| Maduka ya dawa baridi kufutwa Mei mwaka huu | Send to a friend |
| Tuesday, 17 January 2012 21:12 |
|
MAMLAKA ya Chakula na Dawa (TFDA) inakusudia kuyafutia usajili maduka yote ya dawa baridi ili kuyafanya yawe maduka ya dawa muhimu ifikapo mwezi Mei mwaka huu katika Jiji la Dar es Salaam. Akizungumza na waandishi wa habari jana, Meneja wa TFDA Kanda ya Mashariki, Agnes Kijo alisema badala yake yatakiwa kuwapo maduka yenye hadhi ya juu kidogo ambayo yatajulikana kama maduka ya dawa muhimu. Alisema wameamua kuyafuta kutokana na kutoa huduma zilizo chini ya kiwango hivyo kushindwa kukidhi mahitaji ya jamii na hata yale ya kitabibu kulingana na kanuni za huduma za dawa. “Unakuta mhudumu katika duka la dawa baridi hawezi hata kujieleza mwenyewe na pale unapotaka ushauri kabla ya kununua dawa anashindwa kuutoa” alisema na kuongeza kuwa ni hatari ambayo haipaswi kuendelea kuwapo. Kijo alisema uanzishwaji wa maduka ya dawa muhimu utatanguliwa na mafunzo kwa watoa huduma yatakayofanyika Aprili mwaka huu kwa kipindi cha siku 35 na watakaofaulu mitihani watapatiwa vyeti vya kuhitimu.Alisema mamlaka imeanza maandalizi ya utekelezaji wa mpango huo na tayari wakaguzi 175 ambao watakuwa wakufunzi ngazi za kata katika Manispaa zote za Mkoa wa Dar es Salaam wameandaliwa “Tunapenda kuwahakikishia wananchi kuwa tunayaondoa maduka hayo na ambao hawatapata mafunzo hayo ya TFDA na kutunukiwa vyeti hawataruhusiwa kutoa huduma na watakaokiuka utaratibu watachukuliwa hatua za kisheria” alisema Kijo. Meneja wa Mpango wa Duka la Dawa Muhimu (DLDM), Elizabeth Shakalaghe alisema mfumo huo ukianza kutumika utaboreshwa ili huduma za dawa ziweze kuwafikia walio wengi wakiwamo wa maeneo ya pembezoni. Alisema Shakalaghe kuwa mpango huo hadi hivi sasa unatekelezwa katika mikoa 15 ambayo nchini na unatarajiwa kusambazwa nchi nzima lengo likiwa kulinda afya za wananchi na kuhakikisha wanapata huduma bora. Add this page to your favorite Social Bookmarking websites           |
Comments