Tuesday, August 21, 2018

Makazi ya Rais Afghanistan yashambuliwa

 

Kabul, Afghanistan. Wapiganaji wa Taliban wameshambulia kwa makombora makazi ya rais mjini Kabul wakati mkuu huyo wa nchi akiwahutubia Waislamu waliokuwa wakiadhimisha sikukuu ya Eid al-Adha, polisi wamesema.
Shambulizi hilo la Jumanne punde lilichochea jeshi kujibu kwa mashambulizi ya mabomu yaliyorushwa na helikopta kuelekea eneo linalodaiwa kurusha makombora hayo.
Roketi la kwanza lilitua karibu na jengo la Ikulu wakati la pili lilipiga karibu na uwanja wa majeshi ya NATO na ubalozi wa Marekani lakini hakuna aliyejeruhiwa, amesema ofisa wa polisi, Jan Agha.
Mlio wa maroketi yaliyolipuka ulisikika hata kwenye televisheni wakati Rais Ashraf Ghani akihutubia.
Mara aliposikia kishindo hicho, Ghani alikatisha hotuba yake na kusema: "Ikiwa wanafikiri shambulizi la maroketi litawadhoofisha Waafghan, watakuwa wamekosea."
Mahali katika Kabul ambako maroketi hayo yalirushwa ni moja ya maeneo yaliyoimarishwa kiulinzi katika jiji la Kabul ambako ofisi za balozi na majengo ya serikali yamezungushiwa ukuta mzito wa zege kuzuia milipuko na waya wenye ncha kali.
Mitaa mingi karibu na ubalozi wa Marekani imefungwa pamoja na ile iliyoko karibu pamoja na maeneo nyeti ya serikali na jeshi.
Msemaji wa polisi mjini Kabul, Hashmat Stanekzia amesema polisi wa Afghanistan walilitilia shaka gari moja mapema Jumanne na wakalifuatilia hadi kwenye msikitiki wa Eid Gah ambako mamia ya Waislamu walikuwa wamekusanyika kwa sala ya mapumziko ya Eid al-Adha.
Hakuna kikundi kilichotangaza kuhusika. Wakati wahusika wakiwa humo ndani watuhumiwa wanasadikiwa kurusha maroketi hayo, Stanekzia ameliambia shirika la habari la AP.

Tuesday, August 21, 2018

Trump ahofia kuwekwa mtegoni na Mueller

 

Washington, Marekani. Rais Donald Trump alisema Jumatatu alikuwa na wasiwasi kwamba taarifa yoyote chini ya kiapo yeye atakayoitoa kwa Mwanasheria maalum Robert Mueller inaweza kutumika kushtakiwa kwa kutosema ukweli kama sehemu ya uchunguzi wa Urusi kuingilia uchaguzi wa Marekani.
Katika mahojiano na shirika la Reuters, Trump alizungumzia wasiwasi wa mwanasheria wake mkuu katika uchunguzi, Rudy Giuliani, ambaye ameonya kwamba ikiwa atakaa mezani na kuhojiwa na Mueller kunaweza kuwa "mtego wa uongo."
Rais alielezea hofu yake kwamba wachunguzi wanaweza kulinganisha taarifa zake na zile za wengine waliotoa maelezo yao katika uchunguzi huo, kama vile Mkurugenzi wa zamani wa FBI James Comey, na kwamba tofauti yoyote inaweza kutumika dhidi yake.
"Kwa hiyo, ikiwa nitasema kitu fulani na yeye (Comey) akawa amesema kitu, na ni neno langu dhidi yake, na ni rafiki mzuri wa Mueller, hivyo Mueller anaweza kusema: 'Naam, ninamwamini Comey,' na hata kama nitawaambia ukweli , mimi nitaonekana mwongo. Hiyo si nzuri."
Pamoja na wasiwasi huo, Trump hakuweza kusema ikiwa hatimaye atakubali kuhojiwa na Mueller, ambaye, pamoja na mambo mengine, anachunguza kama timu ya kampeni ya Trump ilikula njama na Warusi wakati wa uchaguzi wa mwaka 2016 na ikiwa Trump alizuia haki katika uchunguzi.
Pia, Trump alikataa kusema ikiwa anaweza kumwondolea Mueller kibali chake cha usalama, kama alivyofanya wiki iliyopita kwa Mkurugenzi wa zamani wa CIA John Brennan, ambaye alikuwa akishutumu mara kwa mara utunzaji wa Trump wa sera za nje na masuala ya usalama wa taifa.

Monday, August 20, 2018

Waganda wataka Bobi Wine atendewe haki

 

Kampala,Uganda. Wakati wananchi wa Uganda wakitaka mbunge wa upinzani Robert Kyagulanyi 'Bobi Wine' aachiwe ili apatiwe matibabu ,Rais  Yoweri Museveni amesema mbunge huyo hajajeruhiwa.

Katika taarifa yake ya kwanza kuhusu afya ya mbunge huyo aliyekamatwa na vikosi vya usalama nchini, Museveni amevishutumu vyombo vya habari akidai kwamba vinaeneza habari za uongo.

Kwa mujibu wa ripoti mbalimbali za vyombo vya habari mbunge huyo ambaye pia ni msanii, ana matatizo ya figo ambayo yanahitaji kutibiwa ipasavyo na madaktari bingwa waliobobea kutoa matibabu sehemu nyeti kama hayo ya ndani ya mwili.

''Vyombo vya kueneza habari zisizo za kweli vimekuwa vikitangaza kwamba mjukuu wetu, asiye na nidhamu Wine, ni mgonjwa mahututi, hawezi kuzungumza na mengineyo,'' alisema Museveni.

Aliongeza kwamba vyombo vya habari vilisema kwamba  maofisa wa usalama wamemjeruhi vibaya Bobi Wine kwa sababu ya namna walivyokabiliana na wabunge wakati wakiwakamata.

Tayari Bobi Wine alishapata matibabu kutoka kwa madaktari wa Arua, Gulu na Kampala. Hakuwa na majeraha ya kichwa, kifua au mifupa kuvunjika, wameniarifu," ilisema taarifa hiyo  ya rais.

Museveni pia alilaumu watu maalum ambao alieleza kuwa ni wa nje wanaotafuta kuingilia siasa za nchi hiyo.

Chama cha madaktari Uganda kinasema mahali wanapohifadhiwa wabunge wa upinzani na vyombo vya usalama akiwemo Bobi Wine ni pa hatari na panaweza kuwasababishia vifo.

Viongozi wa chama hicho walisema madaktari wa Jeshi la UPDF hawana ujuzi wa kutosha kutoa matibabu kwa wabunge hao wanaodaiwa kujeruhiwa vibaya na maofisa wa usalama.

Wameelezea kuwa wako tayari kushirikiana na UPDF kuwashughulikia wabunge hao na washukia wengine kufuatia ghasia hizo.

Rais wa chama cha madaktari, Dk  Edward Ekwaro Ebuku  alisema: ''Ugonjwa wa figo unatakiwa uangalizi wa dharura, jeshi la Uganda limemficha huyu Bobi Wine, isitoshe walimkataza daktari wa familia kumtibu.''

''Sasa hivi hatujui hali yake ikoje. Lakini tunafikiria wamemficha kwa sababu hali yake ni mbaya zaidi,'' alisema.

Wataalamu wa afya wanafafanua kuwa mtu akiwa na matatizo kwenye figo ni rahisi sana sehemu nyingine kama maini na ubongo wake kuathirika iwapo hatua za dharura hazichukuliwi kumtibu.

Waliongeza kuwa mbunge Francis Zake ambaye ni miongoni mwa waliokamatwa yuko mahututi na anahitaji kuhamishwa kutoka hospitali moja hadi nyingine kupata matibabu ya hali ya juu.

Wamejitolea kushirikiana na UPDF kutoa matibabu ili kuyanusuru maisha ya waathirika wote wa ghasia waliojeruhiwa na waliomo katika hali mbaya.

'Hatujapata ruhusa kuingia kambi za jeshi kuwaona wabunge hao, tutamuandikia mkuu wa jeshi Rais Museveni ili atupe ruhusa twende tumsaidie huyu mheshimiwa Robert Kyagulanyi', alisema  Ebuku.

Juzi  mtu mmoja aliuawa kwa kupigwa risasi na wengine watano kupata majeraha wakati polisi ilipokuwa ikizima maandamano ya wananchi  wa Manispaa ya Mityana Magharibi mwa Kampala.

Vurugu hizo ziliibuka baada ya kuwepo kwa taarifa kuwa mbunge wa upinzani Francis Zaake amekufa baada ya kupigwa na maofisa wa usalama anakoshikiliwa yeye na wenzake.

Msamaji wa jeshi la nchi hiyo Brigedia Richard Karemire aliliambia gazeti la Daily Monitor kwamba mbunge huyo anatibiwa vizuri na hali yake inaendelea kutengamaa.

Raia wa Uganda wanaoishi nje ya nchi  wameendelea kutuma ujumbe wa kuishtumu Serikali kwa vitendo vyake vya kuwanyanyasa wanasiasa wa upinzani na raia kwenye mitandao ya kijamii.

Mwanasheria wa mwanamuziki huyo alisema  kwamba Bobi wine amechomwa sindano iliyomfanya asijitambue mpaka muda huu, na hata wanaomtembelea hawatambui wala uso wake hautambuliki  huku masikio na pua zikitoa damu.

Alisema  daktari wa jeshi anadanganya  kwamba sindano waliyomchoma ni ya kupunguza maumivu ya  kapigwa.

 

Mwanasheria huyo alisema  mwenye hotel ambako Bobi wine alikuwa anakaa alisema  hajawahi kuona bunduki eneo lile , na pia kuna  utaratibu wa kuwakagua wateja hivyo vyombo vyao vinaonesha Bobi wine hakuingia na bunduki.

Pia akasema baada ya kukamatwa Bob wine, wanajeshi sita waliingia hotelini baadae na hawakutaka kukaguliwa wakati wa kuingia.

Mkewe amlilia aandika waraka

Mke wa Bobi Wine, Barbie Kyagulanyi alisema kwenye waraka wake  kwamba alifanikiwa kumuona mume wake akiwa katika gereza la jeshi la Makindye akiwa katika hali mbaya.

Alisema kwamba  alifika gerezani hapo akiwa na watu wa haki za binadamu,mwanasheria wake na akamuona mume wake huyo akiwa hai licha ya kuwa na hali mbaya hivyo anamuomba Mungu amsaidie apone.

 

''Bobi ameumizwa, anamaumivu makali kila sehemu anatia huruma tumuombeeni hawezi kusimama wala kutembea''alisema

Alisema mume wake anaongea kwa tabu sana,anatoa damu puani anahitaji kupatiwa huduma za kipekee chini ya uangalizi wa daktari wake.

EU walaani

Umoja wa Mataifa (EU) umekosoa namna maofisa wa Usalama walivyowakamata wabunge hao na raia kwa madai kwamba walipiga mawe msafara wa Rais Museveni.

Taarifa ya wanadiplomasia ya Umoja huo waliopo jijini Kampala inataka wote walioshiriki kuwapiga wabunge na raia katika mazingira yanayotajwa kuwa ni ya kinyama kuchukuliwa hatua .

Bobi Wine na wenzake sita wamefunguliwa mashtaka ya kutaka kuipindua Serikali ya Rais Museveni kufuatia vurugu zilizotokea siku ya mwisho ya kampeni katika uchaguzi mdogo wilayani Arua,Kaskazini mwa Uganda.

Friday, August 17, 2018

Bobi Wine ashtakiwa kwa uhaini

 

Kampala, Uganda. Mbunge wa Kyaddondo Mashariki, Robert Kyagulanyi maarufu kama Bobi Wine ambaye alikamatwa Jumatatu mjini Arua pamoja na wanasiasa kadhaa wa upinzani ameshtakiwa katika Mahakama ya Kijeshi mjini Gulu kwa makosa ya kukutwa na silaha na risasi kinyume cha sheria.
Kwa mujibu wa taarifa ya msemaji wa jeshi iliyotolewa Alhamisi Brigedia Richard Karemire, mbunge huyo alirejeshwa mahabusu hadi Alhamisi ijayo.
“Ikiwa ni sehemu ya uchunguzi kuhusu matukio ya vurugu, polisi waliwakamata waandaaji wakuu na washiriki akiwemo Mheshimiwa Robert Ssentamu Kyagulanyi Mbunge wa Jimbo la Kyadondo Mashariki. Katika upekuzi uliofanywa na wapelelezi kwenye chumba chake cha hoteli alikutwa akimiliki bunduki kadhaa na risasi vitu ambavyo kwa kawaida humilikiwa na Jeshi la Ulinzi,” ilisema taarifa ya Brigedia Karemire.
“Kwa sababu hiyo, Mheshimiwa Kyagulanyi leo amefikishwa katika Mahakama ya Kijeshi mjini Gulu na ameshtakiwa chini ya makosa yanayoangukia S 119 (1) (h) ya Sheria ya Jeshi la UPDF, 2005 yanayohusu umiliki usiohalali wa silaha na risasi. Kisha amepelekwa mahabusu hadi Agosti 23, 2018”.
Alishtakiwa mbele ya wanasheria wake wawili; Asuman Basalirwa (Mbunge wa Manispaa ya Bugiri) na Medard Seggona (Mbunge wa Busiro Mashariki).
Kwa mujibu wa Basalirwa, ambaye alikuwepo kwenye chumba cha mahakama, uso wa mteja wake Kyagulanyi ulikuwa umevimba na hakuwa na uwezo wa kutembea wala kuongea.
Seggona alisema Kyagulanyi hakuweza hata kuandikisha maelezo kwa sababu alikuwa katika hali mbaya na amefungwa pingu.

Friday, August 17, 2018

Afya ya mbunge Bobi Wine mbaya mahabusu

 

Kampala, Uganda. Wanasheria wawili wa Mbunge wa Jimbo la Kyadondo Mashariki Robert Kyagulanyi maarufu Bobi Wine, wamesema mwanasiasa huyo ana hali mbaya kiafya kwani hawezi kutembea wala kuzungumza.
Wakiwa pamoja na familia ya Bobi, awali wanasheria hao walizuiwa kumwona mbunge huyo aliyekamatwa Jumatatu mjini Arua pamoja na wanasiasa kadhaa wa upinzani. Alifikishwa katika Mahakama ya Kijeshi mjini Gulu ambako alishtakiwa Alhamisi kwa kosa la kumiliki isivyohalali bunduki na risasi.
Hata hivyo, alishtakiwa mbele ya wanasheria wake wawili; Asuman Basalirwa (Mbunge wa Manispaa ya Bugiri) na Medard Seggona (Mbunge wa Busiro Mashariki).
Kwa mujibu wa Basalirwa, ambaye alikuwemo kwenye chumba cha mahakama, uso wa mteja wake ulikuwa umevimba na hakuwa anaweza kutembea wala kuongea. Seggona alisema Bobi Wine hakuweza hata kuandikisha maelezo kwa sababu alikuwa katika hali mbaya na alikuwa amefungwa pingu.
“Hali ya Kyagulanyi ni mbaya sana. Ana maumivu makali. Hawezi kuzungumza, na anapata shida sana hata kukaa. Uso wake umevimba na hawezi kuona kwa sababu ya mateso aliyopata kutoka kwa askari wa SFC. Hakuweza hata kuzungumza wakati akisomewa mashtaka na naamini hakuwa anajua kinachoendelea wala kuelewa mashtaka aliyosomewa,” alisema Seggona alipozungumza na wanahabari.
Familia yake haikuruhusiwa kuingia kwenye chumba cha mahakama kusikiliza kesi hiyo chini ya mwenyekiti Luteni Jenerali Andrew Gutti.
Mkewe aangua kilio
Barbara Itungo maarufu kama Barbie, ambaye ni mke wa Bobi Wine alianguka na kuangua kilio wakati wanasheria wa mumewe wakielezea namna alivyoteswa.
“Nikiwa mke na mama, uvumilivu wangu uko majaribuni. Serikali iniruhusu nimwone mume wangu. Nina wasiwasi na hali yake kwa sababu najua alipigwa sana na wanajeshi,” alisema huku akitokwa machozi

Friday, August 17, 2018

Katumbi abeza amri ya kukamatwa kwake

 

Windhoek, Namibia. Kiongozi wa upinzani katika Jamhuri ya Kidemokrasia ya Congo (DRC), Moise Katumbi amesema serikali ilipaswa kumkamata alipokuwa anafanya juhudi za kutaka kurejea mapema mwezi huu.
Katumbi ametoa matamshi hayo siku moja tangu DRC itoe hati ya kimataifa ya kukamatwa kwake tangu alipokimbilia uhamishoni mwaka 2016.
Waziri wa Sheria Alexis Thambwe Mwamba Alhamisi alisema hati imetolewa na kwamba serikali inataka akamatwe kokote atakakopatikana.
Lakini Katumbi akizungumza na shirika la BBC amehoji mantiki ya hati ya kukamatwa kwake.
“Wanawezaje kutoa hati ya kukamatwa kwangu wakati wiki mbili zilizopita walinizuia nilipotaka kurejea? Hivi sasa niko Namibia na wanaweza kunipata ikiwa wanataka kunikamata,” alisema.
“Maoni yangu ni kwamba madai hayo yanatolewa na ngoma tupu kama wanavyosema madebe matupu hayaachi kupiga kelele. Watu wanaowasababishia umaskini watu wa Congo ni wale walioko madarakani wanaotoa shutuma za uongo dhidi yangu.
“Ni wale wanaoiba na kuua watu hata sasa ndio wanapaswa kufikishwa kwenye mkono wa sheria.”
Katumbi alikuwa na matumaini ya kurejea DR Congo kabla ya Agosti 8 tarehe ya mwisho ya kujaza fomu za kuwania urais uliopangwa kufanyika Desemba.
Lakini kwanza alijaribu kusafiri kwa ndege hadi Lubumbashi akitokea Afrika Kusini lakini alizuiwa. Baadaye akatumia usafiri wa gari akitokea Zambia, lakini pia alizuiwa na mamlaka za DR Congo.

Friday, August 17, 2018

Magazeti Marekani yaungana kumkosoa Trump

 

Washington, Marekani. Mamia ya magazeti nchini Marekani yameandika maoni ya mhariri yakishutumu tabia ya Rais Donald Trump kuvishambulia vyombo vya habari, zikiwa ni juhudi za pamoja na kuunganisha nguvu kukuza uhuru wa habari.
Magazeti zaidi ya 350 yaliitikia wito wa gazeti la Boston Globe kuandika katika safu zao za tahariri Alhamisi kupigania “uhuru wa habari kutokana na mashambulizi ya Rais Trump mara kwa mara dhidi ya vyombo vya habari".
Trump amekuwa akivikosoa vyombo vya habari kwenye hotuba zake kwa umma na kupitia akaunti yake ya Twitter, akivielezea kuwa vinatoa habari za upotoshaji na adui kwa umma.
"Waandishi wa habari si maadui," kilisomeka kichwa cha tahariri katika gazeti la Boston Globe Alhamisi.
Maoni hayo yalisema kuwa "uongo ni kinyume cha maadili kwa raia wenye ufahamu, wanaowajibika na wanaopendelea uongozi wa kujitawala." Yaliendelea kusema, "Ubora wa Marekani unategemea jukumu la uhuru wa vyombo vya habari kusema ukweli dhidi ya wenye nguvu."
Maoni hayo yalihitimisha kwa kusema "kuviita vyombo vya habari kuwa ni adui wa watu" ni kinyume na Marekani kwani ni hatari kwa umoja wa raia tunaoushiriki kwa pamoja kwa karne mbili."
Gazeti la New York Times katika tahariri yake liliandika: "Kuvishutumu vyombo vya habari - kwa kupinga au kupindua habari ili kuwa na uelewa potofu - unaona sawa...Lakini kusisitiza kwamba ukweli usioupenda ni ‘habari bandia’ ni hatari kwa maisha ya demokrasia. Na kuwaita wanahabari ‘adui wa watu’ ni hatari, kipindi.”
Tangu alipoingia madarakani mwaka jana, Trump amekuwa akivishutumu vyombo vya habari mara kwa mara, mara nyingine akitaja baadhi ya magazeti kuwa “habari bandia”.

Thursday, August 16, 2018

Chameleon amwangukia Rais Museveni amsamehe Bobi Wine

 

By Mwandishi Wetu, Mwananchi. mwananchipapers@mwananchi.co.tz

Uganda.  Mwanamuziki Jose Chameleon amemuombea msamaha kwa Rais Yoweri Museven msanii mwenzake Robert Kyagulanyi ‘Bobi Wine’, anayedaiwa kushikiliwana jeshi la polisi nchini humo.

Hatua hiyo inakuja ikiwa ni siku moja baada ya dereva wa mwanamuziki huyo ambaye pia ni mbunge wa  Kyadondo Mashariki, kuuawa kwa kupigwa risasi.

Tukio hilo  lilitokea katika vurugu za kampeni za ubunge zinazoendelea nchini humo ambapo Bobi anaelezwa kumuunga mkono mgombea huru.

Baada ya tukio hilo, Bobi inadaiwa kuwa anashikiliwa kwa tuhuma za uchochezi, japokuwa polisi wanadai kwamba yupo katika matibabu.

Wakati Polisi wakieleza hivyo, ndugu zake wanasema hadi sasa hawajui alipo.

Katika barua yake aliyoandika kwenda kwa Rais Museveni,  Chameleon, amesema ameamua kuweka pembeni tofauti zake na Bobi na kumuombea msamaha.

Kupitia ukurasa wake wa mtandao wa kijamii wa  Instagram, mwanamuziki huyo amekiri kuwa pamoja na kwamba Bobi katika tukio hilo amefanya kosa ni vyema Museveni kuwa mfano wa kusamehe kwenye Taifa hilo kwa kuwa hakuna kosa lisilosameheka.

Thursday, August 16, 2018

Malkia wa muziki wa soul, Aretha Franklin afariki dunia

 

By Mwandishi Wetu, Mwananchi

Aretha Franklin, malkia wa muda mrefu wa muziki wa soul amefariki dunia leo Alhamisi Agosti 16, 2018  baada ya kuugua saratani ya kongosho.

Msemaji wa mwanamuziki huyo amethibitisha kuwa Aretha aliyekuwa na umri wa miaka 76 amefariki dunia nyumbani kwake katika jiji la Detroit saa 3:50 asubuhi.

Taarifa ya familia inasema, “tupo  katika wakati mgumu kuliko wote tuliowahi kuwa maishani, tumepoteza nguzo ya familia.”

Mwanamuziki huyo aligundulika kuwa na saratani mwaka 2010 na mwishoni mwa mwaka jana alitangaza kustaafu muziki ili kuongeza nguvu katika matibabu yake.

Onyesho lake la mwisho alifanya Novemba, 2017 katika tamasha lililoandaliwa na mwanamuziki Elton John kwaajili ya kuchangia mfuko wa waathirika wa ugonjwa wa Ukimwi.

Akijulikana kwa nyimbo kama Think na Respect, Aretha ni mwanamke mweusi aliyeweka rekodi ya kuwa na nyimbo zaidi ya 20 zilizowahi kushika namba moja katika chati za muziki nchini Marekani.

 

Wednesday, August 15, 2018

Watu 38 wafa daraja likiporomoka Italia

 

Genoa, Italia. Idadi ya vifo vya watu kutokana na daraja kubwa kuvunjika imefikia 38 na bado kuna uwezekano wa kuwepo ongezeko huku juhudi za kutafuta manusura na miili kutoka kwenye vifusi zikiendelea.
Kipande cha daraja hilo la Morandi, ambalo ni sehemu ya barabara kuu na moja ya viunganishi katika mji wa bandari wa Genoa, kilivunjika mnamo saa 12:00 jioni ya Jumanne na kuporomoka na magari 35 madogo na malori matatu yaliyokuwa yakivuka wakati huo.
Nguzo kubwa zilizojengwa kwa saruji zilivunjika na kuangukia kwenye maghala mawili ya vifaa vya ujenzi, na kingo za mto.
"Kwa sasa tunathibitisha vifo 38 na watu wengine hawajulikani walipo," alisema Waziri wa Mambo ya Ndani Matteo Salvini.
Watu watatu walipotea na karibu makumi wengine walikuwa katika hali mbaya, mamlaka zilisema.
Kwa mujibu wa Idara ya Udhibiti Majanga, polisi wapatao 1,000, wazima moto na watu wa kujitolea wako kwenye eneo la maafa.

-->