Anayedaiwa kumuua mpenziwe Dar kuendelea kusota rumande hadi Juni 23

Dar es Salaam. Upande wa mashtaka katika kesi ya mauaji inayomkabili mfanyabiashara, Rehema Hassan (42), umedai bado unaendelea na uchunguzi.

Kwa tafsiri hiyo, Rehema ambaye ni mkazi wa Kigamboni Mwapemba, ataendelea kusalia mahabusu hadi Juni 23, 2026 kesi hiyo itakapotajwa kwa njia ya mtandao.

Hatua hiyo inatokana na upelelezi wa kesi hiyo kutokukamilika.Rehema anadaiwa kumuua mwongozaji na msimamizi wa sauti za filamu nchini, Athuman Nyanza.

Leo Jumanne, Juni 9, 2026 Wakili wa Serikali, Erick Mabagala ameieleza Mahakama ya Hakimu Mkazi Kisutu, Dar es Salaam wakati kesi hiyo ilipotajwa kwa njia ya video huku mshtakiwa akiwa mahabusu.

"Mshtakiwa hajaletwa mahakamani hapa na upelelezi wake bado unaendelea na uchunguzi, kwa sababu hii tunaomba Mahakama itupangie tarehe nyingine," amesema Wakili Mabagala.

Mbagala ametoa maelezo hayo mbele ya Hakimu Mkazi Mkuu, Gwantwa Mwankuga, anayesikiliza kesi hiyo.

Hakimu Mwankuga, amekubaliana na ombi la upande wa mashtaka na kuahirisha kesi hiyo hadi Juni 23, 2026.

Kesi ya msingi

Rehema anadaiwa Februari 10, 2026 eneo la Mwapemba lililopo Kigamboni Mkoa wa Dar es Salaam, ulimuua Athuman Nyanza.

Mshtakiwa anadaiwa kutenda kosa hilo, kinyume na kifungu 196 na kifungu 197 cha Sheria ya Kanuni ya Adhabu, Sura ya 16 iliyofanyiwa marejeo mwaka 2023.

Kwa mara ya kwanza, mshtakiwa alifikishwa Mahakamani hapo Aprili 29, 2026 na kusomewa shtaka hilo.

Hata hivyo, kesi ya mauaji ni miongoni mwa mashtaka ambayo hayana dhamana kwa mujibu wa sheria na ndio sababu ya Rehema kuendelea kusalia rumande.