Na Zakie Chatanda
SWALI langu kubwa, je hizi leseni mpya za madereva ni kwa ajili ya kukusanya mapato ya serikali, kulinda ajira za madereva au kukabiliana na ajali?
Nafikiri siyo mimi peke yangu  ambaye najiuliza swali hili. Kuna watanzania wengi hasa madereva ambao ninawawakilisha.
Hatua ya kubadilisha leseni za udereva ilichukuliwa na serikali ili kukabiliana na ongezeko la idadi kubwa ya ajali za barabarani ambazo zimesababisha   vifo kadhaa na majeruhi .

Sababu kubwa ya ajali ilitajwa kuwa leseni nyingi hasa zile za daraja la C ama zilitolewa kwa wasiostahili au wengi walizipata kwa njia za ujanja ujanja. Hatua hiyo ingesaidia kubaini leseni bandia na zilizotolewa bila ya wahusika kufanyiwa bila kupitia mafunzo maalum na kuruhusu kuanzishwa kwa mfumo wa kisasa wa kutunza kumbukumbu za leseni na madereva vizuri.

Suala la pili ilikuwa ni kuboresha leseni yaani kuondokana na mfumo wa sasa ambao ni wa kizamani na kuzibadilisha kuwa katika mtindo wa kisasa yaani za kielektronika. Mfumo utakuwa rahisi kujua taarifa za kila ambaye ana leseni ya kuendesha gari nchini.

Suala la tatu ni kusaidia kutunza kumbukumbu za madereva na leseni zao baada ya kubadilisha leseni kwani asilimia kubwa leseni zilizotolewa zamani takwimu zake zilikuwa zinahifadhiwa kwenye vitabu hivyo ilikuwa ni vigumu hata kujua idadi ya madereva nchini.

Hatuna budi kuipongeza serikali, Mamlaka ya Mapato (TRA) pamoja na Jeshi la Polisi kwa hatua hii nzuri kwani mbali na kupunguza au kutokomeza ajali nchini pia leseni za madereva wetu zitakuwa zina  mvuto, muundo wa kisasa na vile vile kumbukumbu zao zitakuzwa zinahifadhiwa kisasa zaidi.

Dosari la hii kazi kubwa inakuja pale tu, serikali inapotaka kugeuza shughuli hii kwa ajili ya kukusanya mapato zaidi na hivyo kufifisha madhumuni yake tuliyoambiwa wakati wa kutangazwa kwa nia ya kuanzisha zoezi hilo.
Madereva wa daraja la ‘C’ wanaambiwa kurejea madarasani ili kupata vyeti kabla ya kubadilishiwa leseni.

Ada kwa ajili ya mafunzo hayo ambayo yanachukua siku 10 tu inafikia Sh200,000. Kiwango hicho ni kikubwa mno na gharama zake haziwiani na mafunzo mafunzo anayohitaji dereva mzoefu wala hata na vipato vya madereva wengi nchini. Serikali inapaswa kukumbuka mara kadhaa madereva hao wametishia kugoma kutokana na ujira mdogo kutoka kwa wajiri wao.

Ninaamini kuwa madereva wengi watakosa fursa ya kubadilisha leseni kwa kutokuwa na fedha. Hii itawafanya wengi kusaka vyeti kwa njia ya mkato ili waweze kubadilisha leseni zao au wengine watabaki majumbani na hivyo kuongeza jeshi la wasio na kazi nchini.
Kibaya zaidi gharama hiyo ya Sh200, 000 haijumuishi gharama ya leseni ambayo ni Sh40, 000. Kwa hiyo anataka kubadilisha leseni anapaswa kuwa na Sh240, 000. Tunaikumbusha serikali kuwa madereva wengi mishahara yao haizidi Sh300, 000.

Jambo jingine ambalo ninaliona kuwa ni dosari kubwa katika zoezi zima la kubadilisha leseni ni kitendo cha kuwataka kufanya hivyo hata kama kama zile walizonazo hazijamalizika muda wake. Ni leseni zilizotolewa na mamlaka hiyo hiyo. Hii maana yake ni nini? Ningeelewa kama zoezi hilo lingewagusa wale ambao leseni zao zimekwisha muda.

Katika hili serikali imekosea ilipaswa kuheshimu ukomo wa leseni ilizozitoa ili dereva akitaka kuongeza muda ‘renew’ ndiyo apewe leseni mpya badala ya ile ya zamani hii itaondoa machungu kwa baadhi ya madereva kwa sababu wengi wao leseni zao wamebadilisha mwaka jana na inatakiwa wakae nazo miaka mitatu kabla ya miaka hiyo haijaisha au hata miezi sita wanaambiwa kuzibadilisha tena kwa gharama kubwa zaidi na baada ya mafunzo maalum.

Madereva wengi wameshindwa kubadilisha leseni zao katika muda uliopangwa  wa Desemba 31, 2011. Jambo hilo lisababisha tafrani na taharuki pale mabasi mengi yaliposhindwa kufanya safari kwa kuwa madereva wengi hawakuwa na leseni mpya. Januari 6, 2012 serikali ililazmika kuongeza muda bila kutaja ukomo wake.
Nilikuwa nashauri hivi, badala ya serikali kujikanganya namna hii ni heri ikaweka suala hili wazi kuwa madereva wenye leseni za zamani ambazo hazijaisha muda wake waendelee kuzitumia lakini zikiisha muda wakati wa kuongeza muda basi wahakikishe wanapata leseni mpya.

Kuliko hivi sasa serikali kuwakimbiza kimbiza madereva kubadilisha leseni kitu ambacho mimi binafsi naona ni kibaya kwani kinaongeza mianya ya rushwa sehemu za kubadilishia leseni pamoja na vyuoni kwani madereva wengi watanunua vyeti badala ya kupata elimu husika.

Hili la kuwataka madereva kubadilishe leseni zao huku serikali ikijua kuwa bado hazijaisha muda siyo utawala bora na wengi tunaitafsiri hatua hii kuwa ni mkakati wa serikali wa kukusanya pesa kutoka kwa watanzania ambao tayari wanakabiliwa na maisha magumu.

Tunadhani serikali inapaswa kutafuta njia nyingienya kutafuta pesa kwa ajili ya kuendesha nchi pasi na kuwatia jakamoyo wananchi. Zoezi hili la kubadilisha leseni ni kero. Ni zoezi ambalo halitapunguza ajali wala kuboresha ajira za madereva nchini Tanzania.

Add this page to your favorite Social Bookmarking websites