Wednesday, January 11, 2017

Damu Salama kanda ya Ziwa yajikita kutoa elimu

 

By Jonathan Musa, Mwananchi jmusa@mwananchi.co.tz

Mwanza. Ofisa Ubora wa Damu kutoka Mpango wa Taifa wa Damu Salama Kanda ya Ziwa, Emmanuel Ndaki amesema kuwa wanaendelea kutoa elimu kwa jamii ili kuwaondoa hofu wananchi waweze kuchangia damu.

Ndaki amesema hayo kutokana na hospitali kukabiliwa na upungufu wa akiba ya damu kunakotokana na hofu ya kupimwa na kugundulika kuwa na maambukizi ya Virusi vya Ukimwi (VVU) miongoni mwa wananchi.

Amesema ugonjwa huo umekuwa ni miongoni mwa vikwazo vya watu wengi kukwepa kujitokeza kuchangia damu.

“Ni hiari ya mtu kupima VVU  na kupokea majibu. Tunachohitaji ni watu kujitolea kuchangia damu. Tukishapima hatutoi majibu kwa wahusika bila ridhaa yao,” amesema Ndaki.

 Ametaja kukosa uaminifu kwenye ndoa na uhusiano ni miongoni mwa sababu zinazowafanya kuwa na hofu wanapoombwa kuchangia damu wakidhani wameathirika.

 

Sunday, October 16, 2016

By Julieth Ngarabali, Mwananchi jngarabali@mwananchi.co.tz

Chalinze. Zahanati ya Vigwaza iliyopo wilayani Bagamoyo, Mkoa wa Pwani ambayo ilifunguliwa miaka mitatu iliyopita, haijawahi kupata mgawo wa dawa kutoka kwa mamlaka husika. 

Kutokana na hali hiyo, Diwani wa Vigwaza wilayani humo, Mohsin Bharwani ameamua kutoa msaada wa vifaatiba na dawa mbalimbali muhimu zenye thamani ya zaidi ya Sh4.5 milioni kwa ajili ya zahanati hiyo na nyingine ya Ruvu Darajani.

Akikabidhi dawa hizo kwa waganga wa zahanati hizo, Bharwani alisema ameguswa kutoa msaada huo ili kupunguza malalamiko ya wananchi wanaodai Serikali imeshindwa kuwapelekea dawa.

Ofisa Tabibu wa Zahanati ya Vigwaza, Alexander Ngalawa alisema mahitaji ya dawa ni makubwa kutokana na wingi wa wagonjwa wanaowahudumia kutoka vijiji  vya Buyuni, Vigwaza, Kwazoka na Mnindi.

 

Monday, September 12, 2016

DED mpya Moshi hajaripotikazini

Wednesday, June 22, 2016

Kauli ya Ukawa sasa dhahiri bungeni

By Nuzulack Dausen, Mwananchi ndausen@mwananchi.co.tz

Dodoma. Kauli iliyotolewa na wabunge wa Ukawa kuwa watasusa kushirikiana katika kazi za aina yoyote ile na wabunge wa CCM, imedhihirika jana baada ya baadhi yao kususa kusalimiana nao.

Wabunge wa CCM, Richard Ndassa (Sumve) na Kangi Lugola (Mwibara), wameeleza kutojibiwa salamu zao na wabunge hao walipowasalimia.

Monday, May 23, 2016

Ajirusha akiwa uchi kwenye kundi la simba

Franco Luis akishambuliwa na simba kabla ya

Franco Luis akishambuliwa na simba kabla ya kuokolewa na askari wa bustani ya wanyama.  Picha na Dailymail 

Chile. Ukistaajabu ya Mussa utayaona ya Firauni,  kijana mmoja aliyefahamika kwa jina la Franco Luis ameshambuliwa na kundi la simba baada ya kujirusha ndani ya bustani ya wanyama hao akiwa uchi.

Luis  aliwaacha mdomo wazi watu waliofurika kwenye bustani hiyo ya Santiago  mwishoni mwa wiki ambao wengi waliambatana na  familia zao.

Kwa mujibu wa gazeti la Daily Mail la Uingereza, kijana huyo mwenye miaka 20, alikimbizwa hospitali baada ya walinzi wa bustani hiyo kumuokoa kwa  kuwaua simba wawili waliokuwa wanamshambulia.

Uongozi wa bustani hiyo ulithibitisha tukio hilo na kudai kwamba kijana huyo alishambuliwa akiwa uchi wa mnyama baada kuvunja uzio na kuingia kwenye kundi hilo.

Mkurugenzi wa Santiago Alejandra Montalva alisema walijua kijana huyo aliingia  kwenye bustani hiyo kama wateja wa kawaida wanavyolipa tiketi  kwa lengo  la kutembelea hapo.

‘‘Baada ya kufanya malipo kama mteja wa kawaida kijana huyo hakupita kwenye njia inayotumiwa na wateja bali aliezua paa la simba hao na kutumbukia ndani na kuanza kushambuliwa,’’ alisema

Alisema ni kitendo cha kushangaza kwani kila mtu alishikwa na bumbuwazi baada ya kumuona kijana huyo akijirusha kwenye kundi hilo la simba na kuanza kupigana nao.

Alisema askari wa bustani hiyo walitumia nguvu za ziada kuhakikisha wanaokoa maisha ya kijana huyo, ambaye hawajafahamu fika kama alikuwa na akili timamu.

 Atoa sababu

 Kwa upande wake kijana huyo alisema alifanya kitendo hicho cha kustaajabisha kila mtu kutokana na ufunuo alioshushiwa na  Mungu.

Shuhuda

Mmoja wa mashuhuda wa tukio hilo, Cynthia Vasquez alisema  baada ya Luis kujirusha ndani ya bustani hiyo, simba waliokuwa ndani hawakumdhuru kwanza.

“Cha kushangaza simba hao walianza kucheza naye,”alisema Vasquez

 Vasquez ambaye alikuwa miongoni mwa wageni waliotembelea bustani hiyo, alisema baada ya dakika chache   Lius alisikika akipiga kelele. “Walianza kumrarua...alipiga kelele aliita jina la Yesu,”alisema.                       

Alisema kelele hizo ziliwavuta watu wengi ambao walifika kushuhudia tukio hilo.

Vasquez alisema walinzi waliofika kuokoa maisha ya Luis walilazimika kufyatua risasi juu ili kuwatawanya watu. “Waliingia baada ya kuwaua simba hao na kumtoa Luis ambaye alikuwa ameshajeruhiwa vibaya,” alisema.

Baba aongea

Baba mzazi wa Luis alisema  alishaanga kusikia watu wanapiga kelele na alipofika katika eneo la tukio alimkuta kijana wake akiwa amejeruhiwa vibaya na simba.

Monday, August 10, 2015

NYANZA: Ajipiga risasi, aacha ujumbe kwa baba mkwe

By Jovither Kaijage, Mwananchi

Ukerewe. Mlinzi wa Kampuni ya Ulinzi ya Jitegemee ya Mwanza, Stephano Imbuhu (39), amejiua kwa kujipiga risasi kutokana na kile kinachodaiwa mgogoro katika ndoa.

Habari zilizopatikana kutoka kituo chake cha kazi, Kisiwani Kweru Mto, Ukerewe zinadai kuwa marehemu alijiua juzi saa tisa alasiri baada ya mkewe, Edita Makalanga  akiwa na watoto wao wawili  kuondoka nyumbani na kwenda kusikojulikana.

Inadaiwa kuwa, Edita aliondoka nyumbani bila kumtaarifu mume wake na hata alipopigiwa simu yake ya mkononi haikupatikana.

Majirani walidai kuwa uamuzi wa mke kuondoka bila kutoa taarifa, ulimchukiza marehemu na kuamua kujipiga risasi.

Kamanda wa Polisi wa Mkoa wa Mwanza, Charles Mkumbo  alithibitisha kutokea tukio hilo.

Alisema marehemu alijiua kwa kutumia bunduki aina ya Rifle yenye namba 70526 mali ya kampuni aliyokuwa akifanya kazi.

Kamanda Mkumbo alisema marehemu alijipiga risasi kifuani akiwa chumbani.
“Kabla ya kujiua, aliandika ujumbe kupitia simu yake ya mkononi akieleza kuwa ameamua kuchukua uamuzi huo kutokana na mgogoro wa ndoa na mke wake,” alisema Kamanda Mkumbo.

Alisema ujumbe wa kuamua kujiua aliutuma kwa baba mkwe wake, baadhi ya ndugu zake na rafiki yake.

Kamanda Mkumbo alisema ujumbe huo ulikutwa kwenye simu yake ya mkononi.

Ujumbe huo uliandikwa hivi: “Baba mkwe wangu, sistahili kuishi  duniani kwa sababu ya mwanao  kanifanya mimi kama mwanamke na yeye kuwa mwanaume. Naomba uhudhurie mazishi yangu na usiwaache wanangu, Gadina na  Majid. Asante.”

Mlinzi huyo alikuwa akilinda mali za mfanyabishara mmoja kutoka Kisiwa cha Kweru Mto, aliyetajwa kwa jina la Osward Mwandumisya.

Mkuu wa Polisi wa Wilaya ya Ukerewe, Ally Mkalipa alisema amesikitishwa na tukio hilo na kuwataka wananchi kuomba msaada wa ushauri wanapokumbana na matatizo ya kifamilia.

“Kwenye maisha kuna matatizo mengi tunakumbana nayo, mengine yako nje ya uwezo, lakini hata hivyo hakuna sababu ya kujiua. Nawaomba wananchi kutafuta ushauri wanapokabiliwa na matatizo mbalimbali,” alisema Kamanda Mkalipa.

Saturday, January 31, 2015

MTERA, KONDOA KASKAZINI NA KONDOA KUSINI : UKAWA IJIFUNGE MKANDA



Mbunge wa Mtera Livingstone Lusinde

Mbunge wa Mtera Livingstone Lusinde 

Jumatano iliyopita tuliangazia majimbo ya Dodoma Mjini, Bahi na Chilonwa. Leo tunaendelea kuchambua majimbo ya Mkoa wa Dodoma tukijikita kwenye majimbo ya Mtera, Kondoa Kaskazini na Kondoa Kusini.

Kwa sababu wiki iliyopita tuligusia masuala mengi ya jumla kuhusu Mkoa wa Dodoma, leo tutagusia machache tu kabla hatujajikita majimboni.

 

JIMBO LA MTERA

Jimbo la Mtera linapatikana katika Wilaya ya Chamwino mkoani Dodoma. Wilaya ya Chamwino ilianza mwaka 2006 baada ya kugawanywa kwa iliyokuwa Halmashauri ya Dodoma Vijijini ambayo ilizaa Halmashauri ya Bahi na Chamwino.

Kwa mwaka 2014 wilaya ilikadiriwa kuwa na jumla ya watu 349,714. Kwa Sensa ya Watu na Makazi ya mwaka 2012, Wilaya ilikuwa na idadi ya watu 171,661 na wastani wa idadi ya watu kwa kaya ni 4.5.

Shughuli kuu za uchumi katika Wilaya ya Chamwino ni kilimo na ufugaji.  Mazao ya chakula yanayolimwa ni; mtama, uwele, mpunga, mahindi, mhogo, viazi vitamu, kunde, nyonyo, mboga mboga, choroko na mazao ya biashara ni ufuta, zabibu, karanga na hulimwa katika eneo linalofaa. Makadirio ya pato la mkazi kwa mwaka ni Sh540,000 kwa mwaka.

Tangu kuanza kwa vyama vingi nchini Tanzania na hasa katika Uchaguzi Mkuu wa mwaka 1995, Jimbo la Mtera liliendelea kuongozwa na Chama Cha Mapinduzi hadi leo. Waziri Mkuu na Makamu wa Rais Mstaafu wa Tanzania, John Samwel Malecela, ndiye aliyefungua pazia la ushindi wa CCM katika uchaguzi wa mwaka 1995 kwa kupata kura 27,368 dhidi ya kura 1,052 za mgombea wa CUF. Malecela alishinda pia uchaguzi wa mwaka 2000.

Katika Uchaguzi wa Mwaka 2005, John Samwel Malecela wa CCM alipata ushindi wa asilimia 92.7 uliotokana na kura 42,994 huku wagombea wa CUF, TLP, UDP, DP na Chadema wakipata jumla ya kura 3,392 (asilimia 7.3) katika uchaguzi rahisi sana kwa CCM. Hata kwa upande wa kura za Rais, Jimbo la Mtera bado lilitekwa na nguvu ya CCM na mgombea urais wake alipata kura 44,586 (91.4) huku akiwaacha mbali wagombea wa urais wa upinzani ambao walipata kura 14,174 (asilimia 8.6).

Kura za maoni za ndani ya CCM zilizofanyika mwaka 2010 zilizima ndoto za kisiasa za Mzee Malecela. Safari hii aliangushwa na kijana mdogo wa umri wa kumzaa. Watu wengi hudhani kuwa, mwanasiasa nguli kama Mzee Malecela, mwenye uzoefu wa kuwa Mkuu wa Mkoa, Waziri wa Mambo ya Nje, Waziri Mkuu, Makamu wa Rais, Makamu Mwenyekiti wa CCM Taifa, msomi wa ngazi ya shahada ya uzamivu – kwamba angehitaji kupambana na nguli mwenzake na mwenye sifa kama zake ili aangushwe, la hasha! Mambo yalikuwa tofauti sana.

Kijana Lusinde Joseph Livingstone akiwa na umri wa miaka 38 tu alifanikiwa kumng’oa kiongozi mkubwa na mzoefu katika siasa za Tanzania. Lusinde ana historia mchanganyiko ya kisiasa, Mwaka 1992 – 1995 alikuwa mwanachama wa CUF na aliwahi kushikilia wadhifa wa Katibu wa Jimbo la Kawe, baadaye alihamia Chadema na kushikilia wadhifa  muhimu pia na baadaye Lusinde alihamia CCM na kupewa wadhifa wa Katibu Msaidizi kati ya mwaka 2006 – 2007 na baadaye akawa Katibu wa CCM wa Wilaya mwaka 2006 - 2010. Lusinde ana elimu ya darasa la saba tu na ana cheti cha Uongozi kutoka Chuo cha CCM cha Ihemi.

Baada ya CCM kumteua kuwa mgombea ubunge, alipata ushindi mkubwa wa kura 23,612 (asilimia 80.02) dhidi ya kura 4,955 (asilimia 16.79) za wagombea wa vyama vya Chadema, CUF, NCCR na UDP. Jimbo la Mtera ni kielelezo cha kutosha kuwa vyama vya upinzani vina kazi ya ziada ya kufanya katika Mkoa wa Dodoma. Baada ya Mzee Malecela kushindwa kura ya maoni kulitokea mpasuko mkubwa wa CCM jimboni humo, lakini mpasuko huo haukuvinufaisha vyama vya upinzani.  Kwa upande wa wagombea urais, jimbo la Mtera lilitoa matokeo yaleyale yaliyotarajiwa, CCM ilijibebea ushindi mkubwa wa asilimia 82.31 (kura 24,248) huku vyama vya CUF, Chadema na NCCR vikipata kura 3,759 (12.76) na vyama vya APPT, UPDP na TLP vikipata jumla ya asilimia 1.52.

Kati ya mwaka 2010 – 2014 vyama vya Upinzani havijafanya kazi kubwa ya kisiasa katika jimbo la Mtera na hata Mbunge wake Livingstone Lusinde hajasifika kwa kufanya jambo lolote kubwa katika jimbo hilo. Wananchi wa Mtera na maeneo ya Dodoma ni kati ya wananchi wenye vipato vya chini sana hapa Tanzania na hakujawa na mikakati bayana ya kukuza vipato vyao kupitia sekta za kilimo na ufugaji.

Kwa hivyo, mchuano mkubwa wa ubunge katika jimbo hili utakuwa ndani ya CCM na tayari makada kadhaa wa CCM wameonyesha nia ya kugombea kwenye kura za maoni za CCM. Mmoja ni William Malecela “Le Mutuz” (mtoto wa mzee John Malecela) ambaye sehemu kubwa ya maisha yake ameifanya ughaibuni na baada ya kurejea nchini amepata nafasi ya kushiriki siasa za CCM moja kwa moja. Kwa sababu Lusinde ni  mbunge mwenye vituko, kejeli na kila aina ya siasa za kuchangamsha na kushangaza, kuudhi na kubughudhi sana, kuna uwezekano mkubwa kuwa CCM ikamrejesha tena kugombea Oktoba mwaka huu ikiwa William Malecela hatajipanga zaidi.

WILAYA YA KONDOA

Wilaya ya Kondoa ni moja kati ya wilaya za Mkoa wa Dodoma. Katika sensa ya mwaka 2012, idadi ya wakazi wa Wilaya ya Kondoa ilikuwa 269,704. Wilaya hii ina majimbo mawili ya uchaguzi, Jimbo la Kondoa Kaskazini na Kondoa Kusini.

Wilaya ya Kondoa ilianza kama kituo cha biashara katika karne ya 19 na ni mji ambao ulipokea madhehebu ya dini mapema kabisa. Msikiti wa kwanza ulijengwa Kondoa mwaka 1885 na kanisa la kwanza lilijengwa mwaka 1910. Wakati wa ukoloni wa Kijerumani mji ulijulikana kwa jina Kondoa-Irangi ukawa kituo cha jeshi la kikoloni la Kijerumani. Mwaka 1912 ilikuwa makao makuu ya mkoa mpya wa Kondoa-Irangi. Makabila makuu ya wilaya hii ni Warangi, Wasandawe, Waburunge na Wasi. Kirangi ndiyo hasa lugha ya Warangi, ambayo wao huiita “Kilaangi”.

JIMBO LA KONDOA KASKAZINI

Jimbo hili tangu mwaka 1995 lilikuwa chini ya CCM. Khalid Samure Suru msomi wa stashahada ya Ualimu ya Chuo cha Ualimu Marangu alishinda uchaguzi wa mwaka 1995 akipata upinzani hafifu. Pia, Mwaka 2000 Khalid Samure Suru alishinda na kuongoza kwa kipindi cha pili hadi mwaka 2005.

Kwenye uchaguzi wa mwaka 2005, CCM ilimleta mwanamama Zabein Mhaji Mhita. Mhita aliyezaliwa Septemba 9, 1950 (Miaka 65 sasa) na mhitimu wa shahada ya elimu kutoka Chuo Kikuu cha Dar es Salaam akiwa na uzoefu wa kufanya kazi kama mkurugenzi wa elimu wa wizara ya Elimu, aliipatia CCM ushindi wa kura 42,899 (asilimia 60.8) dhidi ya mgombea wa CUF, Othman Omar Dunga aliyepata kura 26,592 (asilimia 37.7) huku wagombea wa DP na TLP wakipata jumla ya kura 1,020 (asilimia 1.4). Kwa upande wa urais, Jakaya Kitwete wa CCM alipata kura 47,521 (asilimia 64.6), akifuatiwa na Profesa Ibrahim Lipumba wa CUF 24,521 (asilimia 33.5) huku wagombea urais wengine wanane wakipata jumla ya kura 1371 (asilimia 1.9).

Baada ya uchaguzi wa mwaka 2005, mgombea wa CUF ambaye alikuwa amekwishajijenga vya kutosha na alitarajiwa kulichukua jimbo hilo kirahisi uchaguzi ambao ungefuatia, Omar Dunga, alihamia CCM na kuua chachu aliyokuwa ameianzisha. Uchaguzi Mkuu wa Mwaka 2010 ulishuhudia upinzani mkali kutoka kwa Mgombea wa CUF, Deni Yahya Rashid aliyeishia kupata kura 17,413 (asilimia 31.13) huku Mgombea wa CCM yuleyule  Zabein Muhaji Mhita akipata kura 33,413 (asilimia 59.74) na kushinda ubunge kwa kipindi cha pili (2010 – 2015) safari hii akiwa na uzoefu wa miaka saba kama Naibu Waziri wa Sayansi, Teknolojia na Elimu ya Juu (2000 – 2005) na Maliasili na Utalii (2006 – 2008). Wagombea wa Chadema na UDP kwa ujumla walipata kura 3,482 (asilimia 6.23).

Nguvu, uwezo na ubora wa chama cha CUF katika jimbo la Kondoa Kaskazini ni jambo lililo dhahiri. Mara zote CCM inashinda si kwa zaidi ya asilimia 61. Kukosekana kwa mgombea mahiri, mwenye msimamo na anayeweza kuaminiwa na wananchi imekuwa ni tatizo ambalo limeikabili CUF katika jimbo hili. Wagombea wake mara nyingi hurubuniwa mara tu baada ya uchaguzi mmoja na kukosa fursa ya kulichukua jimbo hili katika uchaguzi unaofuata. Wananchi wa Kondoa Kaskazini wako tayari kwa mabadiliko, amekosekana mtu wa kuongoza mabadiliko hayo kutoka upinzani.

Uchaguzi Mkuu wa Oktoba mwaka huu ni muhimu mno kwa CUF kuweka mgombea sahihi na anayekubalika na mwenye uwezo wa kushinda jimbo hili, lakini, nguvu za CCM si za kubeza, zinatosha pia kuiwezesha CCM kulibeba ikiwa Ukawa, hususani CUF haitajipanga kumpata mgombea madhubuti. Japokuwa, taarifa nilizonazo zinaonesha kuwa, mbunge wa Viti Maalumu wa CUF Moze Abeid Said anayetokea Wilaya ya Kondoa, anajipanga kuomba ridhaa katika jimbo hili na kwamba amekwishafanya kazi za kisiasa na kimaendeleo katika maeneo mbalimbali ya Kondoa tangu mwaka 2011, muda haufichi kitu, tutajua mbivu na mbichi siku si nyingi.

JIMBO LA KONDOA KUSINI

Kondoa Kusini kama lilivyo Jimbo la Kondoa Kaskazini, limedhihirisha ukuaji na uimara wa upinzani. Wananchi wameendelea kuonyesha kuwa tayari kwa mabadiliko huku upinzani hasa CUF ikikosa watu thabiti wa kulichukua jimbo hili na hivyo kuifanya CCM iendelee kujikita.

Jimbo la Kondoa Kusini limeongozwa na mbunge mmoja kwa vipindi vitatu mfululizo, huyu ni Paschal Constantine Degera wa CCM. Ameliongoza jimbo hili tangu mwaka 1995 – 2000, 2000 – 2005 na 2005 – 2010 na bado alijaribu kuliongoza mwaka 2010 lakini akaangushwa kwenye kura za maoni za ndani ya CCM zilizoshuhudia Juma Nkamia (mbunge wa sasa) akipata kura nyingi. Juma Nkamia ni mwandishi wa habari mzoefu hapa Tanzania akiwa na Stashahada ya Uandishi wa habari aliyoipata mwaka 1999. Alizaliwa Januari Mosi, 1972 (miaka 43 sasa) na ni Naibu Waziri wa Wizara ya Habari, Vijana, Utamaduni na Michezo tangu Januari 2014 hadi sasa.

Uchaguzi Mkuu wa mwaka 2005 (kipindi cha mwisho cha uongozi wa Degera) aliipa CCM ushindi wa kura 42,155 (asilimia 70.6) dhidi ya kura 14,154 (asilimia 23.7) za Hassan Ally Misanya wa CUF. Wagombea wa Chadema na TLP kwa jumla walipata kura 3,364 (asilimia 5.6). Kwa upande wa wagombea urais, Jakaya Kikwete wa CCM alipata kura 49,492 (asilimia 79.7) huku Profesa Ibrahim Lipumba wa CUF akifuatia kwa kura 10,476 (asilimia 16.9) na kisha wagombea urais wengine wakapata kura 2,151 (asilimia 3.4).

Wakati CCM ilipomuweka Juma Nkamia mwaka 2010, CUF ilimuweka Missanya Hassan Ally kwa mara ya pili, wakiwa wagombea wawili tu katika kinyang’anyiro cha ubunge. Nkamia alishinda kwa asilimia 79.49 akiwa na kura 38,876 huku Missanya Hassan Ally wa CUF akiwa na kura 8,010 zilizompa asilimia 16.38 ya ushindi. Wagombea urais bado walimwachia nafasi Jakaya Kikwete wa CCM aliyepata kura 37,172 (asilimia 76.55).

Hali hii inamaanisha kuwa, itaipasa CUF kutiazama ikiwa bado Missanya Hassan Ally anafaa kupambana na Juma Nkamia ambaye naamini atapitishwa tena na CCM kuwa mgombea, Oktoba mwaka huu. Kwa sababu ushindi wa Missanya ulikuwa wa asilimia 23 mwaka 2005 na umekuwa wa asilimia 16 mwaka 2010, ni lazima Nkamia atafutiwe mgombea mwingine thabiti na aliyejipanga ikiwa Ukawa itahitaji kuleta ushindani mkubwa jimboni humo mwaka huu.

MATATIZO YA KONDOA KWA JUMLA

Wabunge wa sasa, waliopita na wajao wa majimbo ya Kondoa Kaskazini na Kusini, wanakabiliwa na changamoto zilezile za utendaji. Kondoa ni miongoni mwa wilaya ngumu kuanzia kwenye mazingira yake, hali ya hewa, mfumo mzima wa maisha ya jamii, elimu duni, matatizo ya maji, afya, usafiri n.k. Nilipotembelea Kondoa katika moja ya vijiji mwaka 2012 nilishuhudia binadamu na wanyama (ng’ombe) wakichuana kujipatia maji katika chemchemi moja. Kondoa inahitaji kuwa na wabunge imara, watakaosimama kidete kuhimiza halmashauri pamoja na Serikali Kuu ishiriki moja kwa moja kutatua kero kubwa za wananchi hao. Kwa sababu CUF imejikita sana katika majimbo yote mawili na imeonyesha ushindani mkubwa wa kisiasa tangu mwaka 1995, ni wakati mwafaka wa kujipanga zaidi ili kuwapa wananchi machaguo bora kuliko kuweka wagombea dhaifu ambao wataifanya CCM ishinde itakavyo na hivyo demokrasia kutia vigingi.

(Mchambuzi wa ukurasa huu, ana uzoefu mkubwa wa masuala ya uongozi wa kisiasa ndani ya Tanzania. Ana shahada ya Uzamili ya Utawala na Uongozi (M.A) na ni mwanafunzi wa fani ya sheria (LLB) – Anapatikana kupitia +255787536759, “mailto:majimboni2015@yahoo.com” majimboni2015@yahoo.com – Uchambuzi na Maoni haya kwa vyovyote vile ni maoni binafsi ya mwandishi).

Saturday, January 31, 2015

Binadamu ‘akaribia’ Sayari ya Pluto

Moja ya vyombo vya uchunguzi wa anga kikianza

Moja ya vyombo vya uchunguzi wa anga kikianza safari.      

Watafiti hao wamejitoa kwa robo ya maisha yao kufuatilia vifaa hivyo ambavyo vinatarajiwa kutoa matokeo mengine hivi karibuni.

Baada ya mafanikio makubwa ya kutuma chombo kwenye sayari ya Mars, wanasayansi sasa wanakaribia kufikia mafanikio mengine makubwa; kufanikisha safari ya New Horizons kwenye sayari ya Pluto.

Kama ilivyo kwa Rover ambayo imeshatua sayari ya Mars bila ya kuwa na binadamu ndani nyake lakini inatuma picha za ardhi ya sayari hiyo, New Horizon nayo haina mtu ndani yake na inatarajiwa kuanza kutuma picha za mazingira ya sayari ya Pluto kuanzia kesho.

Chombo kilichoundwa na Taasisi ya Utafiti wa Anga ya Marekani (Nasa), kimeshasafiri maili bilioni tatu na sasa kinakaribia mwisho wa safari yake ya miaka tisa kuelekea kwenye sayari ndogo ya Pluto.

Picha za kwanza zitatoa taarifa zaidi ya vidoa vya mwanga baada ya chombo hicho kufika anga ya Pluto. Kwa sasa New Horizons imebakiza maili milioni 100 kufika sayari ya Pluto.

Hata hivyo, picha hizo zilizopigwa kwenye sayari hiyo iliyojaa nyota, zitasaidia wanasayansi kupima umbali uliobakia na kuweka mikakati ya New Horizon kutua kwenye ardhi ya Pluto ifikapo mwezi Julai.

Ni safari ya kwanza kuandaliwa na binadamu kwenda Pluto, na wanasayansi wana hamu kubwa ya kuanza harakati za ugunduzi kwenye sayari hiyo.

“New Horizons imekuwa ni mradi uliochelewa kutokana na mambo kadhaa, lakini sasa mambo yanatokea,” alisema kiongozi wa mradi huo wa wanasayansi, Hal Weaver wa maabara ya fizikia ya Chuo Kikuu cha Johns Hopkins.

“Itakuwa ni mwendo wa kasi katika miezi saba iliyosalia, hasa kuelekea mwisho,” alisema Ijumaa iliyopita. “Tuna hamu kubwa ya kuifanya Pluto kuwa kwenye ulimwengu halisia, badala ya kuwa kitu kidogo, badala ya kuwa kitu kidogo cha kuchora.”

Chombo hicho kilirushwa Januari mwaka 2006, ikiwa ni mradi uliogharimu Dola 700 milioni za Marekani na katika siku za karibuni kilizinduka baada ya ya kipindi cha kulegalega kilichokuwa mapema mwezi uliopita.

Waongozaji vyombo vya angani walitumia wiki kadhaa zilizopita wakikiandaa chombo hicho kwa ajili ya kukamilisha safari yake, hasa kutua.

“Kwa baadhi yetu, wamekuwa wakishughulika na mradi huu kwa zaidi ya robo ya maisha yao kwenye fani, ili kufanikisha mpango huu,” alisema meneja wa mradi, Glen Fountain kutoka Applied Physics Lab. “Sasa tumekaribia kufikia mwisho.”

Kamera yenye uwezo wa kupiga picha kutoka mbali, itachukua picha za sayari ya Pluto katika miezi kadhaa ijayo.

Kifaa hicho kilituma picha katikati ya mwaka jana kabla ya kupumzika, lakini hizo zinatarajiwa kuonekana vizuri zaidi.

Wakati New Horizons ikisafiri kuelekea sayari ya Pluto, ilipiga picha za sayari hiyo ndogo ikionekana ya kuvutia pamoja na mwezi wake unaoitwa Charon.

Chombo hicho kilipiga picha hizo wakati kikiwa kwenye anga ya Pluto. Picha 12 ambazo zilitumiwa kuchora sayari hiyo, zilipigwa kutoka umbali wa kati ya maili milioni 267 na milioni 262 (sawa na kilomita milioni 429 na milioni 422).

Kwa kuziweka pamoja, picha hizo zinaonyesha sayari ya Pluto na mzunguko wake mzima kwenye mwezi huo unaoitwa Charon, ambao uko maili 11,200 (sawa na kilomita 18,000) kutoka ardhi ya sayari hiyo.

Mwezi wa Charon ni karibu nusu ya sayari ya Pluto. Mwezi huo ni mkubwa sana kiasi kwamba wakati mwingine huonekana kama sayari pacha na Pluto.

Timu hiyo ya wanasayansi sasa inatumia picha ambazo zinaionyesha Pluto kwenye mazingira yenye nyota na kupata eneo halisi ambalo New Horizons itapita kati ya Pluto na mwezi na nyota zake.

Setalaiti nne zilizoko Pluto ni ndogo sana kuweza kuonekana kwenye picha hizo za mbali, lakini zitaanza kuonekana kwenye picha za mwaka huu wakati New Horizon itakapoanza kutuma picha ikiwa karibu zaidi na Pluto.

Itakuwa siku chache kabla ya mpya kutumwa duniani, wanasayansi wanatarajia kuanza kuzionyesha mapema mwezi ujao.

Hadi kufikia Mei, picha za New Horizons zinatakiwa zifikie au kupita picha zilizopigwa na hadubini ya Hubble Space Telescope, na zinatakiwa ziwe bora kadiri siku zinavyokwenda.

Picha nzuri zaidi zitakuwa wakati New Horizons itakapokuwa juu ya Pluto Julai 14, umbali wa maili 7,700 na ikisafiri kwa mwendo wa kilomita 31,000 kwa saa.

Wanasayansi bado hawajajua sayari ya Pluto inaonekanaje nje ya Kuiper Belt.

Pluto ndiyo kitu kikubwa kwenye Kuiper Belt. Pamoja na mwezi wake wa Charon, ukubwa wa vitu hivyo viwili unaweza kufanana na ukubwa wa ardhi ya Marekani na bado sehemu fulani kubakia.

Applied Physics Lab ya mjini Laurel, Maryland nchini Marekani ilibuni chombo hicho cha New Horizons na kukitengeneza na sasa inaratibu safari hiyo iliyoandaliwa na Nasa.

Wakati New Horizons ilipoondoka duniani mwaka 2006, Pluto ilikuwa bado kwenye nafasi ya tisa katika mfumo wa jua.

Ilikuwa ni sayari pekee kwenye mfumo wa jua unaohusisha dunia ambayo ilikuwa haijafikiwa na vyombo vya anga vya duniani. Lakini miezi saba baadaye, taasisi ya unajimu ya kimataifa (International Astronomical Union) iliivua Pluto hadhi yake ya kuwa sayari ndogo, baadaye ikaitwa plutoid.

Wednesday, December 24, 2014

NYANZA: Mtoto wa miaka 14 abakwa na vijana watano kwa zamu

 

By Florence Focus, Mwananchi

Mara. Vijana watano wanadaiwa kumbaka mtoto mwenye umri wa miaka 14 kwa zamu hadi kuzirai. Mtoto huyo alikuwa akitokea Kata ya Nyamatere kusherehekea matokeo ya Uchaguzi wa Serikali za Mitaa katika Manispaa ya Musoma.

Kamanda wa Polisi Mkoa wa Mara, Phillip Kalangi alisema tukio hilo lilitokea Desemba 20, mwaka huu saa 2.00 usiku katika Mtaa wa Wakala mjini hapa.

Kamanda Kalangi alisema mtoto aliyetendewa unyama huo ni miongoni mwa watoto wanaotarajia kujiunga na kidato cha kwanza mwakani, baada ya kuhitimu katika Shule ya Msingi Buhare.

Kamanda huyo akielezea chanzo cha tukio hilo, alisema mtoto huyo alikuwa njiani akienda nyumbani kwao katika Mtaa wa Makoko Zanzibar akitokea katika ofisi za Chama Cha Mapinduzi (CCM), Kata ya Nyamatare kwenye sherehe za ushindi wa chama hicho katika uchaguzi wa Serikali za Mitaa.

Alisema njiani alikutana na kundi la vijana watano ambao wote alikuwa akiwatambua kwa sura, ghafla vijana hao walimkamata kwa nguvu na kumpeleka katika nyumba ambayo ujenzi wake haujakamilika na kuanza kumbaka kwa zamu hadi mtoto huyo alipopoteza fahamu na kisha vijana hao kutoroka.

Alisema mtoto huyo alizinduka saa nane usiku akiwa hajiwezi, kwa msaada wa Mungu aliweza kujivuta hadi katika nyumba zilizo jirani na nyumba hiyo na kuomba msaada, majirani hao walimfikisha katika kituo cha polisi usiku huo na kupewa fomu namba tatu, walimpeleka kupata matibabu katika Hospitali ya Rufani ya Mkoa wa Mara.

Kamanda alisema hali yake kwa sasa inaendelea vizuri na tayari polisi wanamshikilia mtuhumiwa mmoja ambaye jina lake linahifadhiwa, mkazi wa Mtaa wa Nyamatare mjini hapa na atafikishwa mahakamani wakati wowote baada ya upelelezi kukamilika.

Tuesday, December 23, 2014

Maswali kumi kwa Mbunge wangu: Abdul-Aziz Abood



Mbunge wa Morogoro mjini, Abdul-Aziz Abood

Mbunge wa Morogoro mjini, Abdul-Aziz Abood 

Hamida Shariff

1.Juma Ng’ondavi, mkazi wa kihonda

Lini tatizo la ukosefu wa maji katika maeneo mengi ya jimboni kwako litaisha?

Jibu: Tatizo la ukosefu wa maji litakwisha muda si mrefu kwa kuwa naendelea kufuatilia kwa karibu miradi ya maji iliyopo jimboni kwangu ukiwepo mradi wa MCC ambayo itaboresha vyanzo vya maji, lakini pia kwa juhudi zangu binafsi nimechimba visima virefu 24 katika maeneo mbalimbali yenye kero ya maji.

Bado naendelea na mradi huo wa kuchimba visima katika maeneo mengine, sambamba na kuboresha miundombinu ya usambazaji maji ili kumaliza tatizo la ukosefu wa maji.

2.Mussa Okita, Mkazi wa Mazimbu

Umesaidiaje wanafunzi wanaotoka kwenye familia maskini ambao wanashindwa kumudu kulipa ada, kupata sare na mahitaji mengine ya shule?

Jibu: Kwa kutambua umuhimu wa elimu, hadi sasa nimewasaidia wanafunzi zaidi ya 4,220 waliopo kwenye shule za msingi, sekondari na hata vyuo na bado naendelea kuwasaidia wengine watakaobainika kuwa wanatoka katika mazingira magumu. Ni kufuata utaratibu tu kuhakikisha nani hasa hana uwezo wa kulipa ada wakati amefanya vizuri.

3. Filemon Mapunda, mkazi wa Kilakala

Unavisaidiaje vikundi vya ujasiriamali hasa vya kina mama na wafanyabiashara wadogo ili kuhakikisha wanakuza mitaji yao?

Jibu: Kwanza nimekuwa mstari wa mbele kuhamasisha vijana, kina mama, watu wenye ulemavu na makundi mengine kujiunga kwa pamoja ili waweze kusaidiwa. Hata hivyo, hadi sasa nimeshavisaidia vikundi zaidi ya 631 vya wajasiriamali kwa kuviongezea mitaji au kuvisaidia vifaa mbalimbali kulingana na mahitaji yao; vipo vikundi nimevipa vyerehani, pikipiki na wanaendelea na uzalishaji mali.

4. Mohamed Mkwinda, mkazi wa Mjimpya

Je, unaishughulikiaje migogoro ya viwanja ambayo imekuwa ikitokea kila kukicha katika maeneo ya Kihonda, Mkundi, Lukobe, Tungi na maeneo mengine?

Jibu: Ni kweli kumekuwa na migogoro mingi ya viwanja katika jimbo langu lakini nimekuwa nikiishughulikia migogoro hii kwa karibu. Nimekuwa nikienda kwenye maeneo yenye migogoro nikiwa na wahusika wenyewe pamoja na maofisa wa ardhi wa manispaa ili kuona ukubwa wa tatizo na baadaye kwa kushirikiana na maofisa wa ardhi nimekuwa nikimaliza migogoro hiyo na ile inayoshindikana nimekuwa nikiiwasilisha kwa waziri husika kupitia bungeni na wananiahidi kuishughulikia.

5. Frank Graison, mkazi wa Kiwanja cha Ndege

Lini kero ya ubambikizaji wa ankra za maji itakwisha?

Jibu: Hili ni tatizo ambalo hata kwangu ni kero. Tatizo liko kwa watendaji wa idara za maji. Hiki ni kilio cha wananchi wa jimbo langu, wamekuwa wakizidishiwa ankara za maji tofauti na matumizi halisi. Nilifika kwa Mkurugenzi wa Mamlaka ya Majisafi na Majitaka Mkoa wa Morogoro (Moruwasa) na kufuatilia suala hili na kwa sasa kero hii imepungua. Hata hivyo, kupitia mikutano yangu nimekuwa nikiwaambia wananchi wenye tatizo na ankara zao za maji kufika ofisini kwangu ili kushughulikia.

6. Pendo Mjema, Mkazi wa Barabara ya Kitope

Una mpango gani wa kuboresha vituo vya afya ili viweze kutoa huduma ya mama na mtoto?

Jibu: Tayari nimeshapeleka vitanda vya kujifungulia, vifaa vya kujifungulia, magodoro pamoja na vifaatiba katika kituo cha afya Kingolwira, Mafiga, Magadu, Kibwe, Chamwino, Mjimpya pamoja na kuanzisha ujenzi wa zahanati mbalimbali lengo likiwa ni kuboresha huduma ya mama na mtoto na bado naendelea kusaidia vituo vingine ili viwe na uwezo wa kutoa huduma ya kuzalisha.

7. Hassan Masenda, mkazi wa Boma

Lini barabara ya Mafiga hadi Kichangani itatengenezwa kwa kiwango cha lami ili kupunguza msongamano wa magari katikati ya mji?

Jibu: Katika kipindi cha mwaka wa fedha 2014/2015 barabara hiyo iko katika mpango wa kutengenezwa kwa kiwango cha lami, ninachotaka kusema hapa ni kutoa muda tu, utekelezaji utafanyika.

8. Boniface Kingson, Mkazi wa Barabara ya Kitope

Lini ujenzi wa soko la kisasa la Mkoa wa Morogoro utaanza mbona hakuna hata dalili?

Jibu: Ujenzi wa soko la kisasa utaanza ndani ya kipindi hiki cha mwaka wa fedha 2014/2015 tayari kibali kimeshapelekwa kwa Waziri wa Nchi, Ofisi ya Waziri Mkuu, Tamisemi ili kuweza kupata mkopo kutoka kwenye benki au taasisi za fedha na mchakato huo utakapokamilika, haraka ujenzi utaanza.

9. Johari Mohamed, mkazi wa Tubuyu

Mbona barabara zilizopo pembezoni mwa mji kama Mafisa, Tungi na Kiegea zimesahauliwa. Una mpango gani wa kuziboresha barabara za mitaani?

Jibu: Zipo barabara za mitaani ambazo mimi mwenyewe kama mbunge niliwahi kutoa fedha kwa ajili ya kugharamia greda ili lizichonge. Pia nimenunua makaravati kwa ajili ya kuweka kwenye mifereji ya kupitisha maji ya mvua.

Pia na nimekuwa nikishirikiana na wenyeviti wa mitaa husika na kuziainisha barabara ambazo ni kero. Hata hivyo, nimekuwa nikifuatilia kwa mhandisi wa manispaa kuangalia namna ya kuzifanya barabara hizi kuwa za kudumu na ninaendelea kupambana.

10.Lucas Mahumpa,Mkazi wa Forest

Lini kero ya foleni ya ulipaji wa ankara za umeme Tanesco itaisha?

Jibu: Tayari nimeshaifuatualia Tanesco baada ya kuonana na meneja wa mkoa nilimshauri uanzishwe utaratibu wa kisasa wa ulipaji wa ankara za umeme kwa njia ya benki na mitandao ya simu. Amelikubali hilo na kwa sasa utaratibu huo unaendelea kuandaliwa. Tatizo la foleni Tanesco litakwisha muda si mrefu endapo utekelezaji wa hayo niliyopendekeza ufafanyika.