Hadija Jumanne
WAFANYABIASHARA wawili raia wa Kenya wamefikishwa katika Mahakama ya Wilaya ya Ilala wakikabiliwa na shtaka la wizi wa Sh2.5 milioni katika benki ya NBC.

Washtakiwa hao Pius Kiroko (46) na Edward Kimata(48), wote wanakabiliwa na shtaka hilo wanalodaiwa kutenda Benki ya NBC tawi la Kichwele, Dar es Salaam.

Mwendesha Mashtaka Wakili wa Serikali, Credo Rugaju, alidai mahakamani hapo kuwa washtakiwa walitenda kosa hilo Oktoba 31, mwaka huu katika benki hiyo mkabala na mtaa wa Kisutu.

Rugaju alidai siku ya tukio saa 6:40 mchaka, washtakiwa wanadaiwa kuiba Sh2.5 milioni kutoka kwa Hemed Jafary.
Washtakiwa walikana kuhusika na tuhuma hizo, Hakimu Ester Mwakalinga aliahirisha kesi hiyo hadi Novemba 21, mwaka huu kesi hiyo itakapotajwa tena.

Add this page to your favorite Social Bookmarking websites