Visa, mikasa ya mahusiano siku ya Valentine

Dar es Salaam. Zimesalia siku mbili ifike Februari 14, ambayo kila mwaka huadhimishwa sikukuu ya wapendanao, maarufu kama ‘Valentine day’.

Sikukuu hii huadhimishwa kwa namna tofauti, huku ikihusisha kutoa na kupokea zawadi kwa marafiki, ndugu au mpenzi.

Gazeti la Mwananchi limefanya mahojiano na baadhi ya watu ambao wanaeleza visa na mikasa ambayo imewahi kuwatokea katika siku hii ya wapendanao miaka ya nyuma na kusababisha kushindwa kuisahau.

Mwajuma Buremo, mkazi wa Mabibo Mwembeni anasema mwaka 2019 aliachana na mpenzi wake siku ya wapendanao baada ya kumfumania akiwa na mwanamke mwingine.

“Kila ikifika Valentine namkumbuka ex wangu (mpenzi wa zamani) ambaye mwaka 2019 kwenye siku kama hiyo nilimfumania akiwa na mwanamke mwingine nyumbani kwake,” anasema.

Mwajuma anasema alipanga kumfanyia ‘sapraizi’ ya kumpelekea zawadi nyumbani kwake, tukio hilo la upendo likageuka shubiri kwa Mwajuma.

“Mpaka leo najilaumu kwa nini sikumuambia mapema kama nitaenda kwake kwa sababu nilimnunulia saa na shati zuri, lakini nilivyompelekea, ile naingia tu ndani nakutana na mwanamke mwingine akiwa amevaa taulo lake, kwa kweli mpaka leo ikifika hii siku naumia sana,” anasimulia Mwajuma.

Gazeti hili kupitia ukurasa wake wa Instagram liliuliza ‘Je, mkasa gani uliwahi kukutokea katika siku hii ambao hutausahau?’

Akijibu swali hilo, Paulo William alisema hatasahau alivyoachana na mpenzi wake baada ya kutokomea na fedha aliyompatia kwa ajili ya kununua nguo za kuvaa siku hiyo.

“Ni tukio ambalo nilimpatia pesa ya kwenda kununua nguo kwa ajili ya Valentine, ila hukutokea na hapo penzi letu liliisha, mpaka leo sijawahi kumuona tena,” aliandika William.

Naye Charles Ancelimo, akijibu swali hilo alisema: “Nilimfanyia shopping (manunuzi) ya nguo na viatu, yaani sikuacha kununua kitu, alisuka vizuri, nilimnunulia simu mpya (smartphone), ilipofika jioni muda wa kwenda klabu, ikabidi kila mtu alale kwake kwa sababu tulikubaliana tupumzike.

“Kesho yake asubuhi nikakutana na binti tunafahamiana akaniuliza mbona jana sijakuona klabu na mpenzi wako, nikamjibu hatukutoka tulipumzika nyumbani, akaendelea kunieleza mbona nilimuona mpenzi wako anacheza muziki na mhasibu wa sekondari (hajalitaja jina la shule), nikamkatalia nikamuuliza alikuwa amevaa nguo gani, akazitaja nguo mpya nilizokuwa nimemnunulia, niliumia sana siku hiyo na tuliachana.”

Devotha Mathias alisema siku kama hiyo aliachwa na mpenzi wake kutokana na madai ya kumsumbua kwa kumpigia simu mara kwa mara.

“Ilikuwa siku ya tarehe 13 usiku kuamkia Februari 14, nilituma sms (ujumbe mfupi wa maneno) nyingi sana kwa mpenzi wangu, mimi nilikuwa Arusha, yeye Mbeya na alikuwa hazijibu.

“Usiku wa saa sita nikajipinda na kuandika ujumbe mzuri wa mahaba na kutuma kwake nikiamini akiamka atausoma, asubuhi nilipoamka hakuna majibu wala hata simu iliyopigwa na yeye,” alisema Devotha.

Devotha anasimulia baadaye mpenzi wake alipokea ila mazungumzo yake hayakuwa ya mahaba kama alivyozoea, anasema baada ya kumuuliza shida nini, alijibu kuwa alimsumbua sana hivyo waachane.

Si kwa wapenzi tu, hata wazazi wanaweza kufanya jambo la kuacha alama kwa watoto wao katika siku hii ambayo dunia nzima inaadhimisha upendo. Elvira Mboje anasema kwa mara ya kwanza alinunuliwa simu na baba yake katika siku ya Valentine.
“Hii siku sitakuja kuisahau, baba alininunulia simu yangu ya kwanza kabisa,” alisema Elvira.
 

Wanasaikolojia waeleza

Mwanasaikolojia na mtaalamu wa mahusiano, Naima Omari anasema kinachosababisha mahusiano kuvunjika siku ya Valentine ni tamaa na ahadi kutotimizwa miongoni mwa wapenzi.

“Hii imekaa katika sehemu mbili, moja ni wanawake ambao mara nyingi wanayavunja mahusiano siku ya Valentine kwa sababu tu hajapewa zawadi au kufanyiwa kitu cha kipekee na mpenzi wake.

“Lakini pia wakati mwingine wale marafiki zake wa karibu wanaweza kuwa chanzo endapo wao wakipewa zawadi au kufanyiwa vitu vya kipekee na wapenzi wao katika siku hiyo,” anasema Naima, ambaye pia ni mshauri wa mahusiano.

Katika sehemu ya pili, Naima anasema wanaume wengi wanavunja mahusiano yao wakati wa Valentine kutokana na tamaa katika mahusiano.

“Wanaume wanavunja mahusiano yao kwa haraka endapo akipata mpenzi mpya ambaye anaona wanaendana, na wakati huu unawakuta wanawake wengi wanakuwa tayari kuingia katika mahusiano kutokana na asili ya mwezi na tarehe husika (siku ya wapendanao),” anaongeza Naima.

Mwanasaikolojia huyo anashauri ili kuepuka kuvunja mahusiano siku ya Valentine, ni vyema wapenzi waishi kwa upendo kila siku na si kusubiria Valentine.

“Hii siku ukisubiri upendo wa kipekee utaumia sana endapo usipoupata, kitu cha muhimu jifunze kujipenda na kuridhika,” anashauri Naima.

Ushauri wa Naima unaendana na wa mwanasaikolojia mwingine na mtaalamu wa mahusiano, Japhet Ngali ambaye anasema matarajio yaliyopita kiasi katika siku ya Valentine ni chanzo cha migogoro na mahusiano mengi kuvunjika.

“Hii siku ukiwa na matarajio ya juu sana, kwamba labda mpenzi wangu ataninunulia kitu fulani, na asipofanya hivyo utaumia maradufu na mnaweza kuachana kwa sababu utaanza kupunguza mapenzi naye,” anashauri Ngali.

Hata hivyo, Ngali anashauri ili kudumu katika mahusiano na mpenzi wako hakikisha kila siku unaishi kama ni Valentine, hii akimaanisha kuwa na upendo wa dhati na uaminifu kwa mwenza wako.
 

Mafundisho ya dini

Licha ya sikukuu hiyo kuwa na dhana ya kuwakutanisha wapenzi ambao aghalabu hawajafunga ndoa, kwa mwaka 2024, Februari 14 pia ni siku ya Jumatano ya majivu ambayo Wakristo, hasa Wakatoliki huanza msimu wa kufunga wa Kwaresma.

Askofu Msaidizi mstaafu wa Jimbo Katoliki la Bukoba, Methodius Kilaini anasema siku hiyo si ya kutenda dhambi, bali ni ya kujitakasa kwa kufanya tafakari na kutenda matendo mema.

“Hiyo ni siku ya kufunga kwa Mkristo Mkatoliki yeyote, si siku ya kutenda dhambi, na hiyo ni amri na ni siku ya kuanza mafungo,” anasema Askofu Kilaini.

“Sasa kama ukitoka kupaka majivu ndio ukatende dhambi hiyo haipo sawa, kwa sababu siku yenyewe ni ya kujitakatifuza na ukifanya dhambi yoyote umeiharibu siku hiyo,” anaongeza Askofu Kilaini.
 

Uhusiano wa Valentine na biashara

Licha ya kuwapo mikasa katika mahusiano katika siku ya Valentine, ukweli unasalia wakati huu maduka yanayouza zawadi na bidhaa nyingine sampuli hiyo huneemeka zaidi.

Neema Mkunda, ambaye ni muuzaji wa duka la maua jijini Dar es Salaam, anasema msimu huu biashara inakuwa kubwa kwa sababu ya uhitaji wa bidhaa hizo katika kunogesha mapenzi.

“Huwezi kudanganya kwa sasa biashara tunaifanya sana, hapa kwangu nauza maua mbalimbali, nafunga zaidi na msimu huu kuanzia Februari 1 hadi Februari 14 tunawauzia watu wengi,” anasema.

Kuhusu jinsi ya wateja wake, Neema ambaye duka lake lipo Kijitonyama jijini Dar es Salaam anasema wanaonunua zawadi au kuagiza kupelekewa (delivery) wengi ni wanaume.

Kauli ya Neema kuhusu mauzo kuongezeka inaungwa mkono na utafiti wa miamala ya kadi za mastercard uliofanywa na kuchapishwa katika tovuti ya kampuni hiyo, unaosema matumizi ya kadi hizo katika manunuzi huongezeka mara tano zaidi siku ya Valentine.

Utafiti huo wa Mastercard ulifanyika katika nchi 53 duniani. “Miamala ya jumla msimu wa Valentine (11-14 Februari) imeongezeka kwa asilimia 31 katika kipindi cha miaka mitatu iliyopita (2018, 2019 na 2020).”
 

Historia ya Valentine

Kwa mujibu wa tovuti ya masuala ya historia ya ‘country living.com’, Italia wakati wa karne ya tano kulikuwa na kiongozi aliyeitwa Mfalme Claudius II, ambaye aliamini kuwa askari anapooa hawi mkakamavu na pia muda mwingi anawaza kuhusu familia yake zaidi ya kitu kingine chochote.

Hivyo alipiga marufuku ndoa kwa askari. Kitendo hicho hakikuwafurahisha watu wengi, akiwamo Padri Valentino. Kiongozi huyu wa kidini aliendelea kufungisha ndoa kwa siri.
Mfalme Claudius alipopata habari hizi aliamuru Valentino akamatwe na kuuawa.

Mtakatifu Valentino aliuawa Februari 14, ndiyo maana ikatangazwa rasmi kuadhimishwa kwa ajili ya kumkumbuka kama baba wa upendo na mtetezi wa wanandoa.

Historia zinaonyesha kuwa aliyetangaza rasmi kuadhimisha siku hiyo ni Papa Gelasius. Aidha, iko simulizi nyingine inayosema kuwa akiwa gerezani kwa amri ya Mfalme Claudius, Padri Valentino aliandika barua ambayo ilikuwa na salamu kwa binti aliyekuja kumsalimia gerezani, mwisho wa barua alihitimisha kwa kusema ‘Kutoka kwa Valentino wako’. Tangu hapo Valentino anakumbukwa kama mtetezi wa wapendanao na sikukuu yake kuadhimishwa ulimwenguni kote.

Kwa mujibu wa mafundisho ya Kanisa Katoliki, baadaye, Padri Valentino alikuja kutangazwa kuwa mtakatifu.