Flatey: Sipigi tena sarakasi

Mbulu. Mbunge wa Jimbo la Mbulu Vijijini Mkoani Manyara, Flatey Massay ameishukuru Serikali kwa kutenga Sh8 bilioni za ujenzi wa barabara aliyoiombea fedha kwa zaidi ya miaka saba, hivyo hataruka tena sarakasi.

 Flatey ameyasema hayo wakati mwenge wa uhuru ukiweka jiwe la msingi kwenye barabara ya lami yenye urefu wa kilomita 0.6 iliyopo kata ya Haydom.

Hivi karibuni akiwa akichangia hotuba ya bajeti ya Wizara ya Ujenzi na Mawasiliano Bungeni jijini Dodoma, aliruka sarakasi kuonyesha hisia yake kwa barabara ya lami kutojengwa.

Hata hivyo, leo Juni 19 amesema hivi sasa hawezi kupiga tena sarakasi baada ya Serikali kutenga kiasi cha fedha kwa ajili ya kuanza ujenzi wa barabara hiyo eneo la Haydom.

"Sarakasi ya Bungeni imejibu kwani serikali imetenga sh8 bilioni za awali za ujenzi wa barabara ya kutoka Karatu kupitia Mbulu, Haydom hadi Sibiti," amesema Flatey.

Amesema amekuwa mbunge kwa zaidi ya miaka saba huku akiisemea barabara hiyo kwa muda huo na sasa imetengewa fedha ili ujenzi uanze.

Kiongozi wa mbio za mwenge Sahili Nyanzabara Geraruma amempongeza mbunge huyo kwa namna anavyowasemea wananchi wa eneo hilo.

"Wewe ni mkimbiza mwenge mwandamizi tunakuona kwenye vyombo vya habari namna unavyoisemea Mbulu na changamoto zake," amesema.

Naye Mkurugenzi mtendaji wa halmashauri ya wilaya ya Mbulu, Abubakary Kuuli amesema ukiwa halmashauri ya Wilaya hiyo mwenge umetembelea miradi mitano ya thamani ya sh1.4 bilioni.

Kuuli ametaja miradi hiyo ni ujenzi wa vyumba vitatu vya madarasa, kiwanda cha chaki, kituo cha afya, ujenzi wa barabara ya lami na mradi wa maji.