Stephano Simbeye, Mbozi
MAMLAKA ya Udhibiti wa Usafiri wa Nchi kavu na Majini (Sumatra) imewashauri madereva wa malori ambao wapo kwenye mgomo kujiunga   kwenye Chama cha Wafanyakazi ili chama hicho  kiweze kushughulikia madai yao huku wao wakiendelea na kazi zao.

Ushauri huo ulitolea jana na Mkurugenzi wa Kanuni na Usafirishaji wa Barabarani, Amon Kisaka alipozungumza na viongozi wa umoja wa madereva katika Kituo cha Polisi mjini Tunduma mkoani Mbeya.

Alisema kwa kufanya hivyo kutawarahisishia mawasiliano baina yao na Serikali kwa kuwa chama hicho kinatambulika na Serikali badala ya kuendelea na mgomo.

Alisema Sumatra inatambua madai yao kuwa ni ya msingi na kuwa madereva wanapaswa kujaza fomu zilizotolewa kwao ili iweze kwenda kulinganisha na mikataba iliyoonyeshwa na wamiliki wa malori hao walioionyesha kwa mamlaka hiyo,  lakini katika kipindi   ambacho suala hilo linashughulikiwa aliwataka waendelee na safari zao kama kawaida.
“Iwapo mtajaza fomu hizi Sumatra itajua namna ya kuwabana wamiliki wa malori ili kuweza kubaini ukweli wa madai kuwa   mikataba iliyopo Sumatra ni feki au la ambayo itasaidia kwa kuwa sisi hatuna taarifa zenu” alisema Kisaka.

Mkurugenzi huyo alisema Sumatra inashindwa kuwasaidia kama wanavyotaka wao kwa vile hawatambuliki kisheria, hivyo kuwashauri wajiunge katika chama cha wafanyakazi kilichopo ama waunde chama chao ili wavitumie kudai haki zao.

Hata hivyo alisema itahakikisha wanapata mikataba ya ajira na kuwa taarifa itatolewa kwenye vyombo vya habari mara tu atakapofika Dar es salaam.

Rashidi Salehe, mmoja wa madereva hao akizungumza kwa niaba ya wenzake alisema  madereva hawana ugomvi na Serikali wala waajiri wao, bali wanachotaka ni kuboreshewa maslahi yao na mazingira mazuri katika kazi ambapo wamekuwa wakifanya kazi pasipo kupata stahili sahihi za safari, ikiwa ni pamoja na uhakika wa ajira kwani utaratibu uliopo hivi sasa mfanyakazi anaweza kufukuzwa wakati wowote na mahali popote na akakosa mahali pa kudai haki zake.

“Hawa matajiri wanatumia nguvu ya fedha kuwadhoofisha madereva kwa kuwasambaratisha lakini iwapo Sumatra itasimama imara itatusaidia kuweza kutengeneza mazingira ya kupatikana haki zetu,” alisema Salehe.

Aidha mmoja wa aliyekuwa kiongozi katika mgomo uliopita Isaack Emmanuel alisema tatizo la madereva ni kutokuwa watulivu kwani mazungumzo yaliyokwishaanza baina ya Serikali na waajiri yanakwenda vizuri, lakini kutokana na uelewa mdogo wameamua kutafuta uongozi mwingine ambao haujui  hatua iliyokwishafikiwa na hivyo kulifanya jambo hilo kuwa jipya.

“Madereva wanajichanganya wenyewe wakiwa huku wanajifanya wana misimamo, lakini wanapofika kwa waajiri wao wanaogopa kuzungumza nao kutokana na hofu ya kufukuzwa kazi jambo ambalo linasababisha usumbufu kwa Watanzania wengine” alisema Emmanuel.
 
Leo  ni siku ya tatu tangu mgomo huo kuanza ambapo jitihada za Serikali zinaendelea kujaribu kuwashawishi madereva hao wasitishe mgomo wao ambao umesababisha msongamano usiokuwa wa lazima katika Mji wa Tunduma.

Add this page to your favorite Social Bookmarking websites