Na Florence Majani
KATIKA kitanda alicholala Amina Shabani amefunikwa na blanketi la simanzi, hofu ya mauti, majuto na maumivu makali ... yasiyostahimilika. Anajuta na mengi. Anakumbuka vingi, na kubwa zaidi … anateseka na maradhi ya saratani ya  shingo ya uzazi yaliyomsababishia uvimbe mkubwa katika sehemu zake za siri.

Maji yenye harufu humwagika kwa saa 24, hali inayomfanya Amina atumie  nepi maalum au ‘diapers’ ili kuzuia maji hayo yasilowanishe shuka.

Si hivyo tu, bali uvimbe huo mkubwa umeziunganisha sehemu ya haja kubwa na uke hali inayompa tabu zaidi kupata haja kubwa.

Uvimbe huo, ambao humfanya atembee kwa taabu, unamsababishia asiende haja ndogo  kama  wanawake wengine wafanyavyo, bali kwa mtindo ambao anadai, hauelezeki.

Na kubwa zaidi ni maumivu, ambayo anadai, yanafanana na mdudu anayetafuna sehemu za kiuno chake- huku wakati mwingine akihisi kisu kikali kikipita chini ya tumbo lake.

Amina anakesha akilia kwa maumivu, huku akitamka maneno haya kila mara:
“Mungu ni baba wa yatima na ni mume wa wajane, yeye ndiye ameamua niupate ugonjwa huu, na kama akipenda, basi nitapona.”

Akiwa na umri wa miaka 31 tu, mwanamke huyu  anasema amepitia machungu zaidi kuliko furaha.  Na hii ndiyo historia ya maisha yake;

Alizaliwa mkoani Mbeya, Wilaya ya Katumba. Awali aliishi na mama yake Rose Freddy pekee. Alipofikisha umri wa miaka minne, mama yake aliamua kumpeleka kwa baba yake.

Amina anasema, maisha nyumbani kwa baba yake, mzee Samweli Shabani hayakuwa mazuri sana.
“Pale kwa baba, familia ilikuwa kubwa, sikupelekwa shule wala hakukuwa na mtu wa kuniangalia kwa karibu ingawa nilikuwa bado mdogo,” anasema.

Anasema, alipoona hakuna dalili ya kupelekwa shule, aliamua kutoroka, wakati huo alikuwa na umri wa miaka 10.
“Nilitoroka nyumbani. Nilipanda gari  kuelekea mjini kutoka hapo Nzovwa anapoishi baba, lakini nilipotea kwa kuwa sikuwa nikifahamu ninakoelekea, nia yangu ilikuwa kumtafuta mama tu,” anasema.

Katika kuzunguka zunguka mjini Mbeya, Amina alikutana na mwanamke mmoja, ambaye ni askari wa Usalama Barabarani(Traffic). Anasema, askari huyo aliamua kumsaidia, lakini kwa masharti ya kuwa, Amina atamsaidia kulea watoto wake wadogo.

“Nilipewa kazi ya kulea watoto wa yule mama, hakunipa ujira ingawa nilikula na kuvaa,” anasimulia.
Kama waswahili wasemavyo, “ng’ombe wa maskini hazai, akizaa basi huzaa dume, nalo likafa,” ndiyo ilivyokuwa kwa Amina.

Baada ya miaka miwili, traffic yule alifariki dunia, na ikambidi Amina kukimbilia kwa Joyce Mwamkinga, maarufu kama Mama Lusi.

Mama Lusi alikuwa ni rafiki wa askari yule na alikuwa akiishi katika kijiji cha Isanga.  Na hapo ndipo kilipo kiini cha machungu ya Amina.

Maisha nyumbani kwa mama Lusi
Amina alifika nyumbani kwa mama Lusi akiwa na umri wa miaka 12 tu. Maisha aliyoyakuta hapo, hayakuwa  kama alivyodhani.

Mama Lusi hakuwa na mume na wala hakuwa akifanya kazi yoyote, lakini alikuwa akitoka usiku na kurejea asubuhi.

 Siku moja, Mama Lusi alianzisha utaratibu mpya ndani ya nyumba hiyo. Utaratibu  ambao twaweza kusema ni wa kikatili, ambao pengine ndicho chanzo  cha mateso anayoyapata Amina leo hii katika kitanda hospitalini Ocean Road.

“Mama Lusi alituambia, ni lazima kila mmoja alale na mwanaume ili tupate pesa ya kuishi,”  Amina anasema huku akilia.

Mama huyo, hakufanya hivyo kwa Amina pekee, bali hata kwa watoto wake wawili wa kike, wa kuwazaa, Tuma na Lusi.

“Tuma alikuwa na miaka 14 Lusi alikuwa na miaka 16, na mimi 12, nilikuwa sisikii chochote kimapenzi, wala sijui kitendo cha ngono ni kitu gani, lakini nilifanyishwa kwa nguvu,” anasema Amina.

Msichana huyu mwenye mtoto mmoja anasema, katika umri huo, alifanya mapenzi na wanaume wenye umri tofauti tofauti.

“ilifikia mahala ikawa ni tabia, kwa hiyo nikazoea kuishi kwa kujiuza kimwili, “ anaeleza  zaidi.

 Mama yangu  baada ya kusikia kuwa nakaa kwa mama Lusi alikuja kutoka Katumba na kunichukua, lakini nilikuwa situlii, nakaa kidogo kwa mama , kisha natoroka narudi kwa Mama Lusi.

 Amina anasema, anasikitika kwa kuwa, Mama Lusi pamoja na watoto wake wote, hivi sasa wamefariki kwa ugonjwa wa UKIMWI.

Chanzo cha maradhi yake
Amina anabainisha kuwa, katika harakati za kufanya biashara ya ukahaba ndipo alipoyapata maradhi hayo.
Amina alikumbwa na ugonjwa wa zinaa ambao kwa kitaalamu unaitwa Human Papillomaviruses (HPVs) au sugu za sehemu za siri.

 Daktari wa Patholojia, wa hospitali ya Taifa ya Muhimbili Innocent Mosha anasema, Ugonjwa huu huambukizwa kama magonjwa mengine ya zinaa yaani kwa njia ya kufanya ngono, na kwa asilimia kubwa husababisha saratani ya shingo ya kizazi.

Amina anasema, kwa kumbukumbu zake, alianza kuugua ugonjwa wa zinaa mwaka 2000.  Wakati huo, alikuwa ndiyo ametoka kujifungua.

“Nilianza kuona vitu kama sugu(wart) katika sehemu zangu za siri, kadiri siku zilivyozidi kusonga ndivyo zilivyozidi kuongezeka ukubwa zikiambatana na maumivu,” anasema Amina.

 Juhudi za kwenda hospitali  mjini Mbeya hazikufua dafu na ilipofika mwaka 2000, Oktoba 5, alipewa rufaa ya  kufika Muhimbili.

Hapo  alifanyiwa upasuaji wa kuondoa uvimbe huo zaidi ya mara tatu. Mwezi Desemba mwaka jana alipewa kibali cha kwenda katika taasisi ya saratani ya Ocean Road.

Alipofika Ocean Road ndipo  madaktari walipompasulia Amina kuwa ana saratani ya shingo ya uzazi kitaalamu(cervical cancer). Saratani hiyo ndiyo iliyomsababishia uvimbe mkubwa katika sehemu zake za siri.
 

“Dada yangu hana mama na mimi ndiyo ndugu yake” anasema Nyalile.

Nyalilie anasema, amekuwa akilala nje ya hospitali ya Ocean Road kwa mwezi mzima sasa kwa kuwa hana ndugu hapa jijini na ameishiwa fedha kabisa.

“Siku nyingine nakosa  hata fedha ya kula, nikikopa basi ni kwa ajili ya Amina,” anasema.
Lakini jambo linalomsikitisha zaidi Nyalilie, ni muonekano wa daktari  alipokuwa akisoma majibu ya vipimo vya Amina, hivi majuzi.

“Daktari aliposoma tu majibu ya vipimo, alitingisha kichwa, nilipomuuliza kwa nini, hakunijibu,” anasema Nyalile.
Amina anawaomba Watanzania wamuombee, mateso anayoyapata ni mazito na  haijui hatma ya maisha yake.
 Kwa kumsaidia Amina piga simu namba 0763205938/ 0768476777

Add this page to your favorite Social Bookmarking websites