini pia kuna sababu ya mtu kuanguka na kapigiza mdomo chini, husabnabisha pia kung’oka kwa jina la asili au kushambuliwa na kujeruhiwa na wahalifu.

Hata hivyo kuna baadhi ya watu wanapokuwa na upungufu wa meno kinywani huona si tatizo, lakini ukweli ni kwamba hilo ni tatizo.

Tatizo lenyewe likoje?

Tunaambiwa meno yanayokuwa yamebakia huanza kujivuta na kusogeleana ili kufunika sehemu ile ambayo jino limeng’olewa.

Hatua hii ni ya kawaida kwa mwili wa binadamu na ndiyo maana hata uking’oa jino kwenye taya la chini, utaona jino la juu la usawa huohuo linarefuka kwa kadiri muda unavyozidi kwenda.

Baada ya muda hali hii huathiri ukutanaji wa meno pale mtu anapotafuna chakula.

Kwani meno yaliyong’olewa husababisha taya na ufizi kusinyaa na kusababisha kubonyea kwa mashavu na hii husababisha mtu kuonekana mzee kuliko umri wake halisi.

Taya ambalo limepoteza meno huanza kupunguza uzito wake wa asili. Hii ni kwa sababu mizizi ya jino iliyojishika kwenye taya ambayo ni muhimu kwa ukuaji na udhibiti wa uzito wa taya inakua haipo tena.

Mizizi hiyo ya jino ndiyo huchochea ukuaji wa taya pamoja na kuhakikisha linakua na uzito stahiki.

Hivyo, ili kuhakikisha mtu unakua na meno imara na yenye afya, ni muhimu kulinda afya ya kinywa na mwili kwa ujumla.

Lakini katika nyakati hizi, ni kawaida kwa watu kuwa na meno ya bandia kama mbadala wa meno ya asili kutokana na sababu mbalimbali kuu ikiwa ni pamoja na kuhakikisha wanakuwa na tabasamu la uhakika mbele ya jamii zao.

Je kuna ina ngapi ya meno ya bandia

Meno ya bandia ambayo hutengenezwa ili yafanye kazi kama meno asili, yako ya aina mbalimbali.

Na mtu hutengenezwa kulingana na uhitaji, uwezo wa kifedha pamoja na hali yake ya kiafya baada ya kufanyiwa uchunguzi wa afya yake ya kinywa na wataalamu wa meno.

Mfano meno ya kuvaa

Haya ni yale ambao muhusika ana uwezo wa kuyavaa na kuyavua kwa ajili ya kuyafanyia usafi na huwa na uwezo wa kuyavua usiku kabla ya kulala.

Meno haya huweza pia kuwekwa kwa ajili ya meno ya mbele na hata ya nyuma, pamoja na watu waliopoteza meno yote kinywani.

Meno ya moja kwa moja

Haya ni meno ambayo mara yawekwapo hayawezi kutolewa na mtu aliyewekewa na daktari.

Mara nyingi hufanyika kwa meno ya mbele na kwa meno machache yaani tuseme jino moja mpaka matatu.

Hii ni kwa sababu kadiri yanavyozidi kuwa mengi, ndivyo uimara wake unavyopungua na uwezekano wa kuvunjika unavyoongezeka. Aina hii ya meno ya bandia haiwezekani kwa mtu ambaye hana meno kabisa kinywani.

Meno ya kupandikiza

Aina hii ya meno ndiyo yenye gharama kubwa kati ya meno yote ya bandia kutokana na hatua za utengenezwaji, dawa pamoja na vifaa vitumikavyo.

Meno haya hupandikizwa kwenye mfupa wa taya na huweza kudumu kwa muda mrefu zaidi.

Je meno ya bandia huweza kutumika kwa muda gani?

Aina mbalimbali za meno ya bandia huweza kutumika kwa muda tofauti kulingana na aina au meno husika. Lakini kikubwa ni kuzingatia masharti ya utunzaji wa meno hayo.

Meno ya kuvaa na kuvua huweza kutumika kwa muda usiozidi miaka saba na baada ya muda huo inashauriwa kubadili kwani kitaalamu yanakuwa yameshachoka.

Meno ya Moja kwa moja na kupandikia haya huweza kukaa muda wa miaka kumi.

Maswali, maoni na Ushauri 0683-694771