Wapigakura 3,352 wapoteza sifa Zanzibar

Unguja. Tume ya Uchaguzi Zanzibar (ZEC) imewaondoa wapigakura 3,352 kwenye Daftari la Kudumu la Wapigakura kwa kupoteza sifa.

Wakati ZEC ikieleza hayo, wadau wa vyama vya siasa wametoa maoni tofauti kuhusu hatua hiyo.

Taarifa iliyotolewa leo Julai 4, 2025 na Mkurugenzi wa Uchaguzi wa ZEC, Thabit Idarous Faina imesema imefikia uamuzi wa kuwaondosha wapigakura hao katika daftari hilo baada ya kujiridhisha kwamba hawana sifa.

"Tume imekamilisha awamu mbili za uandikishaji wa wapigakura wapya na inaendelea na shughuli za uendelezaji wa daftari la kudumu, ikiwa ni pamoja na uhamisho wa wapigakura, marekebisho ya taarifa na kupokea taarifa za waliopoteza sifa,” amesema.

Kati ya wapigakura 3,352 waliopoteza sifa na kuondolewa kwenye daftari, wanawake ni 1,344 na wanaume ni 2,008.

Vilevile, ZEC imesema Mkoa wa Mjini Magharibi unaongoza kwa idadi ya wapigakura waliopoteza sifa ukiwa na jumla ya watu 993 ukifuatiwa na Mkoa wa Kusini Unguja (795), Kaskazini Unguja (628), Kaskazini Pemba (564) na Kusini Pemba (372).

Faina amesema hatua hiyo ni sehemu ya maandalizi ya Uchaguzi Mkuu wa baadaye mwaka huu na orodha hiyo imetolewa kwa kuzingatia kifungu cha 19 na 31 cha sheria ya uchaguzi ya mwaka 2018.

Pia amewahakikishia wananchi kuwa tume itaendelea kusimamia kwa umakini uendeshaji wa shughuli zote za uchaguzi ili kuhakikisha uchaguzi unakuwa huru, wa haki na unaozingatia misingi ya demokrasia.

ZEC imeandikisha wapigakura wapya 101,641 katika daftari hilo.

Tume ilianza uandikishaji wa wapigakura wapya awamu ya kwanza Desemba 2, 2023 hadi Januari 15, 2024 na awamu ya pili ilianza Februari Mosi, 2025 hadi Machi 17, mwaka huu.

ZEC ilitangaza orodha ya wapigakura waliopoteza sifa Mei, mwaka huu na kutoa nafasi kwao kuweka pingamizi iwapo yupo ambaye hajapoteza sifa hizo.

Katibu wa Itikadi, Uenezi na Mafunzo wa Chama cha Mapinduzi (CCM) Zanzibar, Khamis Mbeto amesema chama hicho hakina shaka na uamuzi uliofanywa na ZEC, kwani wanatumia sheria namba nne ya mwaka 2018.

"Chama chetu kimekubaliana na uamuzi ulitolewa na ZEC kwani ndio wenye mamlaka ya kufanya hivyo na sheria ya mwaka 2018 imewaruhusu kufanya hivyo, wakiwa na sababu zaidi ya hilo watatoa ufafanuzi wa hilo.

Kwa upande wake, Katibu wa Itikadi, Habari na Mawasiliano ya Umma kutoka chama cha ACT-Wazalendo, Salim Bimani amesema uamuzi uliotolewa si sahihi kwani sifa mojawapo ya kuondolewa katika daftari la kudumu ni kifo, akidai walioondolewa hawajafa hivyo utolewe ufafanuzi.

"Chama chetu hakijakubaliana na uamuzi ulitolewa na ZEC kwani umeenda kinyume cha haki za wananchi, kama watu waliandikishwa inakuwaje waondolewe kwa nini isingezuiliwa kabla ya kujiandikisha," amehoji Bimani.