Mwenye moyo wa toba husogea karibu na Mungu

Bwana Yesu asifiwe! Karibu siku ya leoJumapili katika tafakari ya neno la Mungu. Katika maisha, siyo kila anayehesabiwa kuwa amefanikiwa mbele za watu huwa amepata amani moyoni. Wapo wenye mali nyingi lakini wanaishi na mzigo wa hatia, upweke na maumivu ya ndani.

 Wengine wamehukumiwa na jamii kutokana na makosa yao ya zamani kiasi cha kuamini kuwa hawawezi tena kukubalika mbele za Mungu. Lakini simulizi la Zakayo katika Luka 19:1-9 linabeba ujumbe wa matumaini kwamba hakuna maisha yaliyoharibika kiasi cha kushindwa kurekebishwa na neema ya Mungu.

Zakayo alikuwa mkuu wa watoza ushuru katika mji tajiri wa Yeriko. Alikuwa na fedha, mamlaka na ushawishi, lakini hakuwa na heshima mbele ya watu. Kazi yake ilihusishwa na dhuluma, unyonyaji na ushirikiano na utawala wa Kirumi, jambo lililomfanya aonekane msaliti wa taifa lake. Ingawa alionekana kuwa na kila kitu, bado alikuwa na kiu ya kumwona Yesu.

Ni jambo la kutafakari kwamba hamu hiyo haikumzuia na vikwazo vilivyokuwa mbele yake. Umati wa watu haukumpisha, kimo chake kilikuwa kifupi na huenda wengine walitamani kabisa asimfikie Yesu. Hata hivyo, hakuruhusu aibu wala hadhi yake ya kijamii kumzuia. Alipanda juu ya mkuyu ili amwone Yesu.

Mara nyingi maisha hutuwekea vikwazo vinavyotuzuia kumkaribia Mungu. Wapo wanaokata tamaa kwa sababu ya makosa yao ya zamani. Wengine huamini kuwa jamii imewashutumu kiasi kwamba hawawezi tena kusamehewa. Lakini habari njema ni kwamba Yesu hamsubiri mwenye dhambi amfikie kwa nguvu zake mwenyewe. Yeye ndiye anayemtafuta.

Yesu alipofika chini ya ule mkuyu hakumuona tu Zakayo, bali alimwita kwa jina. Alimwambia, "Zakayo, shuka upesi, kwa maana leo imenipasa kukaa nyumbani mwako." Hili ndilo kiini cha Injili. Mungu anamjua kila mmoja wetu kwa jina na hutafuta nafasi ya kuingia katika maisha yetu bila kujali historia yetu.

Jambo la kushangaza ni kwamba Yesu hakusubiri kwanza Zakayo ajitetee au aombe msamaha hadharani. Alianza kwa kumkaribia kwa upendo. Upendo huo ndio uliogeuza moyo wa Zakayo. Baada ya kumpokea Yesu kwa furaha, alisimama mwenyewe na kutangaza kuwa atatoa nusu ya mali yake kwa maskini na kumrudishia mara nne yeyote aliyemdhulumu.

Hapo ndipo tunajifunza maana halisi ya toba. Toba si maneno ya mdomoni pekee, bali ni mabadiliko yanayoonekana katika maisha. Moyo unaokutana na Kristo hubadilika. Mtu huanza kuona thamani ya jirani yake, haki, uaminifu na huruma. Anakuwa tayari kurekebisha makosa aliyoyafanya bila kulazimishwa.

Katika dunia ya leo, watu wengi hutafuta suluhisho la matatizo yao kwa kubadili mazingira, kazi au marafiki. Lakini tatizo kubwa mara nyingi huwa moyoni. Moyo unapobadilishwa na Mungu, hata mtazamo wa maisha hubadilika. Ndiyo maana Zakayo hakubaki kuwa yule mtoza ushuru wa zamani. Alikuwa mtu mpya.

Hata hivyo, jamii iliyokuwa imezoea kumhukumu haikuona mabadiliko hayo kwa urahisi. Watu walinung'unika wakisema Yesu ameingia kwa mtu mwenye dhambi. Mara nyingi ndivyo ilivyo hata leo. Wapo wanaoamini kuwa watu fulani hawastahili tena nafasi ya pili. Lakini Mungu huona kile ambacho macho ya mwanadamu hayaoni. Anaona moyo uliovunjika na unaotamani kurejea kwake.

Zaburi ya 51 inatukumbusha kuwa Mungu hapendezwi kwanza na sadaka nyingi, bali na moyo uliovunjika na kutubu. Huo ndio msingi wa imani ya Kikristo. Hakuna anayenunua wokovu kwa matendo yake. Msamaha ni zawadi ya neema ya Mungu kupitia Yesu Kristo. Lakini neema hiyo inapopokelewa kwa imani huzaa matunda yanayoonekana katika maisha ya kila siku.

Ndiyo maana Yesu alitangaza, "Leo wokovu umefika nyumbani humu." Wokovu haukumgusa Zakayo peke yake, bali uliigusa familia yake, mahusiano yake, matumizi ya mali yake na maisha yake yote. Huu ndio ushahidi kuwa Mungu anapobadilisha moyo wa mtu hubadilisha pia mwelekeo wa maisha yake.

Jamii yetu ya leo inahitaji watu wenye moyo wa toba kuliko watu wanaojiona wakamilifu. Tunahitaji viongozi, wafanyabiashara, watumishi na wananchi watakaokuwa tayari kukiri makosa yao, kurekebisha walipokosea na kuanza upya. Taifa lolote hujengwa na watu wanaothamini ukweli, haki na uwajibikaji.

Habari ya Zakayo inatukumbusha kuwa hakuna aliyepotea milele mbele za Mungu. Aliyeanguka anaweza kuinuka. Aliyekosea anaweza kusamehewa. Aliyekataliwa na watu anaweza kukubaliwa na Kristo. Huo ndio uzuri wa neema ya Mungu.

Ikiwa leo moyo wako umelemewa na makosa ya zamani, usikate tamaa. Yesu bado anapita katika maisha ya wanadamu kama alivyopita Yeriko. Bado anamwita kila mmoja kwa jina. Anatafuta si wakamilifu, bali wenye moyo wa kutubu. Anapendezwa na moyo unaokubali kubadilishwa kuliko maisha yanayoficha makosa.

Tumaini la kweli halianzi pale tunapokuwa wakamilifu, bali pale tunapokubali kumfungulia Kristo mlango wa moyo wetu. Kama ilivyokuwa kwa Zakayo, siku moja inaweza kuwa mwanzo wa maisha mapya. Neema ya Mungu bado inatafuta waliopotea, na anayemwitikia kwa toba hupokea msamaha, amani na tumaini jipya.

Mungu awabariki. Amen