Kibatala atumia vifungu vya Biblia kumhoji Luteni Urio
Muktasari:
- Wakili wa utetezi katika kesi ya ugaidi inayomkabili Mwenyekiti wa Chadema, Freeman Mbowe na wenzake watatu ametumia vifungu vya Biblia kumhoji shahidi wa 12.
Dar es Salaam. Wakili wa utetezi katika kesi ya ugaidi inayomkabili Mwenyekiti wa Chadema, Freeman Mbowe na wenzake watatu ametumia vifungu vya Biblia kumhoji shahidi wa 12.
Leo Ijumaa Januari 28, 2022 shahidi huyo Luteni wa Jeshi la Wananchi wa Tanzania (JWTZ), Denis Urio ameendelea kuhojiwa na mawakili wa utetezi baada ya kumaliza kutoa ushahidi wake jana.
Kibatala ambaye ni kiongozi wa jopo la mawakili wa utetezi alilazimika kutumia kitabu hicho wakati akimhoji shahidi wa 12 wa upande wa mashtaka katika kesi hiyo, ambapo alimpelekea shahidi huyo kitabu hicho kizimbani na kumtajia vifungu kadhaa ambavyo alimtaka avisome kwa sauti.
Ifuatayo ni mahojiano baina ya mawakili wa utetezi na shahidi Luteni Urio
Leo Ijumaa Januari 28, shahidi wa 12, Luteni Denis Leo Urio anaendelea kuhojiwa na mawakili wa utetezi.
Mawakili wa pande zote pamoja na washtakiwa tayari wameshaingia mahakamani na sasa Jaji Joachim Tiganga ameingia na kesi inaitwa.
Kiongozi wa jopo la waendesha mashtaka Wakili wa Serikali Mwandamizi, Robert Kidando anafanya utambulisho mawakili
Sasa kiongozi wa jopo la mawakili wa utetezi, Peter Kibatala anafanya utambulisho wa mawakili wa utetezi.
Jaji anawaita washtakiwa mmoja mmoja kwa namba zao akianzia na mshtakiwa wa kwanza hadi wa nne, ili kujiridhisha kama wote wapo mahakamani.
Wakili Kidando: Mheshimiwa Jaji shauri hili linakuja kwa ajili ya kuendele kusikilizwa na tuko tayari
Kibatala: Nasi pia Mheshimiwa Jaji tuko tayati kuendelea
Jaji anakumbusha shahidi kuwa bado yuko chini ya kiapo na wakili John Mallya anaendelea kumhoji shahidi. Anaiomba mahakama imkumbushe shahidi jibu lake la mwisho mahali alipoishia Jana.
Wakili Mallya:Hivi kazi ya VIP protection inafanyikaje?
Shahidi: Mheshimiwa Jaji kazi ya VIP protection inafanyikaje kwa mtu yeyote kwa kufuata sheria
Wakili Mallya:Ni sahihi hawa wanaomprotect wawe naye muda wote?
Shahidi: Ni sahihi
Wakili Mallya:Kuwa VIP protection ni sawa na kuwa body guard?
Shahidi: Sijawahi kusikia.
Wakili Mallya:Mheshimiwa Jaji, naomba kielelezo (printout ya meseji kati ya Mbowe na shahidi).
Wakili Mallya anamtaka asome meseji inayosema hawa wawili kwa kuanzia si mbaya watakuwa na mimi fulltime
Wakili Mallya: Kuna meseji ambazo zinasema kuna shughuli nyingine zaidi ya ulinzi?
Shahidi: Mazungumzo ya kazi nyingine yalikuwa ni kati yangu na Mbowe ana kwa ana.
Wakili Mallya: Kwenye meseji zipo au hazipo?
Shahidi: Kwenye Meseji hazipo
Wakili Mallya anampa kielelezo kingine simu yake shahidi anamuuliza namba aliyoisevu kwa jina la Free ni ya nani
Shahidi: Namba iliyoandikwa Free Ni ya Freeman Mbowe
Wakili Mallya anampa shahidi aiwashe simu hiyo naye anaiwasha anamtaka afungue sehemu ya mawasiliano baina yake shahidi na Mbowe kwenywe mtandao wa Telegram kisha anamtaka shahidi asogee karibu na Jaji amuoneshe kwenye simu kama kuna jina Free linaonekana akiwa amefungua meseji
Shahidi: Hii ni namba
Wakili Mallya: Ukiwa umefungua meseji linaonekana?
Shahidi: Hii ni namba ya Mbowe
Wakili Mallya: Jina Free linaonekana?
Shahidi: Hii ni akaunti ya Freeman Mbowe.
Wakili Mallya: Wakati anakuongoza wakili Chavula ulisoma meseji, ulitoa maelezo kwamba hapa jina halionekani kwa sababu hizi?
Shahidi: Mimi si mtaalam wa IT?
Wakili Mallya:Ulitoa maelezo kwamba hapa jina halionekanani? Mheshimiwa Jaji naomba ajibu swali langu
Jaji: Umeelewa swali lake? Kwamba ulitoa ufafanuzi?
Shahidi: Sikutoa
Wakili Mallya:Meseji uliyoifungua Telegram yako imeanzia mwaka hani?
Shahidi: imeanzia mwaka 2020
Wakili Mallya: Meseji nyingine zimeenda wapi?
Shahidi: Alikuwa ananipigia simu
Wakili Mallya:Ukipigiwa simu kwa telegram call zinabaki?
Shahidi: Naomba nirudie nilikuwa nawasiliana na Mbowe kwa telegram, WhatsApp na simu za kawaida kwa namba ambayo si yake
Wasikilizaji: wanasonya
Jaji: Samahani jamani ninyi ni wasikilizaji mmuache shahidi atoe majibu maana naona kama mnaonesha kutokuridhika.
Wakili Mallya: Shahidi kilichokusaidia usioneshe WhatsApp call Kati yako na Mbowe ni nini?
Shahidi: Mheshimiwa Jaji mimi simu nilimkabidhi na nilitakiwa nisome meseji
Wakili Mallya: Swali langu liko palepale wewe wakati unaongozwa na wakili ulionesha WhatsApp call ni hizi?
Shahidi: Sikuonesha
Wakili Mallya: Namba za watu ambao Mbowe alikuwa anakupigia ulizionesha?
Shahidi: Mheshimiwa Jaji namba ambazo alikuwa anatumia za watu wengine sikuzisevu wala sikuonesha.
Shahidi: Kwa nyongeza sikuonesha kwa sababu...
Wakili Mallya: Mimi sitaki sababu
Shahidi: Sikuonesha kwa sababu.
Jaji: Shahidi sikiliza swali?
Shahidi: Sikuonesha
Wakili Mallya: Mheshimiwa Jaji naomba simu ile ambayo haikuwaka. Shahidi jana ulishindwa kuwasha hii simu, ni sahihi?
Shahidi: Ni sahihi
Mbowe anampatia wakili Mallya kikaratasi cha njano chenye ujumbe wa maandishi.
Wakill Mallya: Shahidi jana ulishindwa kuwasha simu hii, ni sahihi?
Shahidi: Simu haikuwaka?
Wakili Mallya: Ulitoa explanation kwa nini haikuwaka?
Shahidi: Nilisema wakati naitambua ilikuwa ina tatizo la kuwaka na jana nimesema aidha haina chaji.
Wakili Mallya: Wakati unaipeleka kwa Insp. Swima ulieleza kuwa ilikuwa na condition gani?
Shahidi: Nilieleza kuwa ina tatizo la kuwaka
Wakili Mallya: Kama Mshtakiwa akitaka kukizitumia taarifa zake anafanyaje?
Shahidi: Mheshimiwa Jaji, nilieleza nilikuwa na simu moja wakaniambia zinahitajika simu zangu zote nikampelekea, lakini nilimwambia kuwa ina tatizo la display, sasa aliyechunguza ndio anajua mimi si mtaalam?
Wakili Mallya: Sasa hiyo simu utetezi wa Mbowe anauhitaji?
Jaji: Hilo ameshajibu labda ubadilishe swali.
Wakili Mallya: Jana wakati unatoa ushahidi ukionesha call log za Mbowe?
Shahidi: Sikupewa maelekezo ya kuonesha
Wakili Mallya: Call log yako na Halfan Bwire ina taarifa ya muhimu sana kuwa sasa tunakwenda kufanya ugaidi ulionesha?
Shahidi: Sikupewa maelekezo ya kuonesha
Wakili Mallya: Meseji zako kwa Ling'wenya kuwaelekeza kuwa mkienda kukiwa na ugaidi wakueleze ulionesha?
Shahidi: Sikuonesha maana sikuziona
Wakili Mallya: Shahidi kwa ufahamu wako miji ya Dar, Arusha, Kilimanjaro, Mbeya na Mwanza ina jumla ya masoko mangapi?
Shahidi: Mheshimiwa Jaji, mimi sifahamu anayefahamu ni Mbowe ndiye aliyekuwa amepanga kulipua
Wakili Mallya: Wewe unafahamu?
Shahidi: Mimi sihitaji kufahamu
Wakili Mallya: Miji ya Moshi, Dar, Arusha, Mwanza na Mbeya ina vituo vingapi vya mafuta?
Shahidi: Mimi sijui lakini Freeman Mbowe ndio anajua akiyekua amepanga kulipua?
Jaji: Swali liko wazi, wewe unafahamu?
Shahidi: Mimi sifahamu
Wakili Mallya: Jana ulieleza kuwa ulipokwenda DCI ulionesha namba za watu wa ajabu ambazo Mbowe alikuwa anakupigia?
Shahidi: Sikueleza
Wakili Mallya: Unafahamu DCI ana vifaa vya kisasa kabisa vya kurekodi sauti?
Shahidi: Sifahamu wala DCI hakunieleza
Wakili Mallya: Unafahanu DCI ana simu za kuweza kurekodi?
Shahidi: Sifahamu maana sikwenda kufanya upelelezi?
Wakill Mallya: Wakati unawasiliana na Bwire alikueleza kuwa wanakwenda kutumia vifaa gani?
Shahidi: Mheshimiwa Jaji, Wakati nawasiliana na Bwire alinieleza Bro samahani tumekengeuka...
Jaji: Swali anauliza alikwambia ni vifaa gani?
Shahidi: Hakuniambia
Wakill Mallya: Kwa hiyo wewe ulifuzu mafunzo vizuri ndio maana ukapewa zawadi ya bunduki?
Shahidi: Bunduki, Mheshimiwa Jaji kwanza naona wakili anataka kuniwekea maneno mdomoni, mimi sijawahi kusikia mahali popote mtu anapewa zawadi ya bunduki, inaonesha wakili anaongea kitu asichokijua.
Wakili Mallya: Ulipokwenda Dafur ulikuwa private, Ni sahihi?
Shahidi: Si sahihi
Wakili Mallya: Ulikuwa Koplo?
Shahidi: Sahihi
Wakili Mallya: Ulikuwa officer?
Shahidi: Mheshimiwa Jaji, wakili anataka nielezee masuala ya mpangilio wa kijeshi jambo ambalo naona si sahihi
Jaji: Anauliza wewe ulikuwa ofisa?
Shahidi: Hapana
Wakili Mallya: Hukuwa ofisa ndio maana ulikuwa na Adamoo (Adamu Kasekwa Mshtakiwa wa pili) Sasa leo umepanda cheo unamkana.
Shahidi: Sikumbuki kama nilikuwa na Adamoo?
Wakili Mallya: Wewe una Digrii?
Shahidi: Hapana
Wakili Mallya: Lakini ni Luteni?
Shahidi: Ndio
Wakili anampa nyaraka maelezo ya Ling'wenya (Mshtakiwa wa tatu) anamuonesha mahali pa kusoma ambapo pameandikwa " Luteni Urio akitupa nauli Sh87,000 ya kwenda Moshi
Shahidi: Ilikuwa nauli ya kwenda Dar si Moshi
Wakili Mallya: Wakati unaongozwa kutoa ushahidi ulieleza namba ambayo uliokuwa unawasiliana na Bwire?
Shahidi: Sikueleza
Wakili Mallya: Mara ya kwanza kwenda kwa Afande Swila ukamkabidhi simu yako ilikuwa lini?
Shahidi: Tarehe 11/8/2020
Wakili Mallya: Ndio siku ambayo uliandika maelezo yako?
Shahidi: Ndio siku niliandika maelezo yangu.
Wakili Mallya: Ulipokwenda kwa DCI baadaye akaja Kingai, Jana ulieleza kuwa kuna mtu mwingine alikuja kuwajoin?
Shahidi: Hakuna mtu mwingine aliyekuja
Wakili Mallya: Shahidi, kwenye Meseji ya mwisho ambayo Mbowe alikutumia ukasema hukuelewa maana yake kwa nini hukumtumia sms nyingine kumuuliza hukuelewa?
Shahidi: Mheshimiwa Jaji, wakati Mbowe ananitumia meseji njlipata taarifa kutoka kwa Bwire, nikamuuliza bosi wenu anajua akasema anajua, na ilikuwa baada ya mwezi sina mawasiliano nayo.
Wakili Mallya: Mheshimiwa Jaji sina swali zaidi.
Wakili Dickson Matata: Shahidi nitakuuliza maswali machache na naomba ushirikiano wako, mara ya kwanza uliponana na Mbowe ilikuwa tarehe ngapi?
Shahidi: Freeman Aikael Mbowe nilionana naye mwezi wa saba tarehe za katikati, mwaka 2020
Wakili Matata: Siku hiyo ndipo alikwambia kuwa anahitaji vijana wa kuambatana naye kuwashambulia viongozi ambao hawautaki upinzani?
Shahidi: Hiyo ilikuwa ni pointi mojawapo tu
Wakili Matata: Si ndivyo alikwambia?
Shahidi: Ndio
Wakili Matata: Wakati unatoa ushahidi wako ulisema ulifanya tactical appreciation sasa na mimi nataka tufanye tactical appreciation, hayo ndiyo aliyokwambia Mbowe?
Shahidi: Ndio
Wakili Matata: Na mlikuwa wawili tu.
Shahidi: Ndio
Wakili Matata: Ukiacha siku hiyo mliyokuwa wawili kuna siku nyingine aliwahi kukueleza hayo hayo?
Shahidi: Kuna siku alikuwa ananipigia simu mara kwa mara kunisisitiza
Wakili Matata: Hakuna ushahidi wowote uliouleta hapa mahakamani wa sauti au maandishi kuthibitisha kuwa haya ndio aliyoniambia
Shahidi: Hakuna sauti
Wakili Matata: Baada ya kukwambia ukaona utoe taarifa kwa DCI, kwanza ulimpigia simu akakupa appointment
Shahidi: Sahihi
Wakili Matata: Kwamba ukipokwenda akamuita Kingi?
Shahidi: Ni sahihi
Wakili Matata: Kingai ambaye alikuwa mpelelezi mkuu wa mkoa ana uzoefu na ujuzi wa kiupelelezi?
Shahidi: Ana uzoefu
Wakili Matata: Na wewe ukiwa kamanda kila jambo unalipima
Shahidi: Ni sahihi
Wakili Matata: Sasa katika kikao hicho wewe au wao umuhimu wa kwamba licha ya kwamba Mbowe amekuambia kwa mdomo bali kutengeneza ushahidi kwa voice note au kwa meseji?
Shahidi: Mheshimiwa Jaji mimi nilikwenda kutoa taarifa
Wakili Matata: Hamkuona umuhimu?
Shahidi: Mamlaka ndio inajua
Wakili Matata: Sasa kwako wewe hukuona kuna umuhimu?
Shahidi: Niliona ndio maana nikawapigia kina Bwire?
Wakili Matata: Ukiachana na kina Bwire hukuona umuhimu wa kuandaa voice notes, au meseji?
Shahidi: Wakati natoa taarifa hayo Mbowe alikuwa ameshaniambia kwa hiyo alikuwa ananisisitiza tu.
Wakili Matata: Hukuona umuhimu siku ile kuwa na voice notes?
Shahidi: Sikuwa na device?
Wakili Matata: Una ushahidi gani zaidi kwamba Mbowe alikuambia hayo maneno?
Wakili Matata: Hiyo meseji Ina mahali kwamba Mbowe anataka kulipua masoko?
Shahidi: Mheshimiwa Jaji Mbowe hakutaka kuzungumzia hayo kwenye simu?
Wakili Matata: Mheshimiwa Jaji swali langu hiyo meseji kuna sehemu inasema kulipua masoko?
Shahidi: Hakuna mahali inasema hivyo?
Wakili Matata: Kuna mahali inasema kuwadhuru viongozi wasiopenda upinzani?
Shahidi: Hakuna mahali inasema hivyo
Wakili Matata: Kuna mahali ilikuwa inasema kulipua vituo vya mafuta?
Shahidi: Hakuna mahali inasema hivyo?
Wakili Matata: Uliieleza mahakama wewe ulikuwa unafahamiana na DCI?
Shahidi: Nilisema wakili wa Serikali aliniuliza nikasema nilikuwa nimeshakwenda
Wakili Matata: Siyo ofisi, DCI Boaz?
Shahidi: Sikusema
Wakili Matata: Ulieleza namba ya DCI uliipata wapi?
Shahidi: Sikusema
Wakili Matata: Hiyo namba yake yenyewe uliitaja?
Shahidi: Sikuitaja?
Wakili Matata: Sasa nikisema hukumpigia simu una ushahidi wowote?
Shahidi: Ushahidi ninao na namba yake ninayo
Wakili Matata: Uliitaja?
Shahidi: Sikuitaja
Wakili Matata: Ulipokwenda kwa DCI ulifuata utaratibu wa kuingia ofisi za umma?
Shahidi: Sahihi
Wakili Matata: Na hukuieleza mahakama kwamba wewe ulikuwa na upekee wa kuingia moja kwa moja?
Shahidi: Nilisema kuwa nilifika nimejitambulisha kwa secretly kuwa mimi ni Askari wa JWTZ nina appointment na DCI
Wakili Matata: Wakati unaoongozwa ulieleza kwa nini hukufuata utaratbu?
Shahidi: Mheshimiwa Jaji nimeshaeleza kuwa nilifika nimajitambulisha kama kuna utaratibu aliyepaswa kunielekeza ni yeye?
Wakili Matata: Ulisema kuwa ninyi Askari hampaswi kufuata utaratibu hukusema?
Shahidi: Sikusema
Wakili Matata: Umeleta dispatch book kuonesha siku hiyo ulikwenda kwa DCI?
Shahidi: Sikuleta
Wakili Matata: Shahidi wewe ni Askari unafuata taratibu za kijeshi unapotoka nje lazima uwe na movement order?
Shahidi: Inategemea na muda kama ni siku tatu haihitajiki?
Wakili Matata: Hayo uliyasema hapa?
Shahidi: Sikusema
Wakili Matata: Lakini pia unapokwenda kwenye ofisi za umma lazima uwe na pass?
Shahidi: Siyo kweli, pasi lazima uandike?
Wakili Matata: Umeleta pasi hapa kwamba ulikwenda ofisi ya DCI?
Shahidi: Mheshimiwa Jaji sijaleta.
Wakili Matata: Na kwamba tarehe 11 na 12/8 ulikwenda kwa Swila kupeleka simu?
Shahidi: Sijaleta maana sikupewa maelekezo?
Wakili Matata: Umeleta au unaleta?
Wakili wa Serikali Mwandamizi Pius Hilla: Mheshimiwa Jaji shahidi amejibu kuwa hajaleta kwa sababu hakupewa maelekezo
Wakili Matata: Mheshimiwa Jaji anasema hajapewa maelekezo hizo ni sababu mimi sizitaki sababu kwa hiyo naomba anijibu swali langu?
Shahidi: Sijaleta
Wakili Matata: Mheshimiwa Jaji naomba kielelezo namba 20 Kuna miamala yako hapa unasema Mbowe alikutumia Sh500,000 na ukatoa laki 499.
Shahidi: Ni sahihi
Wakili: Kwa mantiki nyingine hukuitoa yote kwa sababu kuna makato?
Shahidi: Ni sahihi
Wakili Matata: Ukichukua laki 5 ukatoa 499,000 Kuna makato shilingi ngapi?
Shahidi: Elfu moja
Wakili Matata: Shahidi naomba nikuoneshe muamala huo wa tarehe 20 mwezi wa Saba 2020, hebu nioneshe kwenye huo muamala ulitoa 499,000
Shahidi: Mheshimiwa Jaji nilitumiwa shiling lai 5 nikatoa keshi
Jaji: Anakuuliza hapo
Shahidi: Hapa haioneshi
Wakili: Kuna jedwali nina kwenda kwenye previous balance, unakubaliana na mimi kwenye akaunti yako kulikuwa na balance ya 49,646 na baada ya kuwekewa laki 5 ikawa 549,646
Shahidi: Sahihi
Wakili Matata: Siku hiyohiyoukatoa laki 3 na balance yako ikawa 243646
Shahidi: Sahihi.
Wakili: Hebu chukua salio ulilokuwa nalo utoe 243,646
Wakili wa Serikali Kidando: Wakili yuko kwenye cross examination na anauliza swali kwenye kielelezo namba 20 lakini swali hilo halijajengewa msingi kama kulikuwa na tozo kwa hiyo wakili afuate utaratibu.
Wakili Matata: Shahidi tusipoteze muda wa mahakama, Utakubaliana na mimi kwamba hapo kuna tofauti ya Sh6,000, je hayo ni makato?
Shahidi: Sijui maana unanisomea document ambayo siifahamu inawezekana ni makato au si makato.
Wakill Matata: Shahidi wakati unatoa ushahidi ulitaja hivyo vituo vya mafuta ambavyo Mbowe alitaka kulipua?
Shahidi: Mheshimiwa Jaji Freeman Mbowe alitaja mikoa hakutaja vituo
Wakili Matata: Kwa hiyo ukiulizwa alitaka kulipua vituo gani Morogoro utakuwa na majibu?
Shahidi: Sitakuwa na majibu, anayo Freeman Aikael Mbowe, sina majibu
Wakili Matata: Ukiulizwa vituo alivyotaka kulipua Mwanza utakuwa na majibu hutakuwa nayo?
Shahidi: Majibu hayo mimi sina anayo Freeman Mbowe
Wakili: Shahidi nakuuliza wewe?
Shahidi: Majibu hayo Mimi sina anayo Freeman Mbowe.
Wakili Matata: Shahidi ukiulizwa ni sehemu ipi specifically aliyopanga kukata miti barabarani utakuwa na majibu?
Shahidi: Kwenye barabara ya Iringa Morogoro Hakuniambia?
Wakili Matata: Uliwataja viongozi wa Serikali aliopanga kuwashambulia?
Shahidi: Mheshimiwa Jaji hakunitajia viongozi alisema tu viongozi wa Serikali ambao ni vikwazo.
Wakili Matata: Shahidi, ukiachana na kumtafutia hao vijana kuna vitu vingine alikwambia kumtafutia kama vilipuzi?
Shahidi: Hakunieleza
Wakili: Kumtafutia silaha labda kushambuliwa hao viongozi
Shahidi: Hakunieleza
Sasa ni Wakili Peter Kibatala
Wakili Kibatala: Shahidi nikikuita Baba Careen ni sawa?
Shahidi: Sawa
Wakili Kibatala: Baba Jackson?
Shahidi: Ni sawa
Wakili Kibatala: Shahidi wewe ni mkristo?
Shahidi: Mimi ni Mkristo
Wakili Kibatala: Unasali wapi, kanisa gani?
Shahidi: RC
Wakili Kibatala: Parokia gani?
Shahidi: Parokia ni Ngerengere
Wakili Kibatala: Paroko wako Unamfahamu?
Shahidi: Namfahamu
Wakili Kibatala: Kateksta wako?
Shahidi: Simfahamu
Wakili Kibatala: Nakuuliza tena kanisani mara ya mwisho ulikwenda lini?
Shahidi: Kwa pale Ngerengere Sikumbuki
Wakili Kibatala: Wewe una gari Rav4 ya Silver kutoka tarehe 16/82020 ilikuwa wapi?
Shahidi: Nilikuwa naitumia haikuwa parked….
Wakili Kibatala: Ulipokuja kutoa ushahidi hapa gari hii umepaki wapi?
Shahidi: Mwanzoni nilikuwa nimeipaki.
Wakili Kibatala: Sikuulizi habari ya mwanzoni, nimekwambia tuna case theory, maana umekuja kutoa ushahidi hapa kutoka Morogoro na si kambini ambako ulikuwa umewekwa baada ya kutekwa...
Shahidi: Mheshimiwa samahani kunaswali hapa....
Wakili Kibatala: Shahidi relax sijakuuliza swali.
Wakili Kidando: Mheshimiwa ulishatoa maelekezo kwamba wakili anapoulizwa maswali yasiingie maneno mengine ambayo hayafahamiki, kwa hiyo yeye ajielekeze kwenye maswali
Jaji: Kibatala.
Wakili Kibatala: Wala sitajibu
Jaji: Yuko sahihi?
Wakili Kibatala: Siyo sahihi.
Wakili Kibatala: Nakuuliza tena gari yako umepaki wapi?
Shahidi: Kwenye parking ya kikosini kwangu
Wakili Kibatala: Uli register?
Shahidi: Hiyo ni parking ya Jeshi huhitaji kusajiri, unapaki kisha unaondoka na ufunguo?
Wakili Kibatala: Kwa hiyo hiyo at owner's risky?
Shahidi: Ni owners risky
Wakili Kibatala: Unafahamu kwamba bila wewe kwenda kutoa taarifa ulizozitoa kwa DCI kusingekuwa na hii kesi?
Shahidi: Nafahamu
Wakili Kibatala: Umeapa kwa Biblia, nakuomba usome Yohana 8:31-39
Shahidi anasoma
Wakili Kibatala: Unafahamu maana ya hilo neno?
Shahidi:Nafahamu
Wakili Kibatala: Lengo lake ni Nini?
Shahidi:Usiogope useme ukweli
Wakili Kibatala: Unafahamu maisha ya Bwire, Kasekwa na Ling'wenya yako mikononi mwako?
Shahidi: Nafahamu
Wakili Kibatala: Soma tena Waef 4:25-32.
Shahidi anasoma
Wakili Kibatala: Unafahamu maana ya andiko Hilo Ni nin?
Shahidi: Nafahamu, kusamehena na pia tusiseme uwongo.
Wakili Kibatala: Narudia tena Unafahamu maisha ya Bwire,Kasekwa na Ling’wenya yako mikononi mwako?
Shahidi: Nafahamu kabisa
Wakili Kibatala: Umesema Mbowe alikueleza siri ya mambo aliyokuwa anapanga kuyafanya, bila shaka alikuawa anakuamini, Unakumbuka tarehe ambayo Mbowe alikuambia hayo?
Shahidi: Sikumbuki
Wakili Kibatala: Kwa hiyo hukumbuki tarehe ambayo Mbowe alikueleza mambo hayo mazito
Shahidi: Ilikuwa ni tarehe za katikati
Wakili Kibatala: Tarehe za katikati ni kuanzia lini?
Shahidi: Kuanzia tarehe moja mpaka 15.
Wakili Kibatala: Na wewe ni Luteni wa Jeshi tunaloliheshimu sana?
Shahidi: Kabisa
Wakili Kibatala: Jeshini una rafiki?
Shahidi: Ndio, lakini sina rafiki wa kudumu
Wakili Kibatala: Ulipopata taarifa hizi za Mbowe ulipeleka kwa nani?
Shahidi: Kwa DCI
Wakili Kibatala: Hukuona umuhimu hata wa kumueza Askofu wako labda akuombee kwa mambo haya mazito?
Shahidi: Hilo si la halihusiki.
Wakili Kibatala: Raia akipita anaona watu wanapigana hana citizenship power ya arrest?
Shahidi: Anayo
Wakili Kibatala: Mwanajeshi akikuta watu wanapigana hawezi kuwakamata mpaka akimbilie Polisi?
Shahidi: Anaweza
Wakili Kibatala: Freeman Mbowe alipokuambia taarifa hizi uliona ni kosa au si kosa?
Shahidi: Niliona ni kosa ndio maana nikatoa taarifa?
Wakili Kibatala: Hakuna Kikosi kinachohusika kuzuia ugaidi?
Shahidi: Hakuna
Wakili Kibatala: Uzuri kuna mtandao hapa unaonesha taarifa hizo , bado unakataa mbali na taarifa hizi?
Shahidi: Sifahamu Kikosi hicho sijawahi kukisikia
Wakili Kibatala: Jeshini kuna kikosi cha uchunguzi na utambuzi?
Shahidi: Ndio
Wakili: Bado Hukuona umuhimu wa taarifa hizi kumweleza mtu yeyote jeshini?
Shahidi: Hizi ni taarifa za Polisi ndio wanaohusika na uchunguzi.
Wakili Kibatala: Kwani jeshi halina mamlaka ya kupokea taarifa hizo?
Shahidi: Jeshi linashughulika na taarifa zinazohusika na masuala ya Jeshi kwa uhalifu wa uraiani ni polisi ndio wanahusika.
Wakili Kibatala: Kwani kama Mbowe alipanga kulipua kituo cha mafuta Mwenge , kinaweza kuiathiri kambi ya Jeshi iliyoko pale?
Shahidi: Ingeweza kuathiri
Wakili Kibatala: Jeshi hawana mamlaka ya moja kwa moja kushughulika na masuala yanayowaathiri?
Shahidi: Linaweza
Wakili Kibatala: Ulisema ulipata taarifa za Mbowe wito ukiwa wapi?
Shahidi: Temeke, Mgulani?
Wakili Kibatala: Kwani kambi ya Mgulani na kwa DCI wapi ilikuwa karibu?
Shahidi: Inategemeana na geographical position
Wakili Kibatala: Unafahamu kuwa DCI ni kama Waziri Mkuu kwa naana anachunguza mambo madudu mengi?
Shahidi: Nafahamu
Wakili Kibatala: Ulimwambia Jaji kwamba Ulipokwenda kwa DCI kuna mtu akijiridhisha na wewe kwanza kabla ya kuingia ofisini kwa DCI?
Shahidi: Sikumwambia
Wakili Kibatala: Unafamu kwa DCI Kuna utaratibu wa kuacha simu mlangoni?
Shahidi: Sijawahi kuacha simu?
Wakili Kibatala: Ulimwambia Jaji kuwa wakati unamsubiri DCI mtu muhimu yule, waziri mkuu wa Jeshi la Polisi ulikuwa na mtu pale,
Shahidi: Nilikuwa na msaidizi wake
Wakili Kibatala: Ulimwambia Jaji?
Shahidi: Sikumwambia
Wakili Kibatala: Uliweza kum-describe DCI kuelezea haiba yake umri wake umbile gani ili tuweze kuamini kuwa kweli ulikwenda kwa DCI?
Shahidi: DCI anafahamika
Wakili Kibatala: Ulimwambia Jaji ulitokaje hapo mwenye hilo jengo?
Shahidi: Sikumwambia
Wakili Kibatala: Ulisema ulibadilishana namba na ACP Kingai, ulimtajia Jaji namba muhimu kama hiyo?
Shahidi: Sikumtajia
Wakili Kibatala: Jana ulioneshwa simu zako, wakati umepewa moja baada ya nyingine ulimuomba jaji ruhusa kwamba naomba nichungulie phone book ningalie namba ya Kingai ambayo mlibadilishana?
Shahidi: Sikumwambia
Wakili Kibatala: Na namba ya DCI pia ulimuomba Jaji kuangalia ili umtajie?
Shahidi: Sikumwambia
Wakili Kibatala: Mheshimiwa Jaji Sasa hivi naona ni saa 7 na utaratibu wetu ni kwamba tunapaswa kub-reak na Nina propose dakika 45 kama wenzetu hawatakuwa na pingamizi.
Wakili Kidando: Mheshimiwa Jaji hatuna pingamizi.
Jaji: Ninaahirisha shauri hili kwa dakika 45.
Mahakama imerejea baada ya mapumziko kwa ajili ya Wakili wa utetezi Peter Kibatala kuendelea kumuhoji shahidi wa 12 Luteni Denis Urio.
Jaji ameingia na mawakili wa pande zote wako tayari kuendelea.
Wakili Kibatala: Unafahamu utambulisho wa simu ni IMEI
Shahidi: Nafahamu
Wakili Kibatala: Unakumbuka uliongozwa kutoa nyaraka kwa ajili ya utambuzi
Shahidi: Ndio
Wakili Kibatala: Ilikuwa ya utambuzi wa nini nyaraka ya makabidhiano ya simu
Shahidi:Utambuzi wa simu
Wakili Kibatala: Mwambie muheshimiwa Jaji kama wakati unaaongozwa kutambua simu moja moja kwa IMEI zake
Shahidi:Nilitambua simu moja ya Tecno Camon
Wakili Kibatala: Ulisema unaishi Ngerengere
Shahidi:Ni sahihi
Wakili Kibatala: Kuna sehemu ulisema unaishi kihonda
Shahidi : Hapana
Wakili Kibatala: Tafuta sehemu ilipoandikwa Tecno Camon kwenye hii nyaraka
Shahidi: Hakuna
Wakili Kibatala: Imeandikwa nini
Shahidi:Tecno
Wakili Kibatala: Angali hii hati ya makabidhiano kwenye kielelezo hili imeandikwa unaishi wapi
Shahidi: Kihonda
Wakili Kibatala: Kuna sehemu ulimwambia muheshimiwa Jaji katika ushahidi wako unaishi Kihonda
Shahidi: Sikusema
Wakili Kibatala: Aliyemkabidhi Inspekta Swilla simu aandike IMEI nani
Shahidi: Mimi akaandika yeye
Wakili Kibatala: kwa hiyo aliandika bila wewe kuwepo
Shahidi:Nilimkabidhi akaandika nikiwepo
Wakili Kibatala: Ulimwambia Mheshimiwa Jaji kama ulishuhudia Inspekta Swilla alisaini
Shahidi:Sikusema
Wakili Kibatala: Ni sahihi kwamba nyaraka hii tunaweza kujua nini kama wewe haupo
Shahidi: Mimi sina utaalamu anajua mpelelezi
Wakili Kibatala: Ulisema unafahamu ofisini ya DCI
Shahidi: Ni sahihi
Wakili Kibatala: Ni sahihi unafahamu meza na viti vilivyoko ofisi ya DCI
Shahidi: Ni sahihi
Wakili Kibatala: Mwambie Mheshimiwa Jaji iwapo ulimwambia meza ya DCI ina rangi gani
Shahidi: Sikumwambia
Wakili Kibatala: Mwambie muheshimiwa Jaji kama ulimwambia nyuma ya kiti cha DCI kuna bendera
Shahidi: Sikumwambia
Wakili: Mwambie muheshimiwa Jaji kama ulisema ukutani kuna picha mbalimbali
Shahidi:Sikumwambia
Wakili Kibatala: Mwambie Mheshimiwa Jaji kama ulimwambia iwapo kwenye ile gorofa ya saba kuna ofisi nyingine
Shahidi: Sikumwambia
Wakili Kibatala: Pale mapokezi ulimwambia kulikuwa na askari wangapi wa zamu
Shahidi: Sikumwambia
Wakili Kibatala: Ulimwambia kama pale nje ya ofisi huwa kuna egeshwa magari
Shahidi: Sikumwambia
Wakili Kibatala: Umepokea taarifa Kutoka kwa Freeman Mbowe na Afisa wa Jeshi hawezi kuona uhalifu unatokea ulimwambia Jaji kwa nini hukumuweka chini ya ulinzi?
Shahidi: Sikumwambia
Wakili Kibatala: Unakumbuka kwa DCI ulienda baada ya tarehe 18/7,2020 au kabla
Shahidi: Sikumbuki
Wakili Kibatala: Mwambie Mheshimiwa Jaji kama una kitu kingine kitakachoonyesha ulienda kwa DCI kabla ya tarehe 18 /7,2020
Shahidi:Hakuna
Wakili Kibatala: Mtu wa kwanza kuwasiliana nae ni nani
Shahidi: Mose Lijenje
Wakili Kibatala: Tuambie mtu wa kwanza kuwasiliana nae akiwa Tunduma ni tarehe ngapi
Shahidi: Sikumbuki
Wakili Kibatala: Kutoka tarehe 18 hadi 24/7,2020 ni siku ngapi
Shahidi: Sifahamu
Wakili Kibatala: Na walikuwa hawafahamiani na Mbowe
Shahidi: Ni sahihi
Wakili Kibatala: Ni nini kilichofanya Swilla afungue kesi tarehe 18 /7,2020 siku mbili kabla ya kuwatafuta
Shahidi: Sifahamu
Wakili Kibatala: Wewe ulikula njama na Mbowe
Shahidi: Sijala njama
Wakili Kibatala: Ulimwambia Jaji kutoka kwa DCI kwenda Morogoro ulitumia gari gani
Shahidi: Sikumwambia
Wakili Kibatala: Baada ya kutoka kwa DCI ulifika nyumbani usiku
Shahidi: Ilikuwa saa kumi
Wakili Kibatala: Mwambie Jaji nani ulimkuta nani
Shahidi: Alikuwa mke wangu
Wakili Kibatala: Ulimwambia Jaji kama mwanao Careen alikuwepo
Shahidi: Wanangu wote walikuwepo
Wakili Kibatala: Unafahamu kila gari inavyoingia hoteli huwa inasajiliwa
Shahidi: Sifahamu
Wakili Kibatala: Ulimwambia Jaji kama dereva alisajili gari pale
Shahidi: Sikumwambia
Wakili Kibatala: Ulimwambia Jaji kama hoteli ya casam ni nyumba ya kawaida au gorofa
Shahidi: Sikumwambia
Wakili Kibatala: Unajua Freeman Mbowe akiwa pale casam hotel huwa anahudumiwa na mtu mmoja
Shahidi: Sifahamu
Wakili Kibatala: Ulimwambia Jaji mhudumu alivyokuwa amevaa
Shahidi: Sikumwambia
Wakili Kibatala: Ulimwambia Jaji Mbowe alivyokuwa amevaa
Wakili Kibatala: Afisa wa jeshi unafunga safari kufuata mtu usiemjua?
Shahidi: Nilikuwa namfahamu kwa kuwa tulikuwa tunawasiliana
Wakili Kibatala: Unafahamu casam hotel ina camera na ulienda na Rav 4 yako ya Silva
Shahidi: Sikwenda na gari
Wakili Kibatala: Pale casam hoteli ulilipia chochote
Shahidi: Hapana
Wakili Kibatala: Nani alikulipia
Shahidi: Freeman Mbowe
Wakili Kibatala: Na aliyekulipia usafiri
Shahidi: Freeman Mbowe
Wakili Kibatala: Ukapokea fadhila za mtu aliyekwambia mambo ya kufanya ugaidi
Shahidi: Sio fadhila
Wakili Kibatala: Baada ya kutoka kwa DCI hukwenda kumwambia mtu yoyote
Shahidi: Nlimwambia CO wangu
Wakili Kibatala: Lini
Shahidi: Tarehe 5/8/2020
Wakili Kibatala: Ulimtajia Jaji jana kuwa uliripoti kwa CO wangu wakati ukiongozwa na wakili Chavula
Shahidi: Sikumbuki
Wakili Kibatala: Pamoja na Mbowe kukwambia anapanga mambo ya kihalifu uliendelea kuwasiliana nae?
Shahidi: Niliendelea kuwasiliana nae
Wakili Kibatala: Bila kujali kama ulitumiwa au hukutumwa ulishiriki kwenye mipango ya kigaidi
Shahidi: Sikushiriki
Wakili Kibatala: Ulishiriki
Shahidi: Sikushiriki
Wakili Kibatala: Kuna sheria inayomruhusu mwanajeshi kushiriki kufanya uhalifu ili kumpata mhalifu mkuu
Shahidi: Sifahamu
Wakili Kibatala: Ungeeleweka kama ingefahamika kama unawasiliana kwa simu na Kiongozi wa waasi
Shahidi: Ni singeeleweka
Wakili Kibatala: Kwa kuwa alikuwa mhalifu wa amani
Shahidi: Ndio
Wakili Kibatala: lakini huku ukawa unawasiliana na Freeman Mbowe
Shahidi: Nilikuja kufahamu baadae
Wakili Kibatala: Wakati unawasiliana na Mbowe ulitoa taarifa kwa mtu yoyote jeshini
Shahidi: Nilikuja kutoa taarifa baadae
Wakili Kibatala: Ulimwambia Jaji ulikuwa Unamfahamu Adamoo ni jina lake la utani jeshini
Shahidi: Sikumwambia
Wakili Kibatala: Ulimwambia Jaji Lijenje jina lake maarufu ni Kakobe
Shahidi: Sikumwambia
Wakili Kibatala:. Ni ushahidi wako Lijenje wakati anatoka hadi mnakutana anaenda kufanya kazi ya ulinzi
Shahidi: Ni sahihi
Wakili Kibatala: Huyu Lijenje yuko wapi
Shahidi: Sifahamu yuko kwa Freeman Mbowe
Wakili Kibatala: Nikisema amekufa
Shahidi: Mimi sijui nilimpakia akaenda kwa Freeman Mbowe
Wakili Kibatala: Tunakubaliana hadi anatoa Morogoro alikuwa hajui mambo ya ugaidi
Shahidi: Alikuwa anaenda kufanya kazi ya ulinzi
Wakili Kibatala: Ulikutana lini na Lijenje Morogoro
Shahidi: Tarehe 21/7,2020
Wakili Kibatala: Baada ya hapo lini uliwasiliana nae tena
Shahidi: Sijawasiliana nae tena
Wakili Kibatala: Kuna nini unaweza kudhibitisha kuwa Mbowe alimwambia Lijenje wakafanye vitendo vya kigaidi
Shahidi: Hakuna
Wakili Kibatala: Kuna sehemu yoyote Mbowe aliwahi kutoa hela akampa Lijenje
Shahidi: Alituma fedha nikampa
Wakili Kibatala: Unajua maana ya utakatishaji fedha
Shahidi: Nafahamu
Wakili Kibatala: Kuna fedha Mbowe alituma ulimuhamishia moja kwa moja au ulimpa ya kwako
Shahidi: Niltoa 300, 000 nikaongezea na za kwangu nikampa
Wakili Kibatala: Ulitumiwa 500,000 na Mbowe na mfukoni ulikuwa na hela
Shahidi: Nilienda kwa wakala nikatoa 300,000 nilikuwa na hela mfukoni Sh200, 000
Wakili Kibatala: Kwahiyo ulimkata Mbowe Sh10000
Shahidi: Nilijikata mimi
Wakili Kibatala: 499, 000 uliyotoa ilitokea wapi?
Shahidi: Kama nisingekuwa na hela kwenye akaunti yangu ningepata pungufu
Wakili Kibatala: Kwa hiyo aliyekata 1000 ni nani
Shahidi: Wakala
Wakili Kibatala: 200, 000 iliyobaki kwenye simu uliitoa lini ?
Shahidi: Kimya
Wakili Kibatala: Naomba kielelezo namba 20, naomba nitafutie sehemu ukiona tuambie ulikitoa lini
Wakili Chavula: Kielelezo hiki sio cha shahidi na wakili hajajenga msingi angemuelekeza kuepusha mahakama kupotoshwa
Wakili Kibatala: Namuonyesha kwa ruhusa ya mahakama.
Shahidi. Niliitoa kabla ya tarehe 30/7,2020
Wakili Kibatala: Nitafutie hapo niambie hiyo 200, 000
Shahidi: 200, 000 hamna
Wakili Kibatala: Ulisema baadae Mbowe alikutumia Sh199, 000
Shahidi: Ni sahihi
Wakili Kibatala: Ilikuwa tarehe ngapi
Shahidi: 27 /7,2020
Wakili Kibatala: Alikutumia nani
Shahidi: Wakla
Wakili Kibatala: Ukaitoa lini
Shahidi. Tarehe 24,/7,2020
Wakili Kibatala: Ukaitoa yote
Shahidi: Hapana
Wakili Kibatala: Nitafutie hapo kwenye kielelezo
Shahidi: Haionekani.
Wakili Kibatala: Tarehe 22/7,2020 kuna muamala wa 190, 000 unakumbuka ulimtumia nani fedha
Shahidi: Sikumbuki
Wakili Kibatala: Ulisema 200, 000 haiwezi kuonekana kuna maelezo yoyote Ulitoa kwa Jaji
Shahidi: Hapana
Wakili Kibatala: Ulipompa Lijenje fedha ulimsainisha
Shahidi: Sikumsainisha yoyote
Wakili Kibatala: Kuna ujumbe wowote kwenye simu unaonysha Lijenje kupokea fedha
Shahidi: Hakuna lakini walipokea
Wakili Kibatala: Niambie ni kazi gani Lijenje alipewa majukumu gani ya kigaidi
Shahidi: Sifahamu
Wakili Kibatala: Unafahamu wapi Lijenje alikuwa akiishi Moshi
Shahidi: Sifahamu
Wakili Kibatala: Una ushahidi wa kimaandishi Ukionyesha ulimsainisha Bwire
Shahidi: Hakuna
Wakili Kibatala: Una ushahidi wa maandishi kuwa Bwire akifika kwa Freeman Mbowe
Shahidi: Hakuna
Wakili Kibatala: Bwire alipewa jukumu gani la Kigaidi?
Shahidi: Kwenda kumdhuru Sabaya
Wakili Kibatala: Alikwambia anaenda kumdhuru lini
Shahidi: Kabla ya tarehe 7/8/2020 na kabla ya tarehe 12 watakuwa Dar es Salaam
Wakili Kibatala: Bwire aliwahi kukwambia kuhusu Bastora A5340
Shahidi: Hajawahi kuniambia
Wakili Kibatala: Aliwahi kukwambia kuhusu kukaa kikao kwa ajili ya kwenda kumdhuru Sabaya
Shahidi: Hakuwahi
Wakili Kibatala: Baada ya kuwa unawasiliana na Bwire akakupa taarifa uliwahi kwenda kwa DCI
Shahidi: Nlikuwa nawasiliana na Kingai
Wakili Kibatala: Taarifa muhimu na nzito kwa nini hukumwambia Kingai
Shahidi: Nlimwambia
Wakili Kibatala: Ni sahihi uliwaambi waende wakishafanya uhalifu waje wakwambie
Shahidi: Ni sahihi
Wakili Kibatala: DCI alikwambia kama Bwire Amekamatwa
Shahidi: Hakuniambia
Wakili Kibatala: Kingai alikwambia kama Bwire amekamatwa
Shahidi: Hakuniambia
Wakili Kibatala: Ni nani alikwambia Bwire kakamatwa
Shahidi: Niliona kwenye vyombo vya habari
Wakili Kibatala: Unakumbuka uliieleza kuwasilisha simu kwa Inspekta Swilla
Shahidi: Nakumbuka
Wakili Kibatala: Unakumbuka ni karatasi ngapi ulikabidhi hapa mahakamani
Shahidi: Karatasi moja
Wakili Kibatala: Ulimwambia Mheshimiwa Jaji ni kwa nini hukutoa karatasi nyingine
Shahidi: Sikupewa ningepewa ningetoa
Wakili Kibatala: Unakumbuka ulikuwa unawasiliana na Kingai mara kwa mara
Shahidi: Sio mara kwa mara.
Wakili Kibatala: Wewe ni Luteni wa jeshi
Shahidi. Ni sahihi
Wakili Kibatala: Unafahamu base intelligence
Shahidi: Nafahamu
Wakili Kibatala: Wakati unaulizwa ulisema ufahamu namna ya kurekodi ulifafanua siku moja yoyote uliwahi kupiga simu ukaweka loudspeaker ili mtu mwingine angalau asikie
Shahidi: Mbowe hakunipigia simu
Wakili Kibatala: Hukumkabidhi Inspekta Swilla simu na chaji
Shahidi: Ni sahihi
Wakili Kibatala: Na ni ushahidi wako simu hizo ulizikabidhi zaidi ya mwaka mmoja na nusu
Shahid: Sahihi
Wakili Kibatala: Ulimfafanulia Mheshimiwa Jaji kuwa simu yako inauwezo wakutunza chaji kwa zaidi ya mwaka mmoja na nusu
Shahidi: Sikusema
Wakili Kibatala: Na hukuieleza kama simu zako nyingine kama zina uwezo wa kuitunza chaji kwa zaidi ya Mwaka mmoja na nusu
Shahidi: Ni sahihi
Wakili Kibatala: Wakati ulikabidhi Inspekta Swilla simu ilikuwa na chaji kiasi gani
Shahidi: Chini ya nusu
Wakili Kibatala: Kwa mujibu wa kanuni za jeshi mnaruhusiwa kuwa na miamala ya kifedha kama mlivyokuwa mnafanya
Shahidi: Ukiwa kazini huruhusiwi lakini mkiwa kambini mnaruhusiwa
Wakili Kibatala: Kama ofisa ulikuwa na jukumu la kutoa taarifa ya ufanyaji wa miamala ya fedha?
Shahidi: Lilikuwepo
Wakili Kibatala: Ulimwambia Jaji katika kipindi chote uliwahi kutumiwa fedha kabla ya tarehe 20/7,2020
Shahidi: Haikuwa muhimu
Wakili Kibatala: Kuna hii namba yako nyingine uliambiwa kama inaonekana kwenye ripoti ya uchunguzi
Shahidi: Sikumwambia
Wakili Kibatala: Unafahamu Bwire alishakuwa bodgurd wa kijeshi
Shahidi: Sifahamu
Wakili Kibatala: Mbowe umeanza kufahamiana nae 2003 au 2008
Shahidi: Mwaka 2008
Wakili Kibatala: Ukitoa Sabaya hao viongozi wengine ambao walitaka kudhuriwa huwajui
Shahidi: Hata Sabaya nlikuwa simjui
Wakili Kibatala: CDF ni Kiongozi wa Kimataifa au sio Kiongozi wa kitaifa
Shahidi: Ni kiongozi wa Kitaifa
Wakili Kibatala: Suala lake linaweza kushughulikiwa na jeshi au haliwezi
Shahidi: Linaweza
Wakili Kibatala: Na waziri wa Ulinzi je?
Shahidi: Ni Kiongozi wa Kitaifa
Wakili Kibatala: Suala lake haliwezi kushughulikiwa na jeshi
Shahidi: Linaweza.
Wakili Kibatala: Mheshimiwa Jaji naomba kutoa hoja. Imefika saa 11 na bado nina maswali kwa shahidi naomba kuahirisha shauri hili hadi Jumatatu tarehe 31/1/2022 kwa ajili ya kuendelea kumuhoji
Wakili Kidando: Hatuna pingamizi Mheshimiwa Jaji.
Jaji: Kufuatia muda na maombi yaliyoletwa na upande wa utetezi na kuridhiwa na upande wa mashtaka na ahirisha kesi hii hadi Jumatatu Januari 31, 2022 Shahidi unakumbushwa kuja kuendelea na ushahidi wako ambapo upande wa utetezi wataendelea kukuhoji.
