CRDB yaendelea kufungua milango kwa Watanzania kuwekeza kwenye hisa
Muktasari:
Mkutano mkuu wa 22 wa Benki hiyo unaendelea jijini Arusha, leo (Ijumaa) na kesho.
Arusha. Mkurugenzi Mtendaji wa CRDB, Dk Charles Kimei amewataka Watanzania kujenga utamaduni wa kuwekeza kwenye hisa kutokana na kila kipato walichonacho.
"Tunaona ongezeko la kampuni kusajiliwa Soko la Hisa. Kutokana tulichonacho, kiwepo kwa ajili ya kula na mambo mengine lakini tusisahau kuwekeza kwa ajili ya baadaye. Hisa ni moja ya sehemu za kipato cha uhakika muda wowote," amesema Dk Kimei.
Mwenyekiti wa Bodi ya Wakurugenzi CRDB, Ally Hussein Laay amesema mazingira yamebadilika hivyo wananchi wawekeze kwenye hisa.
"Zamani yeyote aliyemiliki hisa alikuwa anaonekana ni bepari tofauti na ilivyo sasa. Ukiwa na kipato cha kutosha wekeza Soko la Hisa Dar es Salaam, Nairobi au Kampala," amesema Laay.
Mwenyekiti huyo mpya wa bodi amechukua nafasi iliyoachwa wazi na mtangulizi wake, Martin Mmari ambaye muda wake umekwisha.
