Friday, June 22, 2018

Zitto azidi kupigilia msumari ushuru wa korosho

Mbunge wa Kigoma Mjini, Zitto Kabwe akizungumza

Mbunge wa Kigoma Mjini, Zitto Kabwe akizungumza bungeni alipokuwa akichangia mjadala wa kupitisha Bajeti Kuu ya Serikali kwa mwaka wa fedha 2018/2019, jijini Dodoma leo. Picha na Edwin Mjwahuzi 

By Ibrahim Yamola, Mwananchi iyamola@mwananchi.co.tz

Dodoma. Mbunge wa Kigoma Mjini (ACT-Wazalendo), Zitto Kabwe amesema Serikali inapaswa kuwa makini na zao la korosho kwa maelezo kuwa kitendo inachotaka kufanya cha kuchukua asilimia 65 ya fedha za mauzo ya korosho nje ya nchi, ni hatari.

 

Akizungumza katika mjadala wa bajeti ya Serikali kwa mwaka wa fedha wa 2018/19 leo Ijumaa Juni 22, 2018 bungeni mjini Dodoma, amesema  mfumo wa Bunge ni mfumo wa Kamati, kwamba kamati za chombo hicho cha Dola, zinafanya kazi kwa niaba ya wabunge wote.

 

Tayari baadhi ya wabunge wametishia kufanya maandamano iwapo Serikali haitatoa asilimia 65 ya ushuru wa mauzo ya korosho nje kwa ajili ya maendeleo ya zao hilo.

 

Pia, wabunge wamepinga mabadiliko ya Sheria ya Korosho yanayokusudiwa kufanywa na Serikali ili ushuru huo upelekwe katika Mfuko Mkuu wa Hazina.

 

Akizungumzia jambo hilo ambalo kamati ya Bunge ya Bajeti ililipinga katika maoni yake kuhusu bajeti ya Serikali mwaka 2018/19, iliyoyawasilisha bungeni Juni 18, 2018, Zitto amesema ni vyema jambo ambalo wabunge wanakuwa na mashaka nalo, likafanyiwa kazi.

 

“Leo ukija bungeni uwapinga wabunge wanaolima korosho, kesho utakuwa na jambo lako utakosa wa kukuunga mkono na busara ni kukaa kimya,” amesema Zitto na kubainisha kuwa korosho na mazao mengine kama pamba na kahawa yamesaidia kuongeza pato la kigeni kwa Taifa.

 

 

Saturday, June 16, 2018

Sababu tano kwa nini uchague mtandao wa Telegram

 

Karibu kila mwenye ‘smartphone’ anatumia ‘application’ ya WhatsApp. Hii inatajwa kuwa programu ya mawasiliano kwa njia sauti, video na ujumbe wa maandishi yenye watumiaji wengi zaidi duniani.

Lakini zifuatazo ni faida tano za kukufanya uuchague mtandao wa Telegram ambazo huwezi kuzipata kwingine.

Uhifadhi wa mtandaoni

Telegram huhifadhi vitu mtandaoni na si kwenye simu

Tuma faili la ukubwa hata wa GB 1.5

Kwa watu wanaotumia WhatsApp wanafahamu kwamba huwezi kutuma faili lenye ukubwa wa kuzidi MB 16 kupitia mtandao huo.

 

Mawasiliano ya siri

Hii ni aina ya kutumiana meseji ambayo watumiaji wanakuwa wanaweka muda wa kufutika kwa mesjei zao, na muda unapofikia, meseji hujifuta zenyewe, na zinapofutika, hakuna namna ya kuziona tena.

 

Kundi la wanachama hadi 5,000

Kwa njia ya kawaida, kundi la WhatsApps linaweza kubeba wanakikundi 256 tu. Wakati kwenye Telegram, kundi lina uwezo wa kuwa na idadi ya wanachama hadi 5,000 na zaidi katika Super Groups.

 

Kujisajili bila namba

Kama ambavyo ni lazima kujisajili kwa kutumia nambari ya simu kwenye WhatsApp, ndivyo unavyoweza kujisali kwenye Telegarm pia.

 

 

 

Friday, June 15, 2018

Bajeti EAC zajikita kuibeba sekta ya kilimo

Waziri wa Fedha wa Rwanda, Dk Uzziel

Waziri wa Fedha wa Rwanda, Dk Uzziel Ndagijiman 

EAC. Jana macho na masikio ya wananchi yalikuwa kwa mawaziri wa fedha wa nchi za Afrika Mashariki ambao walikuwa gumzo kila kona ya nchi zao wakisubiriwa kwa hamu kusoma bajeti kuu ya mwaka 2018/2019.

Nchi hizo ambazo zimeweza kusoma bajeti hiyo ni pamoja na Kenya, Tanzania, Uganda na Rwanda.

Kwa nchi zote hizo sekta ya kilimo imepewa kipaumbele katika bajeti hiyo.

Mbali ya sekta hiyo, pia sekta zingine ambazo zilipewa kipaumbele ni pamoja na afya na elimu.

Hatua hiyo ni baada ya kila wizara kuwakilisha makadirio ya matumizi na mapato huku ikiibuka mijadala mizito ambayo wakati fulani ilisababisha mvutano kwa wabunge wa nchi hizo.

Nchini Kenya bajeti hiyo ilisomwa saa tisa alasiri na Waziri wa Fedha, Henry Rotich ambayo kwa jumla ilikuwa ni ya Sh66 trilioni (Ksh3 trilioni).

Bajeti ya Kenya ilijikita zaidi kwenye ajira na kilimo.

Mwaka jana, Waziri Rotich aliondoa kodi ya mahindi yanayoagizwa kutoka nje ili kurahisisha uagiza wa bidhaa hiyo. Pia aliondoa kodi ya utengezaji wa dawa za kuua wadudu na magari ya utalii yanayotengenezwa nchini Kenya.

Kama moja ya njia ya kuzuia uchezaji kamari, Serikali iliongezea kodi ya sekta hiyo hadi asilimia 50 kutoka asilimia 7.5.

Kadhalika, Uganda nako Waziri wa Fedha, Matia Kasaija alitangaza bajeti akitenga Sh16 trilioni (Ush32.7 trilioni), huku vipaumbele vikielekezekwa kwenye sekta za utalii, miundombinu, elimu, michezo, afya, ulinzi na kilimo.

Waziri wa Fedha wa Rwanda, Dk Uzziel Ndagijiman alitaja vipaumbele vya bajeti ya nchi hiyo akidai itajikita kwenye kilimo na viwanda.

Alisema bajeti imeongezeka kwa asilimia 16 ikilinganishwa na iliyopita ya mwaka 2017/2018.

Waziri huyo alisema bajeti kuu ya mwaka huu wa fedha itakuwa Sh6 trilioni (Rwf2.4 trilioni).

Alisema bajeti hiyo ambayo inatarajiwa kuanza Julai Mosi imelenga kuinua uchumi.

Dk Ndagijiman alisema uchumi wa Rwanda unatarajiwa kukua kwa asilimia 7.2.

Thursday, June 14, 2018

Tirdo sasa yatakiwa kufanya kazi saa 24

Katibu Mkuu Wizara ya Viwanda na Biashara,

Katibu Mkuu Wizara ya Viwanda na Biashara, Profesa Elisante Ole Gabriel. 

By Hadija Jumanne, Mwananchi hjumanne@mwananchi.co.tz

Mapinduzi ya viwanda hayajaanzia katika mitambo, bali yanaanzia katika fikra za watu

Dar es Salam. Katibu Mkuu Wizara ya Viwanda na Biashara, Profesa Elisante Ole Gabriel, amelitaka Shirika la Utafiti na Maendeleo ya Viwanda nchini (Tirdo), kufanya kazi usiku na mchana ili wadau wa biashara na viwanda wapate huduma wakati wote.

Profesa Ole Gabriel alisema hayo alipotembelea shirika hilo na kuongeza kuwa ili wafanyabiashara na wawekezaji wa sekta ya viwanda waweze kupata huduma muda wowote, ni lazima Tirdo wafanye kazi usiku na mchana.

“Tunahitaji sana utafiti wenu. Kutokana na umuhimu huo, nawaomba mfanye kazi saa 24 kwa siku saba za wiki, ikiwezekana Profesa Mtambo (Mkumbukwa) muweke zamu kwa wafanyakazi ili wadau wetu wa viwanda na biashara waweze kupata huduma wanapohitaji.

“Mapinduzi ya viwanda hayajaanzia katika mitambo, bali yanaanzia katika fikra za watu, kwa kubuni shughuli zitakazowaingizia kipato, lakini tumeona Tirdo inaisaidia sana Serikali kujua ni eneo gani tunatakiwa kuanzisha kiwanda kulingana na eneo husika,” alisema Profesa Ole Gabriel.

Alibainisha kuwa mikakati ya wizara kwa sasa ni kuhakikisha inaunganisha mnyororo wa thamani wa kilimo na viwanda.

Mkurugenzi Mkuu wa Tirdo, Profesa Mkumbukwa Mtambo alisema silaha kubwa ya ushindani katika uchumi wa viwanda na biashara ni kutumia taasisi zinazofanya utafiti kuhusu maendeleo ya viwanda.

Profesa Mtambo pia alisema kwamba kupitia fedha za maendeleo walizopewa, Sh100 milioni zimetumika kununua mashine ya kisasa ya kupima sumu kuvu na kuangalia usalama wa chakula.

Awali, Mkurugenzi wa Utafiti kutoka Tirdo, Dk Anselm Mosha alisema kwamba mashine hiyo itakuwa na uwezo wa kupima sumu kuvu kwenye vyakula vya nafaka kama, mahindi, karanga, ufuta, makopa ya mihogo na matunda.

“Pia, mashine hii inapima masalia ya viuatilifu katika mazao mbalimbali, hasa ya mbogamboga na matunda, lakini pia masalia ya sumu za dawa zinazotoka kwenye nyama na maziwa,” alisema Dk Moshi.

Thursday, June 14, 2018

Benki ya Mkombozi, Mloganzila washirikiana uchangiaji wa damu

mkurugenzi mtendaji wa benki hiyo, George

mkurugenzi mtendaji wa benki hiyo, George Shumbusho. 

Dar es Salaam. Wafanyakazi wa Benki ya Biashara ya Mkombozi wameungana na Watanzania wengine kuchangia damu ikiwa ni sehemu ya Siku ya Wachangia Damu Duniani inayoadhimishwa leo.

Uchangiaji huo ulifanyika jana katika viwanja vya Msimbazi Centre kwa kushirikiana na Hospitali ya Mloganzila.

Akizungumza wakati wa uchangiaji huo, mkurugenzi mtendaji wa benki hiyo, George Shumbusho alisema upungufu wa damu ni tatizo kubwa Tanzania na duniani kote.

Alisema jitihada zinazofanywa na kitengo cha damu salama zimewasaidia watu wengi wenye uhitaji wa damu hasa wakati wa ajali, uzazi na upasuaji.

“Tuna kila sababu ya kusimama kwa umoja kuhakikisha kitengo cha damu salama kinafikia malengo yake ya kuhakikisha kuna damu ya kutosha nchi nzima. Njia bora ya kufanya hivyo ni kwa kujiunga na familia ya wachangia damu kwa kupitia makundi ya kijamii na taasisi mbalimbali. Hii itahakikisha kitengo hiki kina damu ya kutosha ili kuokoa maisha ya wengi zaidi,” alisema.

Aliwapongeza Watanzania wengine waliojitokeza katika uchangiaji huo wa damu huku akiwataka wasaidie katika kueneza ujumbe huo ili watu wengi zaidi wajitokeze kuchangia damu.

Mkazi wa Kinondoni, Abdallah Mwakipeo alisema mwamko wa uchangiaji damu bado uko chini nchini na kuwataka wananchi kujitokeza kwa wingi kila mara kuchangia damu kwenye hospitali na vituo vya afya.

Thursday, June 14, 2018

Benki ya Azania yaeleza siri ya mafaniko yake kiuchumi

 

By Mwandishi Wetu, Mwananchi mwananchipapers@mwananchi.co.tz

Dar es Salaam. Imeelezwa kuwa Benki ya Azania imekuwa ikiendelea kupata mafanikio ya kiuchumi kwa sababu ya kutoa huduma bora na kuwajali wateja wake.

Mkurugenzi wa Maendeleo ya Biashara wa Azania, Rhimo Nyansaho alisema hayo katika hafla ya futari iliyoandaliwa na benki hiyo jijini hapa juzi kwa ajili ya wateja na jamii yenye uhitaji.

Alifafanua kuwa Azania inasonga mbele kwa sababu ya wateja wanaoweka fedha katika benki hiyo na ndiyo maana sehemu ya pato linalotokana na mafanikio yake, imekuwa ikirudishwa kwa jamii.

Nyansaho alisema katika kipindi hiki cha mwezi wa Mtukufu wa Ramadhani wameamua kufuturisha wateja wake pamoja na watoto yatima wa Kituo cha Ijango Zaidi cha Sinza ikiwa ni sehemu ya kushirikiana nao katika mambo mbalimbali.

Mwakilishi wa wateja wa benki hiyo, Deogratius Kifumani aliipongeza benki hiyo kwa huduma zake pamoja na kurudisha sehemu ya pato lake kwa jamii.

Sheikh wa Wilaya ya Ubungo, Maulid Kidebe alisema kilichofanywa na Benki ya Azania kina maana kubwa kwa jamii na kwamba tukio hilo lina thawabu kwa kuwa imewakumbuka watoto yatima ambao wanatakiwa kuwa karibu na jamii.

Sheikh Kidebe alitoa wito kwa benki na taasisi nyingine kuiga mfano uliofanywa na Azania ili kusaidia jamii katika mahitaji muhimu.

Mtoto yatima aliyekuwapo katika hafla hiyo, Safina Muhsin aliomba benki hiyo kuendelea kuwa karibu nao kwa masuala mbalimbali.

Monday, June 11, 2018

Dar kuutumia ukuta wa bahari kibiashara

 

Dar es Salaam. Jiji la Dar es Salaam limetoa wiki mbili za kupata ushauri juu ya matumizi sahihi ya ukuta uliojengwa pembezoni mwa Bahari ya Hindi, ili kuliongezea mapato.

Hilo limebainishwa na meya Isaya Mwita alipozungumza na gazeti hili kuhusu mikakati ya kuutumia ukuta huo wenye urefu wa mita 920 pembezoni mwa Barabara ya Barrack Obama.

Miongoni mwa mipango iliyopo, Mwita alisema ni kuifanya sehemu hiyo iwe forodha kama ile ya Zanzibar ambayo watu hupumzika huku wakipata huduma mbalimbali.

Naye katibu mkuu, Ofisi ya Makamu wa Rais (Muungano na Mazingira), Joseph Malongo alisema ukuta kama huo umejengwa Zanzibar na Tanga kwa zaidi ya Dola 5 milioni za Marekani. (Bakari Kiango)

Monday, June 11, 2018

KNCU kukopa zaidi ya Sh2 bilioni msimu huu wa kahawa

 

By Florah Temba, Mwananchi ftemba@mwananchi.co.tz

Moshi. Licha ya takriban miaka 10 kupita kwenye hali ngumu ya madeni, Chama Kikuu cha Ushirika Mkoa wa Kilimanjaro (KNCU) kimeruhusiwa kukopa mpaka Dola 1 milioni za Marekani kwa ajili ya ununuzi wa kahawa msimu huu ili kukisaidia kujiimarisha.

KNCU kililazimika kuuza shamba lake la Garagarua mwaka jana lenye ukubwa wa heka 3,429 kwa Sh9.3 bilioni ili kulipa madeni.

Kati ya fedha hizo, Sh5.2 bilioni zililipwa Benki ya CRDB kama deni na riba ya mkopo, huku mwekezaji aliyekuwa amewekeza katika shamba hilo akilipwa Sh3 bilioni kama fidia.

Katika azimio lililopitishwa katika mkutano mkuu wa 34 wa KNCU, meneja wa chama hicho, Honest Temba alisema wataanza ununuzi wa kahawa mnadani muda mwafaka.

Katika msimu huu wa mwaka 2018/19, Serikali imetangaza kuanza kutumika kwa mfumo wa stakabadhi ghalani katika ununuzi wa kahawa hatua ambayo Temba alisema itaondoa madeni ya vyama vya msingi.

Mrajisi msaidizi wa vyama vya ushirika mkoani Kilimanjaro, John Henjewele alivitaka vyama vya msingi kusimamia ubora wa kahawa kuhakikisha inaandaliwa kwa kuzingatia viwango vilivyowekwa ili kupata bei nzuri sokoni.

“Tunakwenda kwenye biashara ya kimataifa, naomba vyama vya msingi vizingatie ubora kwani tunatambua ili kahawa iweze kupata bei nzuri lazima iwe na ubora wa hali ya juu,” alisema.

Naye mwenyekiti wa Chama cha Msingi cha Mwika Kusini Mashariki, Fanuel Silayo alisema uamuzi wa mkutano mkuu wa kukopa fedha benki kununua kahawa utaongeza faida kwa KNCU na kubadilisha muonekano wa chama.

jinamizi la madeni

Katika matumizi ya fedha za shamba la Garagarua, Sh133.5 milioni zilitumika kulipa kodi; ufuatiliaji na gharama za kitaalamu Sh236 milioni, ushuru wa stempu Sh93 milioni; na kodi ya ardhi Sh16 milioni.

Mwaka huu, chama hicho kilikuwa na mpango wa kuuza shamba lingine la Lerongo lenye ukubwa wa heka 581 ili kunusuru benki yake ya Ushirika Kilimanjaro (KCBL) isifungwe.

Benki Kuu ya Tanzania (BoT), iliipa benki hiyo miezi sita kuongeza mtaji wake kutoka Sh1.5 bilioni wa sasa hadi Sh5 bilioni, vinginevyo ingeifunga kama ilivyofanya kwa baadhi ya benki nchini.

Hata hivyo, akihutubia mkutano wa hadhara huko Serengeti mkoani Mara Waziri Mkuu, Kassim Majaliwa, alizuia uuzwaji wa shamba hilo hadi Serikali itakapomaliza kuhakiki mali za vyama vya ushirika nchini.

Monday, June 11, 2018

Rwakatare akopesha wanawake Sh37 mil

 

By Mwandishi Wetu, Mwananchi mwananchipapers@mwananchi.co.tz

Kilombero. Mbunge wa Viti maalumu (CCM), Getrude Rwekatare amekopesha Sh37 milioni kwa vikundi 185 vya wanawake katika majimbo ya Kilombero na Mlimba ili wajikwamue na umaskini.

Rwakatare alisema mikopo hiyo inayotolewa kila kata wilayani Kilombero, inalenga kumuendeleza mwanamke ili ajitegemee kiuchumi.

“Tulianza kutoa mikopo hii kwa kata 51 za Ifakara zilizopata Sh10.2 milioni. Tarafa za Mang’ula na Kidatu kuna vikundi 65 vilivyokopa Sh13 milioni na Jimbo la Mlimba vikundi 69 vilivyopata Sh13.8 milioni. Kuna kata tano hazijapewa fedha,” alisema.

Rwakatare aambaye pia ni mchungaji alifafanua kuwa kila kikundi kilikopeshwa Sh200,000 na baada ya miezi miwili kinatakiwa kurejesha Sh210,000.

Naye mratibu wa mafunzo ya ujasiriamali na mikopo hiyo, Hadija Lifulama alisema baada ya vikundi hivyo kupata mkopo huo vinatakiwa kurejesha mapema ili viweze kupata mara mbili yake ili kufanikisha biashara zao.

“Hakuna mwanamke mshamba kwenye maendeleo. Usichukue mkopo na kununua dera ili uonekane wa leo. Maendeleo huja kwa mwanamke asiyebagua kazi ya kufanya kujipatia kipato,” alisema.

Monday, June 11, 2018

Uturuki yaridhishwa na mazingira ya biashara



Balozi wa Uturuki nchini, Ali Davutoglu

Balozi wa Uturuki nchini, Ali Davutoglu 

By Ephrahim Bahemu ebahemu@mwananchi.co.tz

Dar es Salaam. Serikali ya Uturuki imesema mazingira ya biashara na uwekezaji nchini, ni mazuri na kuahidi kuendeleza diplomasia ya uchumi na Tanzania.

Hayo yalisemwa na Balozi wa Uturuki nchini, Ali Davutoglu na kufafanua kuwa yanaruhusu ushindani wenye usawa sokoni jambo ambalo ni zuri.

Aliyasema hayo mwishoni mwa wiki iliyopita wakati wa futari iliyoandaliwa na Shirika la Ndege la Uturuki (Turkish Airlines) kwa ajili ya wateja, mawakala wa tiketi, maofisa wa ubalozi na wadau wengine. “Unaweza kusikia watu wakisema wanaona mabadiliko ya mazingira ya biashara nchini, lakini mimi naona ndiyo sawa sasa kwani wafanyabiashara wengi wanalipa kodi stahiki jambo ambalo ni manufaa kiuchumi kwani sokoni kuna ushindani wenye usawa,” alisema.

Katika miaka 18 iliyopita, alisema biashara na uwekezaji kati ya Tanzania na Uturuki umeimarika na utaendelea kushamiri zaidi.

Naye meneja masoko wa Turkish Airlines, Taylan Saylam alisema mfungo wa Ramadhan ni wakati mahsusi kwa watu kukaa pamoja.

-->