Ibrahim Bakari, Kaliua
MGOMBEA urais kwa tiketi ya CCM, Jakaya Kikwete amesema anataka Watanzania wamkumbuke kwa mambo nane wakati atakapoondoka Ikulu 2015.

Kikwete alisema hayo alipokuwa akizungumza na wananchi kwenye Jimbo la Urambo Magharibi alipokuwa akiomba ridhaa ya wananchi kumrejesha kuongoza serikali kwa kipindi kingine cha miaka mitano.

"Nimesema kuna mengi nayafanya, lakini nikimaliza kipindi changu nataka watu wanikumbuke kwa mambo nane... waseme Mungu amrehemu, yule bwana acha tu, amefanya kitu."

Huku akishangiliwa na mashabiki, wanachama na wapenzi wa CCM, Kikwete aliyataja mambo hayo kuwa ni; kuimarisha kilimo cha umwagiliaji kupitia mpango aliouasisi wa Kilimo Kwanza, matumizi bora ya mbolea, dawa za kilimo, kutoa wataalam na maofisa wengi wa kilimo.
Pia kusaidia upatikanaji wa masoko kwa mazao ya wakulima, kusimamia uwepo wa bei bora za mazao, kuimarisha barabara ili wakulima waweze kusafirisha mazao kutoka vijijini na kuachana na jembe la mkono na kutumia matrekta makubwa na madogo.

Kikwete aliyekiri kutofikiwa malengo kwa maeneo mbalimbali katika sekta ya maji na barabara, alisema katika kipindi cha miaka mitano ijayo serikali imejipanga kikamilifu kutekeleza ahadi zake.
Alisema kuna mengi yanahitaji misaada ya wahisani ikiwa ni pamoja na ujenzi wa barabara, ujenzi wa miundombinu ya kisasa ya maji hivyo ni lazima tuwatafute wahisani.

Akizungumzia safari zake za nje, Kikwete alisema: "Wapo wanaosema nasafiri sana,  sasa ningekaa pale nyumbani kwangu nikamwangalia mke wangu Salma halafu nimwambie aisee ulivyopendeza, Watanzania wangekufa njaa na Wajapan wanaotaka kusaidia, leo hii wasingeijua Kaliua.

"Sasa kuyapata yote haya, lazima nisafiri. Nilikuwa Marekani, nikakutana na wahisani mbalimbali; wenyewe wananiuliza wanataka wanisaidie wapi, mimi nasema hapa na hapa na pale... kuna watu wanapesa nyingi tu."
Akizungumza katika mkutano huo, mbunge wa Urambo Magharibi, Prof.  Juma Kapuya alisema CCM wameshafundishana kucheza mpira wa uchaguzi.

"Pasi ya kwanza anatoa diwani, diwani kwa mbunge na mbunge anatoa kwa rais anafunga goli... Kikwete ni (mshambuliaji wa Simba, Mussa Hassan) Mgosi wa CCM, ukimpa mpira anafunga," alisema Kapuya na kuamsha vicheko kwa wote waliofika kwenye mkutano huo.

Naye Kikwete aliyekuwa pembeni, baada ya Kapuya kumaliza, alisema: "Aah! Mimi bwana na Kapuya kuna mengi tunakubaliana, lakini katika soka, tuko timu tofauti, mimi siko huko," alisema Kikwete ambaye anajulikana kama shabiki mkubwa wa Yanga wakati Kapuya ni shabiki asiyejificha wa Simba. Hata hivyo alimaliza kwa kusema: "Timu bora inajengwa na ngome imara, kiungo imara na safu yenye mtazamo mmoja na ndiyo inayoshinda kuliko kuchanganya."

Add this page to your favorite Social Bookmarking websites