Jukumu la wabunge, wasanii na wanahabari uchaguzi Serikali za mitaa

Dodoma. Waziri Mkuu Kassim Majaliwa ametoa wito maalumu kwa wabunge, wasanii na vyombo vya habari kuhamasisha wananchi kuhusu umuhimu wa kushiriki katika uchaguzi wa Serikali za mitaa unaotarajiwa kufanyika Novemba 27, 2024.

Majaliwa ametoa kauli hiyo Ijumaa, Septemba 6, 2024, katika hotuba yake ya kuahirisha mkutano wa 16 wa Bunge uliojadili masuala mbalimbali na kupitisha miswada minane ya sheria huku wabunge wakiuliza maswali yanayohusu masilahi ya wananchi kwa Serikali.

Amesema wabunge wana jukumu la kutumia mikutano yao ya majimbo kama jukwaa la kutoa hamasa kwa wananchi kuhusu ushiriki katika uchaguzi wa Serikali za mitaa.

Wakiwa wawakilishi wa wananchi, wabunge wanajua hali ya kisiasa, kijamii na kiuchumi ya maeneo yao.

Kwa kuzingatia nafasi yao ya uongozi, wanaweza kuwafikia watu wengi na kuwaelimisha juu ya umuhimu wa kushiriki katika uchaguzi.

Kupitia mikutano yao, wabunge wanaweza kuwafahamisha wananchi kuhusu taratibu za uchaguzi, kuhimiza umuhimu wa kuchagua viongozi waadilifu na kuwaeleza kuhusu haki zao kama wapigakura.

Mikutano ya majimbo inatoa fursa ya mazungumzo ya ana kwa ana na wananchi, hivyo wabunge wanaweza kujibu maswali na kutoa ufafanuzi wa masuala yanayozua sintofahamu.

Pia, wabunge wanaweza kutumia ushawishi wao kuhimiza ushiriki wa wananchi katika hatua mbalimbali za uchaguzi, kuanzia uandikishaji, kuhakiki majina kwenye daftari la wapigakura hadi kushiriki siku ya kupiga kura.

Kwa kutumia mikutano yao majimboni, wabunge wamepewa jukumu la kuhakikisha wananchi wanaelewa haki na wajibu wao pamoja na kujitokeza kwa wingi siku ya uchaguzi.

Jukumu kwa Wasanii

Waziri Mkuu anatambua nguvu ya sanaa katika kufikisha ujumbe haraka, ndiyo maana katika hotuba yake alisisitiza wasanii watoe hamasa kwa wananchi kutokana na umaarufu na ushawishi wao kwenye jamii.

Wasanii nchini, wakiwa na wafuasi wengi kupitia mitandao ya kijamii, muziki, filamu na vipindi vya televisheni, wana nafasi ya kipekee ya kuhamasisha makundi mbalimbali ya jamii hasa vijana.

Kupitia kazi zao za sanaa, wasanii wanaweza kueneza ujumbe wa kuhamasisha ushiriki wa wananchi katika uchaguzi wa Serikali za mitaa.

Kwa mfano, wanaweza kuandaa nyimbo, matangazo ya video au filamu fupi zinazozungumzia umuhimu wa kushiriki katika uchaguzi, haki za wapigakura na mchakato mzima wa uchaguzi.

Ujumbe wa wasanii mara nyingi unawafikia watu wa rika na tabaka mbalimbali, hivyo kuongeza uelewa wa wananchi kuhusu haki zao za kikatiba na kuwahamasisha kushiriki.

Wasanii pia, wanaweza kuendesha kampeni za mitandao ya kijamii zenye lengo la kuelimisha na kuhamasisha ushiriki.

Vijana wengi wanafuatilia wasanii kupitia majukwaa kama Instagram, Facebook na TikTok, kwa hiyo kampeni hizi zinaweza kuongeza ushiriki wa vijana ambao ni kundi muhimu katika mchakato wa uchaguzi.

Jukumu kwa vyombo vya habari

Waziri Mkuu amesisitiza kuwa vyombo vya habari ni nyenzo muhimu ya kufikisha taarifa kwa umma, hasa kuelekea uchaguzi wa Serikali za mitaa.

Kupitia magazeti, redio, televisheni na mitandao ya kijamii, vyombo vya habari vinaweza kueneza ujumbe kwa haraka na kwa wigo mpana zaidi.

Vyombo vya habari vina jukumu la kutoa taarifa sahihi na kwa wakati kuhusu taratibu za uchaguzi, uandikishaji wa wapigakura, vituo vya kupigia kura, na maelezo mengine muhimu kwa wapiga kura.

Pia, vinaweza kutoa nafasi kwa maoni ya wananchi kuhusu matarajio yao kwa viongozi wanaotarajiwa kuchaguliwa.

Aidha, vyombo vya habari vinaweza kuandaa vipindi maalumu vya mijadala kuhusu uchaguzi, vikishirikisha wataalamu wa masuala ya uchaguzi, viongozi wa kisiasa na wananchi wa kawaida.

Mijadala hii itasaidia kuongeza uelewa wa wananchi kuhusu umuhimu wa kushiriki na kufafanua taratibu za uchaguzi.

Vyombo vya habari vinaweza kuchangia kuondoa hofu, upotoshaji au upungufu wa taarifa unaoweza kuwazuia watu kushiriki kikamilifu katika uchaguzi.

Kauli ya Waziri Mkuu inawalenga wabunge, wasanii, na vyombo vya habari kama sehemu ya kampeni pana ya kuhakikisha wananchi wanashiriki katika uchaguzi wa Serikali za mitaa.

Haki ya Kikatiba kushiriki uchaguzi

Waziri Mkuu amesisitiza kuwa, kushiriki katika uchaguzi ni haki ya kikatiba ya kila Mtanzania. Katiba ya Jamhuri ya Muungano wa Tanzania inatoa haki ya kupigakura na kushiriki katika maamuzi ya kidemokrasia.

Kwa mujibu wa Katiba, kila raia mwenye sifa za kupiga kura ana haki ya kuchagua na kuchaguliwa kushika nafasi za uongozi katika ngazi mbalimbali za Serikali.

Kwa kuzingatia haki hiyo, Waziri Mkuu amewahimiza Watanzania kutumia haki yao ya kupigakura kwa kuchagua viongozi wanaowaamini na watakao wawakilisha kwa uadilifu.

Haki hii ya kikatiba ni mojawapo ya nguzo muhimu za demokrasia nchini, na ushiriki wa wananchi katika uchaguzi unasaidia kuimarisha misingi hiyo.

Haki hii pia inawahakikishia wananchi ushiriki sawa katika mchakato wa maamuzi ya kisiasa bila ubaguzi wa aina yoyote.

Maendeleo ya kijamii

Uchaguzi wa Serikali za mitaa ni chombo muhimu katika kufanikisha maendeleo ya kijamii na kiuchumi katika ngazi za chini za utawala.

Viongozi wanaochaguliwa katika uchaguzi huu, wanasimamia utekelezaji wa sera na mipango ya maendeleo inayolenga kuboresha maisha ya wananchi.

Kwa hiyo, ushiriki wa wananchi ni muhimu ili kuhakikisha viongozi wanaochaguliwa ni wale wenye uwezo wa kusimamia maendeleo hayo kwa manufaa ya jamii.

Uchaguzi huu unahusu viongozi wa vijiji, mitaa na kata; na wananchi wanapaswa kuelewa kwamba viongozi hawa wana jukumu la moja kwa moja katika maisha yao ya kila siku. Wanasimamia huduma za msingi kama maji, elimu, afya na miundombinu.

Wananchi wanaposhiriki katika uchaguzi huu, wanachagua viongozi ambao watakuwa na dhamana ya kuboresha huduma hizi na kuhakikisha rasilimali za umma zinatumika kwa masilahi ya wote.