Wednesday, September 19, 2018

Mapato Acacia yaathiri halmashauri

 

By Rehema Matowo, Mwananchi rmatowo@mwananchi.co.tz

Nyang’hwale. Mapato ya ushuru wa huduma yatolewayo na mgodi wa dhahabu wa Acacia Bulyanhulu kwa Halmashauri ya Nyang’hwale mkoani Geita yameendelea kushuka kutoka Sh400 milion zilizotolewa Januari/Juni 2016 hadi kufikia Sh59 milion kwa kipindi cha Januari/Juni.

Kushuka kwa mapato hayo kunasababisha maendeleo ya halmashauri hiyo kudorora kutokana na miradi mingi kutegemea mapato ya ndani.

Akizungumza kwenye makabidhiano ya hundi ya fedha hizo kati ya halmashauri na uongozi wa mgodi wa Bulyanhulu, Mkurugenzi Mtendaji wa Halmashauri ya Nyang’hwale, Mariam Chaurembo alisema hali hiyo ina athiri maendeleo ya halmashauri.

“Malengo yetu mwaka jana ilikuwa kukusanya Sh1 bilioni lakini tumekusanya Sh800 milioni tu, kushuka kwa mapato haya kunatufanya tutetereke lakini tunajipanga kwa vyanzo vipya vya mapato ili tuweze kufikia malengo,” alisema Chaurembo.

Akikabidhi hundi hiyo, meneja mkuu wa mgodi wa dhahabu wa Bulyanhulu, Benedict Busunzu alisema katika kipindi cha Januari hadi Juni ushuru wa huduma unaopaswa kulipwa na mgodi huo ni Sh181.1 milioni.

Alisema halmashauri ya Nyang’hwale imelipwa asilimia 33 ya fedha hizo, huku asilimia 67 sawa na Sh121.3 milioni ikilipwa halmashauri ya Msalala kwa kuzingatia makubaliano baina ya mgodi na halmashauri hizo mbili.

Alisema sababu za kushuka kwa mapato ni kutokana na kushuka kwa uzalishaji lakini kutokana na mazungumzo baina ya Serikali na Acacia yanayoendelea wana imani kurudi kwenye uzalishaji mkubwa.

Mkuu wa wilaya hiyo, Hamimu Gwiyama aliitaka halmashauri hiyo kubuni vyanzo vipya vya mapato vitakavyo ongeza mapato ya ndani wakati huu wanaosubiri hatma ya mazungumzo.

Monday, September 17, 2018

CRDB yageukia Vicoba, harusi

 

By Julius Mnganga, Mwananchi jmnganga@mwananchi.co.tz

Dar es Salaam. Kutokana na kuongezeka kwa matukio ya wizi wa fedha unaochangiwa na kukosekana kwa uaminifu kwa wanavikundi vya kujikwamua kiuchumi, Benki ya CRDB imebuni bidhaa tatu mpya ikiwamo akaunti ya Vicoba kupata akaunti kupitia simu ya mkononi ili kuondokana na changamoto zinazowakabili.

Suluhisho hilo limebainishwa na meneja wa huduma za mtandao wa CRDB, Edith Metta alipotoa elimu kwa wanahabari kuhusiana na huduma hizo mpya kwa wateja.

Kwa siku za karibuni, Metta alisema kumekuwa na changamoto kwa baadhi ya vikundi kupoteza fedha kutokana na wizi au mmoja kukimbia nazo hali hiyo ilisababisha benki hiyo kuja na suluhisho.

Alizitaji huduma hizo mpya kuwa ni akaunti ya kikundi, akaunti ya akiba na akaunti ya malipo.

Kwa wanachama wa Vicoba alisema wanaweza kufungua akaunti ya pamoja kupitia simu za mkononi kisha kusajili jina la kikundi na kuanza kuweka na kutoa fedha bila makato yoyote.

“Mwanachama ana uwezo wa kuangalia salio lililopo katika akaunti ya kikundi na iwapo kuna fedha imetolewa kinyemela akajua,” alisema.

Metta alisema akaunti hiyo inahakikisha fedha zinakuwa salama na iwapo kuna udanganyifu umefanywa na yeyote wanakikundi wanajua mapema.

Akaunti hiyo inatoa mwanya kwa wanachama kuanzia watatu hadi 3,000 wanaoweza kutunza mpaka Sh50 milioni, huku kukiwa na fursa ya kupata mikopo kwa kikundi kitakachokuwa na kumbukumbu nzuri za utunzaji fedha.

Licha ya Vicoba, alisema akaunti hiyo inazifaa kamati za harusi pia kwa kuwahamasisha wachangiaji wote kufanya malipo kupitia akaunti ya kikundi na fedha zao zikawa salama kuliko kumuachia mweka hazina kwenda nazo nyumbani kwake.

“Kuliko mtu aende benki kutoa fedha ya mchango au mweka hazina kupata shida ya kuweka kumbukumbu za wachangiaji, ukihamisha fedha kwenda akaunti hii salio litaongezeka hivyo kuondoa haja ya kuandaa taarifa ya fedha,” alisema Metta.

Kupata taarifa za akaunti kupitia simu ya mkononi, alisema mteja atatakiwa kubonyeza *150*62# na kufuata maelezo akitumia kitambulisho cha mpigakura au cha taifa. Mchakato huo unakamilika ndani ya dakika mbili.

Metta alisema lengo la huduma hiyo ni kuwafikia wateja wengi hususan waliopo maeneo ya vijijini ambao wamekuwa wakihifadhi fedha zao katika mfumo usio rasmi jambo linalohatarisha usalama wa fedha hata wao wenyewe.

Alisema huo ni miongoni mwa ubunifu wa kukomesha uhalifu.

Monday, September 17, 2018

Walima korosho wajipanga upya kuuza tani 2,000

 

By Burhani Yakub, Mwananchi byakub@mwananchi.co.tz

Tanga. Wadau wa korosho mkoani Tanga, wamejiwekea mikakati ya kufanyia kazi changamoto zinazokwaza uzalishaji na ununuzi wa zao hilo ili msimu ujao ununuzi ufikie tani 2,000 kutoka tani 734 mwaka 2017/18.

Mikakati hiyo iliwekwa juzi katika kikao kilichoandaliwa na Bodi ya Korosho Tanzania (CBT) na kuhudhuriwa na wakulima, wanunuzi na viongozi wa halmashauri zote za Tanga.

Miongoni mwa changamoto zilizotajwa ni kuchelewa kufunga minada ya ununuzi hivyo kutoa nafasi kwa walanguzi kununua nje ya mfumo rasmi kisha kuzitorosha nje ya nchi.

Kikao hicho kilichoongozwa na mkuu wa Mkoa wa Tanga, Martine Shigella kilielezwa tatizo la pembejeo kutowafikia wakulima kwa wakati na elimu duni ya utunzaji wake. Meneja wa CBT Kanda ya Kaskazini, Ugumba Kilasa alisema ili kuhakikisha uzalishaji unaongezeka mipango inafanyika ya kuwezesha miche na pembejeo zipatikane wilaya za Muheza, Pangani, Kilindi, Korogwe na Tanga tofauti na sasa zipo Mkinga tu.

Naye mkulima kutoka kijiji cha Gezani, Mbwana Mamboleo alisema hakuna njia ya mkato kwa wakulima kuongeza uzalishaji kama hawafuati kanuni za utunzaji wake ikiwamo kusafisha na kutoa vitawi kwa wakati.

“Kupata mavuno mazuri kunaanzia kusafishia mikorosho, kuipogolea na kutoa vikonyo. Kuweka dawa inafuatia” alisema.

Monday, September 17, 2018

Ulega: Hakuna sababu ya kuagiza samaki nje

 

By Sharon Sauwa

Dodoma. Wakati kila mwaka tani 22,000 za samaki zinaagizwa kutoka nje ya nchi, Serikali imesema hakuna sababu kwani uwezo wa kuzalisha kitoweo hicho cha kutosha upo.

Akizungumza na gazeti hili jijini hapa jana, naibu waziri wa Mifugo na Uvuvi, Abdallah Ulega alisema kiwango cha samaki kinachozalishwa nchini ni tani 350,000 wakati mahitaji ni tani 750,000 kwa mwaka.

“Tunaagiza tani 22,000 kila mwaka lakini hakuna sababu ya kuagiza kiwango hicho tunao uwezo wa kuzalisha,” alisema.

Alisema tayari kuna mkakati wa Serikali na Benki ya Maendeleo Tanzania (TADB) katika kuikuza sekta hiyo.

Naye kaimu mkurugenzi wa TADB, Japhet Justin alisema tayari wametoa mikopo katika mikoa mbalimbali ikiwamo Morogoro na Arusha ikiwa ni hatua za awali.

Tuesday, September 11, 2018

Emirates kuimarisha usafirishaji mizigo nchini

 

By Mwandishi Wetu, Mwananchi. mwananchipapers@mwananchi.co.tz

Dar es Salaam. Wakati baadhi ya kampuni zikisitisha safari zake nchini, Kampuni ya ndege ya  Emirates Tanzania imesema inaendelea kufanya vizuri kibiashara na kiuwekezaji kwa  kutoa huduma inayoendana na mahitaji ya wateja wake.

 Pia imejisifu  kufanya vizuri katika usafirishaji mizigo.

Akizungumza na wanahabari leo Septemba 11, Meneja wa Kampuni hiyo nchini,  Rashed Alfajeer amesema kampuni hiyo imeendelea kufanya vizuri na inajizatiti kuendelea kuwaunganisha Watanzania hasa wafanyabiashara katika  nchi zote 85 inapofika.

“Kadri yanavyotokea mabadiliko ya kimaendeleo na mahitaji, ndivyo umuhimu wa kuboresha huduma na uwekezaji unavyoongeka,” amesema Alfajeer.

Amesema Tanzania ni moja kati ya nchi muhimu katika biashara yao ndiyo maana ipo ndege inayofanya safari kila siku.

 “Ndege yetu aina ya Boeing 777 inabeba zaidi ya tani 100 za mizigo. Kwa mwaka jana pekee tumesafirisha tani milioni 2.3  kutoka Tanzania kwenda nchi za Falme za Kiarabu na Asia,” amefafanua.

Kuhusu kusafirisha mizigo kuingiza nchini anasema kwa mwaka jana pekee walisafirisha tani 4.5 milioni kutoka nchi za Falme za Kiarabu, India na Hong Kong.

Amefafanua kuwa Emirates imekuwa kiungo muhimu kwa wafanyabiashara wa nyama nchini kwani kiasi kikubwa cha mizigo waliyosafirisha mwaka uliopita ni nyama ya mbuzi na kondoo.

“Uhitaji wa nyama ya mbuzi na kondoo katika nchi za Falme na Kiarabu umewaunganisha wafanyabiashara wa Watanzania na wateja wao waliopo katika mataifa hayo,” amefafanua.

Monday, August 27, 2018

Benki ya AFDB kutekeleza miradi ya Tanzania

 

By Mwandishi Wetu, Mwananchi mwananchipapers@mwananchi.co.tz

Dar es Salaam.Tanzania ni miongoni mwa nchi zinapatiwa fedha nyingi kutoka Benki ya Maendeleo ya Afrika (AfDB) katika kutekeleza miradi ya maendeleo.

Tayari benki hiyo imeshawekeza zaidi ya Sh4.4 trilioni kwenye sekta ya nishati, maji, kilimo na barabara kwa lengo la kuchochea uchumi wa Tanzania ili ufikie lengo la kuwa nchi ya uchumi wa kati unaotegemea viwanda ifikapo 2025.

Haya yamesemwa na Waziri wa Fedha na Mipango, Dk Philip Mpango alipokutana na kufanya mazungumzo na  Mkurugenzi wa benki hiyo anayeiwakilisha Marekani, Steven Dowd Jijini Dar es Salaam leo.

Dk Mpango amesema Tanzania inapata fedha nyingi za kutekeleza miradi ya maendeleo kutoka AfDB kutokana na vipaumbele vya Benki hiyo kuendana na vya Serikali ya Tanzania.

“Miradi inayotekelezwa kwa fedha za AfDB ni pamoja na wa kusafirisha umeme kutoka Mbeya, Sumbawanga hadi Nyakanazi utakao gharimu Dola za Marekani milioni 123, mingine ni ile ya ushirikiano na Sekta Binafsi (Dola 57.6 milioni), ujenzi wa barabara ya Nyakanazi hadi Burundi kupitia Wilaya ya Buhigwe mkoani Kigoma na mradi wa ujenzi wa uwanja wa ndege wa Msalato Jijini Dodoma ambao AfDB imeahidi kutoa Sh200 bilioni  kwa kuanzia,” amesema Dk Mpango.

Naye Mkurugenzi wa  AfDB anayeiwakilisha Marekani, Dowd amesema Tanzania imeonyesha dhamira ya dhati ya kufikia malengo iliyotarajia.

“Kwa msingi huo, bodi ya AfDB itaangalia namna ya kuendelea kuisaidia Tanzania katika miradi mikubwa ya nishati ya umeme na ujenzi wa reli ya kisasa,” amesema.

Pia, ameahidi kuwashawishi wawekezaji kutoka Marekani kuja kuwekeza Tanzania kwa kuwa kuna mazingira mazuri ya uwekezaji na kuishauri Serikali kuweka mazingira mazuri zaidi ya kimikataba kati yake na wawekezaji ili waweze kuwa na uhakika wa usalama wa uwekezaji wao.

Ameahidi pia kutumia ushawishi wake katika masuala ya biashara na uwekezaji ili wafanyabiashara wengi kutoka Marekani waweze kuwekeza mitaji na teknolojia hapa nchini.

Amesema Rais wa Marekani, Donald Trump ni mtu wa vitendo kuliko maneno na ameihakikishia Tanzania kwamba itapata ushirikiano mkubwa kutoka Marekani.

Akizungumzia maombi ya Serikali ya kutaka benki yake isaidie ujenzi wa miradi mikubwa ya maendeleo ikiwamo ya ujenzi wa reli ya SGR, ya kufua umeme kutoka Mto Rufiji na miundombinu mbalimbali, Dowd amesema wataijadili ili kuangalia namna ya kuifadhili.

Mkurugenzi wa AfDB Kanda ya Afrika, Dk Nyamajeje Weggoro, amesema Tanzania ni miongoni mwa nchi za Afrika Mashariki yenye hisa nyingi katika benki hiyo.

“Tanzania  inahisa takribani asilimia moja kati ya tano zinazomilikiwa na nchi nane za Uganda, Rwanda, Ethiopia, Kenya na Sudani Kusini na pia, inatekeleza miradi mbalimbali inayofadhiliwa na AFD,” alisema.

 

Friday, August 24, 2018

Ushindani wa soko wanufaisha wateja, Halopesa yaondoa makato



Naibu mkurugenzi wa Halotel, Nguyen Van Son

Naibu mkurugenzi wa Halotel, Nguyen Van Son 

By Mwandishi Wetu, Mwananchi mwananchipapers@mwananchi.co.tz

Dar es Salaam. Kampuni ya Halotel imetangaza kuondoa gharama za kutuma fedha huku ikiwazawadia muda wa maongezi wateja watakaoweka fedha kwenye akaunti zao.

Akizindua mpango huo, naibu mkurugenzi wa Halotel, Nguyen Van Son alisema ni hatua ya kuhakikisha wateja wanakuwa na wigo mkubwa kufurahia na kunufaika zaidi na huduma za mtandao huo bila kuwa na wasiwasi wa makato kila wanapotuma fedha mahali popote, na wakati wowote.

“Hii ni fursa nyingine ya kuongeza tabasamu na furaha kwa wateja wetu wa Halopesa inayoendana na hali ya uchumi kuondokana na usumbufu wanapotuma fedha. Sasa wataokoa makato ya miamala na kuzitumia fedha hizo kadiri wapendavyo,” alisema Son.

Licha ya kuondoa gharama za kutuma fedha kutoka Halopesa kwenda Halopesa, mkurugenzi huyo alisema wateja watapata muda wa maongezi bure kila wanapoweka fedha kwa wakala.

Alisema kila mteja atakayeweka kuanzia Sh1,000 kwa wakala atapata muda wa maongezi wa bure huku wakiendelea kunufaika kwa namna mbalimbali kila wanapotumia huduma hizo.

Kuzinduliwa kwa kampeni hiyo ni mwendelezo wa azma ya kuboresha huduma za fedha kwa njia ya mtandao kwa wananchi wenye vipato tofauti.

Licha ya kuondoa gharama za miamala kwa wateja wanaotuma fedha kutoka Halotel kwenda Halotel, kampuni hiyo imepunguza gharama za kutuma fedha kwenda mitandao mingine.

Tuesday, August 21, 2018

Serikali yajivunia miradi 20 ya ubia

 

By Burhani Yakub

Tanga. Miradi 20 yenye thamani ya Dola 863.39 milioni za Marekani imewekezwa nchini kupitia utaratibu wa ubia kati ya sekta ya umma na binafsi (PPP).

Hatua hiyo imechangia kusukuma maendeleo ya nchi kwa miaka 28 badala ya kutegemea bajeti ya Serikali pekee.

Naibu katibu mkuu Wizara ya Fedha na Mipango, Suzan Mkapa (pichani) alitoa taarifa hiyo jana akifungua mafunzo ya PPP kwa maofisa wa wizara na taasisi za Serikali jijini Tanga.

Mkapa aliutaja mradi wa aina hiyo kuwa ni uendeshaji wa huduma za usafiri Dar es Salaam (Udart) awamu ya kwanza ambao upo hatua ya utekelezaji.

Naye mtaalamu wa PPP kutoka Benki ya Dunia, Edward White alipongeza kwa kufanikisha mpango huo ambao umezaa matunda kwa baadhi ya nchi duniani.

Tuesday, August 21, 2018

Uwekezaji wa TCC wawakuna wabunge

 

By Mwandishi Wetu, Mwananchi mwananchipapers@mwananchi.co.tz

Dar es Salaam. Kamati ya Bunge ya Viwanda, Biashara na Mazingira imeipongeza kampuni ya Sigara Tanzania (TCC Plc) kwa utekelezaji wa malengo ya ubinafsishaji na kuendeleza azma ya serikali ya viwanda.

Pongezi hizo zilitolewa wakati wa ziara ya kamati hiyo iliyoratibiwa na Shirikisho la Viwanda Tanzania (CTI), ikishirikisha naibu waziri wa wizara hiyo, Stella Manyanya na watendaji wengine.

Mwenyekiti wa kamati hiyo, Suleiman Sadiq aliipongeza TCC Plc kwa mafanikio makubwa na kwamba, wameridhishwa na walichokiona na kuutaka uongozi na wafanyakazi kuendeleza kazi hiyo nzuri.

“TCC Plc ni mfano mzuri unaopaswa kuigwa na wengine kwani imekuwa imara katika ulipaji wa kodi serikalini... kamati imezichukua changamoto zenu tutaishauri Serikali inavyostahili,” alisema.

Naye Manyanya alisema kampuni hiyo imeonyesha mfano katika mafanikio ya ubinafsishaji kwa kuwa baadhi ya mashirika yaliyobinafsishwa wakati mmoja na TCC Plc yalishindwa kujiendesha na yamekufa.

Mtendaji mkuu wa TCC Plc, Alan Jackson alisema kwa mwaka jana walilipa serikalini Sh227 bilioni zikiwa ni kodi ya ongezeko la thamani (Vat), mapato na ushuru wa bidhaa.

Tuesday, August 21, 2018

Wakulima wa mboga walia, soko hakuna!

 

By Janeth Joseph jjoseph@mwananchi.co.tz

Hai. Wakulima wa mbogamboga wilayani Hai mkoani Kilimanjaro, wameiomba Serikali kuwapatia masoko ya uhakika na maeneo ya kutosha kwa ajili ya kilimo hicho.

Akizungumza kwa niaba ya wanakikundi cha mbogamboga wilayani hapa jana, Nice John alisema wanalima mboga hizo bila kuwa na soko la uhakika hali inayowafanya kupata hasara ikilinganishwa na gharama za uzalishaji.

John alisema iwapo Serikali itawasaidia kupata soko la uhakika na maeneo ya kutosha kwa ajili ya kilimo hicho, itawasaidia kujikwamua na umaskini.

Naye meneja wa mradi wa kuwawezesha wanawake kiuchumi mkoani Kilimanjaro kupitia shirika linalolinda na kutetea haki za Wanawake (Kwieco), Stewart Nathaniel alisema wameanzisha mradi huo kuwasaidia wanawake baada ya kuona wengi wao wananyanyasika katika familia.

Nathaniel alisema kwamba baada ya kuona fursa ya kuwapo kwa watalii wengi mkoani hapa waliwahamasisha wanawake hao kwa kuwatafutia wataalamu wa kilimo hasa cha mbogamboga.

-->