Ripoti kifo cha Kabote, kutoroka kwa mahabusu zatua kwa Lugola

Muktasari:

  • Kabote anadaiwa kuuawa akiwa mikononi mwa Polisi Mei 17, mwaka huu, saa 8:00 usiku na tukio la kutoroka kwa mahabusu 17, lilitokea Mei 21, mwaka huu, mkoani Geita.

Dar es Salaam. Waziri wa Mambo ya Ndani ya Nchi, Kangi Lugola leo Jumapili Juni 16,2019, amepokea ripoti mbili za uchunguzi ikiwemo ya kifo chenye utata cha Isululu Kabote (85), mkazi wa Kijiji cha Buhungukila, Kata ya Bugarama, Wilaya ya Maswa, mkoani Simiyu.

Kabote alidaiwa kuuawa akiwa mikononi mwa Polisi Mei 17, mwaka huu, saa 8:00 usiku.

Pia Lugola amepokea ripoti ya uchunguzi wa tukio la kutoroka kwa mahabusu 17, Mei 21, mwaka huu, mkoani Geita.

Mahabusu hao walifikishwa katika Mahakama ya Hakimu Mkazi Mkoa wa Geita wakikabiliwa na mashtaka mbalimbali na kuwekwa kwenye ukumbi wa jengo jipya la Mahakama wakisubiri kusomewa kesi zao.

Ripoti ya uchunguzi wa kifo cha marehemu Kabote iliwasilishwa na Lalph Meela (Mwenyekiti), kutoka Dawati la Malalamiko Wizara ya Mambo ya Ndani ya Nchi.

Wajumbe ni Daktari Bingwa wa Mifupa kutoka Hospitali ya Rufaa ya Dodoma, Ibenze Ernest, Kefa Kaswamila kutoka Dawati la Malalamiko Kitengo cha Upelelezi Wizara ya Mambo ya Ndani na Mzee Mzee kutoka Ofisi ya Ofisa Usalama, Mkoa wa Simiyu.

Kamati hiyo imefanya uchunguzi huo kuanzia Juni 4 hadi 10, mwaka huu na ripoti ya uchunguzi wa tukio la kutoroka kwa mahabusu ilikabidhiwa na Mwenyekiti wake, Alex Mfungo.

Baada ya kupokea ripoti hizo, Lugola amesema ameridhishwa na matokeo ya uchunguzi huo kwa sababu wajumbe wa kamati zote walipata fursa ya kuzichambua na kutoa mapendekezo.

Viongozi wengine waliokuwepo wakati Lugola akipokea ripoti hizo ni Katibu Mkuu wa Wizara hiyo, Meja Jenerali, Jacob Kingu na Naibu Katibu Mkuu, Ramadhani Kailima.

Kamati ya uchunguzi wa kifo cha Kabote iliundwa baada ya wananchi wa kijiji hicho kudai kabla ya kukumbwa na mauti, alikamatwa na polisi na kupigwa akidaiwa hajatoa mchango wa maendeleo wa Sh50,000, madai ambayo Jeshi la Polisi liliyakanusha.

Mmwili wa Kabote ulikaa siku 20 katika chumba cha kuhifadhia maiti kwa ajili ya uchunguzi wa kidaktari.