Acha utani, Jide anapendwa nyie!

Dar es Salaam, Wana Viingereza vyenye upako. Vile Viingereza hivyo hupatikana eneo tengefu. Ngozi, mavazi, vinywaji na maongezi yao ni tofauti. Afya zao zimeboreshwa na kunawirishwa.

Siyo kwa vipodozi bali kwa misosi na vinywaji vilivyojaa katika jokofu majumbani. Mazingira ya malazi, kuanzia zulia mpaka shuka. Hata korido zao zinakupa nyongeza ya kuishi.

Huwaoni Mlimani City au Dar Free Market. Ni vigumu kukutana nao mitandaoni. Huwaoni wakihojiwa ama kulalama kama wapiga kura wa serikali za mitaa. 

Maeneo mengi ya mjini hawayajui. Kwenye ‘vibaa’ na vikumbi vyenu hivyo ndio kabisa. Unakuta mara ya mwisho kufika Magomeni ni 2008. Alienda kwa Mwajabu kupaka hina ya shughuli.

Si ajabu Mwajabu alishadedi kwa kugongwa na boda. Hivyo hawezi tena kwenda Magomeni. Mitaa yetu hawana ushirika nayo, uswahibu au ushosti nayo. Kifupi siyo chimbo zao kabisa.

Njia yao kuu ni Bagamoyo Road, Ally Hassani Mwinyi, Bibi Titi na Nyerere Road. Wanazitumia sana wanapoenda Airport. Morogoro na Mandela Road wanaamini zina fujo sana.

Mitaa wanayoishi Mbweni Mbweni, Ununio kule. Yes! Ni ‘maanti’ flan wale classic sana. Walifunga ndoa na elimu, ikawapa usalama wa maisha yao kwa ajira za pesa chekwa za salare. ‘No stresi’.

Wanavaa miwani inayoakisi picha ya elimu au maisha bora ya mvaaji. Miguuni kote wana vikuku vya ‘goldi au silva’. Siyo zile shanga za ‘yero subai’. Kila kitu kipo ‘oni pointi’ na wakivutia kwa marashi ya ghali.

Vinywaji vyao ni ‘impoted bia’ tupu. Mikononi wana simu ‘latesti’ na za gharama. Shingoni cheni na vidani vya gharama. Siyo vilaza wengi wana CPA, MBA Mastazi Digrii na maelimu elimu ya juu juu tupu.

Wamepaki ndinga flan. Siyo zile za unazozijua, na mara nyingi hukaa bar kwa makundi. Hawapayuki wala kucheka ovyo na neno umbea ni msamiati kwao. Hawanyanyasi na kukaripia wahudumu wakiagiza kitu.

Wana ‘lavu’ na watu wa hali yoyote. Hupiga stori na waosha magari yao tena kwa heshima. Shepu zao flani hivi zilinona, tuvitambi kwa mbali. Achana na vitambi vya Bonyokwa na Mavurunza.

Wengi ni ‘singo maza’ kwa sababu tu ya kujimudu. Hawakutaka kuishi ‘kistresi’ kama Zay na Isabella wa Chang’ombe. Wao ‘hudeti’ kitaita na taita za Afrika Magharibi, midingi ya UNDP, UNICEF nk.

Hata ‘wakideti’ na sisi wahuni wa Sinza ni basi ni kwa usiiri mkubwa. Watapaki ndinga zao Mlimani City, kisha wanachukua usafiri mwingine kwenda eneo la tukio. Wakimaliza wanapitia ndinga wanasepa. 

Wako ‘veri stratejiki’ ili wasiharibu taswira. Gari hazina midoli wala zile ‘flati shuzi’ wanzobadili wakichoka kuvaa ‘hai hilizi’. Wao siti za nyuma kuna laptop na mafaili faili mengi. ‘Klasiki’ kweli. 

Pisi sampuli hii ndo hubadili ‘laifu’ la wana wenye kujitambua. Maanti hawa pia hufanya dunia iwe eneo salama kwa marioo flan hivi. Kama utakuwa na akili ya utu na utulivu, hizo ndio pisi za maisha. 

Kidume ukijimilikisha pisi za aina hii unapaswa uwe na akili timamu. Busara na hekima na zaidi uwe na upendo kwa mtoto wake. Na mtoto wake akikuhusudu ujue mama mtu ni halali yako milele.

Hawa mbali ya kuwapangia kikosi bora kwenye 6 kwa 6. Uwe na akili ya kufanya asonge mbele na uwe ‘stresi rimuva’ akitoka kazini. Siyo katoka job na ‘stresi’ akifika ‘homu’ umuongezee ‘stresi’. 

Sasa maanti na pisi sampuli hii ndo zilijaza shoo ya Jide. Ndo aina ya mashabiki wa Da’ Judith Wambura Mbibo, Mama Somefood, Wallet, Komando Jide. Na hawa ndiyo wale waliojaza kapu la Jide.

Shughuli haikuwa ndogo J’mosi pale Warehouse Osterbay. Shoo ilianza kibabe ikaisha kibabe na sasa inaongelewa kitaa kibabe. Ile ilikuwa shoo ya Komando kweli na imewaacha waandaaji katika wakati mgumu sana.

Ugumu baada ya shoo ya Jide ni ule wa nani afuate? Balaa la Jide siyo la dunia hii, anayekuja ajue kuwa anaenda kupanda mlima mrefu sana aliuacha Jide pale Warehouse Osterbay.

Ukumbi ulishona watu. Ukumbi ulipambwa kwa ‘odiensi klasiki’. Ukumbi ulitendewa haki kwa shoo kali viwango vya Madson Square pale New York. Kuna ‘taimu’ watu tuliokuwepo tulihisi kama siku ya kwenda peponi. 

Achana na shoo na ukumbi. Kitu cha kuzingatia hivi sasa ni kwamba shoo za Jide huvutia kuanzia eneo la ‘pakingi’. Yale maanti ‘klasiki’ na ‘majentromani’ yenye maisha yao. Ndo waliotimba kwa wingi.

Kifupi kabla hujamfananisha Jide na Simbilisi zenu. Nendeni katika shoo zake, tazama ‘pakingi’. Aina ya ndinga zilizopo utapata jibu la kujua unashindana au ‘kudili’ na nani.