Biashara 148 zafungwa ndani ya siku 90

Sunday April 25 2021
BIASHARA PC
By Seif Jumanne

Njombe. Zaidi ya biashara 140 zimefungwa mkoani hapa katika kipindi cha miezi mitatu kuanzia Januari mpaka Machi 31, mwaka huu kutokana na sababu mbalimbali, ikiwamo madeni kwa wafanyabiashara.

Hayo yalibainishwa juzi na Meneja Msaidizi wa Mamlaka ya Mapato Tanzania (TRA) mkoa wa Njombe, George Mapunda kwenye kikao cha kamati ya ushauri ya mkoa (RCC) kilichofanyika mjini hapa.

Alisema wafanyabiashara wengi wamekuwa na uelewa mdogo kuhusu masuala ya kodi, licha ya mamlaka hiyo kuwa na kitengo cha kutoa elimu kwa mlipa kodi na wamekuwa wakipita maeneo mbalimbali kutoa elimu hiyo.

“Kuna timu kutoka makao makuu na ile ya hapa walipita mlango kwa mlango ili kuelimisha wananchi. Walikwenda Ludewa, Makambako na Njombe mjini na sisi ratiba ya kuwatembelea wadau wetu ipo palepale,” alisema Mapunda.

Alisema wafanyabiashara wadogo wanatozwa kodi kulingana na kumbukumbu ya mauzo ambayo ipo kisheria, hivyo wanapouza na kutumia mashine wanaweza kutambua kiasi cha kodi wanachostahili kulipa pasipo kusumbuliwa.

Hata hivyo, alisema kama mfanybiashara hajaridhishwa na makadirio ya kodi aliyopatiwa anapaswa kwenda ngazi za juu na tatizo hilo likatatuliwa.

Advertisement

“TRA haifungi biashara ya mtu, kuna watu wanadaiwa lakini hatufungi biashara, tunachofanya tunakuita tunakaa mezani tunakwambia ulipe na deni lako ni hili kisha tunaingia katika makubaliano ya kulipa kwa awamu,” alisema Mapunda.

Alitoa rai kwa wafanyabiashara kutunza kumbukumbu za mauzo ili kukadiriwa kiasi cha kodi kulingana na mauzo.

Mkuu wa Mkoa wa Njombe, Mhandisi Marwa Rubirya aliitaka TRA mkoani hapa kuzingatia maelekezo yaliyotolewa na Rais Samia Suluhu Hassan ya kuwataka kukusanya kodi kwa weledi na kuacha kutumia mbinu zinazoua biashara.

Alisema mamlaka hiyo ina wajibu wa kisheria wa kuhakikisha wanahamasisha ukusanyaji wa kodi kutoka kwa wafanyabiashara kwa hiari pasipo kutumia mabavu na kwamba, elimu inayotolewa inapaswa kuendelea ili kujenga ufahamu.

Advertisement