Thursday, September 20, 2018

Ndugu wa Bobi Wine akamatwa

Ndugu wa mwanamuziki Bobi Wine aliyegeukia

Ndugu wa mwanamuziki Bobi Wine aliyegeukia siasa, Eddy Yawe. 

By Mwandishi Wetu, Mwananchi mwananchipapers@mwananchi.co.tz

Kampala. Saa chache kabla ya kuwasili kwa mbunge wa Kyadondo, Bobi Wine polisi imemkamata ndugu wa mwanamuziki huyo aliyegeukia siasa, Eddy Yawe.

Yawe amekamatwa na  vikosi vya usalama na kuzuiwa katika kituo cha polisi uwanja wa Entebbe akiwa pamoja na msemaji wa Chama cha Democratic, Alex Mufumbiro.

Walikuwa wamefika katika uwanja wa ndege wa Entebbe katika kile kilichofahamika ni sehemu ya maandalizi ya mapokezi ya mbunge huyo ambaye anatarajiwa kurejea leo nchini Uganda, akitokea Marekani.

Duru za habari zinasema polisi wametahadharisha mkusanyiko wowote wa watu karibu na maeneo ya uwanja huo wa ndege na barabarani itokayo uwanjani hapo na kila mwanafamilia anayewasili uwanjani hapo anakamatwa.

Kwa sasa vikosi vya polisi mjini Kampala viko kwenye tahadhari kubwa kabla ya kuwasili kwa mbunge huyo wa Kyadondo East.

Bobi Wine anatarajiwa kuwasili Kampala leo Alhamisi kutoka nchini Marekani ambapo alikuwa ameenda kupata matibabu baada ya kuripotiwa kuteswa na vikosi vya usalama.

Tangu atangaze kurudi Uganda, makamanda wa polisi mjini Kampala wamekuwa wakifanya mikutano tangu Jumatatu kujiandaa kurudi kwa mbunge huyo.

Zaidi ya watu 1000 wanatarajiwa kufurika barabara ya Entebbe kumkaribisha Bobi ambaye ana wafuasi wengi vijana.

Wednesday, September 19, 2018

Motlanthe, Mwamunyange waanza kazi Zimbabwe

 

Harare, Zimbabwe. Rais Emmerson Mnangagwa leo alitarajiwa kuiapisha rasmi tume ya watu saba aliyoiunda kuchunguza vurugu zilizoibuka baada ya uchaguzi jijini Harare Agosti 1 ambazo zilisababisha vifo vya watu sita.
Mmoja wa wajumbe katika tume hiyo inayoongozwa na rais wa zamani wa Afrika Kusini Kgalema Motlanthe ni Mkuu wa zamani wa Jeshi la Wananchi Tanzania (JWTZ) Jenerali mstaafu Davis Mwamunyange.
Wajumbe wengine kutoka nje waliomo katika tume ni mtaalamu wa sheria za kimataifa Rodney Dixon QC kutoka Uingereza, na aliyekuwa Katibu Mkuu wa Jumuiya ya Madola Emeka Anyaoku kutoka Nigeria.
Wanaokamilisha idadi ni wajumbe wa ndani wahadhiri kutoka Chuo Kikuu cha Zimbabwe (UZ) Profesa Charity Manyeruke, Profesa Lovemore Madhuku na rais wa zamani wa Chama cha Wanasheria Zimbabwe (LSZ) Vimbai Nyemba.
Rais Mnangagwa alidokeza hayo Jumanne wakati akilihutubia Taifa na kuzindua rasmi kikao cha kwanza cha Bunge la Tisa lililohudhuiriwa kwa pamoja na Bunge na Seneti.
"Tukio la pekee, la kusikitisha na lisilokubalika la vurugu, ambalo lilitokea tarehe 1 Agosti 2018 halipaswi kutuzuia kuchukua mkondo madhubuti wa amani ambao tumeuanza," alisema.
"Nimetangaza Tume ya Uchunguzi yenye wajumbe saba, iliyosheheni watu maarufu, ambao nitawaapisha kesho Jumatano Septemba 19, 2018. Nina hakika kwamba ripoti yao ya mwisho na mapendekezo yatasaidia kufunga na kuhitimisha suala hili. "

Wednesday, September 19, 2018

China yaongeza ushuru bidhaa za Marekani

 

Beijing, China. China na Marekani ni kama zinacheza mchezo wa kukomoana kwani baada ya Marekani kutangaza Jumatatu kuongeza ushuru wa forodha kwa bidhaa za China, Jumanne taifa hilo lilijibu kwa kutia saini nyongeza ya ushuru kwa bidhaa za Marekani.
China imesema itaweka ushuru wa forodha dhidi ya bidhaa za kutoka Marekani zenye thamani ya takriban dola za Marekani 60 bilioni kama jibizo baada ya ushuru mpya wa forodha uliowekewa na Marekani.
Juzi Jumatatu, utawala wa Rais Donald Trump wa Marekani ulitangaza awamu ya tatu na kubwa zaidi hadi sasa ya ushuru wa forodha kwa bidhaa za China. Marekani imesema nyongeza ya ushuru kwa asilimia kumi kwenye bidhaa za China zenye thamani ya takriban dola bilioni 200 itaanza kutekelezwa mnamo Septemba 24.
Utawala wa Trump unaishutumu China kwa kujipatia isivyostahili hakimiliki za ubunifu za Marekani na teknolojia.
Serikali ya China ilijibu Jumanne ikisema kuwa ushuru wa forodha wa hadi asilimia kumi pia utaanza kutekelezwa kuanzia Septemba 24. Iwapo hatua hiyo itatekelezwa, zaidi ya asilimia 70 ya bidhaa za Marekani zitahusishwa na ziada ya ushuru.
Trump alituma ujumbe wa Twitter Jumanne akisema kutakuwepo jibizo kali na la haraka la kiuchumi dhidi ya China iwapo “wakulima wetu, wafugaji au wafanyakazi wa viwandani watalengwa”.
Wachunguzi wanasema kuendelea kwa mzozo kati ya mataifa hayo mawili yenye uchumi mkubwa duniani huenda kukaingia kwenye hatua ya vita kamili ya kibiashara.

Wednesday, September 19, 2018

Rais mstaafu Argentina ashtakiwa tena kwa rushwa

 

Buenos Aires, Argentina. Aliyekuwa Rais wa Argentina Cristina Fernandez de Kirchner Jumatatu alifunguliwa kesi mashtaka yakiwa kwamba utawala wake ulipokea rushwa kutoka makampuni ya ujenzi ili yapewe mikataba ya kazi za umma.
Hati ya mashtaka iliyotolewa na Jaji wa shirikisho inaonyesha rais huyo anashutumiwa kuwa alikuwa akiongoza mtandao ambao ulipokea rushwa ili yapewe mikataba minono ya kazi za umma katika vipindi vyote viwili wakati wa urais - kuanzia mwaka 2007 hadi 2015 na kile cha mume wake marehemu, Nestor Kirchner aliyeongoza Argentina kuanzia mwaka 2003 hadi 2007.
Katika uamuzi wenye kurasa 500 Jumatatu, jaji wa shirikisho Claudio Bonadio pia aliamuru Kirchner akamatwe akisema kwamba anaweza kujaribu "kuzuia mchakato wa kimahakama" ikiwa atabaki huru.
Kirchner, ambaye sasa ni seneta, ana kinga ya Bunge ya kutoshtakiwa ambayo inazuia kumweka kizuizini lakini haizuii yeye kushtakiwa.
Mwaka jana, ombi la kutaka Kirchner afutiwe kinga yake kama sehemu ya kesi tofauti lilishindwa. Lakini Agosti maseneta walipiga kura kuondoa sehemu ya kinga yake, hatua ambayo iliruhusu nyumba ya mwanamama huyo mwenye umri wa miaka 65 kupekuliwa.
Katika mfululizo wa taarifa zilizosambazwa kwa Twitter Jumanne, Kirchner alirudia madai yake kwamba uchunguzi huo ni kampeni dhidi yake iliyoshadidiwa na kiongozi wa sasa wa nchi, Mauricio Macri, na akadai kwamba jaji alithibitisha kuwa hakukuwa na ushahidi dhidi yake.
"Jaji ambaye aliniita alikiri mara nne kwamba hakuna ukweli au ushahidi ambao unaniunganisha na (uchunguzi)," alisema Kirchner. "Ni uchunguzi juu ya matakwa".

Tuesday, September 18, 2018

Marekani, China zajibizana nyongeza ya ushuru

 

Beijing, China. Siku moja baada ya Marekani kutangaza nyongeza ya ushuru kwa bidhaa zinazoingizwa kutoka China, Jumanne China ilitangaza kuchukua “hatua mbadala” dhidi ya uamuzi wa Rais Donald Trump unaolenga kupata mabilioni ya dola huku makundi ya wafanyabiashara yakionya.
Jumatatu, utawala wa Rais Trump ulitangaza awamu ya tatu na kubwa zaidi ya nyongeza ya ushuru wa forodha kwa bidhaa za China ambao utaanza kufanya kazi Septemba 24 mwaka huu.
Katika awamu hii kwanza itaweka nyongeza kwa asilimia 10 kwa bidhaa za China zinazoingizwa Marekani zenye thamani ya dola za Marekani 200 bilioni. Nyongeza hiyo itaongezeka hadi asilimia 25 katika siku zijazo.
Lakini Waziri wa Biashara wa China alitoa taarifa ya kulipa kisasi bali hakutoa maelezo ya kina juu ya uwezekano wa hatua za kuchukua dhidi ya ushuru ulioongezwa na Marekani katika juhudi za mataifa mawili hayo yenye uchumi mkubwa duniani juu ya sera ya teknolojia ya China.
Mapema mwaka huu, Marekani iliweka nyongeza ya ushuru kwa bidhaa zinazoingizwa kutoka China zenye thamani ya dola bilioni 50i.
Hatua hiyo ya hivi karibuni inamaanisha kuwa karibu nusu ya bidhaa zote kutoka China zitawekewa nyongeza ya ushuru wa forodha.
Tofauti na awamu ya kwanza na ya pili ya ushuru wa forodha ambapo uliwekwa hasa katika bidhaa za viwandani na teknolojia, ushuru wa forodha wa hivi karibuni utawekwa katika uwanda mpana wa bidhaa, ikiwemo bidhaa za mlaji. Hiyo inaweza kusababisha kupanda kwa bei kutakapowaathiri walaji wa Marekani.
China nayo ilijibu kwa kuweka ushuru wa forodha. Wakati huu inatarajiwa kuweka ushuru wa forodha kwa bidhaa za Marekani zenye thamani ya dola bilioni 60, ikiwemo gesi asilia iliyo katika hali ya kimiminika.

Tuesday, September 18, 2018

Wakuu wa Korea mbili wakutana Pyongyang

 

Pyongyang, Korea Kaskazini. Rais wa Korea Kusini Moon Jae-in amefanya ziara nyingine katika nchi jirani ya Korea Kaskazini ambako alikutana na kiongozi wa nchi hiyo Kim Jong Un kuendeleza mazungumzo kuhusu kuachana kabisa na mpango wake wa kutengeneza silaha za nyuklia.
Mbali ya wakuu hao wa nchi kuzungumzia mpango wa kuachana na utengenezaji silaha za nyuklia pia walitarajiwa kujadili suala la kuimarisha uhusiano wake na Marekani.
Baada ya kuwasili na kupokewa kwa shangwe, Rais Moon alitembezwa katikati ya jiji la Pyongyang na kusalimiwa na maelfu ya wananchi waliojitokeza kwa wingi kumwona.
Mkutano huo wa viongozi wakuu unakuja wakati kukiwa na mkwamo wa mazungumzo ya kuondokana na silaha za nyuklia kati ya Korea Kaskazini na Marekani.
Kumekuwa na ushahidi kwamba Korea Kaskazini bado inaendeleza mipango yake ya silaha za nyuklia wakati Marekani inashinikiza Korea Kaskazini ichukue hatua madhubuti za kumaliza mipango hiyo ikiwa ni pamoja na kubainisha silaha na vituo vyake vya silaha za nyuklia.
Korea Kaskazini inasisitiza kuwa kabla ya hilo kufanyika, ni lazima ipate azimio rasmi la kumalizika kwa Vita vya Korea pamoja na kulegezwa kwa vikwazo vya kiuchumi.
Katika ziara hiyo ya siku tatu, Moon anatarajiwa kusaidia kupunguza hali ya wasiwasi wa kijeshi kati ya nchi hizo za Korea na kuunga mkono majadiliano kati ya Marekani na Korea Kaskazini.

Tuesday, September 18, 2018

Uganda yaishutumu Ulaya kutaka ‘kuteka taasisi’ zake

 

Kampala, Uganda.  Serikali ya Uganda Jumatatu ilitoa majibu kuhusu uamuzi uliotolewa na Bunge la Umoja wa Ulaya wa kukemea mateso yanayodaiwa kufanywa dhidi ya wanasiasa na kuitaka serikali ifute mashtaka dhidi ya watungasheria.
Mbunge wa Kyadondo Mashariki Robert Kyagulanyi maarufu kama Bobi Wine, na Mbunge Francis Zaake wanadaiwa kuteswa walipokamatwa na maofisa wa usalama mwezi uliopita wakihisiwa kuhusika katika tukio la kushambuliwa gari lililokuwa kwenye msafara wa Rais Yoweri Museveni.
Serikali imekanusha madai kwamba maofisa usalama waliwatesa wanasiasa hao, ikisema majeraha yanayoonekana kwa wazi katika miili yao yanaweza yawe yalitokana na vurugu kwani walikuwa wanakataa kukamatwa.
“Hatua ya Bunge la EU kutoa uamuzi unaotaka mahakama za Uganda kutupilia mbali mashtaka haikubaliki...tunaliona hilo kuwa jaribu lililodhamiriwa kuteka na kupindua taasisi zetu,” msemaji wa Serikali Ofwono Opondo alisema katika mkutano na vyombo vya habari Jumatatu.
Umoja wa Ulaya ni mhisani mkuu wa bajeti ya Uganda na ndio uliofadhili ujenzi wa barabara kuu kadhaa na miundombinu mingine.

Vurugu za Arua
Msafara wa Museveni ulirushiwa mawe alipokuwa akiondoka katika mji wa Magharibi mwa Nile Arua ambako alikwenda kwa ajili ya kumpigia kampeni mgombea wa chama tawala katika uchaguzi mdogo uliopangwa kufanyika Agosti 15.
Kyagulanyi, Zaake na makumi ya wafuasi wao walikamatwa na kushtakiwa kwa uhaini kutokana na jukumu walilokuwa nalo katika tukio lile. Wabunge hao kwa sasa wako nje ya nchi – Bobi Wine yuko Marekani na Zaake yuko Indindia – ambako wanapatiwa matibabu maalumu kwa majeraha waliyopata.
Kukamatwa na kuwekwa kizuizini na wafuasi wao na ripoti kuhusu kuteswa kwao kuliibua kwa siku kadhaa maandamano katika maeneo tofauti nchini Uganda.

Tuesday, September 18, 2018

Upinzani waunga mkono VAT ya Rais Kenyatta

 

Nairobi, Kenya. Muungano wa upinzani wa National Super Alliance (Nasa) umesema kuwa utaunga kwa masharti pendekezo la Rais Uhuru Kenyatta alilowasilisha bungeni mwishoni mwa wiki la kupunguza Kodi ya Ongezeko la Thamani kutoka asilimia 16 hadi nane.
Kundi la wabunge kutoka muungano huo unaoongozwa na Raila Odinga Jumanne ulisema utaunga mkono kodi hiyo, ambayo kwa kiwango fulani itachangia kupanda kwa gharama ya maisha, kwa mwaka mmoja.
Baada ya miezi 12 kupita, watungasheria hao wamewaambia waandishi wa habari katika taarifa yao ya pamoja kwamba, kodi hiyo itapaswa ijadiliwe upya na kuona uwezekano wa kuifuta.

Tuesday, September 18, 2018

Netanyahu aruhusu Waethiopia kuhamia Israel

 

Jerusalem, Israel. Waziri Mkuu Benjamin Netanyahu Jumatatu aliamua kuwaruhusu raia wa Ethiopia wapatao 1,000 kuhamia Israel, ofisi yake ilitangaza mkupuo nadra wa Wayahudi wa jamii ya Falashi.
Mafalashi kwa miaka mingi wanadai kwamba wao ni uzao wa Wayahudi wa Ethiopia na wamepigania hadhi na haki ya kuishi Isarel, ingawa taifa hilo la Kiyahudi haliwatambui kiasi hicho.
Katika miaka ya 1980 na 1990 Israel, ambayo iliwachukua maelfu ya Wayahudi kutoka taifa hilo la Kiafrika, linasema mchakato huo umekamilika. Pia imetengeneza sera inayozuia wasio Wayahudi kuhamia Israel.
Lakini mwaka 2015, iliandaa orodha ya Waethiopia 9,000 waliokuwa wameruhusiwa kuhamia Israel katika kipindi cha miaka mitano kwa hoja ya kuunganisha familia zilizopoteana.
Netanyahu alisema tangu ulipotolewa uamuzi ule Mafalashi 1,300 wamehamia Israel.
"Nafurahi kuwaarifu kwamba nimeamua kwamba karibu watu 1000 wa jamii za watu ambao watoto wao tayari wako huku, lazima waruhusiwe kuingia Israel," alisema Netanyahu.

Monday, September 17, 2018

Wabunge kujadili mapendekezo ya Rais Kenyata

 

Nairobi, Kenya. Bunge la Taifa linatarajiwa kuwa na vikao maalumu kwa ajili ya kujadili pendekezo lililotolewa na Rais Uhuru Kenyatta kupunguza Kodi ya Ongezeko la Thamani (VAT) kutoka asilimia 16 hadi asilimia 8 katika bidhaa za mafuta badala ya kutoa waraka wa kuisitisha.
Vikao hivyo vinatarajiwa kufanyika Jumanne na Alhamisi.
Katika hotuba yake kwa taifa wiki iliyopita, Rais Kenyatta alisema aliurejesha bungeni muswada unaopendekeza ongezeko la asilimia 16 katika VAT kwa sababu haiakisi ongezeko la changamoto katika nchi.
Alisema kutakuwa na athari hasi katika maeneo manne ya maendeleo aliyoahidi ambayo ni uhakika wa afya kwa wote, usalama wa chakula, kupanua tasnia ya utengenezaji nguo na ujenzi wa nyumba nafuu.
Pendekezo hilo, ikiwa litaridhiwa na Bunge, litawezesha bei ya petroli kushuka kutoka Sh127 hadi Sh118, wakati dizeli itapungua hadi Sh107 kutoka Sh115.
Tozo hiyo mpya ya VAT katika bidhaa ya mafuta ilianza kutekelezwa Septemba 1, licha ya marekebisho yaliyofanywa katika Muswada huo ambao Bunge lilitaka kodi hiyo iahirishwe.
Utekelezaji wake umepingwa Mahakama Kuu ambayo ilitoa amri ya kusitishwa lakini haijatekelezwa na Tume ya Udhibiti wa Nishati (ERC).

-->