Serikali yajipanga kuvuna utalii AFCON 2027

Dar es Salaam. Wakati Tanzania ikijiandaa kuwa mwenyeji wa Fainali za Mataifa ya Afrika (AFCON) 2027, Serikali imeanza kuweka mikakati mahsusi kuhakikisha sekta ya utalii inanufaika ipasavyo na ujio wa maelfu ya wageni kutoka mataifa mbalimbali.

Akizungumza bungeni leo Aprili 21, 2026, Naibu Waziri wa Maliasili na Utalii, Hamad Chande amesema maandalizi yamefikia hatua nzuri, huku akibainisha kuwa wataalamu wa sekta hiyo tayari wameanza kutoa mafunzo kwa wajasiriamali ili kuwajengea uwezo wa kuhudumia wageni watakaohudhuria mashindano ya AFCON 2027.

Amesema lengo la mafunzo hayo ni kuhakikisha wageni hao hawaishii kushuhudia michezo pekee, bali wanapata fursa ya kutembelea vivutio mbalimbali vya utalii vilivyopo nchini, hatua itakayochochea mapato ya sekta hiyo na kukuza uchumi wa wananchi.

“Tumeshajipanga vya kutosha. Wataalamu wetu wanaendelea kuwajengea uwezo wajasiriamali wetu wadogo na wa kati ili wawe tayari kupokea wageni na kuwapa huduma bora zitakazowavutia kutembelea vivutio vyetu,” amesema Chande.

Kauli hiyo ameitoa wakati akijibu swali la nyongeza la Mbunge Lucy Mwakyembe, aliyetaka kufahamu mikakati ya Serikali katika kuwawezesha wajasiriamali wadogo kunufaika na ujio wa wageni hao.

Katika majibu yake, Naibu Waziri amesisitiza kuwa Serikali inaona mashindano hayo kama fursa adhimu ya kuitangaza Tanzania kimataifa, si tu katika michezo bali pia katika utalii, utamaduni na huduma za ukarimu.

Ameongeza kuwa kupitia maandalizi hayo, wajasiriamali watawezeshwa kutumia vyema fursa ya ongezeko la wageni kwa kutoa huduma zenye viwango, jambo litakalosaidia kuongeza muda wa wageni kukaa nchini na kuongeza mapato ya taifa.

Fainali za AFCON zimepangwa kufanyika kuanzia Juni 19 hadi Julai 18 mwakani katika nchi za Kenya, Uganda na Tanzania zikishirikisha timu 28.