Mke wa Sabaya atoa ushahidi

Arusha. Mke wa aliyekuwa Mkuu wa Wilaya ya Hai, Lengai Ole Sabaya, Jesca Thomas (28) ameieleza Mahakama namna walivyokamatwa na mume wake na askari waliokuwa na silaha jijini Dar es Salaam.

Jesca ambaye ni shahidi wa pili wa utetezi katika kesi ya uhujumu uchumi inayomkabili Sabaya na wenzake sita ameieleza Mahakama kuwa alikamatwa na mume wake Mei 27 mwaka jana jijini Dar es Salaam ambapo alidai kabla ya kukamatwa walipekuliwa na askari hao waliokuwa wamevalia kiraia huku wakiwa na silaha.

Leo Januari 17, 2022 akiongozwa na Wakili Mosses Mahuna anayemtetea Sabaya, Jesca alijitambulisha mahakamani hapo kuwa ni mke wa mshitakiwa huyo na walifunga ndoa mwaka 2018.

SOMA: Sabaya, wenzake sita kuanza kujitetea leo

"Tukiwa chumbani walikuja watu usiku, walikuwa wanagonga kwa nguvu sana na hawakusubiri kufunguliwa walitumia njia zao wakaingia ndani ilikuwa ni saa 10 jioni. Walivyoingia Lengai akauliza ni nini na ni nani nyie, wakajibu wakasema ni askari wakatuamuru tukae sehemu moja,"

"Wengine wakawa wanapekua kabati mabegi wakatoa na godoro wakapekua kila mahali, vurugu kila kitu kikavurumushwa kule ndani,walivyomaliza wakasema tunaondona na nyie tunaenda Takukuru,na hawakutufahamisha chochote kabla ya kutupekua," amedai

Shahidi huyo amedai mahakamani hapo kuwa walikamatwa wao wawili na baada ya kutoka makao makuu ya Takukuru, Upanga walisafirishwa Juni 3 usiku na kufikishwa Arusha ambapo pamoja na vitu vingine walikabidhi gari aina ya Land Cruiser V8, lenye namba za usajili T 222 BDY ambayo walikutwa nayo, pesa pamoja na simu.

Amedai gari hilo Sabaya alinunua Oktoba 2020 kutoka kampuni ya Oil Com na ambaye alisimamia mauziano hayo alimtaja kwa jina la Said.

Kuhusu namba ya simu 0758 707171 inayodaiwa kuwa ya Sabaya, Jesca ameieleza mahakama kuwa namba hiyo imesajiliwa kwa jina la mume wake na wamekuwa wakiitumia wote ambapo yeye anaitumia kwa ajili ya kufanya biashara.

Akihojiwa na Wakili wa Serikali Mwandamizi, Ofmed Mtenga shahidi huyo alidai kuwa wana magari mawili ambayo yote ni Land Cruiser VX V8 yote yanashikiliwa Takukuru

Sehemu ya mahojiano hayo yalikuwa kama ifuatavyo;

Wakili: Nikumbushe majina yako

Shahidi: Jesca Thomas Nassari

Wakili: Wewe na Lengai Sabaya hamjawahi kufunga ndoa

Shahidi:Tumefunga ndoa

Wakili: Mlifunga ndoa lini?

Shahidi: Sabato Central Church mwaka 2018

Wakili: Cheti cha ndoa cha hilo kanisa unacho?

Shahidi:ndiyo 

Wakili:Kipo nyumbani mna mpango gani?

Shahidi:Kikihitajika nitakileta

Wakili:Leo ulijua unatoa ushahidi mbona hukukileta?

Shahidui:Sikuwa nakuja kuthibitisha ndoa ndiyo mana sikukileta

Wakili:Umekuja kufanya nini?

Shahidi:Kutoa ushahidi wa kesi inayoendelea mahakamani lakini si ya ndoa 

Wakili:Tutajie wasimamizi wa ndoa yenu

Shahidi:Ni Elibariki Nnko na Ruth Urassa

Wakili:Wako hapa Arusha

Shahidi:Wanakaa Dar Es Salaam

Wakili:Umesema  unafanya biashara gani?

Shahidi:Nauza na kununua maharage na mahindi

Wakili:Unauza kibaba debe au gunia?

Shahidi:Inategemea mteja anahitaji kiasi gani 

Wakili:Una warehouse ya kuhifadhi mazao ghala liko wapi?

Shahidi :Kisongo na lingine liko Tengeru

Wakili:Umekodi kwa nani?

Shahidi:mzee Metili

Wakili:Kiasi kikubwa cha mahindi na maharage ulichowahi kuuza?

Shahidi:Gunia 200,300 sijawahi kuzidisha

Wakili:Haumiliki kampuni

Shahidi:Ni kweli 

Wakili:Hauna hata leseni 

Shahidi:Biashara ninayofanya mimi haihitaji leseni

Wakili:Kwa hiyo hauna 

Shahidi:Eeh

Wakili:Kwa hiyo haulipi kodi

Shahidi:Ninalipa  ushuru

Wakili:Wapi

Shahidi:Sokoni

Wakili:Hauwezi kulipa ushuru sokoni wa gunia 200

Shahidi:Siwezi kuuza zote kwa pamoja

Wakili:iyo biashara ni ya kwako personal?

Shahidi:Tulikuwa tunafanya pamoja na Sabaya ila mimi ni msimamizi

Wakili:Kwa hiyo na Sabaya alikuwa anafanya biashara bila leseni?

Shahidi:Nimeshasema kwa aina ya biashara na mfumo tunaotumia hauhitaji kuwa na leseni

Wakili:Hizo biashara zenu za mahindi na maharage mmeanza mwaka gani

Shahidi:2018 

Wakili:Mmeshatengeneza kiasi gani?

Shahidi:Siwezi kujua kwa sababu ni fedha ambayo iko kwenye mzunguko

Wakili:Kwa biashara hii ambayo mimi naiona ni ndogo sana mtaji wenu ulikuwa kiasi gani?

Shahidi:Siwezi kujua manake fedha ziko kwenye mzunguko

Wakili:Wakati mlipoanza 2018

Shahidi:Milioni tatu

Wakili:Jesca unakubaliana na mimi biashara yenu ni ndogo sana labda uniambie mtaji wenu?

Shahidi:Nimesema fedha ziko kwenye mzunguko 

Wakili:Umeshawahi kufanya assesment ya biashara?

Shahidi:Sikumbuki

Wakili:Umesema umekaa na Sabaya na miaka minne?

Shahidi:Mitano sasa inakuwa 

Wakili:Mitano mingi,Sabaya hana kampuni

Shahidi:Ni kweli

Wakili:Hakuna biashara nyingine wewe na Sabaya zaidi ya mahindi na maharage?

Shahidi:Tunafanya ufugaji ambapo kwenye kufuga tunauza pia

Wakili:Ulisema mnafuga nini 

Shahidi:Ng'ombe, kuku na mbuzi

Wakili:Wewe na Sabaya mna kuku wangapi?

Shahidi:Mara ya mwisho niliwahesabu wako 600

Wakili:Wako wapi?

Shahidi:Wako Malula

Wakili:Mna ngonbe wangapi?

Shahidi:Mimi sijawahi kuwahesabu Lengai ndiyo anawahesabu

Wakili:Wewe ni mke wa Sabaya na haujui ngombe wake

Shahidi:Yeye ndiyo anapenda kuhesabu

Wakili:Umewahi kuuza ngombe lini?

Shahidi:Mdiyo mwaka jana mwezi wa nane

Wakili:Mwaka jana umeuza wa ngapi?

Shahidi:Lengai ndiyo anajua 

Wakili:Wewe ni mke ng'ombe zinauzwa haujui idadi?

Shahidi:Nataka kujua kilichopatikana 

Wakili:Mwaka juzi 2020 Sabaya aliuza ngombe wangapi

Shahidi:Sijui

Wakili:Haujawahi kujui Sabaya ameuza ngombe wangapi mwaka 2020?

Shahidi:Sifahamu 

Wakili:2019

Shahidi:Sifahamu

Wakili: 2018

Shahidi:Sifahamu

Wakili:Umesema hautaki kujua idadi unataka kujua kiasi mwaka jana alipata kiasi gani?

Shahidi:Mwaka jana hapana hakuuza

Wakili:Mwaka 2020 alipata kiasi gani kwa kuuza ng'ombe?

Shahidi:Kwa hela aliyokuja nayo 2020 ilikuwa Milioni 20 

Wakili:Katika mauzo hayo ingawa wewe ulikuwa hauzingatii idadi ya mifugo mlikuwa mnalipa kodi?

Shahidi:Tulikuwa tunalipa ushuru mnadani

Wakili:Sabaya alikuwa ana chanzo kingine cha mapato?

Shahidi:Mshahara 

W mbuzi anao wangapi

S sijawahi kuhesabu

Wakili:Nani anachunga mbuzi na ngombe huko shamba?

Shahidi:Kuna watu wako huko shamba 

Wakili:Shamba la nani?

Shahidi:La kwetu

Wakili:La  wewe na Sabaya

Shahidi:Ndiyo

Wakili:Shamba la heka ngapi Jesca?

Shahidi:11

Wakili:Umesema wewe na Sabaya mnamiliki magari mangapi?

Shahidi:Mawili namba T 341 ANT na T 222 BDY

Wakili:Gari la tatu

Shahidi:Ni hayo tu ninayoyafahamu

Wakili:Hiyo T 341 ATN ilinunuliwa ukiwa kwenye ndoa? 

Shahidi:Ndiyo

Wakili:Na hii T 222 BDY ilinunuliwa ukiwa kwenye ndoa?

Shahidi:Ndiyo 

Wakili:T 222 BDY mliinunua kwa Sh.milioni 60?

Shahidi:Hapana, tuliinunua kwa kuvunja unatoa gari unajazia hela  kidogo unachukua gari

Wakili:Na wewe Sabaya unampenda sana ndiyo mana unahudhuria kesi yake?

Shahidi:Kwa ajili ya kujua mwendelezo wa kesi si kumpenda 

Wakili:Ndiyo mana nakuona hapa tena 

Shahidi:Kujua mwendelezo wa kesi

Wakili:Shahidi wa 12 ulimsikia hapa mahakamani si ulikuwepo na ulimsikia

Shahidi:Ndiyo

Wakili:Pole lakini mume wako anashitakiwa umekuwa mwaminifu kuwasikikiza mashahidi wote 

Shahidi:Ndiyo

Wakili:Shahidi Sabri alisema gari T 222 BDY walimuuzia Sabaya na ulitolewa mkataba wa mauziano wa lile gari kama kielelezo 

Shahidi:Ndiyo

Wakili:Ule ndiyo mkataba wenyewe?

Shahidi:Mkataba wenyewe nimeutoa mimi na si ule 

Wakili:Kadi ya gari namba T 222 BDY inasomeka jina la Sabaya na si la kwako

Shahidi:Ndiyo

Wakili:Na hilo lingine?

Shahidi: Linasomeka jina la kwangu

Wakili: Alikununulia Sabaya

Shahidi: Tulinunua pamoja

Kesi hiyo imeahirishwa hadi kesho Januari 18, shahidi huyo atakapoendelea kuhojiwa na mawakili wengine wa Serikali.