Dodoma yaishangaza Yanga ikitibua rekodi

Dar es Salaam. Dodoma Jiji imeishangaza Yanga katika mchezo wa Ligi Kuu Bara uliopigwa leo, kwenye Uwanja wa Airtel mjini Singida na kuondoka na pointi tatu baada ya ushindi wa mabao 3-2.

Huo ulikuwa mchezo wa kwanza wa Ligi Kuu Bara kwa Yanga kupoteza msimu huu, ambapo kabla ilikuwa imecheza mechi 22 bila kipigo chochote.

Ushindi huo umeifanya Dodoma Jiji kupanda hadi nafasi ya saba kwenye msimamo wa ligi ikifikisha pointi 32 na kuishusha Pamba Jiji iliyokuwa ikishika nafasi ya saba, huku zikiwa zimesalia mechi saba kabla ya msimu kumalizika.

Kipindi cha kwanza Yanga ilianza vizuri na kupata mabao mawili yaliyofungwa na kiungo Allan Okello aliyeendelea kuonyesha kiwango bora ndani ya kikosi hicho.

Okello, ambaye jana alitangazwa pia kuwa mchezaji bora wa mwezi, alifunga bao la kwanza dakika ya pili akimalizia krosi ya beki wa kulia Yao Kouassi, kabla ya kuongeza la pili dakika ya 41 akimalizia pasi ya Maxi Nzengeli.

Mambo yalianza kubadilika dakika ya 28 baada ya nahodha wa Yanga, Bakari Mwamnyeto, kujifunga alipokuwa akijaribu kuokoa krosi ya William Edgar na kuipatia Dodoma Jiji bao la kwanza.

Bao hilo lilionekana kumkera kipa namba moja wa Yanga, Djigui Diarra, ambaye alipoteza nafasi ya kupata 'clean sheet' yake ya pili dhidi ya Dodoma Jiji.

Katika mchezo wa mzunguko wa kwanza, William Edgar pia aliifungia Dodoma bao pekee wakati Yanga ikishinda mabao 3-1.

Diarra alitolewa dakika ya 38 kutokana na maumivu na nafasi yake kuchukuliwa na Hussein Masalanga, huku kipa huyo raia wa Mali akionekana kulalamika alipokuwa akielekea benchi.

Hata hivyo, Dodoma Jiji ilirejea kwa kasi kipindi cha pili na kusawazisha mabao dakika ya 88 kupitia Dickson Ambundo ambaye aliwapita walinzi wa Yanga kabla ya kufunga bao hilo muhimu.

Yanga ingeweza kupata ushindi mkubwa zaidi katika mchezo huo, lakini ilipoteza nafasi kadhaa za wazi kupitia Maxi Nzengeli, Prince Dube na Pacome Zouzoua.

Dakika ya 90, Yanga ilifanya uzembe mwingine uliomruhusu Waziri Junior kufunga bao la tatu lililoihakikishia Dodoma Jiji ushindi huo mkubwa.

Bao hilo pia limevunja rekodi ya Azam FC ambayo msimu uliopita ilikuwa timu ya mwisho kuifunga Yanga katika Ligi Kuu Bara ambapo mpaka leo ilkuwa imecheza mechi 42 bila kupoteza.

Mechi inayofuata Yanga inakutana na JKT Tanzania katika mchezo wa robo fainali ya Kombe la Shirikisho (FA), ambao unapigwa katika Uwanja wa Meja Jenerali Isamuhyo, Dar es Salaam. Hii itakuwa ni mara ya pili kwa mabingwa hao wa ligi na FA kucheza katika uwanja huo katika kipindi kisichozidi wiki tatu, kwani ilicheza na mtani wake, Simba, Mei 3, mwaka huu.