Mara yaweka mkazo miradi mikubwa kwa walengwa wa mikopo ya asilimia 10
Mkuu wa Mkoa wa Mara, Kanali Evans Mtambi akizungumza katika kikao maalum cha baraza la madiwani kujibu hoja za ukaguzi katika Halmashauri ya Wilaya ya Bunda mkoani Mara. Picha na Beldina Nyakeke
Muktasari:
- Mkuu wa Mkoa wa Mara, Kanali Evans Mtambi, amewataka maofisa maendeleo ya jamii kuacha mazoea ya kuelekeza mikopo ya asilimia 10 kwenye miradi ya bodaboda.
Bunda. Mkuu wa Mkoa wa Mara, Kanali Evans Mtambi, amewataka maofisa maendeleo ya jamii kuacha kuelekeza mikopo ya asilimia 10 ya mapato ya halmashauri kwenye miradi ya bodaboda, akisisitiza walengwa wa mikopo hiyo waelekezwe kwenye miradi mikubwa yenye tija zaidi kiuchumi.
Mtambi ametoa kauli hiyo leo Juni 19, 2026, katika kikao maalumu cha Baraza la Madiwani wa Halmashauri ya Wilaya ya Bunda kilichojadili hoja za ukaguzi wa Mdhibiti na Mkaguzi Mkuu wa Hesabu za Serikali (CAG) kwa mwaka wa fedha 2024/25.
Amesema lengo la mikopo ya wanawake, vijana na watu wenye ulemavu ni kuinua uchumi wa wananchi, hivyo ni muhimu kuwasaidia kubuni miradi itakayozalisha ajira na mapato endelevu badala ya kuendeleza mazoea yasiyo na manufaa mapana.
Aidha, amewataka maofisa hao kwenda kwa wananchi moja kwa moja ili kuwasaidia kubuni miradi kulingana na mazingira yao, akionya kuwa urasimu unaweza kusababisha rushwa na kuwakatisha tamaa walengwa wa mikopo hiyo.
Mtambi ametaja fursa kama ufugaji wa samaki kwa vizimba Ziwa Victoria, kilimo cha mbogamboga na viwanda vidogo vya matofali kuwa na uwezo mkubwa wa kubadilisha maisha ya wananchi kuliko miradi midogo ya kawaida.
Pia ameiagiza Ofisi ya Katibu Tawala Mkoa kufuatilia Sh316 milioni za Baraza la Taifa la Hifadhi na Usimamizi wa Mazingira (NEMC) zinazodaiwa kuchelewesha mradi wa mabadiliko ya tabianchi Bunda, akisisitiza fedha hizo zielekezwe kwenye nishati safi ya kupikia mashuleni.
Halmashauri ya Bunda inakabiliwa na changamoto ya utoaji wa mikopo na elimu kwa walengwa, huku baadhi ya shule 24 bado zikitumia kuni na mkaa, na tayari imepanga kuanza kutenga bajeti ya kuanzisha nishati safi katika shule moja. Mkazi wa Bunda amesisitiza walengwa wanahitaji mafunzo zaidi ya uandaaji wa miradi bora.
