Yasin Ayari: Mswedeni aliyeitesa Tunisia timu ya baba yake

Mara nyingi soka huandika simulizi ambazo haziwezi kutungwa na mwandishi wa filamu. Ndivyo ilivyokuwa katika Kombe la Dunia 2026, ambapo kiungo kijana wa Sweden, Yasin Ayari, aliandika ukurasa mpya wa historia kwa kuiongoza timu yake kuichapa Tunisia mabao 5-1 katika mchezo wa Kundi F.

Kilichofanya ushindi huo kuwa wa kipekee si idadi ya mabao pekee, bali ni ukweli kwamba Ayari alifunga mara mbili dhidi ya taifa la baba yake.

Akiwa mbele ya maelfu ya mashabiki na mamilioni ya watazamaji duniani, Ayari alionyesha ubora, utulivu na uwezo mkubwa wa kiufundi ambao umeanza kumtambulisha kama nyota mpya wa Sweden.

Bao la mapema, heshima kwa nchi ya baba yake

Sweden ilianza mechi kwa kasi kubwa na katika dakika ya saba, Ayari aliifungia timu yake bao la kwanza baada ya kutumia makosa ya safu ya ulinzi ya Tunisia.

Kiungo huyo alituma kombora kali la mbali lililomshinda kipa wa Tunisia na kuamsha shangwe kubwa kwa mashabiki wa Sweden.

Hata hivyo, badala ya kushangilia kwa mbwembwe, Ayari aliamua kuonyesha heshima kwa baba yake.

Aliinua mikono yake juu kama ishara ya kuomba radhi na kuthibitisha uhusiano wake wa karibu na taifa la Tunisia.

Dakika za nyongeza ziliandika sura nyingine ya hadithi hiyo. Ayari alifunga tena kwa shuti la kuvutia kutoka nje ya eneo la hatari, akihitimisha ushindi mnono wa Sweden na kujitangaza rasmi katika jukwaa la dunia

Kijana mwenye asili ya mataifa matatu

Yasin Abbas Ayari alizaliwa Oktoba 6, 2003 mjini Solna, Sweden.

Baba yake anatokea Tunisia, huku mama yake akiwa na asili ya Morocco. Kutokana na historia hiyo ya kifamilia, Ayari alikuwa na nafasi ya kuichezea Sweden, Tunisia au Morocco katika ngazi ya kimataifa.

Licha ya kuvutiwa na Tunisia, Ayari aliamua kuwakilisha taifa alikozaliwa na kulelewa. Uamuzi huo sasa umeanza kuzaa matunda.

Kutoka academy hadi ligi kuu ya England

Safari ya Ayari ilianzia katika academy  ya klabu ya AIK, moja ya vituo vikubwa vya kukuza vipaji nchini Sweden.

Baada ya kuonyesha kiwango bora akiwa na umri mdogo, alipandishwa kikosi cha wakubwa mwaka 2020 kabla ya kuvutia macho ya vigogo wa Ulaya.

Mwaka 2023, alisajiliwa na Brighton & Hove Albion ya England, klabu inayosifika kwa kuibua na kuendeleza vipaji vya vijana.

Pia, amewahi kucheza kwa mkopo katika klabu za Coventry City na Blackburn Rovers, hatua zilizomsaidia kupata uzoefu wa soka la ushindani.

Katika ngazi ya kimataifa, Ayari alipitia timu zote za vijana za Sweden kuanzia U17, U19 na U21 kabla ya kuitwa kwenye timu ya taifa ya wakubwa mwaka 2023.

Mechi yenye hisia nzito

Kwa Ayari, huu haukuwa mchezo wa kawaida. Akiwa amekulia katika familia yenye mizizi ya Tunisia, amewahi kutembelea nchi hiyo mara kwa mara wakati wa likizo na bado ana uhusiano mkubwa na ndugu zake waliopo huko.

Ndiyo maana baada ya kufunga, alichagua kuonyesha heshima badala ya shangwe.

Lakini, ndani ya dakika 90, hisia ziliwekwa pembeni na taaluma ikachukua nafasi yake.

Kwa mabao mawili dhidi ya taifa la baba yake, Ayari ameonyesha kuwa ana uwezo wa kubeba matumaini ya Sweden katika Kombe la Dunia 2026.

Imeandikwa na Noor Shija kwa msaada wa mtandao